1 Juan
1 Juan
Capítulo 1
1 Ca waccajac anac nennactalhescama actemacja aclheianma apto nac ma'a Apaioma jengaicamoc aliennactma ennengio'oc, ca Apaioma nac apnenquec tep nac nanec nemacja secja allanei'o lhamacjo caselha lhmanquec jam, nelluetai'a lhta njan ennenco'o m'a, nellengai'a lhta njan acuacmo jengelmanwei'o lhta njan ennenco'o m'a. 2 Coca apto njan ma'a ngiapom aliennactema ennengio'oc apnenquec nac nanec apnacja Apiapom, netamen na apuai'o jenque'e nengiesecsa ennenco'o, neluetai'a lhta apiocja apanquec ma'a ca netlheianmo mota aptemacja lhta apcaniemjaicama m'a. 3 Jai, netlheianme mota actemacja lhta nenwetai'a, nellengai'a njan, cacpota quetlhencap jengelpasmecjac ennenco'o m'a, ca ctemo nac ennenco'o jengelpasmecjo Engiapom Neten canjan Apquetca Jesucristo. 4 Nennactalhescasquec ennenco'o actemacja caselha neluetai'a cacpota ncolpaijecjac apualho'oc lhemec ennenco'o. 5 Nelleltennasquec ennenco'o ania'a actemacja lhta jengelleltennascama Jesucristo, Engiapom Neten nac apto malha aponmatema, mamma lhnac na ienactesacja la lhma m'a. 6 Ca netlhenalhco la engancawec ennenco'o nengellelto nelpasmecja Engiapom Neten, coca nelloca njan malha ienactesacja lhma, nenmopuana ania'a coca njan m'a. 7 Coca nellawa la atsac'eja lhma malha aptonac Engiapom Neten, nentanquec nelpasmecja m'a, canjan Apquetca Jesús ema apancoc allalhnascama engellualho'oc caselha ncollatsecama. 8 Ca netlhenalhco la engancawec ennenco'o metca neltemenweiacmo lhma, nenmopuana ania'a m'a, nennactewaselhcawec na ennenco'o m'a, 9 coca netlheno la mongeliamolhma m'a, jengenmecjac jata njan tacja m'a Engiapom Neten, jengellalhnasquesec jata njan mongeliamolhma engellualho'oc ma'a. 10 Nenmopuana ania'a netlheno la metca neltemenweiacmo lhma, malha njan neliascacmec ma'a Engiapom Neten anac apaioma, canjan nelleltanquec apmopuana ania'a m'a.
Capítulo 2
1 Quetlhencap eietcac, asnaqtalhescaso nac waccajac anac asquelleltemacja etnancoc cacpota mellananquec caselha ncollatsecama, ca apquelan'o la ncolatsecama lhema apjapac jam, Jesucristo toca engio'oc ma'a napaqtec Apiapom. 2 Apcaiancawe lhtoca apmatnamo jengeliaqmoiecja ennenco'o nengellelto mangeliamolhma cacpota njan aplhamacjo meliamolhma lhmanquec jam cacpota jengenmecjoc mocjom tacja Engiapom Neten. 3 Nengelliawec ennenco'o nengelpasmecjo Engiapom Neten ncanec nengelleliejecjawe mota jenganemacja apancoc ma'a, 4 coca apto la enenlhet meliejecjo m'a, acjemo moc apatong coca aplhenammacpo panquec apto apasmecja m'a. 5 Coca apuanquec enenlhet eliejecjoc apaioma nac ma'a aniem'o apuanenquescama jengamelaiam anac apcaicamoc ma'a Engiapom Neten, aniem'o njan apasmecja Jesucristo. 