1 Tesalonicenses
1 Tesalonicenses
Capítulo 1
1 Co'o Pablo, Silvano, cacpota njan Timoteo, nquetlhenquec engellualhoc engelialheng'a apcacjanco jamTesalonica, apquellelto apquelpasmecja Engiapom Neten apto engiapma'ac cacpota njan apuesque Jesucristo. Nengelleltawec na Engiapom Neten ewaiwesentac nengamelaiam, metca actaicama enwalhoc tacjaplhet'oc quetlhencap. 2 3 Nelelmalhnescasque mota ennenco'o Engiapom Neten apto engeliapma'ac cacpota elpasmoc quetlhencap ma'a, nentanquec na gracias ma'a. Nquetlheianwecje mota enwalho'oc acnaicamo lhta aliennactema meliasqueiam quetlhencap nqueltemesquescanque lhta aquiawai'a apquenmacmecama, apquellasennaianca lhta njan po'oc aquieplomo apquellamelaiacmo, nnaianque lhta njan alleljalhnecamoc apualho'oc ncowac ma'a apquelpasmoma apuesque engancoc Jesucristo. 4 Quetlhencap elialheng'a, apquellamelaiam Engiapom Neten, nelliawec ennenco'o apto njan apqueliequiescama m'a. 5 Jawe wanlha mo'oc engatno'oc alhta nentancoc necsa neleltenascama lhta ania'a actacmanma apiesecsec quetlhencap jam, nellan'a lhta njan caselha jempelapquescama aniemo apmopuana Engiapom Neten cacpota njan Apualhoc apanque nac ma'a. Ca altemesquescamo lhta iocjalhmec anque apqueluetai'a caselha aniem'o ania'a actacmanma lhta nelleltennascama quetlhencap ma'a. Jai, apquelliawec quetlhencap wanlha lhta mota nengelleltemo ncoltacmelec apcajaicamoc necsa nengacjenweiam lhta jam. 6 Apquetlhenquescanquec quetlhencap jengeluanecamo nentaiancolha ennenco'o cacpota njan aptemacja lhta Apuesque, awanje lhta niecje apquellengaianco aquientalhnema quetlhencap jam, ncacjo lhtoca apquenmaianquec tacja ania'a actacmanma aquieplomo alpaijecja apualho'oc aniem'o Engiapom Neten Apualhoc ma'a. 7 Netamen apqueluaneianco lhta njan aptaiancolha quetlhencap aplhamacjo apquellelto nac meliasqueiam ma'a aquieto iocjalhma' Macedonia cacpota njan Acaya. 8 Apquelpaiesque lhta njan ania'a actacmanma quetlhencap ma'a aquieto Macedonia canjan Acaya, lhamacjo aiempec nnec aliojo quetlhencap aquietnema meliasqueiam Engiapom Neten, mangcaimelhcac ennenco'o angetlhenama apqueluesai'a quetlhencap ma'a. 9 Apquetlheianma apancawec na lhta njan quetlhencap ma'a jengenmaianco tacja actacmanma necsa neluaiam alhta jam, ca apqueliengiejo lhna lhta njan caselha aquiocja la alanemmalhca, apquelietasquesecjo lhna lhta njan apualho'oc Engiapom Neten apto mengietsepma, apto njan jawe ngiapac anque ngiapom ma'a. Ca apquellempaiacja lhna lhta njan apquellasennaicama Engiapom Neten ma'a, 10 apquelleljalhneianca lhna lhta njan Apquetca Jesus apto lhta njan aplhatecjanweiam apiesecsec apquenmasquenwaiacmo engielhiemoc ma'a neten ewatamoc mocjom jenque'e cacpota jengeluonquesec tep ennenco'o necsa acuai'a ta apiacmoncasecja apqueltemacja ncollatsecama enenlhet'awoc jalhmanquec jam.
