Toba-Maskoy: Regular Print

Updated ? hours ago # views See on WACS
Marcos
Marcos
Capítulo 1

Apuaiacmec nac lhema enenlhet iocjalhma' metquelha temma apuesai'a Juan
1 Altennama ta ania'a actacmanma aplhenammap Jesus, Engiapom Neten apquetca, apto Cristo aplheianmo lhnac nanec Engiapom Nenten engiapacsec jata. 2 Lhnac nane ntemac aptalhescama waccajac secama ania'a Isaias: «Anwapacse ta co'o secama ania'a ejencoc cacpota epenescaso' amai, cacpota ewomoc lheiap 1 ma'a 2 » lhna ntemac ania'a. 3 Nietnec na mo'oc aptalhescama Isaias: « Nnenquec nac alpalhemaianca metquelha temma ¡Elpenescaso ta amai cacpota ewac apuesque, enmaies jata amai acpeiwomo! » 3 lhna ntemac ania'a 4 Apuai'ac nac Juan ma'a iocjalhma metquelha temma, apqueltemo lhnac aplhamacjo ellanecjac apualho'oc, ncolhec na allauquesancoc conne iemmen cacpota njan enmasquescasecjac Engiapom Neten apqueltemacja ncollatsecama m'a. 5 Apqueluai'ac nac enenlhet'awoc apquelleniem'o iocjalhma Judea cacpota njan na temma Jerusalen, apquelleltemo lhnac ellailhoc Juan ma'a. Apquetlheianmec nac secjec apqueltemacja ncollatsecama, ca apquellauquescamo lhnac conne iemmen Juan aquieto m'a aluata' Jordan. 6 Camello awa' lhnac apuenactema aptalhnema Juan, apiapnama lhnoca caselha aiempec, sewa' lhnac na aptoma' m'a cacpota njan iaujan. 7 Lhna ptemac apquellanemo Juan enenlhet'awoc: —Netamen co'o ewac jata apto apientalhnemo apanquec, molhnoc co'o, monwapuanac niecje njan atnec jennencasecama m'a ncanec coneng anquec co'o. 4 8 Asquellaucasquec niecje co'o quetlhengcap conne iemmen, jato ca m'a enenlhet anac ellancoc Engiapom Neten Apualhoc, aclanei'o apualho'oc quetlhengcap —lhna ptemac ma'a. Juan aplauquescama
Juan aplauquescama conne iemmen Jesus
9 Apteiapmec nac Jesus na temma Nazaret aquieto iocjalhma Galilea, apuecjo lhnac aquieto aluata' Jordan. Juan nac aplauquescamac conne iemmen ma'a. 10 Necsa apteiapma lhnac nemmen, apuetai'o lhnac anmaijecjo neten, acuaiwentamo lhnac tacjaplhet Jesus Engiapom Neten Apualhoc, malha conemmactec na ntemac ma'a. 11 Lhna ntemac nema aliatecama aniemai'o neten: —Lheiap eietca ascamelaiam, asto njan asqueliequiescama—lhna ntemac ma'a nema aliatecama.
Jesus iocjalhma metquelha temma
12 Engiapom Neten Apualhoc nac mpecjesaicama Jesus cacpota emjancoc iocjalhma metquelha temma. 13 Aplomaca lhnac ma'a 40 acnem aisecsec caselha neujac. Nqueliaicama lhnac satanas actemacja acmajai'a ncoiepconec cacpota ncoselhnanac niecje Jesus ma'a, Enenlhet neten noca apqueltaqmelquescamac ma'a.
Ampai'acjasecja apmacmecama Jesus iocjalhma' Galilea
14 Apcaclhencasemmacpec nac Juan apquellauquescama iemmen angiapom, ca apmeiecjo lhnac Jesus iocjalhma' Galilea, apquetlhecmosquecjec nac ma'a ania'a actacmanma aniem'o Engiapom Neten. 15 Lhna aptemac: —Nwa'ac acnem apquetlheianmo lhnac nanec Engiapom Neten apquetsecama ania'a apanco'oc. Ncanquetua'ac acnem etnecjac jata apuesque Engiapom Neten. Ellanecja ta apualho'oc, eluatesamoc aptaiancolha nac ncollatsecama, meliasquem na ania'a nac actacmanma —lhna ptemac Jesus ma'a.
Apqueliequiescama Jesus cuatro enenlhet cacpota etnancoc apquelieplecama
16 Necsa aplhengama lhnac Jesus neiawa' sanga aquieto Galilea, apuetai'o lhnac Simon ma'a cacpota njan apialheng Andres, ca apquelhecjo lhnac iama tetecco nemmen, wanlha lhnac apquenmacmecama apqueltengiaicamoc quelasma m'a. 17 Lhna ptemac Jesus apquellanemo: —¡Etlheng, jelieplomaja! Atlhecmosancoc jata nentemacja nentengiai'a enenlhet 5 —lhna ptemac ma'a. 18 Colhuawec anquec nac apquelhaiancoc iama tetecco apanco'oc, apquelieplecjo lhnac Jesus ma'a. 19 Ca aplhengo lhnac mocjom tep apquetsec Jesus ma'a, apuetanweiacmo lhnac Santiago cacpota njan apialheng Juan, Zebedeo apquetcac nac ma'a, apcacjaianco lhnac conne loma nemmen, apquellanecjo lhnac iama tetecco apanco'oc alietiapma m'a. 20 Apquellaweianca lhnac mocjom Jesus ma'a, apqueliengiecjec nac apiapom cacpota njan apquellennencasecama conne lomma nemmen ma'a, ca apquelieplecjo lhnac Jesus ma'a.
Queliaqjameio' acmaicama enenlhet
