Toba-Maskoy: Regular

2 Pedro
2 Pedro
Capítulo 1

1 Co'o Simón Pedro asto apostol canjan jeiasennaicama Jesucristo, nlhenquec ewalhoc aplhamacjo acnaicamoc la meliasqueiam actacmanma nquec nac, ca ctonac ennenco'o aniem'o nac Engiapom Neten canjan Jesucristo apto apeiwomo canjan jenweluonquescama tep. 2 Asqueltawec ncanantancoc apquellamelaiam canjan metca acmasca apiesecsec anac quetlhencap aniem'o apquelianweiacmo Engiapom Neten canjan Jesús apuesque engancoc. 3 Apto lhta m'a acnema apmopuana, elanac na caselha jempelapquescama, jengellawema lhta cacpota jengellancoc lhamacjo caselha alaimommalhquelha lhta ennenco'o m'a, cacpota angellanancoc necsa nellaniemjaicama mota acpeiwomo. 4 Jengelleltennascamo lhta njan lhema apaioma antancoc jata nengelnemo Engiapom Neten, enwanca'ac jata njan jengelpaqnemecja caselha ncollatsecama nac jenque'e aniem'o aliasponcomacja nac engellualho'oc. 5 6 7 Nnaianquec quetlhencap meliasqueiam, coca ncaimelhquec etengiancoc apiempeioc ellanquesancoc lhamacjo caselha altacmelo ca ctonac nentacmelcasemmalhco, nengianweiacmojo', nenmopuana anmeiawalhcoc enganque', metca nempecjescama, nengamelaiam Engiapom Neten, nengamelaiam enquetcac, nengamelaiam aplhamajo enenlhet'awoc. 8 Ncaimelhquec angellanesancoc aquiecanweiacmo engellualho'oc anac caselha altacmelo nac, cacpota ncotnecjac malha allentepecja m'a ncollanancoc caselha altacmelo. Coca mantanco la m'a, netamen acjemo ta ncotnec nelianweiacmojo apuesque engancoc Jesucristo. 9 Coca enenlhet mancoietnema la m'a actonac alheno lhquec, malha ta ncotnec metca apaqto'oc la'a, nlho ca la njan nengaqtec la apuetai'a caselha, apqueluancaiam najan nema alhnasquescama lhta apualhoc necsa lhta meijamolhma. 10 Quetlhencap elialheng'a, apquellawema lhta Engiapom Neten, apqueliequiesaicamo lhta njan ma'a, ntasec enmeiwo mota m'a caselha altacmelo nac apualho'oc, ntase mota aplhenquescama enenlhet apto la m'a. 11 Netamen ntasec jata ncotnec apuaiam ma'a iocjalhma aquieto nac aptemenwecjelha metca nnelha apuesque engancoc Jesucrista, apto njan jenwonquescama tep. 12 Wanlha mota asqueltemo ncotlhenquescacjo apualho'oc asquetlhecmoscama nac acto jawe ngiapac anquec, asiawe niecje co'o apquelliawec quetlhencap jengetlhecmoscama nac, apquelleliejecjawec nac metca nnelha, 13 ncacjoc coca asqueltacjenwescacjec asquellanemacja etnancoc acuaiacmo asquetsepo ta co'o. 14 Apuesque engancoc Jesucristo apianwesquescaiacmoc ewalhoc ncanquetquec anwetsepoc jata aiengiecjac jata asiocja nac, 15 coca colhuawe nac alhenquesec jata asqueltacjenwesquecja asquetlhecmoscama cacpota ncotlheianwacjo apualho'oc quetlhencap asquetsepo ta. 16 Lhamacjo netlhecmosecamoc anac actemacja apmopuana apuesque engancoc Jesucristo, actemacja njan apuectanlha ta, ncanec nellengai'a lhta ennenco'o neliocjo engancawec ma'a, jawe aniem'o m'a nema jengeltennasecama nac malha ncotno iocjalhme nac, neliocjo engancawe lhta neluetai'a ennenco'o m'a apientalhnacja apuesque. 