Capítulo 2
Aclheianwecjo apualhoc Pablo aptemo amaica'a m'a Tesalónica
1
2
Elialheng'a, apquellengai'ac na lhta quetlhencap ania'a neltacnommalhco cacpota njan nemo jennactewascamo m'a natemma Filipos, coca jengellaianque lhta Engiapom Neten nenmacmosac'a cacpota angelpaiacsec ania'a actacmanma apiesecsec anac quetlhencap jam, niecje lhta apentalhnema jengellammelhma jam, ncacjoc coca nellaneianquec actacmanma nenmacmecama, apqueluetai'a lhta quetlhencap jam.
3
Netlhecmoseianque lhta mota njan acto jawengiapac anquec, ma lhta njan ncolhnaiancoc engellualho'oc malha alposcama la caselha cacpota njan manconmajai'ac angeliennenquesec.
4
Engiapom Neten coca jengelleltemesquescama cacpota ampaiacsec ania'a actacmanma jam apiesecsec anac, montengiaianco' ennenco'o ncoleccasama apualho'oc enenlhet'awoc nentaianquelha, wanlha coca nentengiaiancoc ma'a ncoleccasama apualhoc Engiapom Neten apto apiamo enwalho'oc.
5
Apqueluetai'a lhta nentaianquelha metca nellannenwaiam actacmanma nelpaqmeiasma angellanjoc quetlhencap, ma lhta njan antengiaiancoc pataccom apanco'oc la quetlhencap, apiawec coca Engiapom Neten acto jawe ngiapac anquec astacja nac alheianma.
6
Ma lhta njan antengiaiancoc jengeltemesquesec quetlhencap canjan po'oc enenlhet la'a neten engancawec ennenco'o.
7
Enwanca'a nlho lhta niecje angeliatancoc jengelleliejecjoc ennenco'o quetlhencap, ncanec nengellelto apostoles jengellapascama Cristo, coca ma lhta ntaiancoc ma'a, malha alhta nentaiancoc actaiancolhna nac nematcac. Neltacmelquescanque lhta mota malha actona nquen altacmelquescama nac atcac.
8
Awanjec anque lhta nellamelaiam
quetlhencap, nellanconwaiacmo ania'a actacmanma, niecje lhta atlhenquescama angelletsepoc aniem'o jengellasennaicama quetlhencap.¡Ca m'a awanjec anque lhta acnaicamoc nengellamelaiam quetlhencap ma'a!
9
Nquetlheianwacjawec quelha apualho'oc quetlhencap aquiawai'a nenmacmecama acuaiacmo lhta neliampei'o lhamacjo acnem apiesecsec anac quetlhencap jam, necja emmeio'oc alhtoca nelpaiescama ania'a aplhenammap Engiapom Neten, necja emmeioc alhtoca njan aquiawai'a nenmacmecama cacpota mancolientelhec apualho'oc quetlhencap jengellanco nlho lhamacjo caselha alaimelhquelha la'a ennenco'o.
10
Apqueluetai'a lhta quetlhencap canjan Engiapom Neten actacmanma acpeiwomo nentaiancolha apiesecsec quetlhencap meliasqueiam anac, nellanenque lhta njan caselha acpeiwomo, mancollapuanque lhta njan jengetlhenec enenlhet.
11
Apqueluetai'a lhta njan neliatecjo quetlhencap canjan nelpaiescaiacmo apualho'oc moclhem'a quetlhencap malha apto nac lhema apiapom nematca aptacmelquescaiam la apualhoc apquetca, nengelleltennaso lhta njan etnancoc aptaiancolha acpeiwomo ncanec apquellelto Engiapom Neten apquetcac quetlhencap, apto lhta njan apquellawecama cacpota elpasenwomoc actemacja la awesque apmopuana m 'a.
12
nelienlhanmeiangquec eltejec apqueliamolhma' ca apqueltamacpelha eltejec Engiapom Neten apquetcac ma'a, ncanec apquelelto njan apanco'oc reino gloria.
13
Jai, nengelleltanque mota ennenco'o gracias Engiapom Neten aniem'o apquellengai'a, apquenmaicamoc na tacja ania'a aplhenammap Engiapom Neten netsauquescama lhta jam. Apquelianweiacme lhta ania'a actacmanma jawe aniemai'o enenlhet apanque, coca aniemai'o m'a Engiapom Neten. Jai, jawe ngiapac anquec ma'a aniemai'o Engiapom Neten ania'a actacmanma nac, alentepquesquescamo lhta njan aquiawai'a caselha altacmelo apquellelto lhta meliasqueiam.
