Toba-Maskoy: Regular Print

Updated ? hours ago # views See on WACS
Juan
Juan
Capítulo 1

Apuesai'a Apaioma apnenquec nac lheme Engiapom Neten
1 2 Tep nac nanec amanie apquelentepquescama Engiapom Neten lhamacjo caselha, apnenquec nac ma'a apuesai'a Apaioma 1 , apnenquec nac napocja Engiapom Neten ma'a, apnemo panquec nac na m'a. 3 Apquellanei'acjasecja lhnac na nec lhamacjo caselha Engiapom Neten apmaicama lhnac ma'a Apaioma cacpota elanac na m'a, man nac elanai'a caselha Engiapom Neten metco nlho apmaicama Apaioma nac ma'a. 4 Coca jeng Apaioma nac allaianco lhnac apquelliennactema aplhamacjo enenlhet'awoc lhma nquec jam, malha lhnac atsai'o lhma la m'a apiesecsec enenlhet. 5 Apquetsasquescanquec na lhma aisecsec apienaqtesacja la lhma, mancawanque nac na ncospanac ma'a atsai'o lhma nac. 6 Lhema enenlhet nac na aplomaca m'a apuesai'a Juan 2 , apcapascamo lhnac na Engiapom neten 7 cacpota etlhecmocsec actemacja apuetaianco atsai'o lhma nac, meliascamec na enenlhet'awoc ma'a. 8 Juan coca jawe atsai'o lhma, apto lhnoca apcapasammap ma'a cacpota eleltennasancoc enenlhet'awoc actemacja atsai'o lhma, 9 ncanec ncanquetaiacmec nac acuai'acja atsai'o lhma acto jawe ngiapac anquec ma'a. 10 Apuai'o lhnac apto Apaioma nalhepop anac jenque'e, apto lhnac nanec na apquellanai'a aniem'o apmaicama Engiapom Neten ma'a, coca enenlhet'awoc mang nac ellasecjai'ac ma'a etnocjac apuesque apanco'oc. 11 Apuai'o lhnac apiesecsec apquennemolhema apanque, coca apqueltacnonquec noca m'a. 12 Coca enenlhet'awoc la apquellelto apquenmaicamoc tacja cacpota njan meliasqueiam, aptaianco lhnac Engiapom Neten apquetcac ma'a, 13 malha lhna ntemac apalleiam alhnancoc aniem'o Engiapom Neten, jawe m'a aniem'o apqueltemelha apanque nac enenlhet. 14 Apto lhta Apaioma nac aptaiecjo lhta enenlhet apanque', aplomaca lhta njan nengiesecsa ennenco'o, nelluetai'a lhta njan apmopuana ca njan apientalhnemo ncanec apto lhta wanlha lhema Engiapom Neten apquetca, jengeluetasquescanque lhta jengamelaiam, nelluetai'o lhta njan metca apmopuana ania'a. 15 Necsa apuetai'a lhnac Juan 3 apto Apaioma, lhna ptemac apquellanemo enenlhet'awoc: —Apua'ac jenque'e' alheianmo lhta co'o ewa', neten na nquec apto apiaspommap jam, molhnoc co'o, ncanec aplomaca lhnac tep nac nanec secjec anque lhta—lhna aptemac ma'a. 16 17 18 Apmaicama lhnac Engiapom Neten Moises cacpota jengellancoc na jenganemacja apancoc, apmaicama coca njan Jesucristo cacpota jengeluetasquesec jengamelaiam cacpota njan apto jawe ngiapac anquec. Mamma enenlhet apuetai'o Engiapom Neten, wanlha coca apto apquetca apanque' apuetai'o m'a, apto njan nengaqtec anquec ma'a, apnemo apanquec na m'a, jengetlhecmoscanque lhta njan aptemacja Engiapom Neten, jengeltacmelquesquescanque lhta njan nellaniemjaicama m'a.
Juan aplheianma metno Mesias
19 20 Apquelanma apmaniaie co Jerusalen apquellapascamo lhnac sacerdotes cacpota njan Levitas cacpota elelmalhnama Juan, Mesias quelha m'a, ca apcatemmoianca lhnac iocjalhme canquec Juan ma'a, lhna aptemac: —Jawe co'o asto Mesias 4 —lhna aptemac 21 21 Ca apquelelmalhnecjo lhnac mocjom: —¿Lheiap anlho Elias annenga, je?— — Ma', jawe co'o Elias— lhna ptemac apcatemmoianca Juan. —¿Lheiap anlho secama ania'a 5 aplheianmo lhnac nanec engiapacsec Engiapom Neten, je?— — Jawe' —lhna ptemac mocjom Juan. 22 Ca apquelelmalhnecjo lhnac mocjom: —¿Se lha enenlhet lheiap que, je? Elhen no, nemmac'ac angeletsacjesec ania'a apquellelto lhquec jengellapascama—lhna aptaiancoc. 23 Ca apquellatemmoianca lhnac Juan ma'a aptemacja aplheianmo lhnac nanec Isaias: —Co'o asto nac enenlhet asquelpalhnemaicama iocjalhma metquelha temma: «¡Ellanocja ta amai cacpota ewa' Apuesque engancoc! 6 » lhnac na nec aptemac ma'a. 24 25 Apquellelto lhnac apquellapascama Fariseos lhna aptaiancoc mocjom apquellanemo Juan: — Jawe nac lheiap Mesias, jawe njan Elias, jawe njan secama ania'a aplheianmo lhnac nanec engiapacsec Engiapom Neten lheiap ¡Socactemo apquellauquesaianco na mota iemmen enenlhet que, je!— 26 Ca apquellatemmoianca lhnac mocjom Juan ma'a, lhna ptemac: — Asquellaucasquec co'o conne iemmen enenlhet, coca apiesecsec anac quetlhencap apnec po'oc, mang coca eliecpelcac quetlhencap mocjom. 27 Asua'ac co'o niecje emanie apmanie m'a, coca apto m'a awanjec anquec apientalhnemo, molhno co'o, monwapuanac niecje njan atnec jennencasecama m'a ncanec coneng anquec co'o. 7 —lhna aptemac Juan. 28 Coca lhamacjo acuetammalhca lhnac caselha m'a natemma acuesai'a Betania, aquieto tep aluata Jordan, apquellauquescamacja lhnac iemmen enenlhet Juan ma'a. 29 Mo'oc acnem na ntemac ma'a, apuetai'o lhnac Juan aplheiacmo Jesus ma'a, lhna aptemac apquellanemo enenlhet'awoc: —Ellammelhono m'a, aplhecmec apto nepquesec apquetcoc apcapascama Engiapom Neten, jata eljatsoscasancoc lhamacjo ncolatsecama apualho'oc enenlhet'awoc ma'a. 30 Alhenque lhta, netamen co'o ewac jata po'oc apto apiennactema molhno co'o, apcaniemjaicama lhnac na nec tep nac nanec. 31 Moijamoc secje lhta selha enenlhet quelhaja, asquellauquescanquec coca iemmen enenlhet'awoc co Israel cacpota eliecpelcanwomoc ma'a. 32 33 34 Apto lhta jeiapascama apqueltemo allauquesancoc conne iemmen enenlhet'awoc, lhta ptac jeiano: "Jata apuet'o ta Ewalhoc 8 acuaiwantamo tacjaplhet lhema enenlhet, coca enenlhet apto ascapascama m'a, jata ellancoc Ewalhoc ejenque aplhamacjo enenlhet" lhta aptac ma'a. Netamen asuet'o lhta co'o Jesus, apuaiwantamo tacjaplhet Engiapom Neten Apualhoc malha conemmactec, aclheianwacjo lhta co ewalhoc jawe ngiapac anquec apto Engiapom Neten apquetca m'a—
Apqueltamesaicamoc Juan apquellauquescama iemmen na ngiapom apquelieplecja Jesus
35 Mo'oc acnem na ntemac ma'a, apcacjenwecjo lhnac lheme Juan apcanet apquelieplecama m'a, ca apuetai'o lhnac Jesus apiecai'o m'a, lhna ptemac apquellanemo: 36 — Ellammelhono ja'e, ca apmancoc nepquesec apquetcoc apcapascama Engiapom Neten ja'e— lhna aptemac Juan. 37 Ca apquelieplecjo lhnac ma'a, 38 apencanmacpec nac Jesus necsa aplhengama, apqueluetai'o lhnac apquelieplentamo, ca apquelelmalhneianca lhnac ma'a, lhna aptemac: —¿Se ptengianco ie? —lhna ptemac. —Jengetlhecmoscama ¿co la aquieto apnemacja? —lhna ptaiancoc ma'a. 39 Ca apcatemmoianca lhnac Jesus: —Noc jelieplacja' eluetanwacjac jata ja'e— lhna aptemac. Ca apquelieplecjo lhnac ma'a, apqueluetanweiacmo njan apnemacja Jesus, ienactescanquec na sonquec ma'a, malha la cuatro lhnac ma'a, ca apcacjenweiacmo lhnac na m'a. 40 Apcanet nac enenlhet apquellengai'a apaioma Juan aplheianmo Jesus, ca apquelieplecjo lhnac ma'a, lhema apuesai'a Andres, Simon Pedro apetma. 41 Colhuawec anquec nac apmeiecjac Andres apiantenwecjo lhnac apialheng Simon, lhnac aptemac apcanemo: —¡Nelluet'ac lhec Mesias 9 ja'e, noc!—lhna aptemac 42 Ca apqueluecjo lhnac apnacja Jesus ma'a, lhna aptemac Jesus apcanemo Simon: —Lheiap anac Simon Juan apquetca, coca colhuawe nac etnecjac jata apuesai'a Cefas, mo'oc nemaltema coca Pedro— lhna aptemac Jesus.
Apquellawecama Jesus Felipe cacpota njan Natanael cacpota elieplomaja
43 Mo'oc acnem na ntemac, Jesus apmajai'o lhnac engiacjac iocjalhma Galilea, apuetai'o lhnac Felipe m'a, lhna aptemac apcanemo: —Noc, jeieplacja—lhna aptemac. 44 Co Betsaida lhnac ma'a Felipe, lhnac na apquellawacja m'a Andres cacpota njan Pedro. 45 Netamen apmeiacjo lhnac Felipe apiantenwacjo Natanael, lhna aptemac apcanemo: —¡Nelluet'ac lhec ennenco'o Mesias, Jesus co Nazaret lhaiec, Jose apquetca! Apquelcascanquec nac nanec Moises annenga waccajac apancoc aclheianmo m'a enenlhet anac, apquelelcaseianquec nac nanec na apquetsecama ania'a nnenga m'a—lhna aptemac Felipe. 46 Ca apcatemmoianca lhnac Natanael ma'a: —ieee, mancapuanquec etiepoc enenlhet apiamo la lhma m'a, na temma Nazaret—lhna aptemac. Ca apcatemmoianca lhnac Felipe m'a, lhna aptemac: —¡Elheng, noc cacpota etenwacja apanquec lheiap!— lhna aptemac 47 Ca apquetlhengamo lhnac ma'a, apuetai'o lhnac Jesus aplheiacmo Natanael, lhnac aptemac Jesus: —Ca enenlhet aplhecmo nac ja'e apto Israelita apanque, mamma aptaicama njan apmopuana ania'a —lhna ptemac Jesus. 48 Aplengai'ac nac Natanael ma'a, lhna ptemac: —¿Seclacto jeiecpelco nac lheiap que, je?— Ca apcatemmoianca lhnac Jesus, lhna aptemac: —Asuet'ac lhec apno apiamposacpo coneng pesquesca ncoc iamet higuera, amanie apmajai'a lhquec niawama Felipe—lhna aptemac. 49 Mpelapquescanquec nac Natanael aplengai'o m'a, lhnac aptemac apcanemo: —¡Jengetlhemoscama, lheiap apto Engiapom Neten apquetca, apto njan apiau'acja apuesque Israel!— lhna aptemac. 50 Coca lhna aptemac Jesus apcanemo: —Mei'ascacmoc lheiap ncanec asqueltennaso nac asuetai'a coneng iamet higuera, coca ncolhamonwomoc jata caselha jempelapquescama apuetai'a lheiap— lhna aptemac. 51 Ca aptemo lhnac na apquellanemo Jesus aplhamacjo m'a: —Acto jawe ngiapac anque, eluetac jata quetlhencap acmaijecja neten, Enenlhet Neten apquenmeiecja neten, apqueluaiwenta njan tacjaplhet ma'a Enenlhet Apquetca 10 nac— lhna aptemac Jesus.
1Apuesai'a Jesus
2Juan el bautista
3Juan el Bautista
4El elegido de Dios para salvar al pueblo de Israel, tambien llamado Cristo
5De este mensajero se habla en Deuteronomio 18:15-18
6Isaias 40:3
7No merezco ni siquiera desatarle las sandalias
8Espiritu Santo
9Cristo
10Jesus es el Hijo del hombre, que vino del cielo y se hizo hombre puro
Capítulo 2

/s1 Aptemescasecja Jesus iemmen vino 1 Janetolhem'a acnem na ntemac aquiecai'a m'a apacmetquescama Jesus Natanael, ca acmeiecjo lhnac Jesus anquen na temma Cana aquieto iocjalhma Galilea cacpota ncopasenwomoc aliemjapma m'a. 2 Jesus cacpota njan apqueltamesaicamoc apquelleltacpe lhta njan elpasenwomoc ma'a. 3 Necsa actacmelaicama lhma lhta m'a aliemanco lhta vino, lhta ntac acpacmetcaso nquen Jesus: —Nquelliemanquec lhec vino—lhta ntac. 4 Ca apcatemmonca lhta Jesus: —Me, manjengellietoc ennenco'o m'a, mancowacmoc acnem cacpota aluetasquesec se lha enenlhet co'o ie'—lhta ptac Jesus. 5 Coca lhta ntac Jesus anquen alpacmetcaso nema allennencasecama: —Etlheng nac jenque'e, etnamoc jata apqueltacja la etnancoc Jesus—lhta ntac. 6 Apnanque lhta njan 6 ietanwalhua m'a, malha 100 litro lhta moclhem'a, apquenmaianca lhta mota necsa apqueltemacja judios cacpota ellalhnasecjac apiempeioc napaqtec Engiapom Neten 1 . 7 Lhta ptac Jesus apquellano nema allennencasecama: —¡Ellaneso ta iemen ietanwalhua nac!—lhta aptac. Apquellasecjawe lhta m'a, ca apquelliatmenco lhta iemmen allaneianco. 8 Netamen lhta ptac Jesus apquellano mocjom: —Eliawo ta tquetse, elletsacjes jata apto apquemjama apmanie actacmelaicama lhma nac cacpota eiepconec—lhta aptac. 9 Ca apiepcono lhta m'a, ma lhta eijoc iemmen actaiecja vino, wanlha lhta apqueliojo m'a nema allennencasecama, 10 colhuawec lhta apcawema apoquenammap aliemjapma, lhta ptac apcano: —Aptaiancolha apancawec mota enenlhet ellancoc amanie vino actacmanma, coca melleso la apienanco apquellelto apquelpasenwai'a, netamen ellancoc mocjom mo'oc vino iama actacmanma, coca alpeiwecja aptac lheiap, alhaie apquellancoc vino neten anquec actacmanma—lhta aptac apquemjama apmanie. 11 Ca jeng ampaiacjasecja lhta Jesus apquelanai'a caselha monwetai'o aniem'o neten cacpota eluetasquesec aquietnema apmopuana, ma lhta eliascacmoc apqueltamesaicamoc ma'a. 12 Netamen Jesus cacpota njan nquen, apquelialheng'a cacpota njan apqueltamesaicamoc, apquenmeiacjo lhta na temma Cafarnaum, apcacjenwacjo lhta aquiacuatacjo m'a, malha nlho lhta janet'olhema acnem.
Apquelentepquescama Jesus apquelhaicamoc caselha conne Engiapom Neten apnemacja
13 Quetse lhta ncaimelhcac acnem apanco'oc judios actacmelaicama lhma acuesai'a pascua 2 , ca apmeiacjo lhta Jesus aquieto Jerusalen, 14 aptalhno Engiapom Neten apnemacja, apqueluetanwacjo lhta m'a enenlhet apquelhaicamoc wacca nema alhacquescama apopoc, nepquesec, conemmactec, aptengiaicamoc aquianmoma m'a, apcacjanque lhta njan ma'a necjau'ac asota apanco'oc enenlhet apqueliaqmoncasecja mo'oc pataccom aniem'o mo'oc necja. 15 Ma lhta ncasac aploma Jesus apuet'o m'a, ca apquelan'o lhta wacca aiempec neliacpelhquetma, apquelentepcaso lhta enenlhet apquelhaicamo lhta wacca nema alhacquescama apopoc cacpota njan nepquesec, ca apquelho nalhepop pataccom aliaquiema, apqueliaqnencaso lhta njan asota apanco'oc enenlhet apqueliaqmoncasecja mo'oc pataccom. 16 Lhta ptac Jesus apquellano apquelhaicamoc conemmactec: —¡Elentepques conemmactec anac, jawe alhammalhquelha caselha jenque'e, Tata apnemacja nque'e!—lhta aptac Jesus apquellano enenlhet ma'a. 17 Necsa apqueluetai'a lhta apqueltamesaicamoc ma'a, atlheianwacjo lhta apualho'oc actalhesammalhca waccajac Engiapom Neten apaioma, lhna ntemac: « Nietnocjasawec ewalhoc asuetanwactamo apquellanenco caselha ncolatsecama apnemacja lheiap» 3 ca ntemac ma'a. 18 Netamen ma'a apquelemjama apmania ie judios apquelelmalhnenca lhta Jesus, lhta aptancoc apquellano: —¿Selha acto aptonac lheiap jenca ie? ¡Nwa'! Elana no caselha monwetai'o aniem'o neten cacpota jengeluetasquesec Engiapom Neten apcaicamoc apientalhnemo lheiap—lhta aptancoc. 19 Ca apquellatemmonca lhta Jesus, lhta aptac: —Enaqtewasecja' quetlhencap Engiapom Neten apnemacja nac, janetolhem'a acnem jatoca ncotnec alanecjac mocjom alhnancoc jam—lhta aptac Jesus 20 Ca apquellatemmonca lhta mocjom judios, lhta aptancoc: — 46 iantelhcapa nwaiacmoc apquelpenescamo apquellanecamoc enenlhet Engiapom Neten apnemacja nac, lheiap coca aplhenac janetolhem'a acnem epenacsec apquelanecja alhnancoc—lhta aptancoc ma'a. 21 Coca Jesus jawe lhta niecje aplheianma Engiapom Neten apnemacja nac, aplhenammacpe lhta panque niecje apiocja nac ma'a. 22 Ntemenquec lhta m'a, Engiapom Neten alhta aptemescasecjac mocjom apjalhnancoc Jesus apiesecsec apquenmasquenwaiacmo, ca atlheianwecjo lhta apualho'oc apqueltamesaicamoc cacpota ncowac ma'a, ma lhta njan eliasqueiacmoc actemacja aclheianma Engiapom Neten apaioma, aptemacja lhta njan aplheianma Jesus.
Jesus apqueliecpelquemo apualho'oc enenlhet'awoc
23 Necsa actacmelaicama lhma lhta pascua m'a, Jerusalen alhta pnac Jesus, malhta eliascacmoc enenlhet ncanec apqueluet'a lhta caselha monwetai'o aniem'o neten apquelanai'a m'a. 24 25 Apqueliasqueiacmec coca njan Jesus ma'a, apiamawe lhta apualho'oc ma'a, mancaimommalhcac ma'a nema altennascama la ania'a apqueltemacja enenlhet.
1Los judios tenia una ceremonia en la que se lavaban sus pies y manos para estar bien delante de Dios. Ver Marcos 7:1-4
2Buscar referencia en Marcos para anotar aqui
3Salmos 69:9
Capítulo 3

Jesus ca njan Nicodemo
1 2 Pelhasep nac aptemac ma'a, apmaianco lhema fariseo 1 apnacja Jesus, Nicodemo lhnac apuesai'a m'a, apquemjama apmanie lhta apiesecsec judios ma'a, lhna aptemac apcanemo: —Jengetlhecmoscama, nelliawec ennenco'o Engiapom Neten apcapascama lheiap cacpota jengetlhecmocsec, nelluet'ac na ennenco'o caselha monwetai'o apquelanai'a lheiap, nelliawec na Engiapom Neten aplhelhma lheiap—lhna aptemac. 3 Coca lhna aptemac Jesus apcatemmoianca: —Jawe ngiapac anque, apmac'o la ennancojo nema acuonquescama 2 tep lheiap, ncaimelhquec amanie' etiemoc mocjom, malha nematca secja apteiam la'a—lhna aptemac. 4 Mpelapquescanquec nac aplengai'o Nicodemo m'a, ca apquenmalhneianca lhnac, lhna aptemac: —¿Nieje ncotnec lhema enenlhet necsa aptema apuaneiam etiemoc mocjom?¿Ntase nlho etalhnecjac mocjom au'alhoc anquen, je?—lhna aptemac. 5 Ca apcatemmoianca lhnac Jesus: —Ncaimelhque' nac etiemoc aniem'o Engiapom Neten Apualhoc cacpota njan iemmen, cacpota ennancoc nema acuonquescama tep 3 , acto jawe ngiapac anquec ma'a. 6 Enenlhet apteiam la au'alhoc anquen, atca njan ma'a, coca m'a enenlhet apto la apteiam aniem'o Engiapom Neten Apualhoc, coca Engiapom Neten apquetca njan ma'a. 4 7 Motlapques aplengai'a astacja lhquec alheianma ncaimelhquec etiemoc malha mocjom. 8 Nquelhcacme mota alhcaiam acmac'acja ncolhcama, nenleng'a niecje alhcacmo, mang coca aniojoc actepacja alhcaiam, maniojoc na acmanquelha, maniejec na ncotnec na enenlhet apteiacmo la aniem'o Engiapom Neten Apualhoc—lhna aptemac Jesus. 9 9 Ca apquenmalhnacjo lhnac mocjom Nicodemo m'a: —¿Nieje ncotnec ma'a aplheno nac, je?—lhna aptemac. 10 Ca apcatemmoianca lhnac mocjom Jesus ma'a: —¿Ma nlho eijoc lheiap? Tocja la apto neten apanquec jengetlhecmoscama aplhenammacpo mota apiesecsec co Israel. 11 Ennenco'o coca nelliawe', nelluetai'ac na m'a, quetlhencap coca jengelliascacme'. 12 Jeliascacmec alheno actacja caselha jenque'e nalhepop anac, jeliascamoc jata njan alheno ta caselha actacja m'a neten. 13 Mamma' enenlhet apuaiacmo neten, wanlha coca apto m'a apuaiwentamo nac nalhepop, apuesai'a Enenlhet Apquetca' 5 . 14 15 Ca Enenlhet Apquetca nac ma'a ncolhec jata njan alhno neten 6 , apquellelto la meliasqueiam ma'a ncoitec jata aliennactema apnengio'oc mancotnenwaianlha nnelha, ca aptemo lhnac na nec Moises annenga apquelhanmo neten menasma apquelanai'a tawapac iamet apquenenquescama aquieto iocjalhma metquelha temma. 7 16 Awanjec anquec apquellamelaiam Engiapom Neten enenlhet'awoc lhma nquec jam, ca ncanec engiapacsec lhema pjapac apanque' apquetca, apquellelto la meliasqueiam ma'a, menactewasacpec jata, ncoitec jata alliennactema apnengio'oc mancotnenwaianlha nnelha'. 17 Apcapasquec apquetca Engiapom Neten jenque'e nalhepop cacpota eluonquesec tep enenlhet'awoc, jawe apmajai'a enaqtewacsec. 18 Meliascacmo la Engiapom Neten apquetca, metselhnanec jata, coca apqueliascacmo la'a, 19 apquetselhnanecpe panquec ma'a, ca ncanec apuaio'o nac Engiapom Neten apquetca apto apcaponmatma, mang coca elleliejecjoc ma'a, coca aptengiaiancoc ma'a ienactesacja lhma nac ncanec apquellaneianquec caselha ncolatsecama m'a. 20 Lhamacjo apquellelto nac apquellanecamoc ncollatsecama, apqueltacnewacquec aponmatma nac, meltetesca'ac na atsai'o lhma cacpota meluetacpec necsa apquellanecamoc caselha ncollatsecama, 21 coca apquellelto nac apquellanecamoc caselha altacmanma, apqueltetesca'ac atsai'o lhma, apquelleltemo eluetac napocja enenlhet apquellasecjai'o lhamacjo jenganemacja apancoc Engiapom Neten— lhta aptac Jesus.
Juan apquellauquescama iemmen angiapom aplheianma Jesus apto neten apanquec
22 Mo'oc acnem alhta ntac ma'a, Jesus cacpota njan apqueltamesaicamoc apquenmeiacjo lhta iocjalhma Judea, apcacjenwacje lhta m'a iama aquiacuatacjo, ca apquellauquesaianco lhta njan conne iemmen enenlhet'awoc ma'a. 23 Aquellauquesaianquec nac na iemmen Juan po'oc temma acuesai'a Enon, nengaqtec ma'a na temma Salim, awanje lhta sonquec iemmen ma'a, ca apquelquetansemo lhta njan enenlhet'awoc apquelleltemo ellauquesancoc iemmen ma'a. 24 Ma lhta ncowaiacmoc mocjom acnem cacpota engiaclhencasacpo nenmammalhquelha Juan ma'a. 25 Apquellempai'o lhnac apquellatemmomap moclhem'a apquelieplecama Juan lhema judio m'a apqueltemacja lhta mota ellalhnasecjac apiempeioc. 8 26 Netamen nac ma'a apquenmeiecjo lhnac apnacja Juan apqueleltennasquecjo, lhnac aptaiancoc: —Jengetlhecmoscama, nlheianwacjawe nlho apualhoc enenlhet aplheianmo nac lheiap aptemo nac aplhelhma necja aluata Jordan, colhua coca apquellauquesanquec conne iemmen enenlhet'awoc ma'a, apquelieplacjec na apentalhnema apanque' enenlhet ma'a—lhna aptaiancoc ma'a. 27 Ca apquellatemmoianca lhnac Juan, lhna aptemac: —Ntasec anquec ma'a, Engiapom Neten apqueltemo ncotnejec. 28 Apquelleng'a lhta actacja alheianma quetlhencap alhnacjo nque jawe co'o Mesias 9 , wanlha nema jeiapascama apmanie m'a cacpota apenescasoc amai apancoc ma'a— lhna aptemac. 29 Netamen nac Juan ma'a apquelleltennaseianca lhnac lhema apietquescama, lhna aptemac: —Necsa actacmelaicama lhma' aliemjapma la'a, neten anquec apiaspommap apocquenammap anac aliemjapma, ncoliemjapoc apmajai'acja', apquetsewasawec coca m'a apto aptaianquelha aplhelhma, mpaijacjec na apualhoc aplengo apqueltennaicama m'a. Nnawec na co lha mpaijacjec ewalhoc ncanec apnec Jesus jenque'e, 30 ncoiawancoc jato ca njan apiaspommap ma'a, co'o toca ncaselhtecja. 31 Apto apqueniem'o neten, neten apanquec apiaspommap ma'a mancolhnoc ennenco'o nengellelto nac nenloma nalhepop anac, netlhenque mota actacja neluetai'a nalhepop. 32 Coca apto apqueniem'o neten, aplhenque mota actacja apuetai'a, aplengai'a njan neten, apqueliascacmec coca enenlhet ma'a. 33 Coca apto la meiasqueiam, eiecpelcanwomoc jata apto jawe ngiapac anque' aplheianma mota Engiapom Neten. 34 Apto apcapascama Engiapom Neten, aplhenque mota aptacja apaioma m'a, ncanec apcanquec na aclanei'o Apualhoc apanquec ma'a. 35 Engiapom Neten apcamelaiam apquetca, apcanquec apmopuana cacpota etnec apuesque aisecsec lhamacjo caselha apquelentepquescama lhta. 36 Mang jata nquec eliascacmoc Engiapom Neten apquetca nac, ncoitec jata alliennactema apnengio'oc mancotnenwaianlha nnelha, coca apquellelto la apqueltacnoncoma, mancolhec jata aliennactema apnengio'oc, etselhnanacpoc jata aquiawai'a nque aniem'o Engiapom Neten—lhna aptemac Juan.
1Buscar referencia en Marcos y anotar aqui
2Ver el reino de Dios
3Ver el reino de Dios
4Es espiritu
5Poner el significado
6Morira en la cruz
7Moises hizo la serpiente de bronce para que cuando la gente era mordida por una serpiente, mirara a alli y se sanara.
8Poner la nota de Juan 2 que explica el rito
9Cristo
Capítulo 4

