Toba-Maskoy: Regular Print

Updated ? hours ago # views See on WACS
Lucas
Lucas
Capítulo 1

1 Teofilo, asqueltawec altennacsec ania'a actemacja lhta jengellanei'o Engiapom Neten nengiesecsa ennenco'o, mantec enenlhet apnactalhesaianco lhta actemacja ania'a nac 2 apquellengai'a aniem'o apatno'oc apquellelto apmania'ie apquetlhelhma'ac alhta Jesus necsa apquempaiacjasecja lhta apmacmecama m'a, netamen ma'a apquellapascamo lhta elpaiacsec ania'a nac jalhmangquec jam. 3 Co'o lhta njan astacmelcasawec astengiaicama ania'a nac asquempai'o apteiaianlha lhta Jesus, asqueltawec colhua atalhacsec alanesquesec jata acnaianquelha actemacja acuetammalhca lhta m'a, 4 cacpota iejanwomjoc acto jawe ngiapac anque lhamacjo nemo nac aclhecmoscamo lheiap.
Aplheianma enenlhet neten etiemoc jata Juan apquellauquescama iemmen na niapom
5 Coca m'a lhennenga aptemo lhnac Herodes apuesque iocjalhma Judea, apnenquec nac na m'a sacerdote apuesai'a Zacarias, aptawa lhnoca acuesai'a Isabel, Aaron aptawen neptamen nac ma'a. Zacarias apto lhnac apmacmecama lhemec apquelpasmecja apuesque sacerdote Abias. 6 Alpeiwomo lhnac ma'a, alleliejecjo njan Engiapom Neten lhamacjo jengetlhecmoscama. 7 Mamma lhnac atca m'a Isabel, aquiennactema naie', aluaneiam anquec na ntaiangcoc ma'a. 8 Lhema cnem nac ntemac aquietecjo Abias apquetlhelhma'ac apquenmacmecamo lheme', cacpota enmacmama Engiapom Neten apnemacja, 9 ca apnactewaseianco lhnac lhema nennactewascama, apnacsepmec nac Zacarias cacpota eclhec anmalhquelha aquieto Engiapom Neten apnemacja, ewanlhec 1 caselha acmases aimes acuesai'a incienso. 10 Ca apuanlhemo lhnac Zacarias ma'a, lhamacjo enenlhet nac apquelanmac aujac pa'at ma'a apquelpaqmetquescamo lhnac Engiapom Neten ma'a. 11 Mpelapquescangquec nac apteiapuei'o Enenlhet apqueniem'o Engiapom Neten, aquieto aquiennacja aluanlhemmalhquelha caselha acmases aimes. 12 Apquenmenai'ac nac Zacarias apuetai'o Enenlhet Neten ma'a, man nac eijamoc aptemacja m'a. 13 Coca Enenlhet Neten lhna aptemac apcanemo: —¡Meniaga' Zacarias! Apleng'ac Engiapom Neten apacmetquescama mota lheiap, ngcotac jata atca Isabel aptawa nac lheiap, etnesques jata apuesai'a Juan. 14 Epaiescasecjac jata apualhoc lheiap cacpota njan aplhamacjo enenlhet'awoc nematca nac. 15 Neten anquec jata ngcotnec apiaspommap napaqtec Engiapom Neten, meinec jata iama anmen cacpota njan iaujan anmen, elanoc jata apualhoc Engiapom Neten Apualhoc amanie apmajai'a etiemoc ma'a. 16 Coca m'a nematca nac, acuacmo ta aquiennactemacja apualhoc, elpasmoc jata apaiomalhema co Israel cacpota eclhecjac caselha ngcollatsecama, elleliejecjoc jata njan Engiapom Neten ma'a. 17 Ewac jata apmanie cacpota njan alhaie Cristo, ngcolhoc jata apualhoc actemo lhnac na nec apualhoc Elias secama ania'a annenga, cacpota njan acnema apmopuana. Ca nematca nac ellasecjasquesecjoc jata apiapma'ac apquetcac, etlhecmosancoc jata apquellelto melleliejecjo nac cacpota elleliejecjojo, elpenescasoc jata njan enenlhet'awoc cacpota enmoc tacja Cristo—lhna aptemac apcanemo enenlhet neten. 18 Ca apcatemmoianca lhnac Zacarias Enenlhet Neten: —Motnescasac co'o iocjalhmec acmac'acja nac ngcotnejec, neluaneiam ennenco'o, ngcaimelhque nac jetesquesec lhema caselha mongwetai'o cacpota moiascamec—lhna aptemac 19 Ca apcatemmoianca lhnac mocjom Enenlhet Neten: —¡Jeiascacme nac lheiap, Gabriel co'o Engiapom Neten jennengcasecama, asne co mota napaqtec ma'a, apto jeiapascama cacpota altennascata ania'a actacmanma nac. 20 Coca jei'ascacmec lheiap, metca apaioma ta etnec acuacmo apteiacmo apquetca!—lhna aptemac ma'a 21 Apquellailhenquec nac aujac pa'at enenlhet'awoc Zacarias cacpota etiapuetac iocjalhma, apquelpacmetquesammacpec nac mocapancawe ma'a apquetlheianmo metiapma colhuawawec conne Engiapom Neten apnemacja. 22 23 Lhennenga lhna ntemac apiepjonwectamo Zacarias ma'a, mamma lhnoca ntemac apaioma, moc apopjec nac aptemac ma'a, ca atlheianmo lhnac apualho'oc enenlhet'awoc apuetai'a caselhaja conne Engiapom Neten apnemacja. Ca acuaiacmo lhna nnelha apmacmecama Zacarias Engiapom Neten apnemacja m'a, apiacmoiecjo lhnac po'oc, ca aptaqjecjo lhnac Zacarias, ngjeclhec noca mangcotiapma apaioma. 24 Nguenactengquec nac atquetsec acnem ma'a, actemo lhna nlosec aptawa Zacarias, nguaiacmec nac 5 pelten acnema conne acnemacja, nlhenaicama lhnoca au'alhoc ma'a, lhna ntemac: 25 —Engiapom Neten jetacmelcasac cacpota mangjeltacneuquec mocjom enenlhet'awoc! —lhna ntemac Isabel.
Enenlhet neten aplheianma etiemoc Jesus
26 Nguaiacmec nac 6 pelten actema nlosec Isabel ma'a, apcapascamo lhnac Engiapom Neten Gabriel enenlhet neten natemma Nazaret aquieto Galilea, 27 apsacjescamo lhnac ania'a lhema nqueluana atcoc acuesai'a Maria, acpoccanma lhnac Jose cacpota ngcotnec atawa'. Apuesque David aptawen neptamen nac ma'a Jose. 28 Aptalhnenwaiacmec nac Enenlhet Neten acnacja Maria, lhna aptemac apcanemo: —¡Lheia nac Maria, apnenquec lhemec lheia' Engiapom Neten, apqueltawec na enquesec ngquescama actacmanma ngquec aniemjaicama!—lhna aptemac ma'a. 29 Niemascangquec nac au'alhoc aclengai'o apaioma apaiwescama Enenlhet Neten Maria, mannoca ngcoijamoc ma'a. 30 Lhna aptemac mocjom apcanemo Enenlhet neten: —Monguaga' Maria, Engiapom Neten apqueltawec enquesec ngquescama actacmanma aniemjaicama, 31 nlosec jata ngcotnec lheia', ncotac jata atca, cotnesques jata njan apuesai'a Jesus. 32 Ngcowac jata acnem neten apanquec apiaspommap nematca nac, elleltancoc jata enenlhet'awoc Engiapom Neten apquetca, Engiapom Neten etnesquesec jata njan apuesque nematca nac aptemo lhnac na nec apiata nnenga David. 33 Etnec jata njan apuesque Israel mangcotnengueianlha nnelha, jawe ngiapac anquec ma'a—lhna aptemac enenlhet neten. 34 Ca atemoianca lhnac Maria Enenlhet Neten ma'a: —¿Nieje ngcotnec atac eietca, mamma etawa co'o?— lhna ntemac. 35 Lhta aptemac mocjom apcatemmoianca Enenlhet Neten: —Ewaiwentac jata tacjalhet Engiapom neten Apualhoc lheia', ngcapuetac jata apmopuana Engiapom Neten, ca ncanec nematca nac ngcolhec jata altanco Engiapom Neten apquetca, wanlha ta njan emacmesama lhamacjo cnem lhemec Engiapom Neten. 36 Ca actema mo'oc anac lheia Isabel actacjo acuaneiam, ngcotac jata njan atca m'a. Apquetlheianme mota enenlhet'awoc aquiennactena naie' m'a, coca nguacmec ma'a 6 pelten actema nlose.' 37 Apuanquec Engiapom Neten elanac lhamacjo caselha apmac'acja la etnejec—lhna aptemac ma'a 38 Ca atemmoianca lhnac mocjom Maria m'a, lhna ntemac: —Jai', ntase nac, jata ngcotnec aptacja nac lheiap, co'o nac jeiasennaicama Engiapom Neten—lhna ntemac Netamen ma'a, aptaqjemo lhnac Enenlhet Neten.
Actema amaica'a Maria Isabel
39 Ngcacjetaicama lhnac acmeiecjo Maria natemma acjaiam lhepop aquieto Judea, 40 ca actalhnenwecjo lhnac Zacarias apnemacja m'a, acpaiwesquecjo aptawa acuesai'a Isabel. 41 Necsa aclengai'a lhnac Isabel acpaiwescama Maria, ca apcactemmacpo lhnac atca au'alhoc ma'a, aplanei'awec nac au'alhoc Engiapom Neten Apualhoc, 42 lhna ntemac aquiennactescamo acpaioma: —¡Maria, Engiapom Neten apuetascasac aquiawai'a actacmanma aquiaijecama lheia', cacpota njan atca nac, mangcolhnoc altemo lhemec ngqueluana'ac! 43 Jawe co'o asto neten anquec asiaspommalhca jetno nac amaica'a lheia', lheia ta etnec ngquen apuesque ejencoc. 44 Necsa aslengai'a lhquec jepaiwascama lheia, apcactecpec lhec eietca ewalhoc, apquetsewasawec lhec. 45 Acmaseiwe lheia' ncanec mancoiascacmoc ngcowac jata aptacja alhta aplheianma Engiapom Neten —lhna ntemac Isabel 46 Coca lhna ntemac Maria: —Jai, atacnescasancoc jata Engiapom Neten ncanec nietnec aquiawai'a apmopuana, 47 mpaijacjec ewalhoc aniem'o jeguongquescama tep, 48 jeiangquec na aquiawai'a actacmanma ascaniemjaicama, niecje astema coneng anquec jennengcasecama. Colhua jetlhenama ta aplhamacjo enenlhet'awoc jelleltangcoc jata asmapseiwe, 49 ncanec Engiapom Neten jeiangquec aquiawai'a actacmanma ascaniemjaicama. Engiapom Neten apto apeiwomo, 50 apquellamelaiacme mota enenlhet'awoc apquelelto apqueleliejecjo. 51 Ntewasquec apmopuana alietnaicama apaqto'oc apquellammacpo nac, 52 apqueljatsoscasocjec na aptaicamoc apqueluescaie enenlhet apquelientalhnemo, enenlhet metca apquelletsecama coca apquellancocja apquenmopuanca'a. 53 Mec ato'oc anac apquellancocjec caselha actacmanma, moc apmeioc coca aptocjac nema nac apqueletsecama. 54 Apquelpasmec apquellanemmacpo israelitas apquellelto apquellennencasecama, apquelietnawe mota napaqta'ac ma'a. 55 Apenescamawec nac na nec apqueltennascama Engiapom Neten elpasmoc nengelieijengca Abraham, cacpota njan aplhamacjo aptawana'ac neptamen—lhna ntemac Maria m'a. 56 Nnaiacmec nac lheme Maria m'a apcanetolhem'a pelten Isabel acnemacja, netamen actaqjemo lhnac ma'a.
Apteiam Juan apquellauquescama iemmen na niapom
57 Nguaiacmec na acnem acmajai'a etiemoc atca Isabel ma'a, 58 apqueluaiacmec nac annemolhema cacpota njan actema aclhamacja ncanec apquellengai'ac nac ania'a apcaicamoc Engiapom Neten aquiawai'a actacmanma aniemjaicama m'a 59 Netamen, nguaiacmec nac 8 acnem acteiam nematca nac, aquiantemecjo lhnac cacpota ngcolhec aquiactemencaso necjatcoc aiempec apcammelhacja, coca enenlhet apquellelto apqueluetaianco m'a, lhna aptaiancoc: —Coltemesques jata apuesai'a Zacarias, ca ctonac apuesai'a apiapom anac—lhna aptaiancoc ma'a 60 —¡Mma! Juan jata apuesai'a —lhna ntemac Isabel. 61 Coca enenlhet lhna aptaiancoc mocjom: —Mamma acnemolhema apuesai'a Juan —lhnac aptaiancoc ma'a 62 Moc apopjeio'oc na aptaiancoc apquelpaqmetquescamo Zacarias apmac'acja etnesquesec apuesai'a apquetca. 63 Coca Zacarias apqueltemawec nac ngcolhec acmeso iamet acpaijema cacpota etalhacsec apuesai'a Juan. Mpelapquescanquec nac apqueluetai'a enenlhet'awoc ma'a. 64 Ca acpelapquescamo lhnac na mocjom actepecjo apaioma Zacarias ma'a, ca aptacnescaseianco lhnac na Engiapom Neten ma'a. 65 Ngquelpelapquescanquec nac aplhamacjo enenlhet'awoc ma'a, ngquetcaicama lhnac ania'a aclhamacjo acjaiam metaimong aquieto iocjalhma Judea. 66 Coca apquellelto lhnac apquellengai'a ania'a nac ma'a, apqueluetai'o lhnac Engiapom Neten apto aptacmelquescama nematca nac, ca apquelpacmetquesammacpo lhnac moc apancawec ma'a, lhna aptaiancoc: —¿Co la ta etnec apuanemo ta nematca nac?—lhna aptaiancoc ma'a. 67 Aplanei'awec nac apualhoc Zacarias Engiapom Neten Apualhoc, apenescamawec nac aplheianma apmanie apmac'acja ta ngcotnec, lhna aptemac ma'a: 68 —Angelletsewasquesec Engiapom Neten co Israel, ncanec apua'ac cacpota jengeluongquesec tep, 69 apcapasquec acnema apmopuana jenguongquescama tep, apuesque David aptawen neptamen apquennencasecama. 70 Apquetlheianmec nac nanec apquellelto apquetsecama ania'a annenga apqueliequiescama Engiapom Neten ngcotnec jata m'a. 71 Jengeluongquesec jata tep napaqtawec apquellelto jengellammelhmacja, cacpota njan jengeltacnongcomacja nac. 72 Elietnajoc jata njan napaqta'ac nellieijengcaja, etnesquesec jata jawe ngiapac anquec actacja lhta apaioma. 73 Ca aptemo lhnac nanec Engiapom Neten apquelanei'o nengelieijengca Abraham, 74 jengeluongquesec jata tep napaqtawec apquellelto jengellammelhma cacpota jengellasennama metca nengellai'a, 75 angenmacmesama wanlha apanquec Engiapom Neten, angellanancoc caselha acpeiwomo lhamacjo acnem—lhnac nanec aptemac Engiapom Neten apcanemo nellieijengca Abraham. 76 Netamen Zacarias apquelanei'o lhnac apquetca, lhna aptemac apcano: —Lheiap eietca ngcolhec jata actemescaso secama ania'a apancoc Engiapom Neten, lheiap jata aplhengama apmanie' apuesque engancoc cacpota epenscasoc amai apancoc ma'a. 77 Eleltennasama ta enenlhet'awoc co Israel Engiapom Neten enmasquesquesec meliamolhma cacpota eluonquesec tep. 78 Awanjec anquec jengellamelaiam Engiapom Neten, jengellangcoc jata acnem 2 alhnancoc mo'oc acnem 79 cacpota ngcaponmetec apquellelto apquelloma aquiawai'a ienactesacja lhma', jengenmama njan cacpota angelloca metquelha acmasca—lhna aptemac Zacarias. 80 Apuanecaniec nac nematca nac, niennactengquec nac apualhoc ma'a, aplomaca lhnac na m'a iocjalhma metquelha temma acuacmo acnem ampaiacjasecja apquetlhecmoscama napaqtawec enenlhet'awoc ma'a.
1Se quemaba incienso para agradar a Dios.
2Cristo
Capítulo 2

Acnem apteiaianlha Jesus
1 Quetsec nac ngcaimommalhcac acnem cacpota etiemoc Jesus ma'a, aptemo lhnac apuesque Roma apuesai'a Augusto apqueltemo lhnac ellanescasancoc censo m'a alhma nquec jam. 2 Coca ampaiacjasecja nquec nac censo m'a, Quirineo lhnoca apuesque m'a iocjalhma Siria. 3 Lhamacjo enenlhet'awoc nac apqueleltammacpoc enmeiacjac apalleianlha apancawec cacpota enactalhescacja apqueluesai'a censo m'a. 4 Lhna ncanec na Jose emjancoc etalhescacjac apuesai'a m'a, ca apteiapmo lhnac na temma Nazaret aquieto iocjalhma Galilea, apmeiecjo lhnac na temma Belen aquieto iocjalhma Judea, apteiaianlha lhnac na m'a aptema po'oc annenga apuesque David ma'a. 5 Aptemo lhnac na aclhelhma Maria necsa actema nlose'. 6 Necsa acjaicamoc nac ma'a Belen, ca acuacmo acnem apteiam atca Maria. 7 Mamma lhnoca ngcacjenguomoc apcacjaiancolha la amaica'a cacpota ngcotengquesec atca m'a, wanlha lhnac aluetanweiacmo actoianquelha nema acnaqtoscama, ca apteiaiacmo lhnac ma'a apmanie panquec apteiam atca 1 , ca acpelhquetmo lhnac na ietamopai'a, acpecanmo njan ma'a. 8 Pelhasep apanquec nac ma'a, nengaqtec nac na apquellomacja apquellanecama nepquesec, 9 mpelapcasquec nac apteiapuo'o Enenlhet Neten ma'a, ngquetsasquescamawec na lhma' m'a aniem'o Engiapom Neten, apquelienmoma necjau'ac aquieto apcacjanquelha. Apquellai'ac nac ma'a apquellanecama nepquesec, 10 Coca lhna ptemac Enenlhet Neten: —Mellaga', asquetsantencasquec ania'a actacmanma ngcolpaijecjac jata apquelualho'oc enenlhet'awoc alhma nquec jam. 11 Apteiacmec lhec ma'a aquieto Belen apto Engiapom Neten apqueliequiescama, Cristo apuesque, apqueluonquescama ta tep enenlhet'awoc alhma nquec jam. 12 Eliecpelcoc jata quetlhengcap apquelueto ta m'a actoianquelha nema acnactoscama, nnec acpelhqueto apiempec ietamopai'a m'a—lhna aptemac apquellanemo enenlhet neten. 13 Mpelapquescangquec nac apquelenteiapuei'o njan aplhamacja Enenlhet Neten ma'a, apquennecmaseianquec nac ma'a: 14 —¡Apiepjonwacmec 2 Engiapom Neten, eluetac jata metca acmasca enenlhet'awoc aniem'o Engiapom Neten apquellamelaiacmo!—lhna aptaiancoc ma'a. 15 Ca apqueltaqjecjo lhnac neten enenlhet neten ma'a, lhna aptaiancoc apquelpaqmetquesammacpo moc apancawec apquellanecama nepquesec: —¡Noc angeletquecjac aquieto Belen, cacpota angeluetanwacjac actacja aplheianma Engiapom Neten!—lhna aptaiancoc ma'a 16 Ca apqueluetanwecjo lhnac ma'a Maria, Jose cacpota njan nematca, apietnemo actoiancolha nema acnactoscama. 17 Ca apquelleltennaianca lhnac nac m'a aptacja aplheianma enenlhet neten actemacja nematca nac. 18 Ngquelpelapquescangquec nac apquellengai'o enenlhet'awoc ma'a, 19 mpecquenaiangquec nac au'alhoc Maria actemacja acuetai'a m'a, ngwetangwecjawec na mota actec ma'a. 20 Apqueltaqjemawec nac apquellanecama nepquesec ma'a apquenmacmeianquelha, necsa apquetlhengama lhnac amai, apqueltacnescaseianco lhnac aptacmanma Engiapom Neten, ncanec apqueluet'ac acto jawe ngiapac anquec aplheianma Enenlhet Neten. 21 Ca acuaiacmo lhnac 8 cnem apteiam nematca, aquiaqtemenammalhco lhnac na necjatcoc aquieto apcammelhacja, ca acnemo lhnac na actemesquescamo apuesai'a Jesus ma'a, aptemo lhnac apcanemo Enenlhet neten amanie acmajai'a ngcotnec nlose' ma'a 22 Niecai'ac nac cuarenta acnem, ca anmeiecjo lhnac Jerusalen cacpota ngcollalhnasecjac au'alho'oc napaqtec Engiapom Neten ma'a, actemacja lhnac jenganemacja Moises. Ca aliantemecjo njan Jesus cacpota etnec apocquenammap napaqtec Engiapom Neten ma'a. 23 Lhna ntemac jenganemacja Moises: «Aplhamacjo apteiam la'a apmanie nematca, etnec jata apocquenammap napaqtec Engiapom Neten 3 » lhna ntemac jenganemacja. 24 Lhna ntaiangcoc ma'a, alletsecjo lhnac na apcanet calanniapa', nlhoca la njan apcanet sepop cacpota enquesec Engiapom Neten, actemacja lhnac jenganemacja Moises. 25 Apnenquec nac ma'a lhema enenlhet apuesai'a Simeon, apeiwomo lhnac ma'a, apqueliejecjo lhna mota Engiapom Neten, awanjec anquec nac apqueljalhanma apqueltemo ewac apqueluonquescama tep co Israel, nnlaneiawec nac Engiapom Neten Apualhoc Simeon ma'a, 26 cacpota eijanwescamjo' amanie apquetsepma' etac jata Cristo. 27 Nietemawec nac apqueluetai'o ngcana'ac Jesus necsa apquelleltemo eltemesquesec apoquenammap napaqtec Engiapom Neten Jesus ma'a, 28 ca apcainacjo lhnac Simeon nematca, lhnac aptemac apcanemo Engiapom Neten: 29 —Engiapom Neten ejencoc, ntasec anwetsepoc, necsa acpaijecja ewalhoc, 30 ncanec asuet'ac apnescamo lhta apaioma jeltennascama lheiap, apto jenwongquescama tep lheiap apcapascama. 31 Eluetac jata njan aplhamacjo enenlhet'awoc jalhma nquec jam. 32 Etnec jata malha apquetsasquescama lhma metno judios cacpota eliamwomjoc aptemacja lheiap ma'a, etlhenec jata po'oc enenlhet apquennemolhema nac lheiap co Israel aniem'o nematca nac —lhna aptemac. 33 Mpelapquescangquec nac Jose cacpota njan Maria allengai'o actacja apaioma Simeon, 34 ca apquellaianco lhnac aquiawai'a actacmanma aliaijecama, ca acuacjo lhnac na Maria apqueltennascama ania'a, lhna aptemac apcanemo m'a: —Engiapom Neten apcapasquec nematca nac cacpota eluonquesec tep aplhamacjo enenlhet'awoc, napocja toca njan ellancoc aquientalhnema. Ellacsec jata niecje napaqtawec enenlhet'awoc ma'a, coca eltacnonwacjac jatoca m'a, 35 ngcoliepjongwetamoc jatoca actancolha apualho'oc ma'a. Maria, lheia' jatoca awanjec anquec ngcotnec aclengaianco aquientalhnema aniem'o apmanie actacja ta apiaijecama atca nac, malha acto nac nema alieplhaqlhema pelettau lheia' —lhna aptemac Simeon apcanemo Maria. 36 Necsa apacmetquescama lhnac mocjom Simeon Maria m'a, actetescai'o nqueluana secama ania'a lhnac ma'a, Ana lhnac acuesai'a, 84 iantelhcapa ancoc nac ma'a, acuaneiam anquec nac ma'a, niapom nac apuesai'a Penuel, Aser nac apaioma lhemec ma'a. Atcoc anquec nac apnemo atawa, siete iantelhcapa lhnac aquiantemaicama m'a, ca actemo lhnac lhentampe. 37 Acmeiecjo lhna mota Engiapom Neten apnemacja, pelhasep cacpota njan cnem anque', acjasquesammalhco lhna mota mec, acpacmetquescama cacpota njan acmacmesaicama Engiapom Neten. 38 Ca aleltennaseianca lhnac napaqtawec enenlhet'awoc aptemacja nematca apquellelto apqueleljalhanma apqueluonquescama tep co Israel, ca actemo lhnac na gracias Engiapom Neten ma'a aniem'o nematca nac. 39 Ca alpenescamo lhnac Jose cacpota njan Maria allanemmalhca ngcoltejec aniem'o jenganemacja, ca altaqjecjo lhnac acjaianquelha natemma Nazaret aquieto Galilea. 40 Apuanecaniec nac Jesus apquetcoc, niennactengquec nac apualhoc ma'a, apianweiacmo njan, apasmonquec na mota Engiapom Neten ma'a.
Apmeiecja Jesus apquetcoc actacmelaicama lhma pascua aquieto m'a Jerusalen
41 Anmeiecjo lhna mota ngcana'ac Jesus lhamacjo iantelhcapa apiau'acja temma Jerusalen, alioiam actacmelaicama lhma acuesai'a pascua. 42 Ca acuaiacmo lhnac doce iantelhcapa apancoc Jesus ma'a, ca anmeiecjo lhnac mocjom Jerusalen aptaiancolha lhnac ma'a apquelpasenwecja mota actacmelaicama lhma pascua. 43 Netamen, aluatesammalhco lhnac actacmelaicama lhma m'a, altaqjemo njan ngcana'ac acjaianquelha. 44 Lhema acnem na ntemac atlhengama amai, ca mangcoluetai'o lhnac Jesus ma'a, alleliaicocjo lhnac mocjom aquieto netamna'ac lhec, apiesecsec enenlhet aptema po'oc, apaiomo lhema, mang na ngcolliamoc ngcana'ac apnecjo Jesus Jerusalen ma'a. Ngqueltaqjemawec nac ma'a cacpota ngcollelianguacjac. 45 Nkeltaqhemavek nak ma'a kakpota nkoleliangvakhak. 46 Netamen tres acnem nac ngwaiacmoc, aluetanwecjo lhnac aquieto Engiapom Neten apnemacja m'a, apnaiacmo lhnac apiesecsec jengetlhecmoscama jenganemacja Moises, aptacmelquescamawec nac apcailhecamoc nema atlhecmoscama m'a, ca apquelpaqmetquescamo lhnac na m'a. 47 Ngqueliemascangquec nac apualho'oc enenlhet actacmanma apcatec, cacpota njan apmopuana eniatemmoma nema anmalhnecama ania'a 48 Ngquelpelapquescangquec nac na ngcana'ac Jesus aluetai'o m'a, lhna ntemac anemo ngquen: — !Selha ntac apto nac jengca ie! Apiapom cacpota njan co'o mangcasac nelquetansema lheiap, ngqueltama njan engellualho'oc—lhna ntemac ma'a. 49 Apcatemmoicama lhna Jesus ma'a, lhna aptemac: —¿Selha ntac jelquetamo nac. Manlho ngcoliojoc quetlhengca' asqueltawec alhec tata apnemacja?— lhna aptemac. 50 Coca man nac ngcolliamoc aptacja aplheianma Jesus ma'a. 51 Ca apquelieplecjo lhnac ngcana'ac ma'a aquieto Nazaret, apqueliejecjo lhna mota ngcana'ac ma'a acjaianquelha. Mpecquenaiangquec nac au'alhoc Maria actemacja acuetai'a m'a, ngwetangwecjawec na mota actec ma'a. 52 Apuanecaniec nac Jesus ma'a, apianweiacmec nac lhma', Engiapom Neten cacpota njan lhamacjo enenlhet'awoc apquellamelaiam Jesus ma'a
1Primogenito
2Gloria
3Exodo 13:2,12
Capítulo 3

Juan apquellauquescama iemmen angiapom aquieto iocjalhma metquelha temma
1 15 iantelhcapa lhnac nguaiacmoc aptema apuesque Tiberio iocjalhma Roma, Poncio Pilato lhnoca apuesque iocjalhma Judea, Herodes Antipas noca m'a apto apuesque iocjalhma Galilea, Filipo Herodes apialheng coca apuesque janet iocjalhma, acuesai'a Iturea, cacpota njan Traconitide. Lisanias coca apuesque iocjalhma Abilene. 2 Anas cacpota njan Caifas apquellelto apquelanma apmania ie sacerdotes Judios ma'a. Apnenquec nac na Juan Zacarias apquetca m'a iocjalhma metquelha temma, ca apcapascamo lhnac Engiapom Neten cacpota epaiacsec ania'a actacmanma apiesecsec enenlhet'awoc. 3 Apmeiecjo lhnac Juan iocjalhma actacja nengaqtec aluata Jordan, apacmeteianca lhnac aquiennactema nquec ma'a, lhna aptemac: — ¡Ellanecja apualho'oc cacpota enmasquescasecjac Engiapom Neten apqueltemacja ngcollatsecama, cacpota ngcolhec allauquesancoc conne iemmen!—lhna aptemac ma'a. 4 Nguai'ac nac acnem ma'a actemacja lhnac na nec aptalhescama secamania'a ania'a nnenga Isaias, lhna aptemac: «Nnengquec nac alpalhemaianca iocjalhma metquelha temma: "¡Elpenescaso ta amai ma'a cacpota ewac apuesque enganco'oc, elpeiweso ta apquellanai'a amai, 5 ellapecja ta aliepuatecamoc cacpota metlapme', cacpota njan mangcoliacsec jata lhma'! 6 Netamen eliamwomjoc jata aplhamacjo enenlhet'awoc apqueluoncasemmap tep"» lhnac na nec aptemac. 7 Man na ntec enenlhet'awoc apquelmeiecja apnacja Juan cacpota ellauquesancoc iemmen ma'a, lhna ptemac apquellanemo: —¡Menasma quetlhengcap, apquellanenque mota eluoncasacpoc jata tep acuo'o ta aquientalhnema m'a, jawe coca njan ma'a! 8 ¡Eluatesamoc ngcollatsecama, etnamoc apquelpeiwomo, elleltacmelcasap! Motlhen apualho'oc quetlhengcap eluomoc tep aniem'o Abraham aptawana'ac neptamen, ncanec Engiapom Neten apuanquec etnescasecjac Abraham aptawana'ac neptamen metaimong anac apquelto la'a. 9 Mpenesalhquec tawa cacpota ngolhec aliaqtemeno aicapmen'oc iamet mangcoielhno la altacmanma aquielhna, ngcolhe ta njan aclho natelh— lhna aptemac Juan apquellanemo enenlhet'awoc ma'a. 10 Ca apquelelmalhneianca lhnac enenlhet'awoc ma'a, lhna aptaiancoc: — ¿Co la antancoc ennenco'o cacpota mannactewasalhque'? —lhna ptaiangcoc 11 Ca apquellatemmoianca lhnac mocjom Juan, lhna aptemac: —Apietnec jata nquec apcanet apquelaclammap quetlhengcap, eniamoc jata lhema po'oc metca la apcaclammap, nietnec jata nquec aptecamoc quetlhengcap, eniamoc jata njan po'oc metco la aptoma —lhna ptemac apquellatemmoianca Juan ma'a. 12 Ca apqueluaio'o lhnac na moclhem'a apquenmacmecama apquenmaicamoc pataccom impuesto ancoc, apquelleltemo lhnac ngcolhec allauqueso conne iemmen ma'a, ca apquelelmalhneianca lhnac Juan, lhna aptaiancoc: —Jengetlhecmoscama ¿Co la antancoc ennenco'o cacpota monnactewasalhquec?—lhna aptaiancoc 13 Apcatemmoicama lhnac Juan ma'a, lhna aptemac: —Meliecascamjo nquec apquenmaicamoc patacom—lhna aptemac ma'a 14 Ca apquelelmalhneianca lhnac na moclhem'a soldados ma'a, lhna aptaiancoc: —¿Co la antancoc ennenco'o cacpota monnactewasalhquec?— lhna aptaiancoc —¡ Meltemenguamjo lhma ellanjoc enenlhet apqueliaspecamo la pataccom, ntasec ma'a aquianmoma nac apquenmacmecama !—lhna ptemac Juan. 15 Apquelleljalhanmo lhnac enenlhet'awoc etnec jata Juan ma'a, apquellanemo lhnac Cristo m'a, Engiapom Neten apcapascama. 16 Coca lhnac aptemac Juan apquellanemo enenlhet: —Asquellaucasquec co niecje iemmen quetlhengcap, coca lhema enenlhet jata elhemac netamen co'o, neten apanquec acnema apmopuana, molhnoc co'o, nguannalhquec co'o ewalhoc atnec ascasennaicama, ca enenlhet anac ellanesoc jata Engiapom Neten Apualhoc quetlhengcap, cacpota njan talha. 17 Esantac jata iamet, etecponwatac jata trigo apactec apnaclhema apielhna apiemascama, elhpanquesec jata apactec cacpota njan apiempeioc, altacmanma apactec elhatmoc jata iama lhengajac, netamen apiempeioc eclho'oc jata natelh cacpota eluanlhecja metca acsepaneiacja lhnac talha ma'a—lhna aptemac Juan. 18 Coca jengca nlhanie' nac actemacja apietquescama Juan apquetlhecmoscama ania'a actacmanma enenlhet'awoc ma'a. 19 Apiamenaianca lhnac na Herodes Antipas ma'a, ncanec apmecjo lhnac apiamelhco nqueluana, apialheng Filipo aptawa, Herodias acuesai'a m'a. 20 Coca Herodes apianwescaiacmec nac apquelanai'a ngcolatsecama, ca apcaclhenquescamo lhnac Juan nengaclhengcasemmalhquelha m'a.
Juan aplauquescama iemmen Jesus
21 Apquellauquesaianco lhnac iemmen Juan aplhamacjo enenlhet'awoc ma'a, ca apuaiacmo lhnac na Jesus, aplauqueso lhnac na iemmen ma'a. Necsa apacmetquescama lhnac Engiapom Neten Jesus, acmaijecjo lhnac neten, 22 apuaiwentamo lhnac Engiapom Neten Apualhoc tacjaplhet Jesus ma'a, malha conemmactec na ntemac, aclengammalhco lhnac nema aliatecama neten, lhna ntemac jeng: —Lheiap eietca ascamelaiam, apaiesacjec ewalhoc lheiap—lhna ntemac nema aliatecama
Apquelieijenca Jesus
23 Ampaiacjasecja lhnac apquetlhecmoscama Jesus ma'a, malha treinta iantelhcapa apancoc quelhaja, Jose apquetca lhnac ma'a. Jose apiapom nac Eli 24 Eli apiapom nac Matat Matat apiapom nac Levi Levi apiapom nac Melqui Melqui apiapom nac Janai Janai apiapom nac Jose 25 Jose apiapom nac Matatias Matatias apiapom nac Amos Amos apiapom nac Nahum Nahum apiapom nac Esli Esli apiapom nac Nagai 26 Nagai apiapom nac Mahat Mahat apiapom nac Matatias Matatias apiapom nac Semei Semei apiapom nac Josec Josec apiapom nac Joiada 27 Joiada apiapom nac Johanan Johanan apiapom nac Resa Resa apiapom nac Zorobabel Zorobabel apiapom nac Salatiel Salatiel apiapom nac Neri 28 Neri apiapom nac Melqui Melqui apiapom nac Adi Adi apiapom nac Cosam Cosam apiapom nac Elmadam Elmadan apiapom nac Er 29 Er apiapom nac Josue. Josue apiapom nac Eliezer Eliezer apiapom nac Jorim Jorim apiapom nac Matat 30 Matat apiapom nac Levi levi apiapom nac Simeon Simeon apiapom nac Juda Juda apiapom nac Jose Jose apiapom nac Jonam Jonam apiapom nac Eliaquim 31 Eliaquim apiapom nac Melea Melea apiapom nac Mena Mena apiapom nac Matata Matata apiapom nac Natan 32 Natan apiapom nac David David apiapom nac Jese Jese apiapom nac Obed Obed apiapom nac Booz Booz apiapom nac Selah Selah apiapom nac Nahason 33 Nahason apiapom nac Aminadab Aminadab apiapom nac Admin Admin apiapom nac Arni Arni apiapom nac Herson Herson apiapom nac Fares Fares apiapom nac Juda 34 Juda apiapom nac Jacob Jacob apiapom nac Isaac Isaac apiapom nac Abraham Abraham apiapom nac Terah Terah apiapom nac Nahor 35 Nahor apiapom nac Serug Serug apiapom nac Ragau Ragau apiapom nac Peleg Peleg apiapom nac Eber Eber apiapom nac Selah 36 Selah apiapom nac Cainan Cainan apiapom nac Arfaxad Arfaxad apiapom nac Sem Sem apiapom nac Noe Noe apiapom nac Lamec 37 Lamec apiapom nac Matusalen Matusalen apiapom nac Henoc Henoc apiapom nac Jered Jered apiapom nac Mahalalel Mahalalel apiapom nac Cainan 38 Cainan apiapom nac Enos Enos apiapom nac Set Set apiapom nac Adan Engiapom Neten coca apquelanai'a Adan. Lhnac apqueluesai'a Jesus apquelieijenca lhamacjo nac.
Capítulo 4

