Santiago
Santiago
Capítulo 1
1 Co'o Santiago asto jeiasennaicama Engiapom Neten canjan apuesque Jesucristo nlhenquec ewalhoc apquellelto 12 apqueliaqiaicamoc acnema apquennemolhema Israel apcacjenweiacmo lhma nquec jam lhamacjo apquellawacja. 2 Quetlhencap elialheng'a, ncolpaijecja ta apualho'oc necsa acuai'a la aquientalhnema coca acmajai'a ncoiepconec 3 meliasqueiam quetlhencap ma'a. Ca apqueluascapo la quetlhencap ma'a, netamen ncotiepoc jata apquenmopuanca'a eluascapoc lhamacjo actemacja aquientalhnema la'a apqueluetai'a. 4 Coca ncaimelhcac eluascapoc acuacmo actacja nnelha aquientalhnema apqueluetai'a, netamen jata m'a ncowac aptaicamoc apquelpeiwomo canjan apqueliennactema, ncolhnancoc jata lhamacjo aptemacja apqueltacmanma. 5 Coca moclhem'a la quetlhencap metca apquelianweiacmo, ntasec elelmalhnama mota Engiapom Neten ncanec apto njan ma'a acleclemo mota apualhoc jengancoc caselha, metnac na jentacjescamo la'a. 6 Elelmalhnama ta njan aquieplomo meliasqueiam etlhewac jata m'a, metca coca njan ma'a allelpencammalhca apualho'oc etlhewancoc jatelhaja, nlhoca la m'a. Ca enenlhet apto la m'a malha ta etnec alacjaiam anac iemmen aluata aquiau'acja, nsauque mota alhcaiam amnoma acmac'acja la ncosuoc. 7 8 Ca aptemac na enenlhet janet la aclhenaicama apualhoc, amanie niecje nlhenquec apualhoc lhema caselha, netamen niaqmocje coca mota mo'oc aclhenaicama apualhoc, aptemacja panquec coca mota m'a, ca ncanec melhquec jata caselha aniem'o m'a Apuesque. 9 Engialheng la metca caselha apancoc ntasec ncotacmelama apualhoc ma'a ncanec apto neten apanquec napaqtec Engiapom Neten. 10 Canjan apto la acnema apquetsecama ntasec na ncotacmelama apualhoc ma'a necsa aptemesquesecja coneng la Engiapom Neten, ncanec emasquenwomoc jata njan lhema acnem ma'a malha elhnemoc anac panactema la actecteiapma amjamacjanque nac iocjalhma, aquiacuatacjo nquec actacmanma. 11 Niemac'ac ma'a actepo la acnem aquieplomo njan acmate, mpallacmec elhnemoc na m'a, mmasquenwacmec na actacmanma lhquec ma'a. Nnawec na m'a enenlhet la acnema nac apquetsecama, emasquenwomoc jata njan m'a canjan caselha apanco'oc. 12 Apqueleniemawec enenlhet meliejecjo aquiatecamoc la aquiasponcomacja apualhoc ncolatsecama, ca apuascapo la m'a elhcac jata aquianmoma aquiennactema apcaniemjaicama apquelpenesquescamo lhta apaioma Engiapom Neten ellancoc jata m'a apquellelto la apquellamelaiam. 13 Acuo'o la ncolatsecama aclhenaicama apualhoc, meltamo nque aniemai'a Engiapom Neten ma'a, melanescasac Engiapom Neten ncolatsecama aclhenaicama apualhoc enenlhet, mang na ncoietnac aclhenaicama apualhoc la ncolatsecama m'a. 14 Enenlhet coca nqueniemai'ac ma'a ncolatsecama aclhenaicama apualhoc anac apancoc apanque, malha aquiatecamoc la apualhoc cacpota ncolecuomoc ma'a, 15 netamen apquelanac ncolatsecama m'a, ncoianwomoc jata m'a apquelanai'a ncollatsecama acuacmo apquetsepo ta ncotnec. 16 Elialheng'a asquellamelaiam, mancollatsecama alquetamecama apualho'oc quetlhencap, jawe aniemai'acja Engiapom Neten ma'a ncolatsecama nac aclhenaicama enwalhoc. 17 Engiapom Neten coca nqueniemai'ac ma'a actacmanma, acpeiwomo, ncanec apto njan Ngiapma'ac ma'a alaponmatemo nac neten, mamma nquec na aquiaqmoiecja la mo'oc apualhoc ma'a. 18 Jengeltemesquescanque lhta malha alhnancoc nelpalleiam Engiapom Neten aniem'o ania'a actacmanma nac acto jawe ngiapac anquec acuacmo nentanco malha caselha apancoc la allelto neten ancawec altacmanma aisecsec ma'a lhamacjo caselha apquelentepquescama lhta.