21 Ca apuacjo lhnac Jesus cacpota njan apqueltamesaicamoc na temma Capernaum, acnem sabado lhna ntemac ma'a, ca apquellentalhnemo lhnac nemaqnecjelha' apquellailhemelha Engiapom Neten apaioma judios ma'a, ampai'acjasecja lhnac apquetlhecmoscama Jesus ma'a. 22 Mpelapquescanquec nac apquellengai'a enenlhet'awoc apquetlhecmoscama aquientalhnema, mang na ncolhnoc apquetlhecmosecamoc jengetlhecmoscama jenganemacja Moises. 23 Apnenquec nac na lhema enenlhet ma'a queliaqjameio acmaicama, acpaijeianca lhnac apatong ma'a: 24 —¡Aiaii, manjengeliasamolhma Jesus co Nazaret! ¿Apmac'a ie jennaqtewacsec? Asiawe co'o Engiapom Neten apcapascama lheiap —lhna ntemac queliaqjameio' m'a. 25 Coca lhna aptemac Jesus apquelpalhencaseianca queliacjameio: —!Cowanma', copaqnemecja enenlhet anac! —lhna ptemac Jesus. 26 Nquelpelhiennenquescanquec nac enenlhet acpaqnemecjo queliaqjameio', man nac nquescamac acpaijeianca atong ma'a. 27 Nqueliemascanquec nac apualho'oc enenlhet'awoc ma'a, apquelpaqmetquesammacpo lhnac moc apancawe: —¡Aiii, apientelhe panque nac enenlhet anac, alhnancoc anac na jengetlhecmoscama, mana ncolhnoc queliaqjameio' aiempejec, nquellasecjawe nac na apaioma m'a! —lhna aptaiancoc enenlhet'awoc ma'a. 28 Colhuawec anquec nac nquetcaicama ania'a iocjalhma Galilea, lhamacjo actemacja caselha apquellanai'a Jesus.
Jesus aptaqmelquescaiam Simon apepiamong
29 Apteiapmec nac Jesus apcaqnecjelha judios ma'a, apquetlhelhma'ac noca Santiago cacpota njan Juan, apqueluecjawec nac apnemacja Simon cacpota njan Andres. 30 Nnenquec nac altennascamo Jesus ania'a aquietnema Simon apepiamong ma'a, nemmasquema acmelhanma' aiempejec nac ncaqjemac ma'a. 31 Ca aptetescaiacmo lhnac Jesus ma'a, apmamo lhnac amec, ca apnesecjo lhna na neten ma'a, actacmelecjo njan, ca alanesquescamo lhnac na aptecamoc ma'a.
Aplhamacma anmasca piempeioc apqueltaqmelquescaiam Jesus
32 Apquelienaqtesecama lhna lhma' m'a, aplaqlentamo' lhnac anmasca apiempeioc cacpota njan enenlhet anmaicama queliaqjameio' apnacja Jesus. 33 Apentelhe panquec nac enenlhet apcaqnecjo' atong pa'at aquieto Simon apnemacja'. 34 Apqueltaqmelquescaiacmec nac Jesus aclhamacjo actemacja anmasca apiempeioc enenlhet'awoc ma'a, aplhaniec nac na apqueliengiescasecja queliacjameio' m'a, mang nac na eltemoc ngcotlhenec apuesai'a m'a ncanec nqueliecpelquemawec nac apto Engiapom Neten apcapascama m'a.
Apquetlhecmoscama Jesus nenmaqnecjelha'
35 Mmopeiacmec na lhma' atsai'a, aplhatacjo Jesus, ca aptepo lhnac na temma, apmeiecjo lhnac metquelha aquiennoma lhma', cacpota epacmetquesec Engiapom Neten ma'a. 36 Simon cacpota njan apquetlhelhma'a apqueleltennasquecjo lhnac ania'a apnacja Jesus ma'a, lhna aptaiancoc: 37 —Apentelhec enenlhet apquelquetansema lheiap —lhnac aptaiancoc ma'a. 38 Apcatemmoicama lhnac Jesus, lhna aptemac: —Noc, po'oc temma actacja la nengaqte, ca asmac'ac atlhecmoscacjac ma'a, ca asuai'o nac jengque'e asmajai'a atnec co m'a—lhna ptemac apquellanemo. 39 Ca aplhengo lhnac Jesus, apquetlhecmosquecjo lhnac lhamacjo apcacnecjelha judios aquieto iocjalhma Galilea, apqueliengiescasecjo lhnac na queliaqjameio' m'a.
Jesus aptaqmelquescaiam lhema leproso
40 Aptetescai'o lhnac lhema enenlhet acmasca apiempec lepra apnacja Jesus ma'a, ca apquelteclhecuai'o lhnac aptapno'oc nalhepop napaqtec ma'a, lhna aptemac: —Apuesque, asiawec co'o nietnec apmopuana lheiap ¿Apqueltawe i'e jetaqmelquescamoc 6 lheiap, je? —lhna ptemac. 41 Apietnaiawec nac napa'at Jesus enenlhet anac ma'a, ca apmanweiacmo lhnac, lhna aptemac: —Jai', asqueltawec co'o ¡Cotaqmelecja apiempec anac! —lhna ptemac Jesus ma'a. 42 Colhuawec anquec nac ntaqmelecjac apiempec ma'a 43 ca apqueltennascamo lhnac na lhema apaioma Jesus, lhna aptemac: 44 —Melleltennasamonquec enenlhet'awoc ania'a nac, wanlha ta elana actemacja acpaioma aclheianma nac jenganemacja Moises. Engiacja ta apnacja sacerdote 7 cacpota ellanjoc actacmanweiam apiempec 8 anac, esacja ta njan apcaicamoc Engiapom Neten —lhna ptemac Jesus apcanemo enenlhet. 45 Man noca ncotnemac enenlhet, apquetcasecama lhnac ania'a lhamacjo iocjalhma, lhna sonque Jesus mewomec moc lhem'a iocjalhma aniem'o apqueliasecamo lhma enenlhet, metquelha aquiennoma lhma' lhnoca aplomaca mota'a, coca apentelhec nac na enenlhet apquelioiam apnaianlha m'a.

