Toba-Maskoy: Regular Print

Updated ? hours ago # views See on WACS
2 Corintios
2 Corintios
Capítulo 1

Ca waccajac anac aptalhescama Pablo apquellapasquescama apquelialheng'a co Corinto
1 Co'o Pablo asto jeliequiescama Engiapom Neten cacpota atnec apostol apancoc Cristo Jesus, alhelhma coca co'o Timoteo jenque'e nengenmac'ac angellapacsec atlheianma enwalho'oc Engiapom Neten apquennemolhema jam na temma Corinto, cacpota njan aplhamacjo engelialheng'a apcacjanco m'a iocjalhma Acaya. 2 Awanjec co'o asqueltemo Engiapom Neten cacpota njan apuesque engancoc Jesucristo eluaiwesentac tacjaplhet'oc apquellamelaiam cacpota njan metca altaicama apualho'oc quetlhencap ma'a. 3 Eltacnescasamoc jata mota Engiapom Neten, apiapom ma'a apuesque engancoc Jesucristo ncanec apto njan ma'a ngiapom apietnai'o nenga'at cacpota njan acpaijenwaiam enwalhoc. 4 Jai, apaiescacmec engellualho'oc necsa acuai'a la aquientalhnema m'a cacpota njan enwanca'ac ennenco'o angelpaiescamoc apualho'oc emmo'oc la'a. 5 Awanjec anquec nellengaianco aquientalhnema necsa netlheianma ania'a aplhenammap Cristo aniem'o enenlhet'awoc, jawe ngiapac anquec ma'a, awanjec coca njan jengelpaiesquescaiam engellualho'oc Cristo m'a. 6 Jai, awanjec anquec jengellengasquesaianco aquientalhnema aniem'o enenlhet, coca neluascapquec na m'a ncanec nengelleltawec etlhewancoc quetlhencap ania'a acmowana nac ncopaiescamoc enwalho'oc cacpota njan jenwonquesec tep. Jengelpasmec coca njan Engiapom Neten, jengelpaiesquescacmec na engellualho'oc ma'a necsa acuai'a la aquientalhnema cacpota angellapuanac angelpaiesquescamoc na apualho'oc quetlhencap ma'a necsa acuai'a la aquientalhnema m'a, cacpota njan quetlhencap ellapuanac na eluascapoc ma'a ca nentaiancolha nac ennenco'o. 7 Nelliawec na ennenco'o apquellengaianco aquientalhnema quetlhencap jam, nnawec na ennenco lha', nelliawec ennenco'o aleljalhanma engellualho'oc ncowac jata acnem nema alpaiesquescaiam apualho'oc quetlhencap, nnawec na ennenco lha' m'a. 8 Engelialheng'a, nengelleltawec ennenco'o angeleltennasama ania'a actemacja lhta nellengaianco aquientalhnema aquieto m'a iocjalhma Asia, nientelhec anque lhta m'a, mmasque lhta nelelhiewaso, nquetlhenque lhta engellualhoc angenmasquenwomoc quelhaja. 9 Malha lhta ntac netlhenammalhca la antequio'oc ma'a, coca nquetlhenque lhtoca engellualho'oc ma'a wanlha Engiapom Neten apto apmopuana jenwonquesec tep, aquiawai'a nquec aquietnema apmopuana acuacmo njan apmopuana jenlhatecjascamoc necsa nengetsepma. 10 Jai, nengeluoncaselhque lhta tep ma'a aquiawai'a nenmajai'a antequiewecjac niecje, coca ncotnecjac jata mocjom nengeluoncasemmalhca tep ma'a. 11 Nengelleltawec ennenco'o jengellelmalhnesquesec Engiapom Neten quetlhencap cacpota jengelpasmoc ennenco'o m'a, aplhamo la jengellelmalhnesquescama jam, aplhaniec jata njan etnancoc gracias Engiapom Neten aniem'o jengelpasmoma m'a. 12 Awanjec ennenco'o alammalhco engellualho'oc ncanec neltacmelcaselhquec aquietemo nquec, iocjalhmec anquec na nempaioma nentancoc napaqtawec enenlhet'awoc lhmanquec jam, napaqtawec na quetlhencap. 13 14 Nennactalhesque mota ennenco'o waccajac alhiewai'a nquec acpaioma cacpota eliojoc, colhua coca necja tcoc apquelliawec quetlhencap, netamen ncosaujalhcoc anquec jata apquelianweiacmo apuactamo ta Apuesque engancoc, ncolleccasama ta njan apualho'oc jengellanei'o ennenco'o, ennenco'o ta njan ncotnec alpaijecja engellualho'oc ma'a aniem'o quetlhencap. 15 Asqueliawe co quetlhencap manjelielhnecama ca ncanec asqueltawe lhta niecje janet astenta la amaica'a jam cacpota ncolpaijecjac apualho'oc quetlhencap jam. 16 Nlhenque lhta niecje ewalhoc angiacjac ma'a aquieto Macedonia, coca necsa alhengama lhta nieje nlhenac ewalhoc nalhet amai anwaiwonwatac secjec jam, netamen anwempecjoc alhengama m'a Macedonia. Ataqjoc mocjom asquempacja lhquec, necsa alhengama anwaiwonwatamo telha mocjom astema la amaica'a jam, quetlhencap jatelha njan ncolleniem'ac jelpasmoma caselha alaimommalhca la co'o cacpota anwempecjoc alhengama m'a Judea, ca ntac aclheianma ewalhoc co'o m'a, 17 coca monwopuanac ma'a. Ncotlhenec jatelha apualho'oc quetlhencap asto alpencammalhca ewalhoc aclheianma, malha njan momopuana la aspenescamo asquelanecja astacja, 18 coca motnemac co'o m'a. Engiapom Neten coca apiawec jawe ngiapac anquec astacja nac alheianma. 19 Ennenco'o Silvano, Timoteo cacpota njan co'o jawe nentaiancolha alpencammalhca atlheianma engellualho'oc, nelieplaucasquec ennenco'o aptemacja lhta mota Cristo, metca alpencammalhca apualhoc ma'a, apieplaucasquec na apaioma aptacja la aplheianma m'a. 20 Jai, apieplaucasquec na Engiapom Neten aptemacja la apenescamo apqueltennascama apaioma apcapascamo m'a Cristo, ca ncanec ennenco'o nentaianco mota amen necsa neltacnescasecamoc la Engiapom Neten aniem'o njan Jesucristo. 21 Jengiepeccasacjec ennenco'o emmo'oc quetlhencap Engiapom Neten cacpota njan Cristo, jengelpocquenquec najan, 22 jennactalhescamo njan mongenatquescama enwalho'oc apuesai'a Apualhoc apanquec ma'a, apto njan apmanie panquec nenlhewai'a m'a, amaniaie aluaia ta mocjom caselha altacmelquescama ta nellaniemjaicama. 23 Colhua njan asmac'ac alleltennacsec quetlhencap se cla ctemo co'o mongiecjo lhta jam Corinto secje lhta, ncanec ncoije lhta ncotnec aspaioma asquellaicamoc asuacjo la co'o jam aniem'o ania'a lhta aslengai'a apqueluesai'a quetlhencap, jawe ngiapac anquec astacja nac. 24 Mancomajai'ac ennenco'o antancoc malha apqueluescai'e la'a angellelpalhencasama cacpota etnancoc apquelpeiwomo, apquelliawec quetlhencap actacmanma caselha ellanancoc, wanlha coca nengelleltawec angetlhecmosancoc cacpota ncolpaijecjac apualho'oc quetlhencap jam.
Capítulo 2

1 2 Motnaienta co'o amaica jam ncanec mancomajai'ac allaiosesquesec apualho'oc aniem'o asquelelpalhencasecama quetlhencap jam, melpaisecjec quelha njan ewalhoc quetlhencap asuactamo la jam. 3 Ca nqueniemai'ac ascapascamo lhta waccajac jam astalhescama ncanec mancomajai'ac alelpalhencasama napaqtawec quetlhencap, mancomajai'ac na aluetac anmaiosac'ac apualho'oc quetlhencap jam, wanlha coca asqueltemo ncolpaijecjoc lhemec ewalhoc co'o quetlhencap. 4 Nesca astalhescama lhta waccajac alhta awanje lhta actaicama ewalhoc acuacmo asueno njan ncanec ma lhta ncomac'ac allaiosesquesec apualho'oc quetlhencap aniem'o asqueliennai'o aspaioma astalhescama waccajac, wanlha coca asqueltemo allelpeiwescasecjac cacpota ellapuanac etnancoc apquelpeiwomo aniem'o njan co'o asquellamelaiam quetlhencap. 5 Ca enenlhet alhta apcaiosesquescamo nac ewalhoc, malha lhta nja ntac apquellaiosesquescama apualho'oc na quetlhencap ma'a, 6 apqueliaqmoncasquesecjec coca quetlhencap aptemacja m'a enenlhet, metca toca mocjom ma'a, 7 colhua coca ntasec enmecjoc mocjom tacja m'a, elpaiesquescamoc na apualhoc cacpota ncomascoc aquiawecamoc aquiaqjapma acmaiose apualhoc ma'a. 8 Jai, eltacmelquesques jata njan apcaniemjaicama m'a cacpota eijanwomjoc mocjom apquellamelaiam quetlhencap ma'a. 9 Ca waccajac alhta astalhesquescama asmajai'a aijoc quetlhencap apquellelijecjawec quelhaja. 10 Coca apquenmacjo ta tacja mocjom enenlhet anac, co'o ta njan amecjoc tacja enenlhet anac jam malha napaqtec na Cristo, ncowac actacmanma apquellaniemjaicama aplhamacjo pancawec quetlhencap ma'a. 11 Coca mangenmacjo la tacja enenlhet anac ma'a, ncolhec jata jengelhpanqueso m'a aniem'o satanás, ntengiama mota ncolanac caselha ncolatsecama m'a. 12 Smac'ac aleltennasama quetlhencap asmeiacjo lhta aquieto natemma Troade cacpota altennama ania'a actacmanma aplhenammap Cristo apto Apuesque, apquelpenesawe lhtoca apquenmajai'a ellailhoc asqueltennaicama m'a, 13 coca ntama lhta ewalhoc co'o m'a ncanec ma lhta atac stema eialheng Tito, ca asquelpaiwesanco lhta m'a, asmeiacjo lhta Macedonia. 14 15 Jai, gracia stac co Engiapom Neten ncanec jengeltemesquescama jengeliepjonwescaiacmo mota aniem'o njan nelpasmecja Cristo, jengenmaianca njan cacpota angelpaiacsec ania'a actacmanma aplhenammap Cristo lhmanquec jam. Ennenco'o nengellelto napaqtec Engiapom Neten malha actonac acmases aimes la nentecjanma, acpaijecja lhmanquec jam apiesecsec apquellelto ta apqueluoncasemmap tep, apiesecsec na apquellelto meluoncasemmap jata tep, 16 coca m'a ntacjec ncomases aimes nquennapquec najan apiesecsec ma'a apquellelto nac meluoncasemmap jata tep, coca m'a ntacjec acmases aimes jengaicamoc na aquiennactema ennengiec apiesecces apquellelto nac apqueluoncasemmap jata tep. !Nientelhec anquec nenmacmecama jengelpecquencasecjo Engiapom Neten ennenco'o! ¿Se lha enenlhet engiapuanac ma ie, je? 17 Moclhem'a enenlhet apquelleltennama ania'a actacmanma apquelleltema ncoltacmelquesquesec apquellaniemjaicama apanco'oc apancawec, ennenco'o coca mantancoc ma'a, Engiapom Neten jengellapascama, apiawec najan metca nentengiaicamoc enganco'oc engancawec caselha altacmelquescama la nellaniemjaicama, enwanca'ac coca angellanancoc aniem'o njan nelpasmecja mota Cristo.