6 Enenlhet apto la aplhenammacpo panquec apto apasmecja Jesucristo, ncaimelhquec na eieploc amai apancoc ma'a. 7 Quetlhencap elialheng'a, jawe alhnancoc jenganemacja asqueleltennaso nac, apquellengai'a lhta secjec anque quetlhencap apquetlhewai'o lhta ania'a actacmanma, asqueltawec coca altacjenwescacjac colhuawe nac alheianma 8 cacpota atnesquesancoc malha alhnancoc la'a. Apqueliejecjawe lhta njan Cristo jenganemacja nac ma'a, apquelleliejecjawec na quetlhencap nenwanlha nac ma'a, ntacmelcasawec na acmasco malha ienactescama lhma nac acuacmo aquiawenco atsai'a lhma. 9 Enenlhet apto la aplhenammacpo apanquec aploma aisecsec atsac'ejlha lhma coca aptaqnewacquec engialheng la'a, apmopuana ania'a m'a, aploca niecje aisecsec ienactesacja lhma. 10 Enenlhet apto la apcamelaiam engialheng la'a, coca apto njan enenlhet aploma aisecsec atsac'elha lhma, metuasoc na po'oc. 11 Coca apto la aptacnoncoma engialheng, malha metca apaqto'oc la m'a aploca njan malha ienactesacja lhma la'a, meijoc na apmancolha la m'a. 12 Quetlhencap eietcac, asnactalhescasquec waccajac anac jengque'e asquellanemacja etnangcoc quetlhengcap ncanec apquellelto Engiapom Neten apquenemolhema, apquenmecjo lhta njan mocjom tacja m'a necsa meliamolhma lhta aniem'o njan Jesucristo. 13 Asnactalhescasquec na quetlhencap apiapma'ac anac ncanec apquelliawec ma'a apnemo lhnac nanec tep nac nanec alanemmalhco secja lhmanquec jam. Asnactalhescasquec na m'a quetlhencap apquetco'oc ncanec apqueltemesquesentanie coneng maniamolhma nquen anac. 14 Asnactalhescasque lhta njan waccajac anac quetlhencap eietcac ncanec apquelliawec Engiapom, asnactalhescasque lhta njan quetlhencap apiapma'ac ncanec apquelliawec apnemo lhnac nanec tep nac nanec ma'a alanemmalhco secja lhmanquec jam, asnactalhescasquec na quetlhencap apquetco'oc ncanec apquenmaianquec tacja Engiapom Neten anac apaioma, apmelleijac apancawec najan, apqueltemesquesentaniec coneng maniamolhma nquen anac. 15 Mellamelemmanquec ncollatsecama nac, moleccasquesama nquec na apualho'oc ncoietemo nac nentemacja. Apto la enenlhet apcamelaiam ncolatsecama, mengiamelacmoc na Engiapom anac. 16 Caselha ncollatsecama nac jawe alleniemacja m'a Engiapom Neten, coca maniamolhma nac nquelleniemai'ac ma'a, actepquescama aquiasponcomacja nac enwalhoc angellanac caselha ncollatsecama, nqueltawec angiasepquescamo nenwetacja la'a, ncacjama njan enwalhoc aniem'o nquescama netsecama. 17 Coca quetse ncaimelhca ncomasquenwomoc jata m'a lhamacjo caselha ncollatsecama nac, ncomasquenwomoc jata njan ma'a aliasponcomacja nac engellualho'oc, coca mancomasquenwomec ma'a apto la enenlhet apquelanai'a apqueltemacja etnec Engiapom Neten, eloca ta njan mancotnenwaianlha nnelha m'a. 18 Quetlhencap eietcac, quetse ncaimelhcac actemonwaianlha nnelha acnem lhma nquec jam, apquellengai'ac quetlhencap aplheiam apto apcammelhma Cristo, colhua coca apqueliepjonwac aplhamacma apquellamelhma Cristo, ca ncanec nengelliawec ennenco'o ncanquetuaiacmec actemonwanlha nnelha acnem alhmanquec jam. 19 Apacjanquec nengiesecsa ennenco'o m'a apquellammelhmacja nac, coca jengeliengiecjec lhta njan ncanec mamma mota jengelpasmoma m'a. Lhta jengelpasmacjo la ennenco'o m'a, manjengeliengiecje lhta njan ma'a, neluetai'a coca iocjalhmec anquec metca jengelpasmoma m'a. 20 Quetlhencap coca malha apqueliancanma la apietsecso'ocs aniem'o m'a apto apiamolhma apanque nac, ca ncanec apquelliawec lhamacjo caselha. 