1Dios le esta hablando a Jesus
2Malaquias 3:1
3vIsaias 40:3
4No merezco ni siquiera desatarle las sandalias
5Los hare pescadores de hombres
6Puedes limpiarme? Los judios pensaban que si tenian lepra estaban sucios delante de Dios.
7AQUI ES NECESARIO PONER AL PIE DE PAGINA UNA NOTA EXPLICANDO LO QUE ES SACERDOTE....
8El sacerdote tenia que revisar al enfermo para ver si habia sanado, y luego le permitia estar otra vez entre la gente.

Capítulo 2

Jesus aptaqmelquescaiam lhema enenlhet metca aptapno'oc
1 2 Mo'oc acnem na ntemac, Jesus apuectamo mocjom natemma Cafarnaum. Apquellengai'ac nac enenlhet'awoc ma'a apnema Jesus Simon apnemacja, colhuawec anquec nac apquelanweiacmoc ma'a, ca apquetlhecmoscamo lhnac ania'a actacmanma aniem'o Engiapom Neten. 3 Ca acpelapquescamo lhnac apquelluai'a cuatro enenlhet ma'a, apquetsoiacmo lhnac metca aptapno'oc aquieplomo aptanema m'a. 4 Mamma lhnac elentalhnenwomoc, mang na ntec sonquec enenlhet ma'a. Apquelcanetquescamo lhnac neten pa'at, ca apqueljatsosaianco lhnac lhema iamet acpaijema m'a, apqueluaiwesentamo lhnac enenlhet ieplomo aptanema apnacja Jesus ma'a. 5 Ca apuetai'o lhnac Jesus metca apqueliasqueiam, lhna ptemac apcanemo enenlhet metca aptapno'oc: —¡Nne cmasqueso meijamolhma lheiap!—lhna aptemac 6 Apcacjaianquec nac na moclhem'a jengetlhecmoscama jenganemacja Moises ma'a, nquelpaqmeiasmec nac apualho'oc ma'a, lhna ntaiancoc ma'a: 7 —¡Mancolatsema aptacja nac apaioma, aptewasque nac Engiapom Neten apuesai'a, wanlha apuanquec emasquecsec nentemacja ncollatsecama m'a!— lhna antaiancoc alpacmetecama apualho'oc ma'a 8 Apiecpelquemawec noca Jesus actemacja alpacmetecama apualho'oc, lhna aptemac ma'a: —¿Se lha ntac alpacmetenca nac apualho'oc ncollatsecama quetlhengcap que, je? 9 Nwa', jeleltennes no ¿Se lha alhewai'a nquec antec anganac metca aptapno'oc anac que, je, antec anganac nnec masqueso meijamolhma lheiap, nlho ca la njan etnemecja neten, ema aptanema, eiepconquesama no elhong, selha alhiewai'a nquec que, je? 10 Colhua ngcotlheianwacjoc jata apualho'oc aquietnema apmopuana Enenlhet Apquetca nac cacpota enmasquesquesec meliamolhma enenlhet'awoc— Netamen Jesus ma'a lhna aptemac apcanemo enenlhet metca aptapno'oc anac: 11 —!Etnemecja neten lheiap, ema aptanema nac, etaqjecja ta pnemacja! —lhna ptemac Jesus apcanemo metca aptapno'oc. 12 Colhuawec anquec nac apquenmecjac neten, apmamo lhnac na aptanema, ca aplhengamo lhnac ma'a. Nquelpelapquescanquec nac apqueluetai'a enenlhet'awoc ma'a, nieplomawec nac na apqueltacnescasecamoc apuesai'a Engiapom Neten, lhna aptaiancoc: —¡Mangelluetai'ac ennenco'o ngcotnec acto nac jam! —lhnac aptaiancoc apquelpaqmeteianca m'a.
Jesus aplannecama Mateo cacpota etnec apieplecama
13 Netamen apmeiacjo lhnac mocjom Jesus necja sanga, apqueluecjec nac enenlhet'awoc apnacja m'a, ca apquetlhecmoscamo lhnac mocjom ania'a actacmanma' m'a. 14 Necsa aplhengama lhnac, apuetai'o lhnac Mateo m'a, Alfeo apquetca, apnenquec nac apmacmeianquelha apquenmamacja patacom impuesto apuesque co Roma apancoc, lhna aptemac apcanemo: —Noc, jeieplacja —lhna ptac apcano. Ca apquenmecjo lhnac neten Mateo m'a, apieplecjo lhnac Jesus ma'a, 15 apquenmeiacjo lhnac Mateo apnemacja m'a, aptaweicocjo lhnac na ma'a. Apcacjaianquec nac na m'a apquenmamo lhemec patacom impuesto ancoc, cacpota njan enenlhet meliamolhma, Jesus nac na m'a cacpota njan apqueltamesaicamoc. Aplhaniec nac na enenlhet apquelieplecja m'a. 16 Apquelluetai'ac nac na jengetlhecmoscama jenganemacja Moises cacpota njan fariseos 1 ma'a, ca apquelpaqmetquescaiacmo lhnac apqueltamesaicamoc ma'a, lhna aptaiancoc: —Mancolatsema aptacja nac Jesus, aptawocje nac lhemec apquenmaicamoc anac pataccom impuesto ancoc cacpota njan enenlhet meliamolhma— lhna aptaiancoc 17 Aplengai'awec nac Jesus ma'a, lhna ptemac: —Asua'ac co'o asquelquetansema enenlhet meliamolhma, mou'ac co m'a asquelquetansema enenlhet anac apquelleltammacpo na apancawec apqueliamolhma. Enenlhet metco la anmasca apiempeioc, mengiaimecpoc ponja ngiapom, coca enenlhet anac anmasca apiempeioc, apcaimecpe mota ponja ngiapom —lhna ptemac Jesus ma'a.
Apquetlhecmoscama Jesus actemacja nengaqjasquesammalhco mec
18 Apquellaqjasquesammacpec nac mec 2 apqueltemacja apancawec nac napaqte Engiapom Neten Juan apquellauquescama iemmen angiapom apquelieplecama m'a cacpota njan fariseos. Moc lhem'a enenlhet nac apquelioiacmoc apnacja Jesus, lhna' aptaiancoc apquellanemo m'a: —Juan apquelieplecama cacpota njan Fariseos apquellaqjasquesammacpec mota'a mec ¿Se lha ntac metnanco nac na apqueltamesaicamoc anac lheiap que, je?— 19 Ca apcatemmoianca lhnac Jesus ma'a, lhna aptemac: — Mellaqjasquesammacpoc mec ma'a apquellelto apquellanemmap aliemjapma' apno la mocjom apocquenammap 3 apiesecsec ma'a, 20 ncowomoc jatoca acnem nema aquiantemecjelha' apocquenammap anac, jato ca ellaqjasquesacpoc mec ma'a. 21 Mangcolatsema nentalhnema apjapac angellapama apjalhnancoc ietamopai'a, ncanec eiaqsec jata m'a aniem'o apjalhnancoc, ngcoiangwomoc jata apquelietepaicamoc ma'a nentalhnema apjapac lhec. 22 Mancolatsema angiatmoc vino alhnancoc iempejec lhennenga aquietnemacja la'a ncanec ngcopaclhec jata aniem'o aliaclheiam vino alhnancoc ma'a, nentewasquec na vino cacpota njan iempejec. Coca ntasec angiatmoc vino alhnancoc iempejec alhnancoc najan—lhna ptemac apquetlhecmoscama Jesus apietquescama.
Apquelieplecama Jesus apquelaptema trigo apoctengoc acnem nennecjelha'
23 Acnem nennecjelha lhna ntemac, Jesus cacpota njan apqueltamesaicamoc apqueliecanweiacmo lhnac aniep, ca apnaclheianco lhnac trigo apactec ma'a cacpota etawancoc. 24 Apqueluetaianquec nac fariseos, lhna ptaiancoc: —¡Se lha ntac apnaclhenco nac trigo apactec, mancoltemac jenganemacja Moises anmacmama' acnem nennecjelha'!—lhna aptaiancoc 25 Ca apquellatemmoianca lhnac Jesus ma'a, lhna aptemac: —Apquelietsateianquec niecje quetlhengcap waccajac, aptemo lhnac na nec David, mec nac ncaqjemac cacpota njan apquetlhelhma'ac. 26 Abiatar nac apuesque apanco'oc sacerdotes, aptalhnemo lhnac David Engiapom Neten apnemacja m'a, ca aptaseiacmo' lhnac pan Engiapom Neten nema acpecquencasecama, ca apquellaianco lhnac na apquetlhelhma'ac ma'a. Wanlha lhnac niecje aptecamoc sacerdote m'a. 27 Ca ncanec atnec allanac quetlhengcap ma'a, acnem nennecjelha acto altaqmelquescama enenlhet'awoc, jawe acmajai'a nconnactewacsec. 28 Enenlhet Apquetca nac nietnec apmopuana cacpota etnec apmac'acja la elanac acnem sabado nennecjelha nac—lhna ptemac Jesus ma'a.

1Fariseos: estudiaban mucho la ley de Moises, no se juntaban con los que no eran judios, creian en la resurreccion y en los angeles
2Ayuno: privarse de alimentos por un tiempo para buscar a Dios
3Jesus es el novio y los discipulos son los invitados.

