Toba-Maskoy: Regular Print

Updated ? hours ago # views See on WACS
Gálatas
Gálatas
Capítulo 1

Pablo aptalhesquescama waccajac Jesucristo apquennemolhem'a co Galacia
1 2 1–3 Co'o Pablo astalhescama jengque'e waccajac anac cacpota ngcolhenec ewalhoc aplhamacjo apquellelto Jesucristo apquennemolhema apcacjanco m'a aquieto Galacia, ca njan nquetlhenquec na apualho'oc quetlhengcap jengque'e asquetlhelhma'ac anac apquelelto njan Jesucristo apquennemolhema. Asquenmalhnema Engiapom Neten ca njan apuesque Jesucristo apquellelto apqueliamolhma eltacmelquesec quetlhengcap jam, cacpota nja altacmelaicama apualho'oc quetlhengcap jam. Co'o nac apostol asto ascapasammalhca cacpota alhenec ania'a actacmanma aplhenammap Engiapom Neten apto aptemesquesecja mocjom apjalhnancoc Jesucristo apiesecsec apquenmasquenwaiacmo. Jawe apto enenlhet apanque' jeiapascama, coca jeiapascama m'a Jesucristo cacpota njan Engiapom Neten. 3 Askeltavek ko Eniapom Neten kanhan Apveske engankok Jesucristo ltaqmelkeskesek apkellaniemhaikama, ellangkok na altaqmelaikama apvalho'ok ketlhengkap ham. 4 Apkaiangkave lhta m'a Jesucristo apmatnama aniem'o mongeleliehekho hengaskamakha Eniapom Neten. Hengelpaqnengkasekho nhan ngkolatsekama hengenmaikamok nenvanlha nak aniem'o nhan Eniapom Neten apkeltema m'a. 5 ¡Gloria, ntasek eliavenkasok apvesai'a Eniapom Neten metka akvaiam annelha aliekaikamok iantelhkapa! Amen. 6 Enenlhet meliamolhma niecje quetlhengcap, Engiapom Neten coca apqueliequiescama quetlhengcap aniem'o aquiawai'a apiamolhma m'a, cacpota eltejec apquennemolhema, apcapascamo Cristo cacpota etlhecmosancoc wanlha apqueltemo antejec angeliejecjoc Engiapom Neten cacpota ngcotacmelec nellomaja, ¡Awanjec aquiemascama ewalhoc asleng'o ania'a! Colhuawec anquec apqueluatesaiancoc quetlhengcap Engiapom Neten, apquelieplecjo mo'oc actemacja jengetlhecmoscama. 7 Apcacjanquec enenlhet apqueleltemo etlhenenquesec quetlhengcap, apqueliaqmoncasecja mo'oc actema jengetlhecmoscama, coca m'a jawe aniem'o Cristo. 8 Asquenmalhnema co'o Engiapom Neten engiancoc aquientalhnema apquellaniemjaicama m'a enenlhet'awoc anac apto ta ngcolatsecama apquetlhecmoscama, nnawec na co lha, nlho ca la njan enenlhet neten. 9 Colhuawe smac'ac alhenec mocjom, enenlhet apsoiam la'a moc actema apquetlhecmoscama, Engiapom Neten jata njan ellancoc aquientalhnema apquellaniemjaicamaja enenlhet anac. 10 Ngcaqjoc elluo'oc enenlhet astacja nac aquiennactema aspaioma, wanlha astengia co'o ngcolcoc apualhoc Engiapom Neten, ncanec Cristo apto apuesque ejencoc. Astengio la co'o ngcollecoc apualho'oc enenlhet jellanei'o, ngcomascoc jata asto jennengcasecama Cristo. 11 Quetlhengcap elialheng'a, ania'a actacmanma asquetlhecmoscamo na mota, jawe aniem'o enenlhet apanque', 12 aniem'o Jesucristo, jawe ngiapac anque astacja nac alheianma. 13 Apquelliawe quetlhengcap astemacja lhta secjec anque lhta, asieplauquescamo lhta apqueltemacja apancawec jengetlhecmoscama judios apanco'oc, asmenlhenaicama Jesucristo apquennemolhem'a, asmajai'a anaqtewacsec ma'a. 14 Ascasecjai'awe panque' apqueltemacja lhnac nanec asquelieijenca nnenga, coneng asquetlhelhma'ac lhennenga alhta. 15 16 Mancoietemo niecje' atnejec asmenlhenaicama, njeclhec coca awanjec anquec jeiamelaiacmo Engiapom Neten, amanie asmajai'a atiemoc au'alhoc meme jeliequiescangquec cacpota atnec asiecpelquemo panque' Jesucristo, cacpota aleltennasancoc metno Judios ania'a actacmanma aplhenammap Cristo. Jeiawecama apanque' lhta Engiapom Neten cacpota apaiacsec ania'a actamanma, ma lhta atengiaicama enenlhet jetlhecmoscama la'a, 17 monjaiangcoc na Jerusalen cacpota jetlhecmocsec apquellelto lhta apmania'ie apostoles. Wanlha asmaianco colhuawec anque aquieto iocjalhma Arabia, netamen astaqjemo smeiacjo m'a na temma Damasco. 18 Asnenquec acuacmo tres iantelhcapa m'a, netamen asmeiacjo Jerusalen cacpota atenwomoc Pedro m'a, ca asnacjo lheme 15 cnem ma'a. 19 Ca asueto njan apostol Santiago, Jesucristo apuesque engancoc apialheng ma'a, ma lhtoca aluetai'ac aplhamacja apostoles. 20 Apiawec Engiapom Neten astacja alheianma, jawe niapac anque alheno nac. 21 Netamen asmeiacjo iocjalhma Siria cacpota njan Cilicia. 22 Coca manjeliecpelquemac Jesucristo apquelieplecama apcaqjaianco m'a iocjalhma Judea 1 , 23 apquellengai'ac coca m'a, wanlha alhenammalhca. Lhta ptangcoc enenlhet ma'a: —Ca enenlhet anac jam jenmenlhenaiangca lhta, apmajai'o lhta etuacsec ania'a actacmanma aplhenammap Cristo, colhua coca apquetlhecmosquec ania'a actacmanma —lhta ptaiangcoc ma'a. 24 Ngquelpaijacje lhta apualho'oc apquelleng'o, Engiapom Neten apiaqmoncasecja astemacja lhennenga, ca aptaianco njan gracias Engiapom Neten ma'a.

