Efesios
Efesios
Capítulo 1
Aclheianma apualhoc Pablo apquelialheng'a aquieto Efeso
1
Co'o Pablo asto jeliequiescama lhta Engiapom Neten cacpota atnec apostol Jesucristo apancoc, nlhenquec ewalhoc apquellelto Engiapom Neten apquennemolhema apcacjanco jam Efeso, meliasqueiacmo njan Jesús, aptanco njan apquelpasmecja m'a.
2
Asqueltawe co'o Engiapom Neten cacpota njan Jesucristo apuesque engancoc ewaiwesenta tacjaplhet'oc quetlhencap apquellamellaiam,
metca acmasca njan.
3
Asqueltawec atacnescasancoc Engiapom Neten apto apiapom apuesque engancoc Jesucristo, ncanec apcapascamo nquescama caselha altacmelo aniem'o neten cacpota ncoltacmelquesec nellaniemjaicama m'a aniem'o nelpasmecja mota Cristo.
4
Amanie lhnac nanec apquelanai'a lhamacjo caselha lhma nquec jam, jengeliequiescanquec nac nanec na Engiapom Neten ennenco'o aniem'o njan Cristo cacpota antancoc apquennemolhema angelloca metca neltemenweiacmo lhma' napaqtec ma'a. Awanjec anquec jengellamelaiam Engiapom Neten,
5
ca nqueniemai'ac na jengeltemesquescamo apquetcac aniem'o Cristo. Jai, aptemenquec ma'a ncanec aquiawai'a apiamolhma m'a,
6
ntasec angeltacnescasanco mota apuesai'a m'a aniem'o aquiawai'a jengellamelaiam, apqueltacmelquescamo njan nellaniemjaicama aniem'o njan Apquetca apcamelaiam.
7
Apquetsepme lhta Cristo aquienquenammalhco njan ema apancoc cacpota jengelpaqnencasquesecja necsa lhta jengenmaicama mongeliamolhma, jengenmecjo njan tacja m'a. Coca m'a apenescamo lhnac nanec Engiapom Neten apquelanecja aptacja etnec jata aniem'o aquiawai'a jengellamelaiam.
8
Apqueltacmelquescamo njan nellaniemjaicama tep anquec ma'a jengellaianco aquiawai'a nelianweiacmo cacpota njan nelliamo caselhaja
9
cacpota angeliamwomjoc ma'a apenescamo lhnac nanec apmac'acja ta etnec aniem'o apiamolhma jengellanei'o, malha aposcama la caselha apmajai'acja etnesquesec apquelanei'o Cristo.
10
Apenescamo lhnac nanec apquelanecja aptacja, ncowac jata acnem metca apiecascama aquietemo nquec aptemesquescama apuesque Jesus jalhma nquec jam neten cacpota njan nalhepop anac.
11
Jengeliequiescamo lhnac nanec na Engiapom Neten cacpota antancoc apquennemolhema, angetlhewancoc jata njan caselha aplheianmo lhnac nanec Engiapom Neten, aptemenque ma'a aquietnaicama apaqtec nac nanec etnejec, aptemenque mota m'a apmajai'acja la etnec.
12
Apqueltemawec na Engiapom Neten mongeliascamec emananiaie engancawec Cristo cacpota njan angeltacnescasancoc apuesai'a aniem'o aquietnema aquiawai'a apmopuana m'a.
13
Quetlhencap na apquellailhemawe lhta ania'a actacmanma acto jawe ngiapac anquec actemacja jenwonquescama tep, meliasqueiacmo lhta njan ma'a aniem'o Cristo. Aptemo njan malha apnaqtalhescama lhta njan caselha mongenatquescama apualho'oc apuesai'a Engiapom Neten Apualhoc cacpota etnancoc malha apanco'oc ma'a, aplheianmo lhnac nanec na Engiapom Neten ellancoc Apualhoc apanque.
14
Apquelientemonquescamo apmanie jengellaicamoc Apualhoc apanque' cacpota ncotlheianwacjoc jata mota engellaulho'oc jawe ngiapac anquec angetlhewancoc lhamacjo actemacja apenescamao apaioma aplheianma etnec jata necsa acuai'a ta m'a aquiocjo nquec metca nema jengenmaicama mongeliamolhma, nenlhamacjo ta njan ma'a angeltacnescasancoc apuesai'a aquietnema njan aquiawai'a nquec apmopuana.
Nengianweiacmo aniem'o Engiapom Neten
15
Asqueliawec co'o quetlhencap meliasqueiam apuesque engancoc Jesús, apquellamelaiam na aplhamacjo apquellelto Engiapom Neten apquennemolhema,
16
ca nqueniemai'ac astemo gracias Engiapom Neten, aspacmetquescama mota njan ma'a cacpota eltacmelquesquesec apquelaniemjaicma quetlhencap jam.
17
Asquelmalhnescasquec na Engiapom Neten aquietnema apmopuana apto apiapom apuesque engancoc Jesucristo, ellanesancoc apualho'oc nengianweiacmo cacpota ncowescac apquelianweiacmo aptemacja m'a.