Apacmetquescama Jesus nqueluana co Samaria
1 Apiamawe lhta Jesus fariseos apquellengai'a aplhamecamoc apquelieplecama, aplhaniec na apquellauquesaicamoc iemmen enenlhet'awoc, aselhte lhta m'a Juan. 2 Coca jawe niecje Jesus apquellauquesaicamoc iemmen enenlhet'awoc, wanlha lhtoca niecje apqueltamesaicamoc. 3 Apiamawe lhta njan Jesus apquellengai'o Fariseos ania'a aplhenammap, lhta ncanec etiepoc iocjalhma Judea, ca aptaqjemo neptamen aquieto iocjalhma Galilea, 4 nietawe lhta njan nalhet amai lhema iocjalhma acuesai'a Samaria, 5 apuacme lhta m'a na temma acuesai'a Sicar, nengaqte lhta lhepop apancoc Jacob annenga apcaicocjo lhnac apquetca Jose. 6 Njeclhe lhta mocjom aquietnemo m'a iamelquet apancoc Jacob annenga, apnacme lhta necja Jesus ma'a aniem'o apiampai'a alhengama nalhepop, malha lhta la 12 catelho m'a. 7 8 Coca apqueltamesaicamoc apquenmeiacje lhta apnacja temma aptengiaicamoc aptecamoc. Ca acuecjo lhnac lhema nqueluana co Samaria neptamna'ac ma'a aquiaiam iemmen, lhna aptemac Jesus apcanemo: —Jeiamoc no colha quetsec iemmen ancoc—lhna ptemac. 9 Coca meltetescaiacmoc Judios, co Samaria m'a, ca ncanemac ncotnec acpaioma nqueluana m'a, lhna ntemac: —¿Se lha ntac apqueltonac anwancoc iemmen lheiap que, je? Judio lheiap, co Samaria co'o —lhna ntemac anemo m'a. 10 Ca apcatemmoianca lhnac Jesus: —Manjeiecpelcac lheia', mancoijec na apmac'acja engiancoc jata lheia' Engiapom Neten. Co lhtema nac jeiecpelquema lheia', jenmalhnama ta iemmen, cacpota anwancoc iemmen actacmanma acmases anque' — lhna aptemac 11 Coca lhna ntemac mocjom nqueluana: —¿Se lha eiawoc iemmen actacmanma nac que, je? Mamma iemmen alhancoc apancoc lheiap apiengiecja la conne iamelquet anac, tawanne'. 12 Nengelieijenca Jacob annenga lhnac na nec jengellaicocja jenque'e iamelquet anac, apienaianquec nac na nec apquetcac cacpota njan apnaqtoscama. Neten apanque Jacob annenga, melhnoc lheiap— lhna ntemac. 13 Ca apcatemmoianca lhnac mocjom Jesus, lhna ptemac: —Apienquec jata nquec enenlhet iemmen aniem'o iamelquet anac, eimac jata mocjom, 14 coca enenlhet apiama nac iemmen ascaicamoc anac co'o, meimaquiec jata mocjom. Ncotepancoc jata mota iemmen conne apualhoc, ncancoc jata aquiennactema apnengiec mancotnenweianlha nnelha— lhna aptemac Jesus. 15 Coca lhna ntemac mocjom nqueluana: —Jeiamoc iemmen aplheno nac lheiap, cacpota moimecjec mocjom, moiacuonwataniec jata mocjom iemmen jenque'e iamelquet anac—lhna ntemac. 16 Coca lhna ptemac mocjom Jesus: —Coiantenwacja' atawa— 17 Ca atemoianca lhnac: —Mamma co etawa'— Lhna aptemac Jesus mocjom apcanemo: —Jai, jawe ngiapac actacja nac aclheianma, 18 asiawec co'o 5 lhta anacteianca'a lheia, coca colhuawe nac jawe njan atawa aquiantemaianca nac—lhna ptemac. 19 Mpelapquescanquec nac aclengai'a nqueluana, lhna ntemac: —¿Se lha ntac apiojo nac que? Apiolhma nac lheiap. 20 Asmac'ac apenesoc asqueltennascama asqueltawec jepeiwescasecja. Nelieiejenca co Samaria lhnac na nec apcacnecjac jenque'e lhienep acjema nac cacpota eltacnescasancoc Engiapom Neten ma'a, coca quetlhencap judios apquetlheianme mota actacmanma eltacnesquescacjac Engiapom Neten wanlha m'a aquieto Jerusalen, Engiapom Neten apnemacja nac. ¿Co la actacmelacja antacnesquescacjac Engiapom Neten ma'a, je?— lhna ntemac. 21 Ca apcatemmoianca lhnac Jesus: —Ncanquetacmec acnem ntasec apquenmac'acja la eltacnescasancoc Engiapom Neten jenque'e lhienep acjaiam anac nlhoca la m'a Jerusalen, jawe ngiapac anque astacja nac. 22 Lheia annemolhema co samaria meliamoc selha eltacnescasancoc que, coca ennenco'o judios nengelliamawec, ncanec nengelluoncasemmalhca tep anac aniem'o m'a judios. 23 24 Engiapom Neten jawe aptonac enenlhet, mamma apjapetec 1 , nwa'ac acnem apquelleltema eltejec apqueltacnescasecamoc acto jawe ngiapac anquec Engiapom Neten, eltacnescasancoc aniem'o apquenmaicama Apualhoc apanquec ma'a, actemacja aquietemo nquec ma'a—lhna aptemac Jesus. 25 Coca lhna ntemac mocjom nqueluana: —Asiawec co ewac jata Mesias, mo'oc nema ltema Cristo, jata jengelpeiwescasecja lhamacjo caselha— lhna ntemac. 26 Coca lhna ptemac Jesus: —Co'o nac Mesias— 27 Mpelapcasque lhta apqueluactamo apqueltamesaicamoc ma'a, acpelapqueso apqueluetai'a apacmetquesaicama Jesus lhema nqueluana, coca nquellennawenque lhta apquenmajai'a elelmalhnama actacja aclheianma nqueluana. 28 Ca acpecquenacjo lhta ietanwalhua m'a, acmeiacjo lhta temma aleltennascacjo enenlhet'awoc, lhna ntemac allanemo: 29 —¡Enenlhet lhec ja'e, apiawec lhec lhamacjo astemacja, noc nojo, Mesias quelhaja!—lhna ntemac ma'a. 30 Ca apquenmeiocmo lhta enenlhet apqueliocmo apnacja Jesus. 31 Coca apqueltamesaicamoc Jesus apqueliatenque lhta m'a, lhta aptancoc: —¡Etawecja apquetse! —lhta aptancoc. 32 Coca lhta ptac Jesus apquellatemmonca: —Nietnec co'o astoma meliejec quetlhencap— lhta ptac ma'a. 33 Apquelpacmetquesacpe lhta moc apancawe apqueltamesaicamoc ma'a, lhta aptancoc: —Nne nlho ca la acsantencaso aptoma—lhta aptancoc. 34 Coca lhta aptac Jesus: —Ascasecjai'o co'o Engiapom Neten, asaujo ta asmacmecama apqueltemo lhta alana' apto njan jeiapascama m'a, ca malha astoma co'o m'a. 35 Ca ptanco mota quetlhencap apquetlheno, 4 pelten nelailhema nenganma cacpota annaclhec aquielhna, coca stac co asquellano ellanjono aniep aquiawai'a nac, nnacmatque aquielhna m'a, nennaclhemacja ntajac. 36 Etlhewancoc jata aquianmoma apquellelto la apquenmacmecama apnaclhecamoc aquielhna, ca aquielhna nac enenlhet ma'a ncoitec jata aliennactema apnengio'oc ncotnenwaianlha nnelha, ncolpaijecjac jata apualho'oc lhemec ma'a apasmecja apquellelto apquenaicamoc cacpota njan apnaclhecamoc. 37 Jawe ngiapac ma'a actacja nema altennaicama, napocja apquenaicamoc actec, napocja njan apnaclhecamoc aquielhna. 38 Co'o coca asquellapascama quetlhencap enaclhancoc aquielhna aquietemelha lhta apquenaicocjelha po'oc enenlhet ma'a, coca quetlhencap nquelietacjec apquenmecja apnaclhecamoc aquielhna —lhta ptac apquellano Jesus ma'a. 39 Ma lhta eliascacmoc enenlhet'awoc co Samaria Jesus, lhta ncanec nqueluana altennanwecjo actemacja aniemjaicamaja apiamo Jesus ma'a, 40 ca apqueluo'o lhta enenlhet apnacja Jesus, apquellelto lhta njan elhnecjac secjec Jesus ma'a, ca apnacjo lhta janet acnem ma'a. 41 Ma lhta eliascacmoc enenlhet'awoc apquelleng'o actacja apaioma Jesus. 42 Netamen alhta aptancoc apquellano nqueluana lhta m'a: —Ma lhta angeliascacmoc Jesus actacja lhta aclheianma lheia, coca colhuawe nac mangeliascacmoc ncanec nelleng'ac aptacja apaioma, colhua nelliawec apto jenwonquescama tep ma'a—lhta aptancoc enenlhet'awoc. 43 Netamen ma'a, janet acnem alhta ntac apnema m'a, apquempacjo mocjom aplhengama Jesus aquieto Galilea. 44 Aplheianme lhta Jesus mamma secama ania'a emacpoc tacja apcawacja apanquec la'a. 45 Coca apquenme lhta tacja apuacmo Jesus Galilea m'a, ncanec nquetlheianwacje lhta apualho'oc enenlhet caselha jempelapquescama apquelanei'o alhta Jesus aquieto Jerusalen necsa actacmelaicama lhma pascua lhta m'a.
Aptacmelcasecja Jesus apuesque apquetca
46 Ca apquempacjo lhta mocjom Jesus aplhengama, apuacjo lhta na temma Cana aquieto Galilea, aptemescasecjelha lhta njan iemmen vino ma'a. Aplomaca lhta m'a lhema apuesque soldados, apquennencasecama apiau'acja apuesque, acmasca apiempec alhta apquetca aquieto m'a na temma Cafarnaum. 47 Apleng'a lhta apuesque apuo'o Jesus apquempai'o Judea apuaiacmo Galilea, ca apmeiacjo lhta apqueltennascacjo etnec aplhelhma apnemacja, apcasquesque lhta ame' apqueltemo etacmelcasecja apquetca ncama lhta apquetsepma m'a. 48 Lhta aptac Jesus: —Lheiap cacpota njan apquennemolhema nac wanlha apquelleltemo eluetac caselha monwetai'o aniem'o neten cacpota manjeliascame—lhta aptac apcano. 49 Apcapema lhta apuesque m'a, lhta aptac: —Noc, engiacjetamoc, angenmeiacja asnemacja amanie apmajai'a enietsepoc eietca— lhta ptac apuesque. 50 Ca apcatemmonca lhta Jesus: —Etaqjecja apnemacja, etacmelecjac jata apquetca—lhta ptac. Ma lhta ei'ascacmoc aptacja apcano apaioma Jesus, ca aptaqjacjo lhta njan ma'a. 51 Necsa aptaqjecja lhnac m'a, nalhet amai, apqueltaniacmo apquenmacmesaicama, lhna aptaiancoc apquellanemo: —Aptacmelacjec lhec apquetca— lhna ptaiancoc. 52 52 Lhna ptemac apquelelmalhneianca apuesque: —¿Se lhquec hora aptacmelacjo ie, je?— — Acnem alhta, la 1 catelho lhta mmascac acmelhanma apiempec ma'a—lhna aptaiancoc ma'a. 53 Nlheianwecjec nac apualhoc apuesque nietemawec anque lhta hora actacja apaioma Jesus etacmelecja apquetca, mang nac ei'asqueiacmoc apuesque cacpota njan acuacjo apquetcac. 54 Coca jeng janet alhta ntac apquelanai'a Jesus caselha monwetai'o aniem'o neten, aquieto m'a Galilea necsa aptaqjemo Judea.
1Dios es espiritu
Capítulo 5

Jesus aptacmelcasqueiam metca aptapno'oc
1 Apmeiacje lhta Jesus aquieto natemma Jerusalen cacpota epasenwomoc actacmelaicama lhma judios apanco'oc ma'a, 2 nengaqte lhta atong nentalhnemacja Jerusalen acuesai'a nepquesec, nietnenque lhta lhema pa'at metaimong alanemmalhca acjalhtemommalhca necjau'ac, 5 lhta njan atno'oc ma'a, pancalhua coca conne acnalhuatemmalhquelha iemmen ma'a acuesai'a Betzata, hebreo apaioma. 3 4 Apnaianque lhta lhamacjo actemacja anmasca apiempeioc ma'a, metca apaqto'oc, apqueliacteicama, metca aptapno'oc. 5 Apietnenque lhta njan lhema enenlhet ma'a, 38 iantelhcapa lhta nwaiacmoc aplengaianco acmasca apiempec. 6 Ca apuetanwacmo lhta Jesus ma'a, aplengai'o njan ania'a aplhenammap acmasca apiempec anac ma'a, lhta aptac apcano: —¿Apqueltawe nlho etacmelecja lheiap, je?—lhta aptac. 7 Ca apcatemmonca lhta enenlhet: —Monwapuanac aclhec emanie iemmen necsa nema acjaposcama la iemmen 1 , nne mota jepoctencaso co'o, mamma co enenlhet jepasmoc cacpota aclhec iemmen emanie' — lhta ptac enenlhet. 8 Coca lhta ptac apcano Jesus: —Etnemecja neten, ema aptanema nac, eiepconquesama ta njan elhong— lhta aptac. 9 Colhuawec anquec alhta apquenmacjac neten, aplhengo njan, ca apmo lhta njan aptanema m'a. Coca nietawec anque lhta actacja acnem nennecjelha' sabado. 10 Apquellomawec nac apqueluetai'o apquelemjama apmaniaie' judios ma'a, lhna aptaiancoc apquellanemo aptacmalueiam enenlhet: —Sabado acnem anac nennecjelha, mancoltemac jenganemacja ampatmoc nentanema la'a— lhna aptaiancoc ma'a. 11 Coca lhna aptemac enenlhet: — Apto lhquec jetacmelcasecja apqueltemo apatmoc jenque'e cacpota njan alhong—lhna aptemac. 12 Apquelelmalhnecjawec nac mocjom apquelemjama apmania ie judios, lhna aptaiancoc: —¿Se lhquec altema epatmoc aptanema nac que, je?— 13 Mang noca eijamoc enenlhet apuesai'a, ncanec mannac etecjoc mocjom Jesus, aplhanie lhta enenlhet ma'a. 14 Netamen ma'a apuetacjo lhta mocjom Jesus enenlhet conne Engiapom Neten apnemacja', lhta ptac Jesus apcano: —Aptacmelacjawe i'e lheiap, melanecja nquec mocjom ncolatsecama, ncotnecjac quelha mocjom aquiawai'a acmasca apiempec—lhta ptac apcano. 15 Netamen apmeiacjo lhta mocjom aquieto neptamen enenlhet, apcacjancolha apquelemjama apmaniaie' judios, lhna aptemac apquellanemo: — Colhua asiawec apto lhquec jetacmelcaseja', Jesus lha iec—lhna ptemac ma'a. 16 Apquellempai'awec nac apquelemjama apmaniaie judios apquelquetansema Jesus ma'a, lhta sonque apmacmeianca aptacmelquescaiacmo acmasca apiempec acnem nennecjelha. 17 Coca lhta aptac Jesus apquellano m'a: — Co'o Tata apmacmema lhamacjo acnem, co'o njan asmacmema— lhta aptac Jesus. 18 Apquellauque lhta apquelemjama apmaniaie judios ma'a, apquenmac'awe lhta ennapoc Jesus ncanec apmacmeianca acnem sabado, aplhenacpe lhta nja apanquec apto Engiapom Neten apquetca, apnemo njan Engiapom Neten. 19 Coca lhta aptac Jesus apquellano m'a: —Jawe ngiapac anque, apto apquetca mancapuanquec elana apmac'acja la elana, wanlha elanac apuet'o la apquelan'o caselha apiapom, lhamacjo caselha apquelanai'a apiapom, cacpota njan elanac ma'a apquetca. 20 Apiapom apcamelaiam apquetca apanque', apuetascasquec aptacja la apquelanai'a, netamen etesquesec jata mocjom caselha monwetai'o nquec ma'a, ncolpelapquesec jata apualho'oc quetlhencap apqueluet'o ta m'a. 21 Apiapom apqueltemescasocjec apjalhnanco'oc apquellelto apqueletsepma, apquetca njan ma'a apquellanquec aliennactema apnengio'oc apquenmac'acja la ellancoc enenlhet. 22 Apiapom anac melhe nac se lha enenlhet meijamolhma cacpota njan apqueliamolhma, apcanquec apquetca aquiawai'a apmopuana cacpota elanac ma'a, 23 cacpota ellajoc aplhamacjo enenlhet apquetca, nnawec na ellajoc apiapom. Mang jata nquec ellajoc na apquetca nac, mang na ellajoc apiapom, apto lhta apcapascama apquetca. 24 Apto la enenlhet aptacmelquescamo apcailhemo astacja alheianma, meiascacmo la njan apto jeiapascama, jawe ngiapac anquec enenlhet anac ncoitec jata aquiennactema apnengiec ncotnenwaianlha nnelha, metuasacpec jata njan, apto lhta malha apquetsepma, colhua coca aptacjac apjalhnancoc. 25 Jawe ngiapac anquec astacja nac, nwa'a acnem colhuawe nac apquellelto nac apquelletsepma elleng'ac jata apaioma Engiapom Neten apquetca, ncoitec jata aptaicamoc apjalhnanco'oc. 26 Apiapom anac nietnec apmopuana cacpota ellancoc aliennactema apnengio'oc enenlhet'awoc, apcanque lhta njan apquetca apmopuana cacpota ellancoc na aliennactema apnengio'oc enenlhet. 27 Apcanquec na apquetca apientalhnemo cacpota elhenec se lha enenlhet melatsecama nlho ca la apiamolhma, ncanec apquetca apto Enenlhet Apquetca. 28 Molpelapquesanquec apquellengai'a astacja nac alheianma, ncowac jata acnem apquellenganweiam apaioma Engiapom Neten apquetca apquellelto apquenmasquenwaiacmo, 29 etnancocjac jata apjalhnanco'oc ma'a. Apquellelto lhta apquellanecamoc caselha altacmelo necsa aptaicamoc apjalhnanco'oc, etlhewancoc jata aliennactema apnengio'oc ma'a, coca apquellelto lhta apquellanecamoc ncolatsecama, ncolhec jata aquiaqmoncasacjo apqueltemacja m'a. 30 Monwapuanquec alanac asmac'acja la alana ejencoc ejenque', apiapom anac ma'a jelhecmosquec atnec asqueliequiescama enenlhet meijamolhma cacpota njan apiamolhma, coca aquietemo nquec asqueliequiescama aniem'o asqueliejecjo apiapom anac ma'a, apto njan jeiapascama. 31 Acjemo ta ncotnec alhenammalhco ejenquec co'o asiamolhma, jetlhenec jata quetlhencap asmopuana ania'a, 32 apnec coca po'oc enenlhet apto jawe ngiapac anquec jelheianma, asiawe co'o aplheianma mota apto jawe ngiapac anque'. 33 Apquellapasque lhta quetlhencap apquellennencasecama m'a apnacja Juan cacpota jelpeiwesecjoc co'o, jelhenque lhta co'o Juan acto jawe ngiapac anque. 34 Coca mancaimelhcac enenlhet enmeiwoc asuesai'a, Engiapom Neten coca apuanquec ma'a elana, alhenquec co mota caselha nac cacpota meliascamec Engiapom Neten, eluoncasacpoc jata njan tep quetlhencap. 35 Apquetlhecmoscama lhta Juan, nte lhta malha talha alhancoc aponmatma aisecsec ienactesacja lhma' la'a, nquelpaijacje lhta apualho'oc apquelleng'o m'a iacuatacjo nquec coca. 36 37 Jai', jelheianme lhta co mota astemacja Juan, coca lhamacjo caselha asquelanai'a napactawec quetlhencap aniem'o apiapom, asqueluetasquescanquec acto iocjalhmec anquec asto nema jeiapascama. Apiapom na jelheianma co'o, quetlhencap coca mamma nquec apquellengai'a aptacja apaioma m'a, melluetai'ac na napa'at ma'a, 38 menmaiancoc na tacja apaioma m'a ncanec jeliascacmec co'o, asto jeiapascama m'a. 39 Apqueltacmelcasawec niecje apquelleltamesammap waccajac Engiapom Neten apaioma cacpota eluetanwomoc ma'a ncoitec aliennactema apnengio'oc mancotnenweialha nnelha, jelheianme' co'o waccajac anac actalhesammalhca, 40 coca jeliasquiacme mota quetlhencap, manjellelquetamac allancoc alliennactema apnengio'oc ma'a. 41 Motengiac co'o jenmama la tacja quetlhencap, 42 ncanec asqueliawec mellamelaiacmoc Engiapom Neten. 43 Co'o Tata apto lhta jeiapascama, coca manjenmac tacja quetlhencap, coca apuo'o la po'oc enenlhet apuesai'a apanque', enmancoc tacja m'a. 44 Jeliascacmec niecje quetlhencap co'o, coca wanlha aptengianque mota quetlhencap enenlhet'awoc etlhenec apqueliamolhma panquec la'a, coca metengiancoc ma'a Engiapom Neten la apquetlheianma apqueliamolhma quetlhencap. 45 46 47 Apquetlhenque mota meliasqueiam jenganemacja Moises quetlhencap, jawe coca iocjalhme', ncanec Moises jelheianmec co'o aptalhescama, jeliasqueiacmec coca njan co'o quetlhencap. Mancaimelhcac co'o atlheianwacjac apqueluesai'a meliamolhma quetlhencap napaqtec apiapom ma'a, jenganemacja Moises jatoca ncotlheianwacjac ma'a— lhta aptac Jesus apquellano apquelemjama apmaniaie judios ma'a.
1Decian que un angel movia el agua y el primero que entraba quedaba sanado
Capítulo 6