1Aplheianma Pablo aplhecmosemmacpo apanque' Jesucristo nalhet amai Damasco, nema atlhecmoscama jawe aniem'o apostoles apcacjaianco m'a Jerusalen, man coca eliecpelquemac Pablo po'oc apostoles.

Capítulo 2

1 14 iantelhkapa lhta niekai'ak ma'a, ka asmeiekho lhta mokhom Jerusalen kanhan asketlhelhma'ak alhto ka Bernabe kanhan Tito. 2 Eniapom Neten alhta heteskeskama apkeltemo aniakhak ma'a, nengaqnakhe lhta m'a mok engankavek ennengko'o m'a apkelientalhnakha apkelemhama apmaniaie nemakha allai'o m'a, askeleltennasema lhta ania'a aktaqmanma aktemakha askeleltennasekama mota apieseksek ma'a metnangko nak judios kakpota elvetak iokhalhmek ankek ma'a nkotno aqhemo m'a asmakmekama. 3 Nkellekave lhta apvalho'ok ma'a asmakmekama, metka helammelhma m'a, kanhan ma lhta elleltok na ngkolhek akiaqtemenkaso nekha atkok aiempehek apkammelhakha Tito ngkanek apto lhta griego m'a, aptaiangkolha lhta mota m'a judios apankave'. 4 Hengelpalhakva'a lhta nhan apkelleltammakpo engelialheng'a, koka have lhta niekhe m'a vanlha lhta apkenmahai'a ellanama nentangkolha metka hengenmaikama nak henganemakha aniem'o Cristo Jesus, koka apkenmahai'a lhta henteskesangkok mokhom malha hengellasennaikama nema nelianmoma henganemakha ankok. 5 Koka ma lhta angellasekha apankek ennengko'o m'a ngkanek nenmak'ak al 6 Koka apkelientalhnakha apkelemhama apmaniaie nemo allai'o, ma lhta elleltok aiaqmongkasekhak mo'ok asketlhekmoskama, nkaqhok koka nema allai'akha la enenlhet'avok apkelemhama apmaniaie m'a ngkanek nennemo emmo'ok napaqtek 7 Apkelvetai'ak apkelemhama apmaniaie nak apto Eniapom Neten heiapaskama kakpota atlhekmoksek ania'a aktaqmanma apieseksek ma'a metka nak aliaqtemenammalhka nekhatko'ok apkellammelhakha, koka Pedro apkapasammap ma'a elhenek apieseksek aknaikamo nak nema aliaqtemenkeskama nekhatko'ok apkellammelhakha. 8 Eniapom neten koka aptemeskeskama apkapaskamo mota Pedro kakpota etlhekmoksek apieseksek ma'a nema nak aliaqtemenkeskama nekhatko'ok apkellammelhakha, heiapaskamo nhan ko'o m'a atlhekmoksek metnangko nak judios. 9 Apquetlhenque mota Jesucristo apquennemolhem'a m'a, apquellelto neten apancawec Santiago, Pedro cacpota njan Juan, nquetlheianguacjawe lhta njan apualho'oc asto Engiapom neten jeiapascama, jengenme lhta njan tacja, jengelpaiwesangco enmeio'oc 1 , lhta ptac jengellano co'o cacpota njan Bernabe angetlhecmosancoc metno judios, coca m'a etlhecmosancoc apiesecsec judios apancawe. 10 Wanlha apquelleltawec mota angelpasmoc apquelto nac metca apquelletsecama, nellienlhanacme mota angellanac acto nac ma'a. 11 Necsa apuaiam Pedro ma'a iocjalhma Antioquia, ascammelhque lhta co'o m'a, ncanec aptemacja jawe aniem'o Jescucristo apquennemolhema. 12 Aptawocje lhta Pedro lheme Jesucristo apquennemolhema metno judios ma'a, netamen apqueluo'o judios apancawe' apquelapascama lhta Santiago, ca apqueliengiacjo lhta aptaweicocja lhemec metno judios ma'a, ncanec apcac alhta judios Jesucristo apquennemolhema m'a, aptengiaicamoc na mota apquelleltemo ngcoiaqtemennalhca atquetse aquieto apcammelhacja. 13 Apqueluetai'ac nac na napocja judios Jesucristo apquennemolhema' m'a, ngcolatsecama aptacja Pedro m'a, apqueliengiecjo njan Jesucristo apquennemolhema metno judios ma'a. Nnawec na Bernabe, ma lhta ngcolatsema njan aptacja m'a. 14 Asuet'ac co'o melieplauquescama actemacja jengetlhecmoscama Cristo, lhta stac ascano Pedro napaqtawec aplhamacjo enenlhet apquennemolhema Jesus: —Lheiap Judio apanque', apiengiacje secje jenganemacja Judios, aptaweicocjo lhemec metno judios, ca songque apquetlhecmo Judios lheme', ca apqueliengiacjo aptaweicocjo lheme metno judios lhquec. Malha apqueliengecamoc lheiap apquelto Jesucristo apquennemolhema metno judios cacpota elieplauquesec jenganemacja apancoc judios, ca ctonac apqueliaqtemanma nac necja atcoc apquellammelhacja. 15 Lheiap Pedro judio apanque', co'o njan, jawe acto nac mo'oc apquellawacja nac enenlhet apqueltemenwecjo na lhma', 16 coca nelliawec ennenco'o mangjengeluongquesep tep jenganemacja engancoc anac, jawe ngiapac anque astacja nac, wanlha ngcaimelhquec mongeliascamec Jesucristo cacpota antancocjac nelpeiwomo napaqtec Engiapom Neten, cacpota jengenmecjac tacja Engiapom Neten ma'a, ca ncanec mongeliascamec ennenco'o m'a Jesucristo. 17 Apnec quelha enenlhet jengetlheianma la nengelto mangeliamolhma ncanec nengelleltawec jengeltemesquesec nengelpeiwomo aniem'o Cristo, coca mangcolietoc actacja apquetlheianma m'a, jawe aniem'o Cristo jengeltemesquescama mongeliamolha. 18 Nengellieplauqueso la mocjom jenganemacja judios, mangcoietoc ma'a. 19 Squelienlhaneiacme lhta aieplauquesec jenganemacja judios, asqueluatescamawec coca m'a, colhua coca asqueliajacjawe' Engiapom Neten. Malha niecje asquetsepma lheme Cristo neten iamet actennescama, 20 colhua coca asiepetcacjec Cristo, jemaicama njan, lhamacjo caselha asquelanai'a aniem'o moiasqueiam ma'a. Asiawe co'o awanje jeiamelaiam, apcaiancawe apmatnamo jeiacmonquescama co'o asquetsepma niecje. 21 Moltoc co'o aiengiecja lhamacjo actacmanma Engiapom Neten jelanei'o, wanlha apanquec ma'a aniem'o Jesucristo, jawe aniem'o jenganemcja apanco'oc judios. Mangcaimelhca angeliejecjo mocjom jenganemacja apanco'oc judios cacpota jengenmoc tacja Engiapom Neten. Aimelhco la angelieplauquesec jenganemacja apancoc Judios, acjemo lhta ngcotnec apquetsepma Cristo—

