Colosenses
Colosenses
Capítulo 1
1 Co'o Pablo, asto apostol jeiapascama Jesucristo cacpota alhenec ania'a actacmanma nac aniem'o aptema Engiapom Neten, Timoteo njan alhelhma jenque'e. 2 Nengelleltawec angellapasquesec atlheianma engellualho'oc aplhamacjo apquellelto Jesucristo apquennemolhema aquieto jam Colosas, engelialheng'a jengellasecjai'o aniem'o Cristo. Nengelleltawec na Engiapom Neten eiengientac tacjaplhet'oc nengamelaiam cacpota njan metca actaicama enwalhoc anac. 3 Necsa nelelmalhnesquesquescama mota Engiapom Neten apto njan apiapom apuesque engancoc Jesucristo nentanquec na gracias 4 ncanec nelleng'a mota ania'a acnaicamoc aquiawai'a lhnac meliasqueiam quetlhencap Cristo Jesús, awanjec nac na apquellamelaiam apquellelto apquennemolhema apancoc anac ma'a. 5 Nnaianquec nac na apqueluascap ma'a aniem'o aleljalhnecama apualho'oc etlhewancoc jata lhema caselha nema alpocquenquescama m'a neten, apquelengai'a lhta quetlhencap aclhenammalhca ania'a nac 6 acuai'o secja lhta. Ca ania'a nac mpaijacjec aclengammalhca jalhmanquec jam, aliaqmoncasquesecjo njan mo'oc apualho'oc enenlhet'awoc apquellelto la apquellengai'a, ca actaianco lhta njan quetlhencap ma'a aliaqmoncasquesecjo mo'oc apualho'oc necsa apquenmaicamo lhta tacja aquiawai'a nac jengamelaiam Engiapom Neten, cacpota njan acto jawe ngiapac anac. 7 Epafras alhta apto apquetlhecmoscama quetlhencap caselha nac ma'a, apto njan netlhelhma'ac ennenco'o m'a, apto apquennencasema apcasecjai'o Cristo apmacmecama nac apiesecsec quetlhencap jam. 8 Jengelletsantenquescamo lhta njan ania'a actemacja apquellaniemjaicama quetlhencap jam, awanjec na lhta njan apquellamelaiam po'oc quetlhencap aniem'o Apualhoc anac najan. 9 Necsa nellengai'a lhta ania'a actemacja apquellaniemjaicama quetlhencap jam, lhta nquenoc nelelmalhnesquescama mota metca nnelha Engiapom Neten eltemesquesec apqueliecpelcanweiacmo quiocjo nquec aptemacja m'a, ellancoc na lhamacjo actemacja nema nengiamo cacpota njan nengiecpelquemo aniem'o Apualhoc apanque. 10 Netamen jata m'a ncowac aquietemo nquec aptaiancolha apcanemacja njan etnancoc Apuesque, cacpota njan ellanancoc metca nnelha caselha acleclemelha la apualhoc ma'a, nquescama caselha altacmelo, acuacmo acuanemo lhamacjo acnem apqueliecpelcanweiam Engiapom Neten. 11 Nelelmalhnescasquec na Engiapom Neten etnesquesancoc apqueliennactema aniem'o aquiawai'a apmopuana m'a, cacpota ellapuanac eluascapoc metca apquelpecjescama acuo'o la aquientalhnema. Netamen jata m'a ncolpaijecjac jata apualho'oc ma'a, 12 etnancoc jata njan gracias Engiapom Neten ncanec apquellanquec apquenmopuanca'a eluascapoc, jata etlhewancoc na caselha apenescamo Engiapom Neten cacpota ellancoc apquennemolhema apanco'oc apquellelto nac apquelloma atsac'elha lhma. 13 Jai, Engiapom Neten jengeljatsosquecjec ma'a necsa acmowana lhta ienactesacja lhma, jengeltemesquescamo lhta njan apquennemolhema tecjenlhet'oc apuesque apquetca apcamelaiam, 14 apto lhta njan jengeluonquescama tep, apquenmasquescamo njan mongeliamolhma m'a. 15 Engiapom Neten apto monwetai'a, coca apua'a alhta Cristo apnemo lhtoca njan