Aimommalhco angailhojo', angelleliejecjoc na Engiapom Neten apaioma
19
Quetlhencap elialheng'a asquellamelaiam, eltacmelcaso ta apquellailhemo asmac'acja nac atnec alheianma, ntase mota quetlhencap ellailhoc engiancoc secje' eliatac po'oc la'a, jawe ellelientemmacpoc apmaniaie' quetlhencap, metnamoc na nau'a apuajeioc apquenmac'o la ello'oc,
20
ncanec enenlhet aplauo la mota coca acto jawe caselha acpeiwomo napaqtec Engiapom Neten ma'a.
21
Ntasec coca eluatesancoc quetlhencap ma'a malha caselha alpaiseiam anac canjan ncollatsecama nac, mantec anquec caselha ncollatsecama nac, ntasec coca enmancoc tacja m'a ania'a actacmnama nac nalhep'awec apualho'oc nema atlhecmosecamo lhta, ncanec nietnec acmowana m'a ncoluonquesec tep.
22
Apqueliennencasecpec apancawec napocja quetlhencap nquetlhenque mota apualho'oc ntasec etnanco mota wanlha apquellailhemo ania'a actacmanma. ¡Jawe coca niecje nentemacja m'a, ncaimelhquec coca njan ncoitec apquelleliejecjo ania'a apquellengo la'a!
23
Enenlhet apto la wanlha apcailhemo ania'a actacmanma, coca meliajacjo, malha niecje enenlhet anac apquelanei'o napa'at ieiam appoc
24
cacpota elanjo panquec napa'at aptacja la'a, coca apmasco la apquelanei'o napa'at, apqueluancacmec aptemacja napa'at apanquec ma'a.
25
Coca apmapseiwe' m'a enenlhet anac metca apqueluancaiam actacja la apcailhemo, apsecjo njan alquetamecama apualhoc actacja aclheianma jenganemacja acpeiwomo acmowana jenwonquesec tep, apqueliejecjo mota njan ma'a.
26
Moclhem'a quetlhencap apiesecsec anac jam nquetlhenque mota apualho'oc apquellelto apqueliamolhma meliasqueiam Engiapom Neten, coca apqueliennencasecpec apancawec ma'a ncanec mancollapuanca'ac enmanwomoc apquelpaqmeiasma ncollatsecama, acjemo apquelleltammap apqueliamolhma meliasqueiam ma'a.
27
Coca acto actacmelo nentacmelcasemmalhco enganquec napaqtec Engiapom Neten nentaicama mota amaica'a apquelieijecama canjan lhentampac'a necsa aluetai'a aquientalhnema, canjan mongellanqueje na jengellecjojo ncolatsecama la enenlhet meliamolhma.
