2 Tesalonicenses
2 Tesalonicenses
Capítulo 1
1 Ennenco'o Pablo, Silvano canjan Timoteo nquetlhenquec engellualho'oc apquellelto meliasqueiam apquellawa jam aquieto apiau'acja temma Tesalónica apquellelto njan apquelpasmecja Engiapom Neten engiapma'ac ennenco'o canjan apuesque engancoc Jesucristo. 2 Nengeltawec na Engiapom Neten apto engiapma'ac canjan Apuesque engancoc Jesucristo eluaiwesentac tacjaplhet'oc quetlhencap negamelaiam canjan metca acmasca. 3 Quetlhencap Elialheng'a, nietawec antanco mota gracias Engiapom Neten ncanec nwanengiec meliasqueiam anac quetlhencap lhamacjo acnem, nwanengiec na apquellamelammacpo apiesecsec anac quetlhencap jam. 4 Wanlha mota netlhenaicama actacmanma apqueluesai'a quetlhencap napaqtawec la apqueltemo lhemec meliasqueiam Engiapom Neten, ncanec quetlhencap njeclhec apquetlhenquescama aliennactema apualho'oc meliasqueiam necsa nema acmenlhenaicama canjan apquellengaianco aquientalhnema. 5 Engiapom Neten apto apeiwomo jata ewaiwesentac aquientalhnema tacjaplhet'oc ma'a apquellelto nac apnaqtewascama quetlhencap aniem'o m'a apquellasennaicama Engiapom Neten quetlhencap, eleltennacsec jata njan quetlhencap ma'a alietemo aptaicamoc apquennemolhema apanquec ma'a aptemacja la apuesque. 6 Jai, nietawec ellancoc apquellengaianco aquientalhnema Engiapom Neten ma'a enenlhet'awoc anac apnaqtewascama quetlhencap, 7 ellancoc jata njan apqueliamposammap quetlhencap ma'a, ennenco'o ta njan. Jata ncowac ma'a apquelhiacmo ta neten puesque engancoc Jesús, apquetlhelhma'ac enenlhet neten nema apquenmopuanca'a aisecsec talha aleiwoma. 8 Ewatac jata cacpota ellancoc aquiaqmoiecja apquellelto nac menmaicamoc tacja Engiapom Neten canjan melleliejecjo lhta ania'a actacmanma aplhenammap apuesque engancoc Jesús. 9 Jai, mancotnenwaiam annelha ta aquiaqmoiecja apqueltemacja m'a, elentepcasacpoc jata njan napaqtec Apuesque apto apientalhnemo canjan acnema apmopuana. 10 Ncotalhcac jata m'a apuactamo ta Apuesque cacpota ellajoc ma'a, ncoliemacsec jata njan apualho'oc apquennemolhema apancawec apqueliequiescama lhta, apquellelto njan meliasqueiam ma'a. Jai, quetlhencap najan apquellelto napocja apquennemolhema Apuesque ncanec meliasqueiam alhta nenlheianma mota apuesai'a m'a. 11 Engiapom Neten apto apquellawecama quetlhencap ca ncanec ntasec eltacmelcasacpoc aquietemo nquec, nengellelmalhnescasque mota Engiapom Neten elpasmoc elleliejecjoc ma'a, ellancoc na apquenmopuanca'a cacpota ellanancoc lhamacjo caselha altacmelo apquenmac'acja la ellanancoc aniem'o alpecjesaicama meliasqueiam. 12 Netamen, eluetac jata aplhamacjo enenlhet'awoc ma'a, ellajoc jata apuesque engancoc Jesús, ellacpoc jata njan quetlhencap ma'a. Ca lhamacjo caselha nac ma'a ncotnec jata acuetammalhca aniem'o aquiawai'a jengamelaiam Engiapom Neten canjan Apuesque engancoc Jesucristo.
Capítulo 2
Amanie apmajai'a ewatac Jesús ewac jata enenlhet meijamolhma
1
Quetlhencap elialheng'a, asquelleltennasque lhta actemacja nac ma'a apuactamo ta apuesque engancoc Jesucristo cacpota jenganquesecjac ennenco'o m'a.