Capítulo 3

1 Nentancolha lhta netlhenammalhco engancawec nengeliamolhma, mancoca ncomajai'ac angetlhenalhcoc enganco'oc engancawec ma'a, apquelliawec na enenlhet'awoc nenmancolha la'a nentaiancolha nac. Mancaimelhcac angelletsoma waccajac nema actalhescama la actemacja acuetammalhca neliamolhma cacpota angeluetasquesce quetlhencap, nlho ca la mo'oc iocjalhma nenmac'acja la angenmancoc, mancaimelhcac angelletsoma waccajac anac nema actalhescama ncanec jengelliecpelcawec enenlhet'awoc ma'a. 2 Quetlhencap na apquellelto malha waccajac nema actalhescama aclheianma neliamolhma, necsa apqueluetai'a enenlhet'awoc apqueltemacja apqueltacmelcasemmacpo quetlhencap, ncotlhenec na apualho'oc ennenco'o nengellelto nac apostoles actacmanma nenmacmecanma. 3 Jai, quetlhencap malha waccajac la nema actalhescama aclheianma nenmacmecama actacmanma, Cristo jengellanquec ennenco'o cacpota angellanconwatac jam. Ca waccajac anac jawe actonac aimenec anac alanemmalhca cacpota ncolhec actalheso, wanlha coca niecje Engiapom Neten anac Apualhoc memasquenwaiam anac, ca malha nema actalhescama m'a, jawe njan nema actalhescama la metaimong nema alanai'a la'a, wanlha coca nema acnactalhescamo m'a apualho'oc anac enenlhet'awoc. 4 Nengelliawec ennenco'o Engiapom Neten jengelpasmoma lhta cacpota angellanancoc actacmanma nenmacmecama apiesecsec anac quetlhencap aniem'o njan ma'a Cristo, 5 lhta njan metco la jengelpasmoma Engiapom Neten, mongellapuanque nlho lhta njan angellanancoc nenmacmecama nac enganco'oc engancawec. 6 Jengellanquec lhta njan Engiapom Neten nenmopuanca'a cacpota angelpaiacsec angetlhenec alhnancoc apaioma Engiapom Neten apcanemacja antancoc, actemacja netlhewaicamoc jata aquiennactema ennengiec aniem'o Engiapom Neten Apualhoc, moc actema nquec ma'a jenganemacja nac Moises altema nac ncolhec jengaqjaqjo. 7 Lhema acnem anquec lhnac nane ntemac aquiawai'a actacmanma necsa aplhewai'a lhnac Moises jenganemacja m'a acto nac altema ncolhec jengaqjaqjo, nema actalhescama coca metaimong necja m'a, mang nac nanec na nconmopuanca'ac enenlhet ellanjoc napa'at Moises aniem'o aponmatma m'a, coca ntacmelquescamawec nac na acsepanei'o m'a. 8 Coca mo'oc nac na m'a tep anquec actacmanma acnem acuai'o m'a alhnancoc apaioma apcanemacja antancoc Engiapom Neten aplheianmo m'a jengellancoc Apualhoc apanque. 9 10 11 Jai, lhema acnem anquec lhnac nane ntemac aquiawai'a actacmanma necsa aplhewai'a lhnac Moises jenganemacja m'a acto nac altema ncolhec jengaqjaqjo, actacmanma niecje m'a coca mmasquenwaiacmec ma'a. Coca mo'oc nac na m'a tep anquec actacmanma acnem acuai'o m'a alhnancoc apaioma apcanemacja antancoc Engiapom Neten aplheianmo m'a jengeltemesquesec jata nengelpeiwomo, coca acto mancomasquenwaiam na m'a. 12 Jawe ngiapac anquec ma'a nentaiancolha mota netlheianma, ca nqueniemai'ac ma'a angelpaqmetec napaqtawec ma'a. 13 Jawe actemo lhnac nanec Moises apcapmo lhnac nanec napa'at ietamopai'a napocja, meltemo eluetac israelitas cacpota meluetanquec ncomascoc aponmatema napa'at ma'a. 14 Coca man noca elliamoc israelitas ma'a aponmatema acto iacuatacjo ncoie', ca nenwanlha nac na aptawana'ac neptamen apquelietsatenco la jenganemacja lhennenga man na elliamoc ma'a acto acsepanenwaiam ma'a, malha niecje njan apquelapma la napaqta'a ietamopai'a napocja, apqueliaseianque lhma m'a cacpota meluetie lhma m'a, meliejec najan, wanlha coca njan Cristo apto apmopuana eljatsoscasancoc ma'a. 15 Acuacmo njan nenwanlha nac apquelietsatenquec niecje waccajac apancoc Moises, malha coca ntemac meliamo la'a ncanec nietnec malha apquelapquescama napaqta'a ietamopai'a napocja. 16 Coca aptengianco la apquelpasmoma Apuesque, eljatsoscasancoc na m'a apquelapquescama napaqta'a ietamopai'a napocja. 17 Jai, Apuesque canjan Apualhoc malha lhema m'a, enenlhet apquellelto aquietnema Apuesque Apualhoc, nnec aljatsoscaso ietamopai'a napocja alapma napaqta'a. 18 Ennenco'o njan nnenquec jengeljatsosquescamo malha ietamopai'a nengelapma nengaqta'ac, malha njan ennenco'o acto nac ieiam appoc nelanei'o nac nenga'at, apquellan'o la enenlhet ma'a ieiam appoc lhec, malha apqueluetai'a nja ntac Apuesque aptacmanma apanquec ma'a, lhamacjo acnem acmajai'a ncotjangiacja napa'at Apuesque aniemo njan Apualhoc apanquec ma'a.