ma'a, apnenquec nac nanec apnacja m'a amanie apquelentepquescama lhamacjo caselha lhmanquec jam. 16 Apmaianca lhnac nanec na Engiapom Neten Cristo cacpota ellanac lhamacjo caselha acnaicamo nac ma'a neten cacpota njan nalhepop, caselha neluetai'o nac cacpota njan mangeluetai'o nac, caselha au'alho'oc anac awesque nco'oc, acnema na alientalhnemo cacpota njan acnema nac anmowanca'a, ca lhamacjo caselha nac Engiapom Neten apquellanai'a aniem'o apmaicama Cristo, aptemo njan apanco'oc ma'a. 17 Apnenquec nac nanec Cristo amanie' allanemmalhco secjec anquec lhamacjo caselha, mancollawanquec na ncolloca metca m'a Cristo. 18 Cristo njan apto malha apqatec apquennemolhema, coca ntaiejec malha apiocja m'a. Cristo apto apmanie', apto njan apmanie aplhatecjanweiam apiesecsec apquenmasquenwaiacmo, aptemo nja mota apmanie panquec ma'a. 19 Nietnenque lhta njan apualhoc ma'a Cristo lhamacjo apmopuana m'a aniem'o Engiapom Neten, 20 apquenmecjo lhta njan mocjom tacja enenlhet'awoc lhmanquec jam, apsoiacmawe lhta njan metca acmasca nac aniem'o apquetsepma lhta Cristo aquianquenammalhco ema apancoc neten iamet actennescama. 21 Apquellammelhme lhta quetlhencap Engiapom Neten lhennenga, meliamolhma lhta nqueniemai'ac ma'a, 22 coca colhuawe nac apuanca'ac eltetescacjac Engiapom Neten aniem'o m'a Cristo aptaiecjo lhta njan enenlhet apanque, apquetsepmo lhta njan neten iamet actennescama aniem'o quetlhencap, colhua apuanca'ac eluacjac napactec Engiapom Neten metca meliamolhma la'a, metca alpaieseiam apualho'oc, metca apquetselhnanemmap najan. 23 Ntasec eliennactecsec meliasqueiam anac, metca apqueliengiecja m'a aljalhnecama apualho'oc eluoncasacpoc tep aniem'o Engiapom Neten, ca ctemo lhta njan apquellengai'a ania'a actacmanma aclhenammalhco lhmanquec jam, co'o njan aspaiesquec ma'a ania'a nac aniem'o lhta jeiapascama Engiapom Neten. 24 Mpaijacjec co ewalhoc aslenganco acmasca aniem'o jellasennaicama quetlhencap, ncanec asaujoc jata actemacja lhta aplengaianco Cristo aniem'o apquennemolhema, ncanec malha Cristo apiocja ntac ma'a apquennemolhema nac. 25 Jetnescasquec Engiapom Neten jellasennaicama apquennemolhema apanque nac, jeianquec asmacmecama cacpota altacmelquesquesec apquellaniemjaicama aniem'o njan aspaiescama ania'a actacmanma, 26 actemo lhta njan malha acposemmalhca lhennenga la aquietnema, colhua coca Engiapom Neten apqueluetascasquec apquennemolhema. 27 Jai, apmajai'o lhta njan eluetasquesec caselha aquielhammalhca aquiawai'a nquec apenescamo lhnac nanec apmac'acja ta etnec cacpota eltacmelquesquesec apquellaniemjaicama aplhamacjo apquellawacja lhmanquec jam, Cristo apuesai'a m'a, apmajai'a lhta Engiapacsec Engiapom Neten jenque'e, apsoiacmo lhta njan aleljalhnecama nac apualho'oc etlhewancoc jata caselha altaqmanma nquec ma'a. 28 Ennenco'o nelpaiesquec ania'a aplhenammap Cristo, nelleltennasenque mota aquieplomo aquiawai'a nquec nelianweiacmo, nennawesquec na enenlhet'awoc mellaniec acmasoma cacpota etnancoc apquelpeiwomo apcanemacja njan etnancoc Cristo. 29 Awanjec asmacmecama asqueltemo ncotnec ma'a, aquieplomo asiennactema, asmopuana njan aniem'o Cristo.