Capítulo 3

Jesus aptacmelquescaiam enenlhet acmasca apiempec acnem nennecjelha'
1 Aptalhnenwecjec nac mocjom Jesus apcacnecjelha judios, apnenquec nac na lhema enenlhet aquiaqsecja' apmec ma'a. 2 Nnenquec nac aliascamo Jesus ma'a cacpota ncolhec acuetanco aptaqmelquescaiam enenlhet anac, cacpota elhenacpoc apmacmecama' acnem nennecjelha', apiecai'a njan jenganemacja Moises 3 Lhna ptemac Jesus apcanemo acmasca apiempec: —Etnemecja neten, etnenwatamo jalep, aisecsec anac— lhna aptemac 4 Netamen apquelelmalhneianca lhnac enenlhet'awoc, lhna aptemac: —¿Nqueltemenque nlho jenganemacja Moises angellanac caselha altacmelo, nlho ca la ncolatsecama, je? ¿Nqueltemenque nlho njan jenganemacja Moises anwonquesec tep, nlho ca la njan manwonquesec tep acnem nennecjelha la sabado, je?—lhna aptemac Apqueluanmonconquec noca enenlhet, man noca nconmajai'ac ellatemmoma m'a. 5 Nnatjescanquec nac Jesus, aiosec na ntemac apualhoc apuetai'o aliennactema apualho'oc enenlhet'awoc ma'a, lhna ptemac apcanemo enenlhet aquiaqsecja apmec ma'a: —¡Epeiwesecja' no apmec!— lhna aptemac Apcasecjai'awec nac, ca actacmelecjo lhnac apmec ma'a. 6 Ca apquelenteiapmo lhnac nemacnecjelha Fariseos
Apquelieplecja enelhet'awoc Jesus neiawa' sanga
7 8 Apmeiecjo' lhnac Jesus cacpota njan apqueltamesaicamoc neiawa' sanga, apquelieplecjec nac na enenlhet'awoc ncanec apquelliamawec nac aptemacja Jesus nlhaniec na mota caselha' apquelanai'a m'a. Lhnac apquelleniem'ac iocjalhma Galilea, Judea, na temma Jerusalen, Idumea, actepacja acnem aquieto aluata' Jordan, iocjalhma Tiro, cacpota njan Sidon. 9 10 Ca apqueltemo lhnac Jesus elpenescaso' lhema lomma nemmen cacpota engianantec, cacpota meliaqjapemmec enenlhet'awoc ma'a, ncanec aplhaniec nac anmasca apiempeioc apquelleltemo enmanwomoc, apquellengai'ac na sonque apqueltaqmelquescaiam enenlhet ma'a. 11 Necsa aluetai'a lhnac queliacjameio' Jesus, mpallesacmec nac nalhepop enenlhet apmanie', nquelpaijecama lhnac atno'oc ma'a, lhna antaiancoc: —Engiapom Neten apquetca lheiap —lhna ntaiangcoc ma'a. 12 Ca apqueltemo lhnac ncolluanmac Jesus ma'a, apqueltemawec nac na mangcotlhenec apuesai'a m'a.
Jesus apqueliequiescama 12 apqueltamesaicamoc
13 Netamen Jesus apcanetuacjo lhnac neten metaimong acjema, apquelieplecjec nac na enenlhet ma'a, ca apqueliequieso lhnac na enenlhet acleclelha' la' apualhoc, 14 apuacmo 12 cacpota etnec apqueltamesaicamoc, cacpota njan eleltennasancoc enenlhet ania'a actacmanma' alhma nquec jam. 15 Ca apquellanco lhnac na apquenmopuanca'a cacpota ellammelhec qasecapoc. 16 Ca apqueluesai'a lhnac jenque'e 12 apqueltamesaicamoc. Simon, aptemesquesecjo lhnac apuesai'a Pedro 17 Santiago cacpota njan apialheng Juan, Zebedeo apquetcac, apqueltemescasecjo lhnac apqueluesai'a Boanerges, nema altema apquelhtengioma' atcac. 18 Andres, cacpota njan Felipe, Bartolome, Mateo,Tomas, Santiago Alfeo apquetca, Tadeo, Simon apto lhna mota apcammelhma apuesque co Roma 1 19 cacpota njan Judas Iscariote, apselhnanoncomo lhnac Jesus cacpota ematong.
Ncolatsecama aplhenammap Jesus
20 Aptalhnenwecjec nac Jesus lhema pa'at, ca apcanuei'o lhnac na enenlhet'awoc apentalhnema m'a, man nac nconmopuanca'ac eltawocja Jesus cacpota njan apqueltamesaicamoc ma'a. 21 Allengai'o lhnac ania'a apquennemolhema apanquec Jesus ma'a, aleltaianco lhnac malha anema m'a, ca anmeiecjo lhnac apnacja cacpota ncolaqlosenwacjac ma'a. 22 Apcacjaianquec nac na moc lhem'a jengetlhecmoscama jenganemacja Moises ma'a apquelleniem'o Jerusalen, apquelmalengiosemmacpec nac ma'a: —Amjama amanie queliacjameio' acuesai'a nac Beelzebu aicamoc apmopuana Jesus cacpota engiapuanac elentepquesec queliacjameio' altemo lheme nac ma'a—lhna aptaiancoc. 23 Ca apqueltemo lhnac Jesus eltetescac jengetlhecmoscama jenganemacja Moises, ca apqueleltennaseianca lhnac na lhema apietquescama, lhna aptemac: — Mangconnapalhquec Satanas altemo lhemec la'a. 24 Ca acto nac na lhema iocjalhma la'a apquennapecpo la apancawec ma'a, enactewasacpoc jata apancawec ma'a. 25 Ca ctonac na m'a apquennemolhema apanque nac apquetcac apquennapecpo la apancawec ma'a, enactewasacpoc jata njan apancawec ma'a. 26 Nnawec na m'a Satanas annapelhco la m'a altemo lhemec, nconactewasalhcoc jata nja ncawec ma'a, ncomascoc jata njan acnema acmowana m'a. 27 ¿Se lha enenlhet mannemo la apiennactema ie cacpota eclhec apnemacja enenlhet na apiennactema emenielhquesec caselha apancoc? Wanlha coca enenlhet aquietno la neten apanquec apiennactema, apuanquec secjec elpelhquetec ma'a cacpota enmenielhquesec caselha apancoc. 28 Eltaqmelcaso no apquellailhemo, Engiapom Neten jata emasquecsec lhamacjo caselha ncollatsecama apquellanai'a quetlhencap, cacpota njan apquelpacmetecama ncollatsecama enenlhet'awoc, 29 coca Engiapom Neten mengiamelecjec apqueltaicamoc la enenlhet ncolatsecama Engiapom Neten Apualhoc, ca jeng enenlhet anac ncotnec jata apselhnanemmap metca nnelha' 30 —lhna ptemac Jesus ma'a lhna sonquec fariseo apqueleltaianco lhnac queliacjameio' 2 acmaicama Jesus. 31 Necsa apqueltennaicama lhnac Jesus ma'a, acuecjo lhna nquen cacpota njan apquelialheng'a apnacja m'a, aptec pa'at nac nquelannuai'ac ma'a, allelto lhnac ncolhec altennascacjo' Jesus ma'a cacpota engielhiemoc secje'. 32 Apuacjeiawec nac apcacjaicamoc enenlhet apnacja Jesus ma'a, ca apqueleltennascamo lhnac, lhna aptaiancoc: 33 34 Apquellanei'awec nac necsa apcacjaicamoc enenlhet'awoc Jesus ma'a, lhna ptemac apquellanemo: —¡Tocja la co'o malha meme nqueluana'ac anac acjanco nac jenque'e, cacpota njan elialheng'a enenlhet anac! 35 Enenlhet apto apcasecjai'o Engiapom Neten cacpota njan nqueluana'ac, coca elialheng'a m'a cacpota njan meme' —lhna ptemac Jesus apquellanemo.