Jesus apquellaicamoc aptecamoc tep cinco mil enenlhet'awoc
1 Apmeiacje lhta Jesus mo'oc necja sanga acuesai'a Galilea, mo'oc acuesai'a Tiberia. 2 Ma lhta ntec enenlhet apquelieplecja m'a ncanec apquelluetai'a nlhanie caselha monwetai'o aniem'o neten apquelanai'a m'a, apqueltacmelquescaiam enenlhet anmasca apiempeioc ma'a. 3 Ncanquetuacme lhta njan ma'a acnem actacmelaicama lhma acuesai'a Pascua, ca apmeiacjo lhta Jesus cacpota njan apqueltamesaicamoc lhienep acjaiam, ca apcacjenwacmo lhta m'a. 4 5 Ca apcammelho lhta Jesus, ma lhta ntec enenlhet apquetlheiam ma'a, apquenmalhnenca lhta Felipe, lhta ptac: — ¿Co la anwetanwomoc nenmama la nentoma m'a aptecamoc la enenlhet anac, je?—lhta ptac Jesus. 6 Apquenmalhnema lhta apanquec Jesus Felipe engiatemmoma quelhaja, coca apiawe lhta niecje Jesus apmac'acja etnejec. 7 Ca apcatemmonca lhta Felipe, lhta ptac: — Ncacjoc anmacmama 7 pelten la'a aquianmoma patacom, mancowacjec cacpota angellancoc quetsec la pan enenlhet'awoc anac—lhta ptac ma'a. 8 Apne lhta njan po'oc apqueltamescama Jesus ma'a apuesai'a lhta Andres, Simon Pedro apetma, lhta aptac apcano Jesus: 9 —Ca lhema apquetcoc jenque'e, wanlha cinco pan aquiepetcai'a cebada 1 , (notiaqpa) janet na quelasma mmocjetec, mancowacje coca nennasco la'a —lhta ptac Andres. 10 Coca lhta aptac Jesus apquellano apqueltamesaicamoc: —Eleltennasamoc enenlhet'awoc anac engiacjanco ta tacjalhet pa'at alielsellemo nac—lhta ptac Jesus. Tep cinco mil alhta apquellennawa'ac ma'a. 11 Ca apquenmo lhta Jesus pan, apto njan gracias Engiapom Neten, apquellanco enenlhet'awoc ma'a, nnawec alhta njan quelasma mmocjetec. Aptawenque lhta lhamacjo enenlhet'awoc ma'a 12 acuacmo apqueliaqcanacmo lhta m'a, netamen lhta aptac apquellano Jesus apqueltamesaicamoc: —Elleliaqjecjo ta apquelaimommap anac, nengencasemmalhca ta—lhta ptac Jesus. 13 Nwacme lhta 12 iama posac alaimommalhca apqueliaqjecja m'a. 14 Mpelapcasque lhta enenlhet'awoc apqueluet'o caselha monwetai'o aniem'o neten ma'a, lhta aptancoc: —Jawe na ngiapac enenlhet anac apto secama ania'a aplhenammacpo lhnac nanec lhennenga cacpota ewac jenque'e—lhta aptancoc ma'a. 15 Apiempeioc apancawe lhta aptengiancoc enenlhet cacpota eltemesquesec apiau'acja apuesque' Jesus, coca apcanetuacje lhta netne canque lhienep acjaiam ma'a cacpota elhec aplhepquennenga m'a.
Jesus aplhengama tacjalhet iemmen
16 17 Apquelienactesema lhta lhma m'a, ma lhta ewactac Jesus mocjom ma'a, ca apquelcanetuacjo lhta loma nemmen moc apancawec apqueltamesaicamoc cacpota eljalhtepelhquetec sanga, eluomoc na temma Cafarnaum. 18 Colhuawe lhta nquelhcacmoc alhcaiam aquiennactema m'a, aliocjo lhta nja ntac alacjaiam iemmen ma'a. 19 Apqueluacme' lhta malha 5 nlho ca la 6 kilometros apquetlhengama loma nemmen, ca acpelapqueso lhta apqueluetai'a Jesus aplheiam tacjalhet iemmen, apquellac'a lhta njan ma'a. 20 Coca lhta ptac Jesus ma'a: —¡Manjellaga, co'o jenque'e!—lhta ptac. 21 Nqueltacmelacje lhta apualho'oc apqueltamesaicamoc ma'a, ca apquelcanetcaso loma nemmen, apqueluacmo njan colhuawec anquec na temma Cafarnaum. 22 Netamen mo'oc acnem na ntemac ma'a, enenlhet'awoc apquellelto apcacjaicocja tep sanga, nquetlheianmec nac apualho'oc moc apancawec apqueltamesaicamoc Jesus apquetlhengamo loma nemmen ma'a. 23 Ca apqueluetai'o lhnac na atlheiacmo aclhamacja loma nemmen alleniemai'o m'a na temma Tiberias, nengaqte lhta aptemacja lhta gracias Engiapom Neten Jesus ma'a, apquellaianquelha lhta njan aptecamoc enenlhet'awoc apentalhnema m'a. 24 Coca mang nac eluetai'ac Jesus cacpota njan apqueltamesaicamoc neten loma nemmen ma'a, ca apquelcanantemo lhnac loma nemmen, nlhaniec nac loma nemmen ma'a, apqueljalhtepelhquetmo lhnac na sanga acmaianco na temma Cafarnaum aniem'o apquelquetansema Jesus ma'a. 25 Ca apqueluetacjo lhta Jesus ma'a, apquellelmalhnenca, lhta ptancoc: —Jengetlhecmoscama ¿Se lha acto acnem apuai'a lheiap jenque'e?—lhta ptancoc. 26 Coca lhta ptac Jesus apquellatemmonca m'a: — Jelquetanque mota quetlhencap ncanec asquellanque lhta aptecamoc acuacmo apqueliaqcanacmo, apqueliaspacquec ma'a, coca meliojoc mocjom quetlhencap selha enenlhet co'o ie 2 . 27 Moltama nquec apquellualho'oc aptengiaicamoc aptecamoc, ncosaujalhcac mota m'a, coca ntase eliawencaso apquelquetansema mo'oc actemacja nentoma acto mancosaujommalhca, allaicamoc na apquelliennactema mancotnenweianlha nnelha apquellaniemjaicama, coca Enenlhet Apquetca nac apuanquec ellancoc ma'a, ncanec nietnec apmopuana m'a aniem'o Engiapom Neten—lhta ptac Jesus apquellano m'a. 28 Coca lhta aptancoc enenlhet apquellelmalhnenca m'a: —¿Co la apqueltacja antancoc Engiapom neten ennenco'o m'a, je?—lhta ptancoc 29 Ca apquellatemmonca lhta Jesus ma'a, lhta ptac: —Engiapom Neten apqueltawec meliascamec apto apcapascama—lhta ptac. 30 Lhta ptancoc mocjom enenlhet apquellano Jesus: —Elana no caselha monwetai'o aniem'o neten cacpota mangeliascamec ennenco'o lheiap, 31 ca aptemo lhnac nanec nengellieijenca Moises annenga aquieto iocjalhma metquelha temma, apquellaianco lhnac nanec nengellieijenca pan apqueniem'o neten, mana lhnac apuesai'a m'a—lhta ptancoc ma'a. 32 33 Ca apcatemmonca lhta mocjom Jesus ma'a, lhta ptac: —Jawe ngiapac anquec ma'a, jawe Moises annenga apquellaicamoc nac nanec pan apqueniem'o neten, co'o Tata coca apquellaicamoc ma'a, coca colhuawe nac apmac'ac na ellancoc quetlhencap po'oc aptema pan apqueniem'o njan neten, apquellaicamoc apqueliennactema enenlhet'awoc lhma nquec jam—lhta ptac Jesus. 34 Coca lhta aptancoc mocjom enenlhet'awoc: —Apuesque, jengellamoc jata mota pan anac ma'a—lhta aptancoc. 35 Coca lhta aptac Jesus apquellano mocjom: —Co'o asto nac pan asquellaicamoc alliennactema apnengio'oc enenlhet, apto la jeiplecama, manjei'asqueiam najan, mancaqjecjec anquec jata mec cacpota njan meimaquieje'. 36 Jeluet'a niecje quetlhencap asquelanai'a lhamacjo caselha napaqtawe, mocjom coca jeliasqueiam. 37 Lhamacjo apquellelto lhta apiapom jellaicamoc apqueltemo altacmelquesec, jelioctanie lhta co'o, moltacjesec najan. 38 Asuaiwantanie lhta co'o coneng jawe asmac'acja atnejec ejencoc ejenque', wanlha asma' aliejecjo co'o Tata apto lhta jeiapascama. 39 Apqueltemo altacmelquesec enenlhet'awoc anac jellaicamo lhta, netamen acuacmo ta nnelha lhmanquec jam, altemescasecjac jata mocjom apjalhnancoc. 40 Co'o Tata apqueltawec ellanjoc aptemacja apquetca nac, meliascamec najan cacpota m'a etlhewancoc aliennactema apnengio'oc ncotnenwaianlha nnelha', atnescasocjac na apjalhnanco'oc acuacmo ta nnelha acnem alhma nquec jam— lhta ptac Jesus. 41 Coca m'a, moclhem'a apquelemjama apmaniaie judios apquelpacmetquesacpawe lhta moc apancawec ma'a apqueliemetcasenca aptacja Jesus ma'a, ncanec aplhenacpe lhta apanque aptema pan apqueniem'o neten, 42 lhta aptancoc ma'a: —!Selha ntac aplheno nac Jesus apqueniem'o neten, nelliawec ennenco'o ncana'ac, Jose apquetca jam!—lhta ptancoc. 43 Ca apquellatemmonca lhta Jesus ma'a, lhta ptac: —¡Eluanma'! 44 Mancotlhenap apualho'oc quetlhencap sec la co'o enenlhet que', wanlha co'o Tata apto jeiapascama apuanque elianwesquescamjoc jata, netamen atnescasocjac jata apjalhnanco'oc apiesecsec apquenmasquenwaiacmo acuacmo ta nnelha alhma nquec jam. 45 Nietnec apnaqtalhescama waccajac apquetsecama ania'a nnenga, ca ntac jenque'e: «Engiapom Neten jata etlhecmocsec lhamacjo enenlhet'awoc» 3 ca ntemac ma'a. Enenlhet apquellailhemo, apquellasecjai'o la njan jengetlhecmoscama nac, jata etnancoc jelieplecama co'o m'a. 46 Mamma enenlhet apuetai'o apiapom, wanlha coca apto apcapascama. 47 Jawe ngiapac anque, apto la meiasqueiam, ncoitec jata aquiennactema apnengiec mancotnenweianlha nnelha. 48 Co'o asto nac pan apqueltemesquescama apquelliennactema enenlhet'awoc. 49 Apquelieijenca quetlhencap aptoianquec nac nanec pan apqueniem'o neten aquieto m'a iocjalhma metquelha temma, coca apqueletsepmec ma'a, 50 51 coca aptawenco la asiocjojo malha pan apqueniem'o neten, ncoitec jata aliennactema apnengio'oc mancotnenwaianlha nnelha ncanec co'o asto pan apqueniem'o neten —lhta aptac Jesus. 52 Apquellempawe lhta mocjom apquelpacmetquesacpo moc apancawec judios ma'a, lhta aptancoc: —Nieje ncotnec jengellancoc apjapetec anac cacpota antawancoc— lhta ptancoc ma'a. 53 Coca lhta aptac Jesus: — Jawe ngiapac anquec ma'a, mang jata nquec etawencoc quetlhencap apjapetec Enenlhet Apquetca nac, meinanco la njan ema apancoc ma'a, mancoitec jata aliennactema apnengio'oc. 54 Coca aptawenco la ejepetec anac, apienanco la njan ema ejencoc ma'a, ncoite ta aliennactema apnengio'oc, netamen acuo'o la nnelha acnem lhmanquec jam, co'o ta atnescasocjac apjalhnancoc apiesecsec apquenmasquenwaiacmo. 55 Co'o ejepetec anac, acto jawe ngiapac anquec nentoma, co'o ema ejencoc anac najan, acto njan jawe ngiapac anquec nengiama. 56 Aptawenco la enenlhet ejepetec anac, apienanco la njan ema ejencoc anac, nelpasmommalhco nentancoc ma'a. 57 Apiapom apto alhta jeiapascama nietnec apiennactema, jeianquec na co'o apiennactema m'a, enenlhet aptawo la ejepetec anac, ncoitec jata apiennactema. 58 Co'o asto pan apqueniem'o neten, jawe ptonac pan apqueniem'o lhnac na nec neten, aptoianquec nac nanec apquelieijenca quetlhencap, ncacjoc coca apqueletsepmec lhnac nanec ma'a, coca aptawenco la pan anac, ncoitec jata aliennactema apnengio'oc mancotnenweianlha nnelha—lhta ptac Jesus. 59 Lhamacjo apquetlhecmoscama nac Jesus ma'a aquieto lhta conne apcacnecjelha judios 4 na temma Cafarnaum. 60 Ca apquelleng'o lhta apquellelto apquelieplecama Jesus ma'a, lhta aptancoc: —Nientelhec anquec ammoc tacja jengetlhecmoscama nac—lhta ptancoc. 61 Coca Jesus apiawe lhta apqueliematquesanca enenlhet'awoc ma'a, lhta aptac: —¿Nquellaucasque nlho quetlhencap astacja lhquec alheianma, je? 62 ¿Co la ta etnancoc quetlhencap apqueluet'o ta Enenlhet Apquetca nac apmeiacjo ta mocjom neten, je? 63 Engiapom Neten Apualhoc acto apquellaicamoc aliennactema apnengio'oc quetlhencap, jawe enenlhet. Ca asqueltennaicama lhquec Engiapom neten Apualhoc nqueniem'ac ma'a, allancoc jata njan aliennactema apnengio'oc, 64 coca quetlhencap moclhem'a apqueliascacmec mocjom — Lhta aptac Jesus ma'a ncanec apiawe lhta apquellelto apqueliasqueiam ma'a, apiawe lhta njan enenlhet etnec jata apselhnanoncoma. 65 Lhta aptac na mocjom Jesus: —Mamma enenlhet jeieplomaja melto la Engiapom Neten—lhta ptac 66 Colhuawec anque lhta apqueluatesancoc napocja apquelieplecama Jesus ma'a, 67 ca apquellelmalhnenca lhta Jesus 12 apqueltamesaicamoc, lhta ptac apquellano: —¿Quetlhencap anlho njan apquenmac'ac eluatesancoc jelieplecama, je? — lhta ptac. 68 Ca apcatemmonca lhta Simon Pedro m'a, lhta ptac: — Apuesque, mamma apno enenlhet lheiap, wanlha lheiap apaioma jempeiwescasecja amai cacpota angeluomoc ncotnenweianlha nnelha aquiennactema ennengio'oc, 69 mangeliasqueiacmoc na ennenco'o lheiap, nelliawec na apto apqueliequiescama Engiapom neten lheiap —lhta ptac Pedro. 70 Coca lhta aptac Jesus: —Co'o lhta asqueliequiescama 12 nac quetlhencap, coca apnec lhema apiesecsec acmaicama queliacjameio' —lhta ptac Jesus ma'a. 71 Judas Iscariote, Simon apquetca lhta aplhenac Jesus cacpota etnec apselhnanoncoma m'a.
1Buscar lo que significa cebada
2Las señales demostraban que el era el enviado de Dios, pero la gente no lo entendia
3Isaias 54:13 /Jeremias 31:33-34
4Copiar lo que significa lugar de reunion
Capítulo 7

Apqueliasqueiam apquelialheng'a Jesus
1 Aplomaca lhta Jesus aquieto iocjalhma Galilea, ma lhta ncomac'ac engiacjac Judea, ncanec apquelemjama apmaniaie judios apquelquetanque lhta apquenmajai'a ennapoc ma'a. 2 Ncanquetuacme lhta acnem actacmelaicama lhma judios apanco'oc acuesai'a Enramadas 1 . 3 Lhta aptancoc apquellano apquelialheng'a Jesus: —Melhnecjanquec jenque'e, engiacja ta Judea cacpota eluetac apquellelto apquelieplecama lheiap caselha jempelapquescama apquelanai'a, 4 apquelto la njan eiecpelcacpoc lheiap, jawe ecpocsec apquelanai'a caselha jempelapquescama —lhta aptancoc. 5 Coca apquelpacmetque lhta panque' apquelialheng'a Jesus aniem'o njan apqueliasqueiam, 6 coca lhta aptac Jesus: — Mancowacmoc mocjom acnem ejencoc, quetlhencap coca ntasec lhamacjo acnem. 7 Meltacnewac apquelemjama apmaniaie quetlhencap jenque'e, co'o coca jeltacnewacque ncanec asquetlhenquec mota apqueltemacja ncolatsecama m'a. 8 Enmeiacjac coca quetlhencap moc apancawec ma'a actacmelaicama lhma nac, mongiacjec co'o, mancowacmoc mocjom acnem ejencoc ma'a—lhta ptac Jesus. 9 Ca apnacjo lhta Jesus ma'a Galilea. 10 Netamen apielhacpo lhta njan apmeiacjo Jesus actacmelaicama lhma neptamna'ac apquelialheng'a. 11 Necsa actacmelaicama lhma lhta m'a, apquelquetanque lhta apquelemjama apmaniaie judios Jesus ma'a, lhta ptancoc: — Co la apmanquelha enenlhet anac—lhta aptancoc. 12 13 Ma lhta ellasac apquetlheno enenlhet Jesus aquieto actacmelancolha lhma m'a, apquelmalengioma lhta m'a, ncanec apquellac'awe lhta apquelemjama apmania ie judios ellenjoc ma'a, lhta aptancoc enenlhet: — Apiawe lhma' enenlhet anac ma'a, jela —lhta ptac. — Ma', meijolhma m'a, apmopuana ania'a m'a —lhta ptac po'oc enenlhet. 14 Netamen, nalhet actacmelaicama lhma lhta nwacmoc ma'a, aptalhnenwacjo njan Jesus Engiapom Neten apnemacja, ca apquempo apquetlhecmoscama m'a. 15 Mpelapcasque lhta apquelleng'o apquelemjama apmaniaie judios, lhta aptancoc: — Meltamesammacpoc jenganemacja engancoc anac ja'e, nieje ptemacja apianweiacmo nac—lhta ptancoc. 16 Coca lhta aptac Jesus apquellatemmonca m'a: — Ca asquetlhecmoscama nac jawe ejencoc ejenque', coca aniem'o m'a apto lhta jeipascama. 17 Apmac'ac jata nquec eliejecjoc Engiapom Neten enenlhet, eijoc jata actacja asquetlhecmoscama nac aniem'o Engiapom Neten, jawe aniem'o ejencoc ejenque. 18 Enenlhet apto la aplhenammacpo panque', apqueltemo ncolhec aquiaspenca aptacja la'a, coca enenlhet aptengiai'a la etnesquesec neten apanque apto apcapascama, coca enenlhet anac acto iocjalhmec aplheianma m'a, jawe apmopuana ania'a. 19 Apquellaianquec nac na nec Moises jenganemacja quetlhencap, coca melleliejecjo, ca ncanec ncomajac jellaqjec quetlhencap—lhta ptac Jesus apquellano. 20 Ca apquellatemmonca lhta enenlhet ma'a, lhta ptancoc: —¡Mamma enenlhet engiaqjec lheiap, queliaqjameio i'e acmaicama lheiap! —lhta ptancoc. 21 22 Coca lhta aptac mocjom Jesus: —Apmanquec tacja Moises annenga aptemacja lhnac nac nanec Abraham, Isaac, Jacobo nnenga cacpota ncoiaqtemenalhcac quetsec apcammelhacja apquenno apquetcoc la'a, acuacmo nenwanlha nac apqueluanecamoc apqueluaneianco njan quetlhencap, ncacjoc acnem sabado apcaqjaicocjelha nac quetlhencap. 23 ¿Se lhta cto apquellau'o lhta quetlhencap secje lhta ie, astacmelcasacjo lhta lhema enenlhet sabado lhta m'a, je? 24 Metnamo nquec apqueliecpelquemo apiocja po'oc aniem'o apaqto'oc apqueluetai'a, ntasec coca etnancoc aquietemo nquec apqueliecpelquemo m'a—lhta ptac Jesus apquellano m'a.
Jesus aplheianma apqueniemacja
25 Apquelpacmetquesacpe lhta moc apancawec moclhem'a enenlhet co Jerusalen, lhta aptancoc: — ¿Jawe nlho apquetamecpo lhta enenlhet anac apmajai'a ematong? 26 Ca ja'e, apquelpacmetquesanca nac enenlhet, manac quelha emammacpoc —lhta aptancoc enenlhet. Lhta aptac na po'oc: — Colhua quelha meliasqueiacmoc apquelemjama apmaniaie enganco'oc anac apto Mesias ja'e enenlhet anac—lhta aptancoc. 27 —Ma', jawe Mesias ja'e, jata apuo'o la m'a mancolhec jata aquiojo apqueniemai'acja, coca ennenco nenniawec apqueniem'acja enenlhet anac —lhta ptac po'oc enenlhet. 28 29 Necsa apquetlhecmoscama lhta Jesus conne Engiapom Neten apnemacja apquetlhenac enenlhet ma'a, ca apleng'o lhta Jesus ma'a, apiennacteso lhta paioma, lhta ptac: — Apquetlhenque niecje quetlhencap apqueliamo se lha co'o ie, cacpota njan co la asqueniem'acja m'a, meliejec coca. Jawe asuai'a ejenco ie', jeiapascama m'a apto apiamolhma, asiecpelcawec co'o, quetlhencap coca meliecpelcac ma'a —lhta ptac Jesus apquellan'o enenlhet ma'a. 30 Ca apquenmac'o lhta elpatjetec Jesus apquelemjama apmaniaie judios ma'a, coca malhta ncollapuanca'ac, ma lhta njan ncowacmoc acnem apancoc ma'a. 31 Coca malhta ntec enenlhet meliasqueiam Jesus ma'a, lhta aptancoc: —Jai', Mesias jam, ellanjono lhamacjo caselha monwetai'o aniem'o neten apquelanai'a, elianwomjo coca—lhta ptancoc. 32 Apquelleng'a lhta njan ania'a aplhenammap Jesus fariseos cacpota njan apquelemjama apmaniaie' sacerdotes, ca apquellapaso lhta apquellanecama necjau'ac Engiapom Neten apnemacja' m'a cacpota elpatjetec Jesus. 33 Apne lhtoca Jesus conne Engiapom Neten apnemacja, enenlhet alhta apquetlhecmosac ma'a, lhta ptac: —Aloca ta mocjom apiesecsec quetlhencap aquiacuatacjo, cacpota ataqjo apnacja' apto lhta jeiapascama. 34 Jelquetmoc jata quetlhencap, coca manjeluetecjec jata, mancollapuanquec na enmeiacjac asmac'ac jata angiacja—lhta ptac. 35 36 Ca apquelelmalhnecpo lhta moc apancawec apquelemjama apmaniaie judios ma'a, lhta ptancoc: —Se lha aplheno nac aie', co la apmac'acja emjancoc cacpota mongeluetecje. Quelha apme' engiacjac elpalhacuacjac judios mo'oc apquellawacja 2 nac cacpota etlhecmoscamoc ma'a, quelha njan apme engiacjac apiesecsec metnanco nac judios—lhta ptancoc ma'a.
Iemmen jengiennactescama
37 38 Nwacme lhta actacja nque nnelha acnem actacmelaicama 3 lhma m'a, acto lhta neten anquec aquiaspommalhca m'a, ca apquenmacjo lhta neten Jesus apiesecsec enenlhet, apiennacteso apaioma, lhta ptac: —Apiemac'ac jata nque' enenlhet, jei'ota ta, manjeiascacmo la'a enenlhet anwanco ta apiama cacpota ncotepancoc iemmen apualhoc malha acto nac aluata', ca ntac ma'a waccajac Engiapom Neten apaioma—lhta ptac Jesus. 39 Ca actemacja lhta apaioma Jesus aplheianma aptemacja Engiapom Neten Apualhoc, etlhewancoc jata m'a apquellelto la meliasqueiam, mang coca ewai'ac ma'a secje lhta, amanie coca ncaimommalhcac secjec ematong Jesus, cacpota njan etnecjac mocjom apjalhnancoc apiesecsec apquenmasquenwaiacmo.
Apquetlheianma enenlhet alpeiwecja aptemacja Jesus
40 Moclhem'a lhta enenlhet acto apquellengai'a apqueltennaicama Jesus ma'a, lhta aptancoc: —Quelha secama ania'a nellailhemo nac ewacja ta, ca jam, enenlhet anac— lhta aptancoc. 41 Coca po'oc enenlhet alhta aptac: —Mesias enenlhet anac jam— Coca po'oc lhta aptac: — Jawe', meniengiemec Mesias m'a iocjalhma Galilea nac. 42 Nietnec actalhesammalhca waccajac Engiapom Neten apaioma Mesias apto David aptawen neptamen, etiemoc jata natemma Belen, apcawacja lhnac na nec David—lhta ptac. 43 Ma lhta ncolhoc mo'oc apquetlheianma enenlhet'awoc Jesus ma'a. 44 Moclhem'a enenlhet alhta apquelleltawe niecje ellaclhenquesec Jesus nengaclhengcasemmalhquelha, coca nquelluannalhque lhta apualho'oc ma'a. 45 Ca apqueltaqjo lhta neptapna'ac apquellanecama Engiapom neten apnemacja apcacjanquelha apquellemjama apmania ie sacerdotes cacpota njan fariseos, ca apquelelmalhnenca lhta: —¿Se lha cto meliantemantamo nac Jesus que, je?— lhta aptancoc apquelemjama apmaniaie 46 Ca apquellatemmonca lhta m'a, lhta ptancoc: — Ntasec lhec apqueltennaicama m'a, mamma enenlhet elhoc ma'a —lhta aptancoc ma'a. 47 Coca lhta aptancoc fariseos: —!Apqueliennencasquec na quetlhencap ma'a! 48 Ellanjono, apqueliascacmec apquelanma apmanie enganco'oc anac, cacpota njan apquelanma apmanie fariseos enenlhet anac ma'a. 49 Coca enenlhet anac meliasqueiacmo nac ma'a Jesus, meliamoc jenganemacja Moises annenga, Engiapom Neten jato ca eliaqmoncasquesecjac apqueltemacja m'a—lhta ptancoc. 50 Apne lhta njan ma'a lhema fariseo apuesai'a Nicodemo, apioiacmo lhta pelhasep apnacja Jesus, lhta aptac apquellano aptemo lhemec fariseos: 51 —Ca ntac jenganemacja enganco'oc anac, mangapuanquec anlhenec apselhnanemmap metco la aptemacja emmo'oc, amanie coca nengailhemo aplheianma—lhta ptac. 52 Ca apquellatemmonca lhta m'a, lhta ptancoc: —Lheiap anac na apto malha co Galilea. Eltameso no apquelanei'o jenganemacja Moises, mamma lhema secama ania'a engiengiemac ma'a Galilea—lhta ptancoc ma'a. 53 Netamen ma'a, apqueltaqjacjo lhta moclhem'a apcacjaianquelha.
1i
2Otros judios que viven en el extranjero
3La fiesta duraba siete dias
Capítulo 8