1No era para saludar, sino para demostrar que estaban de acuerdo.

Capítulo 3

1 Asquetlhecmosquec co'o alhnacjo actemacja apquetsepma' Jesucristo neten iamet actennescama cacpota antancocjac nengelpeiwomo napaqtec Engiapom Neten, coca quetlhengcap apqueluatesaianquec ania'a actacmanma nac. Malha apiolhma meijamolhma ntemac apnaqtewascama apqatco'oc anac quetlhengcap co Galacia, mamma apqatco'oc! 2 ¡Cotlheianwacjo no apualho'oc quetlhengcap! Apquetlhewaianque lhta Engiapom Neten Apualhoc aniem'o m'a meliasqueiam Jesucristo, jawe aniem'o apquellasecjai'o jenganemacja nac Moises. 3 Necsa aptaicamoc alhta Jesucristo apquennemolhema quetlhengcap ma'a, Engiapom neten Apualhoc alhta anmaicama, colhua coca apquelleltawec eliawencasancoc niecje mocjom tep anquec aptaicamoc apquelpeiwomo aniem'o apquelieplauquescama jenganemacaja Moises. ¡Metnamongquec ma'a, mamma apqatco'oc quetlhengcap! 4 Malha nac acjemo ntemac apquelluetai'a lhta caselha altacmelo quetlhengcap ma'a, coca jawe acjemo m'a. 5 Apquellaianque lhta Apualhoc apanque' Engiapom Neten ma'a, apquelanai'ac na jempelapquescama apiesecsec quetlhengcap ncanec ma lhta eliasqueiacmoc Cristo m'a, jawe aniem'o jenganemacja nac Moises. 6 Abraham man nac nanec eiasqueiacmoc Engiapom Neten ma'a, ca ncanec Engiapom Neten aptemesquescamo apeiwomo. 7 Ca ctonac ma'a, lhamacjo enenlhet'awoc meliasqueiam anac Engiapom Neten, coca m'a apquelelto jawe ngiapac anque Abraham aptawana'ac neptamen ma'a. 8 Alhnacjo ngquec aclheianma jenganemacja lhennenga, enenlhet'awoc metno judios meiascacmo la Jesus, ngolhec jata altemescaso apquelpeiwomo. Lhnac na nec aptemac Engiapom Neten apcanemo Abraham: «Lheiap jata ngcompac allenteiapma altacmanma caselha alhma nquec apquellawacja enenlhet'awoc» 1 9 Ca ctonac ma'a, enenlhet apquellelto nac meliasqueiam Engiapom Neten, etlhewancoc jata actacmanma aniem'o Engiapom Neten, ca actemo lhnac nanec Engiapom Neten apquelanei'o Abraham annenga, 10 coca enenlhet apquellelto la eluoncasacpoc tep aniem'o jenganemcacja Moises, etselhnanacpoc jata m'a. Ca ntac na actalhesammalhca jenganemacja lhennenga: «Enenlhet apquellelto la apqueiam lhema apquelieplauquescama jenganemacja Moises 2 , ennaqtewasacpoc jata » 11 Coca acto nac ma'a, mancawangquec jentemesquesec nempeiwomo jenganemacja nac, Jesucristo coca apuanque. Alhnacjo ngquec aclheianma jenganemacja lhennenga: «Ngcaimelhquec metca apqueliasqueiam Engiapom Neten cacpota eltec apquelpeiwomo, elloca ta acuancacjo m'a » 12 Coca aclheianma jenganemacja Moises: «Enenlhet apquellelto apquelieplauquescama la jenganemacja, elloca ta acuancacjo 3 » lhna ntemac jenganemacja. Coca jenganemacja nac mangcawangquec jengellancoc aliennactema ennengio'oc, ncanec mangellapuanquec ansaujoc angellieplauquesec lhamacjo jenganemacja nac, ca ncanec angetselhnanalhca niecje m'a. 13 Cristo coca apata ngquec aquientalhnema nac cacpota jengeluonquesec tep ennenco'o necsa aquientalhnema jenganemacja nac Moises. Ca ntac na actalhesammalhca ania'a lhennenga: « Enenlhet apquetsepma nac neten iamet 4 , Engiapom neten aptewascama m'a 5 » 14 Ca actemo nac Jesus apquetsepmec neten iamet actennescama m'a cacpota ngcolluacjoc na metno judios aptemacja lhnac nanec apcanemo Engiapom Neten Abraham. Mang jata ngquec angeliascacmoc Jesucristo, angetlhewancoc jata Engiapom Neten Apualhoc aplheianmo lhnac nanec jengellangcoc. 