1 21 Asnactalhescasquec co'o waccajac anac ncanec apquelliawec quetlhencap acto jawe ngiapac anque nac, apquelliawec na acmowana ania'a nac jawe aniem'o m'a acto jawe ngiapac anque nac. 22 Se lha enenlhet aptema la apmopuana ania'a ie, je? Wanlha enenlhet aplheianma la Jesús jawe apto apcapascama Engiapom Neten, apto njan ma'a apcammelhma Cristo ncanec aptacnewacquec Apiapom canjan Apquetca. 23 Enenlhet apto la aptacnoncoma Apquetca nac ma'a, aptacnewacquec na m'a Apiapom anac, coca apto la njan enenlhet apmama tacja Apquetca nac ma'a, apmec na tacja Apiapom anac ma'a. 24 Quetlhencap elialheng'a, meluancamamonquec ania'a apquellengai'a secjec anque lhta, ca acnanco la ania'a apqatco'oc anac quetlhencap ma'a, apquelpasmacjec Apquetca canjan Apiapom ma'a, 25 ncolhnancoc jata njan aliennactema apnengio'oc mancotnenwaianlha nnelha apenescamo lhta aplheianma apquelleltennasecamoc. 26 Asnactalhescasquec waccajac anac asqueltemo ellajoc ma'a jengetlhecmoscama nac apquenmajai'a na mota eliennenquesca, 27 coca mancaimommalhcac etlhecmoscac ma'a ncanec apnanquec quetlhencap Espiritu apquellaicamo lhta Jesucristo, jata etlhecmosancoc lhamacjo actemacja caselha m'a, acto jawengiapac anquec, metca acmowana ania'a njan, apquetlhecmoscamo lhta njan ma'a etlhenquesec na apquelpasmecja Cristo. 28 Quetlhencap eietcac, etlhenques jata apquelpasmecja Cristo cacpota apuanca'ac na eltetescamoc metca apquenmancasecama, metca apquellai'a njan apuactamo ta m'a. 29 Apquelliawec quetlhencap Jesucristo apto apeiwomo, lhamacjo enenlhet apquenmopuanca'a nac ellanancoc caselha acpeiwomo, aniem'o coca njan ma'a Jesucristo.
1Cuando se elegía a una persona para una tarea especial, se rociaba su cabeza con aceite para consagrarlo
Capítulo 3
1 Awanjec anquec jengamelaiam Engiapom Neten ca jengeltemesquescamo nac apquetcac. Jai, jawe ngiapac anquec nengellelto apquetcac ennenco'o m'a, coca manjengenmancoc tacja m'a apquellelto nac meliamolhma ncanec menmancoc na tacja Engiapom Neten. 2 Quetlhencap elialheng'a asquellamelaiam, colhua coca nentaiancoc Engiapom Neten apquetcac. Mangeliojoc aquiocjo nquec la'a, wanlha necja atquesec acmac'o ta angeluetac caselha m'a emaniaie' nac, coca wanlha nengelliawec angennecjoc jata Jesucristo apuactamo ta m'a, apiocjo panquec jata njan angeluetac ma'a. 3 Coca aljalhnecama engellualho'oc anac jengeltemesquescactanie mota nelalhnai'o cacpota angennecjoc Jesucristo apto apcalhnai'o njan ma'a. 4 Coca apquellelto nac apquellanecamoc caselha ncollatsecama apquelieca'ac ma'a jenganemacja apancoc anac Engiapom Neten, ¡mancolatseca nquec ma'a apquellanecamoc! 