17 Necsa nellengai'a lhta apaioma Engiapom Neten apto engiapma'ac, necsa lhta njan aponmatema neten acuaiwantamo lhta njan apaioma, aio'o lhta m'a, actemesquescamo lhta njan aquiawai'a nquec apuesai'a Jesús, lhta ntac: «Ca eietca jam ascamelaiam, apto njan asqueliequiescama co'o» lhta ntac ma'a. 18 Nelleng'a lhta ennenco'o nema aliatecama nac aniem'o neten necsa nentaicamoc alhta netlhelhma'ac apuesque aquieto m'a nalhma acjaiam acpocquenammalhca, 19 ca nqueniemai'ac neltemesquescamo iocjalhmec anquec ania'a apquetlheianmo lhnac nanec apquetsecama ania'a nnenga, ntasec na quetlhencap eltacmelcasoc apquellailhemo ania'a nac ncanec malha talha alhancoc la m'a altetquescama nac ienactesacjalhma apualho'oc ma'a, actacmelquescamo coca atsasecamo lhma m'a acuacmo aptepo malha iau'a apiawai'a la'a apquellualho'oc quetlhencap ma'a. 20 Asqueltawec na aleltennacsec caselha acto neten anquec aquiaspommalhca nac, mancolatsema elpeiwesocja apanco'oc apancawec la ania'a aquietnemo nac ma'a waccajac Engiapom Neten apaioma, 21 apquetsecama ania'a nneng'a metlheianmac apanco'oc apancawec la'a ania'a, Engiapom Neten coca apquellaicamoc apaioma m'a cacpota etlhenec ma'a, aniem'o njan apquenmaicama Espiritu Santo.
Capítulo 2

Nengai'o apquetsecama ania'a nac apquenmopuanca'a ania'a
1 Apcacjaianquec nac nanec apquetsecama ania'a apquenmopuanca'a ania'a apiesecsec israelitas, eluac jata njan colhuawe nac apiesecsec anac quetlhencap ma'a, etlhecmosancoc jata apquelialhesquescamo caselha mancoietemo, acmowana jentewacsec najan, ncolammelhec jata apquelpaqmeiasma Apuesque apto lhta apqueluonquescama tep necsa meliamolhma, ncotlapquesec jato ca nema apnactewascama m'a. 2 Aplhaniec jata njan Jesucristo apquennemolhema elpasenwomoc apqueltemenweiacmo lhma m'a, jata nja nconniemac apqueliascama apatno'oc apquetlheianma ncolatsecama ania'a actacmanma acto jawe ngiapac anque nac. 3 Ca apquetsecama ania'a nac awanjec anquec jata nja ncotnec aptengiaicamoc pataccom, eluetac jata m'a aniem'o aptaicamoc apquenmopuanca'a ania'a, coca ncowac jatoca njan iocjalhmec anquec nema aliaqmoncasquesecja' apqueltemacja meliamolhma, lhennenga njan nema acpenesquescamo ncolhec jata aliaqmoncasquesacjo apqueltemacja m'a. 4 Mang nac nanec enmecjoc tacja Engiapom Neten enenlhet neten meliamolhma, apquelhacjanweicmo aquieto ncospaneiacja talha, netamen apnactanweiacmo njan lhema au'alhoc ienactesacja lhma, coca m'a apqueleljalhanmec ncowac acnem nengiecpelcammalhquelha ta. 5 Mang nac nanec na enmecjoc tacja enenlhet'awoc anac meliamolhma apquennemolhema lhnac nanec Noe, apiancanmo lhnac nanec iemmen aquiawai'a tacjaplhet'oc ma'a, wanlha lhnac nanec Noe apuaiacmo tep ma'a ncanec apto apeiwomo, canjan apqueluaiacmo tep 7 apquetcac. 