Nqueluana actewascamo atawa'
1 Aptepque lhta Jesus conne Engiapom Neten apnemacja, ca apmeiacjo lhta lhienep acjaiam acuesai'a Olivos. 2 Mo'oc acnem alhta ntac atsai'a acmopeiam conne' m'a, apuactamo mocjom Jesus Engiapom Neten apnemacja, apqueltetescactamo lhta njan enenlhet apentalhnema apnacja, ca apno lhta conne Jesus ma'a, apquetlhecmoso. 3 Moclhem'a lhta njan jengetlhecmoscama jenganemacja Moises cacpota njan moclhem'a Fariseos apqueliantemacjo lhta lhema nqueluana apnacja Jesus ma'a, acuetammalhca alanactescama ncotnacjo atawa enenlhet, ca apquelanquescactamo lhta apiesecsec enenlhet'awoc ma'a, lhta aptancoc apquellano Jesus: 4 —Jengetlhecmoscama, nwetalhquec nac lhec alan'o ncolatsecama nqueluana nac, ntewasquec nac lhec atawa'. 5 Jenganemacja Moises aclheianma angaqjec nqueluana ctonac jenque'e, angelliaqnac na metaimong ¿Co la ptacja' njan lheiap ma'a, je?—lhta ptancoc ma'a. 6 Coca m'a aptancolha lhta apquellanei'o apquenmajai'a eliepconec Jesus, cacpota elpescacjac meieplauquescama jenganemacja Moises ma'a. Ma lhtoca engiatemmoma Jesus ma'a, ca apjalhantamo lhta, apquelcaso lhta apopjec lhepop. 7 Coca apquellelmalhnacjawe lhta mocjom ma'a, ca apquenmacjo lhta njan neten Jesus ma'a, alhta aptac apquellano: — Metca nquec la aptemenweiacmo lhma' enenlhet apiesecsec anac quetlhencap jam, eienje ta apmanie metaimong nqueluana nac— lhta ptac Jesus. 8 Apjalhacje lhta mocjom Jesus ma'a, apquelcaso mocjom lhepop. 9 Moc lhem'a apanque lhta apquenmacpoc apquelenteiapma m'a, apmaniaie lhta apqueluaneiam, netamen aplhamacjo m'a, ca apnacjo lhta aplhepquennenga Jesus ma'a cacpota njan nqueluana. 10 Apquenmacje lhta neten mocjom Jesus ma'a, alhta ptac apcano nqueluana: —Mamma apquellelto lhquec apquenmajai'a etselhnanac lheia' jenque'e, apqueltaqjacje ie'— lhta aptac. 11 Ca atemmonca lhta nqueluana, lhta ntac: —Ca m'a, jawe ngiapac apuesque, mang coca jetselhnanac ma'a—lhta ntac. Lhta ptac apcano Jesus: — Co'o njan moltac aselhnanac actacja nac alanai'a ncoltsecama lheia, cotaqjec jata, molanecjanquec mocjom ncolatsecama—lhta ptac Jesus.
Aplheianma Jesus apto atsai'o lhma'
12 Lhta ptac mocjom Jesus apquellano enenlhet: —Co'o asto asquetsasquescama lhma apiesecsec enenlhet apquellocja la'a, asquellaicamoc aptema apjalhnanco'oc enenlhet apquellelto la jelieplecama, melloca ta apancawec ienactesacja lhma'—lhta ptac. 13 Coca lhta aptancoc fariseos apquellano: — Apmopuana ania'a apquelhenammacpo apanquec lheiap—lhta aptancoc. 14 Ca apcatemmonca lhta Jesus: — Jawe asmopuana ania'a asiawec co'o asquempai'acja', asiawec na asmeiacjelha ta, melliejec coca quetlhencap. 15 Quetlhencap apquelentepcasema asuesai'a aniem'o atlhenaicamoc apualho'oc apanco'oc apancawec, co'o coca momac'ac atnec asquetlheianma apqueliamolhma nlho ca la meliamolhma quetlhencap, 16 coca asmac'o la atnec ma'a, atacmelcasoc jata aquietemo ncoie ncanec aniem'o jepasmoma apiapom apto lhta jeiapascama. 17 Ca ntac jenganemacja apanco'oc anac quetlhencap, ncaimelhquec elhec apcanet acnemo mo'oc apquetlheianma cacpota ncotnec iocjalhmec ma'a. 18 Alhenalhquec ejenque' asiamolhma co'o, jelheianmec na Apiapom apto lhta jeiapascama, enqanet nentacja—lhta ptac Jesus apquellano m'a. 19 Netamen alhta ptancoc apquelelmalhnenca Fariseos ma'a: —¿Co la apnacja apiapom lheiap ma'a, je?— Ca apcatemmonca lhta Jesus ma'a: —Manjeliecpelcac quetlhencap co'o, man na eliecpelcac co'o Tata, coca jeliecpelco la'a, apqueliecpelquec na co'o Tata— lhta ptac Jesus. 20 Necsa apqueltennaicama lhta Jesus ma'a, apne lhta Engiapom Neten apnemacja', aquieto nema acjesquecjelha caselha aplhewai'a Engiapom Neten, coca ma lhta emammacpoc ma'a, ma lhta njan ncowaiacmoc acnem apancoc.
Meliamo apquelemjama apmaniaie judios Jesus apto Engiapom Neten apquetca
21 Lhta aptac mocjom Jesus apquellano apquelemjama apmaniaie judios: —Mang jata nquec eluatesancoc apqueltemacja ncolatsecama, eletsepoc jata. Alhong jata co'o, jelquetmoc jata quetlhencap, coca melluomec jata asmac'acja ta amjancoc— lhta ptac Jesus. 22 Ca apquelpaqmetquesacpo lhta moc apancawe apquelemjama apmaniaie judios, lhta aptancoc: —¿Selha ntac aplheno nac mangeluomec jata apmanquelha? Nlhenquec quelha apualhoc engiaqjacpo panque' —lhta ptancoc ma'a. 23 Lhta aptac Jesus: —Co tacjalhet lhepop quetlhencap, co'o coca asqueniem'o neten, apquellomacja panquec quetlhencap jenque'e, co'o coca jawe asqueniem'o jenque'e nalhepop anac. 24 Asqueleltennasque niecje quetlhencap eletsepoc jata aniemo meliamolhma, apqueliascacmo la'a asto co'o—lhta ptac Jesus. 25 Ca apquelelmalhnenca lhta mocjom apquelemjama apmaniaie judios, lhta ptancoc: —¿Se lha enenlhet lheiap que, je?— Ca apcatemmonca lhta Jesus ma'a, lhta ptac: —Asqueleltennascanque mota quetlhencap. 26 Mantec asqueltemo niecje alleltennacsec actemacja aptaiancolha ncollatsecama quetlhencap, mang coca ncomajai'ac aleltennacsec. Coca lhamacjo actemacja asqueleltennascama nac aniem'o aslengai'a jeltennascama apto lhta jeiapascama, apto jawe ngiapac aplheianma m'a—lhta ptac Jesus. 27 Coca ma lhta eliojoc enenlhet'awoc aplheianma Jesus Apiapom. 28 Lhta ptac mocjom Jesus: — Jatoca acno ta aclheno neten iamet actennescama Enenlhet Apquetca nac, ellianwacjoc jata quetlhencap asto co'o, jawe asquelanai'a ejencoc ejenque', wanlha asquelanai'a apqueltemo alana Apiapom. 29 Wanlha co mota alhelhma apto lhta jeiapascama ncanec asquelan'ac co caselha acleclemelha la apualhoc ma'a—lhta aptac Jesus ma'a. 30 Ma lhta ntec enenlhet melliasqueiam aplheianma Jesus ma'a.
Apmopuana Jesus alpaqnencasecja enenlhet meliamolhna
31 Lhta aptac Jesus apquellano judios apquellelto lhta meliasqueiam ma'a: —Apquelleliajacjawec jata nque quetlhencap actacja nac asquetlhecmoscama, jata etnancoc jelieplecama aptaicamoc jawe ngiapac anque, 32 apquelliecpelcawec jata nquec acto jawe ngiapac anque nac, ncolpaqnencasecjac jata m'a anmaicamoc maniamolhma —lhta aptac. 33 Ca apquellatemmonca lhta enenlhet'awoc ma'a, lhta aptancoc: —Jawe ennenco'o nema jengenmama ca acto nac esclavo, Abraham annenga aptawana'ac neptamen ennenco'o ¿Se lha acto aplheno nac lheiap nenmammalhca ennenco'o ie, je?— lhta aptancoc ma'a. 34 Ca apquellatemmonca lhta Jesus ma'a, lhta ptac: — Jawe ngiapac anquec, aplhamacjo apquellelto la apquellanecamoc caselha ncolatsecama, malha anmama m'a maniamolhma nquen, malha aptanco nac ma'a esclavos. 35 Lhema esclavo la'a, mancapuanquec elhe mota acuancacjo acjancolha la apquennemolhema, coca apquetca apanquec la'a apuanquec elhe mota acuancacjo m'a. 36 Wanlha apuanca'ac na etnancoc enenlhet'awoc metca anmaicama maniamolhma aniem'o apquelpasmoma Apquetca. 37 Asiawec co'o Abraham aptawana'ac neptamen quetlhencap, coca apquelleltawec jellaqjec, menmac tacja asquetlhecmoscama nac. 38 Alhenquec co'o wanlha mota actemacja jelhecmoscama Apiapom, coca quetlhencap apquetlhenque mota wanlha actemacja lhta apquetlhecmoscama apiapom apanco'oc apancawe—lhta aptac Jesus. 39 Lhta aptancoc enenlhet'awoc ma'a: —¡Engiapom ennenco'o Abraham!— 40 —Jawe, melieplomac amai Abraham quetlhencap, 40 moc actema aptaiancolha quetlhencap, apquenmac'ac na jellaqjec ncanec asquelleltennasquec aniem'o aslengai'a aptacja Engiapom Neten apto jawe ngiapac anquec. ¡Ma lhta etnemac Abraham annenga aptaianquelha nac! 41 Coca quetlhencap apquelieplauquec amai apancoc apiapom—lhta aptac. Ca apquellatemmonca lhta m'a, lhta aptancoc: — Jawe metca engiapma'ac 1 ennenco'o, wanlha lhema apjapac Engiapom ennenco'o, Engiapom Neten ma'a— lhta aptancoc. 42 Ca apcatemmonca lhta Jesus, lhta ptac: —Jawe apiapma'ac quetlhencap Engiapom Neten ncanec jeltacnewacque mota, Engiapom Neten apto jeiapascama, jawe asuai'a ejenco ie'. 43 Meliejec quetlhencap actacja nac alheianma, ncanec mancollecoc apualho'oc actacja asqueltennaicama. 44 ¡Queliacjameio atcac quetlhencap! Altacja la'a ellanac ma'a apquellan'ac na quetlhencap. Nentequioma ngiapom queliacjameio', cacpota njan acmowana ania'a ancoie, aquiatecamoc enenlhet altema etnec apmopuana ania'a. 45 Co'o coca alheianma jawe ngiapac, jeliascacmec coca quetlhencap. 46 ¿Selha enenlhet apiesecsec anac quetlhencap apuetai'o la asquelanei'o ncolatsecama jencaie, je? Ca alheno la co'o jawe ngiapac anquec ¿Se lha actemo jeliasqueiacmo na mota ie? 47 Engiapom Neten apquetcac la'a apqueltacmelcasawec mota apquellailhemo actacja aplheianma apiapom, coca mellailhemoc quetlhencap, ncanec jawe Engiapom Neten apquetcac— lhta ptac Jesus. 48 Coca lhta aptancoc enenlhet'awoc ma'a: —Jawe ngiapac netlheno nac, Samaritano queliacjameio acmaicama lheiap—lhta aptancoc. 49 Ca apcatemmonca lhta Jesus: —Mamma nquec co'o queliacjameio' jemaicamaja, ascai'o co'o mota Tata, coca quetlhengcap manjellac'o mota. 50 Motengiac co'o asiaspommalhco ejenquec la'a, Engiapom Neten coca jeiancoc asiaspommalhca ta, apto apiecpelquemo lhamacjo caselha m'a. 51 Enenlhet apquellelto la apquelleliejecjo asquetlhecmoscama nac, melletsepec jata—lhta aptac. 52 53 Lhta aptancoc mocjom enenlhet'awoc: — ¿Se lha ntac aplheno nac melletsepec jata apquellasecjai'o la lheiap? Neten apanquec apmajai'a etnama lheiap, apquelletsepmec nac nanec ma'a nellieijenca Abraham cacpota njan apquelletsecama ania'a nnenga, lheiap coca apmajai'a etnama neten apanquec, nelliawec colhuawe nac queliaqjameioc acmaicama lheiap —lhta ptancoc enenlhet. 54 Ca apquellatemmonca lhta Jesus: — Acjemo alhenalhco ejenque' co'o nema jeiaspecamaja, Tata coca jeiancoc asiaspommalhca. Co'o tata aptaianco na mota quetlhencap Engiapom Neten apanco'oc, 55 coca melliojoc ma'a, co'o coca asiawe, asqueliejecjo njan. Alheno la moiecpelquemo Tata, atnec jata asmopuana ania'a panque', ca apquellelto nac quetlhencap. 56 Abraham apquelieijenca lhta quetlhencap ma lhta ntec apmajai'a jetac awac jenque'e nalhepop anac, jeta'a alhta m'a, mpaijacje lhta apualhoc— lhta aptac 57 Ca apquellatemonca lhta enenlhet'awoc ma'a, lhta aptancoc: —Mancowacmoc 50 iantelhcapa apancoc lheiap ¿Se lha ntac aplheno nac apuetai'a Abraham annenga?—lhta aptancoc. 58 Ca apquellatemmonca lhta Jesus ma'a, lhta aptac: —Jawe ngiapac anque', aslomaca tep nac nanec co'o amanie apmajai'a etiemoc Abraham—lhta aptac Jesus. 59 Colhuawec anque lhta apquenmancoc metaimong aliaquiema cacpota ennapoc Jesus ma'a, coca aplhenencasecpe lhta apanquec apiesecsec enenlhet'awoc ma'a, aptepo njan Engiapom Neten apnemacja.
1Bastardos
Capítulo 9

Jesus aptacmelcasecja metca apaqto'oc
1 Necsa aplhengama lhta Jesus apuet'o lhema enenlhet apteianlha secja metca apaqto'oc, 2 ca apquellelmalhnenca lhta apqueltamesaicamoc, lhta aptancoc: —Jengetlhecmoscama ¿Se lha actemo apteiaiacmo nac metca apaqto'oc enenlhet anac, aniem'o nlho ca la mancoliamolhma ncana'ac nlho ca la njan meijamolhma apanque, je? —lhta ptancoc apqueltamesaicamoc. 3 Ca apquellatemmonca lhta Jesus ma'a, lhta aptac: — Jawe aniem'o ncana'ac ncoliamolhma, nlho ca la njan meijamolhma apanque', apteiacme lhta metca apaqto'oc ma'a cacpota eluetac jata aplhamacjo enenlhet'awoc aptemacja apmopuana Engiapom Neten acmowana ncotacmelcasecja. 4 Necsa actema mocjom acnem, angellanancoc no apqueltemo lhta apto jeiapascama, lheme ncowac jata aptema pelhasep coca mongapuanquec angellanac caselha m'a. 5 Necsa asnema apiesecsec quetlhencap, co'o asto ascaponmatma asquetsasquescama lhma' njan— lhta aptac Jesus. 6 Ca apquelpatso lhta apiemmanong nalhepop Jesus ma'a, nialpa lhta apquelan'ac, apqueltelhnasquesanco lhta apaqto'oc enenlhet, 7 lhta aptac apcano: —Engiacja pancalhua alanemmalhca metaimong anac acuesai'a Siloe 1 , eliengiescacja ta apaqto'oc ma'a— lhta aptac. Ca apmeiacjo lhta m'a, apqueliengiescacjo lhta apaqto'oc, altaqmelacjo lhta njan ma'a, ca aptaqjacjo lhta njan apnemacja. 8 Necsa apqueluetai'a lhnac apquennemolhema apuacjo apnemacja, apquelpacmetquesammacpec nac moc apancawec ma'a, lhna aptaiancoc: —¿Jawe nlho enenlhet anac apquellanjeianca na mota patacom enenlhet, je?— 9 —Tocja' jam— Coca po'oc enenlhet alhta aptac: —Jawe, malha niecje'— Coca aplhenammacpawec na apanquec enenlhet anac ma'a: —¡Jai, co'o!— 10 Apquellelmalhnecjawec na mota actacja altaqmallueiam apaqto'oc, 11 ca apquelleltennaseianca lhnac ma'a, lhna aptemac: —Lhema enenlhet lhec apuesai'a Jesus, nialpa lhquec apquelan'ac, jetnescaso ejaqto'oc, ca jeiapaso aquieto pancalhua alanemmalhca metaimong Siloe cacpota aliengiescacjac ejaqto'oc ma'a. Ca asmeiacjo lhquec asqueliengiescacjo, astacmelacjo njan, asuetacjo lhma' —lhna aptemac apqueltennaianca m'a. 12 Coca apquellelmalhnecjawec nac mocjom enenlhet'awoc ma'a, lhna aptaiancoc apquellanemo: —¿Co la apnacja enenlhet anac ma'a? —lhna aptaiancoc. —Moijoc co'o —lhna aptemac apquellatemmoianca m'a. 13 14 Coca acnem nennecjelha sabado lhta m'a aptacmelquescaiacmo metca apaqto'oc apquelanei'o lhta njan nialpa Jesus ma'a, lhna nqueniemai'ac eliantemecjac aptacmalueiam apcacjanquelha fariseos ma'a, 15 lhna aptaiancoc apquellanemo m'a: —¿Co la actacja apuetacjo na lhma' lheiap?—lhna aptaiancoc. Ca apcatemmoianca lhnac enenlhet, lhna aptemac: —Jesus lhec apuesai'a jetnesquescama nialpa ejaqto'oc, ca asuetacjo lhma'—lhna aptemac. 16 Coca lhna aptaiancoc moclhem'a fariseos: —Enenlhet apto aptacmelcasecja nac lheiap, jawe Engiapom Neten apcapascama, meliajacjoc jenganemacja' enganco'oc, apmacmema acnem nennecjelha sabado—lhna aptaiancoc. Coca aplhamacja fariseos lhna aptaiancoc ma'a: — Tocja nlho ca Engiapom Neten apcapascama m'a, soca acto apquelan'o nac caselha jempelapquescama, ca enenlhet la aptemenweiacmo lhma mancapuanquec elanac ma'a—lhna ptaiancoc. Mang nac ncolhnemoc mo'oc apualho'oc fariseos ma'a, 17 ca apquelelmalhnecjo lhnac mocjom aptacmalueiam, lhna ptaiancoc apquellanemo: —¿Nieje actacja aclheianma apualhoc lheiap enenlhet nac lhec que, je?—lhna aptaiancoc Ca apcatemmoianca lhnac ma'a, lhna aptemac: — Engiapom Neten secama ania'a apancoc ma'a—lhna ptemac. 18 Coca apquelemjama apmania ie judios apqueliasqueiacmec nac ma'a enenlhet apto aptacmalueiam metca apaqto'oc alhta, ca apquellapascamo lhnac lhema apquellennencasecama eliantenwacjac ncana'ac ma'a, 19 20 ca apquelelmalhneianca lhnac ncana'ac ma'a, lhna aptaiancoc: —¿Ca nlho atcac quetlhenca' je?— —Jai —lhna ntaiancoc allatemmoianca m'a. —¿Jawe nlho ngiapac apteianlhasecja metca apacto'oc, je?— —Jai, jawe ngiapac —lhna ntaiancoc ma'a. Ca apquellelmalhnecjo lhnac mocjom, lhna aptaiancoc: —¿Niejec tacja apuetacjo na lhma colhuawe nac, je?— 21 —Mangeliojoc ennenco'o apto aptacmelcasecja, elelmalhnama ta apanquec ma'a, apuanengiec ma'a, apuanque engiatemmomaja— 22 23 Lhna ntaiancoc ncana'ac ncanec nquellai'ac nac apquellemjama apmaniaie judios enmasquescasecjac aluesai'a alpalhacuecja apcacnecjelha, actemacja lhta njan nema allanei'o meliasqueiam la Jesus apto Engiapom Neten apcapascama. 2 24 Ca apquellaweianca lhnac mocjom aptacmalueiam, lhna aptaiancoc: —Nelliawec ennenco'o Jesus apto enenlhet meijamolhma ¿Se lha aclheno apualhoc lheiap ma ie enenlhet anac? Elhen no metca apmopuana ania'a jengelleltennes ennenco'o—lhna aptaiancoc ma'a. 25 Ca apcatemmoianca lhnac enenlhet aptacmalueiam, lhna aptemac: —Moijoc co'o, wanlha lhta metca ejaqto'oc co'o, colhua asuetecjo na lhma—lhna aptemac. 26 Coca apquelelmalhnecjawec nac mocjom ma'a, lhna aptaiancoc: —¿Co lhquec aptacja aptacmelcasacjo lheiap, je?—lhna aptaiancoc. 27 Ca apcatemmoianca lhnac mocjom ma'a, lhna aptemac: —Asqueleltennasquec lhec quetlhencap, coca manlhec jellailhojo. Se lha ncotnec altacjenwescacja alheianma, quetlhencap quelha njan apquenmac'ac etnancoc apquelieplecama m'a—lhna aptemac. 28 Mang nac ncollatsecama apatno'oc apquellanei'o m'a, lhna aptaiancoc: — Lheiap apto apieplecama enenlhet anac ma'a, ennenco'o coca nengelleto nelieplecama Moises annenga, 29 nengelliawec ennenco'o apacmetquescanquec nac nanec Engiapom Neten Moises, coca mangeliojoc co la apqueniem'acja enenlhet anac ma'a—lhna aptaiancoc. 30 Ca apcatemmoianca lhnac mocjom enenlhet aptacmalueiam, lhna aptemac: —Pelapquescama co'o m'a quetlhencap meliojoc apqueniem'acja m'a enenlhet anac apto lhquec jetacmelcasecja, tocja quelha apqueniem'o Engiapom Neten ma'a. 31 Ca apto la meijamolhma m'a enenlhet anac, Engiapom Neten mancapuanquec enquesec apmopuana cacpota jetacmelcasecja. 32 33 Mangeluetai'ac ennenco'o acto nac nengiesecsa, alhnacjo nenwetai'a apqueniem'o Engiapom Neten ma'a enenlhet anac—lhna aptemac. 34 Coca lhna aptaiancoc mocjom apquellanemo apquelemjama apmaniaie judios: —Apteianlhasecja lheiap meijamolhma, mancapuanque jengetlhecmocsec ennenco'o lheiap ¡Etiep, mewatamo nquec mocjom nengacnecjelha nac!—lhna aptaiancoc. 35 Apleng'a alhta Jesus nema actepquescama enenlhet aptacmalueiam anac nemacnecjelha, apuetacje lhta njan m'a, ca apquenmalhnenca lhta, lhta aptac: —¿Mai'e ei'ascacmoc lheiap Enenlhet Apquetca nac, je?— lhta aptac. 36 Ca apcatemmonca lhta enenlhet ma'a, lhta aptac: —Apuesque', jeltennes no secla enenlhet maie', cacpota moi'ascamec co'o—lhta aptac. 37 Lhta aptac apcano Jesus ma'a: —Co'o m'a— 38 Ca apquelteclhei'o lhta aptapno'oc lhepop napaqte Jesus ma'a, lhta aptac apcano: —Apuesque, moi'ascacmoc lheiap—lhta aptac. 39 Coca lhta aptac apcano mocjom Jesus: —Asua'ac co'o asmajai'a aluetasquesec meliamolhma apanco'oc apancawec enenlhet'awoc. Aluetasquesecja lhma metca apaqto'oc la'a, etnancoc apancawec na malha metca apaqto'oc apquellelto nac apqueluetai'a lhma— lhta aptac Jesus. 40 Apquellenga lhta njan moclhem'a fariseos actacja apaioma Jesus, lhta ptancoc apquellano: —Jengetlhenquec lheiap ennenco'o malha metca engaqto'oc—lhta aptancoc. 41 Ca apquellatemmonca lhta Jesus ma'a, lhta aptac: —Aptanco la quetlhencap metca apaqto'oc, malha niecje meluetai'a meliamolhma apanco'oc, mancolhec na nema aliaqmoncasquesecja apqueltacja la'a. Quetlhencap coca apquelleltacpoc nema apaqto'oc, alhnacjo nquec apqueluetai'a aptaiancolha meliamolhma, nquellietawec etlhewancoc jata nema aliaqmoncasquesecja meliamolhma—lhta aptac Jesus.
1Siloe significa enviado
2Mesias
Capítulo 10