14
Apaiomolhema apancawe lhta njan apquenmenlhenaicama quetlhencap ma'a, lhta njan ntemac ma'a apquellelto meliasquieam Engiapom Neten aquieto m'a Judea aniem'o meliasqueiam Cristo, apaiomo lhema apancawe lhta judíos apquenmenlhenaicama m'a.
15
Ca judios alhta m'a apquennapmo lhta njan apuesque Jesús ma'a, apmanie Jesús apquennapeianco lhta njan apquelletsecama ania'a nnenga, ennenco'o lhta njan jengellentepquescamo apquellawacja apanque apiau'acja temma. Ma lhta njan ncolleclemoc apualhoc Engiapom neten, wanlha lhta njan aptengiaicamoc apquellammelhma.
16
Ma lhta njan jengellaiancojo angelpaiacsec ania'a actacmanma nenwoncasemmalhca tep apiesecsec metnanco judíos, coca m'a niaweianque lhta njan meliamolhma m'a, coca ncowac jata njan aquiawai'a nema aliaqmoncasquesecja apqueltemacja ncollatsecama ma'a.
Apmajai'a etnec amaica'a mocjom Pablo aquieto Tesalónica
17
Quetlhencap elialheng'a, neluactanie lhta ennenco'o nentanco lhta amaica'a quetlhencap jam, jengeliepuamenque ennenco'o, awanjec nenmajai'a angeluetecjac mocjom quetlhencap.
18
Nenmac'a lhta niecje angelelhiemoc apiesecsec anac quetlhencap jam, co'o Pablo nlhanie ntemac asquelienlhaneiam asmajai'a niecje anwelhiemoc jam, coca satanas mangcoltemojo.
19
Awanjec nenmajai'a angeluetecjac mocjom quetlhencap ncanec apquelpaiesecja mota engellualhoc, jengellaianco njan aleljalhnecama engellualho'oc enwanca'ac jata njan ncolalhcoc engellualho'oc napaqtec apuesque Jesús apuactamo ta jenque'e.
20
Jai', quetlhencap jengeltemesquescama alammalhco engellualho'oc, apquelpaiesacjec na engellualho'oc.
Capítulo 3
1 Jai', awanjec nengelleltemo antancoc mocjom amaica'a jam coca nne lhta jengeliasenco lhma m'a, lhta nqueniem'ac nelpaqmetquesalhco nengaqjenwacjo aquieto Atenas. 2 Ca nellapaso lhta lhema engialheng Timoteo jam, apmacmecama lheme' Engiapom Neten apaiescama ania'a actacmanma aplhenammap Cristo, nellapasque lhta jam cacpota eliatecjo, elpasmoc najan ncoliennac meliasquiam quetlhencap 3 necsa acuai'a aquientalhenma cacpota mancoltemesquesantaniec na coneng quetlhencap jam. Apqueliawec na aquientalhnema nac mancawanquec jengieca'. 4 Necsa nengacjenweiam alhta apiesecsec anac quetlhencap jam nelpenesawe lhta nelleltennascama ncowac jata aquientalhnema, ntemenquec na lhta m'a apqueluetai'a quetlhencap. 5 Nlhenaicama ewalhoc nquetlhencasque lhta mancolianmolhquec asleng'o ania'a apquellengaianco aquientalhnema quetlhencap jam, ca nqueniemai'ac ascapascamo lhta Timoteo cacpota jesantenquesec ania'a asmajai'a aijoc ania'a actemacja meliasqueiam quetlhencap jam. Awanje lhta co ascai'a jengeljanmo nac ncolpalesenma quetlhencap jam, lhta acto la m'a, acjemo lhta ncotnec nengetlhecmosecamoc quetlhengcap jam. 6 Apuactame lhta Timoteo jenque'e apquengiactamo jam Tesalónica, apsantanie lhta ania'a actacmanma, awanjec na lhta aquietnema meliasqueiam quetlhencap, nengamelaiam, awanjec nac na apquenmajai'a jengeluetecjac quetlhencap ennenco'o, ennenco'o njan ntac ma'a awanec nenmajai'a angeluetecjac quetlhencap. 