Toba-Maskoy: Regular Print

Updated ? hours ago # views See on WACS
2 Juan
2 Juan
Capítulo 1

1 Co'o asto motno apquetcoc nlhenquec ewalhoc quetlhencap apquellelto apqueliequiescama Engiapom Neten, jawe ngiapac anquec asquellamelaiam quetlhencap, canjan apquellamelaiacmec ja'e engelialheng'a nac mo'oc necja apquelianweiacmec na m'a acto nac jawe ngiapac anque, 2 nquengiemaiac ma'a conne engellualho'oc anac nnaianquec acuesai'a nac acto jawe ngiapac anque, nnanque mota njan engellualho'oc ma'a mancotnenwaiam annelha. 3 Asqueltawec co'o Engiapom Neten apto engiapma'ac canjan apquetca Jesucristo eltacmelquesec apquellaniemjaicama quetlhencap jam, eluaiwesentac na tacjaplhet'oc nengamelaiam anac, apquelietnai'o napa'at, acto jawe ngiapac anquec canjan metca acmasca nac. 4 Awanjec anquec lhta acpaijecja ewalhoc asqueluetanwactamo lhta moclhema quetlhencap apquelleliejecjo ania'a actacmanma, apcanemacja njan antancoc ennenco'o Engiapom Neten ma'a. 5 Canjan asqueltawec co'o ellamelemma mota po'oc quetlhencap jam, coca jawe jenganemacja alhnancoc jenque'e, aptaianco secja lhta meliasqueiam quetlhencap apquellengai'a lhta mota m'a. 6 Enenlhet apto la apcamelaiam po'oc, apqueliajacjawec na Engiapom Neten ma'a, secja aptaicamo lhta quetlhencap meliasqueiam, nqueltemenque lhta mota ellamelemmac po'oc ma'a. 7 Mantec enenlhet jengeliennenquescama ngiapma'ac apquenmaicamoc lhmanquec jam, manconmajai'a enmancoc tacja ania'a aplhenammap Jesucristo aptaiecjo enenlhet apanque, apqueluesai'a apanquec coca jengeliennenquescamo ngiapma'ac ma'a, apquellamelhma njan Cristo. 8 ¬°Ellajo ta njan quetlhencap eliennenquescac ma'a! Ncomasquenwomoc quelha njan nengetlhecmosecamoc lhta quetlhencap. Ntasec jatoca njan eliennactecsec meliasqueiam anac quetlhencap cacpota etlhewancoc jata acsaujommalhco aquianmoma. 9 Enenlhet apto la apmajai'a eiaqmoncasecjac mo'oc jengetlhecmoscama lhta Cristo, jawe apasmecja Engiapom Neten ma'a, coca apto la aptacmelquescama jengetlhecmoscama Cristo, coca apto apquelpasmecja Apiapom canjan Apquetca. 10 Ca apuo'o ta njan amaica'a jam apsoiam la mo'oc actema jengetlhecmoscama, menmamonquec tacja, melpaiwescamanquec najan ma'a. 11 Apto la enenlhet apaiwescaiam ma'a, apuanecjo njan meijamolhma m'a. 12 Jai, ntase, mantec niecje mocjom asmajai'a aleltennacsec quetlhencap ma'a, man coca ncomac'ac allapasquesec astalhescama waccajac, ntasec coca angiaja ejenquec jam cacpota alpaqmetquescacja asiocjo ejenquec napaqtawec quetlhencap jam, cacpota ncolpaijecjac na engellualho'oc nelpasmecja m'a. 13 Nquetlhenquec na apualho'oc quetlhencap apquellelto apqueliequiescama Engiapom Neten apquellawa nac jenque'e, malha apquelialheng'a apancawec la njan.