Aptescasecja coneng Jesus queliacjameio awesque'
1 Aplanei'awec nac Jesus Engiapom Neten Apualhoc, acmaianca lhnac cacpota emjancoc iocjalhma metquelha temma, 2 apnaiacmec nac cuarenta cnem ma'a metca ptoma aptoma, mec nac ngcaqjemac ma'a, ca acuai'o lhnac queliacjameio ma'a acmajai'a ngcoselhnana', 3 lhna ntemac anemo: —Jawe ta nque niapac lheiap apto Engiapom Neten apquetca, ngwa', etnescasecja no pan metaimong anac—lhna ntemac anemo m'a 4 Ca apcatemmoianca lhnac Jesus, lhnac aptemac: «Jawe wanlha aptecamoc alliennactescama aplhamacjo enenlhet'awoc cacpota ellocaja» ca ntemac ma'a, actalhesammalhca jenganemacja Engiapom Neten. 5 Ca aquiantamo lhnac queliacjameio Jesus, anetquescaiacmo lhnac netnec anque', aluetasquescamo lhnac apquellawacja lhma nquec jam, 6 lhna ntemac anemo: —Ca lhamacjo apquellawacja nac cacpota njan caselha apanco'oc acmennawe nquescama nac alhewai'a lhta co'o, ewanquec anwancoc asmac'acja la anwancoc. 7 Aptengio la lheiap anwancoc, coca amanie asqueltawec elteclheioc aptapno'oc nejacto ie cacpota njan jetacnescasangcoc—lhna ntemac anemo m'a 8 —¡Mma'! Ca ntac Engiapom Neten apaioma: «Wanlha elteclhec aptapno'oc napaqtec Engiapom Neten, cacpota njan etacnescasancoc ma'a»— lhna aptemac Jesus. 9 Ca aquiantamo lhnac mocjom queliaqjameioc Jesus apiau'acja temma Jerusalen, anetquescacjo lhnac Engiapom Neten apnemacja, aietsecsec anquec pa'at, lhna ntemac anemo: —Jawe ta nquec niapac apto lheiap Engiapom Neten apquetca, enelhtenta nojo, 10 ncanec ca ntac na Engiapom Neten apaioma «elapacsec jata enenlhet neten cacpota eltaqmelquesec, 11 enmoc tacja lheiap cacpota mangcopaluataniec jata apmancoc metaimong»— lhna ntemac ma'a. 12 Ca apcatemmoianca lhnac mocjom Jesus, lhna aptemac: —Ca ntac na Engiapom Neten apaioma: «Meiepcon apuesque Engiapom Neten»—lhna aptemac 13 Ntemenguecjec na lhma alanei'o Jesus queliacjameio, ca aquiengiecjo lhnac secjec aquiacuatacjo m'a.
Ampai'acjasecja apquetlhecmoscama Jesus aquieto Galilea
14 Netamen aptaqjemo lhnac neptamen Jesus iocjalhma Galilea, nlanei'awec nac apmopuana Engiapom Neten Apualhoc, apuetammacpec nac Jesus iocjo iempec ma'a. 15 Apquetlhecmoscamo lhna mota aclhamacjo nemacnecjelha m'a, lhamacjo enenlhet'awoc nac apqueltacnescaseiancoc ma'a. 16 Ca apmeiecjo lhnac na natemma Nazaret, apuanecanlha lhnac ma'a. Ca acuaiacmo lhnac cnem sabado, apmeiecjo lhnac nemacnecjelha aptemacja apanquec nac ma'a. 17 Ca apquellaianco lhnac enenlhet elietsetec waccajac Isaias, ca apquenmecjo lhnac neten Jesus, apmaiescamo lhnac apquelietsatemo, lhna aptemac: 18 «Engiapom Neten Apualhoc alhelhma co'o, jeliequiesque', jeiapasquec na cacpota allancoc ania'a actacmanma metca nac apquelletsecama, cacpota allentepquesec apquellelto apquenmammap, altacmelcasecjac metca apaqto'oc, aljatsoscacjac metca nac ngcolhec altacmelcaso, 19 cacpota njan aleltennasancoc ngua'ac cnem apqueluonquescama tep Engiapom Neten»lhna aptemac. 20 Ca apenescamo lhnac apquelietsatem Jesus waccajac ma'a, apcapacjo, ca apcancocjo apto apquelanecama m'a, ca apnemo lhnac cacpota etlhecmocsec ma'a. Apquellailheianquec nac ma'a actacja apqueltennaicama Jesus, 21 lhnac aptemac ma'a: —Ngua'ac colhuawe nac napaqtawec quetlhengcap asquelietsato nac—lhna aptemac 22 Ngqueliemascangquec nac na apualho'oc enenlhet ma'a, ntasec nac na apquetlheianma aptemacja Jesus, ca apquelpaqmetquesammacpo lhnac mocapancawec ma'a, lhna aptaiancoc: — ¿Jawe nlho Jose apquetca jam? —lhna aptaiancoc ma'a 23 24 Lhna ptemac Jesus apquellanemo enenlhet'awoc ma'a: — Memacpec tacja lhema apsecama ania'a apcawacja apanquec la'a. Jatelha eltejec jellana quetlhengcap lhna ntemac na aclhenammalhca mota: "Aplhenammacpo la panquec aquietnema apualhoc, ntasec etepquesec apmopuana cacpota etacmelecja apanque" Jata eltec jellana quetlhengcap ncanec apquelleltawec aluetasquesec caselha jempelapquescama ascawacja ejenque nac, ca ctonac asquelan'o lhta m'a na temma Capernaun. 25 Coca cotlheianwacjo no njan apualho'oc lhennenga taiep mangcommai'o lhnac tres iantelhcapa cacpota njan seis pelten, mec nac nanec ngquennapmac enenlhet'awoc ma'a Israel. 26 Mang nac nane ntec lhentampa'a aquieto Israel altengiaicamoc nema alpasmoma, mamma lhnoca ntemac ma'a. Coca Elias nnengquec nac apascamo cacpota epasmoc lhema lhentampe aniem'o mo'oc apquellawacja, Sarepta acuesai'a m'a, ngcatepelha lhnac aquieto natemma Sidon. 27 Mocjom na, lhennenga taiep nac na m'a, mang nane ntec anmasca apiempeioc aquieto Israel, nemmasquema actepelcammalhca apiempeioc ma'a, coca Eliseo wanlha lhnac aptacmelcasecjo lhema enenlhet apqueniem'o mo'oc necja apquellawacja Siria, Naamam nac apuesai'a m'a—lhna aptemac Jesus ma'a. 28 Mang na ngquescamac apquellomo 1 enenlhet'awoc apcacjaicamoc ma'a conne nemacnecjelha, 29 nnengquec nac aquiengeicocjo, ngcolhec aquiantemo neten metaimong acjema cacpota eliong coneng ma'a. 30 Apiaiesecjec nac Jesus apiesecsec enenlhet'awoc ma'a, ca aptaqjecjo.
Enenlhet acmaicama queliacjameio
31 Ca apmeiecjo lhnac Jesus natemma Cafarnaum iocjalhma aquieto Galilea, coca m'a lhamacjo sabado lhnac apquetlhecmosquecja mota. 32 Ngqueliemascangquec nac apualho'oc ma'a aniem'o actacja aquientalhnema apquetlhecmoscama. 33 Apnenquec nac na m'a enenlhet actewascama queliacjamio conne nemacnecjelha, apuenecama lhnac ma'a, lhna aptemac: 34 —¡Jesus co Nazaret, Mangjengeliasamolhma!¿Apmac'a nlho jennactewacsec lheiap? Asiawec co'o apto Engiapom Neten apqueliequiescama lheiap —lhna ntemac ma'a. 35 —!Cowanma', cotiep jam enenlhet anac¡ —lhna ptemac Jesus. Apquellelhpocjaicama lhnac nalhepop enenlhet anac aniem'o queliacjameio m'a, ca acteiapmo lhnac metca actewascama enenlhet anac. 36 Ngqueliemascangquec nac apualho'oc apqueluetai'o m'a, lhnac aptaiancoc: —¡Acmowana na nnac apaioma enenlhet anac, ngqueleliajacjawe nac queliacjameio!—lhna aptaiancoc 37 Mpaijengquec nac ania'a lhamacjo apquellawacja m'a actemacja apquelanai'a Jesus.
Jesus apqueltacmelcasecja enenlhet'awoc
38 Apteiapmec nac Jesus nemacnejelha ca apmeiecjo Simon apnemacja, nemo lhnac altennasquectamo apqueltammap etacmelquescamo Simon apepiamong acjema nemmasquema acmelhanma eniempec ma'a. 39 Ca apjalhentamo lhnac Jesus tacjalhet ma'a, apiamenaianca lhnac acmelhanma eniempec. Colhuawe anquec nac ntacmelecjac ma'a, ca anmecjo lhnac neten, allanesquescamo lhnac aptecamoc ma'a. 40 Apienactescanquec nac ma'a, apquelletsacjescamo lhnac anmasca apiempeioc apnacja Jesus, ca apnencanmo lhnac apmeioc tacjaplhet'oc ma'a, ca apqueltacmelecjo lhnac na m'a. 41 Ngquelpaijema lhnac atno'oc queliacjameio allenteiapmo apualho'oc moclhem'a enenlhet'awoc ma'a, lhna ntaiangcoc: —¡Engiapom Neten apquetca lheiap!—lhna antaiancoc. Ca apqueliamenaianca lhnac Jesus queliacjameio' m'a, meltemo ngcotlhenec apto Engiapom Neten apcapascama.
Jesus aplheianma ania'a actacmanma aquieto lhamacjo nemacnecjelha
42 Mmopeiacmec na lhma' m'a, ca apteiapmo lhnac Jesus apiau'acja temma, apmeiecjo metquelha aquiennoma lhma'. Coca apquelquetansenquec nac enenlhet'awoc ma'a, apquelleltemenquec nac memjangquec po'oc temma. 43 Coca Jesus lhnac aptemac apquellanemo: — Ascapasammalhca co'o cacpota apaiacsec ania'a actacmanma aplhenammap Engiapom Neten lhamacjo apquellawacja—lhna aptemac 44 Ca apmeiecjo lhnac Jesus lhamacjo apcacnecjelha aquieto iocjalhma Judea, apaiescamo lhnac na ania'a actacmanma m'a.
1Se enojaron porque Jesus les insinuaba que la bondad de Dios era tambien a favor de los no judios.
Capítulo 5

Quelasma aclhamacma
1 Aplomaca lhnac Jesus necja sanga aquieto Galilea, apcanuei'o lhnac enenlhet'awoc apnacja m'a cacpota ellaihoc ania'a aniem'o Engiapom Neten. 2 Ca apuetai'o lhnac acnaianco janet loma nemmen ma'a, apquelmopesecjo lhnoca iama tetteco apanco'oc otep necja sanga m'a. 3 Ca apcanetuaiacmo lhnac Jesus ma'a, Simon nac apancoc loma nemmen, ca apqueltemo lhnac engiaclhencasancoc tep atquetsec nemmen, apnemo lhnac ma'a, ca apquetlhecmoscamo enenlhet'awoc apquellelto apcacjenwai'a necja sanga. 4 Netamen, apsaujomo lhnac apquetlhecmoscama m'a, lhna ptemac apcanemo Pedro: —Noc, angenmancoc no jae', aptonnelha nac, jata eliengio'oc nemmen iama tetecco m'a—lhna aptemac Jesus. 5 Apcatemmoianca lhnac Pedro, lhna aptemac: —Jengetlhecmoscama, pelhaso puangco nellenlhaneiam aniecje nenteniaicamoc quelasma, mamma coca. Atnec jata aptacja nac lheiap—lhna ptemac Pedro 6 Ca apquelhaianco lhnac iama tetecco m'a, apqueljatsosaianco lhna nquescama quelasma m'a, ngcaicama lhnac alietepquescama iama tetecco m'a. 7 Apquellacjetaianca lhnac apquellaweianca moc apmeio'oc apquetlhelhma'ac mo'oc loma nemmen, cacpota elpasmoc ma'a. Ngquellaneiangquec nac quelasma m'a, caicama lhnac alluaiwecamoc janet loma nemmen ma'a. 8 Lhna songquec apuetai'o Pedro m'a, apqueltanentamo lhnac aptapno'oc napaqtec Jesus ma'a, lhna ptemac: —¡Apuesque, mollatsema co'o, mangjeipetcangua'!— 9 10 Lhna aptemac Pedro m'a ncanec nteiaiacmec nac apualhoc apuetai'o m'a, ntaiangquec nac na aplhamacjo enenlhet'awoc ma'a, cacpota njan apquetlhelhma'ac apancawec Pedro m'a, Santiago cacpota njan Juan, Zebedeo apquetcac nac ma'a. Coca lhna ptemac Jesus apcanemo Pedro: —Meniaga', colhua coca apto aptengiai'o quelasma lheiap, cacpota alhecmocsec na lheiap etnec aptengiai'o enenlhet'awoc jelieplecama co'o—lhna aptemac apcanemo 11 Netamen, apnencanueiacmo lhnac necja sanga loma nemmen, apquelieniecjo lhnac na lhamacjo apquelletsecama m'a, ca apquelieplecjo lhnac Jesus ma'a.
Aptacmelcasecja Jesus lhema enenlhet actepelcammalhca apiempejec
12 Apnenquec nac Jesus natemma, apuai'o lhnac lhema enenlhet actelcammalhca apiempec ma'a, apquelteclhecuai'o lhnac aptapno'oc napaqtec Jesus acuacmo nnelha napa'at apteclheclhema lhepop, lhna ptemac apcanemo: —Apuesque, asiawec co'o nietnec apmopuana lheiap ¿Apqueltawe i'e jetaqmelquescamoc lheiap? — lhna aptemac 13 Ca apmanweiacmo lhnac Jesus ma'a, lhna ptemac: —Jai, aptacmelacjec lheiap—lhna aptemac Colhuawec anquec nac aptacmelecjac enenlhet ma'a, 14 lhna ptemac Jesus apcanemo: —Meleltennasama nquec enenlhet'awoc actacja nac apuetai'a, ei'ocja ta sacerdotes cacpota njan esacjac lhema apmescama Engiapom Neten apqueltemo lhnac nanec Moises, cacpota eluetac sacerdotes apto jawe niapac anquec aptacmelecja lheiap —lhna aptemac Jesus apcanemo m'a. 15 Niaweiangquec nac apqueliecpelquema enenlhet'awoc Jesus ma'a, apcaqnecjo lhna mota apquellailhecamoc apquetlhecmoscama, cacpota njan apqueluaiam apnacja apquelleltemo eltacmelcasecjac anmasca apiempeioc ma'a. 16 Coca Jesus aptengiaicama lhna mota metquelha aquiennoma lhma cacpota epacmetquesec Engiapom Neten aplhepquennenga m'a.
Aptacmelcasecja Jesus enenlhet meniemjama neten
17 Apnenquec nac Jesus lhema pa'at apquetlhecmoscamo lhnac ma'a, apcacjaianquec nac na moclhem'a fariseos, cacpota njan jengetlhecmoscama jenganemacja Moises ma'a, apqueleltemo lhnac ellailhancoc actemacja apquetlhecmoscama Jesus. Apquelleniemai'ac nac apiau'acja temma Galilea, Judea, cacpota njan Jerusalen, ca apqueltacmelquescaiacmo lhnac Jesus anmasca apiempeioc aniem'o apmopuana Engiapom Neten. 18 Ca apqueluai'o lhnac na enenlhet apquelletsoiam lhema enenlhet metca aptapno'oc aquieplomo aptanema, apquelleltemo lhna niecje elentalhnecsec aquieto apnacja Jesus ma'a, 19 mang nac elentalhnemac conne pa'at ma'a, ncanec apentelhec nac enenlhet'awoc aquieto atong pa'at. Ca apquelcanantemo lhnac neten pa'at, apquelletsomawec nac enenlhet meniemjama neten, ca apqueljatsosaianco lhnac lhema iamet acpaijema aietsecsec pa'at, apqueluaiwesentamo lhnac coneng napaqtec Jesus. Mang na ntec enenlhet'awoc ma'a au'alhoc pa'at. 20 Apuetai'o lhnac Jesus aquiawai'a nquec meliasqueiam apquellelto apquelletsoiam enenlhet ma'a, lhna ptemac apcanemo acmasca apiempec: —¡Nne cmasqueso meijamolhma lheiap!—lhna aptemac apcanemo m'a. 21 Ngquellomawec nac apualho'oc apquellengai'o jengetlhecmoscama jenganemacja Moises cacpota njan fariseos, lhna aptaiancoc: —¡Aptewasque nac apuesai'a Engiapom Neten ja'e, wanlha niecje Engiapom Neten apuanquec emasquecsec mangeliamolhma!—lhna aptaiancoc ma'a 22 Apiamawec nac Jesus actacja atlheianma apualho'oc, lhna aptemac: — ¿Se lha ntac alpacmetenca nac apualho'oc ngcollatsecama quetlhengcap que? 23 Ngua', jeleltennes no ¿Se lha alhewai'a nquec antec anganac metca aptapno'oc anac que, nnec masqueso meijamolhma lheiap, nlho ca la njan etnemecja neten, eiepconquesama no elhong, se lha alhiewai'a nquec que, je? 24 Colhua ta aluetasquesec aquietnema apmopuana Enenlhet Apquetca nac cacpota enmasquesquesec meliamolhma enenlhet'awoc— lhna aptemac Jesus. Ca aptemo lhnac na Jesus apcanemo enenlhet metca aptapno'oc: —!Etnemecja neten lheiap, ema aptanema nac, etaqjecja ta pnemacja' ! — lhna aptemac. 25 Colhuawec nac apquenmecjac neten napaqtawec enenlhet'awoc ma'a, ca apmamo lhnac na aptanema, aptaqjecjo apnemacja aquieplomo aptacnescasecamoc Engiapom Neten ma'a. 26 Ngqueliemascangquec nac apualho'oc enenlhet'awoc ma'a, ca apqueltacnescaseianco lhnac na apuesai'a Engiapom Neten, mang nac na ngquescamac apquellai'a m'a, lhna aptaiancoc: — ¡Aiii, caselha monguetai'o nac neluet'ac cnem anac! —lhna aptaiancoc ma'a.
Jesus aplannecama Mateo cacpota eieploma
27 Necsa aplhengama lhnac amai Jesus, apuetai'o lhema enenlhet apuesai'a Mateo, apnenquec nac aquieto apmacmeianquelha apquenmamacja patacom impuesto ancoc Roma, lhna aptemac Jesus apcanemo: —Jeieplomaja —lhnac aptemac 28 Apquenmecjo lhnac neten Levi m'a, apnenquenecjec nac lhamacjo caselha apanco'oc, ca apieplecjo lhnac Jesus ma'a . 29 Ca apquelanei'o lhnac alhaie actacmelaicama lhma Levi m'a, apquetsewasquescamo Jesus, ca apquellanemo lhnac na apquenmacmecama lhemec, cacpota njan aplhamacja enenlhet, elpasenwacjac ma'a nentoma. 30 Apcacjaianquec nac ma'a moclhem'a fariseos cacpota njan jengetlhecmoscama jenganemacja Moises, apqueliascamo lhnac apatno'oc apcacjanquelha Jesus apqueltamesaicamoc ma'a, lhnac aptaiancoc apquellanemo: —¡Selha ntac aptawocjo nac lhemec quetlhengcap apquenmaicamoc anac patacom impueto ancoc, cacpota njan enenlhet meliamolhma nac! —lhnac aptaiancoc ma'a. 31 32 Aplengai'ac nac Jesus ma'a, lhnac aptemac apquellanemo: —Asua'ac co'o asquelquetansema enenlhet meliamolhma, mou'ac co m'a asquelquetansema enenlhet anac apquelleltammacpo na apancawec apqueliamolhma. Enenlhet apqueltacmelo la'a, metco anmasca apiempeioc na m'a, mengiaimecpoc ponja ngiapom, coca enenlhet anac anmasca apiempeioc, apcaimecpe mota ponja ngiapom —lhna aptemac Jesus.
Apquetlhecmoscama Jesus apqueltemacja apquellaqjasquesammacpo mec
33 Lhnac aptaiancoc apquellanemo enenlhet Jesus ma'a: —Juan apquellauquescama iemmen angiapom apqueltamesaicamoc cacpota njan apqueltamesaicamoc anac fariseos, aptaianquelha lhna mota apquellaqjasquesammacpo apanquec mec cacpota njan elpacmetquesec Engiapom Neten ¿Selha ntemac apqueltamesaicamoc anac lheiap metnaiangco nac na m'a?—lhna aptaiancoc ma'a. 34 Ca apquellatemmoianca lhnac Jesus ma'a, lhna aptemac: —Mangcaimelhcac ellaqjasquesacpoc mec apquellelto apquellanemmap elpasenwomoc aliemjapma, apno la njan mocjom apoquenammap apiesecsec ma'a, 35 coca ngcowomoc jatoca cnem nema aquiantemecjelha apoquenammap anac ma'a, jatoca ellaqjasquesacpo mec ma'a apquellelto apquellanemmap aliemjapma—lhna aptemac Jesus ma'a. 36 Lhna aptemac na mocjom Jesus apietquescama: —Mancolatsema aniaqtemenec napocja apquetcoc ietamopai'a apjalhnancoc la'a, angelapama nentalhnema apjapac, ncanec antewacsec jata apjalhnancoc lhec nentalhnema, melhejec jata po'oc ietamopai'a. 37 Mancolatsema angiatmoc vino alhnancoc iempejec lhennenga aquietnemacja la'a, ncanec ngcopaclhec jata aniem'o aliaclheiam vino alhnancoc ma'a, nentewasquec na vino cacpota njan iempejec. 38 Coca ntasec angiatmoc vino alhnancoc iempejec alhnancoc najan. 39 Apieccono la enenlhet vino lhennenga aquietnemacja, meltejec jata einec mocjom vino alhnancoc, ncanec acto tep anquec acmases ma'a vino nac lhennenga—lhna aptemac Jesus ma'a.
Capítulo 6

Apqueltamesaicamoc Jesus apquelaptecamoc trigo acnem nennecjelha
1 Acnem sabado lhnac Jesus cacpota njan apqueltamesaicamoc apqueljalhtepelhquetmo lhnac aisecsec aniep apquenammacpelha trigo. Necsa apquetlhengama lhnac, apquelapteiancoc trigo apactec apqueltamesaicamoc ma'a, apquellactelheianco lhnac na apmeio'oc ma'a cacpota etawancoc. 2 Apqueluetaianquec nac fariseo m'a, lhnac aptaiancoc: — ¡Mancoltemac jenganemacja Moises anmacmama' acnem nennecjelha'! —lhna aptaiancoc 3 Apcatemmoianca lhnac Jesus ma'a, lhna aptemac: —Apquelietsateianquec niecje quetlhengcap waccajac, aptemo lhnac na nec David annenga, mec nac ngcaqjemac cacpota njan apquetlhelhma'ac ma'a. 4 Aptalhnenwaiacmo lhnac David ma'a conne Engiapom Neten apnemacja, ca aptaseiacmo' lhnac pan Engiapom Neten nema acpecquencasecama, ca apquellaianco lhnac na apquetlhelhma'ac ma'a. Wanlha lhnac niecje sacerdotes aptecamoc ma'a. 5 Co'o asto nac enenlhet asqueniem'o neten astaiecjo enenlhet apanque, asientalhnemo njan ewanque' atnejec allanac enenlhet'awoc ellanamoc, niecje acnem nennecjelha nac—lhna aptemac Jesus
Jesus aptacmelcasecja acmasca apiempec acnem sabado
6 Sabado lhna ntemac mocjom, apmeiecjo lhnac Jesus nemacnecjelha cacpota etlhecmocsec enenlhet'awoc ma'a, apnenquec nac lhema enenlhet aquiaqsecja iennacja apmec ma'a. 7 Apquelemjaseianca lhnac apaqto'oc Fariseos Jesus, cacpota njan jengetlhecmoscama jenganemacja Moises, apquelmajai'a eluetancoc aptacmelcasecja enenlhet anac, cacpota eleltennascacjac apquelemjama apmania ie, aptacmelcasecja acmasca apiempec acnem nennecjelha. 8 Apiamawec nac Jesus ma'a, lhnac aptemac apcanemo enenlhet actaqjema apmec: —Etnemecja neten, etnenwom no apiesecsec enenlhet anac—lhna aptemac Ca apquenmecjo lhnac neten, apquenenwecjo lhnac apiesecsec enenlhet ma'a. 9 Ca apquellanei'o lhnac na Jesus enenlhet'awoc ma'a, lhna aptemac: —¿Nqueltemenque nlho jenganemacja Moises angellanac caselha altacmelo, nlhoca la caselha ncolatsecama, je? ¿Nqueltemenque nlho njan jenganemacja Moises anwonquesec tep, nlho ca la manwonquesec tep?—lhna aptemac 10 Apquellanei'awec nac Jesus aplhamacjo enenlhet'awoc ma'a, lhna aptemac Jesus apcanemo enenlhet lhec: —Epeiwesecja no apmec—lhna aptemac Ca apeiwesecjo lhnac apmec ma'a, colhuawec anquec nac ntacmelecjac. 11 Mang na ngquescamac annatjescamo apquelemjama apmania ie m'a, apquellempai'awec nac apquellanecja apqueltacja apquenmajai'a etselhnanac Jesus.
Apqueliequiescama Jesus 12 apqueltamesaicamoc
12 Netamen, apmeiecjo lhnac Jesus apcanetuecjo neten metaimong acjaiam, apnaiacmec nac pelhaso puangco m'a apacmetquesecamo Engiapom Neten. 13 Ca atsai'o lhnac ma'a, apquellaweianca lhnac lhamacjo apquelieplecama cacpota eliequiecsec 12 enenlhet, ca apquelapascamo lhnac cacpota elpaiacsec ania'a actacmanma. 14 Lhnac apqueluesai'a jeng, Simon aptemescasecjo apuesai'a Pedro, cacpota njan apialheng Andres. Santiago, Juan, Felipe, Bartolome, 15 Mateo, Tomas, Santiago Alfeo apquetca, Simon apto lhna mota apcammelhaicama apuesque co Roma, 16 Judas Santiago apquetca, cacpota njan Judas Iscariote, apto lhnac apselhnanoncoma Jesus ma'a. 17 Ca apquelentepecjo lhnac neten acjaiam metaimong ma'a, apcanwectamo lhnac metquelha acjaiam lhepop, ca apcannuei'o lhnac na apentalhnema apquelieplecama cacpota njan po'oc enenlhet apquelleniem'o iocjalhma Judea, Jerusalen, apiau'acja temma Tiro, cacpota njan Sidon. 18 Apquenmajai'a ellailhoc Jesus apqueltennaicama cacpota njan eltaqmaluomoc ma'a. Cacpota njan anmaicama nac queliaqjameioc, apqueltacmalueiacmec nac ma'a. 19 Lhamacjo lhnac apquenmajai'a enmanwomoc Jesus ma'a, apqueltacmelecjec nac na aniem'o apmopuana.
Apqueltemo antec napaqtec Engiapom Neten
20 Apquellanei'awec nac Jesus apqueltamesaicamoc, lhna aptemac apquellanemo: —Apquellenniemawec quetlhengcap metca caselhaja apanco'oc, ncanec Engiapom Neten etnesquesancoc jata apquennemolhema. 21 —Apquellenniemawec quetlhengcap allaqjemo mec, ncanec eliapqanmecjac jata. —Apquellenniemawec quetlhengcap aliepuamecamoc apualho'oc, ncanec ngcolpaijecjac jata apualho'oc. 22 — Apquellenniemawec quetlhengcap apqueltacnommap anac, nema aluannaicama cacpota njan nema alentepquescama apqueluesai'a quetlhengcap aniem'o jelieplecama asto enenlhet asqueniem'o neten astaiecjo enenlhet apanque. 23 Ngcolpaijecja no apualho'oc quetlhengcap ncanec etlhewancoc jata aquiawai'a aquianmoma m'a neten. Lhnac nanec aptaiancoc enenlhet'awoc apquelieijenca meliamolhma nac, apnactewascamo lhnac nanec apquetsecama ania'a annenga apancoc Engiapom Neten. 24 — ¡Aii, quetlhengcap laie nema nac apquelletsecama, ncanec nnelha ntac alpaijecja apualho'oc. 25 —¡Aii, quetlhengcap laie' apqueliapqaneiacmo nac, ncanec ngcowac jata mec annapma! —¡Aii, quetlhengcap laie' apquellaqtemmaicama mota, ncanec eliapcalhec jata aniemo aliepuamecamoc! 26 —¡Aii, quetlhengcap laie' nnengque niecje aliaspeianca, ellengancoc jata aquientalhnama aniem'o ngcollatsecama apqueltemacja, lhnac nanec na ntemac apquellengaianco aquientalhnema apquetsecama ania'a annenga meliamolhma, nnengquec nac nanec na aliaspeianca niecje m'a!—
Nengamelaiam apquellelto jengellammelhmacja
27 — Quetlhengcap apqueltacmelquescamo nac jellailhemo colhuawe nac, asqueltawec alleltennasancoc: Ellamelama ta apquellelto meltacmelquescama nac, eltacmelcaso ta njan apquellanei'o apquellelto apqueltacnoncoma nac. 28 Ellamoc jata actacmanma apaioma apquellelto apqueliamenaicama nac quetlhengcap, elpaqmetquesques Engiapom Neten cacpota ngcoltacmelec apquellelto apqueluannaicama quetlhengcap. 29 Nnec jata nquec actecpongo apmalhempenec lheiap, meiacmongcasecja nque'. Nnec jata ngquec acleccaso apcaclammap, enianco ta njan esacjac aptalhnema apuenactema. 30 Nnec jata nquec alelmalhnenca caselha apanco'oc, ellamoc jata. Nnec jata anquec annactencaso caselha apanco'oc, ngcotnama ta nquec ma'a. 31 Eltacmelques po'oc, apquellelto la njan ngcolhec altacmelcaso quetlhengcap. 32 Coca apquellelto la quetlhengcap ellammelama wanlha apquetlhelhma'ac apancawe nac, coca mellamelacmoc ma'a apquellammelhmacja la'a, mangcolatsema m'a, ncanec aptaiancolha njan enenlhet anac meliamolhma m'a. 33 Coca apquellelto la quetlhengcap eltacmelquesec apquetlhelhma'ac apancawec, jawe m'a apquellammelhmacja la'a, mangcolatsema m'a, ncanec aptaianquelha njan enenlhet meliamolhma nac ma'a. 34 Coca quetlhengcap wanlha apquellelto la ellancoc apqueliaqmoma apquenmopuanca'a nac eltacjeso, mangcowacmoc mocjom nentemacja m'a, ncanec aptaiancolha njan enenlhet anac meliamolhma m'a. 35 Ngaimelhquec nac na quetlhengcap ellamelama apquellammelhmacja la'a, elleltacmelques cacpota njan ellancoc apqueliaqmoma metca apquellailhema apqueltacjescamo caselhaja apqueliaqmoicamoc. Netamen Engiapom Neten jata ellancoc aquiawai'a aquianmoma, cacpota etnancoc apquetca'ac. Engiapom Neten apasmec na enenlhet meliamolhma nac, 36 apquelietnawec na napaqta'ac ma'a. Quetlhengcap na etnamoc elietnajo ta napaqta'ac enenlhet'awoc—lhna aptemac Jesus
Metca nengiaqmongcasecja aptemacja enmo'oc
37 Lhna aptemac mocjom Jesus apquetlhecmoscama: —(CAMBIAR JUZGAR...Ver Mateo 7) Meiaqmoncasecja nquec actemacja po'oc, cacpota njan Engiapom Neten meliaqmoncasecjec aptaianquelha quetlhengcap. Melpescama nquec po'oc, cacpota Engiapom Neten melpescatec na quetlhengcap. Eniamelecjo ta mocjom po'oc, cacpota njan Engiapom Neten ellamelecjoc jata quetlhengcap. 38 Ellamoc jata caselha po'oc aimelhquelha la'a, cacpota njan Engiapom Neten ellancoc caselha aimelhquelha la quetlhengcap, ellancoc jata aquiawai'a caselha eiettacquesancoc jata. Ca ctonac apquellaicamoc anac quetlhengcap po'oc, Engiapom neten jata njan ellancoc quetlhengcap. 39 ¿Apuanque nlho metca apaqto'oc eiantemoc lhemec po'oc metca apaqto'oc? ¿Epallemmo nlho lhemec, jela'a? 40 Co'o asto asquetlhecmoscama quetlhengcap, neten anquec asiaspommalhca, moiacmongcasecjec apqueltemacja ngcollatsecama enenlhet'awoc, wanlha coca asquenmama mota tacja, jata njan eltejec quetlhengcap ncanec asquetlhecmosecamoc, coneng apancawec quetlhengcap molhno co'o. 41 Mellanama nquec wanlha enenlhet'awoc apquellanecamoc anac ngcolatsecama, ncanec quetlhengcap na mantec apquellanecamoc caselha ngcolatsecama. Queietsec allelielhaclhema m'a, coca quetlhengcap awanjec allelielhaclhema apaqto'oc. 42 Mangcollapuanquec elleljatsoscasancoc queietsec allelielhaclhema po'oc, ncanec nan quetlhengcap nietnec aquiawai'a allelielhaclhema mangcolleluetasquescama lhma' m'a. ¡Janet apualho'oc quetlhengcap! Elleljatsosamoc coca apmania ie aquiawai'a allelielhaclhema apaqto'oc quetlhengcap, netamen apuanca'ac jata eljatsoscasancoc queietsec allelielhaclhema po'oc—
Iamet actacmanma cacpota njan iamet ngcolatsecama
43 Lhnac aptemac mocjom Jesus apietquescama: —iamet actacmanma mangcawangque ngcoilhec aquielhna ngcolatsecama, iamet ngcolatsecama mangcawangque ngcoilhec actacmanma aquielhna. 44 Aiwompenec mangcawanquec ngcotnecjac aquielhna nac aicaja cacpota njan nosa'. Angiecpelcoc iamet nenguet'o la aquielhna. 45 Nnawec na m'a, enenlhet apiamolhma apqueliata mota actacmanma, aniem'o actacmanma apualhoc, coca enenlhet meijamolhma nac, apqueliata mota ngcolatsecama, aniem'o ngcolatsecama apualhoc, aclanei'o la apualhoc enenlhet, ngcotiepoc apaioma m'a—
Enenlhet nema apiamo ntasec apquellanai'a apnemacja
46 (CAMBIAR COMO EN MATEO) Lhnac aptemac mocjom apietquescama Jesus: —Apuesque apanco'oc mota jeleltangcoc quetlhengcap, coca acjemo, mangjelleliejecjojo. 47 48 Coca apquellailho la asquetlhecmoscama nac, jelleliajacjo la njan, etnancoc jata malha enenlhet apquelanai'a apnemacja acjaiam lhepop, enmetmoc jata malhec atco'oc cacpota elanquesec memong atco'oc. Netamen ngcowac iemmen aquienweiam aquiennactema, ngcotienguomoc apaclhanma m'a, coca mangcoiaqnenec jata apnemacja, ncanec ntasec apquelanai'a. 49 Coca apquellailhemo la asquetlhecmoscama, melleliejecjo la njan, etnancoc jata malha enenlhet apquelanai'a apnemacja nataita'a, anawa' atco'oc apquelanquescama m'a, netamen ngcowac iemmen aquienweiam aquiennactema, ngcotienguomoc apaclhanma, ngcoiacnengquesec jata lhamacjo m'a—
Capítulo 7