Capítulo 2
1 Quetlhencap elialheng'a, meliasqueiam Jesucristo apuesque engancoc acnema apmopuana, ca ncanec mancolatsema aptanco la melhnescamo mo'oc apquellanei'o po'oc. 2 3 Malha acto nac ma'a apcacnecjelha la quetlhencap apuo'o la acnema apquetsecama enenlhet, aquietnema la nengatquescama engapjec alienmomo oro, cacpota njan apquetsecama apqueltacmanma apanque apmennawe njan, eltacmelcasoc apquenmaicamoc tacja quetlhencap ma'a, ca etnancoc ellanac jeng: "Elhna ta nque'e actacmelacja nac nentanema" Netamen apuo'o la njan enenlhet metca nac apquetsecama, apjapawoc na apquelentalhnema, ca etnancoc na ellanac jeng: "Etnenwacjo m'a mocje nac, nlho ca la njan elhnacja m'a nalhepop anac" 4 Coca mancolatsema etnancoc quetlhencap ma'a, coca acuesai'a mannescamo mo'oc nelanei'o emmo'oc ma'a, malha aptaianquelha nac jengiecpelquemo ngiapma'ac ncolatsecama nac atlhenaicama apualho'oc. 5 Eltacmelcaso no apquellailhemo elialheng'a asquellamelaiam, apqueliequiesquec Engiapom Neten enenlhet'awoc anac metca apquelletsecama cacpota ncoitec aquiawai'a meliasqueiam, etnancoc na apquennemolhema aptemacja lhnac nanec apenescamo aplheianma ellancoc jata m'a apquellelto la apquellamelaiam ma'a. 6 Quetlhencap coca apqueltemesquesantec coneng ma'a enenlhet'awoc anac metca apquelletsecama. ¿Jawe nlho nema apquetsecama nac apquellaiancoc aquientalhnema apquenmacmecama, quetsec coca apquelianmonquescama m'a, je? ¿Jawe nlho njan nema apquetsecama nac eliengiosocja quetlhencap napaqtawec apquelientalhnemo nac, je? 7 ¿Jawe nlho njan nema apquetsecama nac apqueltacnoncoma mota apuesai'a Apuesquel 1 apanco'oc quetlhencap, je? 8 Ntasec apquelleliajacjo la'a quetlhencap jenganemacja acto neten anque aquiaspommalhca aquietno nac ma'a waccajac Engiapom Neten apaioma, ca ntemac jenque'e: «Engiamelemma po'oc ca cto nac apcamelammacpo panque' nac lheiapm» 2 9 Coca mancolatsecama melneso la mo'oc apquellanei'o po'oc quetlhencap, ncolhenec jata njan jenganemacja apquellelto quetlhencap apquetselhnanemmap aniem'o apqueliecai'a aclheianma m'a. 10 Apno la enenlhet apqueliejecjo jenganemacja atlhenquescama njan esaujojo', wanlha coca lhema alcama nquec jenganemacja meliejecjo, jenganemacja ta njan ncolhenec ma'a apto apselhnanemmap aniem'o apiecai'a m'a aclheianma. 11 Ca aptemac na Engiapom Neten jenque'e: «Menaqtewaso apnacteianca'a» Ca aptemac mocjom ma'a: «Mellaqja po'oc» Lhema enenlhet metuascamo la aptawa', apcaqjac coca po'oc, apieca'ac na jenganemacja m'a. 12 Ca ncanec ntasec ellanco mota actacmanma apaioma po'oc quetlhencap, canjan eltacmelcasacpojo ncanec ncolhec jata aliecpelcoc quetlhencap ma'a aniem'o jenganemacja acmowana jengelpaqnencasecja mangeliamolhma. 13 Enenlhet la meietnai'o napa'at po'oc, mancolhec jata njan aquietno napa'at ma'a, coca apietno la napa'at po'oc, eiepjomwomjoc jata njan ma'a acuo'o la acnem nema aquiecpelquemelha.
Acjemo m'a moc engatong nenlhenaicama mongiasqueiam
14
Quetlhencap elialheng'a, aqjemo m'a wanlha apatong anac enenlhet aplheianma aquietnema meiasqueiam coca mepasmac na po'oc, aptaicama panquec meiasqueiam anac, mewoncasacpec jata njan tep ma'a.
15
Malha actonac apqueluetai'a la quetlhencap lhema engialheng apquenno la'a nlho ca la engialheng nqueluana la'a, metca aletsecama canjan metca actecamoc,
16
jatelha etnancoc elpaqmetec quetlhencap ma'a: "asqueltawec co ncotnec actacmanma apcaniemjaicama lheiap, etac aptalhnema apmocjetma apancoc canjan aptoma acuacmo apiapcanaqmo" quelha etnancoc quetlhencap.