Capítulo 2
1 Asmac'ac aleltennasama quetlhencap awanjec co'o aslengaianco aquientalhnema aniem'o jelasennaicama quetlhencap cacpota ncoltacmec apquellaniemjaicama jam, ca njan ma'a elialheng'a apcacjanco Loadicea, cacpota njan aplhamacjo apquellelto nac manjeliecpelquemelha nac. 2 Awanjec na astengiai'o eiempejec asqueliatecjojo aplhamacjo m'a asqueltemo etlhenquesec apquelpasmommacpo, ellamelacpojo cacpota ncowac aquiawai'a apqueliecpelcanweim canjan apquelianweiacmo caselha aquielhammalhca nac apenescamo lhnac nanec Engaipom Neten aplheianmo lhnac nanec engiapacsec Cristo, 3 aquietnemo m'a aquiawai'a nac nengianweiacmojo, nengiecpelquemo njan cacpota jengellancoc ma'a. 4 Ca astacja lhquec alheianma lhamacjo caselha nac cacpota mancolhec aliennenquesco'o, ca enenlhet la'a malha nac altacmanma apquelpaqmetecamaja, apquenmopuanca'a ania'a coca. 5 Colhua coca molhnema apiesecsec quetlhencap jam, ewalhoc coca malha ntemac acnema jam, awanjec acpaijecja ewalhoc ncanec awanjec apqueltacmelquescamo apancawec apcacjaicamoc jam, apquetlhenquescanquec na aliennactema nquec meliasqueiam Cristo. 6 Apquenmaianque lhta tacja quetlhencap cacpota etnancoc apuesque apanco'oc Jesucristo, ntasec na eltacmelcasacpojo apquellanemacja nac etnancoc ma'a. 7 Mellesanquec elpatjetec ma'a Cristo aquieplomo m'a meliasqueiam anac, malha actonac ma'a lhema la iamet aicapmenec acpatjetmo nac lhepop actec, etnamoc jata nja mota gracias ca actemacja lhta mota nemo atlhecmoscamo. 8 Ellajo ta enenlhet apquenmajai'a la eliennenquesec apanco'oc apancawe nac apquetlhecmosecamoc canjan apquellelpeiwescasecja caselhaja nac apquenmopuanca'a ania'a aniem'o njan ma'a alientalhnemo nac anmaicama jalhmanquec nalhepop anac, coca jawe aniem'o Cristo m'a. 9 Cristo apnawe panquec Engiapom Neten, 10 apto njan apuesque tacjalhet'oc casecapo au'alho'oc acnema nac anmowanca'a ca njan alientalhnemo. Quetlhencap coca apquelpasmecja Cristo, nnanquec na caselha alaimommalhquelha la quetlhencap ma'a. 11 Necsa apquelpasmecja lhta Cristo, apqueljatsoscasenque lhta njan Engiapom Neten aliasponcomacja nac apualho'oc, malha lhta nja ntemac apiempeioc circuncidado la'a, jawe m'a aptaiancolha lhta mota judíos, mo'oc actema coca m'a. 12 Necsa lhta njan apquellauquesammap conne iemen quetlhencap, malha lhta nja ntemac apquelcatonnammacpo lheme la Cristo, netamen apnaclhatecjanweiacmo njan lhemec ma'a aniem'o meliasqueiam apmopuana Engiapom Neten. 13 Lhennenga lhta njan quetlhencap malha apqueletsepma lhta ntemac aniem'o meliamolhma', aniem'o njan aliasponcomacja apualho'oc, colhua coca apquellanquec Engiapom Neten aliennactema apnengio'oc actemo lhta njan apcaniemjaicama m'a Cristo, cacpota njan apquenmasquesquescamo lhamacjo apqueltemacja ncollatsecama aniem'o njan ma'a Cristo. 14 Nietnenquec nac nanec lhennenga lhema waccajac jenganemacja actalhesammalhca acnaicamoc malha neliaqmoicamoc la'a, coca Engiapom Neten alhta apiaqlhacuacja njan neten iamet actennescama m'a, aptewasecjo njan ma'a. 15 Apqueljatsosquesquecjo njan anmowanca'a canjan alientalhnemo casecapo' au'alho'oc, aquietnema njan alientalhnemo, aptemesquesecjo njan coneng napaqtawec enenlhet'awoc, apqueiweseicocjo njan atlhengama napaqtawec enenlhet malha anmammalhca la'a. 16 Jai, Engiapom Neten apqueluonquesquecja tep quetlhencap necsa anmaicamoc jenganemacja atlheianma apquetselhnanemmap quetlhencap ma'a, ca nqueniemai'ac na mellammelhec mocjom eliematquesama enenlhet'awoc aniem'o aptecamoc, apienaicamoc, melpalhacuaiam na ctacmelaicama lhma la apanco'oc, cacpota njan pelten apjalhnancoc la'a, acnem nennecjelha njan. 17 Coca lhamacjo caselha nac jawe acto neten anquec aliaspommalhca m'a, coca m'a acmo'o ta ncowac emanie nac coca acto jawe ngiapac neten anquec aquiaspommalhca m'a. Cristo coca apto neten anquec apiaspommap. 18 Mellailho nquec enenlhet apqueliematquesaicama la'a ncanec apqueltacnescasenquec enenlhet neten ma'a, aptanquec nalhep'awec apualho'oc ma'a apquenmopuanca ania'a coca, apquellacpe mota apquetlheno aluetai'a apaqto'oc, acjemo coca m'a, wanlha atlhenaicama apualho'oc apanco'oc apancawec ma'a. 19 Ca enenlhet'awoc anac ma'a jawe apquellelto apquelpasmecja Cristo, apto njan apqatec, apquellaicamoc na aptecamoc apiocja apqueluanenquescama la'a, apquelleto nac apquennemolhema. Cristo apquelpasmecjo njan ma'a apquennemolhema apanque', malha actonac apiocja nac lhema enenlhet nnanquec alpasmecja alietetacja canjan ajac, lhnac nane ntemac aclheianmo njan apualhoc Engiapom Neten ma'a.