5 Apquelliawec quetlhencap Jesucristo apuai'o lhta jenque'e cacpota jengeljatsoscasancoc mangeliamolhma ennenco'o, mamma lhta niecje aptemenweiacmo la lhma m'a, 6 ca nqueniemai'ac na m'a aplhamacjo apquellelto la apquelpasmecja m'a mellanenco mota lhamacjo cnem ncollatsecama, coca apquellelto nac apquellanecamoc ncollatsecama jawe apquelpasmecja m'a. 7 Quetlhencap eietcac, mellanco nquec eliennenquescac ma'a enenlhet'awoc anac moc apatno'oc, ellanjo toca secje apqueltemacja la m'a cacpota eliojoc apqueltemacja m'a. Enenlhet apto la apquelanai'a mota caselha acpeiwomo, coca apto apeiwomo m'a malha Jesucristo, 8 coca apto la enenlhet apquelanai'a mota ncolatsecama, aniem'o njan awesque queliacjamei'o apasmecja m'a, wanlha mota alanei'o ncolatsecama m'a ampai'o lhnac nanec tep nac nanec alanemmalhco secja lhmanquec jam, netamen na m'a apuai'o njan Engiapom Neten apquetca cacpota etuasquesec na actemacja alanai'a mota lhamacjo caselha ncolatsecama m'a. 9 Engiapom Neten la apquetcac mellanenco mota ncollatsecama ncanec nnaianquec apualho'oc caselha nepiawa' nac actemacja apquellaniemjaicama aniem'o m'a Engiapom Neten, ca nqueniemai'ac na m'a metlhenquesec apquellanecamoc ncollatsecama. 10 ¿Co la actemacja aniojo' apto la Engiapom Neten apquetca, canjan atca la queliacjamei'o awesque, je? Ellanama ta secje' apquellaniemjaicama m'a, ca melan'o la caselha altacmelo m'a, mengiamelacmoc na engialheng la'a, jawe Engiapom Neten apquetca m'a.
Actemacja nellamelammalhca
11
Ampaio lhta secjec anquec aptaicamoc meliasqueiam quetlhencap, njeclhe mota ania'a apquellengai'a actemacja apquellamelaiam po'oc,
12
metnamonquec na actemacja lhnac nanec Caín, apto meijamolhma apanquec ma'a acuacmo apqajecjo lhnac nanec apialheng apanquec ma'a aniem'o apquelanai'a mota ncollatsecama, melhnoc ma'a aptemacja apialheng wanlha lhnac nane mota apquelanai'a caselha altacmelo m'a.
13
Quetlhencap elialheng'a, jata njan eltacnewac ma'a enenlhet'awoc anac meliamolhma, coca molpelapquesanquec quetlhencap ma'a acuo'o la apqueltacnommap.
14
Ennenco'o lhennenga nellomaca lhta malha neletsepma, colhua coca nentaicocjec malha enjalhnanco'oc ncanec nellamelacmec engelialheng'a, enenlhet mengiamelaiam la po'oc, malha apquetsepma m'a.
15
Enenlhet apto aptacnoncoma engialheng, coca malha ntequioma ngiapom ma'a, mancoiennac na aquiennactema apnengiec mancotnenwaianlha nnelha m'a aniem'o aptema ntequioma ngiapom.
16
Jengeluetascasque lhta Jesús co la nentemacja angamelemmac emmo'oc necsa apquetsepma lhta m'a jengianmoma ennenco'o, ntasec na ennenco'o angancojo angetsepoc nengiaqmoiecja la engialheng la'a.
17
Nengamelaiam anac nqueniem'ac ma'a Engiapom Neten.
Lhema enenlhet la nema apquetsecama etac engialheng aimommalhca la nema acpasmoma, mancoca epasmac ma'a, mancoiennac na sonquec apcamelaiam po'oc ma'a.
18
Enenlhet aquietno la apcamelaiam po'oc, jawe wanlha mota moc apatong, apasmec coca nja mota ma'a.
19
Ca nelpasmo la mota emmo'oc, ncotlheianwacjoc jata mota engellualho'oc nengellelto nelpasmecja Engiapom Neten, enwanca'ac na angeltetescacjoc napaqtec ma'a metca nellai'a njan,
20
niecje alquetamecama nac enwalho'oc atlhenquesquecjo nengellanecamoc caselha ncollatsecama napaqtec Engiapom Neten, ncacjoc coca jengelpasmoc jata apanquec ma'a ncanec apto nema apiamo, neten apanque na nema apmopuana mancolhoc ma'a alquetamecama nac engellualho'oc.