Aptacmelquescaiam moc apaioma Jesus apquennencasecama apquemjama apmanie soldados romanos
1 Apenescanquec nac apquetlhecmoscama Jesus ma'a, ca apmeiecjo lhnac natemma cafarnaum, 2 aplomaca lhnac ma'a apquemjama apmanie soldado romano, nemmasquema lhnac ngcaqjemac apquennencasecama m'a, ngcaicama lhnac apquetsepma m'a. Awanjec anquec nac apcamelaiam apquennencasecama apquemjama apmanie m'a. 3 Aplengai'o lhnac aplhenammap Jesus ma'a, ca apquellapascamo lhnac moclhem'a apquelemjama apmaniaie judios, cacpota eliantenwacjac Jesus ma'a, etacmelcasecja apquennencasecama. 4 Apqueluecjo lhnac apnacja Jesus ma'a, lhnac aptaiancoc apquellanemo: —Epasem nac lhec ja'e apquemjama apmanie soldado romano, nietawec ampasmoc ma'a ncanec apiawe lhma enenlhet anac ma'a, 5 jengellamelaiacmec ennenco'o m'a nengelto judios, jengellanesquescanquec nengacnecjelha ennenco'o m'a—lhna aptaiancoc 6 Ca apmeiecjo lhnac Jesus ma'a, apqueltecjo lhnac apquetlhelhma'ac ma'a. Necsa apquellanquetuecja lhnac soldado romano apnemacja, ca apuetai'o lhnac apquelhiaiacmo ma'a, apquellapascamo lhnac mocjom aptema po'oc cacpota eleltennacsec lhema ania'a, lhnac aptaiancoc ma'a: —Wesque', nguannalhquec lhec apualhoc apquemjama apmanie emoc tacja lheiap, 7 ca jeiapaso co'o altennacsec lheiap, wanlha lhnac lhec moc apaioma etne lheiap cacpota etacmelecjac apquennencasecama m'a. 8 Ca aplheno lhquec na apnema apuesque apancoc, apcasecjai'o mota, cacpota njan apnema soldado apancoc, apcacjanquec na apquenmacmesaicama apancoc ma'a, apquellaianque mota moc apaioma apmac'acja la elapacsec, ca apta mota apquellano: "¡Enmeiacja m'a, elelhiem!" —Apqueleliajacjawe mota'a. 9 Niemascangquec nac apualhoc Jesus aplengai'o m'a, lhnac aptemac apquellanemo: —Awanjec anquec mangjei'asqueiam enenlhet anac ma'a, motai'ac co aptonac ma'a co Israel—lhna aptemac 10 Ca apqueltaqjemo lhnac apqueltema po'oc apquemjama apmanie soldado romano, apqueluetanwecjo lhnac aptacmelecja apquennencasecama m'a.
Aptescasecja mocjom apjalhnancoc apiesecsec apquenmasquenwaiacmo lhentampe atca
11 Apquenmeiecjo lhnac Jesus cacpota njan apqueltamesaicamoc natemma Nain, mang nantec enenlhet'awoc apquelieploma m'a. 12 Ca apquellanquetquescamo lhnac quieto nentalhnemacja atong apiau'acja temma, apqueluetai'o lhnac apquelletsoma apquenmajai'a elcatonnec lhema apquetcoc apquetsepma'. Lhentampe lhnac atca m'a, wanlha lhnac lhema pjapac, aplhaniec nac enenlhet'awoc apquelieploma m'a. 13 Apietnai'awec nac na'at Jesus lhentampe, lhna aptemac: —Mowen'— 14 Ca aptetescaiacmo lhnac apietnacja apjapac ma'a, apmanweiacmo aptanema. Apquelanueiacmo lhnac enenlhet apquellelto apquelletsoma, lhnac aptemac Jesus apcanemo apquetcoc apquetsepma: —¡Etnemecja neten!—lhna aptemac 15 Mpelapquescangquec nac apquenmecjo neten apquetcoc ma'a, ca apqueliatoncomo lhnac na m'a. Ca apiantemecjo lhnac Jesus acnacja ngquen ma'a. 16 Awanjec anquec nac apquellai'a enenlhet'awoc apqueluetai'o m'a, lhna aptaiancoc: —¡Apua'ac jenque'e secama ania'a neten apanque apiaspommap, Engiapom Neten apcapascama cacpota epasmoc apquennemolhema!—lhnac aptaiancoc ma'a. 17 Colhuawec anquec nac ngquetcaicama ania'a nac, iocjalhma aquieto Judea cacpota njan necjau'ac.
Apcapascama Juan apcanet apqueltamesaicamoc apnacja Jesus
18 19 Apqueltamesaicamoc Juan apquellauquescama iemmen angiapom apquelleltennaseianca lhnac ania'a lhamacjo actemacja apquelanai'a Jesus, ca apquellapascamo lhnac Juan apcanet apqueltamesaicamoc ma'a elelmalhnenwacja Jesus apto quelha aplhenammacpo mota ewa', nlho ca la angellailhec po'oc. 20 Ca apquenmeiecjo lhnac apnacja Jesus ma'a, lhna aptemac apquellanemo: —Jengellapasquec lhec Juan cacpota angellelmalhnama. ¿Lheiap anlho apto aplhenammacpo na mota ewa', nlho ca la angellailhec po'oc?—lhna aptaiancoc. 21 Ca apqueltacmelcasecjo lhnac Jesus colhuawec anquec lhamacjo actemacja anmasca apiempeioc ma'a, metca apaqto'oc, cacpota njan queliacjameio anmaicama. 22 Lhna aptemac apquellanemo Jesus Juan apquellapascama: —Enmeiacja apnacja Juan, eleltennascacja lhamacjo actemacja apqueluetai'a cacpota njan apquellengai'a. Apqueluetacje lhma' metca nac apaqto'oc, ngqueltacmelacjec na apquetlhengama apqueliactecama nac, cacpota njan nemmasquema actepelcammalhca nac eniempec. Apquellengacjec na lhma metca apaico'oc. Apquellelto apqueletsepma aptocjec na mocjom apjalhnanco'oc apiesecsec apquenmasquenwaiacmo. Enenlhet apquellelto metca apquelletsecama apquelleng'ac ania'a actacmanma. 23 Apquellenniemawec enenlhet mangjelieniecja nac necsa apqueluetai'a asquelanai'a acpelapquescama—lhna aptemac Jesus. 24 Apqueltaqjemo lhnac Juan apqueltamesaicamoc ma'a, ca apquelpacmetquescamo lhnac Jesus napaqtawec enenlhet'awoc ma'a actemacja aplhenammap Juan, lhnac aptemac apquellanemo: —¿Co la lhta actemacja apualho'oc quetlhengcap apquellanemacja elhoc Juan necsa apquenmajai'a eluetac ma'a metquelha temma, je? ¿Apquelieujecama panque nlho lhta m'a malha acto nac ocja la'a aquieujesaicama la alhcaiam? 25 ¿Nlho ca la nquescama nac apquetsecama, apmennawe nac apquelentalhnema i'e? ¡Mma! Enenlhet apto apquelentalhnema apmennawe, nietnec na acpaijecja apualhoc aniem'o ngquescama pataccom apancoc, aploca mota apnemacja acmennawe ncoie'. 26 ¿Co la lhta actemacja apualho'oc apquellanemacja elhoc quetlhengcap Juan? ¿Engiapom Neten secama ania'a apanco i'e? Jai', jawe niapac ma'a, apto neten apanquec apiaspommap apiesecsec apquetsecama ania'a m'a. 27 Juan najan aclheianmo lhnac nanec Engiapom Neten apaioma, lhnac na ne ntemac: «Anwapacsec jata secama ania'a ejencoc apmanie lheiap cacpota epenescasoc amai apancoc» 1 28 Jawe ngiapac anquec, Juan apto neten apanquec apiaspommap apiesecsec enenlhet'awoc jengque'e, coca m'a apiesecsec anac Engiapom Neten apquellasennaicama apnec meiennactema njan ma'a, coca neten apanquec mocjom ma'a, meieca'ac Juan ma'a. 29 Aplhamacjo enenlhet'awoc alhta apquellengai'a Juan, cacpota njan apquenmaicamoc pataccom impuesto ancoc Roma, apqueleliajacjawe lhta Engiapom Neten, ca apquellauquesanco lhta njan conne iemmen Juan ma'a. 30 Coca fariseos cacpota njan jengetlhecmoscama jenganemacja Moises malhta ngcomac'ac elleliejejoc Engiapom Neten, apqueltacnewacque lhta, malhta elleltoc na ellauquesancoc iemmen Juan ma'a. 31 ¿Sec la alietquesec enenlhet nengwanlha nac que? 32 Malha niecje nematcac apquennaiwoma nac naiwommalhquelha la'a, apqueluenema mota apqueluannama po'oc: "Coca ennenco'o nelpaiwascasquec niecje iompa'at acpaiwoma, mang coca eleltama quetlhengcap ma'a, nennecmasengque niecje njan nennecmascama acmaiose enwalhoc, mang coca eliepcalhac quetlhengcap" ca aptaiancolha nematcac ma'a. 33 Ca aptaiancoc na quetlhengcap ma'a, apqueluetai'ac Juan meujanenguaiam aquietnacja actacmelaicama lhma, metomac pan, meiamac na vino, apquetlheno njan quetlhengcap queliacjameio' acmaicama m'a. 34 Netamen apuai'o njan Enenlhet Apquetca nac, apasenwacme mota actacmelaicama lhma, aptauquec na aptoma, apienquec najan, coca apquetlhenquec na meiapcanueiam etawecja, mancastengama einec, apquetlhenque mota apquelpalhacuaiam enenlhet meliamolhma cacpota njan apquenmaicamoc patacom impuesto ancoc. 35 Niecje menmaicamoc tacja quetlhengcap ma'a, alhaiec jatoca eluetac actemacja apquelianweiacmo m'a aniem'o Engiapom Neten 2 — 36 Lhema fariseo apqueltemo Jesus etasemoc lhemec apnemacja m'a, ca apmeiecjo lhnac ma'a, apnemo lhnac Jesus ma'a. 37 Nlomaca lhnac na m'a nqueluana acto neten anquec ngcoijamolhma, aclengai'o lhnac ania'a aplhenammap Jesus apuai'a m'a, ca acsomo lhnac alhancoc acmases aimes acmennawe ncoie'. 38 Ca acnaiacmo lhnac aquieto apmancoc Jesus ma'a, man na ngquescamac acuenemo m'a, acsepquenentamo lhnac na aimen'oc aqto'oc, alpaluectamo lhnac tacjalhet apmanco'oc Jesus. Ca aliemasqueso lhnac apmanco'oc awa' Jesus ma'a, alpetsesmo lhnac na apmancoc, ca actemesquescamo lhnac na acmases aimes aimenec apmancoc ma'a. 39 Apuetai'ac nac fariseo apto apnemacja m'a, lhnac ntemac apualhoc: — Colhtema nac aptema secama ania'a apanque' enenlhet anac, eiecpelcoc lhec ngcoijamolhma nqueluana nac—lhna ntemac apualhoc. 40 Coca lhna aptemac Jesus: —Simon, engiailho no asmac'o nac altennasama lheiap— —Jai', anwailho ta jengetlhecmoscama— lhnac aptemac Simon. 41 Lhnac aptemac Jesus apcanemo m'a: —Apcacjaianquec nac apcanet enenlhet apqueliaqmoianco lhnac pataccom apuesque apanco'oc, lhema lhnac quiniento patacom, po'oc nac na cincuenta patacom. 42 Mannoca eltacjescamoc apqueliacmoicamoc ma'a, mamma lhna songquec acnaiancolha m'a, ca apquellaianco lhnac apancawec apuesque m'a. ¿Co la aptacja lheiap, se lha apto neten apanquec aquietnema apcamelaiam apuesque ie?— 43 Ca apcatemmoianca lhnac Simon: —Ca aquiawai'a lhquec apqueliaqmoma —lhnac aptemac Simon Lhna aptema Jesus: —¡Jai, apietawe'! 44 Elanjo no nqueluana nac, ngquelieniesque emancoc aimenec aqto'oc, ca aliemasacjo njan emancoc awa', lheiap coca mangjeiangcoc iemmen asqueliengiescama la emancoc astalhnenwo'o lhquec apnemacja. 45 Ca nqueluana nac mangcasac alpetsesma emanco'oc, lheiap coca mangjepaiwesac mang na epetsesac emec. 46 Ngqueltelhnangquec acmases aimes emanco'oc, lheiap coca mangjetnescasac aceite epatec. 47 Awanjec anquec jeiamelaiam nqueluana nac, ncanec asmasquesquec aquiawai'a ngcolatsecama alanai'a, coca enenlhet quetsec la'a nema acmasquescama meijamolhma, quetsec na apcamelaiam—lhna aptemac Jesus. 48 Netamen Jesus lhnac aptemac apcanemo nqueluana lhquec: —Mmasquesalhquec ngcoijamolhma lheia'—lhna aptemac 49 Coca lhna aptaiancoc apquelpacmeiasmo moc apancawec apquellelto apquellanemmap: —Apientalhnesacpe nac enenlhet anac, aplheno apmopuana emasquecsec nentemacja ngcolatsecama—lhna aptaiancoc ma'a 50 Coca lhnac aptemac mocjom Jesus apcanemo nqueluana nac: —Ngwoncasquec tep lheia' aniem'o mangcoiasqueiam, cotaqjecja cotacmelcasocjo ta—lhna aptemac.
1Malaquias 3:1
2La gente no acepto a Juan el Bautista ni al Hijo del Hombre
Capítulo 8

Ngqueluana'ac alpasmoma lhnac Jesus
1 Apiaijecama lhnac Jesus lhamacjo apiau'acja la temma cacpota njan temma apquetcoc la'a, apqueleltennascanquec nac ania'a actacmanma aptemacja Engiapom Neten, apquetlhelhma'ac noca 12 apqueltamesaicamoc mo'oc nema alleltema apostoles. 2 Apquetlhelhma'ac nac na moclhem'a ngqueluana'ac ma'a, lhennenga actaianco lhnac anmasca aiempeioc cacpota njan queliaqjameioc anmaicama, Jesus coca apqueltacmelquescaiacmoc ma'a. Ca aluesai'a lhnac jengque'e, Maria nema altema lhnac na Magdalena, apquelentepquesquescamo lhnac siete queliacjameio au'alhoc ma'a. 3 Juana, atawa' lhnoca apuesai'a Cuza, apuesque Herodes Antipas nac apqueltacmelquesquescama
Nema aquietquescama aniep angiapom
4 Man na ntec enenlhet'awoc apcacnecjo m'a apnacja Jesus, apquelleniem'o lhnac neiawa' m'a, ca apqueltennaianca lhnac Jesus ma'a lhema apietquescama, lhna aptemac: 5 —Apcanmec nac actec lhema enenlhet, moc lhem'a actec nac mpalueiacmoc amai, nemo lhnac alteioiacmo m'a, aluai'o lhnac anata tco'oc, actaweianco' m'a. 6 Mo'oc actec nac mpalueiacmoc alhiewac'acja lhepop tacjalhet metaimong, colhuawec nac nteiapma niecje', coca ngqueliemai'ac ncanec mamma iemmen ma'a. 7 Mo'oc actec na mpalueiacmoc tacjalhet meneuque actec acnaicamoc conne lhepop, ca actengamo lhnac lheme meneuque m'a, ngquelapecjec nac anammalhca, ca aletsepmo m'a. 8 Coca mo'oc actec nac na mpalueiacmoc actacmelacja lhepop, ntasec anquec nac actecteiapma' m'a, nguaiacmec nac 100 actec lhema apettec ma'a. ¡Eltacmelcaso no apquellailhemo cacpota eliamwomjo quetlhengcap!—lhna aptemac Jesus 9 Ca apquelelmalhneianca lhnac apqueltamesaicamoc Jesus ma'a, lhna aptaiancoc: —¿Selha aquietquesammalhca aplheno nac que?— 10 Ca apcatemmoianca lhnac Jesus: —Apqueltemawec Engiapom Neten elianwomjoc quetlhengcap caselha aquielhammalhca aptemacja apanco'oc, coca napocja enenlhet'awoc asquetlhecmosque mota asietquescama, apqueluet'a niecje coca malha manguet'o aptaiancoc, apquellengai'a niecje' coca malha monleng'o aptaiancoc. 11 Jai', colhua smac'ac alpeiwescasecjac asietquescama nac. Actec aquietquesammalhca Engiapom Neten apaioma. 12 Moc lhem'a enenlhet apquellailhemo ania'a, colhuawec anquec na ngua'ac queliacjameio', ca acmenielhcaso' ania'a lhquec cacpota eliascamoc, melwongcasacpec tep na m'a. Ca jeng enenlhet anac, malha niecje amai acpallueiam actec. 13 Apcacjanquec enenlhet apquellailhemo ania'a, ngquelpaijacjec na apualho'oc, colhuawec na apquenmac tacja ania'a, coca aquiacuatacjo ncoie', ca acpelapqueso acuai'a aquientalhnema, ca apqueliengiacjo apquelieploma Engiapom Neten, ncanec mangcoluaiacmoc conne aicapmen'oc. Ca enenlhet anac, malha aniep lhepop tacjalhet metaimong. 14 Napocja enenlhet apquellailhawe niecje' ania'a actacmanma, wanlha atlheianma mota apualho'oc patacom, cacpota njan apquelleltemo ngcoitec nquescama caselha apanco'oc, acto njan alpaiesecja mota apualho'oc aniem'o allanesquescama actacmelaicama lhma apanco'oc, ca ncanec eluancamancoc ania'a nac, mamma apquellanai'a caselha actacmanma. Ca jeng enenlhet anac malha aniep ngquescama meneuque. 15 Po'oc na enenlhet apqueltacmelcasawec apquellailhemo, apquenmec na tacja', apquelleliajacjawec najan, ngcoijec na apquetlhenquescama, ngua'ac na nquescama apquellanai'a actacmanma. Ca jeng, enenlhet anac apquelietquesammap malha aniep lhepop actacmanma' —lhna ptemac Jesus ma'a. 16 — Nengapommatcasquec jata ngque' talha lhancoc ¿Enwanque i'e ampecquenec coneng nengietnemacja', nhlo ca la angapcacsec ma'a? !Mma'! Neten nelhanmac ma'a, cacpota ngcotsasquese lhma' apquellelto apquelentalhnema conne pa'at, 17 cacpota lhamacjo caselha acnaicamoc anac ienaqtesa lhma', ngcoluetalhca ta, cacpota njan lhamacjo alposemmalhca nac caselha, ngcolhnangconguatac jata alhnacjojo 1 . 18 ¡Eltacmelcaso no apquellailhemo! Engiapom Neten jata ellancoc mocjom tep anquec apquelianweiacmojo, coca meltaqmelcaso la apquellailhemo, ngcolhec jata aljatsosquescactamo atquetsec la apquelianweiacmojo —lhna aptemac Jesus.
Jesus ngquen cacpota njan apquelialheng'a alquetansema m'a
19 Apquetlhecmoscanquec nac Jesus conne pa'at ma'a, ca alluai'o lhna ngquen cacpota njan apquelialheng'a, alquetansemo lhnac Jesus ma'a, mannoca ngcoluaiacmoc apnacja m'a , aplhaniec na songquec enenlhet'awoc ma'a. 20 Ca aptemo lhnac apcanemo lhema enenlhet Jesus: —Ngquen cacpota njan apquelialheng'a tep anac pa'at, nquelleltawec ngcolpaqmetquesec lheiap—lhna aptemac. 21 Ca apcatemmoianca lhnac Jesus ma'a, lhna aptemac: —Ngqueluana'ac cacpota njan enenlhet apquellelto apquellailhemo ania'a actacmanma, apquellasecjai'o njan Engiapom Neten, coca elialheng'a m'a cacpota njan meme'— lhna aptemac
Apmasquescama Jesus alhcaiam iemmen aquiennactema
22 Apcanetuecjo lhnac Jesus loma nemmen ma'a, apquetlhelhma'ac apqueltamesaicamoc, lhnac aptemac apquellanemo: —Noc angenmeiacjac mo'oc necja sanga nac—lhna aptemac 23 Ca apteianmo lhnac Jesus necsa aclhengama m'a. Mpelapquescangquec nac apqueltangiai'a alhcaiam iemmen aquiennactema m'a, ntalhnengquec nac iemmen conne loma nemmen, ngcaicama lhnac acuaiwecamoc ma'a. 24 Colhuawec anquec nac apnaqlhatecjasquecja Jesus ma'a, lhna aptaiancoc : —¡Jengetlhecmoscama, nemmac'ac angeluaiwancoc! — lhna aptaiancoc. Ca apquenmecjo lhnac colhuawec anquec neten Jesus ma'a, ca apiamenaianca lhnac alhcaiam cacpota njan iemmen alacjaiam ma'a, mmasquemawec nac ma'a. 25 Ca aptemo lhnac apquellanemo Jesus apqueltamesaicamoc: —¡Apqueliascacme nac quetlhengcap apquelpasmoma Engiapom Neten!— Mpelapquescangquec nac apqueluetai'a m'a, apquellai'o lhnac na m'a, lhna aptaiancoc apquelpaqmetquesammacpo moc apancawec ma'a: —Selha enenlhet aie', wacjo alhcaiam cacpota njan iemmen alacjaiam anac ngqueliajacjojo— lhna aptaiancoc ma'a.
Enenlhet actewascama queliacjameio
26 Apqueluecjo lhnac Jesus cacpota njan apqueltamesaicamoc mo'oc necja sanga, iocjalhma acuesai'a Gerasa, aquieto ammelhacja iocjalhma Galilea. 27 Ca apteiapueiacmo lhnac Jesus loma nemmen ma'a, aptetescai'o lhnac lhema enenlhet aquiawai'a actewascama queliacjameio, mamma lhnac apnemacja wanlha lhnac tacjalhet lhepop apteianmacja, cacpota njan metca aptalhnema apcalhnai'o lhnac ma'a. 28 Ca apuetai'o lhnac enenlhet Jesus ma'a, apqueltanentamo lhnac aptapno'oc napaqtec ma'a, ca ngquescamo lhnac acueneianca m'a, lhna ntemac: — ¡Jesus, Engiapom Neten apquetca! Selha apmac'ac jengeltemesquesec que', nengeleltawec mangjennactewacseje?— 29 Lhna ntaiangcoc alueneianca m'a ncanec apqueliamenaianca lhnac Jesus apmajai'a elentepquesec ma'a, ncanec nnactewascangquec na mota metca nnelha enenlhet anac, apnacteteianquec nac niecje' enenlhet cadena apmeioc cacpota njan apmanco'oc, coca ngcaqjemawec nac ma'a, apquelietepquescanquec na mota cacpota eniengiecjac aquieto metquelha temma. 30 Ca apquenmalhneianca lhnac Jesus ma'a: —¿Co la acuesai'a?— —Quempocjacmec co'o asuesai'a— lhna ntemac atemmoianca m'a ncanec nlhanie canquec nac ma'a. 31 Ca alleltemo lhnac mellapacsec aquieto allengaianquelha queliacjameio m'a, 32 anmajai'o lhnac ngcolentalhnenguomoc ietapomap aptaianco lhnac aptecamoc aquieto acjaiam lhepop ma'a. Apcasecjai'awec nac Jesus ma'a, 33 ca alentalhnenwaiacmo lhnac ma'a, colhuawec nac apquengiaiancoc ietapomap apqueluaiwentamo lhnac acuacmo apqueluaiwenco nemmen. 34 Apqueluetai'ac nac na enenlhet apquellelto apqueltacmelquescama ietapomap, colhuawec nac apquelletcasecama ania'a lhamacjo apiau'acja temma cacpota njan temma apquetco'oc ma'a. 35 Ca apquenmeiecjo lhnac enenlhet'awoc ma'a aquieto acuetammalhquelha, apqueluetanwecjo lhnac na enenlhet queliacjameio actewascama apnemo aquieto apnacja Jesus, aptalhnema lhnac na apnecjac enenlhet anac ma'a, aptacmelecjec nac. Man na ngquescama apquellai'a apqueluetai'o m'a. 36 Apquellelto apqueluetaianco aptemacja aptacmelcasecja Jesus enenlhet anac, apquelleltennaseianca lhnac ania'a actemacja apqueluetaianco m'a. 37 Netamen, apquellelto apquellawacja nac ma'a Gerasa, apquelleltemo lhnac Jesus etiepoc ma'a ncanec awanjec nac apquellai'a. Ca apcanetuecjo lhnac loma nemmen Jesus, aptaqjecjo aquieto Galilea, 38 coca enenlhet anac aptacmalueiam apmajai'ac nac niecje' eieplacjac Jesus ma'a, coca lhnac aptemac Jesus apcanemo: 39 —Etaqjecja apnemacja, eleltennasama ta actacja apasmoma Engiapom Neten lheiap—lhna aptemac Ca aptaqjecjo lhnac ma'a, apqueleltennaseianca lhnac lhamacjo apquellawacja actacja apquelanei'o Jesus.
Lhema nqueluana atcoc atsepma cacpota njan nqueluana acmasca aiempec
40 Apuecjec nac Jesus Galilea, apquenmanquec nac tacja enenlhet'awoc ma'a, ngquelpaijecjec nac apualho'oc ncanec apquellailhenquec nac na m'a. 41 Ca apuai'o lhnac apquemjama apmanie apcaqnecjelha apuesai'a Jairo. Aptetescai'o lhnac Jairo Jesus ma'a, apquelteclhecuai'o lhnac aptapno'oc napaqtec ma'a, apcapiosemmacpec nac ma'a, apqueltemo lhnac emjancoc apnemacja, 42 ncanec wanlha lhnac lhemapac apquetca mmajai'ac nac ngcotsepoc ma'a, doce iantelhcapa ancoc nac ma'a. Apquenmeiecjec nac Jesus cacpota njan Jairo m'a, apquelieplecjec nac na apentalhnema enenlhet'awoc ma'a, apqueliepetcaseiacmec nac Jesus ma'a. 43 Nlomaca lhnac apiesecsec enenlhet lhema nqueluana acmasca aiempec, doce iantelhcapa lhna nguaiacmoc ma'a, awanjec nac acteiapma ema ancoc. Nsaujommalhquec na mota pataccom ancoc aquianmonquescama pongja niapom, coca mang nac ngcotacmalueiacmoc ma'a. 44 Ca actetesaianco lhnac aquieto apcapoc Jesus, acmanweiacmo nepua'a apcaclammap ma'a, colhuawec anquec nac ntacmelecjac ma'a. 45 Apquelelmalhneianca lhnac Jesus enenlhet'awoc ma'a, lhna aptemac: —¿Selha jemanguo nac que?— lhna aptemac Mannoca elliamoc enenlhet'awoc ma'a, coca lhnac aptemac Pedro: — Jengetlhecmoscama, apuacja'ac enenlhet lheiap apqueliepetcasacme'—lhnac aptemac. 46 Coca Jesus lhnac aptemac mocjom apcanemo Pedro: — Aslenganquec lhec actepo asmopuana, ca ncanec asmac'o nac aijojoc se lha jemanguo nac que— lhna aptemac 47 Manna ngcomowanac ngcoilhanmoc nqueluana m'a, alpelhiennemo lhnac ai'a m'a, alteclheio lhnac atapno'oc napaqtec Jesus, aclheianmo lhnac wanlha actengia'a actacmalueiam ma'a. Apquellengai'ac nac aplhamacjo enenlhet'awoc actacmalueiam ma'a nqueluana nac. 48 Coca lhna aptemac Jesus apcanemo nqueluana nac: —Ntacmelacjec lheia aniem'o ngcoiasqueiam, cotaqjecja ta aquieploma acpaijecja au'alhoc—lhna aptemac 49 Apenescanquec nac apacmetquescama nqueluana Jesus, ca apuaio'o lhnac apquennencasecama Jairo, apnemacja lhnac apquempai'ac, lhnac aptemac apcanemo Jairo: —Jairo, ngcaqjoc emjamcoc jengetlhecmoscama m'a, ngquetsepquec lhec apquetca lheiap —lhna aptemac apquennencasecama. 50 Aplengai'ac nac Jesus actacja ania'a, lhnac aptemac apcanemo Jairo: —Meniaga, meiasquem coca, ntasec jata ngcotnec ma'a— 51 Ca apqueluaiacmo lhnac apnemacja Jairo m'a, apqueltemo lhnac Jesus elentelhec wanlha Pedro, Santiago, Juan, cacpota njan ngcana'ac nematca. 52 Lhamacjo enenlhet nac apiapqalhemac ma'a, coca lhna aptemac Jesus apquellanemo: — Meliapqalh, mangcotsepac nematca nac, nntengque'—lhna aptemac 53 Apqueluannaicama lhnoca enenlhet'awoc Jesus ma'a, apquelliamawec nac atsepmo nqueluana atco nac ma'a. 54 Ca apmamo lhnac amec nqueluana atcoc Jesus ma'a, lhnac aptemac apcanemo: —¡Cotnemecja neten!— 55 Ca actaiecjo lhnac mocjom alhnancoc ma'a, colhuawec anquec nac ngquenmecjac neten, ca apqueltemo lhnac na ngcollangcoc actoma m'a. 56 Ngquelpelapquescangquec nac aluetai'a ngcana'ac, coca Jesus apqueltemo lhnac mancotlhenama actacja aluetai'a m'a.
1Todo lo que todavia no se entiende claramente de las enseñanzas de Jesus, se llegara a entender claramente
Capítulo 9

Apquellapascama Jesus doce apqueltamesaicamoc cacpota elpaiacsec ania'a actacmanma
1 Apcanquesecjec nac Jesus doce apqueltamesaicamoc ma'a, apquellaianco lhnac na apquenmopuanca'a m'a, apquelientalhnemo cacpota njan eltacmelquescamoc anmasca apiempeioc, ca njan eliengiescasecjac queliacjameio' anmaicama enenlhet'awoc. 2 Apquellapascamo lhnac etlhenec ania'a actacmanma aptemacja aptaiecja apuesque Engiapom Neten, cacpota eltacmelquescamoc na anmasca apiempeioc ma'a 3 Lhnac aptemac apquellanemo Jesus: —Melletsauanquec apquelletsecama necsa apquetlhengama, iamet apquelteiasecamoc apmaniaie', nacjapa, aptecamoc, patacom, cacpota njan wanlha etnamoc apquelentalhnecama nac, metca po'oc aptalhnema. 4 Apqueluacmec jata nquec lhema pa'at, eniacjamoc jata m'a acuacmo apqueltaqjemo mocjom, 5 coca menmacpo la tacja quetlhengcap pa'at anac ma'a, elpalhnelhcama ta lhepop actec apmanco'oc napaqtawec apqueltacnoncoma m'a 1 , netamen eltaqjo ta m'a—lhnac ptemac Jesus ma'a. 6 Ca apquetlhengamo lhnac apqueltamesaicamoc ma'a, apquelpaiescamo lhnac ania'a actacmanma lhamacjo aiempec lhmanquec jam, apqueltacmelquescaiacmo lhnac na anmasca apiempeioc ma'a.
Herodes apmajai'a eiecpelcoc Jesus
7 Aplengai'ac nac apuesque Herodes Antipas lhamacjo actemacja caselha apquelanai'a Jesus ma'a, moclhem'a enenlhet nac apquetlheianma mota Juan annenga m'a, aptaiecjo mocjom apjalhnancoc apiesecsec apquenmasquenwaiacmo, 8 po'oc enenlhet nac apcanemac secama ania'a nnenga Elias ma'a, po'oc noca apcanemac secama ania'a nnenga aptaiecjo mocjom apjalhnancoc apiesecsec apquenmasquenwaiacmo, man noca eijamoc mocjom Herodes ma'a, 9 lhna aptemac: — ¿Se lha enenlhet apquetlheianmo na mota enenlhet'awoc que? Jawe Juan apquellauquescama iemmen angiapom ma'a, apmatnanquec ma'a, co'o lhta squeltemo ngoiaqtemenalhcac apiaspoc ma'a— lhna aptemac. Apmajai'awec nac eiecpelcoc Herodes Jesus ma'a.
Apquellaicamoc aptecamoc Jesus enenlhet apentalhnema
10 Ca apqueluectamo lhnac mocjom apnacja Jesus apqueltamesaicamoc ma'a, netamen apquelpaiescama ania'a actacmanma m'a, ca apqueleltennaseianca lhnac ania'a lhamacjo actemacja caselha apquellanai'a. Ca apqueliantemecjo lhnac Jesus natemma Betsaida m'a, apqueltemo lhnac elhec lheme' apqueluanlha apqueltamesaicamoc ma'a. 11 Coca enenlhet'awoc anac ma'a atlheianmo lhnac apualho'oc apmeiecja Jesus Betsaida, colhuawec anquec nac apquenmeiecjac ma'a. Apquenmanquec nac tacja Jesus ma'a, ca apquetlhecmoscamo ania'a aniem'o Engiapom Neten apmopuana cacpota njan apqueltacmelquescaiacmo lhnac anmasca apiempeioc ma'a. 12 Apqueliennactesecama lhna lhma m'a, lhnac aptaiancoc doce apqueltamesaicamoc apquellanemo Jesus: —Ellapes enenlhet anac natemma ncatepelha la'a cacpota eltengiancoc aptecamoc ma'a, apnacteianmacja la njan, mamma temma jengque'e —lhnac aptaiancoc ma'a. 13 Ca apquellatemoianca lhnac Jesus ma'a, lhna aptemac: —Ellamoc aptecamoc quetlhengcap—lhna aptemac —Ma', wanlha apietno ennenco'o cinco pan cacpota njan janet quelasma mocjetec, aplhaniec enenlhet jengque'e, wanlha quelha ngcaimelhcac antengianwacjac aquiawai'a la nentoma—lhna aptaiancoc 14 Malha niecje 5000 enenlhet ma'a, coca lhnac ptemac Jesus apquellano: —Eleltennasamoc enenlhet eniacjanco ta apquelpasmecja acuacmo cincuenta—lhna aptemac 15 Ca apqueleltennaseianco lhnac apquelleltemo eniacjancoc enenlhet'awoc ma'a. 16 Ca apquenmamo lhnac cinco pan Jesus ma'a cacpota njan janet quelasma mocjetec, apcammelhmo lhnac neten, ca aptemo gracias Engiapom Neten. Ca apquellaianco lhnac na apqueltamesaicamoc ma'a cacpota ellascancoc apiesecsec enenlhet'awoc ma'a. 17 Aptoianquec nac aplhamacjo m'a acuacmo apqueliapqanacmo, doce iama posac nac nteiapmac apqueliaqjecja alaimommalhca aptecamoc ma'a.
Pedro aplheianma Jesus apto aplhenammacpo ewa'
18 Apacmetquescamo lhnac Jesus Engiapom Neten ma'a, ca apquellanei'o lhnac apqueltamesaicamoc, apquelelmalheneianca lhnac na, lhna aptemac: — ¿Co la aptaianquelha enenlhet jetlheianmo co'o m'a, je? 19 Ca apquellatemmoianca lhnac apqueltamesaicamoc ma'a: —Moclhem'a enenlhet apquetlhenquec apto lheiap Juan apquellauquescama iemmen niapom lhta, po'oc apquetlhenac Elias secama ania'a nnenga , po'oc na apquetlhenac apto lheiap secama ania'a nnenga aptaiecjo mocjom apjalhnancoc apiesecsec apquenmasquenwaiacmo —lhnac aptaiancoc ma'a 20 Ca apquelelmalhneianca lhnac mocjom Jesus ma'a: —¿Quetlhengcap na co la aptanquelha jetlheno co'o m'a?—lhna aptemac —Lheiap apto Cristo Engiapom Neten apcapascama—lhna ptema Pedro apcatemmoianca. 21 Ca apqueltemo lhnac Jesus meleltennasama enenlhet ania'a nac, 22 lhnac na aptemac: —Co'o asto nac asqueniem'o neten astaiecjo enenlhet apanque', annancoc jata aquientalhnema aniem'o apquellemjama apmaniaie' apquellawacja nac jengque'e, apquellemjama apmaiaie' sacerdotes, cacpota njan jengetlhecmoscama jenganemacja Moises, jeltacnewac jata cacpota njan jellaqjec, coca janetolhem'a acnem jata ncotnec asquetsepma, netamen atnecjac jata mocjom ejalhnancoc apiesecsec apquenmasquenwaiacmo. 23 Apmac'acja enenlhet alleio la apualho'oc etnejec jeieplecamaja, ngcaimelhquec metnec apmac'acja la etnejec, wanlha elanac acleclemelha la apualhoc Engiapom Neten lhamacjo acnem coca, cacpota njan metca apcanmelhmo' niecje acuai'a aquientalhnema, cacpota njan acuacmo aptequiewo' quelhaja. 24 Enenlhet aclheianma la apualhoc apancoc apanque, mewongcasacpec jata tep, coca enenlhet apmama la tacja aquientalhnema aniem'o jeieplecama co'o, ewoncasacpoc jata tep enenlhet anac. 25 Aqjemo ta ngcotnec enenlhet aptengiaicama nquescama apquetsecama, netamen etuasacpoc jata apanquec ma'a. 26 Ca jenmancasengca la quetlhengcap cacpota njan asquetlhecmoscama ejencoc anac, netamen co'o asqueniem'o neten astaiecjo enenlhet apanque', anmancasama ta njan quetlhengcap asuactamo ta jengque'e aquieplomo lhamacjo actemacja asmopuana aniem'o tata, Enenlhet Neten asquetlhelhma'ac ma'a. 27 Jaweniapac anque moclhem'a enenlhet apquellawa nac jengque'e, eluetancoc jata acnem etnecjac apuesque Engiapom Neten aquieplomo apmopuana—lhna aptemac Jesus apquellanemo enenlhet'awoc ma'a. 28 Ocho acnem na ntemac aquiecai'a m'a, apmajai'o lhnac Jesus epacmetquesec Engiapom neten, ca apqueliantamo lhnac Pedro, Juan cacpota njan Santiago aquieto lhienep acjaiam aquiawai'a. 29 Necsa apacmetquescama lhnac Engiapom Neten Jesus ma'a, mo'oc actemacja lhnac ntaiecjac napa'at ncapongmatmec nac, cacpota njan aptalhnema niangueiacmec nac aptema apmopai'a panquec, apquelienmoma panquec nac aptemac aptalhnema m'a. 30 Mpelapquescangquec nac apquelenteiapuei'o Moises nnenga cacpota njan Elias secama ania'a nnenga, 31 apquellapongmatmec nac na m'a. Apquelpacmetquescanquec nac Jesus acmac'acja ta ncotnec apuetai'a m'a, enietsepoc jata m'a na temma Jerusalen. 32 Pedro cacpota njan apcanet apquetlhelhma'ac apqueliampei'awec nac ma'a, necsa teien nac apqueluetai'ac apcaponmatma Jesus, Moises annenga cacpota njan Elias annenga m'a. 33 Ca apuetai'o lhnac Pedro m'a apquenmajai'a eltaqjoc Moises cacpota njan Elias, lhnac aptemac apcanemo Jesus: —!Jengetlhecmoscama, ntase nac nengacjangquelha nac! Apquelto la alanac janetolhem'a pa'at atco'oc lhema lheiap mo'oc Moises cacpota njan Elias— Man nac eijamoc Pedro apqueliateianca m'a. 34 Colhuawec anquec nac nquellapwai'a iepjopai'a tacjaplhet'oc ma'a, apquenmenaianquec nac apcanetolhem'a apqueltamesaicamoc ma'a. 35 Apquellengai'o lhnac ma'a nema aliatecama aisecsec iepjopai'a, lhna ntemac: —Ca eietca jengque'e asqueliequiescama co'o, elleliejecjo ta quetlhengcap—lhna ntemac nema aliatecama. 36 Mpelapquescangquec nac aptaiecjo aplhepquennenga Jesus ma'a. Coca mannac etlheianma apqueltamesaicamoc actemacja apqueluetai'a m'a.
Aptaqmelquescaiam Jesus apquetcoc queliacjameio' actewascama
37 Lhema acnem nac nguaiacmoc apcacjaicamoc lhienep acjaiam ma'a, ca apteiapmo lhnac Jesus cacpota njan apcanetolhem'a apqueltamesaicamoc, aplhamonwaiacmec nac enenlhet'awoc ma'a aquieto apmaniaie', 38 lhema enenlhet nac aptetescai'ac Jesus ma'a apcapiosecama lhnac, lhnac ptemac: —Jengetlhecmoscama epasem no eietca nac lhema pjapac apanque', 39 mpelapquescangque mota actaiecjo queliacjameio acmaicama songque. Mpesama mota apatong, nquelpelhiennengcasquec najan, niacmopesquec na apatong ma'a, mangco mac'a ngcoieniecja mota queliacjameioc ma'a. 40 Asqueltawec lhec niecje apqueltamesaicamoc anac lheiap eliengiescasecja queliajameio', man coca ncollapuanca'ac —lhna aptemac apiapom. 41 Lhnac aptemac Jesus apquellanemo: —Enenlhet meliamolhma' quetlhengcap, apqueliasqueiam Engiapom Neten ¿se lha acnem eliamwomjo quetlhengcap que?¡Ngwa', eiantemenma apquetca nac!—lhna aptemac 42 Secja apmajai'a etetescamoc nac apquetcoc anac apquenmanquelha' Jesus, ca actacjo mocjom aliacpelhqueto lhepop queliacjameio', mang na nquescama alpelhiennenquescamo, coca Jesus apqueliascanque lhna lhma' queliacjameio m'a, aptacmelcasecjo apquetcoc anac, ca apcaicojo lhnac apiapom ma'a. 43 Ngqueliemascangquec nac apualho'oc enelhet'awoc ma'a apqueluetai'o aquiawai'a apmopuana Engiapom Neten. 44 Netamen, lhna aptemac apquellanemo Jesus apqueltamesaicamoc: — Elleltacmelques no apquellailhemo cacpota meluancamangquec, co'o asqueniemo neten astaiecjo enenlhet apanque, ngcolhec jata jeiangconguacmo jellammelhmacja nac—lhna aptemac 45 Mang noca elianweiacmoc mocjom ma'a actacja apaioma Jesus, malha acnema allapecja lhna ntemac apqatco'oc ma'a, man nac elleltemoc elpeiwescasecja alhnacjo nquec Jesus ma'a, ncanec ngcowac jata anmaiosac'a apualho'oc.
Apquetlhecmoscama Jesus enenlhet aptema neten apanquec la apiaspommap
46 Aquellatemmommacpec nac apqueltamesaicamoc Jesus ma'a, sec jata enenlhet etnec neten apanquec apiaspommap apiesecsec ma'a. 47 Apiamawec nac Jesus aptemacja atlheianma apualho'oc, ca apcaweianca lhnac lhema nematca apquenenquescaio'o lhnac napocja m'a, 48 lhna aptemac: — Enenlhet'awoc apquellelto la apquenmama tacja nematca nac, jenmec na tacja' co'o, enenlhet'awoc apquellelto la njan jenmama tacja co'o, apquenmec na tacja Engiapom Neten, apto lhta jeiapascama. Enenlhet apto la metca apiaspommap apiesecsec anac quetlhengcap, coca apto neten anquec apiaspommap napaqtec Engiapom Neten ma'a— lhna aptemac 49 Lhna aptemac Juan apcanemo Jesus: —Jengetlhecmoscama, nelwet'a lhec ennenco'o lhema enenlhet apmopuana eliengiescasecja queliacjameio' aniem'o apuesai'a lheiap, nennawescacmec lhec ennenco'o m'a, ncanec jawe netlhelhma'ac— lhna aptemac 50 Coca Jesus lhna ptemac apcanemo: —Mennawes, metnamongquec mocjom, ca enenlhet anac ma'a nenmacmecama lhemoie, jawe jengellammelhmacja m'a—lhna aptemac 51 Quetsec nac ncaimommalhca acnem apmeiecjelha' neten Jesus ma'a, apiamawec nac niecje ncowac jata aquientalhnema m'a, apmeiecjec noca apanquec ma'a Jerusalen. 52 Apquellapascamo lhnac apmaniaie' apqueltenenwaiacmo la iocjalhma Samaria cacpota engiaqjenwomoc ma'a. 53 Mang na nconmajai'ac enmoc tacja Jesus ma'a 2 , ncanec apquelliamawec nac apmeiecja aquieto Jerusalen. 54 Nquennatjescangquec nac Santiago cacpota njan Juan, lhna aptaiancoc apquellanemo Jesus: —Apuesque', jengellasecjo no cacpota angellelto ngcopallentac talha aniem'o neten tacjaplhet'oc, cacpota nconnapoc —lhna aptaiancoc 55 Mang na ncoleclemoc apualhoc Jesus ma'a, ca apqueliamenaianca lhnac apqueltamesaicamoc ma'a. 56 Netamen nac ma'a, apquellempaicocjo lhnac mocjom 57 apquetlhengama m'a, ca aptetescaio'o lhnac lhema enenlhet Jesus nalhet amai ma'a, lhnac ptemac: —Apuesque, aieploma ta lheiap apmeiacjelha la'a—lhna aptemac 58 Apcatemmoianca lhnac Jesus ma'a: —Nientelhec jeieplomaja, nietnec alhano'oc malhec maleng, cacpota njan alhano'oc nac anata, coca co'o asto asqueniem'o neten astaiecjo enenlhet apanque', mamma asiamposammalhquelha la'a—lhna aptemac. 59 Netamen, apuetai'o lhnac Jesus po'oc enenlhet, lhna aptemac apcanemo: —Jeieploma lheiap— Ca apcatemmoianca lhnac enenlhet anac: — Apuesque, co'o niecje nja asmac'ac aieplacja jatoca apquetsepo ta tata, cacpota anwatonnec secjec ma'a—lhna aptemac 60 Ca apcatemmoianca lhnac Jesus ma'a: — Jawe', apquellelto nac jeliasqueiam, malha apquelletsepma m'a, ngcaimelhquec elcatonnec malha apquelletsepmo lhemec ma'a, coca lheiap elheng ma'a, epaies ania'a actemacja aplhenammap Engiapom Neten—lhna aptemac 61 Ca apuai'o lhnac na mocjom po'oc enenlhet necsa aplhengama, lhnac aptemac apcano Jesus: —Apuesque, asmac'ac niecje aieploma lheiap, asma'ac secjec allentennascacja asnemolhema —lhna aptemac. 62 Ca apcatemmoianca lhnac Jesus ma'a: — Enenlhet apmaicamoc anac apmacmecama wacca alhpejec, mangcapuanquec eniammelhecjoc neptamen. Nnawec na m'a, enenlhet anac apto apmacmecama Engiapom Neten, mangcapuangquec ngcolhenec apualhoc neptamen—lhna aptemac Jesus ma'a.
1Esto era como señal de rechazo si eran mal recibidos
2Puede ser que no lo querian recibir porque eran samaritanos y Jesus era judio
Capítulo 10