Apietquescama Jesus apuetep nepquesec
1 2 Lhta aptac mocjom Jesus: —Apquelliawec quetlhencap apto la apmajai'a emenielhec nepquesec, elietocjac nepquesec aplhancoc anac, 3 coca apto la apuetep nepquesec apquelailhe mota apquelanecama atong emaiacsec ma'a, netamen ellawama moclhema nepquesec cacpota elentepoc aplhancoc ma'a, apqueliecpelquec na nepquesec actacja apuenecama apuetep. 4 Cacpota elailhec ma'a acuacmo apsaujecpo apquelenteiapma nepquesec apnaqtoscama, apquenmacjec na apmanie m'a, apquelieplacjec na nepquesec ncanec apqueliecpelcawec apuenecama m'a 5 Coca ncotno la apuetep, melieplacjec na nepquesec ma'a, engiengianco mota ncanec meliecpelcac apuenecama m'a—lhta aptac Jesus ma'a 6 Coca enenlhet ma'a ma lhta eliojoc aptacja apietquescama Jesus ma'a, 7 ca apquelpeiwescasacjo lhta Jesus, lhta ptac: —Co'o asto atong apquelentalhnenwectanlha mota nepquesec, 8 coca apquelluai'a lhta emanie co'o, apquenmenielhma m'a, meliamolhma njan ma'a ca ncanec melieplacjec nepquesec ma'a. 9 Co'o asto malha atong aptalhnenwo la enenlhet, ewoncasacpoc jata tep. Elhoc jata aptonac nepquesec aptalhnenwecja nac aplhancoc, etepecjac na cacpota etenwomo mota altacmelacja la pa'at. 10 Apquelliawec quetlhencap apmenielhma nac wanlha mota apmajai'a emenielhec, cacpota njan jengaqjec, jentewacsec najan, coca co'o asua'ac cacpota allancoc aplhamacjo apqueltema apjalhnanco'oc, cacpota njan lhamacjo nquec caselha alaimommalhquelha la'a. 11 Co'o asto njan apuetep asiamolhma' apanque', ntasec co'o anwetsepoc necsa asquellanecama, 12 13 coca apquellanecama nepquesec la meijamolhma', mellanje', ca acuo'o la meiwa acmajai'a ncotuoc, engiengiec enenlhet anac ma'a, engielhpacnec na nepquesec lhec neptamen. Mellanama nepquesec ncanec jawe apnaqtoscama m'a, wanlha aptengiai'a aquianmoma apmacmecama patacom. 14 15 Co'o asto apuetep asiamolhma apanque', jeiecpelcawec co'o Tata, co'o njan asiecpelcawec ma'a, asqueliecpelcawec na nepquesec asnaqtoscama la'a, jelliecpelcawec na m'a, ntasec na anwetsepoc necsa asquellanecama m'a. 16 Apianquec na po'oc nepquesec apquelloca mo'oc necja, alaqlosenwacjac jata njan ma'a, jelleliejecjoc jata njan ma'a, netamen anwanquesecjac jata aplhamacjo atnecjac lhema apienactemacja, lhema apjapac na apto apquellanecama m'a. 17 Jeiamelaiam apiapom ncanec aiengioc jata asiennactema cacpota amecjoc mocjom ma'a. 1 18 Astema ejenquec ascaicamoc asiennactema, mamma enenlhet jelecquesec ma'a, nietnec asientalhnemo cacpota allancoc, amecjoc mocjom tacja m'a, ncanec Tata aptema m'a—lhta ptac Jesus ma'a 19 19 Apquelleng'a lhta apquelemjama apmania ie judios ma'a, colhuawe lhta apqueliamenacpoc moc apancawe, lhta aptancoc: 20 —Mellailho nquec mocjom quetlhencap jam enenlhet anac, anema, queliaqjameio' njan acmaicama— lhta aptancoc. 21 Coca napocja enenlhet lhta aptancoc: —Ma', mamma acmaicama queliacjameio jam, ntase eltennamaja, aptaqmelcasecjec metca apaqto'oc alhta, mancapuanquec enenlhet acmaicama la'a queliacjameio etaqmelcasecjac ma'a—lhta aptancoc.
Apqueltacnonwecja apquelemjama apmaniaie' judios Jesus
22 Pieiam apualhoc alhta ntac ma'a, ca apmeiacjo lhta Jesus na temma Jerusalen cacpota epasenwacja actacmelaicama lhma atlheianwecjo lhta mota apualho'oc apquelpenescamacja apquellalhnasecja au'alhoc Engiapom Neten apnemacja m'a 2 , Dedicacion acuesai'a m'a. 23 Apiaijema lhta Jesus Engiapom Neten apnemacja, aquieto portico 3 acuesai'a Salomon. 24 Ca apqueluacjenwo'o lhta apquellemjama apmaniaie judios ma'a, lhta aptancoc apquellano: — ¿Se lha acnem angeliamwomjoc se lha enenlhet lheiap que, je? Apto la lheiap Mesias, jengelleltennes colhuawe nac—lhta aptancoc. 25 26 Ca apcatemmonca lhta Jesus ma'a, lhta aptac: —Asqueleltennasque lhta niecje co'o m'a, ca asquelanai'a lhta lhamacjo caselha jempelapquescama napaqtawec quetlhencap aniem'o apmopuana Tata, apqueluetai'a niecje iocjalhmec anquec quetlhencap cacpota eliojoc niecje asqueniem'acja m'a, quetlhencap jeliascacmec coca ncanec na jawe nepquesec ejenco'oc. 27 Nepquesec ejenco'oc la'a apqueliecpelcawec asuenecama, jelieplacjec najan, asqueliecpelcawec na co lha' m'a. 28 Asquellanquec na apquelliennactema mancotnenwaianlha nnelha, mancolhec na jeljatsosquescactamo m'a, 29 ncanec apiapom jellaicamoc ma'a asnaqtoscama nac, neten na apmopuana m'a apiapom, mamma enenlhet eljatsosquescamoc apnaqtoscama m'a. 30 Co'o, ca njan apiapom enlhema—lhta aptac Jesus. 31 Apquellauque lhta apquellemjama apmaniaie judios apquellengo' m'a, nquetlhencasque lhta ellienjec metaimong Jesus ma'a, 32 coca lhta aptac Jesus apquellano: —Apqueluetai'ac quetlhencap asquellanai'a caselha actacmanma aniem'o apmopuana Tata ¿Se lha ntac apmac'o nac jellaqjec, je?—lhta aptac. 33 Ca apquellatemmonca lhta enenlhet'awoc ma'a, lhta aptancoc: —Mongellelto ennenco'o angennapoc altacmelo la caselha secje lhta apquelanai'a, nengeltawec angellaqjec lheiap ncanec apuannawec Engiapom Neten, enenlhet apanquec lheiap, coca apqueltacpe mota Engiapom Neten— lhta aptancoc. 34 Coca lhta aptac Jesus apquellano: —Coca nietnec actalhesammalhca jenganemacja apanco'oc aplheianmo lhnac nanec Engiapom Neten moclhem'a apquelemjama apmaniaie annenga, lhnac nane ntemac: «Quetlhencap dioses» 4 ca ntemac ma'a. 35 Apquelliawec niecje quetlhencap acto jawe ngiapac aclheianma m'a, apquetlheianmo lhnac nanec Engiapom Neten apquellelto dioses enenlhet'awoc annenga nac ma'a. 36 ¿Se lha ntac jetlheno nac asuannaicama Engiapom Neten asqueltalhco asto apquetca apanquec ma'a, je? Jawe ngiapac anque apto jepoccanma, jeiapascama njan ma'a. 37 38 Ellailho no, coca ntase niecje jeliascamoc ma'a molan'o la caselha altacmanma napaqtawec quetlhencap, coca nlhamacmec caselha altacmanma asquelanai'a aniem'o Tata, alhnacjo nque' nengeluetasquescama apiapom cacpota njan co'o enlhema ennenco'o m'a—lhta aptac. 39 Apquellempawe lhta mocjom apquenmajai'a ellaclhenquesec Jesus nengaclhencasemmalhquelha m'a, coca apquenie lhta Jesus apiesecsec enenlhet ma'a. 40 Netamen ma'a apmeiacjo lhta tep aluata Jordan, apquellauquescamacja lhta Juan conne iemmen enenlhet'awoc lhennenga m'a, apnacje lhta m'a. 41 Ma lhta ntec enenlhet apquelioiam apmajai'a eluetac Jesus ma'a, alhta aptancoc apquelpacmetquesacpo moc apancawe': —Ma lhta elanai'ac Juan caselha monwetai'o aniem'o neten, coca aplheianme mota apuesai'a Jesus ma'a jawe lhta ntema ngiapac ma'a— lhta aptancoc enenlhet. 42 Ma lhta ntec enenlhet meliasqueiam Jesus ma'a.
1Jesus esta dispuesto a morir por sus ovejas, pero luego resucitara
2Poner nota de pie
3Poner nota de pie de pagina o dibujo
4Salmos 82:6
Capítulo 11

Apquetsepma Lazaro
1 Lhema enenlhet alhta apuesai'a Lazaro acmasquei'o lhta apiempec ma'a, apcawacja apanque lhtoca Betania cacpota njan apquelialho'o Maria cacpota njan Marta. 2 Maria coca acto lhta aliengiesquescama apmancoc Jesus acmases aimes aimenec, ca actemo lhta njan awa' aliemasquesecjo apmancoc Jesus ma'a. 3 Ca alapascamo lhnac lhema enenlhet cacpota eltennascacjac ania'a Jesus, lhta aptac apcano apcapasammap: —Apuesque, aptema po'oc apanque' nac apcasecjai'elha lheiap, nemmasquema lhque ncaqjac ma'a— lhta aptac. 4 Ca apcatemmonca lhta Jesus ma'a, lhta aptac: —Coca acmasca engiempec anac jawe acmajai'a ncaqjec ma'a, eluetac jata enenlhet'awoc Engiapom Neten apmopuana, cacpota njan apmopuana apquetca—lhta ptac. 5 Awanje lhta apquellamelaiam Jesus Marta, Maria cacpota njan Lazaro, 6 ma lhtoca epecjac'ac Jesus engiacjac ma'a apnacja Lazaro, apqueltawe lhta elhec mocjom janet acnem ma'a. 7 Netamen lhta ptac Jesus apquellano apqueltamesaicamoc: — Noc, angenmeiacja mocjom iocjalhma Judea— lhta aptac. 8 Coca ma lhta nconmac'ac enmeiacjac ma'a, lhta aptancoc ma'a: —Jengetlhecmoscama, apquenmac'a alhta ennapoc judios lheiap ma'a ¿Apmac'a nlho engiacja apanquec lheiap ma'a, je?— lhta aptancoc. 9 Ca apquellatemmonca lhta Jesus ma'a, lhta aptac: —Mompelapmec acnem anque la'a, 12 hora atsai'a na lhma, nquetsac'awe lhma' amai, 10 coca pelhasep la'a, ampelapmoc ma'a mamma sonquec nentepcasecamoc emmanie. 11 ¡Noc apnacja nentema enlhamacja Lazaro, aptenquec ma'a, alhatecjascacjac jata!— lhta aptac. 12 Coca lhta aptancoc apqueltamesaicamoc apquellatemmonca: —Apuesque', ca acto la jawe ngiapac anquec apteianma m'a, etacmelecjac jata m'a— lhta aptancoc. 13 13 Coca aplhenque lhta niecje Jesus apquetsepma Lazaro, nquetlhenque lhtoca njan apualho'oc apqueltamesaicamoc apteianma Lazaro. 14 Coca apqueleltennasacje lhta mocjom alhnacjo nque' Jesus ma'a, lhta aptac: —Apquetsepquec Lazaro, 15 ntase co molhnemo m'a apquetsepacja nac Lazaro cacpota manjeliascamec co'o quetlhencap. ¡Noc apnacja Lazaro! — lhta aptac. 16 Coca Tomas, mo'oc nemaltema apcanet apalleiam, lhta aptac apquellano aptemo lhemec apqueltamesaicamoc Jesus: —Noc, antancoc netlhelhma'ac Jesus, angelletsepoc jate lha lhemec ma'a—lhta aptac ma'a. 17 Apuacje lhta Jesus na temma Betania, 4 acnem alhta nwacmoc apquetsepma Lazaro m'a, nemo njan aclhenquescaiacmo lhema metaimong alhua apjapac ma'a. 18 19 Ma lhta ntec na judios apquelluaiam ma'a acjaiancolha Marta cacpota njan Maria cacpota elpaiescasecjac au'alho'oc aquientalhnema aniem'o apquetsepma nialhneg, Jerusalen alhta apquelleniem'ac ma'a, malha 3 kilometros lhta nietnac Betania. 20 Ca aclengai'o lhnac Marta apquelhiaiam Jesus ma'a, alanielhaicocjo lhnac ma'a, nnecjec noca Maria acnemacja m'a. 21 Lhta ntac ano Marta Jesus: —Apuesque, co lhtema nac apnema lheiap jenque'e, menietsepe nlho lhta co eialheng, 22 coca asiawec co'o apquenmalhnenca la Engiapom Neten lheiap, etnejec apmac'o la etnejec—lhta ntac. 23 Ca apcatemmonca lhta Jesus: —Lheia' nialheng etnecjac jata mocjom apjalhnancoc apiesecsec apquenmasquenwaiacmo—lhta aptac. 24 Lhta ntac Marta: —Jai', asiawec co'o ncolhec jata actescasacjo apjalhnancoc apiesecsec apquenmasquenwaiacmo acuacmo ta nnelha acnem—lhta ntac. 25 Ca apcatemmonca lhta mocjom Jesus, lhta aptac: —Co'o asto asquellaicamoc apquelliennactema, asqueltemescasecja njan apjalhnanco'oc enenlhet apquenmasquenwaiacmo. Apquellelto la manjeliasqueiam enenlhet, ncaqjoc eletsepoc, elloca coca mocjom ma'a, 26 coca meletsepo mocjom colhuawe nac, manjeliascacmo la'a, meletsepec jata. ¿Mmai'e ncoi'ascacmoc lheia astacja nac, je?— lhta aptac Jesus. 27 Lhta ntac Marta atemmonca: —Jai apuesque', moi'ascacmoc co'o lheiap apto Mesias Engiapom Neten apquetca aplhenammacpo nac ewac jata jenque'e—lhta ntac. 28 Ca actaqjo lhta mocjom netamen Marta acjaiancolha, nielhammalhquec nac acmalenioscamo altennaso nialheng' Maria: —Lheia' lhquec apcanec jengetlhecmoscama—lhna ntemac. 29 Colhuawec nac nteiapmac actangiacmoc Maria alanielhanco Jesus, 30 apne lhta mocjom nalhet amai Jesus ma'a, aquieto lhta apacmetquesacja Marta. 31 Apqueluetai'ac nac na m'a apquelelto apquelpaiesecja au'alhoc aquientalhnema acteiapmo acpecjai'a Maria, apquelieplecjo lhnac ma'a, ncanec nquetlheianmec nac apualho'oc ncowenwacjac aquieto metaimong alhua, apietnemacja apjapac nialheng. 32 Netamen ma'a, ca acuacjo lhta Maria apnacja Jesus, nquelteclhecque lhta atapno'oc napaqte ma'a, lhta ntac: —Apuesque, colhtema nac apnema lheiap jenque'e, menietsepe nlho lhta eialheng—lhta ntac. 33 Apuet'a lhta Jesus Maria acueno ca njan judios awanje lhta aquiapcalhemmalhca m'a, ca aquiaqjapo lhta njan apualhoc Jesus ma'a, 34 ca apquelelmalhnenca, lhta aptac: —¿Co la aquieto apquellaclhenquescamacja apjapac Lazaro m'a?—lhta aptac. Ca apquellatemmonca lhta enenlhet'awoc, lhta aptancoc: —Elheng nojo, elanjo, ca nque'e— lhta aptancoc. 35 Ca apueno lhta njan Jesus ma'a. 36 Apquelluet'a lhta njan judios ma'a, lhta aptancoc apquelpacmetquesacpo mocapancawe: —Awanjec anque nac apcamelaiam Jesus aptema po'oc Lazaro—lhta aptancoc. 37 Lhta aptancoc na napocja enenlhet'awoc jeng: —Aptacmelcasacje lhta metca apaqto'oc Jesus, apuanquec quelha njan cacpota menietsepec Lazaro— lhta aptancoc. 38 39 Mocjom alhta aquiaqjapmo apualhoc Jesus aquientalhnema m'a, ca aptetescacmo lhta aquieto metaimong alhua apietnemacja lhta apjapac Lazaro, lhta ptac: —Eljatsos metaimong atong anac—lhta aptac. Coca lhta ntac Marta: —Apuesque', 4 acnem antac apquetsepma jam Lazaro, aptapque'—lhta ntac. 40 Ca apcatemmonca lhta Jesus ma'a, lhta aptac: —Asqueltennasocja lhquec la lheia manjeiascacmo la co'o cacpota ncotac jata apmopuana Engiapom Neten— lhta aptac. 41 Ca apqueljatsoso lhta metaimong atong enenlhet ma'a, ca apcammelho lhta njan neten Jesus, lhta aptac: —Tata, astac co'o gracias lheiap ncanec apcailhawec asquenmalhnecama lheiap, 42 asiawe co'o jeiailhawe mota lheiap, astec co'o astacja nac aspacmetquescama cacpota manjeliascamec lhamacjo enenlhet anac jenque'e apto lhta lheiap jeiapascama—lhta aptac Jesus. 43 Ca apiennacteso lhta apuenecama Jesus, lhta aptac: —Lazaro, etiep jam—lhta aptac. 44 Colhuawec anque lhta aptepac Lazaro m'a, apquelhiacmo aptepo conne metaimong alhua, aquieplomo apelhquetemmap 1 ietamopai'a, ca njan ieplomo nema apma napa'at ietamopai'a napocja'a. Netamen lhta aptac apquellano Jesus apquellelto apquelluaiam ma'a: —Eljatsosques ietamopai'a nac, cacpota ncotacmelecja aplhengama— lhta aptac. 45 Apqueluet'a lhta m'a caselha jempelapquescama enenlhet'awoc ma'a, ca meliascacmo njan Jesus apquellelto lhta apquelpasmoma Maria, 46 coca na pocja lhnac apquelleltennasquecjac Fariseos actacja apqueluetai'a apquelanai'a Jesus ma'a. 47 Ca apcacnecjo lhnac na apquelemjama apmania ie sacerdotes, Fariseos, cacpota njan apqueluescaie apquelientalhnemo m'a 2 , lhna aptaiancoc: — ¿Co la antemesquesec enenlhet anac ma'a, je? Nlhanie ntac apquelanai'a caselha jempelapquescama m'a. 48 Elhamancoc jata njan enenlhet apquelieplecama ncanec meliascacmoc na m'a. Ca manmanwacmo la ennenco'o m'a, netamen etlhenmac jata quempocjacme romanos, enaqtewacsec jata Engiapom Neten apnemacja enganco'oc anac cacpota njan ennenco'o nelluesai'a judios—lhna aptaiancoc ma'a. 49 Apnenquec nac na m'a apquemjama apmanie sacerdote apuesai'a Caifas, ca iantelhcapa lhta m'a, lhna aptemac apquellanemo: —Colquetamama no apualho'oc quetlhencap, 50 mancoieto ncotuasalhcac nellawacja nac, coca ntasec enietsepoc lhema enenlhet aquiaqmoiecja la m'a—lhta aptac. 51 Apquelientemoncasawe lhta Caifas apcanemmacpelha elhenec acmac'acja ta ncotnec Jesus apmatnama apiaqmoiecja enenlhet'awoc judios, jawe lhtoca apancoc apanquec Caifas aplheianma m'a, wanlha coca aniem'o aptemacja apanquec apquemjama apmanie la sacerdotes. 52 Coca apquetsepmo lhta njan Jesus cacpota engianquesecjoc aplhamacjo apquellelto Engiapom Neten apquetcac apcacjanco lhma nquec jam. 53 Netamen ma'a, apquellelto apqueluescai'e judios apquelpenescanquec nac apquellanecja apqueltacja cacpota ennapoc Jesus ma'a, 54 lhta sonquec elielhanmama Jesus ma'a cacpota meluetiec enenlhet, ca aptepo njan iocjalhma Judea, apquenmeiacjo na temma acuesai'a Efrain, nengaqte lhta iocjalhma metquelha temma. Apnacje lhta Jesus ma'a cacpota njan apqueltamesaicamoc. 55 Ncanquetuacme lhta njan acnem actacmelaicama lhma acuesai'a pascua, ma lhta ntec enenlhet'awoc apquenmeiecja apiau'acja temma Jerusalen, cacpota elalhnasecjac apualho'oc napaqtec Engiapom Neten amanie actacmelaicama lhma' m'a. 56 Apquelleliama lhta njan enenlhet'awoc Jesus ma'a aquieto Engiapom Neten apnemacja, lhta ptancoc apquelpaqmetquesacpo mocapancawec ma'a: —¿Se lha aclheno apualho'oc quetlhencap que, je, ewacja telha Jesus jenque'e actacmelaicama lhma nac?—lhta aptancoc. 57 Coca apquelemjama apmania ie sacerdotes cacpota njan Fariseos apquelpenescamawec nac apquellaicamoc ania'a enenlhet'awoc ma'a, apqueluet'o la Jesus ma'a, apuanca'ac eleltennascacjac cacpota elpatjetec ma'a.
1Vendado de pies y manos
2Junta suprema
Capítulo 12

Nqueluana altelhnaicamoc aimenec acmases aimes apmanco'oc Jesus
1 6 acnem alhta ncaimelhcac mocjom actemacja actacmelaicama lhma' acuesai'a pascua, apuacje lhta Jesus na temma aquieto Betania, apnemacja lhta njan Lazaro m'a aptemescasecjelha lhta njan apjalhnancoc apiesecsec apquenmasquenwaiacmo m'a. 2 Pelhasep alhta aptac ma'a, nno lhta alanescaso aptoma Jesus, apne lhta njan Lazaro m'a, Marta lhtoca apialho' Lazaro nquennasquema lhta nentoma m'a. 3 Maria lhtoca nsantac lhema alhancoc atcoc acmases aimes acuesai'a nardo, acmennawe nque lhta m'a, nqueltelhnanque lhta apmanco'oc Jesus, ca altelhnanco lhta njan awa' cacpota ncoliemecja apmanco'oc ma'a, mpaija lhtoca njan aimes conne pa'at ma'a. 4 Apne lhta njan ma'a lhema apqueltamescama Jesus apuesai'a Judas Iscariote, apto lhta njan apselhnanoncoma Jesus ma'a, lhta aptac: 5 — ¡Ntase niecje ncotengiac aquianmoma acmases aimes anac! Awanje ncotnec patacom 1 cacpota ncolpasmoc metca nac apquelletsecamaja —lhta aptac. 6 Coca apmopuana ania'a lhta Judas aptacja apaioma aplheianma m'a, ma lhta ellanei'oc metca apquelletsecama m'a, apmenielhme lhta mota necja atcoc patacom ma'a, apmacmecama lhta njan apquellanecama patacom Judas ma'a. 7 Netamen lhta aptac Jesus apcano Judas: —¡Melaptencasama lheiap nqueluana nac! Ncatsesquese nque' eiempec jam amanie nema jeiaqlhenquescaiam metaimong alhua ejepac. 8 Njeclhec mota ncotnec metca apquelletsecama apiesecsec anac quetlhencap cacpota elpasmoc na m'a, coca ncowomoc jatoca acnem acmasquema aspalhcaicama quetlhencap—lhta aptac.
Nema alanecja ania'a cacpota ellaqjec Lazaro
9 Mang nac nantec judios apquellengai'a ania'a apnema Jesus na temma Betania, ca apquenmeioiacmo lhnac ma'a apquenmajai'a eluetac Jesus ma'a cacpota njan Lazaro, apto lhta aptemescasecja apjalhnancoc Jesus apiesecsec apquenmasquenwaiacmo. 10 Coca apquellanecjo lhnac na ania'a apmajai'a ellaqjec na Lazaro apquelemjama apmaniaie sacerdotes, 11 lhta sonque apqueliengiecjo judios ma'a, apquelieplecjo lhta Jesus aniem'o apqueluetai'a aptemescasecjo apjalhnancoc Lazaro. 12 Lhema aknem alhta ntak akiekai'a m'a, ma lhta ntek apkenmeiekha enenlhet'avok apiav'akha temma Jerusalen, ngvakme lhta aknem aktaqmelaikama lhma akvesai'a Pascua. Ntepema lhta ania'a apieseksek enenlhet'avok aplheiam Jesus amai. 13 Kolhvavek anke lhta nhan apkeliaqtemenangkok alha ava' m'a, apkelentepke lhta na temma enenlhet'avok apkeltaniakme lhta m'a, apkelvenema lhta nhan, lhta aptangkok: —¡Hosana, ntasek anko ie, eletsevasoho, nema aktaqmelkeskeskama apkaniemhaikama hengke'e aplhekmo nak apkapaskama Apveske, apto nhan apiav'akha Apveske apanko'ok israel! —lhta aptangkok ma'a. 14 Ka apvet'o lhta malekka tkok Jesus ma'a, apkananto nhan, nte lhta aktemakha nhan aktalhesammalhka Vakkahak Eniapom Neten apaivoma, ka ntemak: 15 «Mellaga nko ie atkak Sionf , aplhekmek apveske apanko'ok, apkanantema malekka tkokg», lhnak nane ntemak ma'a. 16 Koka apkeltamesaikamok ma lhta nkotlheianvakho apvalho'ok aktemakha aklheianma ania'a aktalhesammalhka vakkahak. Koka netamen nemo aktemeskeskamo neten apankek Jesus ma'a, atlheianvekho nhan apvalho'ok aktemakha aklhenammalhka kaselha nak ma'a. 17 Koka apkellelto lhta apkelvetaiangko aplhatekhangveiam Lazaro, apteiapmo nhan ma'a nemakha akpekkanveianlha enghapak metaimong alhva, apkeleltennasengka lhta ania'a aplhamakho apkellelto apkelvaiam ma'a. 18 Lhta ngkanek apkeltaniakmo enenlhet'avok apkenmangko takha Jesus ma'a ngkanek apkeliave lhta kaselha mongenatkeskama apkelanai'a. 19 Koka ma lhta nkollekok apvalho'ok fariseos, lhta aptangkok apkelpaqmetkasekpok mok apankavek ma'a: —Mamma antemeskesangkok angelienieskasekhak enenlhet'avok apkelieplekama nak ma'a, aplhamengkek na m'a —lhta aptangkok.
Moc lhem'a griego apquelquetansema Jesus
20 Apcacjanque lhta njan ma'a moc lhem'a griegos apquelpasenwaiam actacmelaicama lhma' Pascua m'a cacpota eltacnescasancoc Engiapom Neten ma'a, 21 ca apqueltetesco lhta Felipe m'a, co Betsaida lhta m'a aquieto iocjalhma Galilea, lhta aptancoc apquellano: —Nengelmac'awec angelluetac Jesus—lhta aptancoc. 22 Ca apmeiacjo Felipe apnacja Andres cacpota etnec aplhelhma eleliama Jesus, ca apqueluetacjo m'a, lhta aptancoc apquellano: —Griego lhquec apquelquetamac lheiap—lhta aptancoc ma'a. 23 Ca apcatemmonca lhta Jesus, lhta aptac: — Colhua nwacmoc acnem Enenlhet Apquetca nac ncolhec jata actemesqueso neten apanque, 24 coca ncaimelhquec secjec engietsepoc ma'a, nnawec lhema actec anac atonnammalhca nconmaiesemma 2 actec aiempec anac cacpota ncotectepoc ncolhamecjac na aquielhna. 25 Aptengianquec jata nque mota apanco'oc apancawec caselha necsa apquellaniemjaicama, emasquenwomoc jata, coca aptengianco la apqueltacmelquesquescama apquellaniemjaicama po'oc, elloca ta acuancacjo'. 26 Apquenmac'ac jata nquec etnancoc asquellasennaicama, ncaimelhquec jelieploma asmanquelha la'a, alhelhma coca mota'a, co'o Tata ta njan eltemescasancoc neten apancawec quetlhencap ma'a. 27 Coca colhuawe nac nientelhe co'o, aslenganquec na acmaiose ewalhoc, asmac'a niecje altennasec Tata cacpota mancotnec actacja nac aquientalhnema, coca moltennacsec jata, ca ncanec asua'ac co'o cacpota ncotnec acmac'acja na ncotnec ascaniemjaicama. 28 ¡Tata, eluetasques enenlhet'awoc anac aquietnema apmopuana lheiap!—lhta aptac. Colhuawec anque lhta nlengalhca nema aliatecama aniem'o neten, lhta ntac: —Asqueluetasquescanquec asmopuana, aluetasquesec jata mocjom—lhta ntac nema aliatecama. 29 Coca acto lhta apquellengai'a m'a, lhta aptancoc: —wa', quelhtengieuque nac—lhta aptancoc. Coca po'oc alhta aptac na: —Jawe', Enenlhet Neten apacmetcasac Jesus —lhta aptancoc ma'a. 30 Coca lhta aptac Jesus: —Ca nema aliatecama apquelleng'o lhquec quetlhencap jawe nema acmajai'a ncolhec jetacmelcasquesacjo ascaniemjaicama, quetlhencap coca m'a acmajai'a ncolhec altacmelcasquesacjo apquellaniemjaicama. 31 Nwacmec acnem Engiapom Neten engianquesecjac jata enenlhet'awoc lhma nquec jam cacpota eliecpelcojo se lha enenlhet apto meijamolhma cacpota njan apiamolhma, ncolhec jata njan actepqueso queliacjameio' actema awesque lhmanquec jam. 32 Jato ca jeleclheno ta neten 3 , manjeliascamec jata aplhamacjo enenlhet —lhta ptac Jesus. 33 Apquetsepma lhtoca niecje aplhenac Jesus ma'a. 34 Lhta aptancoc enenlhet: — Nlheianmec jenganemacja enganco'oc anac menietsepec Mesias ¿Se lha ntac aptonac lheiap ncolhec aclheno neten Enenlhet Apquetca, je? ¿Se lha Enenlhet Apquetca ie, je?—lhta aptancoc ma'a. 35 Ca apquellatemmonca lhta Jesus ma'a, lhta aptac: —Iacuatacjo nquec quetsec mocjom tep ncolhec aponmatma apiesecsec quetlhencap, elloca ta lhemec quetlhencap ma'a ncotlapquesec jata quetlhencap ncollapua' ienactescama lhma, meluetiec jata lhma amai'a apquenmancolha la'a. 36 Meliasquem coca aponmatema nac necsa acnema mocjom apiesecsec quetlhencap, etnancocjac jata atcac 4 quetlhencap ma'a—lhta aptac. Netamen aplheianma lhta Jesus ma'a, apielhacpo lhta aptepo apmeiacjo mo'oc necja' cacpota eilhanmoc ma'a.
Apqueliasqueiam judios Jesus
37 Ma lhta ntec apquelanai'a caselha jempelapquescama Jesus napaqtawec enenlhet'awoc, coca apqueliasqueiacme lhta njan ma'a. 38 Apquelientemonquescamawe lhnac nanec aplheianma secama ania'a Isaias annenga ncotnec jata acuetammalhca m'a, lhnac na ne ntemac ania'a: «Apuesque ¿Se lha enenlhet meiascame ania'a netlheianma nac, je? ¿Se lha nja enenlhet apuetasqueso apmopuana ie'?» 5 lhna ntemac ania'a. 39 Ca nqueniemai'ac enenlhet'awoc apqueliasqueiacmo nac Jesus ma'a, actemo njan aclheianma aptalhescama lhnac nanec Isaias, lhna aptemac: 40 «Nnenquec allapquesecjoc apaqto'oc enenlhet'awoc cacpota meluetie lhma, nnec na altemescaso metca atlhenaicama apualho'oc cacpota melianwomjec ma'a, ca nqueniemai'ac na mellanocjec apualho'oc ma'a cacpota moltacmelquescamec necsa anmasca apiempeioc ma'a 6 — lhnac nane ntemac aptalhescama. 41 Aplheianmo lhnac nanec Isaias annenga Jesus ma'a aniem'o apuetai'a apaqtec apmanie' Jesus, ncoitec jata apmopuana. 42 Coca moclhem'a lhta njan judios meliasqueiacmoc Jesus ma'a cacpota njan apquelemjama apmaniaie, coca apquelmalengiosemmacpe lhta apquetlheianma meliasqueiam aniem'o apquellai'a Fariseos ellentepquesec apcaqnecjelha mota m'a, 43 apquelleltawe lhta etnancoc apqueltacmanma napaqtawec enenlhet'awoc ma'a jawe coca Engiapom Neten.
Apuai'a Jesus cacpota eluonquesec tep enenlhet'awoc lhma nquec jam
44 Lhta aptac mocjom Jesus apiennacteso apaioma: —Mang jata nquec jeliascacmoc moclhem'a enenlhet, meliascacmo la njan apiapom apto lhta jeiapascama. 45 Apquellelto jeluetai'a co'o, apqueluet'ac na apto lhta jeiapascama. 46 Co'o asto aponmatma, asua'a lhta co'o cacpota alaponmatquesec apquellelto manjeliasqueiam, melloca ta ienactesacja lhma. 47 Asuai'o nac co'o asmajai'a aluonquesec tep enenlhet'awoc, jawe asmajai'a anaqtewacsec melleliejecjo la aspaioma. 48 Coca etuasacpoc jata melleliejecjo la aspaioma acuacmo ta nnelha acnem. 49 50 Jawe njan aniem'o ejencoc ejenque asquetlhecmoscama nac, apiapom apto lhta jeiapascama apqueltemo atlhecmocsec. Asiawec co'o apquellelto la apquelliejecjo jenganemacja apancoc Tata, ncoitec jata aquiennactema apnengio'oc mancotnenwaianlha nnelha'—lhta aptac Jesus.
1300 denarios, mas o menos el salario de 9 meses de trabajo
2Muere
3Jesus habla de su muerte en la cruz
4Ser hijos de luz significa ser gente que vive haciendo siempre el bien
5Isaias 53:1
6Isaias 6:10
Capítulo 13