Aqjemo coca apquelpaqmetecama, ncaimelhquec coca ellancoc caselha alaimommalhquelha la po'oc.
17
Coca acto nac mongiasqueiam anac ma'a moc engatong anac malha atsepma njan ma'a.
18
Quelha etnec la lhema enenlhet jenque'e: "Nietnec co'o moi'asqueiam" Quelha etnec na po'oc jeng:"Co'o coca asquelanac caselha altacmelo"
Co'o coca stac asquellano: "Mangellanenco la caselha altacmelo, man na ncoietnac mongeliasqueiam ma'a ncanec nwetalhquec mangiasqueiam anac necsa nellanai'a la caselha altacmelo".
19
Moclhem'a enenlhet meliascacmoc wanlha lhema apuesque Engiapom Neten, ntasec meliascamec ma'a, coca aqjemo m'a mellanenco la caselha altacmelo. Mang na ncoliasqueiacmoc ma'a queliacjamei'o apnemo m'a Engiapom Neten, nquelpelhiennonquec aniem'o allai'a, mang coca njan ncollaneiancoc caselha altacmelo.
20
Metnamonquec quetlhencap malha metca apqatco'oc, ncaimelhquec ncolquetmoc apualho'oc secjec actacmelacja la etnancoc, acjemo m'a apquetlheianma aquietnema meliasqueiam la'a mellan'o nlho caselha altacmelo.
21
Apqueltaianco lhnac nanec Engiapom Neten Abraham apto apeiwomo ncanec apeccanweiacmo lhnac nanec apquetca Isaac neten aluanlhenmalhquelha caselha cacpota engianco niecje Engiapom Neten.
22
Apuanca'ac quetlhencap ellanjoc ma'a aptemacja lhnac nanec Abraham, actaiecjo njan mongiasqueiam anac acpeiwomo aniem'o caselha apquelanai'a.
23
Nwai'ac acnem ma'a aclheianmo lhnac nanec waccajac Engiapom Neten apaioma, lhnac nane ntemac jenque'e:
«Mang nac ei'asqueiacmoc Abraham aptemacja apaioma Engiapom Neten, ca apqueltaianco njan apeiwomo m'a»
Aptaiecjo lhnac nanec na Abraham po'oc apanquec Engiapom Neten.
24
Apuanca'ac quetlhencap eluetac colhuawe nac Engiapom Neten apqueltaicamoc la enenlhet apiewomo aniem'o aquietnema mei'asqueiam cacpota njan apquelanai'a caselha.
25
Ca actemo lhnac nanec na m'a nqueluana alanactema acuesai'a Rahab, apqueltaianco lhnac nanec na Engiapom Neten acpeiwomo m'a ncanec alentalhnescamo lhnac nanec acnemacja apquetsecama ania'a aniem'o nema acmenlhenaicama, cacpota ncolpasmoc engiengiancoc mo'oc amai.
26
Asqueltawec mocjom aleltennacsec quetlhencap, malha atsepma m'a mongiasqueiam anac metco la caselha actacmanma nelanai'a, malha acto nac nengiocja nac atsepma metca aclhelhma mocjom enjangoc.
1El nombre de Cristo
2Levitico 19:18
Capítulo 3
Actemacja engalhcoc
1
Quetlhencap elialheng'a, melienlhanmamonquec aplhamacjo apquenmajai'a etnancoc jengetlhecmoscama Engiapom Neten apaioma, ncanec tep anquec jata ncotnec nema jengeliecpelquemo m'a, manlhejec jata m'a enenlhet'awoc anac apquellomacja apancawec.
2
Nietnec ennenco'o nenlhamacjo nentaicamo mota netlheneiam, coca apto la enenlhet metca aptewascama apuesai'a po'oc, coca apeiwomo m'a, apmopuana njan emancoc apiocja apancoie' cacpota melaniec caselha acmasoma.