Jesus apquelapascama 72 apquelieplecama cacpota elpaiacsec ania'a actacmanma
1 Aplhaniec nac enenlhet apquelieplecama Jesus ma'a, coca wanlha lhnac apqueliequiescamo 72 enenlhet apiesecsec ma'a, coca jawe m'a 12 apqueltamesaicamoc anac, ca apquellapascamo lhnac apmaniaie moc apcanet aquieto acnacja la temma cacpota nja emjancoc alhaie Jesus ma'a, 2 lhna aptemac Jesus apquellanemo: — Aplhaniec enenlhet'awoc ma'a apquelpenescamo apquenmajai'a enmancoc tacja ania'a aplhenammap Engiapom Neten ma'a, moca elhamac enenlhet cacpota elpaiacsec ania'a actacmanma, malha acto nac aquielhna acmocjetma nac cacpota ennaclhancoc, moca elhamac enenlhet apnaclhecamoc la'a. Elelmalhnama Engiapom Neten cacpota ellapacsec enenlhet apquenmacmecama la m'a. 3 Jai', colhua enmeiacja' quetlhengcap ma'a, coca ellajo ta, ncanec malha quetlhengcap nepquesec aisecsec la meiwa'. 4 Melletsawangquec pataccom, aptecamoc, mo'oc apnacteto apmancoc, meluenacteso ngquec apquelpaqmetquesammap apqueluectacpo la nalhet amai. 5 Jata apqueluacmo la na temma, elpaiwesamo ta apquellelto apcacjaianquelha m'a, etnamoc jata ellanac jengque'e: "Ntase ta ngcotnec acjaicamoc jengque'e" 6 Coca apcacjanco la m'a apqueliamolhma, ngcowac jata actacmanma m'a, coca apcacjanco la meliamolhma m'a, mangcoujec jata actacmanma m'a. 7 Engiacjamoc jata m'a lhema pa'at apqueluanlha la'a, melacta panquec najan, etawoc jata njan ma'a, einamoc najan lhamacjo actemacja la'a apquetlhewai'a m'a, ntasec etlhewancoc quetlhengcap ma'a lhamacjo nac, ncanec malha aquianmoma apquenmacmecama m'a. 8 Jata apquelentalhno ta apiau'acja temma acno la anmo tacja quetlhengcap ma'a, etawamoc jata acno la allanco aptecamoc ma'a, 9 eltacmelquescam jata njan anmasca apiempeioc ma'a, eleltennes jata njan quetse ngcaimelhcac ngcowac acnem etnecjac apuesque Engiapom Neten. 10 Coca manjata ngquec enmacpoc tacja quetlhengcap apiau'acja temma, enmeiac jata amai apiesecsec temma, jata eltejec jengque'e: 11 "Nelpalhnelhcama lhepoc actec enmanco'oc ennenco'o ncanec jengeltacnewacquec quetlhengcap ¡Ellajo ta quetlhengcap ngcangquetua'ac acnem etnecja apuesque Engiapom Neten!" Jata etnancoc ellanac apquellelto apqueltacnoncoma quetlhengcap. 12 Jata acuo'o ta acnem nelliecpelcammalhquelha, awanjec jata ngcotnec aquientalhnema apquellengaianco enenlhet'awoc anac ma'a, aselhtec ma'a co Sodoma. 13 ¡Enenlhet'awoc co Corazin cacpota njan Betsaida, quetlhengcap la ie'! Nlhanie caselha jempelapquescama asquelanai'a apiesecsec quetlhengcap jengque'e, coca mangconmajai'ac na elietasquesecjoc napaqta'a Engiapom Neten. Lhta cno la alanenwacmo caselha jempelapquescama apiesecsec anac ma'a co Tiro cacpota njan Sidon, colhuawec anque nlho lhta ellanocja apualho'oc ma'a, ellentalhnecja lhta apquellentalhnema malha iama alhengajac apqueltaclhema engiempec, cacpota njan elelhpacjacpoc tacjaplhet'oc tajap aniem'o apquellanecja apualho'oc. 14 Jata acuo'o ta acnem nelliecpelcammalhquelha, awanjec jata ngcotnec apquetlhewai'a acmasca quetlhengcap co Corazin cacpota njan co Betsaida, aselhtec jata m'a enenlhet'awoc co Tiro cacpota njan Sidon, jawe ngiapac anquec ma'a. 15 ¡Quetlhengcap laie co Capernaum! Apquetlheianme panque' ncolhec anmo' tacja m'a neten, coca mangcotnec jata m'a, eclhacpoc jatoca m'a nema aletsepmacja nac—Lhna aptemac Jesus apquellanemo aplhamacjo napactawec enenlhet'awoc ma'a. 16 Netamen ma'a, lhna aptemac Jesus apquellanemo apqueltamesaicamoc: —Coca apquellailho la'a enenlhet apquetlhecmosecamoc quetlhengcap, jellailhawec na colha, coca enenlhet apqueltacnewo la quetlhengcap, jeltacnewacquec na colha, cacpota njan Engiapom Neten apto lhta jeiapascama —lhna aptemac Jesus apquellanemo m'a. 17 Ca netamen ma'a, apqueluectamo lhnac mocjom 72 apquellelto apquellapasammap netamen apquelpaiescama ania'a actacmanma m'a, ngquelpaijecjec nac apualho'oc ma'a, lhnac aptaiancoc apquellanemo Jesus ma'a: —¡Apuesque, mantec anquec caselha mongwetai'o nellanecamoc ennenco'o m'a, acuacjo queliacjameio' jengellasecjai'o nelentepquescama, aniem'o apmopuana lheiap! —lhna aptaiancoc ma'a. 18 Lhnac aptemac Jesus apquellatemoianca: —Jai, asuet'ac lhec queliacjameio' awesque' acteiacmo neten malha apquelienmoma. 19 Asquellanque lhta co'o apquelmopuanca'a quetlhengcap cacpota elteianmancoc menasma cacpota njan iettaja', cacpota apuanca'ac eltemescasecjac coneng apquellammelhma, mangcolhec jata actacja quetlhengcap. 20 Molpaijecjangquec apualho'oc aniem'o apquelentepquescama queliacjameio' m'a, coca ntase' ncolpaijecjac apualho'oc ncanec enmacpoc jata tacja' quetlhengcap aquieto m'a neten, nnangquec apqueluesai'a quetlhengcap waccajac ma'a neten—lhna aptemac Jesus. 21 Awanjec anquec nac acpaijecja apualhoc Jesus ma'a aniem'o Engiapom Neten Apualhoc ca apacmetquescamo lhnac ma'a, lhna aptemac: —Tata apto apuesque neten ca njan nalhepop, awanjec anquec asquetsewasquescama lheiap, ncanec apqueliequiescama enenlhet apquelomacja nac apancawec cacpota elianwomjo' actemacja asquetlhecmoscama aplhenammap lheiap, man coca eliequiescamac enenlhet apquellelto neten apancawec apqueliaspommap —lhna aptemac Jesus apcanemo Engiapom Neten. 22 Netamen lhnac aptemac apquellanemo Jesus aplhamacjo enenlhet'awoc ma'a: —Jellaiangquec lhamacjo caselha co'o tata, mamma enenlhet jeiecpelcoc co'o, wanlha tata jeiecpelquemo, mamma enenlhet eiecpelcoc tata, wanlha co'o asiecpelquemo m'a, co'o asqueliequiescama enenlhet cacpota njan eliecpelcanwomoc tata —lhna aptemac Jesus. 23 Apnecjec nac Jesus cacpota njan apqueltamesaicamoc moc apancawec ma'a, lhnac aptemac apquellanemo: —Apmapseiwac'a quetlhengcap jelwet'o nac asquellan'o caselhaja, cacpota jellailhojo' asquetlhecmoscama, 24 awanjec anquec lhta apquenmajai'a jelwetac cacpota njan jellailhojo' apqueletsecama ania'a nnenga cacpota njan apqueluesca'a nnenga, coca mangconmopuanca'ac ma'a—lhna aptemac
Apietquescama Jesus enenlhet apiamolhma co Samaria
25 Lhema jengetlhesmoscama jenganemacja Moises apquenmecjo lhnac neten cacpota elmalhnama Jesus lhema caselha aquientalhnema m'a, lhna ptemac: —Jengetlhecmoscama ¿Co la atnec co'o cacpota ngcoitec aquiennactema enengiec ngcotnenguaianlha nnelha?—lhna aptemac 26 Lhna aptemac Jesus apcatemmoianca m'a: —¿Co la actemacja actalhesammalhca jenganemacja?— 27 —Jai', ca ntac jengque'e: «Ellamelemma mota Engiapom Neten acuacjo conne canquec apualho'oc, alietnaicama apaqtec, cacpota njan apqueliennactema apanque', ellamelemma njan po'oc ca acto nac apquellamelammacpo apancawec apqueliocja quetlhengcap» lhna aptemac jengetlhecmoscama jenganemacja Moises ma'a. 28 Lhna ptemac mocjom Jesus: —Jai', tocja', apietawe, etne' ta jam cacpota ngcoitec lheiap aquiennactema apnengiec ngcotnenguaianlha nnelha—lhna aptemac. 29 Coca jengetlhecmoscama jenganemacja nac apmajai'ac nac enmalhnecjoc mocjom aquientalhnema ngquec apquenmalhnecamaja cacpota etnescasecja coneng Jesus ma'a, lhna aptemac: —¿Wanlha nlho angamelemmac nenpaioma lhema, nlho ca la po'oc enenlhet na?—lhna aptemac 30 Ca apquempai'o lhnac Jesus apqueltennaicama apietquescama m'a, lhna aptemac: — Lhema enenlhet apteiapma natemma Jerusalen, apmeiecjo m'a amai acmaianco m'a Jerico, ca apquelpatjetmo enenlhet meliamolhma m'a nalhet amai, mellescamo apqueltecpoianca apiempec ma'a, apquelelmenielhcaso caselha apancoc, apietnemo apcalhnai'o m'a, iama apquetsepma apqueltemesquescamac ma'a. 31 Ietemawec na apmeiecjo sacerdote m'a, apuetai'o lhnac apietnacja mocje, ca aptaqjescaiacmo lhnac, apiecai'o njan ma'a. 32 Netamen apmeiecjo njan lhema levita m'a, apuetai'o lhnac na apietnacja mocje, ca aptaqjescaiacmo lhnac na, apiecai'o njan ma'a. 33 Ca apmeiecjo lhnac na lhema enenlhet mangcotno nempaioma lhema apqueniem'o Samaria, apuetai'o njan apietnacja enenlhet, apiosec nac apquellanei'o ma'a. 34 Ca aptetesaianco lhnac ma'a, apqueltelhnasquesanco ponja 1 apancoc ma'a, apianquencaso aquieto apiensema, ca apelhquetquescamo lhnac ma'a. Ca apcanetquescamo lhnac na apcanantema, apiantemecjo aquietelha apcacjenweiacjac amaica'a pa'at, aptacmelcaso njan ma'a. 35 Mo'oc acnem na ntemac ma'a, apmajai'ac engiempecjac mocjom aplhengama enenlhet apiamolhma nac, ca apcaianco lhnac pataccom 2 apto apancoc pa'at anac, ca aptemo lhnac apcanemo: —Etaqmelques jata enenlhet anac apiensema, mang jata ngquec ngcowacjac pataccom lhec ascaicamoc, mo'oc asuecta ta allanconwa ta mocjom alaimommalhca—lhna aptemac. 36 Ca apenescamo lhnac apqueltennaicama Jesus ma'a, apquelmalhneianca lhnac jengetlhesmoscama jenganemacja nac, lhna aptemac: —Ngua', elhennojo ¿se lha enenlhet actacmelo apquelanei'o po'oc jencaie?— 37 Ca apcatemmoianca lhnac jengetlhecmoscama jenganemacja, lhna aptemac: — Ca apasmoma lhquec po'oc, apietnai'o lhquec napa'at— Lhna aptemac mocjom apcanemo Jesus: —Jai', etne ta njan lheiap ma'a—
Jesus aptema amaica'a Marta cacpota njan Maria acnemacja
38 Ca apquempecjo lhnac mocjom Jesus aplhengama m'a, apuecjo lhnac lhema apquellawacja, acmamo lhnac tacja lhema nqueluana acuesai'a Marta, 39 nengquec nac na nialheng ma'a acuesai'a Maria, ca acnaiacmo lhnac napocja Jesus ma'a cacpota ngcotacmelcaso ailhecamoc apqueltennaicama m'a. 40 Marta lhnoca ngquelanesquescamac alpenesquescamo aptecamoc acnemacja, nietnengquec nac na aquiawai'a acmacmecama acnemacja m'a, ca actetescaiacmo lhnac na apnacja Jesus ma'a, lhnac ntemac anemo: — Wesque ¡Elanjono Maria, magjepasmac asmacmecama, elhepquennenga asmacmemaja!¡Eniana no jepasmoc!—lhna ntemac 41 Ca apcatemmoianca lhnac Jesus ma'a: — Marta, mantec actaicama au'alhoc lheia' actemacja acnema acnemacja, 42 colhua coca Maria ngquelan'ac caselha neten anquec aquiaspommalhca, ngcailhawec asqueltennaicama nac, momac'ac aliaqselhma' co'o—lhna aptemac Jesus ma'a
1Vino y aceite
2Dos denarios
Capítulo 11

Jesus apquetlhecmoscama actemacja nempacmetquescama Engiapom Neten
1 Apenescanquec nac apacmetquescama Jesus Engiapom Neten ma'a, lhnac aptemac lhema apqueltamescama: —Apuesque', jengetlhecmos no actemacja nempacmetquescama Engiapom Neten, ca aptemacja lhta Juan apquetlhecmoscamo apqueltamesaicamoc apanco'oc—lhna aptemac 2 Ca apcatemmoianca lhnac Jesus ma'a: —Jai', etnamoc jata jengque'e: Engiapom Neten, nengeltawec aplhamacjo enenlhet'awoc eliecpelcoc lheiap apto apuesque engancoc aquietnema aquiawai'a apmopuana, elheng cacpota antancoc apuesque' apuanlha lhema apjapac apanque'. 3 Jengellamoc nentoma mangcotnenguaianlha nnelha, 4 jengenmasquesques nentaiangcolha ngcolatsecama, ncanec ennenco'o njan nengellasecjacjawec apquellelto jengellanesquescama ngcolatsecama. Jata acuo'o ta jengeliepconma, jengelpasem jata cacpota mangelpallemmec ennenco'o. 5 Malha acto nac enenlhet apmeiecja' pelhasep apanquec apnemacja apnemolhema, lhna ptemac ma'a: "Aliaqmong apcanetolhem'a pan apancoc 6 cacpota anwancoc amaica'a ejencoc, colhua apuacta', mamma nquec co'o astoma", lhna ptemac ma'a. 7 Eniasecjoc jatelhaja, metnec jatelha apaioma: "Mangjelies alhma', sietnec co'o colhuawe nac ca njan eietcac, nnec apacjo atong, mongwapuanquec atnemecjac neten anwancoc aptoma lheiap". Metnec jatelha m'a, 8 coca etnemecjac jata neten ma'a, cacpota enquesec aptoma lhamacjo aptengiacja la'a, jawe aniem'o aptema po'oc, wanlha aniem'o apquelienlhaneiacmo (MEJOR PONER PO SU SENTIDO DE VERGUENZA O DE DIGNIDAD) 9 Ca stac asquellano quetlhengcap colhuawe nac: —Elelmalhnama cacpota enquesec Engiapom Neten. Elquetam, eluetecjac jata m'a. Eluenama Engiapom Neten, ellanjoc jata quetlhengcap. Ellelienlhanmamoc, etlhewancoc jata m'a. 10 Enenlhet apto apquelmalhnecama, etlhewancoc ma'a. Enenlhet apto apquetansema, eluetecjac jata m'a. Enenlhet apto apuenecama Engiapom Neten, ellanjoc jata m'a. Enenlhet apto apquelienlhaneiam, etlhewancoc jata m'a. 11 Apquelelmalhnenca la'a apquetcac quelasma ¿Ellanco nlho menasma? 12 Nlho ca la apquelelmalhnenca la'a tape'e appoc ¿Ellanco nlho iettaja'? 13 ¡Ma', metnangquec quetlhengcap ma'a! Apuanquec ellancoc caselha actacmanma apquetcac quetlhengcap, niecje meliamolhma nac, coca Engiapom Neten apto neten apiamolhma, jaweniapac anquec jata ellancoc Apualhoc apanque' apquellelto la'a apquellelmalhnecama—lhna aptemac Jesus apquellanemo m'a.
Ngcolatsecama aplhenammap Jesus
14 Apnenquec nac ma'a lhema enenlhet queliacjameio acmaicama, metca apaioma lhnac ntemesquescamac ma'a, ca aptepqueso lhnac Jesus queliacjameio, aptacmelecjec nac enenlhet anac, ntepecjec nac na apaioma m'a. Nquelpelapquescangquec nac enenlhet'awoc apqueluetai'o m'a, 15 coca moclhem'a enenlhet nac apquelmalengiosemmacpec moc apancawec ma'a, lhna aptaianco: —Amjama amanie queliacjameio' acuesai'a nac Beelzebu aicamoc apmopuana Jesus cacpota engiapuanac elentepquesec altemo lheme nac queliajameio m'a —lhna aptaiancoc ma'a. 16 Napokha enenlhet noka apkeleltemo ellanak Jesus kaselha mongenatkeskama m'a apkenmahai'a eliepkonek noka m'a. 17 Koka apiamavek noka Jesus aktemakha atlhenaikama apvalho'ok, lhnak aptemak apkellanemo: —Lhema apkellavakha apkennapekpo la'a, apnaqtevasekpe pankavek ma'a akvakho apkakhaiangkolha la m'a. 18 Nnavek na m'a Satanas mmaskek akno akmovana nhan ma'a annapelhko la annemolhema. Ka alheno nak ko'o aniem'o lhkek hetlheianma ketlhengkap asmopvana alentepkesek kasekapok av'alho'ok aniem'o akmovana Beelzebu. 19 Mankolietok aptangkolha apketlheianma ketlhengkap, vanlha apkenmahai'avek hetselhnana. Apkeliave niekhe ketlhengkap apkelieplekama nak apkelentepkeskangkek na kasekapok av'alho'ok aniem'o Eniapom Neten apmopvana m'a, etlhenekhak hata apankavek apketselhnanemmap ketlhengkap apkelieplekama apanko'ok anak. 20 Ko'o nhan askelentepkasak kasekapok av'alho'ok aniem'o apmopvana Eniapom Neten, apkelvetak iokhalhmek ankek ketlhengkap akvo'o aktemakha apveske Eniapom Neten hengke'e. 21 Apnec enenlhet apiennactema 1 apquelanecama apnemacja acnema apsecama, aptacmelquescama aquietnema conne, 22 coca ewac jata po'oc enenlhet neten apanquec apiennactema 2 , etnescasecjac jata coneng anquec ma'a, eljatsoscasecjac jata apmaicama mmoma cacpota njan caselha apanco'oc, etnecja apancoc apanque'—lhna aptemac apquellanemo Jesus. 23 Lhna aptemac Jesus mocjom apquellanemo: —Enenlhet melhno la nejecja, coca apto jeiammelhma m'a, enenlhet mangepasmoma la njan engianquesecjac jelieplecama, coca engielhpanquesecjac jata njan ma'a—lhna aptemac
Actacjenweiam queliacjameio' apualhoc enenlhet
24 —Actepo la'a enenlhet apualhoc queliacjameio', ncomjangcoc metquelha temma ncoliama acnaianlha aquiamposammalhquelha la'a, coca mangcotengwacmo la m'a, ngcotnec aquietnaicama actec: "Ntasec ataqjoc mocjom, atalhnenwacjac jata mocjom asnemacja lhta" lhna ntemac ma'a. 25 Ngcolhiemoc mocjom ma'a, ngcotengwatac enenlhet malha acnemacja nema alhnascama, actacmanma nema acjescama caselha m'a. 26 Colhuawec anque nconiacjac ncolaclosenguacja 7 queliacjameio' atlhelhma'ac, alto neten ancawec ncolatsecama, alentalhnenwactamo la'a apualhoc enenlhet anac ma'a, mangcolhno secjec anque lhta actewascama, colhua coca ntac tep anquec actewascama m'a.—lhna aptemac Jesus apquellanemo m'a. 27 Nnengquec nac lhema nquelwana apiesecsec enenlhet'awoc ma'a, acpaijeianca lhnac atong, lhna ntemac: —Nqueleniemawe nquen lheiap acuanenquescama—lhna ntemac 28 Ca apcatemmoianca lhnac Jesus: —Apquellenniemawec neten anquec enenlhet apquellelto apquellailhemo Engiapom Neten cacpota njan apquelleliejecjo —lhnac aptemac ma'a.
Enenlhet apquelleltemo Jesus elana caselha jempelapquescama
29 30 Apuacjenwai'ac nac enenlhet apentalhnema napocjawac Jesus ma'a, lhnac aptemac apquellanemo: —Apquelleltawec quetlhengcap allanac caselha jempelapquescama aniem'o neten, coca momac'ac allanac ncanec meliamolhma quetlhengcap, apqueliasqueiacmec na Engiapom Neten, coca eluetac jata quetlhengcap co'o asto nac enenlhet asqueniem'o neten astaiecjo enenlhet apanque', ncotnec jata asiaijecama actemo lhnac nanec apiaijecama Jonas aquieto m'a Ninive, cacpota elianwomjo' quetlhengcap acto jawengiapac anque Engiapom Neten jeiapascama. 31 Jata acuo'o ta acnem apiacmoncasecja Engiapom Neten enenlhet'awoc alhma nquec jam, ngcowac jata njan ma'a awesque nqueluana aniem'o apquelhcaianlha pieiam, ncolammelhecjac jata m'a ncanec jeltacnewacquec quetlhengcap. Ampai'o lhnac nanec mocjec anquec cacpota ncailhoc apquetlhecmoscama acnema apiamo panque' apuesque Salomon, coca colhuawe nac mangcomajai'ac jellailhoc quetlhengcap, co'o asto niecje neten apanquec asiaspommalhca, coneng ma'a Salomon annenga. 32 Jata acuo'o ta acnem apiaqmoncaseja' Engiapom Neten enenlhet'awoc alhma nquec jam, eluac jata njan enenlhet'awoc co Ninive, ellammelhecjac jata quetlhengcap ma'a ncanec apquellengai'a niecje asquetlhecmosecamoc, coca mellanecjac apualho'oc. Coca apquellaneicocjec nac nanec apualho'oc co Ninive apquellengai'o apqueltennaicama secama ania'a Jonas ma'a, co'o asto niecje neten apanquec asiaspommalhca, coneng ma'a Jonas—lhna aptemac Jesus
Engaqto'oc aquietquesammalhca talha alhancoc
33 —¿Nengaleiwasquec jata nquec talha alhancoc enwanque i'e ampecquenec coneng asota'? Ma', neten nelhanmac cacpota ncotsasquese lhma' apquellelto apquelentalhnema la'a conne' pa'at. 34 Ca apaqto'oc anac malha talha alhancoc aponmatquescama apiocja', nqueltasec jata nquec apaqto'oc, nietnec na aponmatma apualhoc, coca ncolatsecama la'a apaqto'oc, ienactescama lhma njan apualhoc. 35 Etacmelques apualhoc anac, menianco nquec ncospana' aponmatma, 36 aponmato la'a apualhoc lheiap mangcolhec ienactescama lhma', etac alhnacjo nquec lheiap malha talha alhancoc atsasquescama na lhma'.
Jesus apqueliamenaicama jengetlhecmoscama jenganemacja cacpota njan fariseos
37 Netamen Jesus apsaujomo lhnac apquetlhecmoscama m'a, ca apqueltemo lhnac lhema fariseo etasacjac lheme' apnemacja' cacpota eltawocjac ma'a, ca apnaiacmo lhnac Jesus ma'a. 38 Awanjec nac acpelapquescama apuetai'a fariseo m'a meleclemo apmeio'oc iemmen Jesus amanie' aptawecja', aptaiancolha apancawec na asonquec ma'a aniem'o apquenmajai'a elalhnoc napaqtec Engiapom neten, 39 coca lhnac aptemac Jesus apcanemo: — Quetlhengcap fariseos ngqueltameiangquec apquelieniesecamoc apto'oc nojaicoc cacpota njan apjac, coca conne' apualho'oc nquelpaiseiacmec anque, nlanei'awec ncolatsecama, apquelmenielhma njan. 40 Janet napaqta'ac quetlhengcap, mangcollapuanquec eliennenquesec Engiapom Neten, eiecpelcoc apualho'oc quetlhengcap ncanec apquellanai'a apiempeioc anac. 41 Apquellelto la etnancoc apquellalhnai'o panquec napaqtec Engiapom Neten, mangcaimelhcac elleliejecjoc jenganemacja apanco'oc apancawec, wanlha ngcaimelhquec elietnajoc napaqta'a metca nac caselha apanco'oc cacpota njan elpasmoc ma'a. 42 ¡Quetlhengcap la ie fariseos! Wanlha apqueleliejecjo mangcotno neten anquec aquiaspommalhca jenganemacja nac Moises, ca ctonac necjatcoc anac aquielhna aniep panco'oc, ruda, menta cacpota njan nentoma nac awa', diezmo acuesai'a m'a, coca melleliejecjoc acto nac neten anquec aquiaspommalhca jenganemacja, ca ctonac aquietemo actacja apquellanei'o po'oc, cacpota njan apquellamelaiam anac Engiapom Neten. Ntasec na etnancoc actacja nac jengque'e alheianma, cacpota njan ma'a diezmo lhquec. 43 ¡Quetlhengcap la ie fariseos! Wanlha apquelleltemo etnancoc neten apancawec, apquelleltawec engiacjenwomoc apcacjanquelha apquelemjama apmaniaie' aquieto apcacnecjelha la'a enenlhet, wanlha mota aptengiaicamoc ellajoc enenlhet elpaiwesancoc apqueltanio la amai. 44 ¡Quetlhengcap la ie' fariseos! Malha nema alposcama iamet aisecsec enjapac conne, apquellelteianmacjawec enenlhet'awoc tacjaplhet necsa meliamo—lhna aptemac Jesus apquellanemo Fariseos. 45 Apnenquec nac na lhema jengetlhecmoscama jenganemacja Moises ma'a, lhna aptemac apcanemo: —Jengetlhecmoscama, ennenco'o nac na jengetlhenac ngcolatsecama nac apaioma lheiap—lhna aptemac ma'a. 46 Ca apcatemmoianca lhnac na Jesus: — ¡Quetlhengcap la ie jengetlhecmoscama jenganemacja Moises! Apquellanei'a mota jenganemacja aquientalhnema angeliejecjoc, coca melleliejecjoc quetlhengcap ma'a, meltengiaiangcoc apiempeioc quetsec la'a elieplauquesec ma'a. 47 ¡Quetlhengcap la ie'! Apqueltacmelquescamawec niecje tacjaplhet'oc apquelletsecama ania'a annenga apquelletsepmacja, apquelieijenca'a lhnac nanec apquennapma m'a. 48 Quetlhengcap na alleclemoc apualho'oc aptaiancolha lhnac na nec apquelieijenca'a, apquennapecamoc lhnac nanec ma'a, colhua coca quetlhengcap apqueltacmelquescamawec niecje tapjaplhet'oc apqueletsepma. 49 Apiamawec nac nanec Engiapom Neten apmac'acja ngcotnec, lhnac na ne aptemac: "Allapacsec jata apquetsecama ania'a cacpota njan apostoles, moclhem'a ta ngcolhec annapacjo, po'oc jata ngcolhec acmenlhenanca" lhnac na ne ptemac Engiapom Neten ma'a. 50 51 Engiapom Neten jata elelmalhnecjo quetlhengcap aniem'o nema annapecja apquetsecama ania'a nnenga, ampai'osecja nquec Engiapom Neten apquellanai'a lhamacjo caselha alhma nquec, ampai'o Abel apmatnama lhnac nanec apmanie nquec, acuacmo Zacarias apquennapma necja Engiapom Neten apnemacja cacpota njan aluanlhemmalhquelha caselha, aisecsec ma'a. 52 ¡Quetlhengcap la ie' jengetlhecmoscama jenganemacja Moises! Apquelliamawec niecje actemacja nemmajai'a angiecpelcoc Engiapom Neten, mang coca eltengiaiancoc apiempeioc cacpota eliecpelcoc, melleltemac na eliecpelcoc enenlhet ma'a —lhna aptemac Jesus ma'a. 53 Ca aptepacjo lhnac Jesus fariseo apnemacja m'a, apquellemjaicocjo lhnac jengetlhecmoscama jenganemacja cacpota njan fariseos, ngquennatquescamawec nac ma'a, apquenmajai'o lhnac elelmalhnama 54 aquientalhnema, apmajai'a etselhnanac cacpota elpatjetec Jesus ma'a.
1Queliacjameioc
2Jesus
Capítulo 12