Capítulo 4

1 Engiapom Neten apto apiamolhma jengellanei'o ennenco'o jengellaianco njan nenmacmecama nenlheianma ania'a actacmanma, mamma njan manjengeliaquaiam la angelpaiacsec ania'a actacmanma. 2 Man na angellanencoc caselha la nelielhasquescamo jenmancascama nac, man na ntengiancoc na neliennenquescama la'a, mangeliaqmoncasecjac na mo'oc actemacja ania'a actacmanma nac netlheianma jengellaicamo lhta njan Engiapom Neten ma'a. Apiawec coca njan Engiapom Neten acto netlheianma iocjalhmec, apquelliawec na enenlhet'awoc ca ncanec na manjeliascamec ma'a. 3 Coca apquellelto nac menmaicamoc tacja ania'a actacmanma nelleltennascama, jata enmancoc ma'a aquieto nemmasquenwaianlha, 4 apqueliascacmec ma'a aniem'o awesque jenque'e nalhepop anac nqueltemescasquec malha ienaqtesalhma apaqto'oc, manconmac'ac eluetac aponmatema acto neten ancoie aniem'o m'a ania'a actacmanma nac aplhenammap Cristo apto acnema apmopuana, apnemo njan Engiapom Neten ma'a. 5 Mongetlhenalhcoc enganco'oc engancawec ennenco'o, netlhenquec coca apuesai'a Jesucristo apto apuesque aniemo njan nengellamelaiam ma'a, ca ncanec nentaianco njan jengellasennaicama quetlhencap. 6 Aptepquescanque lhnac nanec Engiapom Neten aponmatema necsa ienactesacja lhma, aptepquescanquec na aponmatema engellualho'oc anac cacpota ncoltetquesec enenlhet'awoc netlheno la'a ania'a actemacja aplhenammap Cristo, netamen ncotlhenec jata apualho'oc Engiapom Neten apto aquietnema aquiawai'a apmopuana m'a. 7 Ka ania'a aktaqmanma nak malha akto nak kaselha akmennave nke aknaiangko nak neniokha nkoliennaktema malha aktonak nialpa ngvengka, apvanka'ak elvetak enenlhet'avok akmovana m'a aniem'o Eniapom have aniem'o ennengko'o. 8 Niekhe akietnema ngkeskama akientalhnema, nietne koka nhan alelꞏhalhnekama engelvalho'ok kakpota angenmaskeksek hata m'a, niekhe nhan akietnema altaikama engelvalho'ok, man koka hengelastengak ma'a. 9 Hengelmenlhenama nhan kakpota hennaqtevaksek ma'a, neliave koka nnengke mota hentaiangko netlhelhma'ak ma'a, niekhe malha nelpelapeiam aniem'o enenlhet hengeliengama, man koka hennaqtevaskamak 10 ma'a. 11 10–11 Lhamacjo iocjalhma nenmancolha la'a jengeluetascasquec aquientalhnema enenlhet, ca actemo lhta njan Jesús apquellengasquesaianco aquientalhnema acuacmo apquellaqjo, ennenco'o njan ncaicama mota antequio'oc aniem'o nelpaiescama ania'a actacmanma, nelliawec coca nengiocja nac acmowana ncomasquewomoc ncolhatecjanwomoc jata necsa netsepma m'a, jawe ngiapac anquec ma'a. 12 Quelha niecje antequio'oc ma'a nenmeiacjo la apiesecsec anac quetlhencap angelpaiescacjac ania'a actacmanma, ncacjoc coca angenmeianta cacpota etlhewancoc quetlhencap aquiennactema ennengiec mancotnenwaianlha nnelha. 13 Nellan'ac ma'a actemacja lhnac nanec aclheianma Engiapom Neten apaioma: «Moi'ascacmoc co'o ania'a, ca alheianmo njan» 1 lhnac nane ntemac. Ennenco'o njan mongeliasqueiacmoc Engiapom Neten, ca netlheianmo nac na apuesai'a m'a. 14 Nelliawec na ennenco'o m'a apto aplhatecjasqueiam necsa apquetsepma Jesús, jata nja ncotnec ennenco'o m'a annaclhatecjawomoc jata m'a, quetlhencap najan, netamen angeluacjac jata njan napaqtec ma'a. 15 Lhamacjo nellengaianco nac aquientalhnema neluetai'a aniem'o nellienlhanmecamoc cacpota ncoltacmelquesquesc apquellaniemjaicama quelthencap ma'a, etlhewancoc jata njan jengamelaiam anac Engiapom Neten, ca aplhamenco la enenlhet ma'a, netamen elhamancoc jata njan aptaicamoc gracias Engiapom neten ma'a, ncotlheianwacjoc jata njan apualho'oc Engiapom Neten apto aquietnema aquiawai'a apmopuana. 16 Niecje acmasquema neliennactema neliocja nac, coca mancolhnancoc anmaiosac'ac engellualho'oc ncanec nelliawec engellualho'oc anac ncanantanquec na lhamacjo acnem aliennactema. 17 Nellengaianco nac aquientalhnema jenque'e nalhepop anac ncomasquenwomoc jata m'a, ca nenwascapo la m'a necsa nellengaianco nac aquientalhnema, nempenesquec cacpota ncoitec aquiennactema ennengiec aquiau'acja nquec caselha altacmanma m'a mancotnenwaianlha nnelha. 18 Ntasec mongeliawencasec alquetamecama engellualho'oc necsa nellengaianco aquientalhnema nalhepop anac ncanec ncomasquenwoc jata m'a, ntasec coca aniawencasoc atlhenaicama engellualho'oc caselha altacmelo m'a mongeluet'o mocjom, coca nelliawec jawe ngiapac anquec ncowac jata m'a, mancomasquenwomec jata njan m'a.
1Salmos 116:10
Capítulo 5

Nengiocja nac malha acnemacja m'a enjangoc
1 Nengiocja acmowana nac ncomasquenwomoc malha acnemacja m'a enjangoc anac. Ncomasquenwomoc jata m'a nengiocja nac, coca nelliawec ennenco'o jengellancoc jata Engiapom Neten mo'oc nelliocja m'a mancomowana njan ncomasquenwomoc ma'a aquieto neten, malha pa'at jawe ctonac apquelanai'a nac enenlhet. 2 Necsa nelloma mocjom jenque'e nalhepop anac nelleclhanwec ncanec awanjec nenmajai'a angenmancoc ma'a engaqjaiancolha aquieto m'a neten, 3 ncotuasalhcac jata nengiocja nac jenque'e, ncotnecjac jata metca acnemacja enjangoc anac, coca nietnec na mo'oc acnemacja alhnancoc aquieto m'a neten. 4 Necsa nellaniemjaicama jenque'e aquieplomo nelliocja, nelleclhanwec aniem'o nellengaianco, malha niecje mangelleltemo ncotuasalhcac nengiocja nac acmowana nac ncomasquenwomoc, coca nengelleltawec niecje angetlhewancoc colhuawe nac alhnancoc nengiocja mancomasquenwaiam. 5 Jengellanquec ennenco'o Engiapom Neten Apualhoc anac apquelientemonquescamo coca amanie nenlhewai'a ta m'a nengiocja alhnancoc ma'a, 6 jai, nelliawec ennenco'o ncotnec jata m'a. Necsa nellaniemjaicama nelliocja nac jenque'e nalhepop anac, taiepec anquec jenque'e iocjalhma angaqjenwomoc jata lhemec Apuesque m'a. 7 Mongapuanquec angelluetac ma'a iocjalhma nac, coca nelliawec jawe ngiapac aquietnema m'a iocjalhma nac ma'a. 8 Jawe ngiapac ma'a nietnec iocjalhma nac ma'a, nenmac'ac niecje angeliengiecjac nelliocja nac cacpota angenmancoc ma'a angaqjenwomjoc lheme Apuesque m'a. 9 Ca nqueniemai'ac ma'a angelienlhanmanco mota anlecquescasama mota apualhoc Apuesque necsa mocjom nellaniemjaicama jenque'e nengiocja nac, jata njan angelienlhanmancoc angellecquescasama apualho'oc Apuesque m'a nengaqjenwacmo ta m'a napaqtec ma'a. 10 Jai, nenlhamacjo ta lhma nquec jam angelanwacjac ma'a aquieto m'a jengiecpelquemelha Cristo, moclhem'a ta angetlhewancoc aquianmoma actemacja la nellanai'a ncolatsecama, nlho ca la actacmanma necsa nellaniemjaicama jenque'e nalhepop anac. 11 Nelliawec ennenco'o ntasec angellajo mota Apuesque, angelienlhanmancoc na nellannenwaiam enenlhet'awoc cacpota meliascamec ma'a. Apiawec Engiapom Neten iocjalhmec netlheianma ennenco'o, apquelliawec quelha njan quetlhencap. 12 Jawe njan nenmajai'a angellalhcoc ennenco'o, wanlha coca nengelleltemo angetlhenquescacjoc apualho'oc actacmanma nentaiancolha ennenco'o cacpota njan ncolleccama apualho'oc jengellanjoc ennenco'o, etlhenec jata njan nelluesai'a m'a napaqtawec enenlhet'awoc apquetlhenammacpo na apancawec apqueliamolhma, moc apatno'oc coca m'a, moca ncollatsema njan apualho'oc. 13 Malha lhnac ennenco'o alanema lhna aptaiancoc enenlhet jengetlheianmo aniem'o njan jengellasennaicama Engiapom Neten, jawe coca niecje ennenco'o alanema, wanlha coca nenmajai'o angeltacmelquesquesec apquellaniemjaicama quetlhencap. 14 Jai, enwalho'oc coca malha jengeliatecamoc cacpota angelpasmoc quetlhencap ampaio lhta njan nelianweiacmo apquetsepmo lhta lhema enenlhet apquelianmoma lhamacjo enenlhet lhmanquec jam, ca nqueniemai'ac ma'a malha apqueletsepmo lhemec ma'a. 15 Apquetsepme lhta Cristo apquelianmoma aplhamacjo enenlhet'awoc, colhua apquellawa nac mocjom nenwanlha nac metengiamo nquec alleccasecama la apualho'oc apanco'oc apancawe, coca ellecquescasama apualhoc ma'a apto lhta apquetsepma, aplhatecjanweiacmo lhta njan cacpota eltacmelquesquesec apquellaniemjaicama m'a. 16 Lhennenga lhta njan enenco'o nquetlheianmec engellualho'oc malha actonac enenlhet apqueliasqueiam anac Cristo, colhua coca newanlha nac mmasquec ma'a, colhua coca nquetlhenquec engellualho'oc apqueltemacja la antancoc Engiapom Neten. 17 Neluatesaianquec ma'a actemacja lhta alquetamecama engellualho'oc lhennenga, neluatesaianquec na nentaiancolha lhta ncollatsecama aniem'o nelpasmecja m'a Cristo, colhua alhnancoc nentaiancolha 18 aniem'o Engiapom Neten, apcapascamo njan apquetca cacpota jengeliepetquescacjac jengellamelecjoc mocjom ma'a, netamen na jengellapascama ennenco'o cacpota angelpaiacsec ania'a apqueltemo eliepetcanwacjac na ellamelecjoc mocjom aplhamacjo enenlhet'awoc ma'a. 19 Niecje aplhamacjo enenlhet'awoc apquellanecamoc caselha ncollatsecama, apquelhaiecjec na Engiapom Neten, ncacjoc coca apcapascanquec na Cristo cacpota jengeliepetquescacjac jengellamelecjoc mocjom ma'a, netamen na jengellapascama ennenco'o cacpota angelpaiacsec ania'a nac ma'a. 20 Jengellapascama Cristo cacpota angeluomo mota lhamacjo iocjalhma angelletsoma apuesai'a Engiapom Neten, angelleltennacsec najan ania'a apqueltemo angelliepetcanwacjoc mocjom jengellamelecjoc na nenlhamacjo m'a. 21 Niecje njan Cristo metca apquelanai'a caselha ncolatsecama, ncacjoc coca apatencasecjec Engiapom Neten mongeliamolhma aptescasecjo malha meijamolhma apancoc ma'a cacpota jengeltemesquesec nengelpeiwomo napaqtec ma'a.