7 Quetlhencap elialheng'a, awanje lhta apquelpaiesecja engellualho'oc nelleng'o aquiennactema meliasqueiam, niecje lhta aquietnema mota aquientalhnema neluetai'a ennenco'o, 8 coca jengeliennactesacjawe lhta nelleng'o ania'a aquiennactema mocjom meliasqueiam Apuesque quetlhencap. 9 ¡Nquetlhencasquec mamma nelpacmeiasma antancoc gracias Engiapom Neten aniem'o jengeliecanweiacmo apquelpaiesecja engellualho'oc quetlhencap! 10 Nengelmalhnecama negasnecama njan Engiapom Neten lhamacjo acnem cacpota angeluetecjac mocjom, ampasmoc etsaujonwomjo' meliasqueiam alaimommalhcac quetlhencap. 11 Jai, nengeltawec Engiapom Neten cacpota njan Apuesque engancoc Jesús jengellancoc lhema acnem antancoc amaica'a jam. 12 Nengeltawec na Apuesque engancoc eluanenquesquesec meliasqueiam lhamacjo acnem quetlhencap, eiawencasancoc na apquellamelammap apiesecsec anac jam, cacpota njan ellamelemmac po'oc enenlhet, ca nentaiancolha nac na ennenco'o nellamelaiacmo nac quetlhencap. 13 Nengeltawec na eliennactesquesec meliasqueiam, ellalhnasquesec na apualho'oc cacpota mancolhec atlheno apqueluesai'a quetlhencap napaqtec Engiapom Neten apalhacuactamo ta apuesque engancoc Jesús aptanco nac apquennemolhema apanque'. Amen.
Capítulo 4
Apqueltemacja antec Engiapom Neten
1
Quetlhencap elialheng'a, nelleltennasquec lhema nempaioma aquieplomo apuesque engancoc Jesús, eltacmelcasacpo ta lhamacjo acnem ncanec apiasponcomacja Engiapom Neten ma'a,
ca nentaiancolha lhta njan nengetlhecmoseianco quetlhencap ma'a, colhua apquelleliejacjawec na quetlhencap ma'a.
2
Jengellapascanquec ennenco'o Engiapom Neten cacpota angetlhecmosancoc quetlhencap, apquenmaianque lhta njan tacja quetlhencap ma'a netlhecmosecamo lhta.
3
Wanlha coca apqueltemawec Engiapom Neten eliengiecjac ma'a ncollatsecama nac, menmensanwom anque lhma mellanemmacpelha nac etnancoc.
4
Ntasec coca moclhem'a quetlhencap enmancoc apqueliocja nac cacpota mellaniec ncollatsecama caselha, wanlha coca ntasec eltacmelcasacpojo, ellajoc na po'oc.
5
Melleltonquec na ncolhnancoc apualho'oc alleltemo la enmensanwomo lhma', ca aptaiancolha nac ma'a enenlhet apqueliasqueiam anac Engiapom Neten.
6
Menactewascamanque lhma, meliennenques na po'oc actemacja m'a caselha ncolatsecama lhquec, nellascanque lhta ennenco'o m'a aquiawai'a nquec la apiaqmoncasecjac Apuesque.
7
Meltemo Engiapom Neten angellanancoc malha caselha alpaiseiam la'a, wanlha apqueltemo angeltacmelcasalhcojo.
8
Lhema enenlhet la aptacnoncoma jengetlhecmoscama nac, manjengeltacnewac ennenco'o, aptacnewacque' coca m'a Engiapom Neten apto jengellaicamoc Espiritu apancoc.