15 Ketlhengkap elialheng'a, smak'ak aietkesek lhema kaselha aktemo nak nenieseksa ennengko'o. Apto la lhema enenlhet apkelanai'a vakkahak aktemakha apkelhpankesekha kaselha apanko'ok, netamen na etnek firma kakpota ngkolhek aiempek ma'a, netamen mankollapvankek na enmaskeksek ma'a kakpota nhan etalhesekhak mo'ok alqama la'a. 16 Lhnak nanek na aptemak Eniapom Neten ma'a apeneskamo aplheianma lhema apaivoma nkovak hata takhaplhet Abraham kanhan aptaven neptamen, have aplheianmo m'a aplhamakho aptavana'ak anak, vanlha lhema, lhna aptemak: «Lheiap aptavenq», lhna aptemak ma'a. 17 Koka m'a Cristo. Askeltavek ko'o eliohok ketlhengkap ley anak mankavankek nkomaskeksek aktemakha apaivoma apeneskamo aplheianma Eniapom Neten ellangkok kaselha Abraham. Amanie nkek nak akvaiam apaivoma apeneskamo aplheianma Eniapom Neten, netamen 430 anio lhna ngvaiakmok ma'a, akvai'o nhan ley, ka ngkanek ley anak mankavankek nkomaskeksek ma'a. 18 Ka kaselha apeneskamo lhnak nanek aplheianma hengellangkok hata Eniapom Neten have aniem'o m'a ley anak, koka nkeniemai'ak ma'a apaivoma apeneskamo aplheianma Eniapom Neten apkeltennaskamo m'a Abraham. 19 Malha niecje acjemo m'a jenganemacja nac, coca apquetlhewai'ac cacpota eluetac enenlhet ngcollatsecama apquellanecamoc apanco'oc apancawe', coca mmasquemac aquientalhnema m'a jenganemacja nac apuai'o m'a Abraham aptawen neptamen. Enenlhet neten lhnac nanec apquenmama tacja jenganemacja, netamen apquellanconwaiacmo Moises ma'a, ca Moises apquellanconwaiacmo enenlhet'awoc ma'a. 20 Coca Engiapom Neten apcaiancosecja lhnac apaioma Abraham annenga, napaqtec anquec na aptemac ma'a, mamma lhnac apquennencasecama m'a. 21 Molhenac co'o jenganemacja nac ngcammelhec Engiapom Neten apqueltennascamo lhnac nanec Abraham annenga, molhenac ma'a, wanlha alheianmo jenganemacja mancawangquec jengangcoc aquiennactema enengiec, mangcawangquec na jentemesquesec nempeiwomo napaqtec Engiapom Neten. 22 Ca ntac na actalhesammalhca jenganemacja lhennenga, jengenmaicama mangeliamolhma nenlhamacjo nac, coca apenescamo lhnac nanec Engiapom neten apaioma cacpota jengelpaqnencasecjac necsa mongeliamolhma m'a, coca ngcaimelhquec amanie nquec mongeliascame Jesucristo. 23 Jengenmaicama lhta jenganemacja nac acuacmo apuo'o Cristo, 24 25 malha jengellanecama actemacja necsa nellaniemjaicama m'a, acuacmo apuo'o Cristo, mongeliascacmoc na ennenco'o m'a, jengeltemesqueso njan negelpeiwomo m'a. Colhua mangcaimelhcac jengellanecama jenganemacja nac, 26 ncanec mongeliascacmoc Jesucristo. Engiapom Neten apquetcac coca nentangcoc colhuawe nac. 27 Apquellauquesacpe lhta quetlhengcap conne iemmen, apquelpasmacjec Cristo m'a, aptanquec aptemacja nac Cristo. 28 Colhua coca nennacjec enmo'oc nenlhamacjo m'a napaqte Engiapom Neten, judios, metno judios, esclavos, metno esclavos, apquellennawa'ac, ngqueluana'ac, nenlhamacjo nennacjec enmo'oc ncanec nengeliepetcacjec Cristo Jesus. 29 Cacpota njan Abraham apquennemolhema aptaiancoc quetlhengcap, etlhewancoc jata njan lhamacjo Engiapom Neten actemacja lhnac nanec apaioma apqueltennascamo engiancoc jata Abraham annenga.