Capítulo 6

1 Nenmacmesama ennenco'o Engiapom Neten ca nqueniemai'ac aquietnemo aquientalhnema nempaioma cacpota angennawacsec meltemequesecjec coneng jengellamelaiam anac Engiapom Neten. 2 Ca ctemo nac na actalhesammalhca waccajac Engiapom Neten apaioma jenque'e: «Nietawec anquec lhta apquelto apasmoc apuet'o aquientalhenma lheiap, asuoncasque lhta tep necsa aimommalhca aspasmoma» 1 ntemac ma'a ¡Coca colhuawe nac nietawec nemo aluonquescamo tep quetlhencap!
Nellengaianco aquientalhnema
3 Mongeltemonwaiacmo lhma enennco'o necsa nelpaiesacama ania'a actacmnama cacpota meliengiecjec aptaicamoc meliasqueiam enenlhet'awoc netlhecmosecamoc alhta. 4 Ntasec nentaiancolha, apuanca'ac eluetac enenlhet'awoc nengellelto jengellasennaicama Engiapom Neten. Neluascapque lhta metca nempecjescama nelluetai'o aquientalhnema, neluascapmec na necsa aimommalhca la caselha enganco'oc, anmaiosac'a engellualho'oc najan. 5 Neluascapmec na m'a nengaqjenweiacmo nengaqlhencasemmalhquelha, cacpota njan apqueliepetcaseiam apiesecsec enenlhet apquenmajai'a jennactewacsec, neluascapmec na m'a nenmacmecama aquientalhnema metca nenteianma, metca nentoma njan. 6 Apqueliawe mota quetlhencap neltacmelcasemmalhcojo, nelliawe na acto jawe ngiapac anque iocjalhme, apquelliawec na quetlhencap metca nelpecjescama cacpota njan nalhepawec engellualho'oc angellanjoc emmo'oc, apquelliawec na quetlhencap apnaicamoc engellualho'oc Engiapom Neten Apualhoc, nengellamelaiam na emmo'oc iocjalhmec engellualho'oc. 7 Apquelliawec na nelpaiescama ania'a acto ngiapac anque cacpota njan jennaicamoc nenmopuanca'a aniem'o Engiapom Neten, nellammelhquec na jengellammelhmacja la'a malha aquieplomo nenmaicama nennapommalhca nac anco'oc acuesai'a acpeiwomo, malha njan jewa' la'a aquieto aquiennacja, cacpota caselha nengapcasemmalhca aquieto sancaluelha. 8 Moclhem'a acnem jengelleliajacjawe lhta mota, jengeltacmelcasque lhta njan, mo'oc acnem alhtoca jengeltacnewac ma'a, jennactewasque lhta njan ma'a, jengelleltaianco lhta njan nenmopuanca'a ania'a, coca iocjalhme mota netlheianma ennenco'o. 9 Jengeliecpelcawec niecje ennenco'o m'a, coca mancolatsema jengellanei'o m'a, malha aptaiancoc manjengeliecpelquemo la'a. Nquetlhenquescamawe mota jengennapoc ma'a, coca ncacjoc njetlhec nellaniemjaianca mocjom, jengeltecpoicama njan, mancoca jengennapmac ma'a. 10 Apquellapiosesquescanquec engellualho'oc coca neluascapmec ncanec nelliawec Engiapom Neten elpaiescamoc jata engellualho'oc ma'a. Lhamacjo acnem nellaniemjaicama metca caselha engancoc, coca ncacjoc nelpasmonquec enenlhet'awoc cacpota etlhewancoc aquiawai'a malha acnema apquelletsecama la'a aniem'o ania'a actacmanma nelpaiescama, malha njan nentaiancoc enenlhet la metca apquelletsecama, coca nnaianquec niecje caselha alaimommalhquelha la'a ennenco'o. 11 Engelialheng'a co Corinto, nelleltsaujawec lhec nelleltennasecama iocjalhmec anquec ma'a, 12 mongeltacmelquescamac ania'a nac, quetlhencap coca malha niecje apquelposcama la ania'a. 13 Elletsaujoc coca iocjalhmec anquec ania'a apquetlheianma, ca stemacja nac co'o asquelanei'o quetlhencap, malha stemac na co'o apiapma'ac la quetlhencap.
Ncolatsecama aniepetcanwomoc mancolhnemo mo'oc enwalhoc
14 Meliepetcanwoma nquec quetlhencap mancolhno la mo'oc apualho'oc, malha actonac buey anganmelhquesec malecca nennatencasecja la anengieto'oc iamet, ncanec mancapuanquec etnec aplhelhma apeiwomo cacpota njan mepeiwomo, mancawanquec na ncotnec aclhelhma aponmatema cacpota njan ienactesalhma. 15 Mancawanque ncoitec actacmelo caselha apiesecsec Cristo canjan Belial 2 , nnawec na apiesecsec enenlhet meiasqueiam la'a, cacpota njan apiasqueiam la'a. 16 Mancawanque ncolhnancoc caselha aquiocja la alanemmalhca aquieto Engiapom Neten apnemacja, quetlhencap na malha pa'at apnemacja Engiapom Neten apto memasquenwaiam. Lhnac nanec aptemac Engiapom Neten: «Aloca ta, aiaijama ta njan apiesecsec ma'a, co'o ta atnec apuesque 3 pancoc, etnancoc jata njan asquennemolhema» 17 Lhnac nane aptemac mocjom Apuesque: «Elentep jata apiesecsec anac jam, eliengiecja ta, menmanwomanquec nan ma'a caselha apanco'oc ma'a acmowana nac ncolpaisenquesquesec apualho'oc, netamen anmoc jata tacjo co'o, 18 atnec jata apiapma'ac quetlhencap, malha eietcac na apquellennawa'ac, nqueluana'ac najan» lhnac nanec aptemac Apuesque apto apnema apmopuana apanque.
1Isaias 49:8
2Belial
3Dios
Capítulo 7

1 Elialheng'a, aplheianma lhta apenescamo apaioma Engiapom Neten jengeltacmelquesquesec jata nellaniemjaicama ennenco'o ca ncanec ntasec antacmelquesec neliocja nac cacpota njan enwalho'oc, enwanquec na angellajo mota Engiapom Neten, angelienlhanmancoc na metca nellanecamoc caselha ncolatsecama. 2 Elialheng'a, jengenmecjo ta tacja mocjom ennenco'o, mongellaneiancoc ennenco'o ncoietemo napaqtawec quetlhencap, man na annactewascamac ma'a, monnactewascamoc na angenmacmesamaja. 3 Momac'ac co aliamenalhca enenlhet apquellawa nac jam jengetlhenaianca lhna lhta, nellamelacmec ma'a acno la mo'oc engellualho'oc atlheianma njan ma'a, canjan acuo'o la ncolhnemo mo'oc engellualho'oc. 4 Nennactewasemmalhquec ennenco'o engancawec aniem'o mo'oc actema alquetamecama engellualho'oc, ncacjoc coca ncaqjaicama ewalhoc asquellaneio mota quetlhencap ca nqueniemai'ac asuascapecjo m'a canjan apquelpaiesecja mota ewalhoc, jawe ngiapac astacja nac. 5 Awanje lhta nellengaianco ampo'o lhta neluai'o nac jenque'e Macedonia, ma lhta angeliamposammalhca, nellammelhque lhta caselha acmajai'a jennactewacsec ma'a canjan ai'a engellualho'oc. 6 Apquelpaiescacme lhta engellualho'oc Engiapom Neten apto apcapascama Tito jenque'e cacpota antancoc netlhelhma'ac, 7 atse lhta apualhoc apuo'o Tito jenque'e, apsantamo ania'a apqueluesai'a quetlhencap, apquenmajai'o lhnac jengelluetac ennenco'o, nquellaiosesquescanquec nac na apualho'oc quetlhencap aniem'o m'a nentancolha lhta, awanjec nac na altaicama apualho'oc jellanei'o co'o m'a, coca awanjec na acpaijecja ewalhoc asleng'o ania'a apsenta Tito. 8 Asleng'a lhta anmaiosac'a apualho'oc quetlhencap aniem'o waccajac alhta astalhesquescama asquellapasquescama lhta quetlhencap jam, jetnescaso lhta njan co'o acmaiose ewalhoc. Colhua coca nlheianwacjoc ewalhoc ntasec asquelapasquescamo waccajac alhta, amanie altemesquescamo lhnac anmaiosac'a apualho'oc ma'a, coca iacuatacjo lhna ntemac ma'a, 9 netamen atlheianwecjo lhnac na apualho'oc mancolietemo aptaiancolha, ca apquellanecjo lhnac na apualho'oc quetlhencap jam. Monactewasquescama niecje apualho'oc quetlhencap ma'a waccajac alhta asquellapasquescama, aselhtec anmaiosac'a apualho'oc aniem'o coca njan Engiapom Neten ma'a 10 cacpota ncolleltoc ellanecjac apualho'oc ma'a, eluoncasacpoc na tep ¡Ntasec anquec ma'a! Coca apqueluet'o la anmaiosac'ac apualho'oc metca coca apquellanecja apualho'oc, acjemo m'a, nqueliantemacjec amai negetsepmacja m'a. 11 Allaiosai'o lhna apualho'oc quetlhencap necsa apquelietsatecamoc waccajac alhta astalhescama aquiennactema aspaioma asquellaicamoc, coca aniem'o njan Engiapom Neten anmaiosac'a apualho'oc quetlhencap cacpota ellanecjac apualho'oc necsa apnactewascama asuesai'a jetlheianma co'o, nquetlheianwecjec nac na apualho'oc asiamolhma co'o, ca jellatemmocquesquescamo lhna lhta njan alhenammalhca co'o melleltemo alhenalhcac mocjom, apquellai'awec nac na ncotnec jellanei'o ma'a asuacjo la jam. Apquenmajaiwec nac nac jeluetac, jenmasmec nac na napocja jam, apqueliaqmoncasquesecjo lhnac na apquellelto apquenmajai'a jenaqtewacsec. Colhua coca aclheianwacjo ewalhoc ietawec aptaiancolha quetlhencap jam. 12 Apiawec Engiapom Neten asquellapasqueso lhta waccajac asnactalhesquescama lhta jam, jawe njan co'o astengia'a apto la paselhnanemmap canjan metco la apselhnamemmap, wanlha coca co'o actaicama mota ewalhoc aniem'o quetlhencap, squeltawec alpasmoc cacpota angenmasquecsec aquientalhnema nac jam, ca ncanec allapasquesec waccajac astalhescama. 13 Colhua coca nnec alpaiescacmo engellualho'oc jenque'e aniem'o njan nenlengai'a nema alpaiesquescaiam apualho'oc quetlhencap jam, nquelpaijacjec engellualho'oc nellengo ania'a quetlhencap apquelpaiesquescaiam apualhoc Tito necsa apnema jam. 14 Asqueltennasque lhta co'o Tito nquellacjaicama co ewalhoc quelthencap aniem'o apqueliamolhma, necsa apuecja lhta Tito jam apquet'a lhta jawe ngiapac anquec apquellelto apqueliamolhma apanquec quetlhencap, ca stemacja lhta njan co'o ascanemo m'a. 15 Nquetlheianwacjec na apualhoc Tito aquieplomo apquellamelaiam quetlhencap necsa aptaicama lhta amaica'a jam, awanjec na lhta njan apquellai'o m'a, apquelleliejecjo njan. 16 Awanjec co'o acpaijecja ewalhoc, awanje na asqueliamo apqueltemacja actacmanma quetlhencap jam.