Jesus apqueliengiescasecamoc apmanco'oc apqueltamesaicamoc
1 Lhema acnem alhta ncaimelhcac acteiapmacja actacmelaicama lhma acuesai'a Pascua m'a, coca apiawe lhta Jesus ncanquetque lhta aptacjecjelha aquieto neten cacpota eipetcanwajac apiapom ma'a, nianwacme lhta apquellamelaicama Jesus apquellelto apquelieplecama, metca nnelha apquellamelaicama m'a. 2 Mpenesque lhta acmaicama queliaqjameioc Judas, Simon Iscariote apquetca cacpota eselhnanac Jesus ma'a. 3 Apiawe lhta Jesus Engiapom Neten apcapascama cacpota njan etaqjoc apnacja m'a, apiawec na apiapom apcaianco lhamacjo actemacja apmopuana m'a. Necsa aptaweicocja lhta pelhasep ma'a, apquenmacjo lhta neten Jesus, 4 ca apleco apcaqlammap, apteto njan lhema ietamopai'a napocja neplhet, 5 ca apiatmo lhta iemmen lhema apjac aquiawai'a, apquempo njan apqueliengiescasenco lhta apmanco'oc moclhem'a apqueltamesaicamoc, netamen apqueliemasquesacjo njan ietamopai'a napocja lhta m'a. 6 Ca aquietacjo lhta njan Pedro, coca lhta ptac ma'a: —Apuesque, mancoietoc eliengiecsec emanco'oc lheiap—lhta aptac. 7 Coca lhta aptac Jesus: —Ntasec aliengiesquesec lheiap apmanco'oc, meijoc mocjom actacja nac asquelanai'a, alhaiec jatoca eijanwacjo' — lhta aptac. 8 Lhta ptac mocjom Pedro: — Ma', monwasecje nlho nquec eliengiecsec emanco'oc lheiap—lhta aptac. Ca apcatemmonca lhta mocjom Jesus, lhta aptac: —Mang jata nquec eltac lheiap, mancapuanquec jata jeieplomaja—lhta ptac. 9 Lhta aptac mocjom Simon Pedro: — Ia' jai, ntase' apuesque, eliengies emanco'oc, emeioc cacpota njan epatec—lhta aptac. 10 Coca lhta aptac Jesus: —Enenlhet mancowanco la apielhuatema iemmen, apmopacjec ma'a, wanlha coca apmanco'oc ncaimelhcac neliengiesquescama. Apquenmopei'o quetlhencap, coca jawe aplhamacjo m'a—lhta aptac. 11 Apiawe lhta Jesus enenlhet apselhnanoncoma ta, lhta ncanec etnec apaioma jawe lhamacjo apquenmopei'o. 12 Apenesque lhta apqueliengiescasecamoc apmanco'oc ma'a, apcaqlacpo mocjom apcaqlammap Jesus, apnacjo njan ma'a, lhta aptac apquellano apqueltamesaicamoc: — ¿Ma nlho eliojoc astacja lhquec asquellanei'o quetlhencap, je? 13 Quetlhencap jeleltanque mota apuesque cacpota njan jengetlhecmoscama, nietawec co'o ma'a. 14 15 Ncacjoc coca asqueliengiescasenquec apmanco'oc quetlhencap, jata njan etnancoc apiesecsec quetlhencap ma'a astacja lhquec. 16 Ca nema annencasecama nac jawe njan apto neten apanquec napaqtec apuesque, nnawec na nema apascama nac jawe apto neten apanquec apto apcapascama, jawe ngiapac anquec ma'a. 17 Apquellelto la apquenmaicamoc tacja asquetlhecmoscama nac, aptanco la njan, netamen Engiapom Neten jata eltacmelquesquesec apquellaniemjaicama. 18 Coca jawe lhamacjo quetlhencap ma'a, asiawec na apquellelto la enenlhet asqueliequiescama, ncowac jata acnem actemacja nac aclheianma actalhesammalhca jenganemacja, lhnac nane ntemac: «Lhema apto astoma lhemoie', jeselhnanac jata» 1 ca ntemac ma'a. 19 Spenesawec asqueleltennascama m'a acmac'acja ta ncotnec cacpota meliascamec asto Mesias co'o. 20 Apquenmanquec jata nquec tacja enenlhet asquellapascama nac, jenmanquec na tacja co'o, jenmanquec na tacja co'o, apquenmanquec na tacja acto lhta jeiapascama co'o, jawe ngiapac anquec astacja nac—lhta aptac. 21 Aiose lhta ntac apualhoc Jesus ma'a, lhta aptac: — Asiawec co'o lhema pjapac jata apiesecsec anac quetlhencap jeselhnana'—lhta ptac. 22 Apquellan'awe lhta po'oc apqueltamesaicamoc, ma lhta eliojoc enenlhet eselhnanac jata m'a. 23 24 Necsa aptaweicocja lhta m'a, lhema apqueltamescama lhta apcamelaianlha apnema napocja Jesus ma'a, apielhacpo lhta Simon Pedro apto moc apopjec apqueltemo enmalhnama Jesus apto apselhnanoncoma ta enenlhet. 25 Ca apiepetcanwacmo lhta enenlhet Jesus ma'a, lhta aptac: — Apuesque ¿Selha acmac'o nac ncoselhnanac lheiap que?—lhta aptac. 26 Apcatemmoma lhta Jesus ma'a, lhta aptac: — Asmac'ac aiasquecsec napocja pan anac cacpota anwancoc enenlhet anac apto ta jeselhnanoncama—lhta aptac. Ca apiasqueso lhta pan Jesus, apcanco lhta njan Judas Iscariote. 27 Colhuawe lhta ntalhnac apualhoc Satanas Judas ma'a, lhta aptac Jesus apcano: —Judas, epecjeso ta apquelanai'a caselha aclhenacja apualhoc— lhta aptac. 28 Coca ma lhta eliojoc aplhamacja apqueltamesaicamoc ma'a aptacja apcano Jesus, 29 lhta apquellanec elhenac Jesus enmoc Judas caselha actacmelaicama lhma' pascua ancoc, nlhoca la njan ma'a ellancoc patacom metca nac apquelletsecama, ncanec apqueltacmelquescama patacom alhta m'a. 30 Netamen aptoma lhta Judas pan napocja m'a, colhuawec anque lhta aptepac conne pa'at ma'a, pelhasep alhta ptac ma'a. 31 32 Lhta aptac Jesus apquellano aplhamacja apqueltamesaicamoc: — Ca colhuawe nac Engiapom Neten jata etnec apqueluetasquescama apmopuana Enenlhet Apquetca, cacpota njan Enenlhet Apquetca nac etnec apqueluetasquescama apmopuana Engiapom Neten. 33 Quetlhencap eietcac apquetcoc asquellamelaiam, quetse ncaimelhcac astaqjecjelha, jelquetmoc jata, manjeluetecjec jatoca, meluomec jata njan asmac'acja nac amjancoc. Ca asqueleltennaso nac quetlhencap, asqueleltennasque lhta njan apquelemjama apmania ie nac judios. 34 Colhua coca asmac'ac allancoc alhnancoc jenganemacja, ellamelacpo ta mota apiesecsec quetlhencap, ca astemacja nac co'o asquellamelaianca nac quetlhencap. 35 Ca apquellamelacpo ta apiesecsec anac quetlhencap, ncotlheianwacjoc jata apualhoc enenlhet jawe ngiapac anquec asqueltamesaicamoc quetlhencap—lhta aptac Jesus. 36 Netamen Simon Pedro apquenmalhnenca lhta Jesus ma'a, lhta aptac: — Apuesque ¿co la apmac'acja emjancoc lheiap, je?—lhta aptac. Ca apcatemmonca lhta Jesus, lhta aptac: — Mancapuanquec jeieplacjac lheiap colhuawe nac asmac'acja nac amjancoc, alhaiec jata emjancoc lheiap ma'a—lhta aptac Jesus. 37 Apquenmalhnacjawe lhta mocjom Pedro, lhta aptac: —Apuesque ¿Se lha ntac melto nac aieplacjac colhuawe nac lheiap que? ¡Ntase niecje njan co'o anwetsepoc lhemec lheiap!—lhta aptac. 38 Ca apcatemmonca lhta mocjom Jesus ma'a, lhta aptac: —Apmopuana ania'a lheiap, sosecja ta amanie acmajai'a ncopaio' tape'e, 3 jata ncotnec aplheianma manjeiecpelquema lheiap—lhta aptac Jesus.
1Salmos 41:9
Capítulo 14

Jesus apqueliatecjo apqueltamesaicamoc
1 Lhta aptac Jesus apquellano apqueltamesaicamoc: —Moltama nquec apualho'oc, meliasquem Engiapom Neten cacpota njan co'o. 2 3 Awanje lhma apnacja Tata, angiacjac jata co'o m'a alpenescasoc jata apcacjaianquelha quetlhencap ma'a, jawe ngiapac anquec ma'a, netamen awatamoc jatoca mocjom cacpota alaclosenwatac quetlhencap, jata angacjenwacjac ma'a. 4 Apquelliawec quetlhencap amai asmac'acja nac angiacja' —lhta aptac Jesus 5 Coca lhta ptac Tomas: —Apuesque, mangeliojoc apmac'acja emjancoc, mangeliojoc na amai—lhta aptac. 6 Ca apcatemmonca lhta Jesus ma'a, lhta aptac apcano: — Co'o asto nac wanlha lhema amai acmaiancoc aquieto apnacja Engiapom, co'o asto njan jawe ngiapac anque ngiapom, asquellaicamoc na alliennactema apnengio'oc enenlhet'awoc lhma nquec jam. 7 Coca jeliecpelco la quetlhencap, eliecpelcoc jata njan co'o Tata, apqueliecpelquec coca colhuawe nac ncanec apqueluet'a ie— lhta aptac. 8 Lhta ptac Felipe: —Apuesque, jengeluetasques no apiapom, coca wanlha ncotnec ma'a—lhta aptac. 9 Coca lhta aptac mocjom Jesus apcatemmonca: —Felipe, lhennenga ntac asnema apiesecsec quetlhencap ¿Mocjom coca lheiap menjeiecpelquema, je? Enenlhet apto la jetai'a co'o, apuet'ac na apiapom. ¿Se lha acto apquelto lhquec aluetasquesec apiapom, je? 10 Apiascacmec lheiap apiapom cacpota njan co'o nengellelto enlhema, lhamacjo actacja nac alheianma aniem'o apiapom, jawe ejencoc ejenquec alheianma, apiapom co'o alhelhma, jemama co'o m'a cacpota ellanac lhamacjo caselha. 11 Meliasquem coca co'o ca njan Apiapom nengellelto enlhema, coca apqueliascacmo la aspoiama nac astacja, meliasquem aniem'o njan caselha monwetai'o asquelanai'a. 12 Angiacjac jata co'o aquieto apnacja apiapom, coca apquellelto la manjeliasqueiam etnancoc jata actemacja nac asquelanai'a co'o, tep anque jata ncotnec apquellanai'a caselha m'a, jawe ngiapac anquec ma'a. 13 14 Elelmalhnama ta aquieplomo asuesai'a nac apquelleltacja la caselha, cacpota allancoc ma'a, netamen eluetac jata njan apmopuana Apiapom aniem'o aptacja apquetca apquelanai'a m'a. 15 —Jellamelacmo la quetlhencap, elleliejecjoc jata jenganemacja ejencoc anac, 16 17 co'o ta anmalhnama apiapom engiapacsec po'oc Apquenmasma, Engiapom Neten Apualhoc ma'a cacpota elloca lhemo ie, apto jawe ngiapac anque ngiapom. Coca apquellelto la apqueliasqueiam metlhoquiec jata ncanec melluet'ac, melliecpelcac najan. Quetlhencap coca apqueliecpelco la'a, apnec lhemec quetlhencap ma'a, elhec jata njan metca nnelha. 18 Moliengieujec jata quetlhencap jawe malha acto nac apquelieijecama nac, awatamoc jatoca mocjom cacpota alhojoc lheme quetlhencap. 19 Quetsec ncaimelhcac manjeluetecjec jata enenlhet'awoc lhma nquec jam, quetlhencap coca eluetecjac jata, elloca ta mocjom ma'a tep ncanec co'o aloca ta njan ma'a. 20 Netamen acuacmo ta acnem asuactamo mocjom jenque'e, elianwacjoc jata quetlhencap co'o cacpota njan Tata nellelto enlhema, co'o cacpota njan quetlhencap nelpasmommalhco m'a. 21 Enenlhet apto apmama tacja jenganemacja ejencoc anac, apqueliejecjo njan, coca jenca apto jawe ngiapac anquec jeiamelaiam, co'o cacpota njan Tata angellamelemmac enenlhet anac, aiecpelcasquesalhcoc jata njan ejenquec —lhta aptac apquellano Jesus apqueltamesaicamoc. 22 Coca lhta ptac Judas, jawe Judas Iscariote: —Apuesque ¿Se lha ntac apquelto nac jengeluetasquesec lheiap wanlha ennenco'o, jawe nac lhamacjo enenlhet, je?—lhta aptac. 23 Ca apcatemmonca lhta mocjom Jesus: — Enenlhet apto jeiamelaiam, apqueliajacjec na aspaioma, co'o Tata apcamelacmec na enenlhet anac ma'a, Tata ca njan co'o angelloca ta lhemec ma'a. 24 Coca enenlhet apto la manjeiamelaiam, meliajacjoc na aspaioma. Jawe aspaioma ejenquec co'o, Apiapom coca jeiapascama apto apaioma m'a. 25 Asquetlhecmosque mota necsa asnema mocjom apiesecsec quetlhencap, 26 coca engiapacsec jata Apiapom apto Apquenmasma apuesai'a Apualhoc Apanquec Engiapom Neten, jeiaqmonquesec jata asnemacja, etlhecmosancoc jata lhamacjo caselha, etlhenquesquescacjoc jata njan apualho'oc lhamacjo actemacja asquetlhecmoseianco lhta. 27 Asquellanquec metca altaicama apualho'oc quetlhencap, mancapuanquec enenlhet elanac ma'a, wanlha coca co'o ewanque'. Moltama nquec apualho'oc quetlhencap, mellaga nquec najan acmac'o ta ncowa. 28 Apquelleng'a lhta alheianma co'o asmajai'a alhong, coca awatamoc jata mocjom jenque'e. Nquellaiosescasque lhta apualho'oc quetlhencap astacja lhta secjec asquellano, coca jellamelacmo la'a, ncolpaijecja nlho lhta apualho'oc alheno lhta angiacjac apnacja Apiapom acnema apmopuana, molhno co'o. 29 Asquelientemoncasawe' co'o alheianma amanie acuai'a acmac'acja ta ncotnec, jata apqueluet'o ta m'a, manjeliascamec jata. 30 Quetse ncaimelhcac acnem acmasquemacja asquelpaqmetquescama quetlhencap, ncanec ncanquetua'ac awesque lhma nquec jam, coca mamma acmowana jetnescasentac coneng ma'a. 31 Ewanquec co'o alanac apqueltacja la alanac Apiapom cacpota eluetac enenlhet'awoc alhma nquec jam asto ascamelaiam Apiapom. ¡Elaqnecja neten, noc!— lhta aptac Jesus.
Capítulo 15

Jesus apto malha iamet uva
1 —Co'o asto malha iamet uva actacmanma 1 , Tata coca apto aptacmelquescama, 2 apqueliaqtemenque mota actengoc metquelha la aquielhna, apquelalhnascasquec na actengoc nquescama la aquielhna cacpota ncoielhnancoc ma'a. 3 Apquelalhnai'o quetlhencap aniem'o aspaioma asqueleltennascama. 4 Etlhenques actemacja nelpasmommalhco nac, lhema actong la iamet mancoielhnema, ncoiaqtemanalhcac ma'a, nnawec na quetlhencap ma'a, mancollapuanquec ellanancoc altacmelo caselha jeliengiacjo la nentaicamoc nelpasmecja. 5 6 Co'o asto iamet uva, quetlhencap coca m'a malha actengoc anac. Mang jata nquec jeliengiacjac jelpasmecama quetlhencap, ncotnec jata nquescama aquielhna, coca jeliengiacjo la jelpasmecama, ncotnec jata metca aquielhna, ncolhec jata njan aliaqtemeno m'a, ncolliemac jata, ncolhec na anquesacjo cacpota ncoclhalhcac aisecsec talha. 7 Apquetlhencaso la jelpasmecama quetlhencap, apquelleliajacjo la njan aspaioma, elelmalhnama apquenmac'acja la njan, ncolhec jata allanco m'a. 8 Apquellanenquec jata nquec caselha altacmelo quetlhencap, etnancoc jata jawe ngiapac anquec asqueltamesaicamoc, eluetac jata enenlhet'awoc apmopuana co'o Tata. 9 Asquellamelaiam quetlhencap ca ctonac Apiapom jeiamelaiam co'o, jellamelama ta njan quetlhencap. 10 Elleliejecjoc na aspaioma cacpota elluetac enenlhet ma'a jellamelaiam, ca stonac co'o asqueliejecjec Tata apaioma m'a, apquelluetai'ac na enenlhet ascamelaiam co'o Tata. 11 Ca astacja nac alheianma asqueltemo ncolpaijecjo mota apualho'oc lhemec co'o. 12 Ca ntac na jenganemacja ejencoc co'o aspaioma, ¡ellamelacpo ta mota apiesecsec quetlhencap, ca astemacja nac co'o asquellamelaiam quetlhencap! 13 Aquiau'o la apcamelaiam apcamelaianlha po'oc, ntasec engietsepoc apiaqmoiecja m'a. 14 Jelleliajacjo la quetlhencap, coca m'a apquellelto asquellamelaianlha, 15 mmasquec aptanco esclavos, ca esclavo nac jawe nengaqtec apuesque apancoc, quetlhencap coca apquellelto asquellamelaianlha nengaqtec aptanco mota co'o, asqueleltennasquec na actacja Tata apaioma. 16 Ma lhta jeliequiesancoc quetlhencap, co'o coca nqueniemai'ac asqueliequiesaianco ejenque', ca asquellapaso lhma nquec jam cacpota ellana' nquescama caselha actacmanma 2 metca nnelha, netamen ellancoc jata Tata apquelelmalhnenca la'a caselha, aquieplomo coca asuesai'a nac. 17 Alhenecjoc jata mocjom, ¡ellamelacpo ta mota apiesecsec quetlhencap!—
Enenlhet meliamolhma apqueltaqnoncoma Jesus cacpota njan apqueltamesaicamoc.
18 — Eltacnewa ta enenlhet meliamolhma quetlhencap, ncotlheianwacjoc toca apualho'oc emanie lhta jeltaqnoncoma co'o m'a. 19 Aptanco la meliamolhma quetlhencap, ca enenlhet meliamolhma nac ellamelama njan quetlhencap ma'a, ca acto nac apquellamelaicama nac po'oc apancawec meliamolhma lheme' nac. Co'o coca asqueliequiescama ejenquec quetlhencap apiesecsec anac ma'a, mmasquec aptanco m'a aptaiancolha nac ma'a, ca ncanec eltacnewac quetlhencap ma'a. 20 Cotlheianwacjo no apualho'oc astacja lhta asquellano, nema asennaicama nac jawe apto neten apanquec apuesque apancoc. Jeliaqmasema lhta co'o enenlhet, jata njan ncotnec quetlhencap ma'a. Coca moclhem'a lhta njan apquelleliejecjo lhta aspaioma, elleliejecjoc jata njan aptancolha la apquetlhecmosecamoc quetlhencap ma'a. 21 Ncotnec jata acuai'a m'a nema acmenlhenaicama nac co'o sonquec asqueltamesaicamoc quetlhencap, enenlhet meliamolhma nac ma'a meliecpelcac apto jeiapascama co'o. 22 Lhta molan'o la caselha jempelapquescama napaqtawec ma'a, mancolhe lhta apquetselhnanemmap, coca nietnec apquetselhnanemmap ma'a ncanec apqueluetai'ac asquelanai'a caselha jempelapquescama napaqtawe ma'a, coca ncacjoc najan, jengeltaqnonconquec Tata co'o njan. 23 24 25 Coca jeng lhamacjo actacja nac ascaniemjaicama asuetai'a, ca aquietno nac actalhesammalhca waccajac Engiapom Neten apaioma, ca ntemac ma'a: «Jeltacnewacque' enenlhet metquelho astacja» 3 ca ntac ma'a actalhesammalhca. 26 Co'o ta allapacsec apto Apquenmasma quetlhencap, Engiapom Neten Apualhoc, apto jawe ngiapac anque ngiapom, jata etlhecmocsec lhamacjo caselha aniem'o co'o. 27 Quetlhencap jata eleltennacsec enelhet'awoc lhamacjo caselha actemacja apqueluetai'a asquelanai'a ncanec jelieplecama lhta asquempai'acjasecja lhta asmacmecama — lhta aptac Jesus.
1Vid, arbol que produce frutas llamadas uvas.
2Fruto
3Salmos 35:19 /69:4
Capítulo 16