2
Mellanco nquec ncolhec aliennencaso, mennelhtenganquec na neten apquelleng'o ta ania'a acuai'a acnem apuecta apuesque Jesús, apquetlheno la m'a enenlhet'awoc anac ania'a aniem'o apqueluetasquescama apaqto'oc Espiritu Santo, canjan elleltennacsec jata actemacja nengetlhecmosecamoc ennenco'o neliocjo engancawe canjan waccajac nennactalhesquescama lhta.
3
Coca mellanco nquec eliennenquescac ma'a, amanie apuecta ta Apuesque eluac jata apquellamelhma Engiapom Neten cacpota ellammelhec ma'a, eiepjonwac jata enenlhet meijamolhma ncomajac jata etuasec lhamacjo caselha.
4
Coca apto m'a apcammelhaicama Engiapom Neten, engiammelhec jata lhamacjo caselha alleniem'o Engiapom Neten cacpota njan apquelpoccanma Engiapom Neten. Awanjec jata ncotnec ncolatsecama, epeccanwomoc jata aptanema aquieto Engiapom Neten apnemacja, elhenacpoc jata apanquec na apto Engiapom Neten ma'a.
5
¡Ncotlheianwacjo ta mota apualho'oc, asquelleltennascamo lhta mota caselha ncolatsecama nac necsa asnema lhta jam!
6
Apquelliawec quetlhencap malha nema aquiennactescai'a ntemac ma'a
enenlhet anac meijamolhma, coca eiepjonwac jata m'a aquietemo m'a acnem acmac'acja ta ncotnec.
7
Nquénawec apenescamo apquellanecja aptacja ncolatsecama aquielhammalhca m'a, wanlha coca aimelhco m'a nema aclecquescama la nema acmanwai'a m'a
8
netamen eiepjonwac jata m'a. Coca ewatac jata njan ma'a Apuesque aquieplomo apcaponmatema, apuatepnapma ta njan ncotuacsec ma'a, metca apiennactema ta njan etnec ma'a.
9
Ca enenlhet anac meijamolhma m'a ncongiemac jata acpasmoma satanás, ncancoc jata njan aquiawai'a nquec apmopuana cacpota elanac caselha jempelapquescama malha aniem'o neten cacpota njan caselha monwetai'o,
10
elanecjac jata aptacja m'a lhamacjo actemacja caselha ncolatsecama cacpota eliennenquesec enenlhet'awoc apquellelto ta apquenmaicamoc ma'a aquieto apquenmasquenwaianlha ncanec manconmajai'ac enmancoc tacja acto jawe ngiapac anquec, mellamelaicama njan ma'a cacpota eluoncasacpoc niecje tep ma'a.
11
Engiancojoc jatoca Engiapom Neten nema aliennenquescama enenlhet'awoc ma'a, meliascamec jata njan nema acmowana ania'a,
12
netamen jata m'a ncolhec jata aleltanco m'a apquetselhnanemmap apancawec ncanec apqueliascacmec acto jawengiapac anque, nquelleclemawec na apualho'oc caselha ncollatsecama nac.
13
Quetlhencap elialheng'a apquellamelaiacmec Apuesque, wanlha mota ennenco'o nentaicamoc gracias Engiapom ncanec apqueliequiesaianquec tep nac nanec apmaniaie apancawec ma'a cacpota eluonquesec tep aniem'o Apualhoc apqueltemesquescamo njan apquelpocquenammap ma'a aniem'o lhta meliasqueiam quetlhencap ma'a ania'a acto jawe ngiapac.
14
Apquellawecama lhta Engiapom Neten aniem'o ania'a actacmanma nengetlhecmosecamoc alhta, eltoc jata njan elpasenwomoc ma'a apientalhnemo apuesque engancoc Jesucristo,
15
ca ncanec ntasec etlhenquesec meliasqueiam aquiennactema, meluancamanquec na nengetlhecmosecamoc alhta aniem'o waccajac nennactalhesquescama lhta nlho ca la njan neliocjo engancawe lhta.
16
Jesucristo apto apuesque engancoc, Engiapom Neten apto engiapma'ac apto njan jengellamelaiam, apquelpaiescaiam amota engellualho'oc, jengellaianco njan actacmanma ncoie' alleljalhnecama engellualho'oc caselha ncowac jata.
17
Nelelmalhnema njan ma'a Engiapom Neten eliennactesquesecjoc apualho'oc, ellancoc nac apqueliennactema cacpota ellanancoc, etlhenec na mota altacmelo caselha.