6 Apnaqtewasecjo lhnac nanec na Engiapom Neten apiau'acja temma Sodoma canjan Gomorra, apuanlhecjo acuacmo aptancocjo tajap ma'a cacpota eluetac enenlhet'awoc ma'a actemacja apqueluetai'a enenlhet'awoc meliamolhma m'a. 7 Coca wanlha lhnoca apuonquescamo tep Engiapom Neten Lot ma'a ncanec apto apeiwomo, aiosec nac na nentemac apualhoc apuetai'o apqueltemacja apquellanecamoc ncollatsecama meltacmelcasemmacpo' apquennemolhema m'a. 8 Coca apeiwomo nac ma'a awanjec nac aplengaianco aquientalhnema apuetai'a mota ncollatsecama canjan aplengai'o mota apquelpaqmeiasma ncollatsecama apquennemolhema m'a. 9 Jai, apuanquec apuesque eluonquesec tep apquellelto la apquelleliejecjo mota necsa acuai'a la aliepconma, apuanquec na elpocquenec apquellelto la meliamolhma cacpota eliaqmoncasquesecjac jata apqueltemacja ncollatsecama acuo'o ta acnem nengiecpelcammalhquelha m'a, 10 awanjec jata ncotnec na nema aliaqmoncasquesecja apquellelto la apqueliasponcoma apquellanecamoc aliasponcomacja apualho'oc, apqueltacnoncoma njan etnancoc apuesque apanco'oc Engiapom Neten. Aliennactema apualho'oc ma'a, apquellatemmoctemo apqueluescai'e apanco'oc, mellai'o njan ncoltacnewa caselha alientalhnemo m'a neten, 11 niecje njan enenlhet neten acnaicamoc anac neten anquec apqueliennactema canjan apquelientalhnemo, man coca njan ncoliacuacmoc eltacnewac ma'a alientalhnemo apnaianco m'a neten napaqtec Apuesque, metlhoc ma'a enenlhet'awoc anac maliamolhma mellac'ac ma'a. 12 Coca enenlhet'awoc anac meliamolhma mancollapuanca'ac ncolquetmoc apualho'oc, mancollatsema njan apquelpaqmeiasma apquellan'o necsa meliamo caselhaja, ca ncanec nconnapecjoc jata ncawec meliamolhma apancawec ma'a, malha caselha neujac la'a aquieploma nac actecjanecamoc acmancolha la'a nwacmec ma'a aljanemmalhquelha, mmatnec na m'a. 13 Nnawec na m'a enenlhet'awoc anac meliamolhma ellengancoc jata aquientalhnema malha caselha neujac anac aniem'o melpeiwomo, alleclemo mota apualho'oc ellanancoc caselha ncollatsecama, apqueliaspema anmajai'o mota apualho'oc apquellanactema acuacjo apiesecsec la quetlhencap aquietnacja la actacmelaicama lhma apanco'oc. 14 Wanlha mota apquellanecama po'oc enenlhet la aptawa apquenmajai'a ellanactecsec ma'a, metca apquenmanweianlha njan apquenmajai'a ellanancoc ncollatsecama. Apqueliatenquec na ellanancoc caselha ncollatsecama ncolliennactema nac apualho'oc, wanlha nja mota alletsepma apnengio'oc pataccom ca ncanec ncolhec atlheno apquellelto apquetselhnanemmap ma'a. 15 Apquelhacjanwacmec apquelieploma amai actacmanma, apquetlhenenwacmec ma'a malha actemo lhnac nanec secama ania'a Balaam, Bosor apquetca, aptengiai'o lhnac nanec nquescama pataccom aniem'o caselha ncolatsecama apquelanai'a, 16 coca actacnonweiacmo lhnac nanec na malecca m'a mancoltemo elanac caselha mancoietemo. 