1Simon peleaba en contra de las autoridades extranjeras que dominaban a su pueblo
2Espiritu impuro

Capítulo 4

Nema aquietquescama aniep angiapom
1 Apquetlhecmoso lhnac Jesus mocjom aquieto necja sanga, ca apquelluai'o lhnac enenlhet'awoc ma'a apquelleltemo ellailhoc ania'a actacmanma', lhna ncanec engianantec Jesus lomma nemmen, ca apnacmo lhnac ma'a, coca necja iemmen nac apquelacnaicama enenlhet'awoc ma'a. 2 Ca apquetlhecmoscamo lhnac ma'a nquescama caselha apietquescama: 3 — ¡Eltaqmelcaso no apquellailhemo! Apquelhaicama lhnac actec lhema enenlhet apcanmo m'a, 4 moc lhem'a actec nac mpallueiacmoc tacjalhet amai, ca aluai'o lhnac anata tco'oc, actaweianco' njan ma'a. 5 Mo'oc actec nac mpallueiacmoc alhiewac'acja lhepop tacjalhet metaimong, colhuawec anquec nac nteiapmac niecje' m'a ncanec aselhtec nac lhepop actec mang nac na ncaptonnec ma'a. 6 Ca acteiapmo lhnac acnem, aliemai'o m'a, aletsepo njan anammalhca ncanec mamma aicapmen'oc. 7 Mo'oc actec na mpallueiacmoc tacjalhet meneuque actec acnaicamoc conne lhepop, ca actengamo lhnac lheme meneuque m'a, nquelapecjec nac anammalhca, lhna sonquec mancoilhec ma'a. 8 Coca mo'oc actec nac na mpallueiacmoc actacmelacja lhepop, ntasec anquec nac actecteiapma' m'a, lhema apuatjetma apactec na nwaiacmoc 30 apactec, po'oc nac na 60 apactec, cacpota njan 100 apactec ma'a. 9 ¡Ellanjo no quetlhengcap, ncaimelhquec eltacmelcasoc apquellailhemo asietquescama nac! —lhna aptemac apquellanemo Jesus ma'a. 10 Ca apqueltaqjecjo lhnac enenlhet'awoc ma'a, ca apquelelmalhnenca lhnac apquelleltemo elpeiwescasecjac actemacja apietquescama lhquec, ncanec man nac eliamoc ma'a. 11 Apquellatemmoicama lhnac Jesus: —Nnec allanco elianwomjoc quetlhengcap caselha aquielhammalhca aptemacja Engiapom Neten, pero a los de afuera..... 12
Esto esta escrito en Isaias 6: 9-10 Apqueluet'a niecje', coca malha meluet'o, apquelleng'a niecje njan, malha coca melleng'o aptancoc. melianweiacmoc, mellanocjec apualho'oc ma'a cacpota njan mancolhec anmacjo tacja m'a. 13 Melieje' quetlhengcap astacja lhquec asietquescama ¿Co la ncotnec elliojoc mo'oc asietquescama ta? 14 Ca enenlhet lhec apcanma actec, aquietquesammalhca apqueltennaicama ania'a actacmanma aniem'o Engiapom Neten. 15 Moc lhem'a enenlhet apquellailhemo ania'a, colhuawec anquec na nwa'ac queliacjameio', ca acmenielhcaso' ania'a lhquec apquellailhemo. Ca jeng enenlhet anac, malha amai acpalueiam actec. 16 17 Apcacjanquec enenlhet apquellailhemo ania'a, nquelpaijacjec na apualho'oc aniem'o ania'a nac, colhuawec apmac tacja ania'a, ca acpecjenca njan apualhoc, coca colhuawec anquec na nwa'ac aquientalhnema apnema aniem'o enenlhet, ca apiengiacjo apieploma Engiapom Neten ncanec mancoluaiacmoc conne aicapmen'oc. Ca enenlhet anac, malha aniep lhepop tacjalhet metaimong. 18 19 Napocja enenlhet apquellailhawe niecje' ania'a actacmanma', wanlha atlheianma mota apualho'oc patacom, cacpota njan apquelleltemo ncoitec nquescama caselha apanco'oc, ca ncanec eluancamancoc ania'a nac. Mamma apquellanai'a caselha actacmanma. Ca jeng enenlhet anac malha aniep nquescama meneuque. 20 Po'oc na enenlhet apquellailhawec ania'a, apmec na tacja', ca apquellan'o njan caselha actacmanma. Napocja' enenlhet, iamaclhamacma caselha actacmanma apquellan'ac, po'oc enenlhet coca nlhanie caselha actacmanma apquelanai'a, cacpota njan po'oc enenlhet nlhaniec anque actacmanma apquellanai'a. Ca jeng, enenlhet anac apietquesammap malha aniep lhepop actacmanma' —lhna ptac apquelpeiwescasacjo apietquescama Jesus.
Apietquescama Jesus talha alhancoc
21 Apquetlhecmosquec nac mocjom Jesus apietquescama, lhna ptemac: —Nengapommatcasquec jata nque' talha alhancoc, ¿enwanque i'e ampecquenec coneng asota', nlho ca la coneng nengietnemacja' la'a? !Mma'! Neten nelhanmac ma'a, cacpota ncotsacse lhma', 22 cacpota lhamacjo caselha acnaicamoc anac ienaqtesa lhma', ncoluetalhca ta, cacpota njan lhamacjo alposemmalhca 23 nac caselha, ncolhnanconwatac jata alhnacjojo. 24 Apqueltaqmelcasawec jata nquec apquellailhemo asquetlhecmoscama nac, netamen Engiapom Neten jata engiancoc mocjom tep anquec apquelianweiacmojo, 25 coca meltaqmelcaso la apquellailhemo enenlhet, ngcolhec jata aljatsosquescactamo atquetsec la apquelianweiacmojo—
Apietquescama Jesus acuanecamoc actec
26 —Aptaiecja apuesque Engiapom Neten actacmelquescamo acuanecamoc apualho'oc enenlhet'awoc, malha niecje ctonac actec anac 27 apquenacjo la'a, netamen etianuacjac pelhasep, coca actec lhec nwanenie', apquenmacjec jata nque neten sosecje', coca actec lhec nwenque panque' acuanecamoc nlhepquennenga, coca enenlhet meijo' actemacja acuanecamoc ma'a. 28 Lhepop actepquescama nque' nenganma', amanie' ncotiepoc alhcapoc, netamen alhuasecsec cacpota njan mocjom aquielhna. 29 Netamen nwacmec jata nque' acmocjetmacja' aquielhna, colhuawec jata nconaclhalhca' —lhna ptemac Jesus ma'a.
Apietquescama Jesus aicaja actec
30 —¿Se lha alietquesammalhco Engiapom Neten apmopuana ie? 31 Malha aicaja 1 nac actec, quetsec anquec, mang colhnoc mo'oc iamet actec, 32 ntepque, nwanenie', nqueliecanwacjec actemo lhemec iamet, nquelpaijenwacmec actengoc, cacpota ncolpaclhenec na anata tco'oc ma'a, cacpota njan ncolielhanenwomoc pesquesca ancoc— 33 Lhnac aptemac Jesus aplheianmo Engiapom Neten apmopuana, nlhaniec anquec nac actemacja apietquescama', cacpota elianwomjoc enenlhet'awoc. 34 Wanlha lhnac aplheianmo' mota apietquescama napactawec enenlhet'awoc, lhnoca apcacjanco la lheme apqueltamesaicamoc, elpeiwescasecjac nac aquietemo nque' actemacja apietquescama.
Apmasquescama Jesus alhcaiam iemmen aquiennactema
35 Pelhasep na ntemac apnemacja Jesus au'alhoc lomma nemmen, lhna ptemac apquellanemo apqueltamesaicamoc: —Noc, angeljalhtepelhquetec sanga' nac —lhna aptemac 36 Ca apqueliengiacjo lhnac enenlhet'awoc ma'a, ca apquetlhengo. Napocja enenlhet nac na apquelcanantemac mo'oc lomma nemmen ma'a. 37 Mpelapquescanquec nac acteiapmo' alhcaiam iemmen aquiennactema m'a, ntalhnenquec nac au'alhoc loma nemmen, iemmen alacjaiam, ncaicama lhnac aclanai'a m'a. 38 Apteianmec noca Jesus conne loma nemmen tacjalhet apteianmecamoc. Colhuawec anquec nac apnaclhatecjasquecjac apqueltamesaicamoc ma'a, lhna aptaiancoc: —¡Jengetlhecmoscama, mamma apquelan'o lheiap, nemmac'ac angeluaiwancoc! —lhna aptaiancoc ma'a. 39 Netamen Jesus apquenmecjo lhnac neten ma'a, apnawescanquec nac alhcaiam iemmen cacpota njan sanga: —¡Coluanmecja'! ¡Wanlha cotnamoc! —lhna ptemac. Colhuawec nac mmascac alhcaiam iemmen, nqueluenacjec na lhma'. 40 Netamen na ptac apquellano apqueltamesaicamoc: —¿Sec la cto apquenmenanco nac que'? ¡Jeliascacmei'e mocjom quetlhengcap!— 41 Apquenmenaianquec nac apqueltamesaicamoc Jesus, ca apquelpacmeteianca lhnac ma'a: —¿Se lha enenlhet jenca ie'? Nwacjawe nac alhcaiam iemmen, cacpota njan sanga asecjai'o —lhna ptaiancoc ma'a.
Capítulo 5