1 —Asquelientemoncasawe lhta asqueleltennascama quetlhencap acuo'o ta aquientalhnema apquellaniemjaicama cacpota m'a meluatesanquec aptaicamoc manjeliasqueiam acuo'o ta m'a. 2 Ncolhec jata njan alentepcaso conne apcaqnecjelha nac judios, etequio'oc jata njan quetlhencap, ncotlhenec jata apualho'oc ma'a enenlhet anac aniem'o apquellasennaicama Engiapom Neten ma'a, 3 coca manjeliecpelquemac co'o cacpota njan Apiapom enenlhet meliamolhma nac ma'a. 4 Asquelientemoncasawec mocjom asqueleltennascama colhuawe nac cacpota ncotlheianwacjoc apualho'oc acuo'o ta m'a. Ma lhta co aleltennasac quetlhencap secjec lhta asquempai'acjasecja asmacmecama ncanec taiepe lhta mocjom ncowac ma'a, 5 coca ataqjoc jata mocjom apnacja apto jeiapascama, ma nac jelelmalhnema quetlhencap asmac'acja amjancoc, 6 aiosac'a na ntac apualho'oc quetlhencap apquelleng'o aspaioma nac. 7 Ntasec jata ncotnec mocjom apquellaniemjaicama quetlhencap ataqjoc jata netamen alhta, cacpota ewac apto Apquenmasma, coca mongiaqjo la m'a, monwapacsec na m'a. 8 9 10 11 Jata apuo'o ta m'a apto Apquenmasma, etlhenquescamoc jata apualho'oc enenlhet'awoc aquietnema meliamolhma aniem'o jeliasqueiam co'o, etlhenquescamoc jata njan apualho'oc enenlhet'awoc co'o asto aspeiwomo, metca astemenwecjo lhma, etlhenquescamoc jata njan apualho'oc enenlhet'awoc, Engiapom Neten aplheianma acto acselhnanemmalhca awesque lhma nquec jam, eiaqmoncasecjac jata njan actemacja m'a. Coca ataqjoc jata mocjom co'o apnacja apto lhta jeiapascama, manjeluetecjec jata quetlhencap. 12 Nlhanie niecje ania'a asmajai'a aleltennacsec mocjom, coca mancollapuanquec quelha eluascapoc aniem'o aquientalhnema. 13 Jata apuo'o ta Apualhoc 1 apto jawe ngiapac anque na ngiapom, jatoca elianwesquescamjoc quetlhencap acto jawe ngiapac anque, melhenec jata apancoc apanquec caselha, wanlha ta elhenec actemacja aplengai'a aniem'o Engiapom Neten apaioma, eleltennacsec jata njan acmac'acja ta ncowac caselha apmaniaie quetlhencap. 14 Elianwesquescamjoc jata njan co'o asto asientalhnemo, eleltennacsec na astacja aspaioma aplengai'a m'a. 15 Lhamacjo apanco'oc anac Apiapom, co'o njan ejenco'oc ma'a, ca ncanec co'o atnec alheianma colhuawe nac ma'a, ennac jata Apualhoc anac astacja nac alheianma, eleltennacsec jata njan quetlhencap ma'a. 16 Quetse ncaimelhcac manjeluetecjec jata quetlhencap, coca alhaiec jata jeluetecjac mocjom— lhta aptac apquellano Jesus apqueltamesaicamoc. 17 Ca apquelpacmetquesacpo lhta moc apancawe apqueltamesaicamoc ma'a, lhta aptancoc: —¿Se lha aplheno nac Jesus que? 18 Aplhenquec lhec quetsec ncaimelhcac acnem mangeluetecjec jata ennenco'o m'a, coca alhaiec jata angeluetecjac mocjom ma'a. ¡Mangeliojoc actacja nac aplheianma! —lhta ptancoc ma'a. 19 Apiawe lhta Jesus apquenmajai'a elelmalhnama m'a, lhta aptac apquellano m'a: — Asqueleltennasquec lhec quetsec ncaimelhcac manjeluetecjec jata quetlhencap, alhaie jatoca jeluetecjac mocjom, coca meliojoc quetlhencap. 20 Jawe ngiapac anque quetlhencap ncolliepuamancoc jata, ncacsec jata njan apiapcalhema, coca enenlhet anac meliamolhma ncolpaijecja ta mota apualho'oc, alhaie jatoca ncolpaijecjac na apualho'oc quetlhencap ma'a. 21 Nnawe nqueluana apmajai'a la etiemoc atca au'alhoc, asque ncotnejec, coca netamen apteiacmo la atca m'a, ncopaijecjac au'alhoc ma'a. 22 Nnawec na quetlhencap, nqueliepuamenquec colhuawe nac, coca jeluetacjo ta mocjom ncolpaijecjac jata apualho'oc, mamma ta ncomasquecsec alpaijacjo ta apualho'oc ma'a. 23 Jata apuo'o ta m'a apto Apquenmasma ncomascoc jata jelelmalhnenca co'o, jatoca m'a elelmalhnama Apiapom aquieplomo asuesai'a, ellancoc jata lhamacjo caselhaja m'a, jawe ngiapac anquec ma'a. 24 Melelmalhnecama mocjom quetlhencap Engiapom Neten aquieplomo asuesai'a nac, elelmalhnama toca, ncolhe ta allanco m'a, awanjec jata njan ncotnec alpaijecja apualho'oc quetlhencap ma'a. 25 Asietcasque co'o mota aptemacja Apiapom, coca ncotnenwomoc jata alhnacjo nquec asquetlhecmoscama nac, molhenec jata mocjom asietquescama nac. 26 Molelmalhnescasanquec jata njan mocjom quetlhencap Apiapom, elelmalhnama ta apancawec quetlhencap ma'a aquieplomo asuesai'a nac. 27 Apquellamelacmec Apiapom quetlhencap ncanec jellamelaiacmec na quetlhencap, meliascacmoc na apto lhta jeiapascama. 28 Ca asquempai'a co'o m'a apnacja lhta Apiapom, asuai'o jenque'e nalhepop anac, ataqjoc jatoca colhuawe nac apnacja m'a — lhta aptac Jesus. 29 Coca lhta aptancoc apquellano apqueltamesaicamoc: — ¡Colhua nac nelliawec aptacja nac apaioma lheiap, melhe nac apietquescama! 30 Mancaimelhcac angelelmalhnecjo cacpota elpeiwesecjac lheiap, apiawec lhamacjo caselha lheiap ca ncanec mongeliascamec lheiap apto Engiapom Neten apcapascama—lhta aptancoc. 31 Coca lhta aptac mocjom Jesus apquellano: —Iee, ma nlho jeliascacmoc niecje. 32 Jawe ngiapac anquec nwa'ac colhuawe nac engiengiancoc jata quetlhencap, engielhpaqnecja ta njan, jeliengiecjac jata elhepquennenga, coca molhec jata elhepque, Apiapom jatoca alhelhma m'a. 33 Ncowac jata aquientalhnema, coca mellaga ncoie' ncanec co'o mota asiepjonwacme mocjom jata emanie nac nesa aquientalhnema ta. Manjeliengiecja nquec na jelpasmecja co'o cacpota eluetac jata metca altaicama apualho'oc quetlhencap—lhta aptac Jesus.
1Engiapom Neten Apualhoc
Capítulo 17

Apquenmalhnesquescama Jesus apqueltamesaicmoc
1 Ca apeneso lhta apquelpacmetquescama apqueltamesaicamoc Jesus ma'a, apcammelho lhta neten, lhta aptac: —Apiapom, nwacmec acnem colhuawe nac cacpota eluetasquesec jata lhamacjo enenlhet'awoc apmopuana apquetca, etnec jata njan apquetca apqueluetasquescama lhamacjo enenlhet'awoc actemacja apmopuana lheiap. 2 Lheiap apcaicamoc apientalhnema apquetca tacjaplhet'oc aplhamacjo enenlhet'awoc cacpota ellancoc aliennactema apnengio'oc mancotnenwaianlha nnelha apquellelto lhta apquellaicamoc lheiap cacpota eltacmelquesquesec ma'a apquetca nac. 3 Etlhewancoc jata aliennactema apnengio'oc aniem'o apqueliecpelcanweiam lheiap, apto lhema apjapac acnema apmopuana, apqueliecpelcanweiam na Jesucristo apto lhta apcapascama lheiap. 4 Asqueluetascasquec acnema apmopuana lheiap jenque'e napaqtawec enenlhet'awoc, aspenesquec na apquelto lhta alanac lheiap. 5 Apiapom, jeiamoc asmopuana aquiawai'a ca aquietnemo lhta co'o tep nac na nec metquelha caselha lhma nquec jam, asnemo lhta njan lhemec lheiap jam. 6 Asqueleltennasquec co'o apuesai'a lheiap apquellelto jellaicamoc alhta cacpota altacmelquesquesec, lheiap enenlhet apanco'oc, apquelleliajacjawec apaioma lheiap na m'a. 7 8 Apquelliawec na asquetlhecmoscamo nac aniem'o lheiap, apquenmaianquec na tacja m'a, man na eliasqueiacmoc apto lheiap jeiapascama. 9 Ca asquelmalhnescaso nac elpasmoc lheiap apquellelto lhta jellaicamoc cacpota altacmelquesquesec, ncanec lheiap enenlhet apanco'oc ma'a, molmalhnescasacjo m'a meliamolhma nac enenlhet. 10 Aplhamacjo apquellelto lhta jellaicamoc apqueleltemo altacmelquesquesec, enenlhet apanco'oc lheiap ma'a, apqueluetascasquec asientalhnemo apiesecsec enenlhet'awoc jenque'e nalhepop anac. 11 Apiapom apno m'a neten, molhec jata mocjom jenque'e nalhepop anac, angiantac jata jam apnacja nac lheiap, coca engiacjancocjac jata jenque'e jelieplecama nac, asqueltawec enmeiwoc aquieplomo apmopuana nac lheiap cacpota njeclhe ncotnec apquelpasmommacpo, ca ctonac ennenco'o. 12 Necsa asnema jenque'e apiesecsec anac, asquenmeiauquec mota aquieplomo asiennactema lheiap alhta jeiaicamoc, mamma lhema aplheneiam la'a, wanlha coca lhema apjapac aplhenencasemmacpo apanque, ca actemo nac nema alientemonquescamo aclhenammalhca Engiapom Neten apaioma. 13 Apiapom, angiacjac jata apnacja nac lheiap, necsa asnema apiesecsec anac jenque'e nalhepop anac alhenque mota lhamacjo actemacja caselha cacpota ncolpaijecjac apualho'oc aquiawai'a nquec jelieplecama nac, ca acto nac na co'o acpaijecja mota ewalhoc. 14 15 16 Asquetlhecmoscanquec jelieplacama nac apaioma lheiap, apqueltacnewacquec coca enenlhet meliamolhma nac ncanec po'oc aptema aptancoc jenque'e jelieplecama nac, co'o njan moc actema astemacja. Jawe asqueltemo eliantenwatac lheiap acpelapquescama tacjalhet lhepop anac jenque'e necsa acuai'a aquientalhnema la'a, asqueltawec coca eltacmelquesec lheiap. 17 Etnesquesamoc apquelpoccanma lheiap aniem'o apaioma acto jawe ngiapac anquec. 18 Asquellapasquec co'o apcacjanquelha la enenlhet cacpota etlhenec apuesai'a lheiap, ca aptemacja nac lheiap jeiapascamo nac jenque'e. 19 Aspocquenammalhco nac cacpota atlhecmosancoc jelieplecama lheiap apaioma acto actacmanma nquec, cacpota etnancoc na apquellasennaicama lheiap. 20 Asqueltawec na elpasmoc po'oc enenlhet anac manjeliascamec jata apquelleng'o la ania'a apquetlheianma jelieplecama nac. 21 Apiapom, asqueltawec elpasmacpojo ca ctonac ennenco'o malha enlhema, netamen jengelpasmecjac jata njan ennenco'o m'a cacpota meliascamec jata enenlhet apto lheiap jeiapascama. 22 Asquellanquec co'o jelieplecama nac asiennactema ca jeiaicamo lhta lheiap cacpota elpasmecjac ma'a, ca acto nac ennenco'o. 23 Asquelpasmacjec co'o m'a, lheiap na apto jepasmecja co'o, asqueltawec na etnancoc apquelpasmommacpo m'a cacpota eluetac enenlhet'awoc aquiawai'a apquellamelaiam lheiap ma'a, nnawec na jeiamelaiam co'o, eliamwomjoc jata njan apto jeiapascama lheiap. 24 Apiapom, lheiap alhta jellaicamoc cacpota altacmelquesec jelieplecama nac, asqueltawec na engiacjenwomoc asnacjelha ta co'o cacpota eluetac asmopuana jeiaianco lhta tep nac nanec lheiap, metquelha caselha lhma nquec jam, jeiaianquec nac nanec lheiap ma'a aniem'o jeiamelaiam. 25 Apiapom, asiawec co'o lheiap apto apeiwomo, coca enenlhet meliamolhma nac melliojoc lheiap ma'a, coca jelieplecama nac apquelliawec apto lheiap jeiapascama. 26 Asquetlhecmosquec co'o mota aptemacja lheiap, alhenquesec jata mocjom asquetlhecmoscama cacpota etlhenquesec na jelpasmecja co'o m'a, cacpota njan ellamelacpoc apiesecsec ma'a, malha acto nac ennenco'o nellamelammalhco nac—lhta aptac Jesus apquenmalhno Apiapom.
Capítulo 18

Judas apselhnanoncoma Jesus
1 Netamen apenescama lhta apacmetquescama Engiapom Neten Jesus ma'a, apjalhtepelhqueto lhta iemmen atamnec ma'a acuesai'a Cedron, apmeiacjo lhta aniep acuesai'a Olivos, apquetlhelhma'ac alhta moclhem'a apqueltamesaicamoc . 2 3 Apuacje lhta njan Judas ma'a, apquetlhelhma'ac alhta aptancoc quempocjacmec soldados romanos cacpota njan apquellanecama Engiapom Neten apnemacja, apquetsopme lhta njan pelletau aluenactema, talha alhancoc apquellaponmatquesaicamoc apmania ie cacpota njan iamet nau'a talha, apquellapascama lhtoca m'a apquelemjama apmania ie sacerdotes cacpota njan fariseos. Judas alhta aplacloiam ma'a cacpota eselhnanac Jesus, ncanec apiawe lhta njan iocjalhma nac ma'a, apcacnecjelha lhta mota m'a. 4 Necsa apqueluetai'a lhta Jesus apquetlheiam ma'a, apquellanielhanco lhta m'a, apiawec lhta njan apquenmac'acja etnancoc, lhta aptac apquelelmalhnenca: — ¿Se lha enenlhet apquelquetamo ie, je? —lhta ptac ma'a. 5 — Jesus co Nazaret nelquetamac —lhta aptancoc apquellatemmonca. — Co'o m'a —lhta ptac Jesus. 6 6 Mpelapcasque lhta apquelletsecjantamo nalhepop enenlhet'awoc ma'a. 7 Ca apquelelmalhnenca lhta mocjom Jesus ma'a, lhta aptac: — ¿Se lha enenlhet apquelquetamo ie, je?— —Jesus co Nazaret —lhta aptancoc mocjom apquellatemmonca m'a. 8 Coca lhta aptac mocjom Jesus: —Asqueleltennasquec lhaiec, co'o jenque'e, jata jelpacjeto ta co'o, ellanco ta eltaqjoc asqueltamesaicamoc anac— lhta aptac. 9 Nwacme lhta aptemo lhta apaioma Jesus, lhta aptac: —Apiapom, mamma lhema aplheneiam apquellelto lhta jellaicamoc lheiap—lhta aptemac. 10 Ca aplecuacjo lhta pelettau acuenactema apancoc Simon Pedro, apiaqtemencasque lhta aquiennacja apaicoc Malco, esclavo apancoc alhtoca m'a apquemjama apmanie sacerdote. 11 Coca lhta ptac Jesus apcano Pedro: — Engiaqlhencasecja alhancoc pelettau apancoc anac, Apiapom apqueltawec ncotnec aquientalhnema nac, ascasecjawec co'o apmac'acja etnec ma'a—lhta aptac. 12 Colhuawe lhta apquelpatjetac Jesus soldados cacpota njan apquellanecama Engiapom Neten apnemacja', ca apquennacteto njan apmeio'oc. 13 Apqueliantemacje lhta apnacja Anas, Caifas apepiata, aptemo lhta njan apquemjama apmanie sacerdotes iantelhcapa lhta m'a. 14 Apqueleltennascanque lhta mota Caifas apquelemjama apmania ie judios, ntasec engietsepoc lhema enenlhet aquiaqmecja apquellawacja judios. 15 Apquelieplacje lhta njan Simon Pedro m'a cacpota njan po'oc apqueltamescama Jesus, ca apquelentalhno lhta conne acjalhtemommalhca soldados apqueliantemecja Jesus ma'a, aptalhne lhta njan apqueltamescama lhta, ncanec apiecpelquemelha lhta apquemjama apmanie sacerdote m'a. 16 Aquieto atong alhtoca apquenenwa'ac Pedro m'a. Ca apuet'o lhta aplhelhma m'a, apacmetqueso lhta nqueluana alanecama atong ncancoc eclhec ma'a. 17 Ca almalhnenca lhta Pedro m'a, lhta ntac: — ¿Jawe nlho njan lheiap apto lhema apqueltamescama Jesus, je?—lhta ntac. — Jawe— lhta aptac apcatemonca Pedro. 18 Ca aptetesco'o lhta necja talha apqueluatnecamoc apquellanecama Engiapom Neten apnemacja cacpota njan apquellasennaicama Anas, ncanec semange lhta m'a. 19 Netamen apquemjama apmanie sacerdotes Anas apquelmalhnenca lhta Jesus ma'a actemacja apquetlhecmoscama mota, cacpota njan aptaiancolha apquelieplecama, 20 21 apcatemmoma lhtoca Jesus ma'a, lhta ptac: —Se lha ntac jelmalhnenca nac, elelmalhnenwacja coca enenlhet'awoc apcacnecjelha nac, cacpota njan Engiapom Neten apnemacja nac, coca apquelliawec ma'a se lha asquetlhecmoscama ie, jawe asielhammalhco asquetlhecmoscama nac, napaqtawec coca astemac ma'a—lhta aptac Jesus. 22 Colhuawe lhta aptecpongac apmalhempenec lhema apquellanecama atong, lhta aptac apcano: — Jawe nentemacja angatemmoma apquemjama apmanie' sacerdotes aptacja nac—lhta aptac. 23 Coca lhta ptac Jesus: — ¿Se lha ntac jetecpomo nac que, mai'e ncolatsecama aspaioma? Actacmelocja lhquec aspaioma— lhta aptac. 24 Ca apquelto lhta ncolhec acnacteto Anas apmeio'oc Jesus, ncolhec na aquiantemacjo apnacja apquemjama apmanie sacerdotes Caifas. 25 Njeclhe lhtoca apno Pedro m'a necja talha, ca acno lhta anmalhnenca m'a: — ¿Lheiap anlho njan apto lhema apqueltamescama Jesus, je?—lhta aptac. —Ma, jawe co'o m'a —lhta ptac mocjom Pedro. 26 Netamen lhema apquennencasecama Anas, apaiomo lhema lhta enenlhet apiaqtemenquescama lhta apaicoc Pedro m'a, lhta ptac apcano: — Malha nac asuet'o lhta lheiap aniep apatjetacpelha lhta Jesus—lhta aptac. 27 Coca aplhenque lhta mocjom Pedro meiecpelquema Jesus ma'a, ca acpaiwo lhta njan tape'e m'a.
Nema aquientemecja Jesus apnacja Pilato
28 Apquelentepcasque lhta Jesus apquelemjama apmaniaie judios apnemacja Caifas, ca apqueliantemacjo lhta apnemacja co Roma apuesque apuesai'a Pilato, ma lhtoca elentalhnac conne m'a, ncanec ncanquetque lhta atsai'acja m'a cacpota ncowac acnem actacmelaicama lhma ancoc pascua, ma lhta nconmac'ac elpaisenquesec apualho'oc napaqtec Engiapom Neten ma'a, cacpota mancollapuanquec quelha elpasenwomoc nentawecja actacmelaicama lhma nac ma'a. 29 Lhta ncanec Pilato apiepjonwactamo iocjalhma, lhta ptac apquellano: —¿Se lha ntac apqueliantemanto nac enenlhet anac, se lha ncolatsecama apquelanei'o ie, je?—lhta aptac. 30 Coca lhta aptancoc apquellatemmonca m'a: — Meijamolhma enenlhet anac—lhta aptancoc. 31 Coca lhta aptac Pilato apquellano m'a: — Eliantemecja apancawec quetlhencap, etnamoc jenganemacja apanco'oc apancawe nac—lhta aptac. Coca lhta aptancoc mocjom apquellemjama apmaniaie judios: — Quetlhencap romanos manjengellaianco angaqjec emmo'oc— lhta aptancoc. 32 Nietemawec lhta njan actemacja lhta aplheianma Jesus engietsepoc apqueltemacja romanos 1 . 33 Ca aptalhnacjo lhta mocjom Pilato au'alhoc pa'at, apcawenca lhta Jesus ma'a, lhna aptemac: —¿Lheiap anlho niecje apiau'acja apuesque judios apanco'oc, je?—lhna aptemac. 34 Lhna ptemac mocjom Jesus: —¿Se lha altennascama lheiap maie, nlho ca la aplheianma panquec lheiap?— lhna ptemac. 35 Ca apcatemmoianca lhnac mocjom Pilato: — Jawe judio co'o, lheiap apaiomo lhema nac cacpota njan apquelemjama apmaniaie sacerdotes apqueliantementa jenque'e. ¿Se lha apquelanei'o ncolatsecama lheiap que?—lhna aptemac. 36 Coca lhna aptemac mocjom Jesus: — Jai', apiau'acja apuesque co'o, coca jawe aptonac jenque'e nalhepop anac, co lhtema nac astema apuesque jenque'e, apquelua'a niecje quempocjacme ejencoc cacpota jeluonquesec tep apiesecsec anac apquelemjama apmaniaie judios—lhta aptac. 37 Coca lhna aptemac mocjom Pilato apcanemo: — Ia'aaa, tocja nac quelha apiau'acja apuesque lheiap—lhna aptemac. Coca lhna aptemac Jesus: — Lheiap aplhenac ma'a, co'o coca asua'ac cacpota atlhecmocsec acto jawe ngiapac, jellailhawec na enenlhet'awoc aptengiaicamo mota acto jawe ngiapac anque—lhna aptemac. 38 Ca apquelmalhneianca lhnac mocjom Pilato: —¿Se lha acuesai'a jawe ngiapac anquec que, je?—lhna aptemac. Ca aptepacjo lhta mocjom Pilato au'alhoc pa'at, lhta aptac apquellano judios: —Mamma lhquec aptemacja ncolatsecama enenlhet lhec ja'e, 39 coca nietnec apqueltemacja quetlhencap apquelpaqnemecja lhema apcaclhencasemmap la'a necsa actacmelaicama lhma nac pascua. ¿Apquelleltawe nlho apacnemecja enenlhet anac apiau'acja apuesque apanco'oc judios, je?— lhta aptac. 40 Apquelluenema lhta enenlhet'awoc ma'a, lhta aptancoc: — Ma', jawe jam, Barrabas coca epacnemecja'—lhta ptancoc enenlhet'awoc ma'a. Coca Barrabas enenlhet meijamolhma apmopuana ennapacpo lhta ma'a.
1Los Romanos acostumbraban matar por medio de la crucificcion.
Capítulo 19