18
Asquelelmalhnesquescanquec na Engiapom Neten cacpota etnec malha apquelaponmatquesquescama alquetansema apualho'oc cacpota ncowac apquelianweiacmo quetlhencap apquellelto nac nema aliequiescama cacpota etlhewancoc altacmanma apquellaniemjaicama m'a, elleljalhnec na metca apqueliasqueiam ma'a. Jai, caselha altacmanma nquec, acmennawe nquec ma'a apnescamo lhta Engiapom Neten cacpota ellancoc jata apquellelto apquennemolhema apanque'.
19
Asquenmalhema njan elianwesquescamjoc aquieplomo apmopuana mancomowana ncomasquenwomoc cacpota elpasmoc aplhamacjo enenlhet'awoc, ca aquiawai'a apmopuana nac, apiennactema njan
20
aclhatecjasecjo lhnac Cristo necsa apquetsepma, cacpota njan acnesquecjo m'a neten aquieto aquiennacja,
21
aptemesquescamo njan apuesque neten apanquec tacjalhet'oc casecapo au'alho'oc alientalhenmo nque nac, acnema nac anmowanca'a, canjan aluescai'e. Cristo coca apientalhnemo apiepjonweiacmo njan aisecsec anac ma'a metca nnelha.
22
Jai, Engiapom Neten aptemesquescamo apuesque Cristo tacjalhet'oc lhamacjo caselha lham nquec jam, apto njan malha apqatec apiesecsec Engiapom Neten apquennemolhema,
23
aptaianco nac na m'a malha apiocja Cristo, apquellaianco njan caselha la alaimommalhquelha m'a, mamma alaimommalhquelha la njan.
Capítulo 2
Metca aquianmoma jengeluonquescama tep Engiapom Neten
1
Malha apqueletsepma lhta ntemac quetlhencap napaqtec Engiapom Neten aniem'o meliamolhma', caselha ncollatsecama apquellanecamoc ma'a.
2
Apquelnawe lhta quetlhencap aptaianquelha nac enenlhet'awoc anac melleliejecjo Engiapom Neten, apquelleliejecjawe lhta quetlhencap casecapo au'alho'oc awesque nengiawa nac, anmaicama nac aplhamacjo apquellelto nac meleliejecjo nac ma'a.
3
Ennenco'o lhta njan nengelleliejecjawec anmajai'acja nque nac engellualho'oc angellanancoc caselha ncolatsecama, ncolatsecama alquetansema engellualho'oc najan, nengelleliejecjawe lhta mota aliasponcomacja nac engellualho'oc wanlha mota actengiaicama ncolanac ncolatsecama, jengellietemawe lhta angetlhewancoc nema aquiaqmoncasecja nnawec na m'a aplhamacjo enenlhet anac melleliejecjo.
4
Coca apquelietnai'awec lhta nengaqta'a Engiapom Neten ma'a, awanjec anquec jengellamelaian,
5
niecje malha nengeletsepma' aniem'o mongeliamolhma, jengellaianquec coca
nentaicamoc enjalhnanco'oc aniem'o Cristo.
Jai, jengeluonquescanquec tep Engiapom Neten aniem'o aquiawai'a apiamolhma m'a,
6
malha neletsepma lhta nentaiancoc ma'a coca nennaclhatecjanweiacme lhta m'a aniem'o Cristo, ca jengacjescacjo lhta njan napocja m'a aquieto neten.
7
Netamen eluetac jata aplhamacjo enenlhet'awoc apto apiamolhma Engiapom Neten, aquiawai'a nquec apquelpasmoma apquellelto nac meliasqueiam Cristo Jesús.
8
9
Engiapom Neten apto apiamolhma apanque ca ncanec apqueluonquescamo tep apquellelto nac meliasqueiam, mancapuanquec enenlhet ewoncasacpo panquec tep ncacjoc etnec apiamo lhma apanque, metca aquianmoma apqueluonquescama tep Engiapom Neten.
Mancolatsema etlhenacpo apancawec apquellanecamoc caselha altacmelo,
10
aniem'o apquelpasmecja coca Cristo Jesús nqueniemai'ac apquellanecamoc anac caselha altacmelo. Jai, jengeltemescasacjo lhta enjalhnaco'oc Engiapom Neten aniem'o nelpasmecjo lhta Cristo, enwanca'ac na angellanancoc caselha altacmelo apenescamo lhnac nanec Engiapom Neten actemacja aquietnaicama apaqtec etnec ma'a.
Jengiepetcasecja enmo'oc nenlhamacjo Cristo
11
Quetlhencap metnanco nac judios ma lhta etnaiancoc apquelpasmecja Cristo, apquelleltaianco lhta mota judios metca circuncidados quetlhencap, ncanec judíos nietnec circuncision.