Enenlhet acmaicama queliaqjameio iocjalhma Gerasa
1 Jesus cacpota njan apqueltamesaicamoc apqueliecai'o lhnac sanga Galilea, apqueluecjo lhnac jalep aquieto na temma acuesai'a Gerasa. 2 Nnaiangquec nac malhca'a m'a apquelcatonnammacpelha enenlhet, aplomaca lhnac lhema enenlhet queliaqjameio' acmaicama m'a. 3 Mamma nquec nac ngcopatjetec, ngcacjoc nac cadena. 4 Metca nnelha lhnac nema acnaqtetema apmancoc cacpota njan apmeioc, coca apquelietepquescanquec na mota' cadena, mamma ngque nac ngcomangcoc. 5 Apiaijecama lhnac acnem, pelhasep, aquieto acjaiam lhepop tacjalhet malhca'a, apuenecama lhna mota m'a, aptecpommacpec na mota apanquec metaimong aquiaquiema. 6 Apuetai'ac nac mocje enenlhet anac, Jesus apteiapei'o loma nemmen ma'a, ca apquetameianco lhnac ma'a, apquelteclhecuai'o lhnac aptapno'oc nalhepop apquenmanquelha Jesus. 7 8 —¡Coiengiecja jam enenlhet anac! —lhna ptemac Jesus apcano queliacjameio'. Ca acpaijeianca lhnac atong: —¡Mangjelanactes, Engiapom Neten apquetca lheiap, mangjetnesques asmapiose! —lhna ntemac queliacjameio'. 9 —¿Co la acuesai'a m'a? —lhna ptac Jesus apquenmalhnenca. —Co'o asuesai'a quempocjacme', nenlhanie pangque' ennenco'o, 10 coca asqueltawe' niecje' mangjengellapacsec mo'oc iocjalhma, 11 12 jengellapes coca angelentelhec ietapomac anac, apquellawa nac aquieto acjaiam lhepop —lhna nta aiancoc queliacjameio' ncanec nengaqtec nac aptoianquelha aptecamoc apentalhnema ietapomap. 13 Apcasecjawec nac Jesus ma'a, ngquelentepquec nac queliaqjameio' alentalhnenwacmo lhnac ietapomap, malha dos mil ietapomap nac ma'a, ca apquengiaianco lhnac apqueluaiwantamo aquieto sanga, apqueluaiwenco, ca apqueletsepo lhnac ma'a. 14 Netamen apquelto apquellanecama ietapomap, apqueletquecjo' lhnac na temma, cacpota njan na temma apquetco'oc, apqueletcaseicocjo lhnac ania'a m'a. Ca apquenmeiecjo lhnac enenlhet aquieto apnacja Jesus, cacpota eluetac acto jaweniapac anque actacja acuetammalhca. 15 Necsa apqueluecja lhnac ma'a, apqueluetai'o aptacmanueiam queliaqjameio' lhquec acmaicama, aptalhnecje' nac aptalhnema, apnecjec na apanque', aptacmelcasemmacpec nac ma'a. Apquellai'ac nac apqueluetai'o enenlhet, 16 ca apqueleltennaseianca lhnac mocjom ania'a m'a, actacja apqueluetai'a. 17 Netamen enenlhet apquelapaseianca lhnac Jesus, emjancoc mo'oc iocjalhma. 18 Ca apcanetuecjo lhnac Jesus loma nemmen, coca acmaicama lhquec queliaqjameio' apmajai'awec nac eieplacjac Jesus. 19 Coca Jesus lhna ptemac apcano: —Jawe', etaqjecja apnemacja lheiap, eleltennasamo ta apnemolhema cacpota njan enenlhet lhamacjo actemacja apasmoma Engiapom Neten— 20 Ca enenlhet anac apsaujomawec nac lhamacjo iocjalhma Decapolis 2 , apqueleltennaseianca ania'a actacja apasmoma Jesus. Alpelapquescamo lhnac apquellengai'a lhamacjo enenlhet ma'a.
Jairo apquetca, cacpota njan nqueluana acmanweiam Jesus apcaqlammap
21 Apuecjo lhnac mocjom Jesus loma nemmen apcanantema mo'oc necja sanga, apteiapuecjo lhnac necja nquec iemmen, ncanec aplhaniec nac enenlhet apquetlheiam ma'a. 22 Ca apuai'o lhnac na lhema apquemjama apmanie nemacnecjelha' apuesai'a Jairo apnacja Jesus, apquelpalenwai'o lhnac apquenmanquelha, lhna aptemac: 23 —Eietno neja'at, mmac'ac lhec ngcotsepoc eietca, noc, enenquen jata apmeioc tacjalhet, cacpota mangcotsepe', ngcoloca ta mocjom —lhna ptemac Jairo. 24 Ca apieplacjo lhnac Jesus ma'a, apquelieplecjec nac na enenlhet'awoc, nnengquec nac aquiaqjapeianco Jesus ma'a. 25 Nlomaca lhnac na m'a lhema nqueluana aquiawai'a ema ancoc, apiesecsec enenlhet'awoc, 12 iantelhcapa lhna ntemac aclengaianco, 26 awanjec na ntemac alhacjama pataccom actengiai'a actacmalueiam, apquellanei'awec nac niecje apquellanai'a po'oc, coca mang nac ngcotacmalueiacmoc ma'a, 27 apquelianwescaiacmec nac acmasca aiempec ma'a, nsaujomaquiec nac alhacjama anco'oc altemo ngcotacmelecja niecje. 28 Nlengai'ac nac aplhenammap Jesus ma'a, nlheianmec nac au'alhoc: —Wanlha amanwomoc apcaqlammap anac Jesus, atacmelecjac jata — lhna ntemac aclhenaicama au'alhoc ma'a. Ca acuetai'o lhnac Jesus ma'a, aliaiesanco lhnac apiesecsec enenlhet'awoc, actetescaiacmo' lhnac aquieto apcapoc, ca acmanweiacmo lhnac apcaqlammap ma'a. 29 Colhuawec nac mmasquemac aquiawai'a ema ancoc, nengaiangquec nac actacmelecjo acmasca aiempec ma'a. 30 Aplengaianquec nac Jesus acteiapmo apmopuana, ca apencammacpo lhnac ma'a, apquellan'o enenlhet'awoc, lhna aptemac apquellanemo: —¿Se lha jemanguo'o nac que? —lhna ptemac ma'a. 31 —Selhaja, apentelhec enenlhet anac —lhna ptaiangcoc ma'a. 32 Ca apquellan'o lhnac mocjom Jesus enenlhet'awoc, cacpota eijoc acto acmanweiam. 33 Ngquelpelhiennongquec noca ai'a nqueluana lhquec, ngcai'awec nac actemacja ca actetescaiacmo lhnac, ngqueltanentaniec nac atapno'oc nalhepop apquenmanquelha Jesus, ca altennascamo lhnac: — Co'o lhquec asmanwacmoc, ca astaqmelacjo nac —lhna ntemac 34 Netamen lhna aptemac apcanemo Jesus: —Mangcoi'asqueiam ngqueniem'ac lheia, actacmelacjo nac acmasca aiempejec, ntase ie' cotaqjecja ta— acuetai'a m'a, 35 Necsa apacmetquescama lhnac nqueluana Jesus, apqueluai'o lhnac enenlhet apquelleniem'o Jairo apnemacja, lhna aptaiancoc: —¡Jairo, ngcaqjoc emjancoc jengetlhecmoscama m'a, ngquetsepquec lhec apquetca'! —lhna ptaiangcoc ma'a. 36 Apleng'awec nac Jesus, lhnac aptac apcano Jairo: —! Meniaga', mei'asquem coca!— 37 Ca apmeiecjo lhnac Jesus Jairo apnemacja m'a, wanlha lhnac apqueltemo apquetlhelhma'ac Pedro, Santiago, cacpota njan Juan, Santiago apialheng, mangnac eltemoc ngcolhec alieplacjo m'a. 38 Necsa apqueluecja lhnac Jairo apnemacja, niapcalhenmalhquec nac ngquescama m'a. 39 Ca aptalhnemo lhnac Jesus au'alhoc pa'at, lhna ptemac apquellanemo: —¿Se lha ntac apqueliapcalho nac? Mangcotsepac nqueluana atcoc anac, nntenque' —lhna ptemac Jesus. 40 Apuannammacpec nac Jesus ma'a, ca apquelto lhnac ellentepoc lhamacjojo enenlhet ma'a, wanlha lhnac apqueltemo ngcacjoncocja ngcana'ac nqueluana atcoc anac, cacpota njan Pedro, Santiago cacpota njan Juan, ca apqueltetescaiacmo lhnac aquietnacja nqueluana atcoc, 41 ca apmamo lhnac amec Jesus, lhna aptemac apcanemo : —!Talita, cum¡— Nemaltema, lheia nqueluana tcoc, cotnemecja neten. 42 43 Colhuawec anquec nac ngquenmacjac neten nqueluana tcoc lhec, ca aclhengo lhnac na, 12 lhnac nguaiacmoc iantelhcapa ncoc ma'a, ca apqueltemo lhnac na ngcolhcac actoma m'a. Mpelapquescangquec nac apqueluetai'a enenlhet, apquelleltennascamawec noca Jesus, melletcasama ania'a nac actacja apqueluetai'a.

