Titosy
Titosy
Toko 1
1 Paoly, mpanompon' Andrinagnahare naho Apostoly i Jesosy Kristy, hagnamafe ty finoa ty ndaty jinobon' Andrianagnahare naho ty fahafantaragne ty Tò ze magnarake ty toe-pagnahy arake an'Andrianagnahare, 2 ama ty fahatokisagne ty fiaiganagne hatra amparae, nampitamaen'Andrianagnahare, i tsy mandagnitsey, tama ty fahagola. 3 Tama ty fotoagne voatondro, le naboae tama ty hafatse i tsara natokisa'e hambarako'oy. Nataoko zay arake ty lilin'Andrianagnahare Mpamonje antika' ay. 4 o ie Titosy, anake vata'e agnate ama ty finoagne hiombognantika. Fahasoavagne naho fiadanagne avy aman' Andrianagnahare ie Rae naho i Jesosy Kristy Mpagnavotse antika. 5 Naho zo sankagne zao ro nagnengako azo a Kreta agne, le ty mba hagnalignovako ze mbe tsy vita naho ty hanondro zoke ondaty isan-tanagne arake ze fa nandiliako azo. 6 Ty zoke ondaty le hanan-kakeo vatae, valy ty ampela raike, managnanake mino voampanga ho magnaram-po ama ty raty na marengerenge. 7 Mpaia ty mpiambegne, ama ty maha mpanompo ty asan' Andrianagnahare, ty tsy fanagnankakeo. Tsy tokoe ho mafe rehake na hieboebo, tsy lia naly, ara tsy ondaty tea vola. 8 Fa ie, toko'e hampiditse antragno reke, ragne ty fanjaka. Mahay tsy hanognonan-tegna, maregne, masigne, ara le mahamben-tegna. Tokoe mitagne mafe ty hafatseze ze fa 9 nampianare'e, mba hahaia'e mampikepake ty hafa ama fampianaragne soa naho hagnitsy iareo ze mandietse aze. 10 Fa lako ty ndaty mpitologne, loho tsie iareo voa savatse. Tsy misy haja'e ty reha iareo. Mandiso fagnantenagne naho mitarike ty ndaty agne ama ty lalan-tsie iareo. 11 Paiagne ty manakagne iareo. Magnanatse ty tsy toko'e hagnanaragne iareo mba hahazoan-kareagne maloto ara le mandrava ty fianakaviagne manontolo. 12 Nisy raika tama iareo, ze lahilahy tsy magnahy iareo zay, le nirehake te ie: " Ze Kretana le mandagnitse hatra amparae, raty ara le biby mandoza, maleme fo be feo." 13 Maregne ze rinehake zay, a naho izao anaro mafe iareo mba hatanjake ama ty finoagne. 14 Ko andream-betsevetse ze talily ty Jiosy naho iareo lily ondaty ze nisintake ty fahamarignagne. 15 Ho ei ze malio, le malio ze kila raha. Fa hoe iareo ze voaloto naho tsy mino ka, le tsy malio ndre ia ndre ia. Lehe ty saigne naho ty vetsevetse ro voaloto. 16 Miantoke ty fahianan' Andrianagnahare iareo, fe ie mandietse Aze ama ty asa'e. Heje'e handika ty lily iareo. Tsy mahavita asa soa na inogne na inogne.