12
Jai, jawe lhta apquelpasmecja Cristo quetlhencap, ma lhta elpalhacuaiacmoc na co Israel, mancollapuanquec lhta njan etlhewancoc caselha altacmelo apenescamo lhta apaioma Engiapom Neten ellancoc jata apquellelto nac apquennemolhema apancoie'. Taiepe lhta Engiapom Neten quetlhencap lhennenga, mamma lhta njan aleljalhnecama apualho'oc.
13
Jai, taiepe canque lhta quetlhencap Engiapom Neten, colhua coca nengaqtoie aniem'o apquetsepma Cristo aquianquenammalhco lhta ema apancoc neten iamet actennescama.
14
Apsoiacmo lhta njan metca acmasca apiesecsec judíos cacpota njan metno judíos, apleclemo lhta njan malha acjalhtemommalhca apquelhpanquesammap apiesecsec ma'a, apiepetcasecjo lhta njan po'oc ma'a.
15
Apmasquescacme lhta njan altema mongelaniec jenganemacja apanco'oc judíos, janet apquellawacja lhta niecje, aptemescasacje lhtoca malha lhema apquellawacja alhnancoc ma'a.
Apsoiacmo lhta njan metca acmasca apiesecsec anac ma'a,
16
apmasquescacme lhta njan apquellamelhammap apiesecsec anac ma'a janet apquellawacja nac, apiepetcasecjo lhta po'oc, apqueliepetquesquecjo lhta njan Engiapom Neten aniem'o apquetsepma neten iamet actennescama.
17
Apuai'o lhta Cristo cacpota epaiacsec ania'a actacmelaicama enwalhoc aplhamacjo enenlhet'awoc, apquellelto lhta taiepe Engiapom Neten, cacpota njan apquellelto nengaqtec Engiapom Neten.
18
Colhua coca judíos cacpota njan metno judios nietnec acnemo mo'oc Apualhoc anac ma'a, enwanca'ac colhua antancoc nengaqtec anquec Engiapom.
19
Quetlhencap metno judíos mmasquec aptanco po'oc enenlhet, colhua aptancoc na Engiapom Neten apquennemolhema, ietawec na etlhewancoc lhamacjo caselha aniem'o m'a Engiapom Neten, nnawec ma'a judíos.
20
Quetlhencap malha pa'at aquiawai'a apquellanecamoc aniem'o apquetlhecmosecamo lhta apostoles cacpota njan apquetsecama ania'a, Jesucristo coca apto malha metaimong actaqjescamacja aujac pa'at alanemmalhca.
21
Nwanengiec meliasqueiam aniem'o apquelpasmoma Cristo acuacmo alienno apualho'oc, etnancoc jata malha pa'at aquiawai'a Engiapom Neten apancoc.
22
Apiepetcasecjec po'oc Cristo cacpota ncowomoc aptaicamoc malha pa'at aquiawai'a Engiapom Neten la apnemacja aniem'o Apualhoc apanquec ma'a.
Capítulo 3
Pablo apaiescama ania'a actacmanma apiesecsec metno judíos
1
Co'o Pablo jeiapascama lhta Cristo Jesús cacpota apaiacsec ania'a actacmanma apiesecsec anac quetlhencap metnanco judios cacpota ncoltacmelec apquellaniemjaicama, ca nqueniemai'ac na nemo nac jepatjetmo, scaqlhencasemmalhco njan nemmammalhquelha.
2
Jawe ngiapac apquelliawec quetlhencap Engiapom Neten jeipascama cacpota alhenec ania'a apenescamo lhta aquietnaicama apaqtec etnec ma'a cacpota ncoltacmelecja' apcacjaicamoc quetlhengcap jam, ncanec awanjec apiamolhma Engiapom Neten.
3
Jetescasque lhta njan caselha aquielhammalhca aquietnaicama apaqtec etnec jata, quetse lhta astalhescasac co'o waccajac quetlhencap ma'a actemacja ania'a nac,
4
ca apquelietsatenco ta quetlhencap eluetac jata jawe ngiapac anquec actacja nac alheianma, asiamo co'o actacja lhta aquietnaicama apaqtec etnec jata Engiapom Neten, apmajai'o engiapacsec Cristo.
5
Enenlhet lhennenga meliamoc ma'a, colhua coca Engiapom Neten apcapascanquec Apualhoc apanquec cacpota elianwesquescamjoc ania'a nac aquielhammalhca aplhamacjo apquellelto apqueliequiescama apostoles cacpota njan apquetsecama ania'a.
6
Colhua sma alhenec ania'a aquielhammalhca nac: Apquellelto nac meliasqueiam Jesús metnanco nac judíos, etlhewancoc jata njan lhamacjo actemacja caselha altacmanma apenescamo lhta apaioma Engiapom Neten apquelleltennascamo lhta m'a apquennemolhema co Israel. Etnancoc jata njan Engiapom Neten
apquennemolhema m'a metnanco nac judíos, ca ntemac ania'a nac ma'a.