1En castellano dice semilla de mostaza
2Una region que tenia 10 aldeas

Capítulo 6

Apuecja Jesus apuanecanlha aquieto Nazaret
1 Apuecjec nac Jesus aquieto apuanecanlha, apquetlhelhma'ac nac apqueltamesaicamoc ma'a. 2 Sabado lhna ntemac, ca apquetlhecmoso lhnac Jesus nemacnecjelha, mang na ntec enenlhet'awoc apquellailhemo m'a, mpelapquescangquec nac apquellengai'a actemacja apquetlhecmoscama, lhna ptaiangcoc: —¿Co le lha aniem'acja lhamacjo actemacja jengetlhecmoscama nac? ¿Co la ampai'acja apianweiacmo na lhma? ¿Se lha aicamoc apmopuana elanac caselha monguetai'o? 3 ¡ ieee ! Neliawec ennenco'o jam, asota apquellanai'a, Maria atca m'a, ca apquelialhenga m'a Santiago, Jose, Judas cacpota njan Simon, ngquellomaca njan apquelialheng'a jengque'e, nellocja nac. Mongellapuangquec angeltemesquesec iocjalhmec ennenco'o actacja nac apaioma jam —lhnac aptaiancoc enenlhet'awoc. 4 Lhna ptemac apquellanemo Jesus: —Lhema secama ania'a Engiapom Neten apancoc la'a, ngcolhec jata ailhojo', ngcolhec jata njan amelacmo, ngcolhec jata njan acmo tacja lhamacjo iocjalhma', coca memacpec tacja aquieto apuanecanlha cacpota njan apaioma lhema —lhna ptemac. 5 Mang nac elanai'ac caselha monguetai'o m'a, wanlha lhnac apnencanmo apmeioc tacjaplhet moc lhem'a anmasca apiempeioc, ca apqueltaqmelquescaiacmo lhnac ma'a. 6 Niemascangquec nac apualhoc Jesus, lhna songquec apqueliasqueiacmo' enenlhet anac. Ngcatepelha' na temma lhnac aplomaca mota Jesus ma'a apquetlhecmoscamo enenlhet.
Apquelapascama Jesus apqueltamesaicamoc, eleltennacsec ania'a actacmanma aniem'o Engiapom Neten.
7 Ca apcanquesacjo lhnac Jesus 12 apqueltamesaicamoc, apquelapaso lhnac moc apcanet, apquellanco lhnac na apquenmopuana cacpota eliengiescasecjac queliacjameio'. 8 9 Lhna ptemac na apquellanemo: —Melletsacja ngquec aptecamoc necsa apquetlhengama, patacom, po'oc apquelentalhnema, wanlha ta elletsacjac apnactetopmanco'oc, cacpota njan iamet apquelteiasecamoc anac apmania ie'. 10 Jata apquellentalhno ta na temma, eniacjenwom jata m'a acuacmo apqueltaqjemo. 11 Mang jata ngquec enmacpoc tacja po'oc temma, cacpota njan mangco mac'ola ellailhoc apquetlhecmosecamoc, elpalhnelhcama ta lhepop actec apmanco'oc 1 napaqtawec apqueltacnoncoma m'a, netamen eltaqjo ta m'a —lhna ptemac Jesus apqueleltennascamo apqueltamesaicamoc. 12 Ca apquetlhecmoscacjo lhnac enenlhet'awoc eliengiecja' apqueltemacja ngcollatsecama', cacpota elietasquesecjoc mocjom apualho'oc Engiapom Neten, 13 cacpota njan eliengiescasecjac na lhamacjo actemacja queliacjameio', ca apqueliancanmo' lhnac quetsec na panactema aimenec apietsecso'oc enenlhet anmasca apiempeioc, ca apqueltacmalueiacmo lhnac ma'a.
Apquetsepma' Juan apquellauquescama iemmen na niapom
14 Netamen apleng'o lhnac na Herodes ania'a aplhenammap Jesus, lhamacjo actemacja caselha apquellanai'a. Moc lhem'a enenlhet nac aptaiancoc apquelpaqmeiasma: —Juan apquellauquescama iemmen na angiapom ma'a, aptacjec apjalhnancoc apiesecsec apquenmasquenwaiacmo m'a, ca ncanec ngcolhec apmopuana'— 15 Coca po'oc enenlhet lhna ptemac: —Jawe Juan ma'a, Elias secama ania'a nnenga m'a. —Jawe Elias ma'a, po'oc secama ania'a nnenga quelhaja' —lhna ptemac na po'oc enenlhet. 