Tito
Tito
Capitulo 1
1 Co'o nac Pablo asto jeiasennaicama Engiapom Neten, asto njan apostol jeiapascama lhta Jesucristo cacpota atlhecmocsec actemacja mongiasqueiam apiesecsec ma'a apquellelto nac apqueliequiescama Engiapom Neten cacpota ncowac apquelianweiacmo m'a actemacja acto jawe ngiapac anquec nenganiemjaicama actacmanma, 2 cacpota njan ncowac aleljalhnecama apualho'oc etlhewancoc jata mancotnenwaianlha nnelha aliennactema apnengio'oc, apenescamo lhnac nanec aplheianma Engiapom Neten ellancoc jata tep nac nanec ma'a. 3 Nietemawec newanlha nac jeiapascamo Engiapom Neten apto jenwonquescama tep cacpota alianwesquescamjoc ania'a apancoc anac. 4 Asmac'ac anwapasquesec waccajac anac astalhescama lheiap Tito, apto njan malha eietca aniem'o njan acnemo mo'oc mongeliasqueiam, asqueltawec Engiapom Neten apto njan engiapma'ac canjan Jesucristo apto jengeluonquescama tep ewaiwesentac jengamelaiam canjan metca acmasca tacjaplhet lheiap. 5 Asiamasanwacje lhta lheiap ma'a Creta cacpolhta elanecjac moclhem'a aquientalhnema m'a, aspecquencasacje lhta njan ascaicamoc lhema aspaioma nentemacja angeliequiecsec apqueliamola lhma metno apquetco'oc cacpota etnancoc apquelemjama apmaniaie moclhem'a la apcacnencjelha Jesucriso apquennemolhema m'a. 6 Lhema metno apquetcoc la'a ncaimelhquec etnec metca la aplhenammap, canjan lhema apac aptawa, canjan apquetcac ncotnancoc mancoliasqueiam Engiapom Neten, altacmelcasemmalhcojo cacpota njan mancotnanquec mancolleliejecjo'. 7 Jai, lhema metno apquetcoc la'a ncaimelhquec etnec metca la aplhenammap ncanec Engiapom Neten aptemesquescama m'a cacpota ellanama tacjaplhet'oc apquellelto nac Jesucristo apquennemolhema, metnec apcammacpojo, metca aploma, metca njan aquieijama lhma, metca apquennapommap, metca njan apielhammacpo elcancoc pataccom aptengia'ia la aquianmoma apmacmecama. 8 Coca ntasec etne mota apmama tacja amaica'a apancoc la'a apnemacja, elanac na caselha altacmelo, apmopuana aquietnaicama apaqtec, apeiwomo, apiamolhma apanque' cacpota njan aptacmelcasemmacpo apancoie'. 9 Ncaimelhquec na meiaqmoncasecjec mo'oc nema atlhecmoscama lhta aplhewai'a acto jawe ngiapac anque, etnec na apiatecjoc po'oc aquieplomo apquetlhecmoscama actacmanma, etnec na apmopuana epeccanwacjac apquellelto la apquellammelhecja m'a, 10 aplhaniec melleliejecjoc m'a nqueniemai'ac ma'a apiesecsec anac judios, wanlha mota apquelpaqmetecama actaicama nquec, aptengiaicama mota eliennenquesec enenlhet'awoc ma'a. 11 Mengianco nquec lheiap etlhecmosancoc ma'a ncanec aplhaneic apqueliennenquescama acnema nac apquennemolhema, wanlha mota aptengiaicamoc pataccom ma'a. 12 Malha actonac enenlhet'awoc anac apquelloma nac Creta, apquenmopuanca ania'a lhnac ma'a aplheianma coca apaiomo lhema apanquec secama ania'a apiesecsec anac ma'a, malha lhnac caselha neujac la acloma, mellescama lhnac na etawancoc aptecamoc, manconmajai'a lhnac na enmacmama m'a, lhna aptemac secama ania'a apquetlheianmo m'a. 13 Jawe ngiapac anquec ma'a actemacja aplheianma m'a, ca ncanec ntasec eliennajoc lheiap aplhamacjo apquellelto la apqueluanenwaiam ma'a cacpota eltacmelcasecjoc aptaicamoc meliasqueiam ma'a, 14 mellanco nquec na ellailhoc ania'a nema altennaicama acmowana ania'a la'a coca aniem'o m'a apquelentepquescama apancawec alietnaicama apaqto'oc. Eliennacjo ta njan cacpota mellailhec jenganemacja aniem'o enenlhet apanque' apquellelto nac apqueliamasanweiam jengetlhecmoscama acto nac jawe ngiapac anquec. 15 Apquellelto la alalhnai'o apualho'oc nqueluetalhquec na lhamacjo caselha alalhnai'o apquellanai'a m'a, coca apquellelto la alpaiseiam apualho'oc manconmac'ac enmancoc tacja mongiasqueiam anac, nqueluetalhquec na lhamacjo caselha alpaiseiam ma'a ncanec nquelpaisacmec alietnaicama apaqto'oc canjan alianwecjo apualho'oc, 16 apquetlhenque panquec apquelianweiacmo aptemacja Engiapom Neten coca apquellanenque mota caselha apcammelhmacja antec Engiapom neten ma'a, neten anquec meliamolhma m'a canjan melleliejecjoc, manconmajai'a nja mota ellanancoc caselha altacmelo.