17 Ca enenlhet'awoc anac meliamolhma malha iamelquet la metca iemmen, malha njan iepjopai'a la acsecja alhcaiam acmac'acja la ncoiasecja, apquetlhenammacpo njan engiacjenwomoc jata aquieto ienactesacja lhma mancotnenwaianlha nnelha. 18 Malha altacmanma mota apquetlhecmosecamoc, coca acjemo m'a, apquenmopuanca'a ania'a, apqueliennencasquec ma'a atlhenquescama nac apqueluatesaicamoc meliamolhma cacpota etnocjac mocjom apquellanactema. 19 Apquelleltennasquec niecje njan lhema apaioma etnancocjac jata metca anmaicama mocjom meliamolhma, coca anmaicama niecje njan meliamolhma m'a, nenlhamacjo nengellelto malha esclavo anco nac caselhaja acto njan jengenmaicama m'a. 20 Lhennenga apquelianweiacmo aptemacja apuesque engancoc canjan jenwonquescamo tep Jesucristo, apqueluatesaicamo lhta njan meliamolhma, coca netamen ma'a apquellaianco mocjom malha alpatjetuecja la mocjom maniamolhma, aptaicocjo mocjom neten anquec meliamolhma, mancolhnoc ma'a secjec anque lhta. 21 Apquelianweiacme lhta nieje amai anac acpeiwomo, coca netamen apqueliengiecjec ma'a, melleliejecjo njan jenganemacja actacmelo allanemacja etnancoc, ntase lhta niecje melianwomje' amai anac ma'a. 22 Nnawec na m'a apquetlheianma na mota enenlhet, ntemac jenque'e: «Nieclhec semjeng, netamen ntawacjec mocjom aquielhema lhquec» Ca ntac na mo'oc jeng: «Ietapomap la colhua nema aquiengiescama, netamen la m'a apietnacjec coca mocjom aisecsec nialpa»
Capítulo 3

Apuecta ta mocjom Apuesque engancoc
1 Elialheng'a asquellamelaiam, janet astalhesecjo ntac waccajac anac asmajai'a aleltennasancoc cacpota ncolquetamancoc apualho'oc acto acpeiwomo nque. 2 Cotlheianwacjo no apualho'oc apquetlhecmosecamo lhnac nanec apquetsecama ania'a nnenga Engiapom Neten apquellapascama, cotlheianwacjo ta njan apualho'oc apquellanemacja etnancoc apuesque apto jenwonquescama tep, cacpota njan apquetlhecmosecamo alhta apostoles. 3 Eleljalhnama ta nepiawa' aimelhco ta quetsec actemonwanlha nnelha acnem eluac jata enenlhet anmaicama aliasponcomacja apualho'oc meliamolhma, eliematquesama ta quetlhencap ma'a, 4 jata etnancoc ellanac quetlhencap jeng: "Ieee, malha apmopuana ania'a aplheianma Cristo ewatac jata, apqueletsepaiacmec engiapma'ac, njeclhe mota actemacja nellaniemjaicama ampai'o lhnac nanec nemo alanei'o lhmanquec jam acuacmo nenwanlha nac" jata etnancoc apqueluannaicama m'a. 5 Coca apqueltaicama apanquec ma'a, apquelliawec niecje Engiapom Neten apto apquellanai'a neten canjan nalhepop moc apaiwoma lhnoca, aisecsec iemmen lhnoca nteiapmac lhepop anac, ncotsepoc nac metco la iemmen ma'a, 6 netamen nac ma'a lhamacjo caselha nenwetai'o nac lhmanquec jam actewasecjo lhnac na iemmen. 