Caselha acposemmalhca, ngcoliepjonguetac jata
1 Apuacjenwai'awec nac enenlhet'awoc apentalhnema Jesus apquenmanquelha' m'a, apqueliengemmacpec nac na m'a, lhnac aptemac Jesus apquellanemo apqueltamesaicamoc: —¡Ellajo ta quetlhengcap aptaianquelha ncolatsecama ellancocjac 1 fariseos! Moc apquetlheianma mota aptaiancoc ma'a, acjemo coca 2 Lhamacjo caselha apquellanecamoc apquelposcama m'a, coca alhnacjo toca ncoietnatac ma'a, lhamacjo caselha apquellanecamoc iennactesa lhma, ngoliepjonguetac jata m'a. 3 Ca ncanec ellajo quetlhengcap, lhamacjo apquelpaqmeiasma nac ienactesalhma, ngcolhec jata aluet'o acnem anque, lhamacjo apquelpaqmeiasma nac alposemmalhca, ngoliejonguetac jata napaqtawec enenlhet'awoc—
Mellaga nquec enenlhet
4 —Ca stac co'o asquellano quetlhengcap asquetlhelhma'ac, mellaga nquec enenlhet apmopuana nac ellaqjec, ncanec mangcollapuanquec ellaqjec apquelluanmoncoma nac ma'a. 5 Ellajoc coca Engiapom Neten, apmopuana nac ellaqjec enenlhet'awoc cacpota njan eclho'oc ma'a ncospanei'acja talha, jawe ngiapac anquec ma'a. 6 Ellanjono ctonac anatatco'oc cinco, alianmoma coca janet pataccom aliaquiema, mangquennawe ca ngcoie', Engiapom neten coca apqueltacmelquescamac ma'a. 7 Coca neten apancawec quetlhengcap, jawe aptanco nac anatatco'oc ¡Mangcolieta nquec apquellai'a, Engiapom Neten jata eltacmelquesec lhamacjo apqueliocja! Apqueliecpelcawec Engiapom Neten lhamacjo apqueliocja nac quetlhengcap. 8 Apqueleltennasquec jata nquec quetlhengcap apquellelto co'o jelieplecama metca apquenmancasecama, co'o ta njan asto nac enenlhet asqueniem'o neten astaiecjo enenlhet apanque, alleltennacsec jata njan napaqtawec Enenlhet Neten ma'a, jawe niapac anquec apquelleleto asqueltamesaicamoc quetlhengcap. 9 Coca apquelleltennaso la quetlhengcap manjeliecpelquema co'o, co'o ta njan alleltennacsec Enenlhet Neten jawe apquellelto jelieplecama quetlhengcap. 10 Engiapom Neten jata ellasecjecjo apmac'acja la enenlhet apquetlheianma jellamelhma co'o, asto asqueniem'o neten astaiecjo enenlhet apanque', coca mellasecjecjec enenlhet apquellelto apqueluannaicama Engiapom Neten Apualhoc. 11 Nnec jata nquec aliantemacjo apcaqnecjelha la enenlhet'awoc, nlhoca la napactawec jengeliecpelquemo apqueluescaie', coca moltama nquec apquelualhoc apquenmajai'a la eltejec apquellatemmoicama quetlhengcap ma'a, 12 Engiapom Neten Apualhoc jata ellancoc apqueliamo apquellatemmoicama quetlhengcap ma'a— 13 Apnenquec nac lhema enenlhet apiesecsec ma'a, lhna aptemac apcanemo Jesus: —Jengetlhecmoscama, eltennes no eiepma eniana ta jeiangcocjac necjatcoc caselha apanco'oc alhta tata nnenga — 14 Ca apcatemmoianca lhnac Jesus ma'a: —Mangjeieto co'o alpacmetquesalhca lheiap apetma cacpota alhpanquescasecjac caselha apanco'oc ma'a— 15 Ca apquellan'o lhnac Jesus enenlhet'awoc ma'a, lhnac aptemac: —Ellajo ta, metengiamo nque mota nquescama apquelletsecama quetlhengcap ncanec mangcollanquec acuenactema apqueliaijecama cacpota njan mangcollangquec alpaijecja mota apualho'oc—lhnac aptemac Jesus ma'a. 16 Ca apqueleltennaseianca lhnac Jesus lhema apietquescama m'a, lhna aptemac: —Lhema lhnac enenlhet nema apquetsecama nietnengquec nac aquiawai'a lhepop apancoc ma'a, nietnengquec nac na aquiawai'a apnaclhema aquielhna m'a. 17 Mang nac eijamoc apcacjesqueianlha aquielhna apnaclhema m'a, 18 lhna ntemac aclheianmo apualhoc: "Jai, atuasecjac jata co'o pa'at apac acnaianquelha' actec ejencoc, allanecjac jata alhnancoc pa'at aquiawai'a nque', cacpota altacmelquesec lhamacjo actec asnaclhema m'a, cacpota njan lhamacjo caselha ejenco'oc conne. 19 Netamen ncopaijecjac jata co'o ewalhoc, ncanec ncacsec jata asquetsecama cacpota njan nentoma, ncotnec jata acuenactema aquietnema caselha ejenco'oc, cacpota njan ajolhec jata ngcotnec asiamposammalhca" lhna ntemac aclhenaicama apualhoc enenlhet anac ma'a. 20 Coca lhna aptemac Engiapom Neten: "Metca apqatec, enietsepoc jata pelhasep anac, po'oc enenlhet jata etnecjac apancoc apqueltacmelquescama lhquec caselha apanco'oc" 21 Jata ncotnec ma'a enenlhet apcanquesaicamo mota apquetsecama caselha apanco'oc, coca m'a metca aclhenaicama apualho'oc Engiapom Neten. 22 Ellailhono quetlhengcap apquellelto asqueltamesaicamoc: —Moltama nquec apualho'oc selha etawancoc que cacpota ngcoliennactecsec, cacpota njan se lha elentalhnecjac ietamopai'a ie', 23 ncanec apqueltema nac apjalhnanco'oc acto neten anquec aquiaspommalhca, mangco lhno nentoma nac, ca apqueliocja nac neten anquec aquiaspommalhca, mangcolhnoc ma'a apquelentalhnema nac. 24 Ellanjo no mama', mamma apnaclhecamoc aquielhna apquenaicamoc, mamma njan apnencanuecjelha la'a aquielhna apanco'oc, Engiapom Neten coca apquellaianque mota aptecamoc ma'a. Tep anquec jatoca ellancoc caselha Engiapom Neten quetlhengcap, ncanec tep anquec apquellelto apqueliaspommap, metlhoc mama'. 25 26 Acjemo ngcoltama apualho'oc ncanec mancawangque ngcowenque pancoc tep atquetsec anque apqueliaijecama, mangcawangquec na ngcolanengwomoc apqueliaijecama caselha aquiawai'a nquec la'a. 27 Moltama apualho'oc se lha ellentalhnecjac ietamopai'a ie', ellanjo no elhnemoc alanamo nac iocjalhma, mamma anmacmecama la'a cacpota ngcoteniangcoc alentalhnema ietamopai'a, coca ngqueltase elhnemoc ma'a. Salomon annenga ngquescama lhnac nanec niecje pataccom apancoc, apqueltase lhta njan apquelentalhnema ietamopai'a, coca elhnemoc anac ma'a allelto neten anquec altacmanma malha alentalhnema ietamopai'a, melho Salomon annenga apquelentalhnema. 28 Engiapom neten apquellaicamoc elhnemoc anac malha apqueltacmanma alentalhnema, wanlha coca aquiacuatacjo allenteiapma m'a, cacpota ngcolhec aluanlhacjo m'a. Tep anquec jatoca ngcotnec quetlhengcap apquellaicamoc Engiapom Neten apquelentalhnema ietamopai'a ¡Mocjom coca apqueliasqueiam Engiapom Neten quetlhengcap! 29 Ca sta asquellano mocjom quetlhengcap, moltama nquec apualho'oc selha etawancoc que, cacpota njan einancoc, apquelentalhnema njan. 30 Ca apqueltemacja nac meliecpelquemo Engiapom Neten, ngqueltama mota apualho'oc caselha aimommalhca. Coca quetlhengcap apnec apqueliapom ma'a neten, apiawec aimommalhquelha la'a. 31 Ntasec ellelienlhanmojo' apquelleliejecjo Engiapom Neten apto apuesque apancoc, cacpota ellancoc lhamacjo caselha alaimommalhquelha nac. 32 Mangcoieta nquec apquellai'a quetlhengcap apquellelto nac jelieplecama, apcanet apanque niecje quetlhengcap, coca Engiapom Neten jata eltemesquesec apqueluescai'e apquelpasmecja m'a, aniem'o apiamolhma m'a. 33 Eclhamoc jata aquietnacja la caselha apanco'oc, eltengia ta aquianmoma patacom cacpota ennasquecjac apiesecsec enenlhet metca nac apqueletsecama, cacpota ncoitec quetlhengcap nquescama apqueletsecama m'a aquieto neten mangcotnengwaianlha nnelha', mamma enenlhet apmenielhma m'a cacpota njan mamma ascoc weneng aptewascama la caselha m'a. 34 Ca aquietno la caselha acmennawe apanco'oc enenlhet nalhepop anac, nietnec na apualho'oc jengque'e, coca aquietno caselha acmennawe apanco'oc neten, nietnec na apualho'oc ma'a— 35 Etnamok hata mota ketlhengkap malha nema allennengkasekama nak 36 apkelelꞏhalhnekama na mota apveske apanko'ok evak kelha neksa aktaqmelaikama lhma aliemhapma. Apkelpeneskamo nhan talha alhankok apanko'ok apkelapommatkesekha apkenmahai'a elpeneskasok apkenmaieskasekha atong apvenengka ta m'a apveske apanko'ok. 37 Hata apvaktamo ta m'a, aktaqmelakho nke ta nkotnek apkellelto metka apnaqteianma aniem'o apkelelꞏhalhnekama apveske apanko'ok. Ellavak hata nhan ma'a kakpota elpasengvomok aptavekha m'a, kakpota ellangkok na apanke aptekamok. 38 Hai, aktaqmelakho nke ta nkotnek nema alennengkasekama apkelvetangvaktamo ta menaqteianma apveske apanko'ok, evatak kelha pelhsep apanke' nlho ka la nhan atsak'o. 39 Lhna aptemac mocjom apietquescama Jesus: — Apiojo la'a enenlhet se lha hora ewac apmenielhma apnemacja, eljalhnamaja cacpota meniangquejec emenielhec caselha apanco'oc apnemacja 40 Jata etnancoc na quetlhengcap, melwatesamoc anquec apqueleljalhnecama cacpota njan apquelpenescamo, ncanec co'o asto nac enenlhet asqueniem'o neten astaiecjo enenlhet apanquec, ngcotlapquesec jata awatac mocjom necsa aselhtecja apqueleljalhnecama quetlhengcap— 41 Lhnac aptemac Pedro apcanemo m'a: —Apuesque ¿nlho jengellietcasac apietquescama lhquec ennenco'o nengelto nac apqueltamesaicamoc, nlhoca la aplhamacjo enenlhet anac?— 42 Ca apcatemmoicama lhnac Jesus ma'a: —Ca asietquescama lhquec aplhamacjo apquellelto nac malha nema annencasecama la apiamolhma apqueliejecjo aptacja apcanemacja apuesque apancoc apqueltemo ellancoc aptecamoc apquetcac neptamen. 43 44 Ca apuacjo la mocjom apuesque apancoc ma'a, etanwetac apqueliejecjo aptacja lhquec apaioma apqueltemo ellana, cacpota etnesquesec apquemjama apmanie apqueltacmelquesquescama caselha apanco'oc ma'a, awanjec jata ngcotnec acpaijecja apualho'oc ma'a apquennencasecama. 45 Coca nema annencasecama aclheianma la apualhoc alhaiec apuecta apuesque apancoc, meltacmelquesquesec jata njan aplhamacjo apquenmacmesaicama cacpota njan apquenmacmesaicama nquelwana'ac, cacpota eniempoc aptawecja, einec najan acuacmo nqueso aquieijamalhma'. 46 Ncotlapquesec jata ewatac apuesque apanco'oc, eiaqmoncasecjac jata aquientalhnema nquec aptaiancolha enenlhet meliamonalhma. 47 Nema annencasecama la'a apiawec aptemacja apecquencasecja apaioma apuesque apancoc, coca meliejecjo la'a, ngcolhec jata aquiaqmoncasacjo neten anquec aquientalhnema. 48 Nema annencasecama la'a meijo la apecquencasecja apaioma apuesque apancoc, aptemenwacjo la lhma, ngcolhec jata aquiaqmoncasacjo alhiewai'a ngquec. Apquellelto la enenlhet aquiawai'a aquietnema apianweiacmo, ngcolhec jata aquiatenco m'a, apquellelto la enenlhet aquiawai'a aquietnema apientalhnemo, ngcolhet jata aquiatenco m'a—
Nelhpanquesammalhca aniem'o jengetlhecmoscama Jesus
49 Lhnac aptemac Jesus apquellanemo m'a: —Asua'ac co'o cacpota aluetec talha canque'e nalhepop anac, asqueltawe niecje ncalaio' colhuawe' nac. 50 Ngcowac jata aquiawai'a aquientalhnema asiaijecama, awanjec aslengai'anco colhuawe nac acuacmo actacja nnelha. 51 Ngquetlhenquec apquelualho'oc quetlhengcap ngcoitec metca acmasca ncanec asuai'o jengque'e, coca mangcotnec m'a, ennapacpoc jata. 52 53 Apnemolhema apquetcac apanque enielhpanquesacpoc jata. Apiapom eniammelhecjac jata apquetca, apquetca eniammelhacjac jata apiapom apanque, ngquen ngcammelhecjac jata atca nquec, atca ngcammelhecjac jata ngquen anque', niepiamong ngcammelhecjac jata atawen anquen, atawen anquen ncammelhecjac jata niepiamong— lhna aptemac Jesus
Caselha mongenatquescama
54 Lhnac aptemac Jesus apquellanemo enenlhet: —Necsa apqueluetai'a quetlhengcap iepjopai'a acteiapma aquieto actalhnenwanlha acnem, etlhenec jata acmajai'a ncomma', jata ncotnec ma'a. 55 Ca apquelhcacmo la njan pieiam, etlhenec jata quetlhengcap apmajai'a ncapsemangecja', ncotnec jata m'a. 56 Ellammelhoc secjec neten quetlhengcap cacpota njan nalhepop, apquelliawec acmac'acja ncotnec, coca necsa apqueluetai'a quetlhengcap lhamacjo actemacja caselha asquellanai'a, mangcotlhenac mocjom apquelualhoc co'o asqueniem'o Engiapom Neten. ¡Metca alietnaicama apaqto'oc quetlhengcap!—
Nengasecjecjo mocjom jengammelhaicama
57 —¡Eliequies ellanac acpeiwomo quetlhengcap¡ 58 Aplhenacpec jata nquec lheiap apquellanai'a caselha ncolatsecama, ellanecja coca apancawec secjec ma'a amanie apmajai'a ngcolhec aquiantemacjo napaqtawec apquelemjama apmaniaie', cacpota elhcanwomoc lheiap apquellelto apqueltacmelquescama atong ma'a, cacpota ellaclhenquesec conne nengaclhencasemmalhquelha lheiap ma'a. 59 Eniaqlhencasacpoc jata m'a acuacmo aptangienwacmoc apqueliaqmoma m'a cacpota etepecjac lheiap ma'a—
1Levadura
Capítulo 13

Enenlhet melanecja la apualhoc, mewoncasacpec tep
1 Moclhem'a enenlhet nac apquelleltennasquecjac ania'a Jesus actemacja acuetammalhca m'a, apquellennencasecama Pilato apquennapmo lhnac enenlhet apquelleniem'o Galilea necsa apqueluanlhecamoc nac apquenmesecamoc Engiapom Neten ma'a, lhna ntemac ania'a acuetammalhca m'a. 2 Ca apcatemmoianca lhnac Jesus, lhna aptemac: —Ngquetlheianme mota apualho'oc quetlhengcap ma'a aniem'o aquiawai'a meliamolhma m'a enenlhet anac, tep anquec meliamolhma m'a apquennemolhema apancawe nac, ntema mota atlheianma apualho'oc quetlhengcap ma'a. 3 ¡Coca jawe niecje m'a! Quetlhengcap jata njan elletsepoc mellanacjo ta apualho'oc. 4 Cotlheianwacjo no apualho'oc quetlhengcap apqueletsepmo lhnac nanec 18 enenlhet co Jerusalen, allapecjo lhnac pa'at aquiawai'a metaimong alanemmalhca' aquieto natemma Siloe. Ngquetlheianmec apualho'oc quetlhengcap ma'a apquellelto neten apancawec meliamolhma' apiesecsec apquennemolhema m'a 5 ¡Coca jawe m'a! Quetlhengcap jata njan elletsepoc mellanacjo ta apualho'oc—lhna aptemac Jesus apquellanemo
Lhema iamet apietquescama Jesus metca aquielhna
6 Lhnac aptemac Jesus apqueltennaianca apietquescama: — Lhema enenlhet nac apcanmac iamet higuera aquieto aniep apancoc, lhennenga lhna ntemac aptenenwecjo aptengiai'a niecje' aquielhna, mang noca ncoielhnemac ma'a. 7 Lhna aptemac apcanemo apmacmesaicama: "Janetolhem'a iantelhcapa ntac astenenwectamo mota astengianwecta aquielhna, moca ncoielhnemac ma'a, ntasec jata eiaqtemenec, acjemo amjamo m'a aniep anac" lhna aptemac. 8 Apcatemmoianca lhnac apmacmesaicama m'a: "Eniancono' secjec ncotnemoc mocjom iantelhcapa nac, aliepuatesquesec jata secjec aujac anac lhepop, annenquenec jata njan nquelhtec atco'oc 9 cacpota ncoilhec quelhaja, coca mangcoilho la'a, ntasec aniaqtemenecjac jata" lhna aptemac ma'a.
Aptacmelcasecja Jesus acnem nennecjelha nqueluana acmasca aiempejec
10 Apquetlhecmoscanquec nac Jesus aquieto nemacnecjelha acnem nennecjelha, 11 nnengquec nac na m'a nqueluana acmasca aiempec, 18 iantelhcapa lhnac nguaiacmoc actema acjema, mancawangquec nac ngcopeiwecjac ma'a aniem'o queliacjameioc acmaicama. 12 Apuetai'ac nac Jesus ma'a, ca apcaweianca lhnac, lhna aptemac apcanemo: —Atacmelcasecja ta lheia'— lhna aptemac 13 Ca apnencanmo lhnac apmeioc tacjalhet ma'a, acpeiwecjo lhnac acjema m'a. Awanjec anquec nac acjaicama au'alhoc aniem'o Engiapom Neten apmopuana. 14 Coca mang na ngquescamac acnatjescama apquemjama apmanie nemacnecjelha m'a, ncanec Jesus aptacmelcasecjo nqueluana nac acnem nennecjelha, lhna aptemac ma'a: —¡Acnem sabado nennecjelha acnem anac, metca nemmacmecamaja, mo'oc acnem coca elelhiem cacpota ngcolhec actacmelcasacjo anmasca apiempeioc! —lhna aptemac ma'a 15 Ca apcatemmoianca lhnac Jesus, lhna aptemac: —¡Janet apualho'oc quetlhengcap! Apquenmacmema njan acnem nenencjelha la'a, apqueljatsosquescacje mota tama apnaqtoscama wey, iama maleca njan cacpota elaclacjac ellanconwacjac iemmen. 16 Co'o njan ngcaimelhcac alecquesec acmasca aiempec nqueluana nac aptawen neptamen Abraham, 18 iantelhcapa ntemac malha actetema queliacjameioc, ntasec astacmelcasacjo acnem nennecjelha nac —lhna aptemac Jesus apquellanemo m'a. 17 Ca apquenmancanwecjo lhnac apquellelto apquellammelhma apquellengai'o actacja apaioma Jesus ma'a, coca napocja enenlhet ngquelpaijecjec nac apualho'oc ma'a aniem'o caselha monguetai'o.
Apietquescama Jesus aicaja actec
18 Lhna aptemac Jesus: —Aptaiecja apuesque Engiapom Neten actacmelquescamo acuanecamoc apualho'oc enenlhet'awoc, 19 malha acto nac aicaja 1 nac actec, acpallacmo la actec nalhepop, ntectepquec ma'a, nguanenie', ntec iamet aquiawai'a, ngcolpaclhenec na anata tco'oc actengoc ma'a. 20 21 Aptaiecja apuesque Engiapom Neten actacmelquescamo acuanecamoc apualho'oc enenlhet'awoc, malha acto nac niecje pan anac apiepjescama, nqueluana la'a ngoipetquesec harina cacpota eiepjecja'—lhna aptemac Jesus
Nientelhec antelhec Engiapom Neten apcawacja
22 Necsa apmeiecja lhnac Jesus Jerusalen ma'a, apquetlhecmoseianquec nac aplhamacjo apiau'acja temma cacpota njan temma apquetcoc apqueliecanwacjelha la'a. 23 Lhna aptemac lhema enenlhet apquenmalhneianca: —Apuesque' ¿Apcanet apancawe nlho ta eluoncasacpoc tep enenlhet, je?—lhna aptemac Ca apcatemmoianca lhnac Jesus ma'a, lhna aptemac: 24 —Elienlhanmamoc ellentalhnenwom colhuawec atong atcoc, mantec enenlhet apquenmajai'a elentelhec alhaie, coca mangcollapuanquec jata m'a. 25 Apto apnemacja apcapacjo la atong ma'a, quetlhengcap apquellelto apquelanwai'a aquieto atong iocjalhma, jata eltejec jengque'e: "Apuesque, jengelmaiesques no atong anac" jata etnancoc ma'a. "Ma', moliecpelca quetlhengcap" jata etnec apto apnemacja m'a. 26 Jata etnancoc mocjom ellana quetlhengcap apto apancoc pa'at: "Nentaweicocjec lhta lhemec lheiap, apquetlhecmoscanque mota lheiap aquieto amai cacpota njan nellawacja" jata etnancoc ma'a. 27 Coca jata etnec ellana: "Enmeiacja m'a, meliojolhma quetlhengcap, moliecpelcac" jata etnec apto apnemacja m'a. 28 Netamen eliapcalhec jata, elelpelhiennemoc jata njan apqueluet'o ta apquellelto apquenmammap tacja m'a aquieto Engiapom Neten apcawacja apquelieijenca'a apancawec quetlhengcap Abraham, Isaac, Jacob, cacpota njan aplhamacjo apquetsecama ania'a nnenga, coca menmacpoc tacja quetlhengcap ma'a. 29 Eluomoc jata m'a enenlhet apquelleniem'o alhma nquec jam cacpota elpasenwomoc actacmelaicama lhma' m'a Engiapom Neten apquelanai'a. 30 Moclhem'a anenlhet apquellelto meliaspommap jengque'e nalhepop anac, jata eltemenwomoc neten apancawec ma'a neten, moclhem'a enenlhet apquellelto neten anquec apiaspommap jengque'e nalhepoc anac, coneng jata etnocjac ma'a neten.
Acmaiose apualhoc Jesus apqueluetai'o meliamolhma enenlhet'awoc co Jerusalen
31 Apqueluai'ac nac fariseos apnacja Jesus ma'a, lhnac aptaiancoc: — Jesus, etaqjecja ta, Herodes lhec apmac'ac eniaqjec lheiap—lhna aptaiancoc 32 33 Ca apcatemmoicama lhnac Jesus ma'a: —Maleng ma'a Herodes, eleltennascacja' ta alentepquesec queliacjameio', altacmelcasecjac jata njan anmasca apiempeioc moclhem'a acnem m'a, netamen apenacsec jata asmacmecama. Alhong mocjom alhengama aquieto Jerusalen, coca m'a aptequiomacja lhna mota apquetsecama ania'a m'a. 34 ¡Aiii, quetlhengcap laie' co Jerusalen! wanlha mota apqueliacnecamoc metaimong apquennapeianco apqueletsecama ania'a apquellelto Engiapom neten apquellapascama. Mantec niecje asmajai'a aleltacmelquesec quetlhengcap actemo nac tape'e allaclawa alapquescama alhempancoc atco'oc, coca mellasecjai'ac quetlhengcap, 35 ca ncanec ngcoienniolhcac jata apquellawacja nac, mamma ta ncotacmelquesec, mangelwetecjec jata mocjom acuacmo acnem asuectanlha ta, jata etnancoc jellanac: "Ntasec anque apuactamo, Engiapom neten aptacmelquescama lheiap, nelliawec apto Engiapom Neten apcapascama" jata etnancoc quetlhengcap ma'a.
1En castellano dice semilla de mostaza
Capítulo 14

Aptacmelcasecja lhema acmasca apiempec Jesus
1 Acnem nennecjelha sabado lhna ntemac Jesus apcanemo lhnac etasemoc apnemacja lhema apquemjama apmanie' fariseo ma'a, apcacjaianquec nac na aplhamacja fariseos ma'a, apquellemjaseianca lhnac apaqto'oc Jesus ma'a. 2 Apnenquec nac na lhema enenlhet ma'a aliepjema apoctengoc cacpota njan apio'oc, aptetescai'o lhnac apnaja Jesus ma'a. 3 Ca apquelelmalhneianca lhnac Jesus jengetlhecmoscama jenganemacja Moises, cacpota njan fariseos, lhna aptemac: —¿Nqueltemawe nlho jenganemacja Moises antacmelcasecja acmasca apiempec acnem nennecjelha la'a?—lhna aptemac 4 Coca mang nac ellatemmoicama m'a, ca aptacmelcasecjo lhnac Jesus acmasca apiempec ma'a, ca apqueltemo lhnac na etaqjecjac ma'a. 5 Netamen apquellelmalhneianca lhnac mocjom Jesus fariseos ma'a: —¿Co la etnancoc quetlhengcap apuaiwenco la apquetca nlhocala wei apancoc conne malhec aquiawai'a acnem nennecjelha la'a, je? ¡Jellatemomanojo! —lhna aptemac 6 Coca mang nac nconmajai'ac ellatemmoma m'a. 7 Apuetai'o lhnac Jesus apquellelto apquellanemmap eltasemoc actommalhca' m'a, apqueltengiaianca lhnac altacmelacja aquieto napocja apto apancoc ma'a, lhna aptemac apquellanemo: 8 — Apquellanecpo la quetlhengcap aquietnacja la actacmelaicama lhma' aliemjapma, melteniamonquec aquieto la napocja apnacja apto apancoc ma'a. Ewac jatelha alhaie' enenlhet apto neten apanque' apiaspommap ma'a, 9 netamen apto apancoc ma'a elentepquesec jata quetlhengcap ma'a, engiacjenwacjac jata mocjec quetsec ma'a, ngcotno nac aquiaspommalhquelha. Enmancac jata quetlhengcap aniem'o nema allentepquescama m'a. 10 Coca apquellanecpo la elpasenwomoc aliemjapma quetlhengcap, eniacjenwom jata aquieto ngcotno neten anquec aquiaspommalhca m'a, quetsec mocjec la apto apancoc ma'a, netamen apto apancoc eltoc jata eltetescojo aquieto apnacja, ngcolhec jata allamelanca quetlhengcap ma'a napaqtawec enenlhet'awoc. 11 Enenlhet aptemesquesammacpo la neten apanquec apiaspommap, coneng apanquec jata etnecjac ma'a, coca enenlhet aptema nac coneng apanque, neten apanquec jatoca etnecjac apiaspommap ma'a—lhna aptemac Jesus apquellanemo apquellelto apquellanemmap eltasemoc ma'a. 12 Netamen lhna aptemak Jesus apkanemo apto apnemakha: —Apkelan'o la lheiap aktaqmelaikama lhma, mellanesongkek apkellanema apkennemolhema panke, apkelialheng'a apanke kakpota nhan apkeliekpelkemelha la'a enenlhet, nlho ka la nhan enenlhet nema nak apkelletsekama ngkanek elailhek hata lheiap ma'a apkeliaqmongkasekha apkellaikamok. 13 Koka ntasek ellanak lheiap elpasengvak metka nak apkeletsekama, anmaska apiempeiok, meliennaktema, apkeliakteikamaha, kakpota nhan metka apaqto'ok. 14 Ka enenlhet'avok anak ma'a mankollapvankek eliaqmongkasekha lheiap apkellanema la'a eltasemok, koka aktaqmelakho nke ta nkotnek lheiap akvo'o ta aknem apnaklhatekhangveianlha apieseksek apkenmaskengvaiakmo apkellelto apkelpeivomo, hata nhan nkotaqmelek lheiap ma'a —lhnak aptemak Jesus apkanemo apto apankok ma'a 15 Aplengai'ac nac na lhema enenlhet ma'a, lhnac aptemac: — Apquellenniemawec enenlhet apquelelto apquelpasenwaiam actacmelaicama lhma' aquieto m'a Engiapom Neten apcawacja—lhna aptemac 16 Ca apqueltennaseianca lhnac Jesus lhema apietquescama, lhnac aptemac: —Lhema enenlhet nac apquelanai'ac aquiawai'a actacmelaicama lhma, ca apcapascamo lhnac apquennencasecama cacpota elleltennasancoc elpasenwomoc enenlhet apentalhnema m'a. 17 Ca acmocjetmo lhnac actommalhca m'a, apcapascamo lhnac mocjom apquennencasema cacpota elaclosenwacjac apquellelto apquellanemmap. 18 Coca man nangconmajai'ac enmeiacjac ma'a, lhnac aptemac lhema pjapac: "Momac co aniacjac ma'a, mangcowangcoc asmama lhepop ejencoc, asmac'ac atienenwacjo" lhna aptemac lhema apjapac ma'a. 19 Lhnac na aptemac po'oc: "Momac'ac co aniacjac ma'a, mangcowangcoc co asquenmama 10 wey cacpota alcacquesec, asma'ac aiepconquesec ma'a" 20 Lhnac na aptemac po'oc: "Momac'ac aniacja', mangcowangcoc co'o jeliemjapma" lhna aptemac ma'a. 21 Netamen, aptaqjemo lhnac nema anencasecama apqueltennasquecjo lhnac ania'a apuesque apancoc ma'a. Man na nquescamac acnatjescamo m'a, lhnac aptemac: "Engiacja colhuawe nac amai apiesecsec temma apualhoc anac, eliantementa ta enenlhet metca nac apqueletsecama, meliennactema, metca apaqto'oc, cacpota njan enenlhet apqueliacteicama nac" lhna aptemac. 22 Ca apmeiecjo lhnac nema anencasema m'a, aplaclosenwecjo lhnac enenlhet'awoc ma'a, ca aptaqjemo neptamen, lhnac aptemac: "Apuesque asquelan'ac apqueltacja lhquec alana', awanjec lhma mocjom aplhamo la enenlhet" lhna aptemac. 23 Ca apcapascamo lhnac mocjom apuesque apancoc, lhnac aptemac: "Eniacja colhuawe nac nepiawa temma, eleltennasamoc jata enenlhet apquelluet'acja la'a ellana ta elelhiemoc jengque'e cacpota elanoc asnemacja nac. 24 Moltoc co mocjom elelhiemoc ma'a apmaniaie lhquec asqueltema elpasenwatac nentawecja nac" lhna aptemac.
Nientelhec anieploma Jesus
25 Mang nantec enenlhet apquelieploma apmeiacjelha Jesus ma'a, ca apencammacpo lhnac neptamen ma'a, lhnac aptemac: 26 —Apquenmac'ac jata nquec eltec quetlhengcap jelieplecama, ncaimelhquec eltejec neten apancawec jellamelaiam, mancolhno m'a apquellamelaiam anac apiapma'ac anac, ngcana'ac, apquetcac, apquelialheng'a, cacpota njan mangcolhno apquellamelammacpo apancawe nac quetlhengcap. Mang jata ngquec etnancoc quetlhengcap ma'a, mangcollapuangquec na etnancoc jelieplecama. 27 Mang jata nquec ncollapuanca'ac ellengancoc aquientalhnema 1 aniem'o co'o, cacpota njan niecje acuacmo aptequiewo', moltemesquesec jata jelieplecama. 28 Ngcaimelhquec secjec ngcolietnama apaqto'oc amanie apquenmajai'a etnancoc jelieplecama, malha enenlhet apmajai'a la ellanac pa'at aquiawai, amanie secje ncoietnama apaqtec acuanlha aquianmoma la patacom. 29 29 Apquempo la apquelanai'a apcacjescama ietapjaimaccoc, acsaujelhco la pataccom apancoc, netamen ncolhec jata acuannanca m'a, 30 30 ncolhec jata njan altanco metca apqatec aniem'o mepenescama m'a. 31 Ngcaimelhquec secjec ngcolietnama apaqto'oc amanie apquenmajai'a etnancoc jelieplecama quetlhengcap, malha acto nac apquemjama apmanie quempocjacme 10.000 soldados apancoc, amanie secjec ncoietnama apaqtec cacpota apuanquec jatelha eniammelhec po'oc apuesque apno la 20.000 soldado apanco'oc. 32 Mangcapwanco la'a eniammelhec ma'a, cacpota engiapacsec apquennencasecama eltoc jata mennapacpe'. 33 Jai, ca stac co asquellano quetlhengcap colhuawe nac, apquelmac'ac jata nquec etnancoc jelieplecama, ngcaimelhquec engiaqjesocja' caselha apanco'oc aniemo jelieplecama. Mang jata ngquec etnancoc ma'a, mangcollapuangquec na etnancoc jelieplecama. 34 35 Eltacmelcaso no apquellailhemo quetlhengcap, iasec 2 acto actacmanma nque' nemmaicama, coca acpallesalhco la nalhepop, mmasquec nemmancaja, nnelhacquec najan—lhna aptemac apquellanemo Jesus ma'a.
1Llevar la cruz
2En aquella epoca, la sal en trozos se colocaba como piso en los hornos para aumentar rapidamente su calor, y tambien se mezclaba con estiercol para que sirviera de combustible.
Capítulo 15