1
2Deuteronomio 27:26
3Levitico 18:5
4Poste
5Deuteronomio 21:23

Capítulo 4

1 2 Smac'ac alelpeiwescasecjoc mocjom iocjalhmec anquec astacja lhta asquellano cacpota elianwomjo' quetlhengcap. Apnec jata nquec apquetca enenlhet apselhie' mewanemo mocjom, mangcapwanque enmecjac apquetsecama apiapom apanco'oc, ncanec apquetquetsec mocjom, mangcapuanquec etne panque' aplhepquennenga, ca ctonac niecje esclavo. Ncaimelhquec elhenquesec nema atlhecmoscama lhema jengetlhecmoscama, cacpota njan lhema enenlhet aptacmelquescama acuacmo apuanemo, etnecjac apanco'oc lhamacjo caselhaja apanco'oc apiapom ma'a. 3 Ca ntemac ennenco'o lha' lhennenga m'a mangeliecpelquemelha Cristo, jengenmaicama lhta jenganemacja, 4 coca nietemawec acuai'o acnem aplheianmo lhnac nanec Engiapom Neten, apcapascamo apquetca apanque', malha enenlhet apanquec aptemac apteiaiacmo m'a, necsa aquientalhnema jenganemacja' apanco'oc judios. 5 Apuai'ac cacpota jengelwongquesec tep necsa jengenmaicama jenganemacja', cacpota antancoc Engiapom Neten apquetcac. 6 Colhua coca neltangcoc Engiapom Neten apquetcac, ca ncanec apcapascamo nac Apualhoc apanque' engellualhoc ennenco'o cacpota jengeleltennasangcoc nempacmetquescama Engiapom Neten ca njan metca actaicama enwalhoc, neltangca la'a: — Tata', ta' + ft Abba padre 7 Colhuawe nac quetlhengcap jawe esclavo, quetlhengcap apquellelto Engiapom Neten apquetcac, nquelietawec anquec na etlhewancoc apqueltacja lhta ellancoc Engiapom Neten. 8 Lhennenga quetlhengcap meliecpelquemac napaqtec Engiapom Neten ma'a, malha lhta quetlhengcap aquiennactema anmaicama queliaqjameioc casecapoc aclhelhma'ac ma'a. 9 Coca colhuawe nac Engiapom Neten apcaiancawec eliecpelcoc quetlhengcap napaqte'. Mpelapquescangquec aslengai'o quetlhengcap apquelleltemo ngconmama mocjom caselha metca aquiennactema, mangcomowana jempasmoc. ¡Acjemo m'a! 10 Mocjom apquetlheianma quetlhengcap aimommalhca mocjom ellanac actacmelaicama lhma' judios apanco'oc cacpota njan etlhenquesec jenganemacja judios apanco'oc, ca apquellanemac quetlhengcap enmoc jata tacja Engiapom Neten aniem'o apquelleliejecjo jenganemacja nac. 11 !Coca jawe niecje' m'a, asquetlhecmoseianque lhta niecje' quetlhengcap ma'a, malha acjemo ntemac asquetlhecmosecamoc alhta! 12 Elailhono, lhta co stema mota lhennenga m'a, ascanemo aimommalhco angeliejecjoc jenganemacja Moises cacpota jengenmoc tacja Engiapom Neten, asiamasmec coca co'o m'a, ca astecjo ctonac quetlhengcap metno judios mamma anmaicama jenganemacja' Moises. !Eltamoc na quetlhengcap astemacja nac co'o! Ntase lhta jeltacmelquescamo quetlhengcap 13 secja suecja lhta co'o m'a Galacia asquetlhecmoscama ania'a actacmanma, nientelhe canque lhta nemmasquema jeiaqjema, ca ncanec alhnacjac iama acuancacjo m'a. 14 Malha aliasekamo lhma lhta ntemak nemmaskema ehenkok ketlhengkap ma'a, mokhom alhto ka heltaqmelkeskamm'a, mang na heltaknongkomak, henmankek takha malha stonak angel Eniapom Neten la apkapaskama, malha niekhe nhan Cristo apanke'. 