7
Jetnescasquec co'o jeiasennaicama Engiapom Neten cacpota apaiacsec ania'a aquielhammalhca nac aniem'o njan aquiawai'a apmopuana, apiamolhma apanquec na jelanei'o, apietnai'awec na neja'at ma'a.
8
Jai, malha asquetquetsec co'o, moientalhnemo njan apiesecsec enenlhet Engiapom Neten apquennemolhema, ncacjoc coca jeliequiescanquec ma'a Engiapom Neten cacpota apaiacsec ania'a actacmanma apiesecsec anac metnanco judíos, ca aclheianma ania'a nac tep anque nquescama actacmana apmajai'a jengellancoc Cristo.
9
Jeliequiescanquec Engiapom Neten cacpota alianwesquescamjoc enenlhet'awoc caselha acposemmalhca nac aptacmelquescama lhnac nanec Engiapom Neten apto apquelentepquescama lhamacjo caselha lhmanquec jam, lhennenga tep anquec nac nanec aptacmelquescama ania'a nac ma'a aquielhammalhca.
10
Nlheianmec nac nanec apualhoc Engiapom Neten eipetcasecjac po'oc aplhamacjo enenlhet'awoc alhmanquec jam apquellelto la meliasqueiam ma'a, ncowac jata njan malha lhema apquellawacja aptaiecja m'a, ncolluetac jata casecapo au'alho'oc alientalhenmo nque nac, acnema nac anmowanca'a, canjan aluescai'e, ncotlhenec jata aquietnema nema nengiamo lhamacjo aptemacja Engiapom Neten.
11
Ca lhamacjo caselha nac lhennenga lhnac nanec apenescamo aclheianma apualhoc Engiapom Neten elanac jata, coca apenescanquec nenwanlha nac apcapascamo lhta Cristo Jesús apuesque engancoc.
12
Colhua coca njan enwanca'ac angeltetescamoc Engiapom Neten metca nengai'a aniem'o mongeliasqueiam Cristo.
13
Mollaiosenquec apualho'oc quetlhencap aniem'o apquellengai'a aslengaianco aquientalhnema nac, aslenganquec co asmajai'a alpasmoc quetlhencap, ncolleccasama coca apualho'oc ma'a.
Apenmalhnoncoma Pablo apqueltemo eliennecjoc apquelialheng'a
14
Necsa aclheianma ewalhoc quetlhencap apquellengaianquec quelha jam, asquelteclhecquec co'o etapno'oc nalhepop asquenmalhno Engiapom,
15
apto pquelentepquescama lhamacjo caselha apcacjanco m'a neten cacpota njan nalhepop anac,
16
apto njan nquescama apquetsecama caselha altacmanma. Asquenmalhnema ellancoc alliennactema nquec apualho'oc cacpota eliennecjoc mocjom aniem'o Apualhoc apanquec ma'a.
17
Asquenmalhnema njan eltejec meliasqueiam quetlhencap Cristo cacpota elhec apualho'oc quetlhencap ma'a, cacpota eltemesquesec apquelliennactema aniem'o njan nengameliam.
18
Netamen ncowac jata apquelianweiacmo quetlhencap cacpota njan lhamacjo apquellelto nac apquennemolhema Engiapom Neten aquiawai'a nquec
+ ft Cuan largo, ancho, alto y profundo es el amor de Dios.
jengamelaiam Cristo, mancotnenwaiam annelha.
19
Jai, asqueltawec co'o eliojoc quetlhencap actemacja jengamelaiam aquiawai'a nquec Engiapom Neten, tep anquec ma'a apquellanemacja ncolho nac alietnaicama apaqto'oc quetlhencap caselhaja, asqueltawec na allaneianconque' apualho'oc caselha apanco'oc Engiapom Neten.
20
Colhua coca ntasec angeltacnescasancoc Engiapom neten aquietnema apmopuana cacpota tep anquec aquiawai'a jentacmelquescama ennenco'o, tep anquec ma'a nengellanemacja ncolhoc alietnaicama engaqto'oc anac, apuanquec jata jengeltacmelquesques nellaniemjaicama tep anquec nengellelmalhnenca la'a.
21
Jai, nenlhamacjo ennenco'o nengellelto mongeliasqueiam Cristo Jesús, ntasec na angeltacnescasanco mota Engiapom Neten metca nnelha. Amen.
Capítulo 4
Actacmanma antec nempasmommalhco
1
Co'o Pablo ascaclhencasemmalhquec aniem'o jeisennaicama Apuesque, asqueltawec eltacmelcasacpoc aquietemo ncoie ncanec Engiapom Neten alhta apqueliequiesaicamoc quetlhencap cacpota etnancoc apquennemolhema apancoie'.
2
Etnamoc coca coneng apancawec quetlhencap, anmomjapac'a apualho'oc ellanjoc po'oc, metnamoc na nau'a apuajei'oc, ellamelemma ta njan po'oc apiesecsec anac quetlhencap.