Capítulo 3
1 Engelialheng'a, nengelleltawec na ennenco'o jengellelmalhnesquesec cacpota enwanca'ac angelpaiacsec ania'a aplhenammap Apuesque lhmanquec jam cacpota ncotnec na actacmanma apquenmaicamoc tacja enenlhet'awoc ca actemo lhta quetlhencap jam apiesecsec anac. 2 Jengellelmalhnesques najan cacpota jengeltacmelquesec Engiapom Neten necsa apquenmajai'a jennactewacsec enenlhet meliamolhma, apqueltemenwecjo lhma la'a apqueliasqueiam la njan Engiapom Neten. 3 Engiapom Neten apto apeiwomo elpasmoc jata m'a cacpota ncoliennac meliasqueiam quetlhencap, enmeiwoc jata njan necsa acmajai'a la ncowac ncolatsecama. 4 Nengelliawec ennenco'o quetlhencap apquelleliajacjawe mota nengetlhecmosecamo lhta, etlhenquesec jata njan mocjom ma'a nengetlhecmosecamo lhta aniem'o Apuesque engancoc. 5 Nengelleltawec na ennenco'o elpasmoc apuesque Jesús cacpota ellamelemmac po'oc ca aptemo nac ma'a Engiapom Neten apquellamelaiacmec aplhamacjo enenlhet'awoc, ellancoc na apqueliennactema cacpota eluascapoc necsa acuai'a la aquientalhnema. 6 Quetlhencap elialheng'a, aquieplomo apuesai'a apuesque engancoc Jesucristo mangelleltoc eliepetcanwomoc engelialheng'a nentemo lheme nac manconmajai'a enmacmama canjan melieplauquescama nengetlhecmosecamo lhta. 7 Quetlhencap coca ntasec eluanancoc nentaiancolha lhta ennenco'o jengeluetai'o lhta jam, aquietemo nque lhta nentaiancolha m'a, 8 ma lhta antoiancoc nentecamoc metca aquianmoma la'a, nientelhec anque lhta mota nenmacmecama lhamacjo acnem cacpota mongelientalhnesquesec apualho'oc quetlhencap jam jegellanco nlho mota nentecamoc. 9 Enwanca'a nlho lhta niecje angellelmalhnama jengelpasmoma la'a metca aquianmoma aniem'o nelemjama enmaniaie ennenco'o, coca montaiancoc ma'a, nemacmecama coca cacpota angenmancoc nentecamoc, ca nentaianco lhta ennenco'o m'a nengelleltemo ntasec jengeluanancoc quetlhencap ma'a nentaiancolha lhta. 10 Necsa nelloma lhta jam nellanque lhta njan ennenco'o lhema jenganemacja, ca ntemac jenque'e, enenlhet mancomajai'a la emacmamaja, mancoietoc na elhcac aptoma. 11 Nellengai'ac coca apqueluesai'a moclhem'a apiesecsec anac quetlhencap acjemo lhna ntemac apquellaniemjaicama, manconmajai'a enmacmamaja, wanlha lhna mota apquetlheianweiacmo aptacja la po'oc temma apqueluetai'a. 12 Coca mellammelho nquec aquientalhnema, enmacmama coca cacpota eluetac aptecamoc, nengelleltawec ennenco'o m'a aniem'o apientalhnemo apuesque engancoc Jesucristo. 13 Coca quetlhencap engellialheng'a nengelleltawec ellananco mota caselha altacmelo. 14 Jata apquelueto ta po'oc meliejecjo waccajac nennactalhesquescama nac, meliepetcamanquec ma'a cacpota njan enmancanwomoc ma'a. 15 Coca mellammelhanquec na m'a, ntasec coca ennawacsec ma'a metca apquelpalhencasecama, malha actonac apquelialheng'a apancawec la'a. 16 Jai, asqueltawec Apuesque apto ngiapom metca actaicama enwalhoc, ellancoc na metca altaicama apualho'oc nesca acuai'a lhamacjo actemacja aquientalhnema, etnancoc jata mota apquetlhelhma'ac ma'a. 17 Co'o Pablo astalhescama ejenquec jenque'e nlhenquec ewalhoc quetlhencap, aquieplomo njan astalhescama asuesai'a ca ntema mota lhamacjo waccajac astalhescama. 18 Asqueltawec na apuesque engancoc Jesucristo ewaiwesentac apquellamelaiam tacjaplhet'oc quetlhencap.