15 Avanhek ankek lhta alpaihekha apvalho'ok ma'a, akvakho lhta niekhe apkenmahai'a hellangkok apaqto'ok ¿Se lha ntemak na akmaskemo nak alpaihekha apvalho'ok, he? 16 Malha kelha astaiekhak ko'o nkotno emmo'ok ngkanek askelpaqmetkeskama mota napaqtavek aktemakha hengetlhekmoskama akto have niapak anke. 17 Ca jengetlhecmoscama meliamolhma nac, apqueliateianco nac elleliejecjoc quetlhengcap jenganemacja Moises, malha apquenmajai'a elpasmoc niecje' quetlhengcap ma'a, apquenmopuanca ania'a coca. Apquelleltawec coca jelieniecjac quetlhengcap cacpota etlhenquesec apquetlhecmosecamoc apanco'oc apancawec ma'a. 18 Ntasec eltejec wanlha ellananco mota caselha actacmelo, alleclemo apualho'oc coca metca ngcollatsecama. Asqueltawec jeltacmelquesec asno la apiesecsec quetlhengcap ma'a, cacpota njan molho la'a apiesecsec quetlhengcap. 19 Asquellamelaiacmec quetlhengcap malha eietca'ac, mocjom jata ncotnec aslengaicamoc aquientalhnema ca ctonac nquelwana aclengaianco acmasca au'alhoc aniem'o apmajai'a etiemoc atca. Jata ncotnec aslengaianco aquientalhnema acuacmo acnem etnancoc quetlhengcap malha Cristo. 20 Coca colhuawec nac asqueltawec nieje' alhec lheme quetlhengcap jam, alelmalhnama astacmelquescamo aspaioma cacpota aijoc' co'o actacja apquellanai'a, ncanec moijoc co'o aptaianquelha quetlhengcap jam. 21 Eltacmelcaso no apquellailhemo quetlhengcap apquellelto apquenmajai'a elieplauquesec jenganemacja Moises ¿Ma nlho ellengai'ac quelhengcap actacja aclheianma jenganemacja nac? 22 Apcanet nac nanec apquetcac Abraham, lhema apuetasquescama atca esclava, cacpota njan po'oc atca aptawa apanque'. 23 Atca apquenno aptawa apanquec Abraham, Engiapom Neten aptema, coca atca apquenno esclava aniem'o meljalhanma Abraham ma'a actacja lhta Engiapom Neten apaioma 2 . 24 Ca janet anac ngqueluana'ac malha nema altemesquescama janet caselha aplheianma lhnac na nec Engiapom Neten, apmanie apatmetquescamo lhnac nanec Abraham anennga, netamen mocjom Moises annenga ma'a. Ca nquelwana nac esclava nwetai'a atca apquenno, esclavo njan ma'a atca, 25 ca nquelwana nac ntemenwacmec malha jenganemacja' apmamo lhnac nanec tacja Moises annenga aquieto nalhma' acjaiam Sinai, conne' iocjalhma Arabia, ca nalhma acjaiam anac ma'a malha ntemengwacmoc colhuawe nac natemma apiawai'a Jerusalen, aplhamacjo enenlhet'awoc na apquellawacja nac ma'a, anmaicama aquiennactema nquec jenganemacja'. 26 Coca Sara, mangcotno esclava, malha ntemesquesalhcac po'oc temma Jerusalen ma'a neten, malha enquen ennenco'o m'a, nengellelto nac mangjengenmaicama jenganemacja'. 27 Ca ntac actalhesammalhca jenganemacja lhennenga: « Copaijecja au'alhoc nquelwana aquiennactema naie', mangcotai'a niecje atca, ca ctemmamaja nquelwana', nnenquec niecje' aquiamasmojo, elhamonwomoc jatoca atcac lheia', ncoliecanwacjac jata acnema nac anacteianca'a» — ca ntac ma'a. 28 Elailhono elialheng'a, Engiapom Neten lhnac nanec aptema apqueltennascamo apaioma Abraham etac jata apquetca, Isaac apuesai'a m'a, quetlhengcap apqueltacja malha Isaac 3 . 29 Lhennenga lhnac na nec Ismael metno Engiapom Neten aptema etiemoc, apiacmasecama Isaac apto Engiapom Neten aptema etiemoc, lhnac nanec ntemac ma'a. Ntemengquec nenguanlha nac, enenlhet'awoc apqueleltawec elieplauquesec jenganemacja Moises, jemmenlhenaicama njan nengelelto metca nac jengenmaicama jenganemacja' nac. 30 Nietnec actalhesammalhca jenganemacja lhennenga actemo lhnac nanec anemo Sara Abraham: «Engiapes 4 nquelwana esclava nac cacpota njan atca, ncanec mangcoietoc epasmecja apanco'oc apiapom, po'oc atca nquelwana ncotno esclava coca nietoc ma'a 5 » —lhna ntemac ma'a. 31 Elailhonojo elialheng'a, jawe ennenco'o ctonac Ismael, apto atca esclava, ennenco'o coca nengellelto nac Isaac, apto atca ncotno esclava.