21
Coca alquetamecama nac engellualho'oc manjengetlhenquesquecjo la nellanecamoc caselha ncollatsecama, netamen enwanca'a angeltetescacjac metca nellai'a napaqtec Engiapom Neten ma'a, jawe ta nja ngiapac ncotnec
22
jengellancoc caselha nenmalhnencolha la m'a ncanec nelleliejecjawe mota m'a jenganemacja apancoc, nellaneianquec na acleclemelha la apualhoc ma'a.
23
Apqueltemawec na Engiapom Neten mangeliascamec apquetca Jesucirsto, angellamelalhcoc na nengiesecsa nac ennenco'o.
24
Enenlhet apquellelto la apquelleliejecjoc jenganemacja Engiapom Neten, apquelpasmecja mota m'a. Nengelliawec na ennenco'o apnec engellualhoc Engiapom Neten aniem'o Espiritu apancoc jengellaicamo lhta.
Capítulo 4
Engiapom Neten apualhoc anac canjan au'alhoc anmelhmacja nac Cristo
1
Quetlhencap elialheng'a asquellamelaiam, menmamonquec tacja aptacja la aplhenammacpo panquec la enenlhet apietnema Engiapom Neten Apualhoc ma'a, coca ellanama ta njan secjec ma'a aptacja la aplhenquescama m'a cacpota eliojoc apqueniemo m'a Engiapon Neten ncanec aplhaniec lhmanquec jam apquetsecama ania'a apquenmopuanca ania'a.
2
Asmac'ac aleltennacsec quetlhencap cacpota eliojoc apietnema la Engiapom Neten apualhoc. Coca enenlhet apto la mei'asqueiam Jesucristo aptaiecjo lhta enenlhet apanque, apuai'o lhta njan nalhepop anac, coca enenlhet ma'a apietnema Engiapom Neten Apualhoc.
3
Coca enenlhet la apiasqueiam ma'a, meietnac Engiapom Neten apualhoc ma'a, nietnec coca au'alhoc apualhoc ma'a anmelhmacja nac Cristo. Apquellengai'a lhta quetlhencap
ma'a ncowac jata jenque'e nalhepop anac au'alhoc anac ma'a, nwai'ac coca njan ma'a.
4
Quetlhencap eietcac, apquelpasmecjec Engiapom Neten quetlhencap, apto neten anquec aquietnema apmopuana mancolhnoc ma'a anmelhmacja nac ma'a, ca ncanec apuanca'ac quetlhencap eltemescasentac coneng apquetsecama ania'a nac apquenmopuanca ania'a.
5
Wanlha mota apquetlheianma ncollatsecama aniem'o apquelpasmecja anmelhmacja nac ma'a, apquellailhawe mota enenlhet anac ma'a apquellelto la njan melleliejecjo Engiapom Neten.
6
Ennenco'o coca nengellelto nelpasmecja Engiapom Neten, jengellailhawe mota m'a apquellelto la apquelleliejecjo m'a, coca manconmac'ac jengellailhoc ma'a apquellelto la apquelleliejecjo anmelhmacja nac ma'a. Netamen enwanca'ac angeluetac enenlhet apto la apietnema Apualhoc acto jawe ngiapac anque ngiapom, nlhoca la njan enenlhet apto la apietnema au'alhoc jengiennenquescama nquen.
Nenga melaiam nqueniemai'ac ma'a Engiapom Neten
7
Quetlhencap elialheng'a asquellamelaiam, enwanca'ac angellamelalhco mota nengiesecsa ennenco'o ncanec nengamelaiam anac nqueniemai'ac ma'a Engiapom Neten. Enenlhet apto la apcamelaiam amota po'oc apto njan Engiapom Neten apquetca apqueliejecjo,
8
coca apto la meniamelaiam po'oc meliajacjoc na Engiapom Neten ncanec Engiapom Neten apto jengamelaiam ngiapom.