Apietquescama Jesus nepquesec aplheneiam
1 Apqueltetescai'o lhnac enenlhet apquenmaicamoc anac pataccom impuestos ancoc, cacpota njan enenlhet apquetlhenammap meliamolhma' apnacja Jesus ma'a cacpota ellailhoc apqueltennaicama m'a. 2 Apqueluetai'ac nac fariseos ma'a, ca apquelmalengiosemmacpo lhnac mocapancawec ma'a, lhna aptaiancoc: — Apalhacuacme nac Jesus enenlhet meliamonalhma cacpota njan aptawocjec lheme'— lhnac aptaiancoc ma'a. 3 Coca aplengai'ac nac Jesus ma'a, ca apqueleltennaseianca lhnac lhema apietquescama, lhna aptemac: 4 — Apietno la 100 nepquesec enenlhet, netamen elhnanmoc jata lhema apjapac apquetcoc. ¿Jawe nlho ngiapac eliengiecjac secjec 99 nepquesec ma'a cacpota elianwacjac lhema lhquec aplheneiam nepquesec apquetcoc, je? 5 Ca apuetacjo la m'a, ncopaijecjac jata apualhoc, epatmentac jata neplatane, 6 apuacjec jata nquec apnemacja, ellawama ta apnemolhema, jata etnec: "Npaijacjec co'o ewalhoc, asuetacjec lhec nepquesec apquetcoc alhta aplheneiam, colpaijecja njan apualho'oc quetlhengcap" jate etnec ma'a. 7 Nnawec na acpaijecja apualhoc Engiapom Neten apuet'o la lhema enenlhet meijamolhma apquellanacjo la apualhoc, aselhtec ma'a acpaijecja apualhoc apquellanei'o 99 enenlhet apquellelto apquelpeiwomo metca aimommalhca' nac ellanocjac apualho'oc mocjom ma'a. 8 Lhema nqueluana quelhaja ngcoitec 10 pataccom aliaquiema, ngcotacmelcaso acnactama conne nacjapa ancoc, netamen ngcolhenec jata au'alhoc acteiam lhema pataccom aquiaquiema ¿Jawe nlho ngiapac colhuawec anquec ncoliama aponmatquescama la'a, cacpota njan ngcalhnasama conne' acnemacja cacpota ngotecjac ma'a, je? 9 Netamen acuetacjo la'a pataccom ancoc, ncollawama ta annemolhema m'a, jata ncotnec: "Colelhiem asnemacja, ncolpaijecjac jata engelualhoc ncanec asuetacjec lhec patacom acteiam lhec" ngcotnec ma'a. 10 Nnawec na m'a Enenlhet Neten ncolpaijecjac jata apualho'oc, ellanancoc actacmelaicama lhma m'a neten, apquellanacjo la apualhoc lhema enenlhet meijamolhma'—
Enenlhet apcasecjecjoc mocjom apquetca
11 Apqueltennaianca lhnac Jesus mocjom apietquescama m'a, lhnac aptemac: — Lhema enenlhet nac apcanet apquetcac ma'a, 12 apselhiec apquetca lhnac apquenmalhnecama lhema piquete apancoc apiapom. Ca apquennasquecjo lhnac piquete apanco'oc apiapom, apquellaiancoc apcanet apquetcac ma'a. 13 Ca apiamasmo lhnac nema aquianmoma piquete apancoc apselhiec ma'a, apquenmamo pataccom aquiawai'a, ca aplhengamo lhanc ma'a apmaianco mo'oc apquellawacja. Ca aptewasqueiacmo lhnac patacom apancoc ma'a apuaianlha, aniem'o caselha ngcollatsecama apuanenwaiam ma'a. 14 Mec nac na nietnemac ma'a, mamma lhnac nentoma m'a, ca aqjemo lhnac na mec apquetcoc anac. 15 Ca aptengiaianca lhnac apmacmecama m'a, apuetecjo aptacmelquescama ietapomap ma'a lhema iocjalhma'. 16 Apmajai'awec nac niecje etuoc aptoma ietapomap ma'a, mang noca eltemoc etuoc apuesque apancoc ma'a. 17 Ca alquetansemo lhnac apualhoc apquetcoc anac, lhnac ntemac aclhenaicama apualhoc: "Mantec aptecamoc apquenmacmesaicama tata netamen alhta aniep apancoc, co'o coca mec jeiaqja nguai'ac jengque'e. 18 Ntasec jata ataqjo netamen alhta cacpota altennacsec: Tata, mangcolatsema asquelanai'a napaqtec Engiapom Neten cacpota njan lheiap, 19 mmasquec co'o asto apquetca, nwannalhquec co ewalhoc atnec apquetca, ntasec jetnescasecjac apmacmesaicama lheiap" lhna ntemac mota aclhenaicama apualhoc apquetcoc anac. 20 Ca aptaqjemo lhnac neptamen apquetcoc anac ma'a, apcanquetquesquecjo lhnac apnemacja apiapom ma'a, mocjec nac apuetai'ac apiapom apquelhiaiacmo apquetca, apietnai'awec nac napa'at, ca apquetcaianco lhnac aptanieiacmo, apatjetmo lhnac na m'a, apetsesmo njan apmalhempenec. 21 Lhnac aptemac apquetcoc anac apcanemo apiapom: "Moijamolhma co'o tata, napaqtec Engiapom Neten cacpota njan lheiap, acuannammalhca ewalhoc atnec apquetca" lhna aptemac apquetcoc. 22 Coca lhna aptemac apiapom apquellanemo apquenmacmesaicama: "Ellacjetcasama eluacjesec apquelentalhnema apqueltacmanma la jengque'e cacpota njan apcatquescama apocjec cacpota njan apnacteto apmancoc, 23 cacpota njan eliantenwacjac wacca atcoc acmelai'a nquec la'a, ennajap jata njan cacpota angellanancoc aquiawai'a actacmelaicama lhma', 24 ncanec apuactaniec eietca malha apquetsepma lhta aptemac, colhua coca apjalhnancoc mocjom, malha aplheneiam alhta aptemac, colhua coca asuetacjec mocjom" lhnac aptemac apiapom ma'a. Ca apquelempai'o lhnac apquellanecjac apqueltacja actacmelaicama lhma' ancoc ma'a. 25 Apetma' lhnoca aplomaca mocjom aniep apmacmecama, netamen aptaqjemo lhnac apnemacja' m'a, necsa aplhengama lhnac aplengai'o acpaiwoma iompat actacmelaicama lhma m'a, 26 ca apquenmalhneianca lhnac apmacmesaicama apiapom, lhnac aptemac: "¿Se lha aquietno aie'?" lhna aptemac. 27 "Apuactaniec lhec apialheng', awanjec acpaijecja apualhoc apiapom apuet'o apjalhnancoc, ca apquelanescaso nac actacmelaicama lhma' apcaqjo njan wacca atcoc acmelai'a nque" lhnac aptemac nema acmacmesaicama. 28 Mang na nquescama aploma apetma' m'a, mang nac na ngcomajai'ac etalhnenwomoc conne' pa'at ma'a. Ca apteiapmo lhnac apiapom ma'a apquelienlhaneiacmo lhna niecje' etalhnenwomoc aquietnacja actacmelaicama lhma m'a. 29 Coca lhna aptemac apquetca metno apquetcoc: "Lhamacmec iantelhcapa asmacmesaicama lheiap, asqueliejecjo motaja, mang coca jeiaiangcoc lhema ieta'ai apquetcoc cacpota alanac actacmelaicama lhma' ieplomo astemo lheme' apquetco'oc. 30 Coca apuactamo apquetca nac lheiap meijamolhma, aptewasquescanquec na lheiap pataccom apancoc ma'a apcaicamo lhta, nquelwana'ac allanactema apquellaiancoc ma'a, njeclhec coca apmacjec tacja aptacmelo lheiap ma'a, apcaqjasqueso njan wacca atcoc acmelai'a, apquelanescaso njan actacmelaicama lhma" lhna aptemac ma'a. 31 Coca lhna aptemac apcatemmoianca apiapom ma'a: "Jai', asiawec co'o mota jeiasecjai'o, alhelhma mota lheiap, ca ejencoc anac lhamacjo lheiap na apanco'oc. 32 Coca ntasec na angellanac actacmelaicama lhma, ncolpaijecjac na enwalho'oc, apuactaniec apialheng, malha lhta apquetsepma aptemac ma'a, apjalhnancoc coca nelwetacjac mocjom, malha alhta aplheneiam na aptemac, coca neluetacjec mocjom " lhna aptemac apiapom ma'a.
Capítulo 16

Apietquescama Jesus enenlhet apmopuanco
1 Apquelleltennasecama lhnac Jesus mocjom apietquescama apqueltamesaicamoc, lhna ptemac: — Lhema enenlhet nac nquescama pataccom apancoc, apnenquec nac na lhema apqueltacmelquesquescama caselha apancoc, aplengai'ac nac na puesque aptewasquescama caselha apanco'oc ma'a. 2 Ca apcaweianca lhnac ma'a, lhna aptemac apcanemo: "Asleng'ac co'o aptewascama caselha ejenco'oc lheiap, jelanescaso no waccajac aptalhescama aluesai'a caselha ejencoc, atepquesec jata lheiap" lhna aptemac apuesque apcanemo m'a. 3 Ntaicama lhnac apualhoc nema acmacmesaicama lhquec ma'a ncanec mancapuanac emacmama mo'oc actemacja apmacmecama, ca ctonac nemmetama malhec, mang nac na ncomajai'ac emoncalhnama m'a, aclheianmo lhnac apualhoc emancac jata m'a. 4 Ca alquetansemo lhnac apualhoc ma'a, lhna ntemac: "Jai', ntase allawama apquellelto apqueliaqmoicamoc apuesque ejencoc cacpota jellamelama quelhaja, cacpota atecjac mocjom asmacmecama lhema apjapac apcacjaiancolha m'a" lhna ntemac alquetansema apualhoc. 5 Ca apcaweianca lhnac lhema apjapac secje, lhna aptemac: "¿Se lha nguaiacmoc pataccom apqueliaqmoma apuesque ejencoc lheiap que?" 6 "100 alhano'oc pelhmoc" "Jai, etalhes no wanlha 50 alhano'oc" lhna aptemac apcanemo. 7 Ca apcaweianca lhnac mocjom po'oc, lhna aptemac apcanemo: "¿Se lha nguaiacmoc pataccom apqueliaqmoma apuesque ejencoc lheiap que?" "10 mil kilos alena apactec" "Jai', etalhes acuanlha 8 mil kilos" lhna aptemac. 8 Aplengai'ac nac ania'a apuesque apancoc aplheianmo lhnac apto apmopuanco panquec ma'a apmacmesaicama nac. Jai, jawengiapac anquec enenlhet apquellelto la mellelieplecama Engiapom neten, neten apancawec apquenmopuanco etengiancoc caselha apanco'oc, mangcolhnoc ma'a apquellelto nac apquelieplecama Engiapom Neten. 9 Ca stac co'o asquellano quetlhengcap apquellelto asqueltamesaicamoc, eleltacmelques apquelhaicamoc pataccom apanco'oc cacpota elpasmoc po'oc, ncacjo ngcosaujalhca, netamen enmacpoc jata tacja quetlhengcap aquieto m'a neten. 10 Enenlhet apmopuana la eltacmelquesec quetsec la caselha nema acpecquencasecja, apuanquec na eltacmelquesec aquiawai'a la caselha, coca enenlhet mangcomopuana nac eltacmelquesec quetsec la caselha nema acpecquencasecja, mangcapuanquec na eltacmelquesec aquiawai'a la caselha. 11 Quetlhengcap mang jata nquec eltacmelcasencoc caselhaja jengque'e nalhepop anac, metlhewanquec jata njan caselha aquiaspommalhca m'a neten. 12 Coca apqueltemenwacjo la lhma quetlhengcap necsa apqueltacmelquescama caselha mangcotno apanco'oc, metlhewangquec jata njan caselha apanco'oc. 13 Mongapuanquec antec apcanet apuesque' engancoc, ncanec angamelemma cacpota njan angeliejecjoc lhema apjapac, coca antacnewac ma'a po'oc, mongeliejecjec najan. Mangapuanquec angeliejecjojoc Engiapom Neten necsa atsepma ennengiec nquescama patacom engancoc —lhna aptemac Jesus apquetlhecmoscamo m'a. 14 Apquelluannaicama lhnac fariseos apquellengai'o m'a aptacja apquetlhecmoscama Jesus, ncanec fariseos aptengianque mota nquescama patacom apanco'oc, 15 coca lhna aptemac Jesus apquellanemo: — Nqueltasec nieje' napaqta'a quetlhengcap napactawec enenlhet, coca meliennengcasac Engiapom Neten apto apiecpelquemo apquelualho'oc. Coca jeng caselha acto neten anquec aquiaspommalhca' napaqtawec enenlhet'awoc, aptacnewacquec coca Engiapom Neten ma'a—lhna aptemac Jesus apquellanemo m'a
Apquetlhecmoscama Jesus actemacja jenganemacja cacpota njan apquetsecama ania'a nnega
16 —Nnelha ntemac jengetlhecmoscama nac jenganemacja cacpota njan apquetlhecmosecamoc apquetsecama ania'a nnenga apuai'o Juan, ca ampai'o njan ania'a actacmanma aclhenammalhca' acnem aptaiecja' apuesque Engiapom Neten, mantec enenlhet'awoc apquellelienlhaneiam etnancoc apnemolhema m'a. 17 Ngcomascoc quelha niecje neten cacpota njan nalhepop, coca jenganemacja nac Moises mangcomasquengwomec jata, ngcotnec jata aclhamacjo actalhesammalhca m'a — lhna aptemac Jesus apquellanemo m'a
Metca nengiamasma entawa'
18 —Lhema enenlhet apiengiauquec jata ngquec aptawa', emecjac mo'oc, apiennencasquec aptawa lhque amanie'. Lhema enenlhet ngcoliemjapoc aquiamasma la atawa, aptewascasquec aliemjapma lhta napaqtec Engiapom Neten—lhna aptemac Jesus
Nema aquietquescama enenlhet nquescama apquetsecama cacpota njan metca apquetsecama
19 Lhna aptemac mocjom apietquescama Jesus: —Apnenquec nac lhema enelhet ngquescama apquetsecama, apmennawe lhna apquelentalhnema, apqueltacmanma njan. Wanlha lhna mota apquelanai'a aquiawai'a actacmelaicama lhma. 20 Apnenquec nac na aujac pa'at enenlhet metca apquetsecama apuesai'a Lazaro, wanlha lhna mota apcasnecama caselhaja apanco'oc, al'oc nac apiempec ma'a. 21 Ngqueltetescai'ac na mota semjeng alpetsesuai'o al'oc apancoc. Mec na ngcaqjema mota m'a, apmajai'awec nac niecje etuoc acpalleiam aptoma necja atcoc coneng asota apancoc nquescama apquetsecama. 22 Apquetsepmec nac enenlhet metca apquetsecama m'a, enenlhet neten nac apquelletsecjac neten ma'a aquieto apnacja Abraham annenga, cacpota etawecjo lhemec ma'a. Netamen apquetsepmo lhnac na ngquescama apquetsecama enenlhet, apcatonnammacpec nac ma'a, 23 awanjec anquec nac aplengaianco aquientalhnema m'a aquieto anmaiancolha enjangoc, ca apcammelhmo lhnac neten, apuetai'o lhnac Abraham cacpota njan Lazaro apnemo lhnac lhemec ma'a, 24 ca apueneianca lhnac ma'a, lhna aptemac: "Seta nnenga Abraham, jeietno no neja'at, eltennes no Lazaro cacpota eiasquecsec apocjec iemmen, eiasquescatac jata ejelhcoc, awanje aslengaianco jengque'e aniem'o talha" lhna aptemac. 25 Coca lhna aptema Abraham apcatemmoianca: "Etawen, colheianwacjo no apualhoc ntase lhta apnemo lheiap nalhepop, Lazaro lhtoca mangcolatsecama apnemo ma'a, colhua coca awanje acpaijecja apualhoc jenque'e, mangcolhnoc lheiap, awanjec aplengaianco aquientalhnema jam. 26 Mangapuangquec ennenco'o angelliocja apnacja nac lheiap, mangcapuangquec na lheiap eniantac jengque'e, ncanec tawanne ca nquec jam" lhna aptemac Abraham. 27 Coca lhna aptemac mocjom ngquescama apquetsecama enenlhet: "Jeiasecjo no Abraham, engiapes no Lazaro asnemacja lhta 28 cacpota eleltennascacjac 5 elialheng'a actacja asuetai'a jengque'e, elianmonquesec jata apualho'oc cacpota melwec jengque'e nenlengaiancolha nac acmasca aquiawai'a" lhna aptemac ma'a. 29 Coca lhnac aptemac Abraham apcatemmoianca: "Nietnec waccajac apanco'oc Moises ma'a cacpota njan apqueletsecama ania'a nnenga, ntasec ellelietsatancoc, elleliejecjoc najan" 30 Coca apcatemmoianca lhnac enenlhet anac, lhnac aptemac: "Ncaimelhquec na lhema nengieijengca annenga eniacjac ma'a cacpota elpacmetquescacjac elianmonquesec apualho'oc, eluatesancoc apqueltemacja ncolatsecama cacpota njan meliascamec Engiapom Neten" 31 Coca apcatemmoianca lhnac mocjom Abraham ma'a: "Melelliajacjo la'a jenganemacja Moises cacpota njan apquetsecama ania'a, cacpota njan melleliejecjec jata njan ma'a lhema apjapac apmasquenwaiam apmeiacjo la m'a" lhna aptemac Abraham.
Capítulo 17

Metca nengiatecamoc enmo'oc elanac ngcolasecama
1 2 Lhnac aptemac Jesus apquellanemo apqueltamesaicamoc: —Apne mota enenlhet apiatecamoc Engiapom Neten apquennemolhema ellanancoc ngcolatsecama, ¡lheiap la aie apiatecamoc anac po'oc! Etac jata aquiawai'a nque aquientalhnema apiaijecama, ntasec niecje ncolhec acteto apiaspoc tama lhema metaimong aquiawai'a cacpota eiengiocpoc nemmen aquiau'acja' aluata. 3 ¡Ellajo ta quetlhengcap!—
Nengasecjecjo mota emmo'oc —Apquellanescaso la'a caselha ncolatsecama po'oc lheiap, eltennacsecjo ta, ca apquellanacjo la apualho'oc ma'a, engiasecjecjoc jata mocjom lheiap metca nnelha m'a.
4 Nlhaniec 1 jata nquec apquelanesquescama ngcolatsecama lheiap lhema acnem ma'a, netamen apquelhiacmec jata nque apmajai'a ellanecjac apualhoc napaqtec lheiap, ntasec engiasecjecjoc mocjom—lhna aptemac Jesus.
Quetsec niecje manjeliasqueiam ellanac coca caselha jempelapquescama
5 Lhnac aptaiancoc apquellanemo apquellapasammap Jesus: — Jengelpasem no cacpota mongeliascamec lheiap—lhna aptaiancoc 6 Coca lhna aptemac Jesus apquellatemoianca: — Niecje quetsec la mangeliasqueiam quetlhengcap, malha acto nac mostaza nac actec, apuanca'ac etnec ellanac iamet anac ncotnengwacja aisecsec anac aluata' aquiau'acja', ncotnengwacjac jata m'a— lhna aptemac.
Apcanemmacpelha etnejec nema acmacmesaicama
7 Nema apmacmesaicama la'a ewacjac apnemacja apuesque apancoc netamen apenescama apmacmecama wacca, cacpota njan aniep, meltejec coca apuesque apancoc cacpota elhec etawecjac ma'a, 8 amanie coca eltec epenescasoc aptoma apuesque apancoc cacpota etuoc, einec najan, netamen eniancoc apaioma apmacmesaicama lhquec cacpota etawecjac alhaie' m'a. 9 Mangcaimelhcac na etnec gracias apuesque apancoc ma'a ncanec nietawec etnec apmacmesaicama m'a. 10 Nnawec niecje njan ngcotnec quetlhengcap ma'a apqueleliajacjo la'a Engiapom Neten, metengianquec na etnancoc gracias, ncanec wanlha apquelieplaucasquec apquellanemmacpelha eltejec—lhna aptemac Jesus
Jesus apqueltacmelcasecja 10 enenlhet nemmasquema actepelcammalhca eniempejec
11 Ca apquempecjo lhnac mocjom Jesus, apiecanwecjo lhnac ma'a iocjalhma Samaria cacpota njan Galilea, 12 apuecjo lhnac natemma apcacjaianquec nac na 10 enenlhet nemmasquema altepelcammalhca apiempeioc ma'a. Ca apqueluetai'o lhnac Jesus ma'a, mocjec nac apquelanmac ma'a, 13 lhnac aptaiancoc apquelueneianca aquiennactema nquec ma'a: — Jesus jengetlhecmocama, elietnojo nengaqta'a ennenco'o, jengeltacmelcasecja no!—lhna aptaiancoc. 14 Ca apqueluetai'o lhnac Jesus ma'a, lhnac aptemac: — Enmeiacja Engiapom Neten apnemacja cacpota eluetac sacerdotes ma'a— Ca apquenmeiecjo lhnac ma'a, nalhet amai nac apqueltacmaluecjac ma'a. 15 Lhema apjapac noca apiecpelcanweiacmo aptacmalueiam ma'a, ca aptaqjemo lhnac neptamen apnacja Jesus. Awanjec anquec nac apquelpalhemaicama aptacnescasecamoc Engiapom Neten ma'a, 16 apqueltanwecjo lhnac na aptapno'oc napaqtec Jesus ma'a, apjalhentamo njan apteclheclhemo napa'at lhepop, aptemo gracias. Co Samaria lhnac enenlhet anac m'a. 17 Necsa apuetai'a lhnac Jesus ma'a, lhnac aptemac apquellanemo apqueltamesaicamoc: —¿Jawe nlho lhquec 10 enenlhet apqueltacmalueiam? Manac eltaqjenwacmoc 9 lhquec, 18 wanlha nac aptaqjenwacmo enenlhet anac metno judio cacpota etnec gracias Engiapom Neten—lhna aptemac Jesus apquellanemo apqueltamesaicamoc 19 Ca aptemo lhnac apcanemo Jesus enenlhet anac: — Etnemecja neten etaqjecja', aptacmelacjec lheiap ncanec mangjei'ascacmoc iocjalhmec etnescasac—lhna aptemac Jesus ma'a.
Apquenmajai'a eliojoc fariseos selha acnem eniempac aptaiecja apuesque Engiapom Neten
20 Moclhem'a fariseos nac apquelelmalhnecama Jesus apquenmajai'a eliojoc acnem ncowac aptaiecja apuesque Engiapom Neten, coca lhna ptemac Jesus: —Acuo'o acnem aptaiecja apuesque Engiapom Neten mangcollapuangquec eluetac enenlhet'awoc, 21 metnangquec jata ngwa'ac ma'a, ngwa'ac jenngque'e, ngwai'a niecje ngque'e apiesecsec anac quetlhengcap—lhna aptemac Jesus apquellanemo m'a. 22 Netamen lhnac aptemac apquellanemo Jesus apqueltamesaicamoc: — Ncowac jata acnem quetlhengcap apquenmajai'a jelweta' aquiacuatacjo nque' asuai'a co'o aquieplomo asmopuana asto enenlhet asqueniem'o neten astaiecjo enenlhet apanque', coca manjeluetiec jata. 23 Moclhem'a ta etlhenec jelwetai'a co'o m'a, mo'oc necja' cacpota njan jengque'e, coca melieplacjanquec quetlhengcap ma'a, ncanec jawe iocjalhmec apquetlheianma m'a. 24 Jata asuactamo ta asto enenlhet asqueniem'o neten astaiecjo enenlhet apanque', aplhamacjo enenlhet jata jeluetac ma'a, malha apquelienmoma nac acuecjo nau'a acsaujecjo alhma nquec jam. 25 Coca amanie' acmajai'a ngcotnec jeng, awanjec jata ncotnec aslengaiancoc co'o, jeltacnonwacjac jata njan enenlhet'awoc anac. 26 Necsa asuecta ta mocjom asto enenlhet asqueniem'o neten astaiecjo enenlhet apanquec, jata ncotnec actemo lhnac nanec apnema Noe nnenga, 27 ngjeclhec noca antemac apquelliaijecama enenlhet'awoc ma'a, aptoianquec aptecamoc, apienaianquec, nqueliemjapeiangquec nan ma'a. Netamen Noe aptalhnemo lhnac nanec conne' loma nemmen aquiawai'a, ca apcapascamo Engiapom Neten acmamai'a aclanecja' aquiawai'a jalhmanquec jam, apqueluaiweianco njan enenlhet, apqueletsepmo lhnac na m'a 28 Lhnac nanec nantemac na temma Sodoma, ngjeclhec noca actemacja apqueliaijecama enenlhet'awoc ma'a, aptoianquec nac aptecamoc, apienaianquec, apquenmaianquec caselha apancoc cacpota njan apquelhaicamoc, apquenaicocjec najan, apquellaneianquec na apcacjaianquelha pa'at, lhnac na ne ntemac apqueliaijecama m'a. 29 Ca apteiapmo lhnac nanec Lot na temma m'a, acpalleiacmo lhnac talha cacpota njan metaimong jenguanlhema aniem'o neten, apqueletsepmo njan aplhamacjo enenlhet'awoc ma'a 30 Ngcotnec jata njan asuactamo ta mocjom co'o asto enenlhet asqueniem'o neten astaiecjo enenlhet apanquec, ngjeclhec jata ngcotnec aptaiancolha nac apqueliaijecama enenlhet'awoc jalhmanquec jam, ngcotlapquesec jatoca njan awatac mocjom. 31 Apnec jata nquec enenlhet tacjalhet apnemacja, metalhnengwacja nquec apnemacja ewacjac caselha apanco'oc, apnec jata nquec enenlhet aniep apancoc, metaqjo nquec apnemacja' apuecja la'a caselha apancoc. 32 Cotlheianwacjo no apualho'oc actemo lhnac nanec Lot aptawa', actaiecjo lhnac nanec iasec aquiennaiecja amjama, ncanec ammelhecjo lhnac nanec netamen ma'a. 33 Enenlhet aclheianma la apualhoc apancoc apanque, mewongcasacpec jata tep, coca enenlhet apmama la tacja aquientalhnema aniem'o jeieplecama co'o, ewoncasacpoc jata tep enenlhet anac. 34 Ca acuo'o ta pelhasep anac, apcanet jata enactenec lheme, lhema apjapac jata ngcolhec aquiatenwactamo, po'oc jata elhnecjac ma'a. 35 Janet jata njan ngqueluana'ac ngcolteclheioc nteclheclhema m'a, lhema ta ngcolhec aquiantemacjo, ngcolhnecjac jata mo'oc 2 —lhna aptemac Jesus apquellanemo m'a. 36 37 Ka apkelelmalhneiangka lhnak apkeltamesaikamok ma'a: —¿Apveske ko la akietelha akmak'akha ngkotnek lhamakho aplheno nak, he? — lhna aptaiangkok. Ka apkatemmoiangka lhnak Jesus ma'a, lhna aptemak: —Malha ta nkotnek ma'a mama nak apkelieihakha la neten, ka nietnak na kaselhan apak atsepma m'a —lhna aptemak Jesus ma'a.
17 veces
2Los que creen en Dios seran llevados con el, pero los que no creen seran dejados.
Capítulo 18

Nellienlhaneiacmo nempacmetquescama Engiapom Neten
1 Apquetlhecmoscanquec nac Jesus apqueltamesaicamoc actemacja nempacmetquescama nellienlhaneiacmo Engiapom Neten, lhna aptema Jesus lhema apietquescama: 2 — Apnenquec nac lhema enenlhet jengiecpelquemo, mengiailhemo lhnac Engiapom Neten cacpota njan enenlhet'awoc ma'a, 3 nlomaca lhnac na m'a lhema nqueluana lhentampe, metca nnelha lhna ntemac aquiawecja apnacja jengiecpelquemo, altemo epasmoc emasquecsec alammelhammalhca acjaicamoc. 4 5 Amanie nquec nac aquiawecja m'a, mang nac eniasecjai'ac ma'a, coca netamen jengiecpelquemo alquetamieanca lhnac apualhoc ma'a cacpota eniasecjamwomjoc lhentampe, ncanec alienlhaneiacmo metca nnelha acuecja m'a, nleclaiacmec nac jengiecpelquemo acuecja mota nqueluana nac. Mengiailhemo niecje Engiapom Neten cacpota njan enenlhet'awoc, apasmonque coca apanque nqueluana nac aniem'o alienlhaneiacmo m'a—lhna aptemac. 6 Ca apenescamo lhnac Jesus apqueleltennasecama apietquescama, lhna aptemac apquellanemo apqueltamesaicamoc: — Ca enenlhet anac jengiecpelquemo meijamolhma, apasmonquec coca apanquec nqueluana lhentampe aniem'o alienlhaneiacmo. 7 8 Engiapom Neten coca epasmoc colhuawec apto enenlhet apqueliequiescama apquelienlhaneiacmo la'a apacmetquescama, colhuawec anquec jata eliejecjoc, jawengiapac anque' jata ngcotnec ma'a. Necsa asuecta ta mocjom asto enenlhet asqueniem'o neten astaiecjo enenlhet apanque', malha nac moluetangwetec enenlhet mangeliasqueiam la'a—lhna aptemac Jesus.
Enenlhet apcanmacpo cacpota njan enenlhet meientalhnecamaja
9 Apquelpaqmetquesaicama lhnac Jesus enenlhet'awoc apquelleltammacpo apancawec apquelpeiwomo, apquelluannaicama mota po'oc, lhna aptemac Jesus apietquescama: 10 — Apcanet nac enenlhet apquenmeiecja Engiapom Neten apnemacjac cacpota elpaqmetquesec Engiapom Neten ma'a. Lhema lhnac Fariseo, po'oc nac na apquenmama tacja pataccom impuesto ancoc 11 Apquenmecjec nac neten fariseo, apacmetquescamo Engiapom Neten ma'a, lhna aptemac: "Awanjec astema gracias lheiap ncanec jawe stonac co'o po'oc enenlhet meliamolhma nac, mamma asmenielhma, moiennengquescamac etawa', motnema aptemacja nac jengque'e, apquenmama nac pataccom impuesto ancoc. 12 Janet acnem lhema semana ancoc ascaqjasquesammalhco mec aniem'o lheiap, ascaianquec na diezmo aquianmoma asmacmecama " lhna aptema apacmetquescama Engiapom Neten fariseo. 13 Coca enenlhet apquenmama tacja pataccom impuesto ancoc, taiepec nac apquenmaiancolha m'a fariseo, apcapiosemmacpawec nac apjalhentamo njan ma'a, aptecpoianca apnengiec apanque' aniem'o aquietnecjo apaqtec meijamolhma, lhna aptemac: "Jeiasecjecjo nojo Engiapom Neten, emasques ngcolatsecama astemacja, eietno no neja'at" lhna aptemac apacmetquescamo Engiapom Neten— 14 Ca apenescamo lhnac apietquescama Jesus ma'a, lhna aptemac apquellanemo enelhet'awoc: —Jawe ngiapac anquec Engiapom Neten apmecjo tacja mocjom apquenmama tacja pataccom impuesto ancoc, coca m'a meniasecjecjoc fariseo lhquec. Enenlhet apqueltammacpo neten apancawec, ngcolhec jata actemesquesacjo coneng. Enenlhet apqueltaicamoc coneng anque, neten apancawec jata ngcolhec altemesquesacjo—lhna aptemac Jesus.
Apquenmama tacja Jesus nematcac
15 Mmajai'ac nac niecje ngcolhec aliantemo nematcac apnacja Jesus ma'a cacpota enenquenec apmeio'oc aietsecso'oc, cacpota ngcotlhewangcoc altacmanma allaniemjaicama m'a. Man nac elleltemoc apqueltamesaicamoc ma'a, apqueliamenaicama lhnoca ngcana'ac ma'a. 16 Ca apquellaweianca lhnac Jesus mematcac, lhna aptema apquellanemo apqueltamesaicamoc: —Meliasamolhma nematcac anac, ellanco jelliawa', ngcaimelhquec na quetlhengcap etnancocjac malha nematcac anac cacpota etnancoc Engiapom Neten apquennemolhema. 17 Engiapom Neten jata etnocjac apuesque apancoc wanlha apquellelto nac meliasqueiam, malha actaiancolha nac nematcac—lhna aptemac apquellanemo m'a.
Apquetcoc ngquescama apquetsecama
18 Lhema apquemjama apmanie' lhnac apacmetquescai'ac Jesus, lhna aptemac: —Jengetlhecmoscama apiamolhma' ¿Co la atnec co'o cacpota ngcoitec aquiennactema enengiec mancotnenguaianlha nnelha?—lhna aptemac 19 Ca apcatemmoianca lhnac Jesus ma'a, lhna aptemac: —¿Se lha ntac jeltangco nac asiamolhma lheiap que? Wanlha Engiapom Neten apto apiamolhma. 20 Apiawec lheiap jenganemacja nac, meiennengques aptawa' etuascamoc mo'oc nqueluana, meniaqja po'oc, memenielhangco ie', metnama ngquec apmopuana ania'a apmajai'a etselhnanac po'oc, eliejecjo ta cacpota njan eltacmelquesec ngcana'ac —lhna aptemac Jesus. 21 Ca apcatemmoianca lhnac apquemjama apmanie, lhna aptemac: —Jai, astemacja eietcoc asqueliejecjo co'o m'a— 22 Coca lhna aptemac Jesus apcanemo: — Lhema caselha ngcaimelhcac lheiap etnejec, etlhac lhamacjo apquetsecama apancoc, etengia aquianmoma pataccom cacpota ellanconwomoc pataccom metca nac apquelletsecama, cacpota jeieplomaja. Netamen ngcoitec jata lheiap ngquescama apquetsecama m'a neten —lhna ptemac ma'a. 23 Aiosec na ntemac apualhoc aplengai'o enenlhet ma'a aniem'o ngquescama apquetsecama. 24 Netamen Jesus lhna aptemac apquellanemo enenlhet'awoc ma'a: —¡Nientelhec anquec eclhec enenlhet nquescama apquetsecama Engiapom Neten apcawacja! 25 Mangcaniemec etalhnenwacja ietapecjang sei'e nac alhancoc —lhna aptemac Jesus ma'a. 26 Ngquelpelapquescangquec nac enelhet'awoc apquellengai'o m'a, lhna aptaiancoc: —Mamma jatelha apqueluaiam la tep, jela— 27 Ca apcatemmoianca lhnac Jesus ma'a: — Enenlhet mangcapuanquec etnec acto nac jeng, coca Engiapom Neten apuanque etnejec apmac'acja la etnejec—lhna aptemac 28 Coca lhna aptemac Pedro: —Apuesque, nennengquenacje lhta caselha engancoc ennenco'o ca nelieplawengca lheiap—lhna aptemac 29 Ca apcatemmoianca lhnac Jesus, lhna aptemac: —Jai', jawe ngiapac anquec apquelto la enenlhet eingiecja secje' apnemacja, aptawa', apquelialheng'a, ngcana'ac, apquetcac, aniem'o Engiapom Neten, 30 elhcac jata caselha tep anquec mocjom jengque'e, netamen elhnacjac jata lhemec Engiapom Neten aquieto m'a neten mangcotnenguaianlha nnelha' aquiennactema apnengiec ma'a—
Aplheianma mocjom Jesus ematong jata
31 Apcanquesecjec nac Jesus 12 apqueltamesaicamoc moc apancawec ma'a, lhna aptemac apquellanemo: —Nenmeiacjec colhua Jerusalen, jata ngcotnec ma'a aquientalhnema apquetlheianmo lhnac nanec apquetsecama ania'a nnenga actemacja apiaijecama enenlhet apqueniem'o neten aptaiecjo enenlhet apanque. 32 Apquelemjama apmaniaie nac judios jellangconguomoc jata metnangco nac judios, jeluannama ta m'a, jeltacnewa ta njan, jellelhpaqjac jata njan apqueliemanong neja'at, 33 jelleliaqpelhquetama ta, cacpota jellaqjec jata njan, coca janet'olhema acnem jata ngotnec asquetsepma, atnecjac jata mocjom ejalhnancoc apiesecsec apquenmasquenwaiacmo— lhna aptemac Jesus ma'a. 34 Coca mang nac eliamoc apqueltamesaicamoc ma'a actemacja aplheianma Jesus, malha lhna ntemac melleltammap eliojoc ma'a.
Aptaqmelcasecja Jesus enenlhet metca apaqto'oc
35 Nengaqtec nac apuecja Jesus natemma Jerico m'a, apnenquec nac enenlhet metca apaqto'oc ma'a necja amai, apquellanjecama lhna mota enenlhet pataccom ma'a. 36 Aplengai'ac nac nema alpacmetenta amai, ca apquelelmalhneianca lhnac ma'a, lhna aptemac: —¿Se lha acto ie? 37 —Apieca Jesus co Nazaret jengque'e —lhna aptaiancoc enenlhet ma'a. 38 Ca apueneianca lhnac metca apaqto'oc ma'a, lhna aptemac: — Jesus, David aptawen neptamen, eietno neja'at— 39 Coca enenlhet apquetlhengama apmanie Jesus apqueliamenaicama lhnac apquelleltemo ewanmac metca apaqto'oc ma'a, coca apianwescaiacmec nac apuenecama aquiennactema anque, lhna aptemac mocjom: —David aptawen neptamen, eietno no neja'at—lhna aptemac 40 Ca apquenenwaiacmo lhnac Jesus ma'a, apqueltemo lhnac ngcolhec aquiantemacmo enenlhet anac, lhna aptemac ma'a: 41 —¿Sec la apquelto alanac que? —lhna aptemac — Apuesque, asqueltawec atecja lhma' mocjom—lhna aptemac 42 — Jai', ntase, etacmelecjac jata ncanec manjeiascacmoc lheiap —lhna aptemac Jesus m'a. 43 Colhuawec anquec nac aptacmelecjac, apieplecjo lhnac Jesus ma'a, apquetsewascamawec nac ma'a aniem'o Engiapom Neten apmopuana, cacpota njan enenlhet'awoc apquelletsewascamawec nac na m'a.
Capítulo 19