Capítulo 8

Nema anquesecja pataccom
1 Elialhneg'a, nenmac'ac angelleltennasama ania'a caselha actacmelo lhta apquelanai'a Engiapom Neten apiesecsec ma'a Jesucristo apquennemolhema aquieto iocjalhma Macedonia. 2 Awanje lhta apquellengaianco niecje m'a, coca apqueluascapme lhta metca alietnocjai'o njan apualho'oc, niecje aptaicamoc metca caselha apanco'oc apquellanquesaicocjec coca pataccom metca apquenmeiauquesammacpo apquellapasquescamo Jesucristo apquennemolhem'a m'a. 3 Apquellaianque lhta apquelapuanquelha la ellancoc, nlho ca la njan tep atquesec mocjom aniem'o apanco'oc apancawec apualho'oc, 4 jengelleltennascama apancawe lhta apquenmajai'a ellancoc patacom apquellanquesecja cacpota elpasmoc Jesucristo apquennemolhema m'a. 5 Apquelpenesawe lhta njan apquetlheianma cacpota ellasennama actacmanma nquec Engiapom Neten, cacpota njan angellasennama ennenco'o. Jai, aptanque lhta apquelleltemacja la etnancoc Engiapom Neten ma'a. 6 Nesca aptaienta lhna lhta amaica'a Tito jam apiesecsec quetlhencap, apqueliatecjo lhna lhta njan ellanquesecjac pataccom cacpota ellapacsec, colhua angellapacsec jata mocjom Tito cacpota eluatac pataccom jam. 7 Asiawe co'o quetlhencap apquelienlhanmecamo mota eliawencasancoc actacmanma actacja la apqueluetai'a apquellanai'a po'oc, meliasqueiam, actacmanma apquelpaqmetecama, apquelianweiacmo, acmases apualho'oc necsa apquenmacmecama, jengellamelaiacmo njan ennenco'o, ca lhamacjo caselha nac apquellanecamoc quetlhencap tep anquec actacmanma. ¡Elienlhanmamoc jata njan eliawencasancoc tep mocjom pataccom apquellanquesecja cacpota elpasmoc po'oc! 8 Jawe aquiennactema ejetong asquelanei'o quetlhencap, wanlha squeltawec aliatecjojo cacpota ellancoc pataccom po'oc, aptaiancolha lhna lhta ma'a engelialheng'a co Macedonia, metca apquenmeiauquesammacpo lhna lhta pataccom apanco'oc ellancoc ma'a, etnamoc jata njan quetlhencap ma'a cacpota eluetacpoc jawe ngiapac anquec apquellamelaiam po'oc. 9 Etnamoc jata njan aptemacja lhna lhta Cristo, nema apquetsecama lhna lhta m'a, coca aptemonwai'ac metca apquetsecama la jenque'e cacpota eltemesquescac quetlhencap malha nema apquelletsecama la'a. 10 Quetlhencap anio lhta apmaniaie apquellapascama pataccom apquellanquesecja aquieplomo allecclemo apualho'oc alhta. Colhua smac'ac allancoc aspaioma 11 ntasec etlhenquesec apquellanquesaicocjac pataccom apquellapuanquelha la'a, aquieplomo njan allecclemo apualhoc. 12 Apquellanco la pataccom aquieplomo alpaijecja apualho'oc, niecje quetsec la'a, nlho ca la njan aquiawai'a pataccom, ncolleccasama ta njan Engiapom Neten. 13 Mangelleltoc ennenco'o etnocjac metca apquelletsecama quetlhencap, etnocjac nema apquelletsecama m'a apquellelto apquetlhewai'a pataccom, nengelleltawec coca ncotnec acnemo mo'oc. 14 Nietnec colhua nquescama apanco'oc caselha quetlhencap, apuanca'ac elpasmoc metca nac apquelletsecama, etnancocjac jatelha njan metca apquelletsecama quetlhencap lhema acnem la'a, jatelha njan ncollengientac na apquelpasmoma quetlhencap ma'a, malha apquelietquescama ta ncotnec ma'a. 15 Ca netmac na actalhesammalhca waccajac Engiapom Neten apaioma jenque'e: «Apto lhta apiaqjecama nquescama, coca ma lhta njan ncolaimelhcac ma'a, apto lhta njan apiaqjecama apcanet apanque, ma lhta njan engiaimecpoc ma'a» 1
Pablo apcapascama Tito
16 Gracias co stemac Engiapom Neten aquietnemo njan Tito aptaicama apualhoc apquellanei'o quetlhencap jam, awanjec apmajai'a elpasmoc malha ctonac co'o. 17 Asqueltennasque lhta Tito ntasec engiacjac etnocjac amaica'a jam, apcasecjawe lhta astacja ascano aniem'o njan apualhoc apanque apmajai'o. 18 Asmac'ac anwapacsec colhuawe nac Tito jam, aplhelhma njan lhema engialheng apto lhnac apquetlheianma mota Jesucristo apquennemolhema lhamacjo iocjalhma apiamolhma m'a, actacmanma apmacmecama lhnac na m'a apaiescama ania'a actacmanma. 19 Apto lhta njan nema aliequiescama cacpota antancoc netlhelhma'ac necsa nenlhengama mota netsenta pataccom nema anquesecja cacpota angellanconwacjac engellialheng'a alaimommalhca nac caselha apanco'oc, wanlha mota netlhengama nenmajai'a angelpasmoc emmo'oc ma'a, nellac'awec na Engiapom Neten. 20 Ca engialheng anac jengelpasme mota apqueltacmelquescama pataccom cacpota mancoitec anmasonca apualho'oc enenlhet, mellentepcasama njan neluesai'a enennco'o. 21 Jai, squelienlhanacmawec co'o mota alanac acpeiwomo napaqtec Apuesque, napaqtawec na enenlhet'awoc. 22 Asmac'ac na anwapacsec po'oc engialhneg eltec na apquetlhelhma'ac jam, apto njan apieplauquescama apmacmecama la'a, apnescamo nja mota apmajai'a epasmoc po'oc, apiawe na apquellelto apqueliamolhma quetlhencap. 23 Asiecpelquemo co'o aptemacja Tito astema nja mota alhelhma, nenmacmecama nempasmecja cacpota ncoltacmelquesquesec apquellaniemjaicama quetlhencap jam, coca apqanet anac engelialheng'a apqueliecpelquemo lhnac aptaiancolha lhamacjo Jesucristo apquennemolhma, apquellai'o lhnac na Apuesque m'a. 24 Eltacmelcaso ta apquellanei'o apqueluactamo ta jam cacpota lhamacjo Jesucristo apquennemolhema lhmanquec jam ncotlheianwacjoc apualho'oc jawe ngiapac actemacja netlheianma ennenco'o apqueliamolhma quetlhencap jam.
1Exodo 16:18
Capítulo 9

1 Elialheng'a apcaqjanco aquieto jam iocjalhma Acaya, astalhescasquec co waccajac actemacja pataccom apquelpenescamo lhta apquelpaqmeiasma ellapasquesec engellialheng'a metca caselha apanco'oc anac ma'a, mmasque smac'o aliatancoc mocjom actemacja nac ma'a 2 ncanec asiawe co'o anmajai'o nquec apualho'oc quetlhencap ellapasquesec pataccom acto nac ma'a. Asqueleltennasque lhta engellialheng'a nac jenque'e Macedonia ncalhquec na co ewalhoc aniem'o quetlhencap, anio lhta apquelpenescamo apquelpaqmeiasma acto jawe ngiapac ellanquescasecjac jata pataccom cacpota ellapasquesec engelialheng'a m'a. 3 4 Colhua smac'ac allapacsec engellialheng'a asquelleltennaso lhta secje lhta cacpota elpasmoc elpenacsec na apquellanquesecja pataccom amanie asuecta ta jam, asquetlhelhma'ac jata njan engelialheng'a aquieto jenque'e Macedonia. Coca mellelpeneso la apquellanquesaicocjac pataccom, jenmancacsec jatelhalha napaqtwec asquetlhelhma'ac, quetlhencap najan aniem'o melpenescamo. 5 Ca nqueniem'ac allapacsec engelialheng'a cacpota ellanquesecjac pataccom apquelpenescamo lhta apquetlheianma quetlhencap. Ntasec elpenacsec apquellanquesecja amanie neluecta ta jam cacpota eluetac asquetlhelhma'a anmajai'o nquec apualho'oc quetlhencap, coca apquellanquesacjo la neluacto ta jam, ncotlhenec jata njan apualho'oc asquetlhelhma'ac aniem'o jellai'a co'o asuactamo la jam.