Acmasquema jengenmaicama jenganemacja aniem'o enenlhet
20
Necsa apquetsepma lhta Cristo apquelpacnencasacje lhta acmowana jenganemacja aniem'o enenlhet. ¿Se cla ctemo aqnactetemo nac mocjom jenganemacja nac, je?
21
Ca ntemac aclheianma, ¡Menmanwomanquec jam! ¡Metawamonquec jam! ¡Menmamonquec jam! Ca ntemac ma'a.
22
Coca lhamacjo jenganemacja nac enenlhet apancawec apanco'oc, ca ncowancac quetsec jeng, ncomasquenwomoc coca aquiennactema m'a.
23
Malha niecje acto neten anquec aquiaspommalhca' m'a ncanec nqueltawec antec nalhepec anquec ma'a, antengioc na engiempejec angelliejecjoc ma'a, nqueltawec na ncoiatancoc nengiocja nac altemo ncoliejecjoc ma'a, coca jenganemacja nac mamma aiempejec cacpota ncotnescasecja coneng aliasponcomacja nac engellualho'oc.
Capítulo 3
1 Malha lhta nja ntemac apnaqlhatecjanweiacmo la lhemec Cristo quetlhencap, ca nqueniemai'ac na ntasec ellanacoc caselha aniem'o neten, coca m'a apnec Cristo aquieto aquiennacja Engiapom Neten. 2 Jai, ntasec ncolquetamanco mota apualho'oc caselha alleniem'o nac neten, jawe acnanianco nac jenque'e nalhepop anac. 3 Malha lhta niecje apqueletsepma quetlhencap, ca aptaianco lhta njan malha apqueliengiecja caselha ncolatsecama, Engiapom Neten coca apquellaicocjac alhnancoc aliennactema apnengio'oc aniem'o Cristo. 4 Jai, Cristo apto apqueliennactescama apnengio'oc quetlhencap, jata apuactamo ta mocjom jenque'e ncoiepleujoc jata apcaponmatema, apientalhnemo, ellanconwatac jata njan quetlhencap ma'a.
Nelleltammalhca angelieplauquesec cacpota angellanancoc caselha acpeiwomo
5
Ennapecja' ncollatsecama anmajai'o apualho'oc, eluatesamoc apquellanactema, mellanamoc caselha malha alpaisenquescama nac apualho'oc, mellanco nquec ncoliatancoc apualho'oc allapelhcasecama apnengio'oc ellanancoc caselha ncollatsecama, melleliejecjo nquec na aliasponcomacja nac apualho'oc, metnamo nquec na apquenmeiauquesammacpo caselhaja ncanec malha apqueltacnescasecamoc caselha aquiocja la alanemmalhca m'a.
6
Ncanec eiaqmoncasecjac jata Engiapom Neten aptaiancolha nac ma'a,
7
lhennenga lhta njan quetlhencap apquellaneianquec ma'a.
8
Colhua coca ntasec eluatesancoc lhamacjo caselha ncollatsecama nac ma'a, ca actonac nenloma, allapelhcasecama apnengio'oc, ncollatsecama, nentacnoncoma, ncolatsecama apatong.
9
Eluatesamoc jata apquenmopuanca ania'a apiesecsec anac quetlhencap ncanec apqueliengiauque lhta apualho'oc lhennenga apquellanecamoc alhta caselha ncollatsecama.