Apiaqmoncasecja apualhoc Zaqueo
1 Apuecjo lhnac Jesus na temma Jerico, aplhengamo apiecanwecjo lhnac ma'a. 2 Apnenquec nac ma'a lhema apquemjama apmanie apquenmaicamoc pataccom impuesto ancoc co Roma, nema apquetsecama lhnac ma'a enenlhet anac, Zaqueo apuesai'a. 3 Apmajai'awec nac niecje eiecpelcoc Jesus ma'a, coca aplhaniec na sonque enelhet'awoc ma'a, apiaquatema panquec nac Zaqueo. 4 Ca apquetquecjo lhnac apmanie apmeiecjelha Jesus ma'a, apcanetuaiacmo lhnac lhema iamet cacpota etac ma'a, sicomoro acuesai'a iamet anac, aliawai'a awa' lhnac ma'a. 5 Apuaiacmo lhnac Jesus ma'a aquietelha apiancacja neten Zaqueo, ca apuetai'o lhnac ma'a, lhna aptemac apcanemo: — Etiep colhuawe nac Zaqueo, asqueltawec alhec apnemacja acnem anac —lhna aptemac ma'a. 6 Colhuawec anquec nac apteiapmac Zaqueo m'a, mpaijecjec anquec nac apualhoc apmamo lhnac na tacja Jesus ma'a. 7 Coca apquelmalengiosemmacpec nac enenlhet'awoc ma'a apqueluetaio apiantemecjo Jesus enenlhet meijamolhma. 8 Necsa aptaweicocja lhnac ma'a, apquenmecjo lhnac neten zaqueo m'a, lhna aptemac: —Apuesque, engiailhono secje asmac'acja atnec alheianma, allancoc jata necja atcoc caselha ejencoc metca nac apquelletsecama, asmenielhquescamacja lhta la enenlhet, altaqjesoc jata acuacmo 4 actaiecjo mocjom taiep—lhna aptemac 9 Coca lhna aptemac Jesus apquellanemo enenlhet'awoc: —Ca acnem anac, ngua'ac apuoncasemmap tep enenlhet anac cacpota njan apquetca'ac, ncanec apto njan aptawen neptamen apanquec Abraham annenga. 10 Co'o asto nac enenlhet asqueniem'o neten astaiecjo enenlhet apanque, asua'ac asquelquetansema cacpota njan aluonquesec tep apquellelto nac apquetlheneiam—lhna aptemac Jesus
Apietquescama Jesus nema apmacmesaicama meijamolhma
11 Nengaqtec nac natemma Jerusalen ma'a, apquellengai'o lhnac Jesus enenlhet'awoc apqueltennaicama m'a, atlheianmo lhnac apualho'oc anquetuai'a acnem acuai'a aptaiecja jata apuesque Engiapom Neten, 12 ca apqueltennaseianca Jesus lhema apietquescama, lhna aptemac: —Apnenquec nac ma'a lhema enenlhet apto neten apanquec apiaspommap, apmaianquec nac mo'oc apquellawacja cacpota elhcac ma'a waccajac apancoc aptemacja apquemjama apmanie, cacpota etaqjoc mocjom neptamen ma'a. 13 Amanie lhnac apmajai'a elhong ma'a, apcanquesecjo lhnac 10 apquenmacmesaicama, ca apquellaianco lhnac na pataccom moclhem'a m'a, lhna aptemac: "Enmacmesama ta pataccom anac acuacmo acnem asuactamo ta mocjom" lhna aptemac apquellanemo m'a. 14 Ca aplhengamo lhnac ma'a. Coca apquellelto apquennemolhema apancawec ma'a apquelapascamo lhnac apmaniaie apquellennencasecama cacpota eleltennascacjac apto neten apanquec apuesque m'a mo'oc apquellawacja, melleltemo etnescasocjac apuesque apanco'oc ma'a. 15 Coca ngcacjemawec nac apquenmeiecjo nema allennencasecama lhquec ma'a, aptemenquec coca apuesque. Netamen aptaqjemo lhnac apcawacja apanque ma'a, apquellaweianca lhnac apquenmacmesaicama apquellaicamoc alhta pataccom, cacpota eijoc acuanlha apquennacsepma' pataccom. 16 Ca apuai'o lhnac lhema apjapac apmanie' apmacmesaicama, lhna aptemac: "Apuesque, 10 actaiecjo mocjom tep asnaqsepma' pataccom jepecquencasecja lhta lheiap" lhna aptemac. 17 Coca lhna aptemac apuesque apcatemmoianca: "Ntasec anco ie', lheiap apto apiamolhma, quetse lhta niecje aspecquencasecja pataccom, apuanquec coca etacmelquesec lheiap, colhuawe nac atnesquesec jata apuesque 10 na temma lheiap" lhna aptemac ma'a. 18 Ca apuectamo lhnac na mocjom po'oc apmacmesaicama, lhna aptemac: "Apuesque, 5 actaiecjo mocjom tep asnaqsepma pataccom jepecquencasecja lhta lheiap" lhna aptemac 19 Coca lhna aptemac apuesque: "Colhuawe nac atnesquesec jata apuesque 5 natemma lheiap" lhna aptemac. 20 21 Ca apuo'o mocjom po'oc apmacmesaicama, lhna aptemac ma'a: "Apuesque, asiawe co lheiap apto jeniatecjojo, wanlha mota apqueltemo enacsepoc pataccom aniem'o nientelhe mota nenmacmecama jengaicamoc, ca ascai'o nac co'o atuacsec pataccom alhta jeiaicamoc lheiap, asqueltacmelquescamo nac asquelpelhquetmo ietamopai'a pataccom anac, ca jengque'e, ema' jam" lhna aptemac. 22 Coca lhna aptemac apuesque apcanemo: "Meijamolhma lheiap, apaioma apanque' acselhnanecja. Apiawec nieje lheiap asto asiatecjo cacpota anaqsepoc pataccom necsa aquientalhnema apquenmacmecama asquenmacmesaicama. 23 Apuanque lhta niecje engiaqjescacjac pataccom ejencoc anmacmeiancolha nac pataccom cacpota ncowanamoc anquec ma'a" lhna aptemac. 24 Ca apquellaweianca lhnac apuesque po'oc apmacmesaicama, lhna aptemac: "Eljatsoscasecja patacom enenlhet anac, ellancocja' aplhamesecja lhquec 10 actaiecjo apnacsepma" lhna aptemac. 25 Coca apquellatemmoicama lhnac ma'a: "Ma', selha ntajac, mangcaimelhcac ma'a, 10 antac aplhamasecja m'a" lhna aptaiancoc. 26 Coca lhnac aptemac apcatemmoianca apuesque: "Jawe niapac anquec astacja nac asquellano, apto la'a apqueliejecjo, neten anquec jata ncotnec aplhewai'a mocjom, coca enenlhet meliajacjo la'a, ngcolhec jata aljatsosquescactamo quetsec caselha apanco'oc. 27 ¡Enmeiacja m'a, eliantenwacja enenlhet apquellelto nac asquellammelhmacja' lhcaiec, melleltemo lhquec atnec apuesque! ¡Ennapec jata nejaqtec co'o!" lhna aptemac apuesque apquellanemo—
Jesus aptalhnenwecja natemma Jerusalen
28 Apenescanquec nac apquetlhecmoscama Jesus ma'a, ca apquempacjo lhnac mocjom aplhengama aquieto Jerusalen, 29 30 nengaqtec nac ma'a na temma Betfage cacpota njan Betania, necja lhnac lhienep acjaiam acuesai'a Olivos m'a, lhna aptemac apquellanemo apcanet apqueltamesaicamoc: — Enmeiacja no ja'e na temma nac, eluetanwomoc jata m'a malecca atco'oc metca ngcoltamacsec, actetemmalhca m'a. Eleljatsosques jata actetemmalhca, eliantementa ta. 31 Jata apuet'o ta otep ma'a, apquelelmalhnenca la'a apquenmajai'a etnancoc, eleltennes jata m'a apuesque lhquec aptema', jata eltejec—lhna aptemac Jesus apquellanemo 32 Ca apquenmeiecjo lhnac ma'a, apqueluetanwecjo lhnac actacja aplheianma lhquec Jesus, 33 ca apqueljatsosquescamo actetemmalhca tama, coca lhna aptemac apquellanemo otep: —¿Se lha ntac apqueljatsoscasenco nac tama ie? —lhna aptemac 34 —Apuesque lhquec apqueltema'— lhna aptaiancoc ma'a. 35 Ca apqueltaqjemo lhnac mocjom apnacja Jesus ma'a, apquelleltanquesecjo lhnac apquellaclammap ma'a, apquelpasmo lhnac na Jesus apquelcanetquescamo malecca tcoc ma'a. 36 Ca apquellempecjo lhnac mocjom aquieto m'a Jerusalen, manna ntec enenlhet'awoc apcacjesecamoc apquelaqlammap tacjalhet amai apmeiacjelha Jesus. 37 Apqueluecjo lhnac ma'a nengaqtec lhienep acjaiam Olivos, apquellempecjo lhnac mocjom apquetlhengama aquieto Jerusalen. Ngquelpaijecjec nac apualho'oc apquellelto apquelieplecja Jesus ma'a, awanjec anquec nac aptaicamoc gracias Engiapom Neten ma'a ncanec apqueluetai'o lhnac caselha monguetai'o apquellanai'a Jesus. 38 Apqueluenecama lhnac aquiennactema ngquec ma'a, lhnac aptaiancoc ma'a: —!Ntasec anquec apuai'o apuesque, nelliawec ennenco'o lheiap apto apcapascama Engiapom Neten! ¡Nengeltawec ngcoitec metca acmasca neten, nengeltawec na eliecpelcanwomoc actemacja apmopuana Engiapom Neten!—lhna aptaiancoc ma'a. 39 Coca apquellomaca lhnac na moclhem'a fariseos ma'a, lhna aptaiancoc apquellanemo Jesus ma'a: — Jengetlhecmoscama, eniana no eluanmac apquelieplecama nac lheiap— 40 Coca lhna aptemac Jesus apcatemmoianca: — Ca apqueluanmo la enenlhet anac, metaimong jata jeluenama co'o—lhna aptemac 41 Apquellanquetquescanquec nac natemma Jerusalen ma'a, ca apcamelhecjo lhnac natemma Jesus, apuenemo lhnac ma'a, 42 lhna aptemac: —Enenlhet'awoc co Jerusalen, asqueltawec niecje eliamwomjoc quetlhengcap cacpota ngcoitec metca acmasca, mang coca elianweiacmojo'. 43 Ngcowac jata aquientalhnema tacjaplhet'oc, eluac jata apquellammelhma, ellanancoc jata apquelcanantaicamoc ancoc lhamacjo necjau'ac acjalhtemommalhca nac. 44 Enaqtewacsec jata natemma aplhamacjo nac, jawe ngiapac anquec jata ngcotnec ma'a, ngcolhec jata annapacjo lhamacjo enenlhet'awoc, ncanec menmamac tacja cacpota eluoncasacpoc tep apuo'o lhta Engiapom Neten apiesecsec quetlhengcap—
Apquelentepquescama Jesus enenlhet apquelhaicamoc caselha conne' Engiapom Neten apnemacja'
45 Netamen aptalhnemo lhnac Jesus Engiapom Neten apnemacja m'a, apquelentepquescamo lhnac enenlhet apquelhaicamoc caselha apanco'oc aptengiaicamoc patacom, 46 lhnac aptemac Jesus: — Ca ntemac actalhesammalhca Engiapom Neten apaioma: «Asnemacja' jelpacmetquescamacja enenlhet'awoc, quetlhengcap coca apqueltemescasac malha apcacjaiancolha' enenlhet apquenmenielhaicamoc» —lhnac aptemac Engiapom Neten. 47 Lhamacjo cnem nac apquetlhecmoscama Jesus ma'a Engiapom Neten apnemacja', coca apqueluescai'e sacerdotes, jengetlhecmoscama jenganemacja cacpota njan apquellemjama apmaniaie' apquellawacja nac apquelleliaicama lhnac ania'a cacpota ellaqjec Jesus ma'a. 48 Mang noca ncollapuanca'ac ma'a, ncanec aplhamacjo enenlhet nac apquenmajai'a ellailhoc apquetlhecmocama Jesus ma'a.
Capítulo 20

Apquenmajai'a eliojoc enenlhet'awoc aniemeiacja apientalhnemo Jesus
1 Apnenquec nac Jesus ma'a conne Engiapom Neten apnemacja' apquetlhecmoscanquec nac ma'a ania'a actacmanma, ca apqueluai'o lhnac apqueluescaie' sacerdotes, jengetlhecmoscama jenganemacja, cacpota njan apquelemjama apmaniaie' apquellawacja', 2 lhnac aptaiancoc: — ¿Selha altemo eientalhnesacpoc lheiap cacpota ellanac lhamacjo caselha nac?— lhna aptaiancoc 3 Coca lhna aptemac Jesus apquellatemoianca: — Co'o njan asqueltawec alelmalhnama quetlhengcap. 4 ¿Selha apascama Juan cacpota ellauquesancoc iemmen enenlhet'awoc que, Engiapom Neten nlho ca la enenlhet? ¡Ngwa, jellatemmoma nojo!—lhna ptemac 5 Ca apquellatemommacpo lhnac mocapanwec ma'a, lhna aptaiancoc: — Nengellatemmonca la'a Engiapom Neten apcapascama Juan, netamen jengelleltennasecjoc jata Jesus mangelleliejecjo Juan ma'a. 6 Nengellatemmonca la'a enenlhet apcapascama Juan, ello'oc jata enenlhet metaimong jata jengeliaqna', ncanec apquelliawec enenlhet Engiapom Neten apcapascama Juan—lhnac aptaiancoc apquelpacmetcasemmacpo moc apancawec ma'a. 7 Ca apquetlheianmo lhnac meliamoc apto apcapascama Juan cacpota ellauquesancoc conne iemmen enenlhet'awoc ma'a. 8 Lhnac aptemac na Jesus: — Co'o njan momac'ac alhenec apto apqueltemo aientalhnesalhcojo' cacpota allanac lhamacjo caselha nac— lhna aptemac
Nema anmacmesaicama meliamolhma'
9 Lhnac aptemac lhema apietquescama Jesus: — Lhema enenlhet apcanmo lhnac uva iamet aniep apancoc, ca aptengiai'o lhnac apquenmacmesaicama cacpota eltacmelquesec aniep apancoc, ca aplhengamo lhnac ma'a mo'oc apquellawacja'. 10 Nwaiacmec nac pelten apnaclhemacja' aquielhna m'a, ca apcapascamo lhnac lhema apmacmesaicama m'a cacpota eluacjesec necja aquielhna apanco'oc. Coca apqueluetai'ac nac apquenmacmecama aniep apuecjo apcapasammap ma'a, ca apqueltanieiacmo lhnac, apquelpatjetmo, apqueltecpoianca njan, ca apquellapasecjo moc apmeioc ma'a. 11 Netamen apuesque apcapasacjo mocjom po'oc apmacmesaicama, apqueltacnoncomo lhnac na m'a, apqueltecpoianca njan ma'a, ca apquellapasacjo mocjom moc apmeioc. 12 Netamen apcapascamo mocjom po'oc apmacmesaicama, apqueliensascamo m'a ca apqueliengeianco neiawa' aniep ma'a. 13 Netamen apto apancoc aniep alquetameianca lhna apualhoc, lhna ntemac: "Ca ascapaso la eietca ascamelaiam, ellasecjoc jatelha m'a" lhna ntemac aclheianma apualhoc ma'a. 14 Coca apquellelto apquenmacmecama m'a apqueluetai'o nema apascama, lhnac aptaiancoc apquelpacmetquesammacpoc moc apancawec ma'a: "Ca apquetca ja'e, jata etnecjac apanco'oc aniep anac, ntasec angaqjec cacpota antancocjac enganco'oc aniep anac" lhna aptaiancoc ma'a. 15 Ca apquelpatjetmo apqueliaso neiawa' aniep, ca apquellaqjemo m'a. Ca apenescamo lhnac apqueltennaicama Jesus ma'a, apquelelmalhneianca lhnac enenlhet'awoc ma'a, lhnac aptemac: 16 — ¿Co la actacja atlheianma apualho'oc quetlhengcap apuactamo la otep aniep anac? Jawe ngiapac anquec ennapuetac jata apquenmacmesaicama meliamolhma lhquec cacpota ellancocjac aniep po'oc enenlhet— lhna aptemac. Coca lhna aptaiancoc apquellatemoianca enenlhet'awoc ma'a: —Ma', metnec ma'a —lhnac aptaiancoc ma'a. 17 Apquellanei'awec nac Jesus enenlhet'awoc ma'a, lhnac aptemac: — Ca ntac actalhesammalhca Engiapom Neten apaioma: «Metaimong alhta apquelhacjama apquellanecamoc pa'at, coca Engiapom Neten aptemesquesacjec neten anquec aquiaspommalhca m'a» 18 Enenlhet apto la apteiam tacjalhet metaimong anac, etuasacpoc jata, metaimong anac acteiapmo la tacjaplhet enenlhet, ngcotuacsec jata m'a 1 —lhnac aptemac Jesus ma'a. 19 Apqueliecpelcanweiacmec nac apquetlhenammap sacerdotes cacpota njan jengetlhecmoscama jenganemacja Moises, actemacja apietquescama Jesus ma'a, ca apquenmajai'o lhnac niecje' elpatjetec ma'a, nquelwannammalhquec noca apualho'oc ma'a, apquellai'ac nac ello'oc apquellelto apquelieplecama Jesus. 20 Ca apquellapascamo lhnac enenlhet malha apqueliamolhma apancawec cacpota elenmalhnenwacjac lhema ania'a Jesus, coca apquenmajai'ac nac niecje etselhnanac cacpota ellanconwomoc apuesque co Roma, 21 lhnac aptaiancoc apquellanemo m'a: — Jengetlhecmoscama, nenniawec ennenco'o acto nac iocjalhme' apaioma lheiap mamma apcai'acja, melan'oc apiempec enenlhet acnema apquelletsecama, wanlha aquietemo nquec apquetlhecmoscama jenganemacja Engiapom Neten, ca nemmac'o nac angelelmalhnama lheiap, 22 ¿ntase nlho angelianmonquesec impuesto ancoc apuesque iocjalhma Roma? —lhna aptaiancoc ma'a. 23 Apiamawec noca Jesus apquenmajai'o etselhnanac ma'a, lhnac aptemac apquellanemo: 24 —Nguanojo, jengques no lhema patacom aquiaquiema nac nengaicamoc anac impuesto ancoc ¿Selha na'at jengcaie, apuesai'a njan? — Apuesque Cesar jam — lhnac aptaiancoc. 25 —Jai', ellanconwacjac Cesar acto apancoc, cacpota njan ellanconwacjac Engiapom Neten acto apancoc —lhna aptemac Jesus ma'a. 26 Mannac ncolmopuanca'ac etselhnanac niecje Jesus ma'a, apqueluanmecjec nac ma'a, ngqueliemascangquec nac apualho'oc ma'a apquellatemmoicama acnema apiamo Jesus.
Apquelpacmetquescama Jesus saduceos
27 Apqueliawecjec nac Saduceos apnacja Jesus ma'a, apqueliasqueiacmo lhnac apqueletsepma metnocjec mocjom apjalhnanco'oc, lhna aptaiancoc: 28 — Jengetlhecmoscama, Moises annenga jempecquencasecja lhta apaioma, apquetsepo la lhema enenlhet metca apquetca, netamen apialheng jata emecja aptawa neptamen, apuetasqueso la atca nqueluana, ngcotnec jata apquetca apmanie lhquec apmasquenwaiam apetma' annenga. 29 Nietnengquec nac lhema acuetammalhca m'a, nemmac'ac angeliojoc actacja aclheianma apualhoc lheiap ania'a nac. Apcacjaianquec nac 7 apquelialheng'a enenlhet, ngqueliemjapmec nac apquelpetma m'a, apquetsepmo lhnac metca apquetca m'a. 30 Netamen apquemjaicamoc apialheng apmecjo lhnac aptawa neptamen, ca apquetsepmo lhnac na metca apquetca m'a. 31 Ca apmecjo lhnac na mocjom nqueluana apquemjaicamoc apialheng ma'a, apquetsepmo lhnac na metca apquetca m'a. Ntemengquec nac na m'a aplhamacja apquelialhenga, apqueletsepmec nac na metca apquetca'ac ma'a. 32 Ca atsepmo lhnac na nqueluana. 33 Colhua nenmac'ac angelelmalhnama lheiap ¿Selha ngcotnecjac atawa nqueluana, 7 nac apquelialheng'a acuacmo ta acnem apqueltecja apjalhnanco'oc apiesecsec apquenmasquenwaiacmo? 2 —lhna aptaiancoc ma'a. 34 Ca apcatemmoianca lhnac Jesus ma'a, lhna aptemac: — Ngqueliemjapeiangque mota enenlhet'awoc jengque'e, 35 36 coca apquellelto apqueliequiescama Engiapom Neten cacpota etnocjac mocjom apjalhnancoc apiesecsec apquenmasquenwaiacmo cacpota enmancoc ma'a neten, mangcolelliemjapecjec jata m'a, ncanec mmasquec apqueletsepo mocjom, malha Enenlhet Neten jata etnancocjac ma'a, Engiapom Neten apquetca'ac jata etnancocjac— 37 38 —Cotlheianwacjo no apualho'oc ania'a lhnac nanec iamet atcoc aleiwomo, nlheianmec ma'a etnocjac mocjom apjalhnancoc apiesecsec apquenmasquenwaiacmo, aplheianmo njan Engiapom Neten apto apuesque apancoc Abraham, Isaac cacpota njan Jacob annenga, apcacjanquec mocjom ma'a neten apjalhnanco'oc —lhnac aptemac ma'a. 39 Apquellengai'ac nac na jengetlhecmoscama jenganemacja Moises, lhnac aptaiancoc apquellanemo: — Jengetlhecmoscama, nietawec apquellatemoicama lheiap —lhna aptaiancoc ma'a. 40 Mmasquengquec nac apquenmajai'a elelmalhnama Jesus ma'a. 41 Coca lhna aptemac Jesus apquellanemo: —¿Se lha ntemac apquetlheianmo nac Cristo apto apuesque David aptawen neptamen? 42 Waccajac Salmo nietnec ania'a actalhesammalhca aplheianma lhnac nanec David, lhna aptemac: « Lhta aptac Engiapom Neten aplheno apuesque ejencoc ma'a: "elhnata nejecja aquiennacja, 43 acuacmo asaujo asnaqtewasecja apquellelto apquellammelhmacja lheiap"» lhnac nanec aptemac. 44 Apuesque David aplheianmec nac Cristo apto apuesque apancoc ¿Etnecja nalhmoc la apuesque apancoc aptawen neptamen? 3 —lhna aptemac Jesus. 45 Mang nantec apquellailhemo apqueltennaicama Jesus enenlhet'awoc ma'a, lhna aptemac apquellanemo apqueltamesaicamoc: 46 —¡Ellajo ta jengetlhecmoscama jenganemacja Moises! Awanje mota apquellammacpo, apquellentalhnecja apquellentalhnema apqueltacmanma, apqueluenactema nepua'ac, apquelleltemo njan ngcolhec alpaiwesanca necsa apqueluaiam apcacnaianquelha enenlhet. Ngquellecawe mota apualho'oc elleliama apcacjenwecjelha apquelemjama apmaniaie aquieto nemacnecjelha, cacpota njan aquieto actacmelanquelha lhma', 47 coca apqueltacmelquescamawec apquenmenielhquescama caselha anco'oc lhentampa'a, ajolhec anquec na apquelpacmetquescama Engiapom Neten cacpota ngcolhec alleltanco apqueliamo lhma', awanjec jatoca ngcotnec apiaqmoncasecjac Engiapom Neten ma'a—lhna aptemac Jesus.
1Poner nota de pie explicando
2Ellos preguntan para trampearle, pues ellos creen que no hay resurreccion
3Poner una nota al pie
Capítulo 21

Lhentampe metca atsecama aicamoc pataccom Engiapom Neten
1 Apnenquec nac Jesus conne Engiapom Neten apnemacja, apuetai'o lhnac nema apquelletsecama apnenquenaiancoc pataccom apanco'oc apquellaicamoc Engiapom Neten nema acjescamacja m'a, 2 acuai'o lhnac na lhema nqueluana lhentampe metca atsecama m'a, allaianco lhnac quetsec pataccom ancoc, janet pataccom aliaquiema m'a. 3 Ca apuetai'o lhnac Jesus ma'a, lhna aptemac: —Jawe ngiapac lhentampe nac tep anquec aicamoc pataccom ancoc Engiapom Neten, 4 nsaujawec anquec, niecje actengia'a la actoma ancoc, coca nquescama lhquec apquelletsecama awanjec mocjom pataccom apanco'oc, alaimommalhca coca apquellancoc ma'a —lhna aptemac Jesus.
Aplheianma Jesus ngcolhec jata actewasacjo Engiapom Neten apnemacja
5 Apquelpaqmeiasmec nac moclhem'a enenlhet ma'a apquetlheianmo lhnac actacmanma metaimong allanemmalhca Engiapom Neten apnemacja, cacpota njan alienmoma altacmanma, coca lhna aptemac Jesus: 6 — Ngcotuasalhcac jata lhamacjo ngque nac—lhna aptemac 7 Ca apquellelmalhnenca lhnac apqueltamesaicamoc: —¿Se lha acnem ngcowa', niejec jata ngcotnec amanie neluetai'a cacpota angeliojoc ennenco'o acmac'acja ngcotnejec?—lhna aptaiancoc. 8 Coca lhna ptemac Jesus apquellatemmoianca m'a: —Aplhaniec jata enenlhet apqueluai'a, co'o nac Cristo jata etnancoc ma'a, etlhenec jata njan nguacmec acnem actema nnelha' alhma nquec jam. ¡Coca melieplau anquec quetlhencap ma'a, mellanco nque' ncolhec alliennencaso! 9 Elleng'ac jata ania'a apquennapecpelha', apquennapommap najan, coca mellaga ncoi'e ncanec mancowacmoc mocjom acnem annelha, lhamacjo aquientalhnema nac ngcotnec jata amanie actema nnelha' acnem alhma nquec jam. 10 Ellammelhacpoc jata moclhem'a apquellawacja la'a, 11 ngcotnec jata aquiawai'a aquieujecama lhepop, mec, nemmasquema lhamacjo apquellawacja, eluetac jata njan neten caselha monguetai'o nengai'a. 12 Amanie apmac'acja ngcotnec quientalhnema nac, ngcolhec jata anmenlhenanca quetlhengcap, elpatjetacpoc jata, ngcolhec jata allanconwacmo apquelemjama apmaniaie' nemacnecjelha la'a cacpota ngcolhec aqnactemo' nemammalhquelha' aniem'o jelieplecama quetlhengcap. 13 Jata jetlhnec asuesai'a napaqtawec apquelemjama apmaniaie m'a. 14 Moltama ngquec apualho'oc eltengiancoc amanie nquec apquellasennecja la'a, 15 co'o ta allancoc apquelianweiacmo apquellasennammap cacpota ngcollapuanac apquellatemmoicama, mangcolhec jata alieco'o quetlhengcap ma'a. 16 Coca etselhnanacpoc jata quetlhengcap aniem'o apnemolhema apanque, ncana'ac, apquelialheng'a, cacpota njan apqueltema po'oc, ematong jata njan. 17 Eltacnewacpoc jata quetlhengcap aniem'o jelieplecama, 18 coca mangcolhec jata actacja quetlhengcap ma'a, co'o ta altacmelquesec aplhamacjo nac apqueliocja. 19 ¡Apqueliennacquec jata nquec quetlhengcap necsa acuai'a aquientalhnema cacpota etlhewancoc apqueluaiam tep ma'a! 20 Jata apqueluet'o ta quempocjacme' apqueljalhiencanwai'a natemma Jerusalen, eliojoc jata ncangquetwa'ac acnem actewasemmalhca m'a. 21 Apcacjanquec jata nquec quetlhengcap iocjalhma Judea, enieniamoc jata aquieto acjaiam metaimong, apcacjanquec jata nquec natemma Jerusalen, elentep jata m'a, apquellawa la iojalhma apancoc meltacjo nquec natemma. 22 Ngcowac jata aquientalhnema aclheianmo lhnac nanec Engiapom Neten apaioma, jata eiaqmoncasecjac apqueltemacja meliamolhma enenlhet'awoc ma'a. 23 Aiosac'ac jata ngcotnangcoc nquelwana la nlosawe', cacpota njan nlaclawa'ac, awanjec jata apquellengaianco enenlhet'awoc ma'a, nema aquiacmoncasecja aquiawai'a apqueltemacja meliamolhma enenlhet'awoc ma'a. 24 Moclhema'a ta etequio'oc pelletaw acuenactema, po'oc jata ngcolhec aliantemo apquenmammap mo'oc apquellawacja', netamen apquellelto apquellammelhmacja eliatancoc jata ellanac caselha alientalhnema tacjalhet natemma Jerusalen aniem'o nema aliatecamoc ma'a acuacmo acnem aplhenacja Engiapom Neten ngcomascoc jata aquientalhnema nac. 25 26 Ncolwetalhcac jata caselha mongwetai'o nengai'a neten, acnem, pelten, cacpota njan piau'a, ncolieujama ta m'a. Aplhamacjo enenlhet jata elienwac cacpota njan meliejec jata aptanquelha', aniem'o aquiawai'a alhtengioma alacjaiam aluata' iemmen aquiau'acja, apqueliennacjo jata elletsepoc aquiacuatacjo m'a aniem'o apquellai'a. 27 28 Coca moltama nquec apualho'oc quetlhengcap apquelueto la aquientalhnama nac ma'a, elleliennecjo toca ncanec nengaqte apqueluaianlha tep quetlhengcap ma'a, jelwetac jata asuactamo ta mocjom aisecsec iepjopai'a, co'o asto enenlhet asqueniem'o neten astaiecjo enenlhet apanque' aquieplomo asmopuana cacpota njan ascaponmatma'. 29 Ellailhonojo asietquescama nac, ca apqueluet'o la quetlhengcap tewes 1 , cacpota njan aplhamacjo iamet anac 30 actaiecja alhnanco'oc awa', ngcotlhenec jata apualho'oc canquetua'ac acnem aliepuoi'acja. 31 Nnawec jata apqueluet'o ta actacja apqueluetai'a aquientalhnema, ngcotlhenec apualho'oc canquetua'ac acnem aptaiecja ta apuesque Engiapom neten. 32 Jawe ngiapac anquec ngcotnec jata amanie apsaujommap apqueletsepma apcactengama nac colhuawe nac enenlhet. 33 Ngcomascoc jata neten cacpota njan nalhepop, coca aspaioma nac ngcotnejec jata, jawe ngiapac anque. 34 35 Ellajo ta quetlhengcap ngcoliennac apualho'oc aniem'o ngcolatsecama apquellanecamoc, apienaicamoc anmen cacpota njan alleltaicama apualho'oc, ncanec ngcoplapquesec jata acuai'a nnelha acnem alhma nquec jam tacjaplhet'oc quetlhengcap, ca ctonac neljanma nac, ngcoplapquesec acmama caselha neujac. 36 Ntasec elleljalhnama quetlhengcap, wanlha elpaqmetquese' mota Engiapom Neten cacpota eluomoc tep aniem'o aquientalhnema nac, cacpota eluacjac aquieto nejaqtec co'o m'a, asto enenlhet asqueniem'o neten astaiecjo enenlhet apanque— lhna aptemac Jesus apquellanemo apqueltamesaicamoc. 37 Apquetlhecmoscanquec na mota acnem anque' Jesus ma'a aquieto Engiapom Neten apnemacja, pelhasep noca apmaiancoc aquieto lhienep acjaiam Olivos, 38 lhamacjo sosecjec apquenmeiecja enenlhet'awoc ma'a Engiapom Neten apnemacja cacpota ellailhoc Jesus apqueltennaicama.
1Higuera
Capitulo 22