3
Malha actonac ma'a etanlheng anac, nenmaicamoc anac nengatquescama apatong anganantec cacpota memjanquec apmac'acja la emjancoc ma'a anmanwomo mota.
4
Malha
njan actonac loma nemmen, aquiawai'a nquec la'a, acmajai'a na mota ncosuoc mo'oc necja alhcaiam, coca nietnec quetsec alpencamecamoc ma'a cacpota ncopeiwoc aclhengama m'a.
5
Nnawec na m'a engalhcoc anac, quetsec anquec niecje coca antac aclhenammalhco nquec ma'a acmowana ncolanac aliawai'a caselha. Malha talha nac aleiwoma quetsec secje, coca niawonwacmec acmeiasma nalhma aquiawai'a la'a.
6
Jai', engalhcoc anac malha talha nac aleiwoma, nietnec aquiawai'a acmowana cacpota ncolanac caselha ncolatsecama nquec, malha nja ntac acpaisenquescama enwalho'oc anac, coca engalhcoc anac talha ancoc nqueniemai'ac ma'a ncospaneiacja talha, ntewasquec lhamacjo nenganiemjaicama.
7
Apuanquec enenlhet enmancoc lhamacjo caselha neujac, anata, menasma cacpota njan aloma nac nemmen,
8
coca mamma enenlhet emancoc apalhcoc anac, ncolatsecama nquec, mancaianco nac anmancoc, nlaneiawec na veneno jengaqjemo.
9
Nenmama mota ennenco'o engalhcoc anac cacpota angeliatama actacmanma anlhenec apuesai'a Apuesque canjan Engiapom, nenmama njan engalhcoc anac cacpota aniemetquesec emmo'oc apquellelto lhta apquelentepquescama Engiapom Neten apnesemmacpo panque lhta njan ma'a.
10
Wanlha lhema engatong anac nquelentepquec nempaioma actacmanma, ncolatsecama njan, coca jawe nentemacja m'a elialheng'a.
11
¿Awanque nlho ncotiepoc lhemec iemmen acmases canjan iasec iemmen lhema malhec la acteiapmacja iemmen, je?
12
Colquetamama no apualho'oc quetlhencap ¿Awanque nlho iamet higuera ncoitec aquielhna aceituna, je? ¿Awanque nlho njan iamet vid ncoitec aquielhna higo, je?
¿Awanque nlho ncotiepoc lhemec iasec iemmen canjan iemmen acmases acteiapmacja nac iemmen, je?
Nengianweiacmo aniem'o Engiapom Neten
13
Apno la lhema enenlhet apiesecsec anac quetlhencap aclheianma mota apualhoc apcanema eijoc lhamacjo caselha, ntasec eluetasquesec ma'a ncotalhcac na apquelanai'a caselha altacmelo aquieplomo coca njan nalhepec apualhoc aniem'o acnema apiamo.
14
Coca acloma la apualhoc aniem'o apiasepquescama, canjan apquenmeiauquesammacpo panquec caselhaja, acjemo ncotnec ma'a anmalhco apualhoc ncanec jawe acnema apiamo m'a, apmopuana ania'a njan ma'a.
15
Coca iama nengiamo nac jawe aniemai'a neten, nalhepop coca nqueniemai'ac ma'a, enenlhet apanque nac canjan queliacjameio',
16
ncanec ntepcasquec ma'a nengiasepquescama nac aquietnacja la apanco'oc emmo'oc, nennapommalhca, mantacmelcasemmalhco engancoie' canjan lhamacjo actemacja ncollatsecama.
17
Coca enenlhet la aquietnema acnema apiamo aniem'o m'a Engiapom Neten, apto malha alhnai'o apualhoc, apto njan metca acmasca ngiapom apcaniemjaicama, apiamolhma, jengamelaiacmo mota, apietnai'o njan napa'at po'oc, apnescamo po'oc apquellanei'o enenlhet apiesecsec la'a, iocjalhmec na aplheianma, apquelanai'a nja mota caselha altacmelo.