Acpaijecja enwalhoc nengaicamoc caselhaja
6 Ellailhonojo, apto la apcanma atquetse, quetsec jata njan enaclhec aquielhna m'a. Apto la njan apcanma aquiawai'a, nlhaniec jata nja ncotnec apnaclhema aquielhna m'a. 7 Ntasec ellancoc caselha apmac'acja la ellancoc apualho'oc apancawec coca, metca anmaiosac'a apualho'oc, canjan metca nema aliatecamoc. Apcamelacmec Engiapom Neten apto la apcaicamoc caselha aquieplomo acpaijecja apualhoc. 8 Apuanquec Engiapom Neten ellancoc nquescama caselha actacmanma cacpota mancaimalhque mota caselhaja apanco'oc, ncoliecanwomoc jata cacpota njan elpasmoc po'oc. 9 Ca ctemo nac na actalhesammalhca Engiapom Neten apaiom jenque'e: «Apto la apquennasectema caselha apancoc metca nac apquelletsecama, eloca ta mota apquelanai'a caselha acpeiwomo m'a» 1 10 Apcanquec Engiapom Neten actec apto la apmajai'a ecnecja', apcanquec na nentoma apto la apmajai'a etuoc, engiancoc jata njan aquiecanweiacmo tep anquec caselha alaimommalhquelha la'a quetlhencap cacpota njan quetlhencap ellancoc nquescama caselha engellialheng'a alaimommalhquelha la'a. 11 Jai, Engiapom Neten jata eltemesquesec malha acnema apquelletsecama quetlhencap cacpota ellanconwomoc metca apquenmeiauquesammacpo caselhaja, ennenco'o coca angelletsacjac jata pataccom ma'a, awanjec jata njan etnancoc gracias Engiapom Neten apquellelto apquetlhewaicamoc engelialheng'a m'a. 12 Enwanca'ac jata angenmancoc lhamacjo caselha alaimommalhquelha la'a engelialheng'a, netamen jata m'a ncolactesquesec jata apualho'oc cacpota eltancoc gracias Engiapom Neten ma'a. 13 Jai, jata apquelueto ta m'a pataccom apquellapascama quetlhencap, ncotlhenec jata apualho'oc ma'a quetlhencap apquellelto apquelleliejecjo ania'a actacmanma aniem'o Cristo apquellanemacja etnancoc, netamen jata m'a eltacnescasancoc, ellajoc najan Engiapom Neten apuesai'a aniem'o metca apquenmeiauquesammacpo mota caselha apanco'oc quetlhencap apquellaicamoc aplhamacjo engellialheng'a m'a. 14 Ellamelama ta njan ma'a, elelmalhnesquesec jata njan Engiapom Neten cacpota eltacmelquesquesec apquellaniemjaicama quetlhencap, etnancoc jata njan gracias Engiapom Neten aniem'o apqueltemesquescama apqueliamolhma apancawec quetlhencap ma'a. 15 Jai, gracias ennenco'o nentancoc Engiapom Neten aniem'o caselha aquiawai'a metca aquianmoma jengellaicamoc ma'a.
1Salmos 112:9
Capítulo 10

Apcammelhma Pablo necsa aclhenammalhca apuesai'a
1 2 Moclhem'a quetlhencap apnaqtewascanquec asuesai'a, apquetlheianmo lhnac ncolatsecama astemacja, lhnac asno la jam apiesecsec anac quetlhencap asqueliatecama lhnac ncoiennactema aspaioma, coca lhnac ascapaso la astalhesquescama waccajac quetlhencap jam, ncoijec nac aspaioma astalhescama. Jata apquetlhencaso la apquellentepcasecama asuesai'a jam, alhiemoc jata metca asiecascama cacpota alammelhec ma'a apquellelto nac moc apatno'oc. ¡Eluatesamoc coca apquelentepcasecama asuesai'a! Asqueltawec na aquieplomo apuesai'a Jesus, apto apiamolhma, jengellamelaiam najan. 3 Niecje nellaniemjama apiesecsec enenlhet apquellelto nac melleliejecjoc Engiapom Neten, ennenco'o coca moc actema nentaiancolha. 4 Apquenmac'a mota elammelhec aquientalhnema aquieplomo apqueliennactema apanco'oc apancawec, ennenco'o coca nelammelhquec aquientalhnema aquieplomo apmopuana Engiapom Neten, enaqtewasquesec na aliennactema casecapoc au'alho'oc, 5 enaqtewasquesec na acpaioma acmowana ania'a acmajai'a la ncoiennenquesec, apmopuana njan enaqtewasquesec apquelammacpo apancawec enenlhet'awoc apqueliasecamo na lhma enenlhet apquenmajai'a la eliecpelcoc Engiapom Neten. Nnanquec ennenco'o nenmopuanca'a cacpota angeliaqmoncasquesecjac alquetamecama apualho'oc apquellammelhma la Cristo, angeltemescasecjac atlhenaicama apualho'oc elleliejecjoc Cristo. 6 Angeliaqmoncasquesec jata njan aptaiancolha apquellelto nac melleliejecjoc acuacmo apqueluateso m'a, cacpota njan elleliejecjoc aquiocjo nquec Engiapom Neten. 7 8 Moclhema lhna mota quetlhencap apquetlheianmec aquiawai'a apquelianweiacmo meliasqueiam Cristo, man nac ncaimommalhcac ennenco'o nelleltennasecamoc la mangelleltemo metnanque, coca smac'ac atnec mocjom allanac quetlhencap, Engiapom Neten jengellanquec nelientalhnemo cacpota angelleltennasancoc quetlhencap eltnancoc ma'a, jawe ngaipac anquec ma'a, asqueliatema metca ascammalhco, metca njan asmancactema. Manconmajai'ac na annaqtewacsec quetlhencap, wanlha coca nengelleltemawec angeltacmelquesquesec apquelaniemjaicamaja. Cotlhenama coca apualho'oc quetlhencap nentaiancolha na mota ennenco'o, ncotlheianwomoc jata apualho'oc nengellelto jawe ngiapac anquec mongeliasqueiam Cristo, aniem'acja njan ma'a nengellientalhnemo nac. 9 Molleltemoc co mota nconnelhtenquesec neten aniem'o apqueluetai'a mota waccajac asnaqtalhesquescama. 10 Moclhem'a lhna mota jetlheianmac asiennactema co'o, aquiennactema njan asnaqtalhesquescama waccajac, lhnoca napaqtawec la quetlhencap moiennactema lhnac, moientalhnemo lhnac na. 11 Jata neluacjo ta jam ncoijec jata aspaioma allanjo, ca ctemo nac acpaioma waccajac asnaqtalhesquescama quetlhencap. 12 Moclhem'a quetlhencap apquelietquesacpec po'oc melhnemo, apquetlhenquec na aptanco neten apancawec, coca malha metca apqatco'oc la quetlhencap ma'a, ennenco'o coca montaiancoc ma'a. 13 Mangellammalhcoc na angetlhenec nenmacmecama po'oc enenlhet coca apmacmecama, coca apqueltemo Engiapom Neten ma'a wanlha angellalhcoc nenmacmecama engancawe nac apiesecsec quetlhencap. 14 Lhta mongetlhecmosenco la quetlhencap, acjemo lhta ncotnec nelammalhco, coca netlhecmoseianquec ma'a, emmaniaie lhta njan nelletsauquescama ania'a actacmanma aplhenammap Cristo. 15 Asquelleltennasquec lhec mangelleltemo angellalhcoc angetlhenec nenmacmecama po'oc enenlhet coca apmacmecama, mancoietoc antec ma'a. Wanlha toca angelleltoc jata nquescama la nenmacmecama apiesecsec anac quetlhencap acuenque panco ta aptaicamoc meliasqueiam quetlhencap jam, metca coca nelliecai'a apquenmacmecama po'oc enenlhet la'a. 16 Ca njan nenmac'ac angetso'oc angelpaiacsec ania'a actacmanma m'a tep apcacjaiancolha nac quetlhencap, metca coca nelliecai'a apquenmacmecama po'oc enenlhet la'a, mangelleltoc ncolalhcoc engellualho'oc nenmacmecama po'oc enenlhet la apquenmacmecama. 17 Wanlha lhema caselha coca ntasec ncolalhcoc engellualho'oc, antancoc mongiasqueiam Apuesque. 18 Coca acjemo m'a angelalhcoc enganco'oc engancawec, ntasec coca Apuesque nac ncalhcoc apualhoc aniem'o nenmacmesaicama m'a.