3
Elloca ta njan metca acmasca, etlhenques jata apquelpasmommacpo aniem'o lhta Engiapom Neten Apualhoc altemesquescama
4
ca actemacja nac apquelpasmommacpo malha ntac ma'a lhema nac nengiocja, nnanquec na malha lhema Apualhoc anac ma'a, nnanquec na lhema aljalhnecama enwalhoc ncowac jata.
5
Apnec na lhema Apuesque, nietnec na malha lhema mongiasqueiam, lhema njan apquellauquesammap iemmen.
6
Apnec na wanlha lhema Engiapom Neten apto apqueliapom aplhamacjo enenlhet'awoc, apto njan apquemjama apmanie, apquellanai'a njan lhamacjo caselha apquellaianco njan enenlhet'awoc, aptaianco njan
apquetlhelhma'a mota m'a.
7
Nelpasmecja nentancoc ennenco'o malha lhema neliocja ntacja, coca Cristo jengellanquec alpalhcammalhca nenmopuanca'a nenmacmecama moclhema ennenco'o,
8
ca ctemo nac aclheianma waccajac Engiapom Neten apaioma:
«Apmeiecjec neten aplaqlecjec na enenlhet apquenmammap, apquellaianco njan apquenmopuanca'a enenlhet'awoc»
1
ca nnena actemo m'a.
9
Jai, apmeiecjec neten coca amanie apuaiwentanie lhta nalhepop anac,
10
ca apto lhta apuaiwenta nalhepop anac, apto lhta njan apmeiecjo lhta netne cancoie, aptemo njan malha aplanenwecja lhma nquec jam.
11
Ca enenlhet anac ma'a apquellaianco lhta njan apquenmopuanca'a moclhema apostoles, po'oc na apquelleltsecama ania'a, po'oc na apqueltennaicama ania'a actacmanma, po'oc na pastores cacpota njan jengetlhecmoscama.
12
Enenlhet anac ma'a apquelpenesquescanque lhta njan Engiapom neten apquennemolhema cacpota etnancoc apquellasennaicama, eluanenquesquesec meliasqueiam apquennemolhema m'a, ntacjec malha apiocja la Cristo,
13
acuacmo acuo'o ta nelpasmommalhco nentaicamoc aniem'o mongeliasqueiam cacpota njan nelianweiacmo Jesucristo apto Engiapom Neten apquetca, acuacmo njan nentanco alienno engellualho'oc malha nenwaneiam la'a, malha njan Cristo la'a.
14
Ncomascoc ma'a nentangco malha nematca nac mangcolliennactema nac apualho'oc, colhuawec ncolhec aliennencaso apquellailho la nematlhecmoscama ncolatsecama, enenlhet anac apquenmopuanca'a jeniennengquesec.
15
Ennenco'o ta mota antancoc metca nenmopuana ania'a angellanjoc emmo'oc, angellamelemmac jata njan cacpota ncowanamoc acuacmo nennacjo Cristo, apto malha apqatec.
16
Ennenco'o coca neliocja nac malha alpasmecja m'a aniem'o Cristo cacpota angellanancoc actacmanma nenmacmecama, ncowanamoc meliennactema njan nelpasmommalhco njan aniem'o nengamelaiam.
Eliaqmoncasecja mo'oc apualho'oc
17
Asmac'acja atnec allanac aniem'o Engiapom Neten apmopuana jeiaicamoc, ¡metnamo nquec quetlhencap aptaiancolha nac meliojo nac Engiapom Neten! Apquelieplaucasquec aptaianquelha apancawec acmowana nac manietec nentacja.
18
Malha alpaiseiam na alquetamecama apualho'oc ma'a, meliojoc na aptemacja Engiapom Neten aniem'o aliennactema apualho'oc.
19
Menmanquec na apquellanenco la ncolatsecama alenteiapma apualho'oc ma'a, metca apquenmanweiam apquellanenco la apquenmensanweiam alhma.
20
Quetlhencap coca apqueliawec jawe apcanemacja antec Cristo m'a,
21
jawe ngiapac anquec na apquellengai'o apquetlhecmosecamoc ma'a, apquelianweiacmo njan apquelleliejecjo apquellaneianco caselha acpeiwomo.
22
Ca nqueniemai'ac na quetlhencap ntasec eliengiecjac ncolatsecma nac apquellanecamoc, eljatsosamoc coca lhennenga apualho'oc malha tawa pac la anie la acteiapma m'a aniem'o aliasponcomacja nac apualho'oc ellanancoc.
23
Eliaqmoncasecja njan alhnanco'oc alquetamecama apualho'oc anac apcanemacja nac na Engiapom Neten etnancoc.
24
Etlhatmecja coca alhnancoc apualho'oc apcanemacja nac etnancoc Engiapom Neten, caselha nac acpeiwomo, caselha njan altacmelo cacpota njan acto iocjalhmec anquec.
25
Ca apquelpasmecja nac quetlhencap malha lhema apqueliocja ntacjac ma'a, ca nqueniemai'ac na metnanquec apquenmopuanca'a ania'a apiesecsec anac quetlhencap, etnamoc jatoca njan iocjalhmec anquec apqueltheianma.