2Amanie Engiapom Neten paioma etac jata apquetcac Abraham, mangcoca etai'ac colhuawe apquetca Abraham ma'a, coca melailhemac ma'a, ca apuetasqueso atca esclava.
3Ennenco'o nengelto nac malha Isaac aniem'o Engiapom Neten apqueltennascama Abraham, jawe aniem'o jenganemacja Moises.
4Pablo aplheianma ntasec ellapacsec jengetlhecmosama meliamolhma nac apquetlheianma mota ngcaimelhquec mocjom angelieplauquesec jenganemacja Moises cacpota jengeltemescasecjac nengelpeiwomo napaqtec Engiapom Neten.
5Genesis 21:10

Capítulo 5

1 Nne lhta jengelpacnengcasacjo jengenmaicama jenganemacja Moises, Cristo lhta m'a. !Elteta apqueliennactema quetlhengcap, mellangco nquec mocjom eltejec anmaicama jenganemacja! 2 ¡Eltacmelcasono apquellailhemo! Co'o Pablo smac'ac aleltennasancoc quetlhengcap ¡Meliaqtemena nque' necjatcoc apquellammelhacja'! Actemacja nac aclheianma jenganemacja, ncanec acjemo ta ncotnec apquelpacnencasecja lhta Cristo anmaicama caselha ngcolatsecama. 3 Alleltennasecjoc jata mocjom cacpota elianwomjoc quetlhengcap alhnacjo nque', apqueliaqtemenanco la quetlhengcap necjatcoc apquellammelhacja, netamen ngcoitec jata mocjom apqueleliejecjo lhamacjo jenganemacja nac. 4 Ca apiesecsec anac quetlhengcap moclhem'a meliasqueiacmoc mocjom apquellanemo aimommalhco elleliejecjoc jenganemacja nac Moises cacpota etnancoc apquelpeiwomo napaqte Engiapom Neten ¡Mangcoietoc niecje m'a! Apquelhacjec Cristo quetlhengcap ma'a, cacpota njan apquelhacjec Engiapom Neten apqueltemo lhta ellancoc quetlhengcap metca aquianmoma. 5 Ennenco'o coca Engiapom Neten Apualhoc jengellangquec ennenco'o metca altaicama engellualhoc ncanec nengelliawec nengelto negelpeiwomo aniem'o mongeliasqueiam Cristo, jawe aniem'o neliejecjo jenganemacja Moises. 6 Ennenco'o negellelto nengelpasmecja Cristo jawe neten anquec aquiaspommalhca m'a nengiaqtemanma nac nengammelhacja necjatcoc, nlho ca la njan metca nengiaqtemanma nac cacpota antancoc nengelpeiwomo, wanlha ngcaimelhquec mongeliascame' Cristo cacpota ngcotalhcac aquietnema nengamelaiam emmo'oc. 7 Ntase lhta niecjec apquelieplauquescama quetlhengcap jengetlhecmoscama acpeiwomo, nne lhtoca aliasenco lhma' ¿Se lha enenlhet apqueliaseianco lhma ie? 8 Jawe Engiapom Neten, enenlhet coca aniem'o m'a. Engiapom Neten apqueliequiescama quetlhengcap cacpota elleliejecjojo'. 9 10 Engiapom Neten jata eiaqmoncasecja aptemacja enenlhet anac apto apqueletsoiam ania'a ncolatsecama jengetlhecmoscama, ngcaqjo enenlhet apto la neten apanque apiaspommap, ncanec ntacmelcasawec actewasecja jengetlhecmoscama actacmanma, malha niecje' ctonac menewque 1 , lhema actec niecje mpaijacjec coca actewascama aniep. Jai, ascanec co'o ngcollecoc apualho'oc quetlhengcap astacja nac alheianma. 11 Asquetlhecmosquec co'o apquenmac'o la eluoncasacpoc tep quetlhengcap wanlha etnancoc metca apqueliasqueiam Cristo apquetsepmo neten iamet actennescama jenianmoma ennenco'o, mangcaimommalhcac eliaqtemenancoc necjatcoc apquellammelhacja' cacpota enmoc tacja Cristo. Ca ncanec apquellomo nac jelanei'o enenlhet judios aniem'o asquetlhecmoscama nac, ca asieniacjo la'a asquetlhecmoscama nac, ncomascoc jeliasengco lhma' judios anac. 12 Apqueliaseianquec na lhma' quetlhengcap ma'a apquelleltemo eliaqtemenec necjatcoc apquellammelhacja !Ma nac etnaianco apancawe' enenlhet'awoc anac ma'a eliaqtemenanco lhamacjo nac acnaicamoc apquellammelhacja'! 13 Engiapom Neten jengelwongcasac tep lhamacjo aisecsec caselha jengenmaicama lhta, cacpota angelpasmalhcoc engancawec ennenco'o, angeluancasalhco na engancawec tep, jawe angellanac enganque' ncolatsecama. 14 Neten anquec aquiaspommalhca' jenganemacja' jeng: «Eniamelemma po'oc ca ctonac apcamelammacpo apanque' lheiap» 15 Coca apquennapecpo la mocapancawec quetlhengcap, actemo nac ma'a apqueltaclhemmap po'oc la'a, elliensacsec po'oc, malha quemjawa' ennapacpoc, ennactewasacpo ta apancawe' quetlhengcap ma'a. 16 Asmac'ac alleltennacsec quetlhengcap, eleliejecjo ta Engiapom Neten Apualhoc, cacpota ngcomascoc ngcolatsecama alquetansema apualho'oc, 17 ncanec ngcolatsecama nac alquetansema apualho'oc anmelhmacja Engiapom Neten Apualhoc ma'a ¡Metnamongque quetlhengcap ma'a ngcolatsecama nac! 18 Apquelleliajacjo la'a Engiapom Neten Apualhoc quetlhengcap, mmasquec anmanco jenganemacja quetlhengcap. 19 Alhnacjo nquec nengwetai'a enenlhet apto apieplauquescama ngcolatsecama alquetansema apualhoc, aptewascamo mota aptawa', apquenmensanweiam alhma', mantec apquenmaicama caselha ncolatsecama, lhamacjo actemacja caselha ncolatsecama aquietnaicama apaqtec. 20 Aptacnescasecamoc caselha alanemmalhca' aquiocja, cacpota njan acnema apualhoc, aptacnoncoma po'oc, apquennapommap po'oc, apnatjaicama aptawa', cacpota njan acmomjape aploma, apquenmeiauquesammacpo apanquec caselhaja, apquellatemommacpo mota, apquelhpanquescama mota. 21 Apiasepquescama po'oc, anmen ato', apasenwaiam apcacnaianquelha' enenlhet ncolatsecama aquiecanweiam aptecamoc cacpota njan apienaicamoc anmen, nlhaniec anquec aptemacja ncolatsecama apquellanai'a. Asquellasquec quetlhengcap mocjom, ca enenlhet aptema nac jeng, metnesquesacpec jata Engiapom Neten apnemolhema. 22 Coca Engiapom Neten Apualhoc jengeltemescasquec nengellamelaiam emmo'oc, alpaijecja enwalho'oc mota, jengeltemescasquec metca acmasca nellanei'o emmo'oc nenlhamacjo, metca acpecjai'a enwalhoc, antancoc anmomjape enwalhoc angellanjoc enmo'oc, antacmelcaso angellanjo enmo'oc, mongeliascamec coca njan Engiapom Neten, 23 metca nengientalhnesammalhco, enwanca'ac angellanama enganquec ncolatsecama enwalhoc. Engiapom Neten Apualhoc jempasmoma cacpota angellana lhamacjo caselha nac altacmanma. Ca nellano la lhamacjo caselha actacmanma nac, mangcawangquec jenganemacja jengellammelhec. 24 Nengelto nengelieplecama Jesus nengelwatesangque lhta nengeltemacja ncolatsecama aclhenaicama enwalhoc. 25 Colhua coca nengelloca lhemec Engiapom Neten Apualhoc, angellancojo jengelpasmoc jengenmama nengenmanquelha la'a. 26 Metca nellammalhco, mongeluanquesalhquec enmo'oc cacpota angellammelhalhca, metca nengiasepquescama caselhaja apanco'oc enmo'oc ennenco'o.