Capítulo 11

1 Eluascapecjo jellanei'o co'o necsa jeiepjesecama malha asqueltaqjenwesquecja alheianma aniem'o ascasennammalhco ejenque', malha njan astaicama la anema. 2 Aniemai'o njan Engiapom Neten jeiaicamoc acmajai'o nac ewalhoc alpasmo mota quetlhencap cacpota elienlhanmancoc acuacmo mancou'o acmasoma cacpota elpasmecjac wanlha Cristo, malha ctonac nqueluana atcoc la metca nema acmanweiam alienlhaneiacmo acuacmo aliemjapo atawa la actema. 3 Ncac'awec co enengiec eliengiecjac jatelha Cristo aptaicamoc apquelleliejecjo, ncolhec jata aliannencaso aniem'o m'a acmowanco nquen anac menasma, aquiennenquescamo lhnac nanec na Eva m'a. 4 Aslenga lhta njan co'o ania'a quetlhencap apquenmaianco lhna lhta tacja allecclemo nquec apualho'oc ania'a nema alletsauquesaiam jam, moc actemacja nquec ania'a nac ennenco'o netlheianmo na mota apuesai'a Jesús. Jai, apquenmaianco lhnac tacja ania'a moc actemacja nquec ania'a actacmanma, apquenmaianco lhnac na tacja lhema cnema enwalhoc, jawe coca m'a Engiapom Neten anac Apualhoc apquetlhewai'a nco lhta secje lhta 5 Malha neten apancawec la niecje m'a apostoles anac apquetlheiam netamen co'o, molhnoc co'o. 6 Niecje moliatecama actacmanma ca aptaiancolha nac ma'a, nietnec coca asianweiacmo aquiocjo ncoie, nquetlheianwacjec apualho'oc quetlhencap necsa apquellengai'a lhta asqueltennaicama jam. 7 Ntase lhta niecje atengiac aquianmoma quetlhencap necsa aspaiescama lhta ania'a aplhenammap Engiapom Neten apiesecsec anac jam, coca ma lhta co'o atengiac aquianmoma m'a apiesecsec quetlhencap jam, coneng apanquec astaiecja cacpota etnancoc neten apancawec quetlhencap. 8 Astengia lhtoca aquianmoma m'a apiesecsec po'oc engelialheng'a nac cacpota angiantac jam, jellasennama njan. 9 Necsa aimommalhca lhta caselha co'o jam, ma lhta alelmalhnecama jelpasmoma la quetlhencap, Macedonia lhta apquelleniem'ac elialheng'ac jellancoc caselha alaimommalhquelha la co'o m'a. Ma lhta alelmalhnecama jelpasmoma la quetlhencap, molelmalhnecjec jata mocjom caselha alaimelhco la co'o, mancomac'ac na allapsonquesquesec apualho'oc. 10 Jai, ncalhquec co ewalhoc ejencoc ejenquec alhenquescama lhta necsa asnema lhta apiesecsec anac jam, apquelliawec quetlhencap jawe ngiapac anquec ma'a astacja nac, meltemo Cristo atnama asmopuana ania'a. 11 Ncotlhenec jatelha apualho'oc quetlhencap mollasecjai'o ncanec molelmalhnecama caselha alaimommalquelha la co'o, coca apiawec Engiapom Neten awanjec asquellamelaiam quetlhencap. 12 Alhenquesec jata metca asquelelmalhnecama caselha la alaimommalhquelha co'o cacpota eluetac apqueltemacja m'a apquellelto nac apostoles apquenmopuanca ania'a jawe stemo nac co'o, ntasec astemacja, jawe aptanco nac ma'a. 13 Apquenmopuanca ania'a m'a apostoles anac, apqueliennenquescanquec enenlhet, apquelietquesacpec malha niecje apostoles, 14 nnawec na satanas anac nquelietquesalhquec enenlhet neten apiamo na lhma. 15 Coca apquellelto nac apquetsecama ania'a apquenmopuanca ania'a wanlha mota apquellasennaicama Satanás, apquelietquesacpec na enenlhet la apiamolhma apquetlhecmoscama acpeiwomo, coca etlhewancoc jato ca m'a nema aquiacmoncasecja apqueltemacja ncollatsecama.
Anmalhco apualhoc Pablo aniem'o apmacmecama actacmanma
16 Alhenecjoc jata mocjom, molleltoc jelleltancoc malha anema lhnac jeiepjesecama aliata m'a aniem'o ascasennammalhca ejenque. Jata actanco la atlheianma apualho'oc quetlhencap ma'a, ncacjoc ma'a ntasec jenmancoc tacja, ellanco ta alhenalhcoc ejenquec iacuatacjo la actacmanma asmacmecama. Ncalhquec co ewalhoc asquellano actacmanma asmacmecama lhta apiesecsec anac quetlhencap, 17 malha anema la asto nac asqueliatecama co'o, asiawe coca njan Engiapom Neten mancoleclemoc apualhoc etacnescasancoc apancoc apanquec enenlhet la'a. 18 Aplhaniec coca enenlhet alammalhco apualho'oc aniem'o apquenmacmecama actacmanma apanco'oc apancawec, co'o ta njan ncalhcoc ewalhoc aniem'o actacmanma asmacmecama. 19 Apquellanec quetlhencap nema apqueliamo apancawec coca apquenmanquec na tacja enenlhet'awoc anac metca apquelianweiacmo, 20 apquenmanquec na tacja m'a enenlhet'awoc anac apqueliateianco nac ellasennama m'a, apquelianmonquescanquec na quetsec quianmoma nquescama coca apquenmacmecamaja, apqueliennenquescanquec najan, coneng na apqueltemesquescamac, apqueltecpoicama njan napaqta'a, coca ncacjoc apqueltacmelquescamawec apquenmaianco tacja quetlhencap ma'a. 21 Smancacquec co'o asmac'o alhenec colhuawe nac, ennenco'o nlho lhta njan ntase lhta niecje antancoc angellanjoc aptaiancolha nac ma'a, coca ma lhta ntaiancoc ennenco'o, neltacmelquescamawe lhta nellaneio ennenco'o quetlhencap. 22 Apquelammacpec na aptaiancoc Hebreos ma'a, co'o njan sto Hebreo, apquelammacpec na aptaianco israelitas, co'o njan israelita, apquelammacpec na aptaianco Abraham aptawana'ac neptamen, co'o njan asto m'a. 23 Apquetlhenacpawec na apancawec apquellelto apquenmacmesaicama Engiapom Neten, co'o coca tep anquec asmacmesaicama Engiapom Neten. Malha ascammalhco co'o astacja nac asqueliatecama, ncacjoc coca alhenquesec jata asqueliatecama, tep anquec co asmacmecama m'a enenlhet'awoc anac, nlhaniec ascaclhencasemmalhca nenmammalhquelha, nlhanie lhta njan nema jeliaqpelhquetaicama, nlhaniec na atlhenquescama amatong. 24 5 aptaiecjo njan jelelliaqpelhquetaicama apquelientalhnemo nac judíos, 39 nema jeliaqpelhquetecjo mota acuacmo acsaujelhco 5. 25 Janet'olhema actaiecjo njan jeltecpoicama iamet, lhema actema coca jeliaqnai'a metaimong. Janet'olhma njan acuaiwecamoc loma nemmen necsa alhengama, nquetlhenquescanquec na anwetsepoc, lhema acnem na aspatjetma nemmen iamet acpaijema acuacmo lhta apqueluo'o jelpasmoma. 26 Alhengamo lhta njan acuenactema nquec, asiecai'o njan aluata asquetsepma quelha lhta niecje, man na ntec atlhenquescama ncolhec jenmenielhcaso caselha ejencoc, aspaiomo lhema ejenquec na jelelliaicama apquenmajai'a jenactewacsec cacpota njan po'oc enenlhet anac. Aslengaianquec aquientalhnema apiau'acja temma nac, iocjalhma, aluata aquiau'acja cacpota njan apiesecsec engelialheng'a meliamolhma nac. 27 Aslengaianquec na aquientalhnema asmacmecama, asiampei'o, metca asteianma, mec jeiaqjema aimommalhca astoma, acnem na jeiaqjema, aslengaianquec na apmap semange, apcaimommap astalhnema. 28 Nlhaniec mocjom caselha aslengaianco, lhamacjo cnem na actaicama ewalhoc aquientalhnema aniem'o elialheng'a lhamacjo eiempec lhma nquec jam. 29 Asleng'o la lhema engialheng acmasca apiempec ma'a, co'o njan malha acmasca eiempec na stajac, aslengo la njan lhema engialheng apiepconammap m'a, awanje ntac na sloma m'a. 30 Lhamacjo caselha nac ntemescasquec ncoiennactema ewalhoc, coca ncacjoc ncalhquec ewalhoc aslenganco aniem'o quetlhencap. 31 Apiawec coca Engiapom Neten metca astaicama asmopuana ania'a alheno lhquec, ntasec angeltacnescasanco mota Engiapom Neten apiapom apuesque engancoc Jesús. 32 Asmac'ac aleltennasama quetlhencap actacja lhta asuetai'a m'a Damasco, gobernador apto apcasennaicama apiau'acja apuesque Aretas apcapaso lhta guardias cacpota jepatjetec co'o aquieto atong apiau'acja temma nac ma'a, 33 coca asquetlhelhma'ac jellaqlhencasque lhta lhema iama posac aquiawai'a, jeluaiwesantamo lhta aquieto atong atcoc coneng necja acjalhtemommalhca apiau'acja temma nac, ca asquenio lhta njan ma'a.