26
Apquellawo la njan quetlhencap, melliawencaso ncoie, metca acuaiacmo mo'oc acnem la'a, enmasques jata colhuawoie
27
cacpota mancoujec queliacjameioc ncoliatancoc apualho'oc quetlhencap ma'a.
28
Enenlhet apto apmenielhma la'a, eluates, etengiama coca apmacmecama cacpota ncoitec pataccom apancoc, cacpota epasmoc alaimelhquelha la'a enenlhet anac metca apquelletsecama.
29
Melpaqmet ncollatsecama la'a apquelpameiasma, ntasec coca elpaqmetama altacmanma cacpota ncoltacmelquesec apquellaniemjaicama po'oc, ncollianwesquescamjoc najan.
30
Meltemesques na acmaiose apualhoc Engiapom Neten anac Apualhoc, malha mongenatquescama la apiempeioc apqueltemesquescamo lhta Engiapom Neten quetlhencap cacpota eliecpelcoc apquellelto apquennemolhema apanco ie' acuo'o ta acnem jata njan ncosaujalhcoc apqueluoncasemmap tep ma'a.
31
Eliengiecja anmaiosac'a apualho'oc cacpota njan eluatesamoc annatjesaicama, mellelpalhemamaja', melliematquesama njan po'oc, eliengiecja njan lhamacjo actemacja ncolatsecama.
32
Ellanamoc coca altacmelo caselha, elietnajo napaqta'a po'oc, enmecjo mocjom tacja njan po'oc ca aptemacja lhta Engiapom Neten apquenmecjo lhta mocjom tacja quetlhencap aniem'o Cristo.
1Salmos 68:18
Capítulo 5
1 Quetlhencap apquellelto Engiapom Neten apquetcac apquellamelaiam, ntasec etnancoc aptemacja nac ma'a. 2 Ellamelemma njan po'oc ca aptemacja nac Cristo jengellamelaiacmo ennenco'o, apcaiancawec na apmatnamo m'a jengelliaqmoiecja ennenco'o, malha acnema acmescama nac nentoscama acuanlhenmalhca actapeiam anac aimes acleclemelha apualhoc Engiapom Neten. 3 Aptaianquec quetlhencap Engiapom Neten apquennemolhema apquelpoccanma, ca nqueniemai'ac eltacmelcasacpoc quetlhencap ma'a, metnamoc na apquelmensanweiam alhma, metnamoc na apquellanactema, menmeiauquesacpo apancawec na caselha. 4 Melpaqmetama apquelpaqmeiasma jenmancascama nac, melpaqmetama nque na malha actaicama nque nac cacpota njan caselha ncolatsecama, acjemo m'a, coca ntasec ma'a elpaqmetama eltacnescasancoc Engiapom Neten. 5 Apquellelto nac apquenmensanweiam alhma, caselha acpaisenquescama enwalhoc napaqtec Engiapom Neten, malha niecje m'a apqueltacnescasecamoc la caselha aquiocja allanemmalhca', metnanquec jata Cristo apquennemolhema m'a cacpota njan Engiapom Neten.
Nelliejecjo mota Engiapom Neten
6
Mellanco nquec eliennenquescac enenlhet'awoc anac actaicama nquec ania'a apquetsoiam, Engiapom Neten jata eliaqmoncasquesecjac apqueltemacja melleliejecjo m'a,
7
melluanamonquec na aptaiancolha nac ma'a.
8
Lhennenga lhta quetlhencap malha ienactesacja lhma lhta apquelloma m'a, colhua coca malha atsacelha la lhma aniem'o apquelpasmecja Apuesque, ¡eltacmelcasacpo ta njan jam!
9
Ellanancoc actacmanma, caselha acpeiwomo, altemesquescama njan iocjalhmec apquelpaqmeiasma, ca aptaiancolha nac enenlhet apquellelto nac apquelloma malha atsac'elha lhma,
10
wanlha mota alquetamecama apualho'oc caselha acleclemelha la apualhoc Apuesque.
11
Meluanecjo nquec enenlhet'awoc anac apquellelto nac apquelloma malha ienactesacja lhma, ntasec coca eliaqsec apatno'oc quetlhencap ma'a cacpota etnancoc malha apqueluetai'a apquellanecamoc caselha ncolatsecama m'a.
12
Ca enenlhet'awoc anac ma'a apquellanenquec aquielhammalhco caselha jenmancasma nac anlhenec,
13
coca apquelliaso la apatno'oc quetlhencap ma'a, elianwacjoc jata njan mancolietemo apqueltacja m'a.
14
Jai, nnanquec quetlhencap malha alaponmatma apualho'oc cacpota ncoltetquesec acnanquelha caselha alposemmalhca cacpota ncoluetalhca ncolhnanconwatac na alhnacjo ncoie'. Lhna nnemac na actemo jenque'e: «Elhatacja lheiap malha apteianma ptajac, etnemecja neten malha apiesecsec apquenmasquenwaiacmo cacpota ncaponmetec jata tacjaplhet lheiap Cristo atsai'o lhma apancoc anac» lhna nnema actema m'a.