9
Mancaimelhcac annactalhescasancoc mocjom actemacja apquellamelammap apiesecsec anac quetlhencap jam ncanec apquetlhecmosecamoc apanque Engiapom Neten quetlhencap,
10
apquellaneianquec quetlhencap ma'a apqueltacmelquesquescamo njan apquellaniemjaicama apquelialheng'a apquellawa nac ma'a aquieto Macedonia. Wanlha nengellelto elienlhanmancoc lhamacjo acnem apquellamelaiam po'oc.
11
Nenmac'ac angelleltennasecjoc mocjom nelleltennaso lhta,
¡elienlhanmamoc metca apqueltemenwecjo lhma'! ¡meujanenwomanquec aptacja la po'oc, ellanjo toca apanco'oc apancawec aptancolha la'a! ¡Enmacmama coca motaja
12
cacpota mellelmoncalhnamaja¡ Netamen ellajoc jata mota apquellelto nac apqueliasqueiam Engiapom Neten.
Ncotnec jata apquellaniemjaicama apquellelto nac apquelletsepma
13
Elialheng'a, nenmac'ac angelleltennacsec acmac'acja ta ncotnec apquellaniemjaicama apquellelto nac apquelletsepma cacpota quetlhencap mancollaiose apualho'oc malha aptaiancolha nac ma'a enenlhet'awoc metca nac aleljalhnecama apualho'oc apmaniaie.
14
Mongeliasqueiacmoc ennenco'o Jesús apquetsepmo lhta canjan aplhatecjanweiacmo lhta njan, mang na angeliasqueiacmoc Engiapom Neten elaclacjac jata apquelleto nac apquelletsepma meliasqueiam la Jesús.
15
Nengelleltennasquec
ennenco'o mota jengetlhecmoscama nac aniem'o Apuesque, apmaniaie ta elaclacjac apquellelto nac apquelletsepma meliasqueiam, netamen jata njan m'a nengellelto nac enjalhnanco'oc apuactamo ta jenque'e Apuesque.
16
Ncolnalhcac jata aquiennactema apatong apqueliatecama, ncolnalhcac jata njan ma'a apqueliatecama lhema enenlhet neten apuesque, acpaiwoma njan iompa'at aniem'o Engiapom Neten, ewaiwentac jata Apuesque aquieto neten, apmaniaie ta enaclhatecjanwomoc apquellelto lhta apquelletsepma meliasqueiam alhta Cristo,
17
netamen ennenco'o nentanco nac enjalhnancoc mocjom ncolhec jata enlaclacjo lhemec apquellelto lhta apquelletsepma aisecsec iepjopai'a cacpota angeluetanwacjac Apuesque m'a neten, jata angelloca mota lhemec metca nnelha m'a.
18
¡Ntasec elpaqmetquesacpoc apancawec apiesecsec anac quetlhencap jam ania'a nac cacpota ncoliennecjo mota apualho'oc!
Capítulo 5
1 Quetlhencap elialheng'a, mancaimelhcac annactalhesquesec actemacja ncotnec jata acuetammalhca m'a lhamacjo caselha nac asquelleltennaso lhquec, 2 apquelliawec quetlhencap ncotnec jata acpelapquescama apuactamo ta Apuesque jenque'e, malha enenlhet la apmenielhma acpelapquescama apuai'a, metca nema aljalhanma. 3 Jata etnancoc enenlhet'awoc jenque'e: —Moltama apualho'oc, mellaga njan—jata etnancoc ma'a. Coca ncotlapquesec jata acuai'a aquientalhnema apnactewasemmap enenlhet'awoc ma'a, mamma ta njan elielhanenwomoc ma'a, ncotlapquesec jata njan malha actonac nqueluana la nlosec acpelapquescama nac acmasca au'alhoc. 4 Coca quetlhencap mancolpelapquesec jata apqueluetai'a m'a malha enenlhet lhec apmenielhma, ncanec quetlhencap melloca mota ienactesacja lhma. 5 Malha coca apquelloca m'a atsac'elha lhma nac cacpota njan acnem ancoie. 6 Melienmamanquec najan malha aptaiancolha nac ma'a po'oc enenlhet, ntasec coca etnanco mota malha apnaclhatecjai'a la'a, metca njan alieijamalhma la'a. 7 Pelhasep apanquec la'a apnactenquec enenlhet'awoc, nquelieijac na lhma, 8 ennenco'o coca nelloca mota acnem ancoie ca ncanec ntasec montanquec malha jengelieijamalhma la'a, ntasec angelapquesec malha nelapquescama la ennengio'oc aluesai'a m'a nengamelaiam canjan mongiasqueiam, angelletsawec jata njan malha casco la'a acuesai'a nengeljalhanma angeluoncasalhcac jata tep. 9 Jengeliequiescanquec ennenco'o Engiapom Neten jawe apmajai'a jengellancoc apiaqmoncasecja nentaiancolha, wanlha coca apmajai'o jengeluonquesec tep aniem'o apuesque Jesucristo, 10 apto lhta apquetsepma jengianmoma ennenco'o cacpota annacjoc lhemec ma'a nengellelto nac enjalhnanco'oc canjan apqueletsepmo nac. 11 Ca ncanec ntasec elleliatecjoc po'oc, eleliennactescasecjoc na apualho'oc po'oc lhamacjo acnem.