Capítulo 12

Acuetai'a apaqtec Pablo
1 Acjemo alhenalhcoc ejencoc ejenquec co'o, ncacjoc coca smac'ac aleltennacsec actemacja acuetai'a lhta ejaqtec, caselha aquielhammalhca njan aniem'o 2 Apuesque. 3 2–3 Asiecpelquemelha co'o lhema enenlhet apto lhta meiasqueiam Cristo nemo nac aquiantemecjo acuacjo janet'olhema au'alho'oc apqueliecaicamoc neten 1 , nwacmec 14 anio m'a, apiocjo quelhaja nlhco ca la apjangoc, Engiapom Neten apiawec ma'a. 4 Nnenquec aquiantamo m'a aquieto iocjalhma actacmanma, aplengai'ac nac ma'a caselha monlengai'acja, manmopuana njan anlhenec. 5 Coca ntasec ma'a engiacpoc enenlhet anac ma'a, co'o coca jawe, coca wanlha ntasec ncoleccasama ewalhoc jeietacjo la moiennactema 6 Ntase niecje ncalhcoc ewalhoc aniem'o caselha jempelapquescama asuetai'a, coca mancomajai'ac atnec co'o anmalhco ewalhoc ncanec ellengac enenlhet ncotlhenec apualho'oc asto neten ejenquec co'o, jawe co'o sto niecje m'a. 7 Acuia'o lhta mota njan apascama Satanas cacpota jetuacsec co'o, malha jelieclhaclhema lhta mota ntemac quetama eiempejec cacpota mancoujec ascammalhco aniem'o asuetai'a acuetai'a ejaqtec. 8 Janet'olhema astaiecjo lhta asquenmalhnoncoma Apuesque asqueltemo emasquecsec aslengaianco, 9 jeiatemmoma lhta Apuesque, lhta aptac: — Wanlha coca ncaimelhcac anwamelemma lheiap, aquiawai'a asmopuana stajac acuo'o nlho meiennactema lheiap— lhta aptac Apuesque. Malha ntasec atnec moiennactema ncanec Cristo jeiancoc jata apmopuana cacpota aiepjonwomjoc necsa acuai'a la aquientalhnema. 10 Awanjec asuascapma necsa moiennactema, necsa aimommalhca njan caselhaja, nema jeiaqmasecama, necsa acuai'a aquientalhnema aniem'o enenlhet apquenmajai'a jenactewacsec aniem'o njan moiasqueiam Cristo, niecje stema moiennactema, Cristo coca nquengiactac asiennactema. 11 Astec co'o malha la anema aniem'o anmalhco ewalhoc ejencoc ejenque, jawe njan asto neten ejenque, quetlhencap coca nquelleniemai'ac mancolleccasecama apualho'oc jellanjojo, ca nqueniemai'ac na ncalhcoc ewalhoc ejencoc ejenquec aniem'o asmacmecama apiesecsec anac quetlhencap. Snawec na co'o m'a apostoles alhta apquellelto lhta neten apancawec apquenmacmeianca lhta njan apiesecsec anac quetlhencap. 12 Apquelliawec quetlhencap asto njan apostol co'o, apqueluetai'a lhta asmacmeianca metca aspecjescama, asquelania'a lhta njan caselha monwetai'o aniem'o neten, caselha jempelapquescama njan, caselha aquiawai'a acmowana njan apiesecsec anac quetlhencap. 13 Ma lhtoca alelmalhnecama aquianmoma la asmacmecama apiesecsec anac quetlhencap jam, coca mo'oc apquellawacja nac Jesucristo apquennemolhema jellaianque lhta aquianmoma asmacmecama apiesecsec ma'a, quetlhencap coca manjellaiancoc. ¡Jellasecjecjo telhaja malha aquiawai'a asnaqtewascama la quetlhencap molelmalhneianca lhta aquianmoma asmacmecama jam!
Pablo apmajai'a etnec amaica'a mocjom Corintios
14 Aspenesawec asquelanecja astacja cacpota atnentac amaica'a mocjom jam, janet'olhema ta ncotnec astema amaica'a, moleltoc na quetlhencap jellancoc caselha astoma la'a jam, momac'ac na aljatsoscasancoc caselha apanco'oc, wanlha coca smac'ac alpasmoc quetlhencap jam. Malha actonac engiapom la'a apcanquescasecamo mota caselha cacpota ellancoc apquetcac, jawe apquetcac ellanquescasancoc caselha apiapma'ac la'a. 15 Nnawec na co'o ntasec aietepoc pataccom canjan lhamacjo caselha ejencoc cacpota ncoltacmelquesquesec apquellaniemjaicama quetlhencap, ntasec na ncowaiwentac asmacmose aniem'o jellasennaicama quetlhencap. Niecje acuanecamoc asquellamelaiam quetlhencap, aselhtec coca njan jellamelaiam quetlhencap. 16 Moclhem'a quetlhencap apquelliawec motengiai'a lhta co'o aquianmoma asmacmecamaja, napocja toca jetlhenec asmopuana atnama asmopuana ania'a. 17 18 Jetlheianmo lhna lhta ascapascamo nac Tito cacpota njan aplhelhma cacpota anactewasojo quetlhencap ma'a. ¿Apnactewascamawe nlho Tito quetlhencap, je? Mma, menactewascamoc ma'a, aptacmelcasemmacpawe lhta m'a Tito, malha astonac co'o, acnemo njan ewalhoc co m'a. 19 Quetlhencap elialheng'a asquellamelaiam, nquetlhenquec quelha apualho'oc nellasennammalhca engancoie napaqtawec quetlhencap, mancaimelhcac antancoc ma'a ncanec wanlha mota nentengiancoc angeltacmelquesquesec apquellaniemjaicama quetlhencap jam aniem'o nengellelto nengeliamolhma nellasennaicama Cristo, apiawec Engiapom Neten acto jawe ngiapac anquec alheianma nac. 20 Ascac'ac co'o m'a etnancoc asuactamo ta jam aliasancolhma aniem'o co'o, co'o telha njan jeliasanco lhma quetlhencap asuactamo ta jam. Asca'ac co'o njan aluetanwetac apellatemmommap, apqueliasepquescama, apquelloma, atlhenammalhco nque apualho'oc apancawec, elentepcasama apuesai'a po'oc apquenmopuanca ania'a coca, etlhenama apuesai'a po'oc aptacja la'a, elacpojo, lhamacjo caselha ncolatsecama aptaiancolha. 21 Ascac'ac na astanta mota amaica'a jam jetnesquesec Engiapom Neten asmancactema napaqtawec quetlhencap acuacmo ta asueno aniem'o asqueluetanwecta apquellanecamoc ncollatsecama mocjom, meliengiecja mocjom meliamolhma, canjan lhamacjo actemacja apquellanactema, cacpota njan apqueltemenwecjo lhma.
1Tercer cielo
Capítulo 13

1 Anianta ta mocjom astaienta la amaica'a jam janet'olhema ta ncotnec asuecta jam, lhamacjo actemacja aquientalhnema ta alanecja co'o, wanlha coca apquellaimecpec apcanet, nlhco ca la apcanet'olhema enenlhet apqueluetaianco la caselha ncolatsecama acuetammalhca m'a. 2 Asqueleltennasque lhta secje lhta astaiento lhta amaica'a jam, atnec jata aquiennactema aspaioma asquellanei'o apquellelto apquellanecamoc anac meliamolhma, alhenecjoc jata mocjom colhuawe nac, atnec jata asqueliennai'o asquellanei'o 3 Atnec jata aliatama malha Cristo, metca apqueliatecama lhta ncoiennactema necsa apiaqmoncasquesecja aptemacja la enenlhet, aquiennactema lhta apaioma m'a. 4 Malha lhta niecje meiennactema la necsa nema aliaqlhaclhema apmeio'oc apmanco'oc neten iamet actennescama m'a, colhua coca aploca mocjom aniem'o Engiapom Neten apmopuana. Ennenco'o njan malha mongeliennactema la'a ca actemo lhta njan Cristo, coca nelpasmecjac Cristo nqueniemai'ac neliennactema nac, jata angenmama nenmopuanca'a nac cacpota angeliennacteso nelpaqmeiasma angellanjoc quetlhencap jam. 5 Ellanjoc coca apualho'oc apancawe nac quetlhencap cacpota eliojoc aliennactema nquec quelha meliasqueiam Cristo, ncotlheianwacjoc jatelha njan apualho'oc ncolatsecama apquellanecamoc. 6 Ennenco'o coca ntasec lhta nellanecamoc caselha apiesecsec anac quetlhencap. 7 Colhua coca ennenco'o nengellelmalhnescasquec Engiapom Neten elpasmoc quetlhencap mellananquec jata mocjom caselha ncolatsecama, jawe ncollacjama engellualho'oc engancawec aniem'o netlhecmosecamoc ennenco'o, ncacjoc ncotlhenec apualho'oc enenlhet acjemo nenmacmecamaja apiesecsec anac quetlhencap, wanlha coca nengelleltawec ellanancoc caselha altacmelo quetlhencap. 8 Mancomajai'ac nac angellanancoc mancoietemo nac, nenmajai'ac coca mota angellanancoc aquietemo ncoie. 9 Jai, niecje mongeliennactema, ncacjoc coca nquelpaijacjec engellualho'oc ncanec melleija sonquec quetlhencap, nengelmalhnescasquec na lhamacjo acnem cacpota ncanantancoc aptaicamoc apquelpeiwomo. 10 Asnactalhescasquec waccajac anac astalhescama aquiennactema aspaioma amanie acuaiam jata ncotnec jam, cacpota moliennajec asquellanei'o asuactamo ta jam, ncanec jeianquec Engiapom Neten asientalhnemo cacpota ncoltacmelquesec apquellaniemjaicama quetlhencap, jawe asmajai'a anactewacsec najan. 11 Jai, ntase, asqueltawec co'o ncolpaijecja mota apualho'oc quetlhencap jam, elienlhanmamoc jata mota eliawencasancoc apquelpeiwomo, eliatamo ta mota po'oc, elloca ta lhemec acnemo mo'oc apualho'oc, metca altaicama apualho'oc apiesecsec anac quetlhencap jam. Engiapom Neten apto ngiapon metca actaicama enwalho'oc, nengamelaiam angiapom najan etnancoc apquetlhelhma'ac amota. 12 Elpaiwesacpo ta mota apancawec apiesecsec anac quetlhencap aquieplomo apquelpetsesammap apmalhempenec po'oc malha apquelialheng'a apancawe nac, canjan apquellapasac atlheianma apualho'oc engelialheng'a nac jenque'e. 13 14 Asqueltawec co'o apuesque Jesucristo ewaiwesenta mota nengiamolhma apancoc tacjaplhet'oc quetlhencap, jengamelaiam anac apancoc Engiapom Neten ncoltacmelquesquesec apquellaniemjaicama quetlhencap canjan Apualhoc apanquec ncotnanco mota atlhelhma'ac.