10
Colhua coca alhnancoc apualho'oc nlhenquec na acuanecamoc lhamacjo acnem acuaiacmo acnacjo aptaiancolha Engiapom Neten apto lhta apquelanai'a enenlhet, nlhenquec na acuacmo apqueliecpelcanwacmo ta apiocjo nquec ma'a.
11
Apnemo po'oc enenlhet napaqtec Engiapom Neten metca apqueliecammap, ca actonac judio, metno judio, circuncidado, no circuncidado, niecje apiau'acja temma actacmanma, nlho ca la temma apquetcoc acmase lhte caselha apancoc, niecje esclavo, metno esclavo, apnemo po'oc. Coca acto neten anquec aquiaspommalhca etnancoc apnema apualho'oc Cristo, apto neten apanquec apiaspommap ma'a.
12
Apquellamelaiam Engiapom Neten quetlhencap cacpota njan apqueliequiescanquec cacpota eltesquesancoc apquennemolhema, ca ncanec na ntasec elietnajo mota napaqta'a po'oc, etnancoc na apqueliamolhma, anmomjapac'a apualho'oc, metca apquelloma, metca apquelpecjescama njan.
13
Meltacnewa' panquec apiesecsec anac quetlhencap, enmecjo ta njan tacja apquellelto nac apnaqtewascama, ca ctonac Apuesque apquenmecjo tacja quetlhencap.
14
Ellamelama ta mota po'oc ncanec ncotsantenquesec jata apquelpasmommacpo m'a.
15
Engiapom Neten apqueliequiescama quetlhencap cacpota ncotnancocja malha lhema apiocja, ellanco ta njan metca actaicama enwalhoc anac aniem'o Cristo ncollanancoc apualho'oc, etnamo ta mota njan gracias.
16
Meliengiecja nquec na ania'a actacmanma aniem'o Cristo, etlhecmosacpo ta apiesecsec anac quetlhencap, ennawesap najan aquieplomo apquelianweiacmo. Etnamo ta njan gracias Engiapom Neten, ennecmasamoc jata njan salmos, imnos cacpota njan nennecmascama aniem'o apualho'oc apancawe nac.
17
Apuesque Jesús apqueltawec etnancoc quietemo nquec lhamacjo caselha apquellanecamoc, apquetlheianma la njan,
¡ntasec etnancoc quetlhencap ma'a! Etnamoc jata njan gracias engiapma'ac anac apuesai'a Engiapom Neten aniem'o njan Jesús.
Neltammalhquelha antancoc
18
Quetlhenca nema nac anacteianca'a colleliejecjo ta mota anacteianca'a ncanec mancoliasqueiacmoc Apuesque.
19
Quetlhencap najan nema apnacteianca'a ellamelemma ta apnacteianca'a cacpota njan metca apqueliennai'o apquellanei'o njan.
20
Quetlhencap najan apquetco'oc elleliejecjo ta apiapma'ac ncanec acto apiasponcomaja antejec Apuesque.
21
Quetlhencap apquellelto apiapma'ac mellauques anquec apquetcac cacpota mancouje anmaiosac'a apualho'oc ma'a.
22
Quetlhencap apquellelto esclavos elleliejecjo ta mota apqueluescaie necsa apquenmacmecama jenque'e nalhepop anac, jawe wanlha apquellanenca la apquenmacmecama napaqtawec ma'a apquelleltemo ncolcama apualho'oc apuesque apanco'oc, etnamoc jata njan jawe ngiapac anquec metca apqueliennenquescama aniem'o njan apquellai'o Engiapom Neten.
23
Ellanamoc jata njan caselha alleclemo nquec apualho'oc apquenmacmenca la'a malha actonac apquellasennanca la Engiapom Neten, jawe acto nac enenlhet apanque nac.
24
Apqueliawec quetlhencap ellancoc jata Engiapom Neten lhema caselha apenescamo aquianmoma m'a ncanec quetlhencap apquellelto apquellasennaicama Cristo apto apuesque.
25
Coca apquellanenco la caselha ncolasetcama etlhewancoc jata njan aquiaqmoiecja' ncolatsecama apqueltemacja', moclhem'a ta njan etlhewancoc actacja la aquietemo ncoie' ncanec Engiapom Neten apto apnescamo mo'oc jengellanei'o ennenco'o lhmanquec jam.