15
Elienlhanmamoc na apqueltacmelcasemmacpo apancawec, metnamonquec aptaianquelha m'a enenlhet anac metca apqatco'oc, etnamoc coca nema apqueliamojo.
16
Ellelientemacpojo apquellanecamoc caselha altacmelo nenwanlha nac, ncanec nientelhec caselha mota apqueluetai'a.
17
Metnamo nquec quetlhencap malha meliojo, elienlhanmamoc coca elianwomjoc apcanemacja etnancoc Apuesque.
18
Metnamonquec na acuacmo alieiesolhma vino ncanec ncoltemesquesec jata malha metca apquelielhnenwaiam ma'a, ntasec coca elleltoc ellanancoc apualho'oc Engiapom Neten Apualhoc.
19
Ennecmasamoc jata mota salmos, nennecmascama cacpota njan apquellennecmasecama apualho'oc aniem'o. Jai, ntasec eltacnescasancoc Apuesque acuacjo conne apualho'oc.
20
Etnamoc jata mota gracias Engiapom Neten aniem'o apuesai'a apuesque engancoc Jesucristo.
21
Elhneso mo'oc apualho'oc cacpota ellajo mota Cristo.
Nenganemmalhquelha antancoc nema ennacteianca'a
22
Quetlhenca' nqueluana'ac ntasec ncolelliejecjo ta mota anaqteianca'a, acno aliejecjo Apuesque,
23
ncanec atawa' malha apto apqatec lheia' m'a, nnawec na Jesucristo apto njan malha apqatec Iglesia, iglesia nac malha apioja nac Cristo, apto njan apqueluonquescama tep ma'a.
24
Ca iglesia nac ncolleliejecjo mota Cristo, nnawec na nqueluana'ac ntasec ncolelliejecjo mota anaqteianca'a.
25
Quetlhencap acnema nac apnacteianca'a ntasec ellamelemma mota apnacteianca'a, nnawec na Cristo apcamelacmec ma'a iglesia, apcaiancawe lhta apmatnamo aquiacmoiecja m'a
26
cacpota ncotnec apancoc ma'a, malha njan apcalhnascama la'a aniem'o apaioma malha iemmen acmowana nac ncalhnacsec au'alhoc ma'a.
27
Netamen ncolhec aquiantemacjo napaqtec ma'a, malha alhnai'o njan aponmatma la'a, metca ncolatsecama, actacmanma njan, acpeiwomo.
28
Nnawec na quetlhencap acnema nac apnaqteianca'a, ntasec ellamelemmac apnacteianca'a ca ctonac apcamellammacpo apanque apiocjojo, enenlhet apto la apcamelaiam aptawa', malha ntacjac na apcamelammacpo apanque nac apiocja.
29
Mamma njan enenlhet etacnewecjac apiocja apanque nac, apuanquec coca etacmelquesec cacpota njan engiancoc actoma, malha acto nac Cristo apquelanei'o iglesia aptacmelquescamo njan m'a
30
ncanec iglesia malha apiocja m'a. Jai', ennenco'o nengellelto Jesucristo nennemolhema ntacjec neluesai'a malha iglesia nac, nentancocjec na malha apiocja nac Cristo
31
Ca ntemac na actalhesammalhca waccajac Engiapom Neten apaioma jenque'e: «Eiengiecjac jata aptema apnemolhem'a nquen cacpota njan apiapom cacpota eipetcanwomoc aptawa', ncotnecjac na malha lhema apiocja»
1
lhnac nanec ntemac ania'a.
32
Coca jenque'e asietquescama lhquec nientelhec angianwomjo, coca alhenquec co'o ania'a malha aplhenammap Cristo cacpota njan iglesia.
33
Jai, aleltennacsec jata colhuawe nac nema nac apnacteianca'a ntasec ellammelama mota apnacteianca'a ca ctonac apquellamelammacpo apancawe nac quetlhencap. Quetlhenca' njan apnema nac anacteianca'a ntase ncollajo mota anacteianca'a.
1Genesis 2:24
Capítulo 6
Apiapma'ac, apquetcac najan apquellanemmacpelha etnancoc
1
Ellasecjo ta ncana'ac, coca acto acpeiwomo m'a, ncolcoc na apualhoc Apuesque m'a.
2
Amanie jenganemacja lhnac nanec nema jempenesquescamo lhema caselhaja, ca ntemac jenque'e:
«Ellajo ta mota ncana'ac,
3
cacpota elloca acuancacjo ncoie nalhepop anac» lhna ntemac.
4
Quetlhencap apiapma'ac, ncana'ac, mellauquesanquec apquetcac, ntasec coca etlhecmosancoc cacpota njan eleltennasancoc ma'a, ca apcanemacja etnancoc Apuesque m'a.