9
Awanjec anquec jengellamelaiam Engiapom Neten ca apcapascamo lhta apquetca wanlha apanquec lhema nalhepop anac cacpota jengellancoc aliennactema ennengio'oc,
10
coca acto aquiawai'a nquec jengeluetasquescama jengamelaiam ma'a. Ma lhta ennenco'o angellamelaiacmoc ma'a, aptema apanquec coca jengellamelaiam ma'a Engiapom Neten, apcapascamo lhta njan apquetca cacpota engietsepoc jengiaqmoiecja aniem'o lhta mongeliamolhma engancawec ennenco'o.
11
¡Elialheng'a asquellamelaiam, aquiawai'a nquec jengellamelaiam Engiapom Neten, ncaimelhquec na angellamelalhcoc ennenco'o!
12
Mamma enenlhet apuetai'o Engiapom Neten, coca nengellamelacmo la m'a, eloca ta njan ma'a nengiesecsa ennenco'o, ncowenque pancoc jata nentaicamoc nengeliamolhma aniem'o m'a jengamelaiam anac.
13
Nelliawec ennenco'o nengelpasmecja engancawec Engiapom Neten ncanec jengellaianque lhta Apualhoc apanque,
14
nelliawec na ennenco'o Engiapom apcapascamo lhta apquetca cacpota eluonquesec tep aplhamacjo enenlhet'awoc, jawe ngiapac anquec neluetai'o lhta ennenco'o m'a, nelpaiescamo mota njan apuesai'a m'a.
15
Apto la enenlhet mei'asqueiam Jesús apto Engiapom Neten apquetca, aptec na nengaqtec anquec apasmecja mota m'a.
16
Neluetai'a lhta mota ennenco'o jengamelaiam Engiapom Neten, mongeliasqueiacmo lhta njan jengellamelaiam ma'a ncanec apto jengamelaiam ngiapom. Enenlhet apto la apcamelaiam amota po'oc, apto njan nengaqtec anquec apasmecja Engiapom Neten ma'a.
17
Ncowenque pancoc jata nentaicamoc nengeliamolhma aniem'o nengellamelaiam emmo'oc cacpota njan neluanecamoc aptemacja lhta mota Jesucristo jenque'e nalhepop anac, netamen jata m'a mancoitec jata nellai'a acuo'o ta acnem nemacja jengeliecpelquemo.
18
Enenlhet aquietno la apsaujonwaiacmo nengamelaiam, mamma njan apcaiacja m'a ncanec nengamelaiam anac ntepcasquec apualhoc ma'a apcaiacja la'a, coca aquietno la apcai'a, aniem'o mesaujonwacmo aquietnema apcamelaiam.
19
Nengellamelacmec ennenco'o Engiapom Neten ncanec apmanie panquec jengellamelaiam ma'a.
20
Apto la enenlhet aplheianma mota apcamelaiam Engiapom Neten, coca aptacnewacque mota
engialheng la'a, apmopuana ania'a njan ma'a enenlhet anac. Apto la mengiamelaiam engialheng apuetai'a mota lhamacjo acnem, mengiamelacmoc na Engiapom Neten ma'a meta'ac na m'a.
21
Jengellaianque lhta lhema apaioma Jesucristo, lhta aptemac jeng: "Enenlhet apto la apcamelaiam Engiapom Neten, ncaimelhquec na engiamelemmac engialheng la'a"
Capítulo 5
Mongiasqueiam actemesquesenta coneng ma'a maniamolhma
1
Apquellelto nac meliasqueiam Jesus apto njan Mesías coca apqueluesai'a m'a Engiapom Neten apquetcac. Apquellamelaiacmo la Engiapom, apquellamelacmec na apquetcac la m'a.
2
Nellamelacmo la m'a apquetcac anac ma'a Engiapom Neten, nellamelacmec na m'a Engiapom Neten, nelleliajacjawec na jenganemacja apanco nac ma'a.
3
Jai, acto la enenlhet apcamelaiam Engiapom Neten, apqueliajacjawec na jenganemacja apancoc anac ma'a, nquelheiwac'awe na jenganemacja apancoc anac ma'a.