Capítulo 2
1 Etlhecmos jata mota lheiap actemacja na mota aclheianma jengetlhecmoscama acto nac jawe ngiapac anque'. 2 Ncaimelhquec na metno apquetco'oc anac ellapuanac ennawacsec apualho'oc apanquec la'a, etnancoc na apquellai'acja la enenlhet, ncaimelhquec na ncotlhenec apualho'oc amanie apquenmac'acja la ellanancoc caselhaja, etnancoc na meliasqueiam acto nac jengetlhecmoscama acpeiwomo, ellamelemmac na aplhamacjo enenlhet'awoc, etnancoc na apqueliennactema apqueluascapma necsa acuai'a la aquientalhnema. 3 Canjan ncotnotco'oc anac ntasec ncoltacmelcasalhcojo', metca alpaiesaicama ania'a acuesai'a mo'oc la'a, metca njan alieiescama lhma anmen. Ntasec coca ncotlhecmosancoc aplhamacjo cacpota ncollanancoc caselha altacmelo, 4 ncotlhecmosancoc na nqueluanat'co'oc anac colhua actengiaicamoc anacteianca'a cacpota ncollawanac ncollamelemmac anacteianca'a, atcac najan. 5 Ncollawanac na ncotlhenec au'alho'oc amanie anmajai'a la ncollanancoc caselha m'a, cacpota njan mancotlhenec au'alho'oc ncollanca', canjan ncotnancoc aliamo ncoltacmelquesec acjaiancolha la'a, aliamolhma, alleliejecjo njan anacteianca'a la'a cacpota m'a mancolhec aquiematquesanca ania'a actacmanma aniem'o Engiapom Neten. 6 Elleltennasamoc jata njan apquetco'oc anac ncotlhenec apualho'oc amanie apquenmac'acja la ellanancoc lhamacjo caselhaja, 7 eluetasques na aptemacja apanque nac lheiap cacpota eluanancoc ma'a, eiplauques jata njan actemacja nac apquetlhecmoscama apancoc, etacmelcasacpo panquec najan cacpota meliascamec enenlhet lheiap, 8 eliatama ta njan actacmanma apaioma, metca la nenlheianweiam emmo'oc cacpota enmancanwomoc ma'a apquellelto la apquenmajai'a elammelhec apquetlhecmoscama, mancolhenalhquec jata acuesai'a ncolatsecama jengetlhecmoscama enganco'oc anac. 9 Elleltennasamoc jata njan apquellelto nac esclavos ellanac elleliejecjoc apuesque apanco'oc, ellana ta njan etnancoc ellanjoc nalhep'awec apualho'oc ma'a, jawe njan ellatemmonjo'. 10 Elleltennasamoc jata njan menmenielhe, etnancoc na nengaqtawe mota apqueluescai'e apanco'oc cacpota eluetac actacmanma nema atlhecmoscama apquetlhewai'a aniem'o Engiapom Neten apto njan jengeluonquescama tep ma'a. 11 Jengeluetasquescanque lhta Engiapom Neten apto apiamolhma apanquec jengellaianco nengeluoncasemmalhca tep anac nenlhamacjo lhmanquec jam, 12 ca nqueniemai'ac ntasec angeluatesancoc nentaicamoc mongeliamolhma, canjan alletsepmacja ennengio'oc anac, colhua coca ntasec angelloca atlhenaicama mota engellualho'oc actacmanma caselha nac, angellanancoc na acpeiwomo, angellamelemmac na emmo'oc, 13 anlhenquesec ma'a acuacmo ta acnem acuai'a alpaijenwaiam enwalho'oc aquiawai'a, anwetanwomoc jata ma'a aleljalhneianca mota engellualho'oc, ncote ta actacmanma nque acuetammalhca malha apquelienmaiam apuactamo ta acnema apmopuana apanquec Engiapom Neten canjan Jesucristo apto jengeluonquescama tep, 14 apcaiancawe lhta njan apmatnamo m'a cacpota jengeluonquesec tep ennenco'o necsa jengenmaicama mangeliamolhma, jengellalhnesquescamo njan engellualho'oc ma'a, jengeltemesquescamo njan apquennemolhema apanque', antengianco angellanancoc actacmanma. 15 Jai', ca jenque'e ntase mota etlhecmocsec lheiap. Eliatecjoc, ennawes najan aquieplomo apientalhnemo, mengianco njan lheiap ncolhec actemesquesantamo coneng.