18
Ca apquellelto la aptengiacamo mota metca acmasca, malha njan ma'a enenlhet apcanma la mota actec acuesai'a coca metca acmasca, netamen ma'a enaclhec jata malha aquielhna acuesai'a coca njan acpeiwomo.
Capítulo 4
1 ¿Co la aniem'acja apquennapommap anac ma'a cacpota njan apquellatemommap apiesecsec anac quetlhencap elialheng'a, je? Coca nqueniemai'ac ma'a annapommalhca aliasponcomacja na mota apualho'oc apancawec ellanancoc ncollatsecama. 2 Acuacjo apquellaqjo po'oc ncanec awanje canque mota apquelleltemo ncoitec caselha apanco'oc. Nietne sonquec na apqueliasepquescama po'oc la'a apanco'oc apquelleltemo njan ncoitec actonac ma'a, ca mancoito la caselha apanco'oc ma'a, ncoiepleujoc jata apqueltengiai'o apiempeioc ncomajac ennactemoc, nlho ca la njan ennapacpoc ma'a. Meluetai'ac caselha apanco'oc quetlhencap ncanec mellelmalhnecama mota Engiapom Neten, 3 moclhem'a coca niecje apquelelmalhnecama m'a coca metlhewaiancoc na m'a ncanec mancolatsecama apquelelmalhnecama, wanlha sonque mota aptengiaicamoc nquescama pataccom cacpota ncotesquesec acpaiesecja la apualho'oc ma'a aniem'o apquellanai'a ncollatsecama. 4 ¡Apnaqtewascamawec quetlhencap apquellanei'o Engiapom Neten! Apquelianweianlha niecje quetlhencap apquellelto niecje apquellasecjai'o ncollatsecama nac, apquellammelhmec coca niecje njan Engiapom Neten, jawe ngiapac anquec ma'a. 5 Ca ncanec aquietnemo nac Engiapom Neten apaioma aclheianma, ntemac jenque'e: «Awanjec anquec apcamelaiam Engiapom Neten aquieplomo apquenmeiawecama engellualho'oc anac ennenco'o jengellaicamoc» ntemac ma'a 6 Awanjec anquec na jengelpasmoma aniem'o apiamolhma' panque', ca actemo nac waccajac Engiapom Neten apaioma jenque'e: «Apcammelhmacja Engiapom Neten ma'a anmalhco enwalhoc anac, coca apqueltacmelquescasquec apquellaniemjaicama apquellelto nac nalhep'awec apualho'oc» 7 Elleliejecjo' Engiapom Neten, eltacnewa coca m'a awesque queliaqjameio' nac, netamen ncongiec jata m'a. 8 ¡Eltetescacjo ta Engiapom Neten, netamen eltetescatac jata njan quetlhencap ma'a! ¡Eliengiesa mota njan apmeio'oc, malha alpaisenquescama ncolatsecama quetlhencap meliamolhma!¡Ellalhnasecja ta njan apualho'oc quetlhencap janet anac apualho'oc! 9 ¡Collaiosenwom coca apualho'oc aniem'o meliamolhma, elleclhanwama ta njan, enmasquescam jata njan alpaijecja apualho'oc anac, etnescasocja ta njan anmaiosac'a apualho'oc! 10 ¡Etnocja nalhep'awec apualho'oc napaqtec Apuesque, netamen etnescasocjac jata neten apancawec quetlhencap ma'a! 11 Elialheng'a, meluannamanquec po'oc apiesecsec anac quetlhencap jam, meliecpelconquec najan. Ca aptanco la quetlhencap ma'a, malha njan aptancoc apqueluannaicama jenganemacja, apqueliecpelquec najan. Mancolatsema etnancoc quethencap ma'a ncanec jawe jengiecpelquemo ngiapom quetlhencap, wanlha enenlhet apancawec apuanca'ac elleliejecjoc ma'a. 12 Wanlha coca m'a lhema apjapac apto jengiecpelquemo