Capítulo 4
1 Quetlhencap apquellelto apqueluescaie eltacmelques jata apquenmacmesaicama, ellamoc coca aquietemo ncoie', cotlheng na apualho'oc quetlhencap apnec Apuesque apanco'oc ma'a neten.
Nellanemmalhquelha antancoc
2
Elelmalhna mota metca nnelha Engiapom Neten, ellelquetnama ta njan cacpota njan etnancoc gracias Engiapom Neten.
3
Elelmalhnama ta njan Apuesque cacpota jengellancoc nquescama nempaiescama ania'a actacmanma cacpota aplhamacjo enenlhet'awoc elianwomjoc caselha aquielhammalhca aniem'o Cristo, asnec co'o colhuawe nac jenque'e nengaclhencasemmalhquelha nac aniem'o aspaiescama ania'a actacmanma nac.
4
Jelelmalhnesques jata njan Engiapom Neten cacpota jepasmoc asquetlhecmoscama iocjalhmec ancoie napaqtawec enenlhet'awoc.
5
Etnamoc jata nema apqueliamo napaqtawec ma'a enenlhet'awoc anac metnanco Jesucristo apquennemolhema,
aptanco la amaica'a ellelientemoncaso ta amanie nquec
6
ania'a actacmanma acleclemo la enwalhoc, apquelelmalhnenca la caselha m'a, ellatemmoma ta actacmanma nquec.
7
Astema eialheng ascamelaiam Tiquico etsacjesec jata ania'a ejencoc jam, apto njan alhelhma jeiasecjai'o nenmacmecama lhemo ie' Apuesque.
8
Allapasquesec jata quetlhencap jam cacpota eleltennacsec actemacja nellaniemjaicama jenque'e, cacpota eluascapecjoc quetlhencap jam.
9
Onesimo ta njan etnec aplhelhma m'a, apaiomolhema apancawe nac quetlhencap, awanjec nellamelaiam ma'a, apto njan jengasecjai'o, eleltennasama ta njan lhamacjo caselha actemacja acuetammalhca jenque'e.
10
Ca apcapasac na aclheianma apualhoc Aristarco, apcaqlhencasemmacpo njan jenque'e alhelhma. Cacpota njan apcapasquec na aclheianma apualhoc jenque'e Marcos apto Bernabe apiaja' apquetca, jata etnec na amaica'a jam, eltacmelcaso ta apquenmaicamoc tacja apuactamo ta jam, astacja lhta njan aspaioma asquelleltennascama secjec anque lhta.
11
Ca apcapasac na aclheianma apualhoc jenque'e Jesus, mo'oc nemaltema coca Apeiwomo. Ca enenlhet'awoc anac jenque'e apquellelto judíos wanlha apancawec jelpasmoma necsa aspaiescama ania'a actemacja Engiapom Neten apuesque, apquelpaiescaiacmo njan ewalhoc necsa asuetai'a aquientalhnema jenque'e.
12
Apcapasquec na aclheianma apualhoc Epafras apto njan apaiomolhema nac quetlhencap, apto njan apcasennaicama Cristo Jesus, wanlha mota apacmetquescama Engiapom Neten cacpota eliennac quetlhencap apquelieplauquescama apaioma Engiapom Neten.
13
Jai', asuetacje lhta njan Epafras awanjec actaicama apualhoc apquellanei'o quetlhencap jam, cacpota njan engelialheng'a apcacjanco Laodicea cacpota njan Hierapolis.
14
Apcapasquec na aplheianma apualhoc ponja ngiapom jengamelaiam Lucas, cacpota njan Demas.
15
Quetlhencap jatoca njan jam elletsacjesec aclheianma ewalhoc elialheng'a apcacjanco m'a Laodicea, cacpota njan elletsacjesec aclheianma ewalhoc Ninfa ca njan elialheng'a apcaqnecjo mota acnemacja m'a.
16
Jata netamen apquelpenescama ta apquelietsatecamoc waccajac anac, ellapasques jata njan enenlhet'awoc co Loadicea cacpota elietsatancoc ma'a, elietsatamoc jata njan quetlhencap waccajac apquellanco ta m'a.
17
Eleltennasamoc jata njan Arequipo etacmelcasoc jata apmacmecama aniem'o m'a apcaicamoc Apuesque.
18
Jai, colhua astalhesquec co'o, cotlheng jata mota apualho'oc necsa asnema co'o jenque'e nengaqlhencasemalhquelha nac, asqueltawec na Engiapom neten ewaiwesenta jengamelaiam tacjaplhet'oc quetlhencap jam.