7 Apcaianco njan apaioma Engiapom Neten apqueltemo ncoietnama secjec neten anac canjan nalhepop anac neluetai'o nac ennenco'o cacpota njan nconmetec ma'a acuo'o ta acnem nengiecpelcammalhquelha, nema acnaqtewasecja njan meliamolhma nac. 8 Elialheng'a, asqueltawec eliojoc lhema caselha, moc actema acnem apancoc apquelietsatema Engiapom Neten, jawe ctonac ennenco'o, mil año nac malha lhema acnem apquelanei'o napaqtec ma'a, nlho ca la njan lhema acnem anac nelanei'o ennenco'o nenwanlha nac, coca mil años niecje apquelanei'o napaqtec ma'a. 9 Moclhema quetlhencap nquetlhenquec apualho'oc ajolhec acnem ncowomoc jata apuectanlha apuesque actemacja lhta njan aplheianma, jawe coca niecje m'a, wanlha apquelailhec metca apecjescama aplhamacjo quetlhencap ellanecjac apualho'oc, meltemo niecje eletsepoc lhema apjapac la m'a. 10 Coca ncotlapquesec jata apuecta m'a Apuesque, malha ta etnec enenlhet la apmenielhma ewac pelhasep ma'a, ncotuasalhcac jata neten anac ncalhcac jata alpaclhaiam ma'a, ncolhec jata njan aluanlhacjo caselha acnaicamo nac neten, cacpota njan lhamacjo caselha acnaicamo nac nalhepop. 11 Jai', lhamacjo caselha ta nconaqtewasalhcac ma'a, ca ncanec na quetlhencap ntasec eltacmelcasacpo mota, elleliejecjoc na Engiapom Neten, 12 eliawencaso ta apqueleljalhanma ncowac acnem apqueliecpelquemelha Engiapom Neten aplhamacjo enenlhet'awoc, ncongietec jata neten ma'a, ncolpaijecjac jata caselha acnaianco nac ma'a aniem'o talha alpaiesecja. 13 Ennenco'o coca mongeliascacmoc apaioma lhta jengelleltennascama Engiapom Neten actemacja aplheianma alhnancoc neten canjan nalhepop, etnancocjac jata ma'a apquelpeiwomo canjan apqueliamolhma apancawoie'. 14 Quetlhencap elialheng'a asquellamelaiam, eltacmelcasacpo ta necsa apqueleljalhanma ncowac acnem anac ma'a cacpota eluetanwetac Engiapom Neten metca apquellanecamoc caselha ncollatsecama canjan metca acmasca. 15 Asqueltawec na eliojoc quetlhencap Engiapom Neten metca apecjescama eiaqmoncasecjac nentemacja m'a, apqueltawe niecje la angeluoncasalhcac tep ma'a nenlhamacjo, apnaqtalhesquescanque lhta njan engeliepma'ac nellamelaiam Pablo actemacja nac ma'a aquieplomo coca apianweiacmo aniem'o m'a Engiapom Neten. 16 Lhamacjo lhta mota waccajac aptalhescama Pablo actemacja mota m'a aclheianma m'a, nientelhe lhta niecje anianwomjoc ma'a moclhema aptalhescama, coca apquelietnocjasqueiacme mota m'a enenlhet'awoc anac malha metca apqatco'oc anac, canjan apquellelto nac ncoliennactema nac meliasqueiam, apquelietnocjasqueiacme mota njan lhamacjo actemacja aclheianma nac Engiapom Neten apaioma, ca ncanec eluetac jatoca aquiaqmoiecja aniem'o meliamolhma apancawec ma'a. 17 Quetlhencap elialheng'a asquellamelaiam, asquelientemoncasawec asquellascama amanie apquenmajai'a eluac ma'a, ¡ellajo ta enenlhet'awoc anac meliamolhma apquenmajai'a mota eliennenqueses canjan meliennactesquesec meliasqueiam anac! 18 Ntasec coca eluanenquesec lhamacjo acnem nengamelaiam anac canjan nengianweiacmo apquellaicamo lhta apuesque engancoc canjan apto jenwonquescama tep Jesucristo.¡Angeltacnescasanco toca apuesai'a m'a nenwanlha nac canjan emanie nac metca nnelha! Amen.