Nema alanecja ania'a cacpota epatjetacpoc Jesus
1 Quetsec nac ncaimommalhcac acnem acuaianlha actacmelaicama lhma judios apancoc aptoiancolha lhna mota alena apquenammap metca apiepjescama, pascua lhnac acuesai'a m'a. 2 Apquelelliaicama lhnac actemacja ania'a apqueluescaie' sacerdotes cacpota njan jengetlhecmoscama jenganemacja Moises cacpota ellaqjec Jesus ma'a, mang noca elleltemoc ellengac enenlhet'awoc ma'a, ncanec apquellai'ac nac ello'oc 3 Ca actalhnemo lhnac Satanas Judas Iscariote apualhoc ma'a, apto lhnac na Jesus apqueltamescama m'a. 4 Apmeiecjec nac apcacjanquelha apquelemjama apmaniaie' sacerdotes cacpota njan apqueluescaie' apquellanecama atong Engiapom Neten apnemacja', apquelpacmetquescaiacmo lhnac ma'a, ca apquellanecjo lhnac aptancolha m'a cacpota elpatjetec Jesus 5 Nquelleclemawec nac apualho'oc apquellemjama apmaniaie m'a, ca apquetlheianmo lhnac ellancoc patacom Judas. 6 Ca apquempai'acja lhnac Judas apqueliaicama actacmelacja la'a, metquelha la temma cacpota elpatjetec Jesus.
Aptawecjo lheme' Jesus apqueltamesaicamoc actacja nnelha'
7 Nwaiacmec nac acnem actacmelaicama lhma judios apanco'oc acuesai'a pascua, alena apquelquenammap metca apiepjescama, apquennapmacja lhna mota nepquesec apquetcoc ma'a cacpota etawancoc. 8 Ca apquellaweianca lhnac Jesus Pedro cacpota njan Juan ma'a, lhnac aptemac: —Enmeiacja ta apmaniaie m'a cacpota elpenesoc nentawecjac ancoc actacmelaicama lhma' pascua— lhna aptemac Ca apquellatemmoianca lhnac ma'a, lhna aptaiancoc: 9 — ¿Co la quietelha angellanenwacjac ma'a? — lhna aptaiancoc. 10 Ca apcatemmoianca lhnac mocjom Jesus: —Enmeiacja Jerusalen eluetanwacjac jata lhema enenlhet ma'a apiaiam ietanwalhua nema acmacmesaicama, elieplacja ta acuacjo apnemacja' apuesque apancoc ma'a, 11 eleltennes jata m'a apuesque apancoc, jengetlhecmoscama lhquec apmac'ac eijojo' co la aquietelha nentawecjelha la pascua ancoc, jata etnancoc ellanac ma'a. 12 Ca enenlhet anac ma'a eluetasquesec jata aquieto neten au'alhoc pa'at aquiawai'a nema acpenescamo m'a, elpeneso ta m'a lhamacjo aimelhquelha la'a cacpota antawocjac ma'a— lhnac aptemac Jesus apquellanemo m'a. 13 Ca apquenmeiecjo lhnac ma'a apqueluetanwecjo lhnac lhamacjo actacja lhquec aplheianma Jesus ma'a, ca apquelpenescamo lhnac na lhamacjo actacmelaicama lhma' ancoc nentawecja' m'a. 14 Ca apmeiecjo lhnac Jesus ma'a cacpota njan apqueltamesaicamoc 1 , apcacjenweiacmo lhnac na m'a aptaweicocjo, 15 lhnac aptemac Jesus apquellanemo m'a: —Awanjec asqueltemo ataweijoc lheme quetlhengcap actacmelaicama lhma nac ancoc pascua, amanie asquetsepma. 16 Motawecjec jata lheme mocjom quetlhengcap actacmelaicama lhma nac, acuacmo acnem aptaiecja ta mocjom apuesque Engiapom Neten—lhna aptemac Jesus. 17 Ca apmamo lhnac nojaicoc vino, aptemo lhnac na gracias Engiapom Neten ma'a, apquelaianco lhnac na apqueltamesaicamoc ma'a, lhnac aptemac apquellanemo: — Enma einamoc moc atqueietsec la'a, 18 moinecjec jata lhemec vino mocjom quetlhengcap acuacmo ta acnem aptaiecja mocjom apuesque Engiapom Neten—lhna aptemac 19 Ca apmamo lhnac na alena apquenammap, aptemo njan gracias Engiapom Neten ca apqueliapto njan apquellanco apqueltamesaicamoc, lhnac aptemac: — Coca jengque'e ejepetec, allancoc jata jenactewacsec cacpota eluoncasacpoc tep quetlhengcap, colietnecjo ta mota apaqto'oc co'o apquellanenco la'a necsa actacmelaicama lhma' nac quetlhengcap— lhna aptemac 20 Ca apquelpenescamo lhnac aptaweicocja m'a, apmacjo lhnac na mocjom nojaicoc Jesus ma'a, lhnac ptemac apquellanemo: — Ca vino nac malha niecje ema ejencoc co'o, Engiapom Neten apqueltawec ngcoitec lhema apaioma alhnancoc nentemacja' 2 , ca jeng ema nac ngcotnec jata aluonquescama tep quetlhengcap. 21 Coca jeselhnanac jata lhema enenlhet apnec jengque'e neniesecsa nac, 22 co'o asto enenlhet asqueniem'o neten astaiecjo enenlhet apanque anwetsepoc jata aniem'o Engiapom Neten aptema, coca enenlhet apto jeselhnanongcoma ncowac jata aquiawai'a aquientalhnema —lhnac aptemac Jesus. 23 Ca apquelpacmetquesammacpo lhnac mocapancawec apqueltamesaicamoc ma'a, lhnac aptaiancoc: — ¿Se lha enenlhet apmac'o nac eselhnena' Jesus que?—lhna aptaiancoc ma'a
Neten anquec apiaspommap nema nac annencasecama
24 Apquellatemmomacpo lhnac mocapancawec apqueltamesaicamoc ma'a apquetlheianmo lhnac apquenmajai'a niecje etnancoc neten apanquec apiesecsec ma'a, 25 coca aplengai'ac nac Jesus ma'a, lhnac aptemac apquellanemo: — Apiesecsec enenlhet'awoc meliamolhma nac, apquelientalhnesacpawe mota apqueluescaie m'a, apquetlhenacpawec pancawe actacmanma apquellanecamoc caselha apiesecsec enenlhet. 26 Coca metnamonquec quetlhengcap aptaiancolha nac ma'a, apquellelto la apquelemjama apmaniaie' quetlhengcap, ntasec etnancoc coneng' apancawec cacpota njan elpasmoc po'oc. 27 Coca apiesecsec anac enenlhet'awoc, neten apanquec apiaspommap ma'a apto apuesque 3 , jawe aptonac ma'a nema annencasecama nac. Co'o coca asto jellennencasecama quetlhengcap. 28 Jelieplecama mota quetlhengcap necsa asuetai'a jeipconma, 29 30 ca ncanec atnesquesanco ta quetlhengcap apqueluescaie, ca ctonac tata apuesque jetnescasac, jata antawocjac ma'a, anienancoc najan nempasmecja m'a, allancoc jata apquenmopuanca'a cacpota elleliecpelcojo apqueltemacja m'a doce apquennemolhema 4 aptawana'ac neptamen Israel —lhna aptemac ma'a. 31 Lhnac aptemac Jesus apcanemo Pedro: —Simon, etacmelcaso no apcailhemo, ngquelmalhnema Satanas Engiapom Neten cacpota ncolleluapocja m'a quetlhengcap, malha acto nac coleique nentecpoicama 5 nac iamet, 32 co'o coca asquenmalhnema lhta Engiapom Neten cacpota mangeiengiecje lheiap, meiennec jatoca quetse' lheiap, netamen eiennecjoc jatoca' alhaie', cacpota elpasmecjac na apquetlhelhma'ac anac eliennecjoc —lhna aptemac Jesus apcanemo Pedro. 33 Lhna aptemac Pedro: —Ma', moieniecjec lheiap, ncacjoc jellaclhengquesec lhemec lheiap cacpota jengellaqjec najan, moieniecjec coca lheiap—lhna aptemac 34 Coca lhnac aptemac Jesus apcanemo Pedro: —Acnem anac eiennenquesec jata lheiap amanie acpaiwoma tape'e, janetolhem'a ta ncotnec aptema apmopuana ania'a elhenec jata mangjeiecpelquema—lhna aptemac Jesus. 35 Netamen Jesus lhnac aptemac apquellanemo apqueltamesaicamoc: —Cotlheianwacjo no apualho'oc asquellapaso lhta elpaiacsec ania'a actacmanma, asquelto lhta njan melletsewec patacom, aptecamoc cacpota njan mo'oc apnactetopmanco'oc ¿ Ngcaimelhque nlho lhta caselha quetlhengcap ma'a?— — Ma', mamma' lhta aimommalhca'—lhna aptaiancoc 36 Coca lhnac aptemac mocjom Jesus: —Coca colhuawe nac ca stac asquellano quetlhengcap, nietnec jata nquec patacom, elletsau jata, cacpota njan aptecamoc, coca mancoietno la pelletaw acuenactema apanco'oc, eliengiau jata caselhaja apanco'oc cacpota enmoc ma'a 6 . 37 Jelheianmec co'o Engiapom Neten apaioma: «Nne lhta actemesqueso malha enenlhet meijamolhma» Jawengiapac anquec ncotnec jata colhuawe nac asiaijecama—lhna aptemac Jesus 38 Lhnac aptaiancoc apqueltamesaicamo apquellanemo: —Apuesque', ca janet peletaw aluenactema jengque'e—lhna aptaiancoc ma'a — Wanlha'—lhna aptemac apcatemmoianca Jesus ma'a.
Jesus pacmetquescama Engiapom Neten aquieto iocjalhma Getsemani
39 Apteiapmec nac Jesus na temma m'a, apmaianco lhnac lhienep acjaiam acuesai'a Olivos aptemacja lhna mota m'a, apquelieplejec nac na apqueltamesaicamoc ma'a. 40 Ca apqueluecjo lhnac ma'a, lhnac aptemac Jesus: —Elelmalhnama Engiapom Neten cacpota elpasmoc eliennac acuo'o ta aliasecamo lhma cacpota jeliengiecja—lhna aptemac 41 Ca apquelieniecjo lhnac tep atquetsec ma'a, apquelteclhecuaiacmo lhnac aptapno'oc lhepop ma'a, lhnac aptemac apcanemo Engiapom Neten: 42 ——¡Ta! jeieques aquientalhnema nac acmac'o na ngcowac, momac'ac atnejec asmac'acja atnejec, wanlha apquelto la apmac'acja la etnec lheiap—lhna aptemac 43 Mpelapquescangquec nac apiepjonwai'o enenlhet neten apqueltemo lhnac eiennecjoc Jesus ma'a, 44 awanjec anquec nac aplengaianco aquientalhnema m'a, coca niangweiacmec nac apacmetquescama Engiapom Neten ma'a, acteiapmo lhnac na apiemes ma'a malha ema lhna ntemac ma'a. 45 Ca apquenmecjo lhnac neten Jesus ma'a apmeiecjo lhnac apcacjanquelha apqueltamesaicamoc, apqueluetanwecjo lhnac apnacteianma m'a, aniem'o lhnac anmaiosac apualho'oc, aliamposcama m'a. 46 Lhnac aptemac Jesus: — Selha acto apnacteno nac que, enaclhatacja', elpaqmetques coca Engiapom Neten cacpota ncoliennecjac apnengio'oc amanie' acuai'a aquientalhnema nac ma'a—lhna aptemac 47 Njeclhec nac apquelpaqmetquesaianca Jesus apqueltamesaicamoc ma'a, ca acpelapquescamo lhnac apqueluai'a enenlhet'awoc ma'a, Judas nac na m'a aplacloiam, apto lhnac na apqueltamescama, ca aptetescai'o lhnac, apetsescamo njan apmalhempenec Jesus ma'a 7 . 48 Coca lhnac aptemac Jesus: —Judas, apetsesquec emec lheiap malha apto po'oc apanque' aptac jelan'o, coca apmajai'a jeselhnana lheiap, co'o asto enenlhet asqueniem'o neten astaiecjo enenlhet apanque —lhna aptemac Jesus. 49 Ca apqueluetai'o lhnac apqueltamesaicamoc Jesus ma'a, ca apquelelmalhenianca lhnac ma'a: —Apuesque, angeltanie mota i'e aquieplomo pelletau acuenactema?—lhna aptaiancoc ma'a 50 Lhema apjapac nac apiaqtemanmac aquiennacja apaicoc apquennencasecama apquemjama apmanie sacerdote ma'a. 51 Coca lhnac aptemac Jesus: —¡Wanlha, mennapap!— Ca apmanweiacmo lhnac apaicoc enenlhet lhec ma'a, aptacmelecjo njan. 52 Lhna aptemac Jesus apquellanemo apquelemjama apmaniaie sacerdote, cacpota njan apquelemjama apmaniaie Engiapom Neten apnemacja, cacpota njan apquelemjama apmaniaie apquellawacja m'a, apquellelto apquenmajai'a elpatjetec, lhna aptemac Jesus: —Selha acto apqueluo'o nac aquieplomo peletau acuenactema cacpota njan iamet apmeio'oc, malha enenlhet meijamolhma nac jeltemescasac quetlhengcap. 53 Lhamacjo acnem alhta niecje asquetlhecmoscama Engiapom Neten apnemacja' napactawec quetlhengcap, mang coca jelpatjetmac ma'a. Colhua coca ienaqtesalhma jelpatjetac quetlhengcap, pelhasep acmacmecama queliaqjameioc —lhna aptemac apquellanemo Jesus ma'a.
Aplheianma Pedro meiecpelquema Jesus
54 Ca apatjetammacpo lhnac Jesus ma'a, apqueliantemecjo lhnac apcacjanquelha apquelemjama apmaniaie sacerdotes, apquelielhanmeiangquec nac na Pedro m'a apieplomo Jesus. 55 Ca apqueluecjo lhnac ma'a aquieto aujac pa'at, necja talha lhnac na apcacjaiancoc enenlhet ma'a, ca apnaiacmo lhnac na Pedro m'a. 56 Ca acuetai'o lhnac lhema nquelwana, apuesque sacerdote lhna apquennencasecama m'a, ngqueltamescamawec nac alanei'o m'a, lhna ntemac: —Ca enenlhet anac jengque'e aplhelhma lhta njan Jesus—lhna ntemac 57 —Jawe co'o m'a, moiecpelcac co'o enenlhet anac ma'a—lhnac aptemac apcatemmoianca Pedro. 58 Po'oc enenlhet nac na apiecpelquemac Pedro m'a, lhnac aptemac: —Jai, lheiap alhta njan apto apieplecama Jesus— —Jawe co'o m'a —lhna aptemac apcatemmoianca Pedro m'a. 59 Netamen aquiecai'o lhema hora quelhaja, apto njan po'oc enenlhet lhna aptemac: —Jawe niapac enenlhet anac apto apieplecama Jesus, apto njan co Galilea jam— 60 —Ma', apmopuana ania'a lheiap—lhnac aptemac Pedro apcatemmoianca. Njeclhec nac apacmetecama Pedro m'a, ca acpaiwomo lhnac tape'e m'a. 61 Apquellanei'awec nac Jesus Pedro m'a, aclheianwecjo lhnac apualhoc aptacja lhquec apaioma Jesus eiennenquesec janetolhem'a amanie' acpaiwoma tape'e. 62 Ca aptaqjecjo lhnac Pedro m'a, mang nac nquescama apuenemo m'a.
Nema acuannaicama Jesus
63 Enenlhet apquellelto apquellanecama Jesus apqueluannaicama lhnac ma'a, cacpota njan apqueltecpoicama, 64 apquellapmo lhnac na apaqto'oc ma'a, lhna aptaiancoc: —Eijo nojo, selha actecpongo nac que—lhna aptaiancoc 65 Awanjec nac na apquellaicamoc ngcollatsecama apatno'oc apquellanei'o m'a. 66 Mo'oc acnem na ntemac ma'a, apcacnejo lhnac apquelemjama apmaniaie apquellawacja, jengetlhecmoscama jenganemacja Moises, cacpota njan apquelemjama apmaniaie sacerdotes, apqueliantemecjo lhnac Jesus ma'a napactawec apquelientalhnacja apquelemjama apmaniaie, apquellelmalhneianca lhnac ma'a: 67 —Lheiap anlho Cristo apto apcapascama Engiapom Neten— Ca apcatemmoicama lhnac Jesus ma'a: — Ca sto la jai', jeliascamoc jata quetlhengcap, 68 ca asquellelmalhnenca la lhema caselha quetlhengcap mangjellatemmoma ta. 69 Coca colhuawe nac enenlhet apqueniem'o neten aptaiecjo enenlhet apanque, elhnemoc jata lheme' neten aquieto aquiennacja Engiapom Neten apto aquietnema apmopuana—lhna aptemac Jesus 70 Coca lhna aptaiancoc apquelemjama apmaniaie m'a: — ¿Jawe nlho niapac lheiap, apto Engiapom Neten apquetca?—lhna aptaiancoc Ca apcatemmoianca lhnac Jesus: —Ca aptanquelha nac apquelpaqmeiasma quetlhengcap —lhnac aptemac. 71 Lhnac aptaiancoc mocjom apquelpaqmetquesammacpo mocapancawec ma'a: — Colhua nelleng'ac ennenco'o aplhenammacpo panque' apto Engiapom Neten apquetca enenlhet anac, meniaimecpo enenlhet apuetaianco la'a apquelanai'a ngcolatsecama cacpota eselhnanacpoc ma'a—lhna aptaiancoc apquellemjama apmaniaie m'a.
1Apostoles
2Pacto
3El que esta sentado en la mesa
4Tribu
5Asi como se sacude al trigo
6Jesus los envia la primera y les dice que no lleven nada, porque todavia no habia llegado la persecusion, pero luego que Jesus se fuera llagaria el peso, y seria necesario llevar todasestas cosas.
7Algunos creen que Judas beso en la mano a Jesus, porque a los maestros se los besaba en la mano, a los amigos en la cara, y a los reyes en los pies.
Capítulo 23

Nema aquiantemecja Jesus napaqte Pilato
1 Apquelaqnecjec nac neten aplhamacjo apquelemjama apmaniaie apquellailheianco lhnac Jesus apqueltennaicama m'a, ca apquelpatjetmo lhnac na m'a, apqueliantemecjo lhnac napaqtec apuesque co Roma apuesai'a Pilato, 2 apquelleltennascamo lhnac meiamolhma Jesus napaqtec Pilato m'a, lhna aptaiancoc: — Apuesque, nelueta lhta ennenco'o enenlhet anac apqueliaseianco lhma' enenlhet'awoc, cacpota melianmongquesec impuesto ancoc anac Roma, cacpota njan aplhenammacpe panque' apto Cristo apuesque—lhna aptaiancoc ma'a 3 Netamen Pilato lhna aptemac apquelmalhneianca Jesus ma'a: —¿Lheiap anlho apuesque apanco'oc Judios?— — Ca aptacja nac lheiap—lhna aptemac Jesus apcatemmoianca m'a. 4 Lhna aptemac Pilato apcanemo apuesque sacerdotes cacpota njan enenlhet'awoc ma'a: —Mamma aptemacja meijamolhma apquelanai'a jengque'e enenlhet anac cacpota antewacsec—lhna aptemac 5 Coca ngjeclhec noca apqueliatecamoc apquelemjama pamaniaie m'a, lhna aptaiancoc —Jai, ietnec meijamolhma enenlhet anac, ngqueliaseiangque lhma' apquetlhecmoscama enenlhet'awoc lhamacjo apquellawacja jam, ca apquempai'ac ma'a Galilea colhua coca jengque'e Judea —lhna aptaiancoc. 6 Ca aplengai'o lhnac Pilato m'a Jesus apqueniemai'a Galilea, apquelelmalhneianca lhnac, lhna aptemac: —¿Jawe nlho Jesus apqueniem'o Galilea, je?— 7 — Jai', tocja jam— Aclheianwecjo lhnac apualhoc Pilato m'a mancoietemo eiecpelcoc Jesus, ca apcapascamo lhnac napaqtec apuesque co Galilea apuesai'a Herodes Antipas, nietemawec nac aptemo amaica'a Herodes ma'a na temma Jerusalen. 8 Mpaijecjec nac apualhoc Herodes apuetai'o Jesus ma'a, aplengai'o lhna mota wanlha aplhenammap Jesus, apmajai'ac nac na eiecpelcojo niecje' cacpota njan etac caselha monguetai'o apquelanai'a. 9 Man na ntec caselha apquenmalhnecama, mangnoca eniatemmoicama Jesus ma'a. 10 Apcacjaianquec nac na m'a apqueluescai'e sacerdotes, cacpota njan jengetlhecmoscama jenganemacja Moises, apquellapecama lhnac apquetlheianma Jesus meijamolhma. 11 Ca apquellempai'acja lhnac apqueluennaicama quempocjacme cacpota njan apuesque Herodes, ca apquelentalhnescasecjo lhnac aptalhnema apmennawe, malha apuesque aptalhnema, apqueltaicama lhnac apanquec ma'a apqueluannaicama lhnoca m'a. Netamen apquellapasecjo lhnac mocjom ma'a napaqtec Pilato. 12 Apquellamelhammacpec nac ma'a Pilato cacpota njan Herodes, coca apquellanecjawec nac apancawec ma'a aniem'o Jesus aptemacja apquetlheianma.
Aplhenammap Jesus ematong
13 Ca apquellaweianca lhnac apuesque Pilato apqueluescai'e sacerdotes cacpota njan apquelemjama apmaniaie apquellawacja m'a, 14 lhna aptemac apquellanemo: —Apqueliantemante lhta quetlhengcap nejaqtec enenlhet anac, jelleltennaso lhta njan apqueliasecamo lhma' enenlhet'awoc apquellawacja nac, coca asquenmalhnema alhta co'o m'a napaqtawec quetlhengcap, ma lhta ata'ac meijamolhma m'a enenlhet anac. 15 Aplhenquec lhec na Herodes mamma aptemenweiacmo lhma enenlhet anac, ca apcapasacjo mocjom jengque'e asnacja nac. Mota co'o meijamolhma enenlhet anac cacpota angaqjec, 16 17 wanlha ta aliaqpelhquetama apiempejec cacpota apaqnemecja— lhna aptema Pilato apquellanemo enenlhet'awoc. 18 Coca ngquelpaijecama lhnac apatno'oc enenlhet'awoc ma'a, lhna aptaiancoc: —¡Ma, mepaqnemecja ngco ie', engiaqja coca, coca epaqnemecja Barrabas!— lhna aptaiancoc ma'a. 19 Barrabas noca apto meijamolhma, apnenquec nac nengaqlhencasemmalhquelha ncanec apcammelhma apuesque co Roma, aquietnema apiemonque lhma' lhnac na m'a. 20 Coca Pilato apquelienlhaneiacmec na niecj e enenlhet'awoc apqueltemo epaqnemecja niecje Jesus, 21 coca eniaweianquec na alpaijecama apatno'oc enenlhet'awoc ma'a, lhna aptaiancoc ma'a: — ¡Eliaqlha apmeioc apmancoc neten iamet actennescama, eliaqlha!—lhna aptaiancoc 22 Coca lhna ptemac mocjom Pilato apquellanemo enenlhet'awoc: —Mamma meijamolhma jengque'e enenlhet anac ¿Se lha ntac apquellelto nac ennapoc que? Wanlha ta aliaqpelhquetama apiempejec cacpota apaqnemecja'—lhna aptemac 23 Coca ngjeclhec nac alpaijeianca apatno'oc enenlhet'awoc aquiennactema m'a apquelleltemo eniaqjec Jesus, ca apcasecjanweiacmo lhnac Pilato m'a, 24 25 ca apqueltemo lhnac ngcolhec aqjo Jesus ma'a, apaqnemacjo lhnoca Barrabas, apto aquietnema apiemonque lhma' cacpota njan apcammelhaicama apuesque co Roma.
Nema aliaqlhaclhema apmeioc apmancoc Jesus neten iamet actennescama
26 Nemo lhnac aquiantemecjo Jesus cacpota ngcolhec aliaclho apmeioc apmancoc neten iamet actennescama, ca apqueluetai'o lhnac nalhet amai lhema enenlhet apqueniecta aniep apancoc apuesai'a Simon, co na temma Cirene lhnac ma'a. Ca apquellelto lhnac epatmoc iamet actennescama m'a, ca aplhengamo Simon neptamen Jesus. 27 Man na ntec enenlhet'awoc apquelieploma Jesus ma'a apquenmajai'a elueta', man nantec nac na ngqueluana'ac aquiapqalhema, alpaijeianca lhnac na atno'oc, anmaiosac'a au'alho'oc acmac'acja ngcotnec ma'a. 28 Coca lhna aptemac Jesus apquellanemo ngqueluana'ac ma'a: — Moliapqalh jellanjojo' ngqueluana'ac co Jerusalen, ntasec coca ncoliapqalhe nquec quetlhengca cacpota njan atca'ac, 29 ncanec ncowac jata aquiawai'a aquientalhnema, jata etnancoc enenlhet: "Ngquelenniemawe niecje' ngqueluana'ac mangcotnema na nlose, cacpota njan nema nac atcac actenquescama acnemacja" jata etnancoc enenlhet ma'a. 30 Jata njan niecje eltejec enenlhet'awoc ma'a: "Coiaqnen tecjenjlet'oc metaimong acjaiam acuenactema cacpota jengellapoc" jata etnancoc ma'a. 31 Nnengquec coca jetwascamo co'o stonac malha iamet alhnancoc aquielsellemo, tep anquec jatoca ncotnec apnaqtewasemmap enenlhet apqueltemenwecjo na lhma' malha iamet apawoc —lhnac aptemac Jesus ma'a. 32 Netamen ma'a, apqueliantemecjo lhnac na apcanet enenlhet meliamolhma' m'a cacpota ncolhec aliaclhanco apmeio'oc apmanco'oc neten iamet actennescama. 33 Ca apqueluecjo lhnac iocjalhma' acnaianquelha ientepac empatec, ca apqueliaqlhaclhemo lhnac apmeio'oc apmanco'oc neten iamet actennescama m'a cacpota njan apcanet enenlhet meliamolhma' po'oc nac aquiennacja' cacpota njan sangcalwelha'. 34 Coca lhnac aptemac Jesus apcanemo Engiapom Neten: — Tata ncotnamanquec ma'a ncanec meliamoc asto nac apquetca apanquec lheiap—lhna aptemac Netamen apquellelto soldados apnactewaseianco lhnac lhema nennactewascama nenietemo cacpota esacjac lhema apto apnacsepma nennactewascama aptalhnema Jesus ma'a 35 Man nantec enenlhet apquellanecama m'a, apqueluannaicama lhnac na apquellemjama apmaniaie' Jesus ma'a, lhnac aptaiancoc: — Apqueluoncasque lhta tep enenlhet'awoc Jesus, ma nac na ewoncasecpo panquec tep apto nlho jaweniapac Cristo Engiapom Neten apcapascama —lhnac aptaiancoc ma'a. 36 Ca apquelluannaianca lhnac na soldado m'a, apquellaianco lhnac na vino acmasca cacpota einec Jesus, 37 lhna aptaiancoc: — Apto la jawe ngiapac lheiap apuesque apanco'oc judios, ewoncasacpo' panquec tep lheiap—lhna aptaiancoc 38 Nietnegquec nac na actalhesammalhca tacjaplhet Jesus iamet acpaijema, lhna ntemac: —Apuesque Judios jengque'e—lhna ntemac actalhesammalhca 39 Lhema lhnac na meijamolhma apuannaicama Jesus, apielhnemo lheme neten iamet actennescama m'a, lhna aptemac apcanemo Jesus: — Apto la lheiap jawe ngiapac anquec Cristo, ewoncasacpo' panque' tep lheiap, cacpota njan ennenco'o— 40 Coca po'oc noca meijamolhma apiamenaicama lhnac, aptemo lhemec apielhnema neten ma'a, lhna aptemac apcanemo: —Aplenganquec lheiap acmasca, ngjetlhec coca meliejecjo' Engiapom Neten. 41 Mamma aptemenweiacmo lhma' enenlhet anac, ennenco'o coca jawe ngiapac mangeliamolhma, nietawe ngcolhec aquiaqmoncasacjo neltemacja aquiawai'a nellengaiangco—lhna aptemac ma'a. 42 Ca apquelaneio lhnac enenlhet meijamolhna m'a Jesus, lhna aptemac: — Jata aptaqjo ta apuesque lheiap, coietnama ta apaqtec asuesai'a nac—lhna aptemac 43 Ca apcatemmoianca lhnac Jesus ma'a, lhna aptemac — Jai', jawengiapac anque acnem anac alhoc jata lhemec acmancolha acnem 1 —lhna aptemac Jesus.
Apmatnama Jesus
44 45 Malha la 12 catelho lhna ntemac ma'a acmasquemo aponmatma acnem, apienactescamo lhna lhma' lhmanquec jam acuacmo la tres ienacteso, netamen acjalhtemommalhca ietamopai'a 2 aquieto Engiapom Neten apnemacja, apiaqtemmacpo lhnac apiesecsec ma'a. 46 Man nac eniescama apueneianca Jesus ma'a, lhna aptemac: — Tata, ema ta tacja ejangoc anac— Ca apquetsepmo lhnac ma'a. 47 Apuetai'o lhnac apquemjama apmanie soldados Romanos ma'a, aclheianwecjo lhnac apualhoc apto jawe ngiapac anquec Engiapom Neten apascama Jesus, lhna aptemac: —Jawe na ngiapac enenlhet anac mamma aptemenweiacmo lhma'—lhna aptemac. 48 Ca apqueltaqjecjo lhnac enenlhet'awoc ma'a, apqueltecpoicocjo njan apnengio'oc ma'a aniem'o anmaiosac'a apualho'oc. 49 Lhamacjo lhnac apquelelto aplhamacja Jesus ma'a, cacpota njan ngqueluana'ac alieplecja alhta allempaio'o Galilea acuacjo acuactamo Jerusalen, apquellanecama lhnac ma'a iama taiepe' actemacja aptewasemmap Jesus.
Nema aclhenquesquecja apjapac Jesus metaimong alhua
50 51 Apnenquec nac na m'a lhema enenlhet apuesai'a Jose, co na temma Arimatea lhnac ma'a, iocjalhma Judea. Apiamolhma lhnac ma'a, apeiwomo njan, awanjec nac apqueltemo ngcowac aptaiecja apuesque Engiapom Neten ma'a, apto lhnac na apquetlhelhma'ac apquelemjama apmaniaie' Judios, coca mang noca ncoleclemoc apualhoc aptaiancolha' apquellanei'o Jesus ma'a. 52 Ca apmeiecjo lhnac apnacja apuesque Pilato, apquenmalhnenwecjo lhnac elcoc apjapac Jesus ma'a neten iamet actennescama. 53 Ca apmeiecjo lhnac ma'a, aplecuecjo apjapac Jesus neten iamet actennescama, apelhquetmo lhnac na ietamopai'a apmennawe' apanque, cacpota njan apcaclhenquesquecjo lhnac apjapac metaimong alhua', mamma lhnac nema acmaicama m'a, alhnancoc nac ma'a. 54 Netamen, quetsec nac ncaimommalhca acuaianlha acnem sabado 3 apcacjaicocjelha lhnac judios ma'a, wanlha lhna mota apquelpenescamelha caselhaja apquellanquesecja amanie apmajai'a ngcowomoc acnem sabado. 55 Ca anmeiecjo lhnac moclhem'a ngqueluana'ac aquieto metaimong alhua nemacja aclhenquescaiacmo apjapac Jesus, aluetanwecjo lhnac ma'a apietnacja apjapac, ca nquelwana'ac anac alieploianca lhnac Jesus allempai'o Galilea. 56 Netamen altaqjemo lhnac ma'a natemma, alpenesquecjo lhnac panactema aieiwo'oc acmases aimes cacpota njan aimenec acmases, cacpota ncoleltelhnasquescacja apjapac Jesus ma'a.
1En el paraiso
2Explicar porque se rompio, que implica que ahora cualquiera puede entrar en la presencia de Dios por medio de la muerte de Jesus
3Explicar que el dia duraba hasta que se meta el sol, luego comenzaba otro dia.
Capítulo 24

Engiapom Neten aptemescasecja mocjom apjalhnancoc apiesecsec apquenmasquenwaiacmo Jesus
1 Ngqueliamposammalhquec nac ma'a ngqueluana'ac acnem sabado apcacjaicocjelha lhnac aniem'o jenganemacja apanco'oc judios ma'a. Netamen, acuaiacmo lhnac acnem domingo sosecjec anque', anmeiecjo lhnac apietnemacja apjapac Jesus, alletsecjo lhnac aimenec acmases aimes alpenescamo. 2 Ca aluetanwecjo lhnac ma'a nema actesquescama metaimong atong aquiawai'a, 3 ca alentalhnemo lhnac conne ma'a, mang noca ncolwetai'ac apjapac apuesque Jesus ma'a. 4 Ngquetlhengamawec nac ngquennio'oc mangcoluetai'o apjapac Jesus ma'a, ca acpelapquescamo lhnac apqueliepjonwai'a apcanet enenlhet apqueltetescai'o lhnac nquelwana'ac ma'a, apquenmopai'a panquec nac apquelentalhnema m'a apquelienmomo njan 5 6 5–6 Nquelmenaiangquec nac nquelwana'ac ma'a ca alteclheianco lhnac atapno'oc lhepop ma'a acuacjo alteclheio njan naqta'a lhepop, coca enenlhet neten anac ma'a lhnac aptaiancoc apquellanemo: —Molleliangwa Jesus jengque'e apiesecsec anac apqueletsepma, aptacjec lhec apjalhnancoc, cotlheianwacjo no au'alho'oc aptacja lhta apaioma aquieto ma'a iocjalhma Galilea, 7 apto lhna lhta enenlhet apqueniem'o neten aptaiecjo enenlhet apanque', elhcanwomoc na lhta enenlhet anac meliamolhma' cacpota ncolhec na aliaqlho apmeioc apmancoc neten iamet actennescama, coca janetolhem'a acnem na lhta ngcotnec etnecjac mocjom apjalhnancoc apiesecsec apquenmasquenwaiacmo m'a—lhna aptaiancoc enenlhet neten 8 Nquelpelapquesanquec nac atlheianwecjo au'alho'oc nquelwana'ac ma'a actemacja lhta apaioma Jesus acmajai'acja ncotnec apcaniemjaicama, 9 anmeiecjo lhnac ma'a apcacjanquelha 11 apqueltamesaimoc cacpota njan apquelelto apquelieplecama Jesus, aleltennasquecjo lhnac ania'a m'a. 10 Maria Magdalena lhnac ma'a cacpota njan Juana, Maria Santiago nquen cacpota njan mo'oc nquelwana'ac. 11 Coca apqueliasqueiacmec nac apqueltamesaicmoc ania'a m'a, ngquetlheianmec nac apualho'oc mangcotnec ma'a, 12 coca apquetquecjo lhnac Pedro m'a aquieto metaimong alhua, apcammelhmo lhnac conne', mang noca etai'ac Jesus apjapac ma'a, wanlha lhnac apuetai'o ietamopai'a napocja'ac apelhquetemmap apjapac ma'a. Niemascangquec nac apualhoc ma'a, ca aptaqjemo lhnac mocjom neptamen ma'a. 13 Netamen apcanet apquelieplecama Jesus apquenmeiecjo lhnac natemma Emaus, 11 kilometro lhnac nietnemac Jerusalen ma'a. 14 Apqueleltennaicocjec nac necsa apquetlhengama m'a actacja acuetammalhca', 15 ca aptetesquecjo lhnac Jesus ma'a cacpota elieplacjac apquenmeiacjelha'. 16 Coca lhema caselha lhnac malha aleliasecamo lhma' m'a cacpota meliecpelquec Jesus ma'a, malha meliamo lhna ntemac, 17 coca lhna aptemac Jesus apquelelmalhneianca m'a: —¿Selha apquetlheno lhquec necsa apquetlhengama ie? —lhna aptemac Anmaiosecama apualho'oc lhna ntemac ma'a, 18 ca apcatemmoicama lhnac apuesai'a Cleofas, lhna aptemac: —Lhamacjo enenlhet apquelliawe actacja acuetammalhca m'a Jerusalen ¿Ma nlho ennai'ac ania'a acuetammalhca m'a? Lheiap na apquempa'ac ma'a, aptemo amaica'a m'a —lhna aptemac 19 —¿Selha caselha acuetammalhco m'a ie, je? —lhna aptemac Jesus. Ca apquellatemmoianca lhnac ma'a, lhna aptaiancoc: —Ca Jesus co Nazaret alhta, Engiapom Neten secama ania'a apancoc lhta m'a, awanje lhta acmowana apaioma, cacpota njan apquellanai'ac lhta caselha mongwetai'o napactawec enenlhet'awoc ma'a, 20 coca apquelemjama apmaniaie' sacerdotes cacpota njan apqueluescaie enganco'oc anac, apquellanconwacme lhta m'a apqueluescai'e romano cacpota ellaqjec eliaqlhac apmeioc apmancoc neten iamet actennescama m'a. 21 Ngquetlheianme lhta niecje engelualhoc ennenco'o jengelwongquesec tep nelluesai'a Israelitas necsa aquietnema jengellammelhmacja, coca janetolhema acnem antac apmatnama lhta m'a. 22 Ca sosecjec lhec moclhem'a nquelwana'ac netlhelhma'ac anac, jengeleltennascactamo lhquec lhema ania'a jengelmelhtengcasawec lhec neten ma'a, anmeiecja lhta aquieto metaimong alhua apietnacja apjapac Jesus, 23 ca atlheno lhquec mangcolwetangweja m'a, wanlha lhnac lhec aluet'o apcanet enenlhet neten ma'a, apquetlheno lhnac lhec aptaiecja apjalhnancoc apiesecsec apquenmasquenwaiacmo Jesus ma'a, ca aluactamo lhquec mocjom ma'a nengaqjangquelha lhquec. 24 Ca apquenmeiacjo lhquec netlhelhma'ac anac ma'a aquieto metaimong alhua, apqueluetanwacjo lhnac lhec acto jawe niapac anquec actacja lhquec atlheianma nquelwana'ac ma'a, mancolwetai'a Jesus apjapac— lhna aptemac. 25 Ca aptemo lhnac Jesus apquellanemo m'a: —Coca mangcotlheiangwacjoc apualho'oc quetlhengcap apquetlheianmo lhnac nanec quetsecama ania'a nnenga ngcotnec jata, 26 ncaimommalhquec na lhta Cristo ennancojo aquientalhnema amanie, cacpota etnecjac na lhta mocjom apjalhnancoc apiesecsec apquenmasquenwaiacmo—lhnac aptemac ma'a. 27 Ca apquelpeiwescasecjo lhnac Jesus actemacja aclheianma Engiapom Neten apaioma aplhenammap Cristo, ampai'o lhnac nanec actalhesammalhca jenganemacja Moises, ca amjaianco njan waccajac apnactalhescama apquetlheianma lhnac nanec quetsecama ania'a annenga. 28 Ca apqueluecjo lhnac natemma Emaus, apmajai'ac nac niecje eieca' aplhengama Jesus ma'a, 29 coca apquelleltemawec nac elhnecjac apquetlhelhma'ac ma'a, lhnac aptaiancoc: — Elhnecja' jengque'e, ienactesque —lhnac aptaiancoc ma'a. Ca apnecjo lhnac Jesus ma'a natemma nac 30 apcacjaianquec nac aptaweicocjo m'a, ca apmamo lhnac pan Jesus ma'a, aptemo lhnac na gracias Engiapom Neten, ca apquellaianco njan ma'a. 31 Ca alpelapquescamo lhnac apqueliecpelcanweiam apto Jesus enenlhet anac, coca apsepaneio lhnac napaqtawec ma'a. 32 Coca lhnac aptaiancoc apquelpacmetquesammacpo mocapancawe' ma'a: —Jawe na ngiapac Jesus ja'e, ngquelleccasema lhquec engelualhoc necsa jengelpeiwescasecja lhquec Jesus actemacja Engiapom Neten apaioma nalhet amai—lhnac aptaiancoc. 33 Colhuawec nac apqueltaqjemo aquieto Jerusalen, apquenmeiecjo apcacjancolha 11 apqueltamesaicamoc Jesus cacpota njan aplhamacja apquetlhelhma'ac, apqueluecjec nac ma'a, 34 lhnac aptaiancoc ma'a apcacjaicamoc conne: —Jawe lhque niapac Jesus aptacjo mocjom apjalhnancoc apiesecsec apquenmasquenwaiacmo, apueta'ac lhec na Simon ma'a— lhna aptaiancoc 35 Ca apquelleltennaianca lhnac actemacja apqueluetai'a amai acmaianco Emaus, netamen apqueliecpelcanweiacmo lhnac apiaptemo pan ma'a. 36 Njeclhec nac apquelpacmetquesammacpo m'a, apiepjonwo'o Jesus ma'a, lhnac aptemac apquellanemo: —Coltacmelcaso no apualho'oc —lhnac aptemac. 37 Awanjec nac apquenmenaicamoc ma'a, ncanec enjangoc nac apquellanemac ma'a. 38 Coca lhnac aptemac Jesus apquellanemo: —Menmenamoc, meliasquem najan, 39 40 jawe engjangoc co'o, ellanjono esquepoc emeioc, emancoc. Jenmangwanojo, mamma aquiocja engjangoc la'a—lhna aptemac ma'a. 41 Coca mocjom nac apqueliasqueiam ma'a, nquelpelapquescangquec noca apqueluetai'a m'a, alpaijecjo lhnac na apualho'oc ma'a, lhnac aptemac mocjom Jesus: —Jellamoc astoma—lhna aptemac 42 Ca apquellaianco lhnac necjatcoc quelasma alquenammalhca', 43 ca aptomo lhnac napactawec ma'a. 44 Netamen Jesus lhnac aptemac apquellanemo: —Actacja nac asuetammalhca co'o, asquelleltennascanque lhta mota quetlhengcap, ntemengquec ascaniemjaicama aclheianmo lhnac nanec jenganemacja Moises, quetsecama ania'a nnenga cacpota njan waccajac Salmo jetlheianma co'o—lhna aptemac Jesus. 45 Ca apquelpeiwescasecjo lhnac ma'a cacpota elianwomjoc actemacja aclheianma Engiapom neten apaioma, 46 lhnac aptemac: —Ca ntac aclheianma Engiapom Neten apaioma enietsepoc jata Cristo, coca janetolhem'a acnem jata ncotnec apquetsepma, etnecjac mocjom apjalhnancoc apiesecsec apquenmasquenwaiacmo. 47 Ncolhenalhcac jata apuesai'a lhamacjo apquellawacja jalhmanquec jam, jata ellempac jengque'e Jerusalen cacpota elianmonquesec apualho'oc cacpota Engiapom Neten enmasquesquesec meliamolhma, enmecjoc tacja mocjom enenlhet'awoc, lhna ntemac Engiapom Neten apaioma m'a. 48 Coca eleltennes jata lhamacjo caselha actacja nac apqueluetai'a quetlhengcap, 49 niacjamoc jata jengque'e Jerusalen ncanec colhuawec jata anwapacsec tacjaplhet'oc actacja lhta apaioma tata, acnema acmopuana apqueniem'o neten—lhna aptemac
Apmeiecja neten Jesus
50 Apmeiecjo lhnac Jesus cacpota njan apqueltamesaicamoc acuacjo m'a natemma Betania, ca apqueliasecjo lhnac neten apmeioc Jesus apqueltemo eltaqmelquesec apqueltamesaicamoc. 51 Coca m'a apcaclheianco lhnac tep atquecsec Jesus ma'a, ca acnemo lhnac aquiasecjo neten, 52 necsa apmeiecja lhnac neten ma'a, apqueltacnescaseianquec nac apqueltamesaicamoc ma'a. Netamen apqueltaqjemo lhnac aquieto Jerusalen, awanjec anque nac alpaijecja apualho'oc ma'a, 53 wanlha lhna mota ntemac apquenmeiecja' Engiapom Neten apnemacja' cacpota eltacnescasancoc Engiapom Neten ma'a.