ngiapom, apto lhta njan jengellaicamoc jenganemacja nac ma'a, apuanquec na jenwonquesec tep nlho ca la njan eiaqmoncasecjac nentemacja ncollatsecama la nellanai'a, ca ncanec quetlhencap mancollapuanquec eliecpelcoc aptemacja la po'oc. 13 Moclhem'a quelha quetlhencap ncotlhenec apualho'oc apquenmac'acja la ellanancoc apmaniaie, quelha etnec lhema apjapac jeng: "Acnem anac nlho ca la sosecja angiacjac ma'a po'oc temma nac cacpota alhec lhema iantelhcapa m'a, anacsepoc na pataccom ma'a" quelha ncotnec aclhenaicama apualhoc ma'a. 14 Man coca eijo' acmac'acja ta ncotnec apcaniemjaicama apmanie' m'a, emasquenwomo ta m'a, malha acto nac teiam eten aquiacuatacjo nac nenwetai'a, mpelapcasque na acmasquenwacmo m'a. 15 Ntasec coca eiaqmoncasecjac mo'oc apqueliatecama, etnec jeng: "Apquelto la apuesque ncolhong ascaniemjaicama nalhepop anac, alanac jata njan lhamacjo caselhaja" 16 Coca apquelammacpo sonquec quetlhencap aptaianco na mota apquelpaqmeiasma m'a apquenmac'acja la etlhenec etnancoc apmaniaie, coca mancolatsema niecje etnancoc apquelpaqmeiasma m'a. 17 Apto la enenlhet apiamo niecje elanac caselha actacmelo, coca melanac ma'a, mangiamolhma actonac ma'a.
Capítulo 5
Nema jennawescama nquescama nac netsecama
1
¡Ellailhonojo quetlhencap nquescama nac apquelletsecama, eliapqalhec jata, elleclhanwama ta njan ncanec ncowac jata aquientalhnema tapjaplhet'oc quetlhencap!
2
¡Ncocpelcalhcac jata m'a caselha apanco'oc anac, ncotuoc jata weneng apquetsecama!
3
¡ncolentepoc jata anie m'a pataccom oro nac canjan caselha alienmomo plata aniem'o apquellanquesaicamoc ma'a! Acjemo coca ncanec quetse ncaimelhcac actemacja nnelha acnem lhmanquec jam, coca anie' nac ma'a ncotlhenecjac jata nque meliamolhma, nconaqtewasecjoc jata nquec quetlhencap najan malha talha nac ma'a!
4
Apcacjanquec quetlhencap apquenmacmesaicama apanco'oc apnaclhecamoc aquielhna, apquetlheianme niecje apqueluannaicamoc aquianmoma ncanec melianmoncasac apquenmacmecama aquianmoma m'a, apleng'ac coca njan Apuesque acnema apmopuana apanquec ma'a.
5
Nnanquec na quetlhencap nquescama caselha apanco'oc apmennawe, nnaianque sonquec aquianmoma apquenmac'acja la etengiancoc, nnacmelascanquec na aniem'o nquescama aptecamoc m'a malha actonac nennaqtoscama la'a nenmelasecja nac cacpota angaqjec acuacmo ta acnem nengaqjemacja.
6
Apquetlheianwecjec quetlhencap meliamolhma ma'a apquenmacmesaicama, apquellaqjenquec najan
necsa apqueliamolhma niecje, mang coca njan eliaqmoncasecjac ma'a.
Metca acpecjai'a nelailhema acnem actacmanma
7
Quentlhencap elialheng'a, ellaielh jata acnem metca apquelpecjescama apuectanlha ta Apuesque, malha aptonac ma'a aniep angiapom la'a metca apecjescama nac apquelailhema acnem acmamai'acja
nac cacpota njan netamen enaclhec aquielhna m'a.
8
Nnawec na quetlhencap m'a ellienna ta apquellailhema m'a metca apquelpecjescama ncanec quetse ncaimelhcac apuectanlha ta Apuesque.