Capítulo 3
Apquellanemmacpelha etnancoc apquellelto nac Jesucristo apquennemolhema
1
Elleltennasamo ta njan Jesucristo apquennemolhema ellanac elleliejecjoc gobernadores canjan apqueluescai'e, etengianco mota ellanancoc caselha altacmelo m'a.
2
Ellana ta njan lheiap melentepcasama apqueluesai'a po'oc ma'a, etengiancoc na metca acmasca, etnancoc na
apqueliamolhma canjan nalhep'awec apualho'oc napaqtawec aplhamacjo enenlhet'awoc.
3
Ennenco'o lhta njan malha nengellelto metca enqatco'oc la'a, mangelleliejecjo njan ma'a, malha lhta njan neltaianco netlheneiam la'a, jengenmaicama lhta njan lhamacjo actemacja aletsepma ennengio'oc anac, nquelleclemawe lhta njan engellualho'oc nellanenco la caselha ncollatsecama. Neten anque lhta mongeliamolhma, neliasepquescama njan, neltacnonwecje lhta emmo'oc engancawe nengiesecsa m'a, canjan jengeltacnonconque lhta njan enenlhet.
4
Coca ncacjoc Engiapom Neten apto jengeluonquescama tep jengeluetasquescanque lhta panquec aptema apiamolhma apanque, apquellamelaiam na aplhamacjo enenlhet'awoc lhmanquec jam,
5
niecje lhta ennenco'o mongellaneianco caselha altacmelo, ncacjoc coca engiosac'ac jengellanei'o m'a Engiapom Neten, jengeluonquescamo njan tep, jengellalhnasquescamo njan engellualho'oc, malha njan jengeltemesquescamo njan malha la colhua nempalleiam, jengellaianco alhnancoc nengiennactema
aniem'o Espiritu Santo.
6
Jai', apianquenque lhta Engiapom Neten Espiritu Santo aclanei'o aquiecanweiacmo tecjenlhet'oc ennenco'o aniem'o njan Jesucristo apto jengeluonquescama tep,
7
awanjec anquec jengellamelaiam Engiapom Neten, jengeltemesquescamo lhta njan nengelpeiwomo, colhua nnanquec alleljalhnecama engellualho'oc angetlhewancoc jata aliennactema ennengio'oc ncotnenwaianlha nnelha m'a.
8
Jai', jawe ngiapac anquec astemacja na mota asquetlhecmoscamo lheiap, eltacjenwescacja ta mota m'a napaqtawec aplhamacjo Jesucristo apquennemolhema cacpota etengianco mota ellanancoc caselha altacmelo m'a. Jai', ntasec ma'a jengetlhecmoscama nac, awanquec ncolpasmoc aplhamacjo enenlhet'awoc.
9
Meluanenwomanquec lheiap apquellatemmommap anac actaicama nquec apquetlhenaicama apquelieijenca'a aptepecamoc neptamna'ac ma'a, meujanenwom anquec na apqueliamenammap apquetlheianma apquellatemmommap actemacja jenganemacja Moises anac, coca acjemo m'a, mancotacmelquesec neganiemjaicama m'a.
10
Ca apuet'o la lheiap lhema enenlhet apquelhpanquescama apiesesec anac Jesucristo apquennemolhema jam, ennawes jata lhema nlho ca la jante aptaiecjo, coca mancomac'o la engiailhoc ma'a, melto nquec epalhacuatac ma'a
11
ncanec malha aplheneiam ma'a, ntewasacjenquec aptemacja meijamolhma m'a.
Pablo apcaicamoc lhema apaioma Tito
12
Anwapacsec jatelha lheiap Artemas nlho ca la njan Tiquico, lheiap jatoca engiacjac ma'a Nicapolis cacpota angeluetalhcac ma'a, co'o njan asmac'ac angiacjac ma'a cacpota alhec apualhoc pieiam ma'a.
13
Ntasec na epasmoc lheiap abogado Zenas canjan alhelhma Apolos, ellamoc jata njan caselha alaimommalhquelha la m'a cacpota elempecjoc mocjom apquetlhengama, mancolaimalhquec jata njan caselha m'a.
14
Lhamacjo Jesucristo apquennemolhema la'a ntasec eltacmelquesquesec apquellaniemjaicama po'oc, elianwomjoc na ellanancoc caselha altacmelo, elpasmoc na po'oc alaimommalhca nac caselha apanco'oc.
15
Nquetlhenquec na apualho'oc lheiap jenque'e asquetlhelhma'ac anac, etsacjes jata njan lheiap aclheianma enwalho'oc nentemo lheme mongeliasqueiam jam. Asqueltawec na Engiapom Neten ewaiwesentac nengamelaiam aplhamacjo tacjaplhet'oc jam.