Toko faha 2
1 Fe ie rehe, magnambarà ze mifagnarake amy ty fampianaragne maregne. 2 O lahilahy fa nahazo taogne reo le tsy maintsy mahay miaigne, hendre, mahay mampionogne ty tegna'e, matanjake amy ty finoagne, amy ty fiteavagne, naho amy ty faharetagne. 3 Le manao hoe'izay ka o ampela fa nahazo taogne reo le toko'e haneho avao ty tegna'iareo te soa fiaignagne, fa tsy mpitsiko. Tsy toko'e hoandevoze ty divay bey iareo. Toko'e hampianatse ze soa iareo 4 mba hampiofagnagne ze ampela tanora ho tea vata'e ty valy aman'ana'e manokagne. 5 Toko'e hampianatse iareo hampionogne ty tegna'e, halio, hikarakara soa ty tokantragno, naho le hagneke ty vali'e iareo. Toko'e hanao ze raha iaby zay iareo mba tsy ho voatsikike ty saontsin'Andrianagnahare. 6 Le manahake zay, ampaherezo ze lahilahy mbe tanora reo mba hampinogne ty tegna'e. 7 Ami'ze fomba iaby le atorò ty vata'o ho modely asa soa reo; naho fa mampianatse rehe, le manehoa fahitsiagne naho fahamendrehagne. 8 Mirehafa hafatse salama naho tsy misy tahigne, mba himegnara ze manohitse ndre ia ndre ia, satria tsy managne ndre ino ndre ino raty ho rehefigne momba antika reke. 9 Ze mpanompo le toko'e hagneke ty tompo'e ami'ze kila raha iaby. Le hanao ze sitrapo'e fa tsy ndra hiale ama'e. 10 Tsy toko'e hangalangalatse iareo. Fe ie ka, le toko'e hanoro ty finoagne soa iaby iareo, mba hahamendreke ty fampianarantika momba an'Andrianagnahare mpamonjy antika amy ty lafy ze raha iaby. 11 Fe ie fa niseho tami'ty o ndaty iaby ty fahasoavan'Andrianagnahare. Mampianatse antika handietse ty fomba tsy arake 12 an'Andrianagnahare naho ty filà ty tane toy zay. Mampianatse antika hiaigne am-pionognagne, am-pahamaregnagne, naho ty arake ty lalan'Andrianagnahare ami'ze fotoagne zao zay 13 am-pandignisantika mafe ze handrambesantika ty fanantenagne soa, ty fisehoa'ty volonahe'i Andrianagnahare bey naho i Mpamonjy Jesosy Kristy. 14 Jesosy le nagnome ty tegna'e ho antika mba hagnavotse antika hiala ami'ty tsy fagnarahan-dily iaby naho handiovagne, hoey ty tegna'e, ndaty raike manokagne ze mazoto vata'e ty hanao asa soa. 15 Ambarao naho indeso am-paherezagne o raha reo. Magnomeza fahitsiagne ami'ze fahefagne iaby. Ko magneke hatao'o ndaty tsinontsinogne rehe.
Toko faha 3
1 Ampaherezo iareo hagneke i mpandily naho iareo manam-pahefagne, hagneke iareo, ho vognogne amy ty asa soa aby. 2 Ampitsiarovo iareo tsy hagnambane ndre ia ia, hisintake amy ty aly hevetse, hagnenga ty ila'e hagnorike ty lala'e, le hanoro fiambaneagne amy ty ndaty aby. 3 Fa taloha ty vatantika mbe tsy naharendre-draha le tsy nagneke. Voatarike tamy ty lalagne tsie tika le nandevoze ty filagne naho ty fahafinaretagne sambe hafa. Nivelogne tagnate ty faharatiagne naho ty fialognagne tika. Tsy niteagne zahay le tsy nifankatea tika. 4 Fa naho niboake ty hasoavam-pagnahin'Andriagnanahare hamonje antika naho ty fiteava'e ty olombelogne, 5 le tsy tamy ty asa ty fahamarignagne natontika zay, fa tamy ty famindra-po'e ro namonjea'e antika. I reke le namonje antika tamy ty alala ty fagnaliovagne ty fahaterahagne vaovao naho ty fagnavaozagne tamy ty Fagnahy Masigne. 6 Andriagnanahare nandrotsake tamantika ty Fagnahy Masigne tamy ty alala i Jesosy Kristy Mpamonje antika. 7 Nata'e zay mba, mba hovoamaregne tamy ty fitahiagne, le toe lasa mpandova tika amy ty alala ty fahatokisagne ty fiaignagne hatrampara'e. 8 Ze hafatse zay le magneva atokisagne. Teako hirehake moba ze raha zay am-patokisagne nareo, mba iareo ze matoky an'Andriagnanahare le hametsevetse hanao o asa soa ze fa nafe'e tam'iareo eo. Ze raha zay le soa ro mahasoa hoe ze ndaty abike. 9 Isintaho ty aly hevetse gege naho ty tantaran-drazagne le ty fifandieragne naho ty aly mahakasike ty lily. Ze raha zay le raha tsy misy dika'e naho tsy mahasoa. 10 Mandietse ze ndaty aby miterake fizarazaragne agnivo'areo eo, afara ty fameperagne indraike na indroe, 11 le hai'o fa ty ndaty manahake zay le nisintake tamy ty lalagne maregne le mana-kakeo naho le magnameloke ty vata'e. 12 Naho fa magnirake i Artema ndra i Tykiko ama'areo agne raho, le ko manao ela le mandehana amako à Nikopolia agne, i nanampahako hevetse handaniagne ty andro manintsigne. 13 Ko manao ela le alefaso Zena, i mpahay lily, le i Apolosy, mba tsy hisy raha hanahiragne aze iareo. 14 Ty ndatitikagne le tsy maintsy mianatse manao asa soa ze ilaigne meke mba tsy hahavy iareo tsy hamokatse. 15 Iareo aby ze mindre amako le manao veloma anareo. Magnombarà iareo ze tea antika amy ty finoagne. Lonike ho ama'areo aby ty fitahiagne.