4
Apto la enenlhet Engiapom Neten apquetca, aptemescasantec na coneng maniamolhma nac aniem'o aquietnema njan meiasqueiam ma'a.
5
Apto la njan meiasqueiam Jesus apto Engiapom Neten apquetca, aptemescasantec na coneng maniamolhma nac.
6
Necsa apuai'a lhta Jesucristo jenque'e nalhepop anac nietnenque lhta janet caselha apuai'o m'a acuetammalhca, iemmen canjan ema, jawe wanlha iemmen, canjan ema'. Espiritu lhta aplheianma m'a apto njan apuetaianco m'a, apto njan metca aptaicama apmopuana ania'a m'a.
7
Apcanet'olhema lhtoca njan apqueluetaianco m'a, apquetlheianma njan,
8
acno nac ma'a Espiritu, iemmen canjan ema, acnemo mo'oc alhta njan apualho'oc ma'a apquetlheianma.
9
Ca aplhamo la njan enenlhet apquetlheianma lhema ania'a, nenmanquec na tacja ennenco'o m'a, coca acto njan neten anquec actacmanma m'a angenmancoc tacja aptemacja aplheianmo Engiapom Neten apquetca apanque'.
10
Apto la enenlhet mei'asqueiam Engiapom Neten apquetca, apmec na tacja aptemacja aplheianma Engiapom Neten, coca apiascacmo la enenlhet, apqueltanquec na apmopuana ania'a Engiapom Neten.
11
Aplheianme lhta Engiapom Neten jengellaiancoc aliennactema ennengio'oc mancotnenwaianlha nnelha aniem'o m'a apquetca apancoie'.
12
Apto la enenlhet apmama tacja apuesai'a apquetca, nietnec na aquiennactema apnengiec ma'a mancotnenwaianlha nnelha, coca apto la njan memama tacja apquetca nac ma'a, mang na ncoietnac aquiennactema apnengiec.
13
Jai', lhamacjo actemacja asnactalhesquescama nac quetlhencap apquellelto nac meliasqueiam Engiapom Neten apquetca, cacpota eliamwomjoc acnaicamoc aliennactema apnengio'oc mancotnenwaianlha nnelha.
14
Mancoltama ta engellualho'oc napaqtec Engiapom Neten ncanec nelliawec jengellancoc jata nelmalhno la apmac'acja la jengellancoc aclequelha la njan apualhoc ma'a,
15
nelliawec apcailhawe mota nelelmalhnoncoma m'a, jengellancoc jata njan caselha actacja la nelelmalhnecama.
16
Jata apquelueto ta lhema engialheng apquelanai'a ncolatsecama ncotno nac jengaqjecmo, elelmalhnesques jata Engiapom Neten cacpota engiancoc aquiennactema apnengiec, coca nietnec na ncolatsecama acmowana jengaqjec, melelmalhnesquesanquec ma'a apquelueto ta apquelano la lhema engialheng.
17
Lhamacjo ncolatsecama nac alelto aluesai'a maniamolhma, coca nietnec ncolatsecama ncotno jengaqjemo.
18
Nelliawec ennenco'o mongelaneianco lhamacjo acnem ncolatsecama apquellelto nac Engiapom Neten apquetcac, ncanec Engiapom Neten apquetca nac apqueltacmelquescama m'a, mancawanquec na nconactewacsec maniamolhma nquen.
19
Nengelliawec na ennenco'o nengellelto Engiapom Neten apquennemolhema, coca apquellelto nac melleliejecjoc malha acnactetema m'a maniamolhma nquen anac.
20
Nengelliawec na apuai'o lhta Engiapom Neten apquetca, jengellanconwai'o lhta njan acnema nengelliamo cacpota angeliecpelcanwomoc ma'a apto jawe ngiapac anque nac ngiapom, nelpasmecjec na ennenco'o m'a aniem'o apquetca Jesucristo. Coca apto Engiapom Neten, apto nja ngiapom jawe ngiapac anque, jengaicamoc na aquiennactema ennengiec ncotnenwaianlha nnelha.
21
Eietcac apquetco'oc, melpasenwom anquec caselha aquiocja alanemmalhca nac.