Pilemon
Pilemon
Kurket 1
1 Paulo kimonjororiot ab Kristo Jeiso ak Timoteo tupchenyo, kisirun Pilemon tupchenyo ne kiboityot ne kiboisiei tukul. 2 Ak Apia chepkamenyo ak Arkipo asikarindet ne kiboisiei tukul, ak kaniset ne mi gongung. 3 Ngotebi miendo ak kalyet kobotok nebunu Jehova Kwandanyo ak Kiptaiyat Jeiso Kristo. 4 Amwachini Jehova nenyu kongoi, amwain eng sautikyu. 5 Agose akobo chamnyengung ak kayanet ne itinye eng Kiptaiyat Jeiso ak eng che tililen tugul. 6 Si koek yamtaetab kayanengung ne boisiei Komie eng naetab kiy age tukul ne mie mi eng Kristo Jeiso. 7 Amu kitinye boiboiyet neo ak kakaikaet eng chamiengung amu kikonyor kamunget mukulelwekab bik che tililen akobo inye ne ki tupche. 8 Noto anyun mbo ntatinye nyikanatet tukul eng Kristo si angatin akobo ne nyolu. 9 Ako amu chamyet, asomin mising ane Paulo ne kaositu ak raa kogeny ko a kimonjoriot nebo Kristo Jeiso. 10 Asomin mising akobo lakwenyu Onesmo ne kiasich eng monjororionotosiekyu. 11 Inendet nekimakotoretin eng kiy eng tai, ako raa kotoretin ak kotoreto. 12 Ne kaawegun inendet ne mukuleltanyu. 13 Ne kitameche arany ketebi tuwai si ko toreto kokereninge kotomi monjorornatosiekab lokoiwek che miach. 14 Ako mamach ayai kiy kotomo akas kit ne ibwati si mebun kimnatet ako koek eng chamengung. 15 Amu abere kiobesiege eng betusiek che matia si kobit otebi tuwai kokeny akoi. 16 Ma kou otwokin kokeny ako kakosir otwokin, tupchet ne chamat, mising ko eng ane; ako sirei netia anyun eng inye eng borto ak eng Kiptaiyat. 17 Noto anyun, ngiito ile kii akenge eng boisiet, itach anyun kou yo imuchi itacha ane. 18 Ako ngokikoyaun kiy ne ya, anan ngo kikobesenin kiy, iityo noto. 19 Anendet Paulo nekasir eng eunyu ale ayakun ako mamwaun ale itinye besentanyu, u kele inyendet nyoto. 20 Ee tupchenyu nganyorunenen boiboiyet eng kiptaiyat ibaibai mukuleldo nyu eng Kristo. 21 Kasirun amu amangu kasengung bo iit, angen che iyae agot che sirei che amwae. 22 Ako koboto choto, ichobko olinyorue amu amangu ale eng sautik kwok amuchi ketyacha anyonchok. 23 Igotin Epapra, ne kei kimonchororinik tuwai eng Kristo Jeiso. 24 Ko u noto, Aristorko, Dema ak Luka che kii kiboitinik tugul. 25 Ngotebi mientab Kiptaiyandenyo Jeiso Kristo koboto tamirmiryengwong. Amen.