Apquelemjama apmaniaie judios apquelleltema ematong Jesus
1 Ca apquelto lhnac apuesque Pilato ncolhec aliaqpelhquetanca Jesus, 2 ca apquennelhpoianco lhnac iamet actengoc atco'oc acnema am'oc soldados romanos ma'a, apquelatquescasecjo lhnac apqatec Jesus ma'a, apquellaclasecjo lhnac na apcaqlammap apuenactema apaiseiam apielhuasema m'a, 3 ca apquelluannaianca lhnac na m'a, lhna aptaiancoc: — ¡Aptase' noca niecje apiau'acja apuesque apanco'oc judios!— lhna aptaiancoc. Apqueltecpoianca lhnac na apmalhempenec ma'a. 4 Ca aptepacjo lhta mocjom Pilato conne pa'at aquiawai'a m'a, lhta aptac apquellano apquellelto apqueliantemaiam Jesus: —Mota'ac co'o apquelanai'a ncolatsecama enenlhet lhec ja'e—lhta aptac Pilato. 5 Ca apquelto lhta ncolhec aquiantemantamo Jesus napaqtawec ma'a, njeclhe lhta quetama nema acnelhpoma apqatec cacpota njan apielhuasema apcaqlammap, lhta ptac Pilato apquellano enenlhet: —Ca enenlhet anac jenque'e—lhta aptac. 6 Necsa apqueluetai'a lhta Jesus ma'a apquelemjama apmaniaie sacerdotes cacpota njan apquellanecama Engiapom Neten apnemacja, colhuawec anque lhta apquelelpalhnema m'a apqueluenenca njan, lhta aptancoc: —¡Eliaqlha apmeioc apmancoc neten iamet actennescama!— lhta aptancoc. Coca lhta ptac Pilato apquellano: —Ma', mamma apselhnanemmap jenque'e enenlhet anac, ia', ellanjo ta apancawe' quetlhencap—lhta ptac Pilato. 7 Coca apquellatemmoma lhta apquelemjama apmaniaie judios, lhta aptancoc: —Nietnec aclheianma jenganemacja enganco'oc ennenco'o ntasec ematong ncanec aplhenacpe lhta apanque apto Engiapom Neten apquetca jam—lhta aptancoc. 8 Awanjec anque lhta apcai'a Pilato apleng'o m'a, 9 ca apquelto lhta ncolhec actalhnesacjo mocjom conne pa'at Jesus ma'a, ca apquenmalhneianca lhnac mocjom, lhnac aptemac: —¿Co la apqueniem'acja lheiap, je?— Mang noca engiatemmoicama Jesus ma'a. 10 Lhna aptemac mocjom Pilato apcanemo Jesus ma'a: —¡Jeiatemmoma nojo! Nietnec co asientalhnemo apacnemecjac lheiap, nlho ca la njan ncolhec aliaqlho apmeioc apmancoc neten iamet actennescama—lhna aptemac. 11 Ca apcatemmoianca lhnac Jesus ma'a, lhna aptemac: —Mamma apientalhnemo lheiap elana actacja aplheianma, coca aclhamacjo acmac'acja nac ncotnec, Engiapom Neten apqueltemo. Coca apto lhta jeianconwai'a lheiap, coca apto neten apanquec meijamolhma m'a, melhnoc lheiap—lhna aptemac. 12 Netamen apqueliaicama lhnac Pilato cacpota epatnemecjac Jesus ma'a, coca nianwacmec alhta apqueliascama apatno'oc enenlhet'awoc ma'a, lhta aptancoc: —Mepatnemecja nquec Jesus, awanje ta ncotnec aploma apiau'acja apuesque Roma, ncanec Jesus eleccasecjac jata aptema apiau'acja apuesque m'a, cacpota eniammelhecjac ma'a—lhta aptancoc. 13 Apleng'a lhta Pilato m'a, ca apquelto ncolhec actepqueso conne pa'at aquiawai'a Jesus, ca apcananto lhta neten metaimong alanemmalhca acuesai'a lhta Gabata apquelleltema Hebreo apaioma, aptemacja lhta mota apquenmama tacja enenlhet apcailhemelha, apquelpacmeiasma njan ma'a, ca apno lhta m'a, 14 malha lhta njan catelho m'a, lhema acnem alhta njan ncaimelhcac acuaianlha pascua, lhta ptac apquellano judios: — ¡Ca apiau'acja apuesque apanco'oc anac quetlhencap jenque'e!—lhta aptac. 15 Coca apquelelpalhema lhta enenlhet'awoc ma'a, lhta aptancoc: —¡Etepques, etepques jam, eliaqlha apmeio'oc apmancoc neten iamet atennescama!—lhta aptancoc. Coca lhta aptac mocjom Pilato: —¿Apqueleltawe nlho anwaqjec apiau'acja apuesque apanco'oc anac quetlhencap, je?— Coca lhta aptancoc apquelemjama apmaniaie sacerdotes ma'a apquellatemmonca: —Jawe apiau'acja apuesque engancoc enenlhet anac jam, wanlha lhema apjapac apiau'acja puesque engancoc anac co Roma— lhta aptancoc ma'a. 16 Ca apquellanco lhta Pilato m'a cacpota ellaqjec neten iamet actennescama, apqueliantemacjo lhta njan Jesus ma'a.
Nema aliaqlhacjema apmeio'oc apmancoc Jesus neten iamet actennescama
17 Aplhenque lhta Jesus ma'a aquieplomo iamet actennescama apatama acuacjo iocjalhma acuesai'a Golgota, hebreo apqueltema coca acnaiancolha ientepac nema apqatcoc. 18 Ca apqueliaqlhanco lhta apmeio'oc apmancoc ma'a, apquelelhno neten iamet actennescama m'a, cacpota njan apcanet enenlhet aisecsec alhta apielhnac Jesus ma'a. 19 20 Apqueltawe lhta Pilato ncolhec alcaso lhema iamet acpaijema alcasemmalhca neten iamet actennescama aquieto tacjaplhet Jesus, janetolhem'a actemacja nempaioma, hebreo, latin, cacpota njan griego, lhta ntac jeng: Jesus co Nazaret apiau'acja apuesque apanco'oc judios, lhta ntemac actalhesammalhca m'a. Ma lhta ntec enenlhet judios apquelietsatenque lhta njan alqama m'a necsa apquetlhengama m'a ncanec nengaqte lhta apiau'acja temma. 21 Necsa apenescama lhta aptalhescama Pilato iamet necja acpaijema, lhta aptancoc apquelemjama apmaniaie sacerdotes: —Metalhes lheiap apiau'acja apuesque apanco'oc judios, coca elques apqueltammacpo apanquec lhec apuesque apiau'acja judios— lhta aptancoc. 22 Coca lhta ptac Pilato: —Mma', astalhesque', momac'ac aiaqmoncasecjac mo'oc—lhta aptac. 23 Apquelpenesque lhta soldados romanos apqueliaqlhaclhema apmeio'oc apmancoc Jesus ma'a, ca apquenmanco lhta aptalhnema, apquennasquesacpo cuatro napocja'a, apquennemalhecpe lhta m'a, ca apquenmanco lhta njan apcaqlammap, ma lhtoca ennasquesacpoc ma'a ncanec mamma lhta nema alietnactema. 24 Lhta aptancoc apquelpacmetquesacpo moc apancawec ma'a: —Mongeliaptanque ta jenque'e, ntase ta annactewasancoc nennactewascama nemmapseiwe' cacpota apto apnaqsepma, esacjac ma'a—lhta aptancoc ma'a. Nwacme lhta acnem actemacja lhnac na nec aclheianma Engiapom Neten apaioma waccajac, lhnac nane ntemac: «Apquennasquesacpec astalhnema, apnaqtewasenquec na nennactewascama nenmapseiwe' ascaqlammalhca» 1 lhna ntemac. 25 Necja iamet actennescama lhta nquenmama Jesus anquen, cacpota njan nialheng acuesai'a Maria apto aptawa m'a Cleofas, cacpota njan Maria Magdalena. 26 Ca apuet'o lhta nquen Jesus ma'a, aclhelhma lhema apqueltamescama apcamelaianlha, lhta ptac apcano: —Me, jata ncotnecjac atca jam—lhta aptac. 27 Netamen lhta ptac na mocjom apcano apqueltamescama m'a: —iaa, jata etnecjac nquen lheiap jam—lhta aptac Netamen, apiantemacjo lhta apnemacja m'a.
Apquetsepma Jesus
28 Apiawe lhta Jesus apenescama apmacmecama Engiapom Neten apqueltemo etnec ma'a, lhta ptac: —Cnem jeiaqjac—lhta aptac Nwai'ac acnem actemacja lhnac nanec aclheianma Engiapom Neten apaioma actalhesammalhca. 29 30 Ca apquellanenco lhta ieteiepa acmoc iamet nau'a acuenactema m'a, apiasqueso lhta conne najaicoc iama anmen aimenec acmasca jentacmetquescama, apqueltelhnasqueso lhta njan apatong Jesus ma'a, ca apetseso, lhta ptac: —Aspenesque asmacmecama—lhta aptac. Ca aquiaqneno lhta apqatec ma'a, apquetsepo njan. 31 Lhema acnem alhta ncaimelhcac cacpota ncowac acnem sabado, actacmelaicama lhma pascua m'a, apquenmeiacje lhta apnacja Pilato apquelemjama apmaniaie judios, apquelleltemo lhnac ncolhec alentaso apelhcapco'oc apcanetolhem'a enenlhet cacpota eletsepoc colhuawec anquec ma'a, elleljatsoscacjac na apjapawoc cacpota meluetiep enenlhet necsa actacmelaicama lhma m'a. 32 Ca apquenmeiacjo lhta soldados ma'a, apquelentascacjo apelhcapcoc apcanet enenlhet nema aleclhanma lhemec neten iamet actennescama Jesus, 33 coca ma lhta alentaso apelhcapcoc Jesus ncanec apquetsepque lhta m'a. 34 Lhema soldado lhta apquelieplhac jewa aquiawai'a napocja Jesus ma'a, acteiapuacmo lhta nepquetama mo'oc napocja, colhuawe lhta ntepac ema apancoc cacpota njan iemmen aquiepetcai'a. 35 Apto lhta apuetai'a m'a actemacja acuetammalhca m'a jawe ngiapac anquec na aptemac aplheianma, metca apmopuana ania'a, aplheianmac ma'a cacpota njan meliascamec quetlhencap. 36 Coca actemacja lhta acuetammalhca caselha m'a ntemenquec aclheianmo lhnac nanec Engiapom Neten apaioma ncotnec jata m'a, lhna ntemac: «Mancolhe ta alentaso apelhcapcoc ma'a» 2 lhna ntemac. 37 Ca ntemac na Engiapom Neten apaioma: «Ncolhec jata alanenca enenlhet aquiaqlhammalhca lhta napocja acuacmo apteiapuacmo mo'oc napocja nepquetama» 3 lhna ntemac.
Nema aclhenquescama Jesus apjapac metaimong alhua
38 Ca apmeiecjo lhnac Jose co Arimatea apnacja Pilato m'a, apquenmalhnenwecjo lhnac Jesus apjapac cacpota esacjac ma'a. Apcasecjai'awec nac Pilato m'a. Apielhammacpec nac Jose apiepleianca Jesus, ncanec aplemjama apmania ie judio lhnac apquellai'ac ma'a. 39 Aplhelhma lhnac na Nicodemo m'a, apsoiacmo lhnac na treinta quilos acmases aimes aimenec anammalhca acuesai'a aloe cacpota njan mirra. Coca Nicodemo apmaianco lhnac pelhasep apnacja Jesus apquelpacmetquesammacpo. 40 Apquenmaianquec nac na Jesus apjapac ma'a, apquelpelhquetmo ietamopai'a napocja apmennawe, ca apquellelhpacjaianca lhnac na acmases aimes ma'a, apqueltemacja mota judios ellanjoc quenmascoia m'a. 41 Aquietemelha lhta apquetsepmacja Jesus ma'a nietnenque lhta lhienep acjaiam ca njan aniep atcoc ma'a, cacpota njan lhema metaimong alhua alhnancoc metca nema acmaicama. 42 Ca apquellaclhenquesquecjelha lhnac Jesus apjapac ma'a, ncanec nengaqtec ma'a, quetse lhta njan ncaimelhcac acnem sabado neniamposammalhquelha apqueltemacja lhta judios.
1Salmos 22:18
2Salmos 34:20 /Exodo 12:46 /Numeros 9:12
3Zacarias 12:10
Capítulo 20

Aptemesquesecja apjalhnancoc Engiapom Neten Jesus
1 Sosecjec anquec na ntemac domingo, mocjom nac apquelienactesecama lhma m'a, acmeiecjo lhnac Maria Magdalena nemacja aclhenquescaiacmo Jesus apjapac metaimong alhua. Mpelapquescanquec nac acuetai'a nemo actesquescamo atong metaimong alhua. 2 Ca atquecjo apnacja Simon Pedro cacpota njan po'oc apqueltamescama apcamelaianlha lhta Jesus, lhta ntac jeng: —Nnec quelha actalhnenwacmo apietnacja apjapac apuesque, nnec acsacjo, mongeliojoc na acnacja acpeccanwanlha'—lhta ntac. 3 4 Ca apqueletcacjo lhta aquieto metaimong alhua Pedro cacpota njan po'oc apqueltamescama Jesus, amose lhta apqueniema po'oc, ma lhta elhnoc Pedro apmanie lhta apuacjac ma'a. 5 Coca ma lhta etalhnac conne metaimong alhua m'a, wanlha lhta apquelteionnenca m'a, ca apuet'o lhta wanlha ietamopai'a apelhquetemmap alhta Jesus. 6 Ca apuo'o lhta njan Simon Pedro m'a, coca aptalhno lhta conne metaimong alhua, apuet'o njan ietamopai'a napocja'a nema acpelhquetema, 7 apuet'o njan ietamopai'a napocja'a nema acpelhquetquescama lhta apqatec Jesus, nema actacmelquescamo njan aliaqsasecja aquieto necja apietnemacja lhta. 8 Ca aptalhno njan po'oc apqueltamescama Jesus conne metaimong alhua, apuet'o lhta njan, mei'ascacmo njan. 9 Coca ma lhta elianweiacmoc actemacja aclhenammalhco lhta mota Engiapom Neten apaioma actemacja aplhennammap Jesus, etnecjac mocjom apjalhnancoc apiesecsec apquenmasquenwaiacmo. 10 Netamen ma'a, apqueltaqjacjo lhta apcacjaiancolha.
Jesus apuetasquesammap Maria Magdalena
11 Nnenquec nac Maria aquieto necja metaimong alhua, mang nac nquescamac acuenemo m'a, ca alteionneianca lhnac conne altemo ncotac ma'a. 12 Ca acuetai'o lhnac apcanet enenlhet neten apquenmopai'a lhnac apquelentalhnema m'a. Apcacjaianquec nac nemacja acpeccanweiacmo apjapac Jesus ma'a, lhema lhnac apnemac aquieto nepuaje, po'oc nac na aquieto nepmancoc. 13 Lhna aptaiancoc apquellanemo: —Nqueluana ¿Se lha ntac acueno nac que? —lhta ptancoc. Ca atemoianca lhnac ma'a: — Nnec acuo'o apjapac apuesque ejencoc, moijoc acnacja acpeccanwanlha'—lhna ntemac. 14 Ca acpencammalhco lhnac acmajai'a ncotaqjecjac ma'a, acuetai'o lhnac lhema enenlhet apquenmaianca m'a, Jesus noca niecje njan ma'a, coca mang nac ncoiecpelquemac ma'a. 15 Lhna aptemac apcanemo: —Nqueluana ¿Se lha ntac acueno nac que, se lha enenlhet atamo nac que?—lhna aptemac ma'a. Coca lhna ntemac atemoianca: —Lheiap quelha apsecjac apuesque ejencoc apjapac, jeltennes no co la apeccanweianlha' cacpota awacjac co'o —lhna ntemac ma'a. Man na ncoijamoc mocjom Jesus noca njan niecje m'a, lhna ncanemac enenlhet aptacmelquescama m'a lhienep acjaiam. 1 16 Netamen lhnac aptemac Jesus apcanemo m'a: —Maria—lhna aptemac. Ntacmelquescamawec nac alanei'o Maria, ca aclheianwecjo lhnac au'alhoc Jesus ma'a, lhna ntemac: —¡Jengetlhecmoscama!— lhna ntemac. Ca acmanweiacmo lhnac na m'a, 17 coca Jesus lhna aptemac apcanemo: —Mma', manjemanwa', mowacjac mocjom co'o apnacja Tata. Congiacja coca coleltennascacja asqueltamesaicamoc alhta, angiacjac jata apnacja Tata, ca Apiapma'ac na m'a, Engiapom Neten apanco'oc, Engiapom Neten ejencoc—lhna aptemac. 18 Ca acmeientamo lhnac Maria Magdalena, aleltennascacjo apqueltamesaicamoc acuetai'o apuesque m'a, nqueleltennasema lhta njan lhamacjo actemacja acpacmetquesaicama Jesus ma'a.
Jesus apuetasquesammap apqueltamesaicamoc
19 Domingo pelhasep alhta m'a, apcacnacjo lhta apqueltamesaicamoc conne pa'at, apquellapacjawe lhta atong ncanec apquelemjama apmania ie judios alhta apquellac'ac ma'a. Mpelacasque lhta aptalhnenwo'o Jesus ma'a, apquenenwacmo apiesecsec apcacnacjelha, lhta ptac apquellano: —¡Metca altaicama apualho'oc quetlhencap!—lhta aptac. 20 Apqueluetascasque lhta esquepoc apmeioc cacpota njan napocja apqueltamesaicamoc ma'a, nquelpaijacje lhta apualho'oc apqueluetacjo mocjom apuesque m'a. 21 Lhta ptac mocjom Jesus apquellano: — ¡Metca altaicama apualho'oc quetlhencap! Allapacsec jata quetlhencap ca ctonac co'o jeiapascama Apiapom—lhta aptac. 22 Ca apqueluatepnapo lhta tacjaplhet'awoc ma'a, lhta ptac: —Apquetlhewanquec Engiapom Neten Apualhoc colhuawe nac quetlhencap, 23 apquenmasquescaso la quetlhencap caselha ncolatsecama apquelanesquescama po'oc, ncolhec jata njan anmasquescaso m'a, coca menmasquescaso la quetlhencap caselha ncolatsecama apquelanesquescama po'oc, mancolhec jata njan anmasquescaso m'a—lhta aptac.
Apuetai'a Tomas Jesus
24 Tomas apto lhta njan apqueltamescama Jesus, nema ltema lhta apcanet apalleiam, ma lhta elhnemac apiesecsec apquetlhelhma'ac aptalhnenwacjo lhta Jesus ma'a. 25 Alhaie lhtoca apuacjac ma'a, lhta ptac apquellano apquetlhelhma'ac: — ¡Nelluet'ac lhec ennenco'o apuesque! —lhta aptancoc ma'a —Ieeee, asiascacmec apquetlheno nac, coca asuet'o la esquepoc apmeioc cacpota njan napocja', asmanwacmo la m'a, netamen moi'ascamec jata co'o —lhta ptac Tomas. 26 Netamen ocho cnem alhta nieca'ac ma'a, apcacnacjo lhta mocjom apqueltamesaicamoc Jesus lhema conne pa'at, Tomas alhta njan colhua m'a, apquellapacjawe lhta atong, coca aptalhne lhta Jesus conne m'a, apquenenwacme lhta apiesecsec ma'a, lhta ptac apquellano: —¡Metca altaicama apualho'oc quetlhencap!—lhta aptac. 27 Coca lhta ptac apcano Jesus Tomas: —Elanjo no emeioc cacpota njan nejecja, emanwom no esquepoc ejencoc anac, meiasquem jeto'o ejalhnancoc mocjom—lhta aptac. 28 Lhta ptac Tomas: —¡Apuesque ejencoc anac lheiap, Engiapom Neten ejencoc najan!—lhta aptac. 29 Coca lhta ptac Jesus apcano: —Manjei'ascacmoc lheiap ncanec jeto'o nac, eletsewasoc jata enenlhet apquellelto manjeliasqueiam metca jeluetai'a nac— lhta aptac. 30 Ma lhta ntec caselha jempelapquescama apquelanai'a Jesus napaqtawec apqueltamesaicamoc ma'a, aclhamacja coca manconactalhesammalhcac waccajac anac, 31 coca caselha aquietno actalhesammalhca nac, cacpota njan meliascamec jata quetlhencap Jesus apto Cristo Engiapom Neten apquetca, jata nconiema' aliennactema apnengio'oc mancotnenwaianlha nnelha quetlhencap ma'a aniem'o apuesai'a m'a.
1Huerto
Capítulo 21

Jesus apuetasquesammap 7apqueltamesaicamoc
1 Mo'oc acnem alhta ntac ma'a, apuetasquesacpo mocjom Jesus apqueltamesaicamoc aquieto necja sanga Tiberias, aleltennasama ta njan ania'a actemacja lhta acuetammalhca m'a. 2 Apquelloca lhta Pedro, cacpota njan Tomas nema altema apcanet apalleiam, Natanael co Cana aquieto iocjalhma Galilea cacpota njan apquetcac Zebedeo, apqanet na mocjom ma'a apqueltamesaicamoc. 3 Lhta ptac Simon Pedro: —Quelasma asmac'ac atengia' —lhta ptac ma'a. —Ennenco ta njan angelieplacja'—lhta ptancoc ma'a. Apquelcanetuacje lhta lhema loma nemmen ma'a, ma lhtoca ennapencoc quelasma pelhasep alhta m'a. 4 Mmopacme lhta lhma' atsai'a m'a, ca apquenenwo'o lhta Jesus necja sanga, coca ma lhta eliecpelcac apqueltamesaicamoc ma'a. 5 Lhta ptac: —¿Apquennapenque i'e quelasma, je?—lhta ptac ma'a. —Mamma'—lhta ptancoc apquellatemmonca. 6 —Eliengiau no iama tetecco aquiennacja nac loma nemmen, jata ennapancoc quelasma m'a—lhta ptac apquellano Jesus. Apquellasecjawe lhta apqueltamesaicamoc ma'a, nlan'awec lhta quelasma m'a, ma lhta ncollapuanca'ac eljatsosancoc iama tetecco apancoc m'a. 7 Netamen apqueltamescama apcamelaianlha Jesus, lhta ptac apcano Pedro: —¡Apuesque Jesus ja'e! —lhta aptac. Apleng'a lhta Simon Pedro m'a, colhuawec anque lhta aptalhnacjac aptalhnema, apnelhtacjo njan nemmen cacpota emoc iemmen engiacjac necja sanga. 8 Aplhamacja lhtoca apcacjancocja conne loma nemmen ma'a, apqueliengiosocje lhta njan iama tetecco apanco'oc aclanei'o nquec quelasma, apquenmeiacjo necja sanga, malha 100 metro lhta neiawa m'a. 9 Necsa apqueluecja lhta neiawa sanga m'a, apqueluet'o lhta lhema quelasma tacjalhet talha cacpota njan lhema alena apquenammap. 10 Lhta ptac Jesus: —Jetsantenques aclhamacja quelasma colhua lhquec apquennapecamoc—lhta aptac. 11 Apcanetuacje lhta Simon Pedro loma nemmen ma'a, apiengioscacjo lhta iama tetecco apanco'oc apuescactamo lhta neiawa sanga, nlan'awe lhta quelasma m'a, ciento cincuenta y tres quelasma aliawai'a lhta m'a, malhtoca ncolietepac iama tetecco m'a. 12 Lhta ptac apquellano Jesus: —Mocjetque', etlheng eltawocja'—lhta aptac. Nquellennawenque lhta apqueltamesaicamoc elelmalhnama secla enenlhet que', apquelliawe lhta niecje apto apuesque Jesus ma'a. 13 Apme lhta Jesus alena apquenammap cacpota njan quelasma, ca apquellanco lhta njan apqueltamesaicamoc ma'a. 14 Coca jenca janetolhem'a lhta ntac actaiecjo apqueluetecja apqueltamesaicamoc Jesus netamen aptescasecja mocjom apjalhnancoc Engiapom Neten. 15 Netamen apquelpenescama lhta aptaweicocja, lhta ptac Jesus apquenmalhnenca Pedro: —Simon, Juan apquetca ¿Tep anque nlho jeiamelaiam lheiap melhnoc apquetlhelhma'ac anac?— lhta aptac. —Jai', apuesque apiawec lheiap ascamelaiam—lhta ptac apcatemmonca Pedro. Lhta ptac Jesus: —Eltacmelques jata jelieplecama nac, malha nepquesec apquetcoc ejenco'oc—lhta aptac. 16 Apquenmalhnacjawe lhta mocjom Jesus: —Simon Juan aquetca, ¿Jeiamelaiam anlho lheiap?—lhta aptac. —Jai', apuesque apiawec lheiap ascamelaiam—lhta aptac Pedro. Lhta ptac mocjom Jesus: —Eltacmelques jata jelieplecama nac, malha nepquesec ejenco'oc— lhta aptac. 17 Janetolhem'a lhta ntac apquenmalhnecjo m'a, lhta ptac: —Simon, Juan apquetca, ¿Jeiamelaiam anlho lheiap?— Aiose lhta ntac apualhoc Pedro ncanec janetolhem'a lhta ntac apquenmalhnecama Jesus, lhta ptac apcatemmonca: —Apuesque, apiawec lhamacjo caselha lheiap, apiawec na awanjec ascamelaiam lheiap— Ca apcatemmonca lhta Jesus ma'a, lhta aptac: —Eltacmelques jata nepquesec ejenco'oc anac. 18 Asmac'ac altennacsec lheiap, apmeije panque lhta aptemacja apquetcoc, emjancoc apmanquelha la'a, aptalhnecja apanque lhta njan aptalhnema. Coca jawe ngiapac anque' astacja nac, jata apto ta apuaneiam lheiap, ncomascoc jata apiennactema, elielhnesecjac jata apoctengoc neten cacpota ncolhec actalhnescasacjo aptalhnema, ncolhec jata njan aquiantemo mancoleclemelha la apualhoc lheiap— lhta aptac. 19 Apenesawe lhta apaioma Jesus acmac'acja ta ncotnec apquetsepma Pedro cacpota eluetasquesec enenlhet'awoc aptemacja apieplecama metca apiamasanweiam Engiapom Neten ma'a. Lhta ptac Jesus apcano mocjom Pedro: —Jeieplomaja— lhta aptac. 20 21 Apieplacje lhta Simon Pedro m'a, neptamen alhta njan apqueltamescama apcamelaianlha lhta Jesus, apnemo lhta njan lheme apquelanei'o lhta nentoma actacmanma Pascua ancoc ma'a, apquenmalhneianca lhta njan Jesus apto enenlhet apmajai'a eselhnana. Apuet'a lhta Pedro aplhecmo neptamen apqueltamescama lhta apcamelaianlha Jesus, lhta aptac apquenmalhenca: —Apuesque ¿Co la ta ncotnec apiaijecama enenlhet anac?—lhta aptac. 22 Ca apcatemmonca lhta Jesus ma'a, lhta aptac: — Asqueltawec niecje la eloca mocjom enenlhet anac acuacmo asuactamo ta, mancoietoc lheiap eijoc ma'a, lheiap coca jeieplomaja —lhta aptac Jesus. 23 Lhta ncanec ncopaijec ania'a apiesecsec apquelieplecama Jesus mengietsepec jata m'a apqueltamescama nac, ma lhtoca ncotnemac niecje aplheianma Jesus ma'a, lhtoca niecje aptemac Jesus apqueltemo eloca niecje apqueltamescama apcamelaianlha nac ma'a acuacmo apuactamo ta m'a, ca njan mancoietemo eijoc Pedro m'a. 24 Ca apqueltamescama nac apcamelaianlha lhta Jesus apto aplheianma, aptalhescama njan lhamacjo actemacja ania'a nac, nelliawec ennenco'o acto jawe ngiapac anquec ma'a. 25 Mantec niecje mocjom mo'oc caselha apquelanai'a Jesus, mansaujec coca antalhacsec aclhamacma la waccajac actemacja apquelanai'a lhta Jesus m'a.