9
Quetlhencap elialheng'a, mellentepcasamanquec apqueluesai'a po'oc la'a ncanec quetse ncaimelhcac apuectanlha ta jengiecpelquemo ngiapom, jata eliecpelcoc quetlhencap ma'a.
10
Ntasec coca antancoc ennenco'o m'a aptaiancolha lhnac nanec apquetsecama ania'a nneng'a apquelleltennaianca ania'a aniem'o apquellapascama Engiapom Neten, apquellengaianco lhnac nanec na aquientalhnema m'a, coca apqueluascapmec na m'a metca apqueliengiecja colhuawec apquenmacmecama.
11
Nelliawec ennenco'o m'a apquellenniemawec enenlhet'awoc la'a aptengiaianco apiempeioc apqueluascapma necsa acuai'a la aquientalhnema. Apquellengai'a quetlhencap nema altennaicama aptemacja Job, apuascapmo lhnac nanec necsa aplengaianco aquientalhnema, netamen aptacmelquesquescaiacmo lhnac nanec na apcaniemjaicama Apuesque apto apiamolhma apanque', apietnai'o njan napa'at ma'a.
12
Quetlhencap elialheng'a, smac'ac alhenec mocjom jengetlhecmoscama nac acto neten anquec aquiaspommalhca, metnamoc juramento aquieplomo neten, nalhepop, metca lhamacjo caselha nac. Jata apquetlheno ta apquenmajai'a ellanancoc lhema caselha, ellanamoc jata m'a, jato ca apquetlheno ta manconmajai'a ellanancoc ma'a, mellanamoncoie'. Ntasec elieplauquesec aptancolha la apquetlheianma cacpota metlhenacpec meliamolhma quetlhencap ma'a.
13
Apno la lhema enenlhet aplengaianco aquientalhnema apiesecsec anac quetlhencap, ntasec elmalhnac ma'a, apno la njan lhema enenlhet acpaijecja apualhoc, ntasec ennecmacsec ma'a apuesai'a Engiapom Neten.
14
Apno la njan lhema enenlhet acmasca apiempec, ntasec ellawama metno apquetco'oc la cacpota elmalhnescasancoc ma'a, elleltelhnancoc najan aceite aquieplomo apuesai'a Apuesque.
15
Ca apquelelmalhno la aquieplomo meliasqueiam ma'a, etacmaluomoc jata acmasca apiempec anac. Apuesque Jesus ta emasquesquesec aplengaianco m'a, aquietno la njan meijamolhma, emecjoc jata mocjom tacja m'a necsa meijamolhma.
16
Ca ncanec na ntasec etlhenec moclhem'a apquellanecamoc meliamolhma napaqtawec po'oc apiesecsec anac quetlhencap jam, elelmalhnesques jata njan po'oc jam cacpota ncolhec altacmelquescacmo m'a necsa apquellengaianco anmasca apiempeioc, ca enenlhet la apeiwomo nietnec acmowana apquenmalhnoncoma.
17
Ca actemo lhnac nanec na Elias anneng'a m'a, nennemo njan ennenco'o enenlhet apanque, aptengiai'o njan apiempec necsa apquenmalhnoncoma apquenmalhneianca Engiapom Neten meltemo manconmaquiec acuaiacmo nalhet janet'olhema iantelhcapa, ntemenquec nac nanec na m'a.
18
Netamen nac nanec na m'a apquenmalhneiecjo mocjom Engiapom Neten cacpota ncomama, ca acmamecjo lhnac mocjom ma'a, actepquesecjo njan aquielhna lhepop actec anac.
19
20
Quetlhencap elialheng'a, moclhema'a la apquellanenco la caselha ncollatsecama apiesecsec anac, malha apjaiwonwaiam amai la ncolatsenquelha, ca apuet'o la po'oc engialheng ma'a, apiantemantamo la mocjom amai actacmanma, malha apuonquescama tep apquetsepma niecje ta m'a, aptemescasquec na po'oc apmesquesecjo tacja Engiapom Neten necsa apquelanai'a nquescama meijamolhma.