Apquellanemacja etnancoc Pablo co Tesalónica
12
Quetlhencap elialheng'a, nengelleltawec ennenco'o ellajoc apquelemjama apmaniaie apanco'oc apquellelto nac apquennawescama mota cacpota njan apquetlhecmosecamoc actemacja Apuesque engancoc.
13
Ellajo mota malha apquelpetma la'a, ellamelemjo ta njan ncanec apquelpasme mota quetlhencap ma'a, elloca ta njan metca acmasca apiesecsec anac quetlhencap jam.
14
Nengelleltawec na ennawacsec apquellelto la apquellanecamoc caselha ncolatsecama jam, eliatecjo ta njan ma'a apquellelto nac anmaiosac'a apualho'oc, elpasem jata njan meliennactema nac, cacpota njan etnancoc metca apquelpecjesammap apiesecsec anac jam.
15
Mellanco nquec eliaqmoncasquesecjac po'oc apquellanesquescama la ncolatsecama, ntasec coca mota etengiancoc ellanancoc caselha altacmelo apiesecsec anac quetlhencap cacpota njan apiesecsec po'oc anac enenlhet.
16
Colpaijecja coca mota apualho'oc,
17
elelmalhnamoc na metca nnelha.
18
Quetlhencap apquellelto meliasqueiam Cristo Jesús nietawec na etnancoc gracias lhamacjo caselha apqueluetacja la'a, ca apiasponcomacja Engiapom Neten ma'a
19
Menmanwom apmac'acja la etnec Engiapom Neten Apualhoc,
20
meltacnewa njan ania'a aniem'o Engiapom Neten aclhenammalhca nac,
21
ntasec secjec na ellanama netamen enmancoc jata tacja actacmelo la'a,
22
coca eltacnewa m'a ncollatsenca nlho nema atlhecmoscama.
23
Nengelleltawec na Engiapom Neten apto ngiapom metca actaicama enwalhoc etnec na
apquelpoccanma quetlhencap, eltacmelquesec apualho'oc, apqueluanmoncoma canjan apqueliocja cacpota etnancoc metca apqueltemenweiacmo lhma acuacmo apuactamo ta apuesque engancoc Jesucristo.
24
Jai', apto apquellawecama quetlhencap wanlha mota apquellanai'a aptacja la aplheianma, eiplauquesec jata njan aptacja apaioma.
25
Quetlhencap elialheng'a, jengellelmalhnesques jata Engiapom Neten cacpota jengeltacmelquesec ennenco'o m'a.
26
Elpaiwesap jata njan apquellialheng'a aquieplomo apquelpetsesma apmalhempen'oc jam,
27
asqueltawec co'o aquieplomo asientalhnemo jeiaicamoc Apuesque elietsatancoc waccajac anac aplhamacjo elialheng'a jam.
28
Asqueltawe na Apuesque engancoc Jesucristo ewaiwesentac apquellamelaiam tacjaplhet'oc quetlhencap jam.