Esclavos, apuesque apquellanemmacpelha etnancoc
5
Quetlhencap esclavos, elleliejecjo ta mota apuesque apanco'oc nalhepop anac, ellajo coca, enmacmesama ta njan anmajai'o nquec apualho'oc, malha actonac ma'a apquellasennanca la Cristo.
6
Metnamo nquec malha apquenmacmenca napaqtec la apuesque apanco'oc, cacpota etaqjecja ma'a, mmasquec na apquenmacmenca. Ntasec coca mota enmacmama malha actonac ma'a apquellasennanca la Cristo apquellan'a mota apquellanemacja nac etnancoc Engiapom Neten.
7
Enmacmama coca aleclemo nquec apualho'oc, malha acto nac quetlhencap apquenmacmesanca la Apuesque, jawe actonac ma'a apquenmacmesanca la enenlhet apanque nac.
8
Asqueltawec co'o elianwomjoc quetlhencap esclavos, nlho ca la njan metno esclavos, moclhem'a ta etlhewancoc aquianmoma aquietemo nquec aniem'o actacja apquellanei'o apquenmacmecama.
9
Quetlhencap apquellelto apqueluescai'e, eltacmelcaso ta apquellanei'o apquenmacmesaicama apanco'oc, mengiamo nquec ncolatsecama apaioma, ncotlheng apualho'oc apquennawec po'oc apnema Apuesque apanco'oc apnec ma'a neten, nennawec emmo'oc napaqtec ma'a.
10
Quetlhencap elialheng'a, etengiamoc jata mota Apuesque cacpota ellancoc apquellienactema m'a, nietnec aquiawai'a nquec apmopuana m'a, mamma njan awanco ncammelhec ma'a.
11
Elentalhnecja ta malha nennapommalhca nac ancoc cacpota elliennac necsa acuai'a alammelhma queliacjameio'.
12
Mongennapelhcac ennenco'o enenlhet lheme nac, coca nengennapelhcac ma'a casecapoc au'alho'oc aniem'o nac nengiawa', aquietno acmowana, aquientalhnemo njan tacjalhet'oc ienactesacja lhma nengiawa' alhma nquec jam.
13
Ca ncanec ntasec elentalhnecjac malha nennapommalhca nac ancoc aniem'o Engiapom Neten apquellaicamoc, cacpota eluascapoc acuo'o la aquientalhnema, apquelpenesawec na cacpota eliennac ma'a.
14
Eleljalhnama ta, eliennacteso ta njan apqueliapnecja apqueliapnama acuesai'a nac jawe ngiapac anquec, enenquenecja ta njan malha alapma apnengio'oc acuesai'a nac ma'a nempeiwomo.
15
Enactetocja ta njan apnacteto apmanco'oc acmowana nac ncolhenec ania'a metca actaicama enwalhoc,
16
Elapquesap jata njan aquielhnenwai'a nac ianca acuesai'a m'a mongiasqueiam, ancoc na aquielhnenwai'a ianca aquieplomo talha nepquetama aniem'o queliacjameio'.
17
Eletsawecja njan alapma apqatco'oc acuesai'a nac nenwoncasemmalhca tep, enmama ta njan apmeio'oc malha pelletaw acuenactema nac acuesai'a Engiapom Neten apaioma, aniem'o njan Apualhoc apanquec ma'a.
18
Elelmalhna ta mota Engiapom Neten, ellapiosama ta njan aniem'o Engiapom Neten Apualhoc anmaicama, eleljalhnama ta metca apqueljalhionwaiam. Elelmalhnesques jata njan aplhamacjo Jesucristo apquennemolhema,
19
co'o njan cacpota jeiancoc aspaioma Engiapom Neten asmopuana apaiacsec metca ascai'a ania'a aquielhammalhca apenescamo lhta apaioma m'a.
20
Jai, Engiapom Neten alhta apqueniemai'a apanque jeiapascama cacpota alhenec ania'a actacmanma nac, ca ncanec ascaqlhencasemmalhco nac. Jelelmalhnesques jata Engiapom Neten jeiangcoc asiennactema cacpota alhenec metca ascai'a ania'a actacmanma nac.
21
22
Jai, colhua asmac'ac anwapacsec Tiquico ascamelaiam jam, apto nengaqtec astaicama alhelhma necsa nenmacmesaicama Apuesque, etsacjesec jata ania'a ejencoc cacpota njan ania'a apanco'oc asquetlhelhma'ac anac jenque'e cacpota eliojoc quetlhencap actacja nelluetai'a jenque'e cacpota eluascapecjoc mocjom quetlhencap jam.
23
Jai, ntase', awanjec asqueltemo Engiapom Neten cacpota njan Jesucristo ewaiwesentac metca actaicama enwalhoc, nengamelaiam cacpota njan mongiasquieam tacjaplhet'oc engellialheng'a jam.
24
Asqueltawec na Engiapom Neten eiawencaso apqueltacmelquescama metca nnelha aplhamacjo apquellelto apquellamelaiam anac apuesque engancoc Jesucristo.