1Levadura

Capítulo 6

1 Apqueluet'ac jata nquec po'oc apquellanai'a caselha ncolatsecama, quetlhengcap apquellelto apquenmaicama Engiapom Neten Apualhoc, ennawescacja ta, metca apiennai'o apaioma ta eltejec, ncanec ncotnec quelha nja quetlhengcap ma'a. 2 Elpasmacpo ta pancawec quetlhengcap apqueluet'o nlho aquientalhnema, jata etnancoc cacpota apqueliajacjawec jenganemacja Cristo 1 quetlhengcap ma'a. 3 Coca apquelleltacpo la panque' neten apancawec quetlhengcap, apqueliennencasecpe panque quetlhengcap ma'a. 4 5 Moclhem'a quetlhengcap apquelliawec apqueltemacja apancawe', mellanama nquec po'oc aptancolha la'a apquellanecamoc. Elleltacmelcaso ta apquellaneio apancawec apualho'oc quetlhengcap, ntasec jata nquec apqueluetai'a apualho'oc apancawe', ncollecasama ta apualho'oc quetlhengcap ma'a. 6 Apua'ac jata nquec enenlhet apqueletlhecmoscama ania'a actacmanma, elpasmec jata. 7 Apquellan'ac jata nquec ncotlasecama quetlhengcap, eluetac jata njan ncolatsecama. Apquellan'ac jata nquec actacmanma quetlhengcap, eluetac jata njan actacmanma. Motlhen na nquec apualho'oc ncomajac eliennenquesec Engiapom Neten, mamma ngcowennoc ma'a. 8 Apquelieplaucasquec jata nquec quetlhengcap ngcolatsecama apqueltemacja, ennactewasacpoc jata apanque'. Coca apquelieplawo la Engiapom Neten Apualhoc, etlhewancoc jata aliennactema apnengio'oc mangotnengueianlha nnelha. 9 Etlhenques apquellanecamoc actacmanma metca apqueljalhionwaiam, netamen ncowac jata acnem apquetlhewai'a aquianmoma aniem'o Engiapom Neten. 10 Eltejec jata mota aquietacjo la, ellanamoc jata actacmanma apiesecsec enenlhet'awoc, apmaniaiec ma'a apquelto nac Cristo apquennemolhema. 11 Eltacmelcaso no apquellanei'o astalhescama nac. 12 Ca enenlhet'awoc anac judios apquenmajai'o lhta eliatancoc quetlhengcap eliaqtemenquesquesec necjatcoc apquellammelhacja, wanlha coca apquelleltemo ngcollecoc apualho'oc apquetlhelhma'ac ma'a, mangcomajai'ac ellengancoc aquientalhnema necsa apquetlheianma ania'a apquetsepma lhta neten iamet actennescama Cristo m'a. 13 Apquelpenescanquec enenlhet anac apqueliaqtemenaicamoc necjatcoc apquellammelhacja' m'a, mang coca elieplauquescama aclhamacja jenganemacja Moises. Ca judios anac apquelleltemawec eliaqtemenancoc necja atcoc apquellammelhacja quetlhengcap ma'a, cacpota ellacpoc aniem'o apquellasecjai'o quetlhengcap ma'a. 14 Wanlha coca co'o asielhanmecjo apuesque engancoc Jesucristo, apquetsepma' lhta neten iamet actennescama cacpota jengellwongquesec tep. Monguanmelhmoc jeliematquesaicama enenlhet, ncanec co'o asiamasme' ngcolatsecama lhta. 15 Ngcacjoc ma'a nema nac alliaqtemanma nac apquellammelhacja necjatcoc, mancolhec actacja niecje' m'a, coca neten anquec acto aquiaspommalhca m'a meliasqueiam anac Cristo cacpota njan alhnancoc neniaijecama. 16 Jai ntase', Engiapom Neten jata ellancoc altacmelaicama apquelualho'oc, elpasmoc jata njan aplhamacjo apquellelto apquelleliejecjo jengetlhecmoscama nac, aplhamacjo apquellelto jawe ngiapac anque Engiapom Neten apquennemolhem'a. 17 Coca colhuawe nac enmanie nac mollelto co'o jeliasangco lhma', mantec co'o esquepoc ejencoc eiempejec ncanec co'o aslengaianco secje lhta aquientalhnema, ncanec co'o asto asieplecama Cristo. 18 Jai', Asqueltawec co'o apuesque engancoc Jesucristo elpasmo mota quetlhengcap. Jai', ntase' 2 .

1La ley que dice ama al otro como a ti mismo
2Amen