16 Coca lhna ptemac Herodes: —Juan ma'a, ca squeltemo nac ngcolhec aquiaqtemeno apiaspoc, aptacjec mocjom apjalhnancoc piesecsec apquenmasquenwaiacmo m'a— 17 Lhna ntemac ania'a m'a, necsa aptema apquemjama apmanie' Herodes, apmecjo lhnac Herodias, apialheng Felipe lhnac aptawa m'a, 18 ca apiascamo lhnac apatong Juan apquellauquescama iemmen na niapom ma'a, lhna aptemac: —¡ Mangeltammalhcac antec aptemacja nac ! —lhna ptemac ma'a. 19 Ca aclomo' lhnac ma'a Herodias, mmajai'awec nac ngqacjec Juan, coca apquemjama apmanie' Herodes wanlha lhnac apmajai'o engiaqlhenquesec nenmammalhquelha'. 20 Apcai'awec nac Herodes Juan aptaqmelquescamawec nac ma'a, lhna ncanec apiamawec nac apto enenlhet apeiwomo, apiamolhma', wanlha lhna mota apcailhemo apqueltennaicama, lhna nquenniem'ac eniac Herodes ma'a. 21 Lhema acnem na ntemac, Herodes apquelanei'o aquiawai'a actacmelaicama lhma', acnem apteiaianlha', apquellanemo lhnac elpasenwa'ac apqueluescaie', soldados, cacpota njan enenlhet nema apqueletsecama iocjalhma apquelleniem'o Galilea. Ca aclheianmo lhnac au'alhoc Herodias: 22 —Nietawec anque nac anwaqjec Juan —lhna ntema au'alhoc ma'a. 23 Necsa aptaweicocja' lhnac, actalhnenwo'o Herodias atca, ca alanco'o lhnac napaqtawec enenlhet. Ngquelleclemawec anquec nac apualho'oc, lhna ptemac apcanemo Herodes nqueluana atcoc anac: —Jenmalhnama no actengiacja la'a anwanco ta, jawe aquiecanweiacmo, wanlha ta acuacmo necja ejenco'oc anac —lhna ptemac Herodes. 24 Colhuawec anquec na ntepac nqueluana tcoc, acmeiacjo acnacja ngquen, lhna ntemac: —Me ¿Se lha caselha anmalhnama Herodes que? —lhna ntemac anemo ngquen. —Congiacja', conmalhnama ta Juan apqatec, ngcoltota ngcolhec aclhencasqueso' apjac — lhna ntema ngquen ma'a. 25 Colhuawec anquec na ntemac ma'a actacja lhquec acpaioma ngquen 26 Aiosec anquec na ntemac apualhoc Herodes, aplengai'o acpaioma nqueluana tcoc anac, coca apenescanquec nac apaioma, mang nac ngcomajai'ac eienenquesec napactawec enenlhet'awoc ma'a. 27 28 Ca apcapaso lhnac lhema soldado aquieto nengaqlhengcasemmalhquelha', cacpota eiaqtemanuacjac apiaspoc Juan, cacpota epecquenec na lhema apjac, apcanconwecjo lhnac nqueluana tcoc. Netamen anconwacjo lhnac ngquen ma'a. 29 Netamen apquellengai'o lhnac ania'a Juan apqueltamesaicamoc ma'a, ca apquenmeiecjo lhnac eluacjac Juan apjapac cacpota elcatonnec ma'a.
Jesus apquellaicamoc aptecamoc enelhet'awoc
30 Netamen apquetlhecmosecamoc enenlhet'awoc, apqueluactamo lhnac mocjom apnacja Jesus apqueltamesaicamoc apquelapascama 2 lhta, apqueleltennasenca lhnac lhamacjo actemacja caselha apquellanai'a. 31 Mang na ntec enenlhet apquelquetansema Jesus m'a, mamma lhnac apqueliamposammacpelha', apquenmajai'ac nac niecje eltawocjac ma'a. Lhna ncanec etnec Jesus: —Noc, metquelha aquiennoma lhma' la'a, cacpota angeliamposalhcac ma'a— 32 Apquenmeiecjec nac ma'a, apquelcanantemo lhnac lhema lomma nemmen, 33 coca apquelliamawec nac enenlhet'awoc apmac'acja emjancoc Jesus, ca apquenmeiecjo lhnac apqueletquecjo' apmeiacjelha, apmania ie' lhnac apqueluecjac ma'a. 34 Ca apteiapuacmo lhnac Jesus loma nemmen, apuet'o lhnac apentalhnema enenlhet, apquelietnawec nac napaqta'a, lhna songquec enenlhet malha nepquesec metca allanecamaja. Ca apquetlhecmoscamo lhnac lhamacjo aptemacja caselha actacmanma. 35 Ienaqtescanquec nac ma'a, lhna ptaiangcoc apqueltamesaicamoc: —Jesus, ienaqtesque', mamma temma ngque'e. 36 Eltennasamoc enenlhet anac, enmeiacja ta, eltengiancoc aptecamoc, ngcatepelha la natemma cacpota njan natemma apquetco'oc —lhna aptaiancoc ma'a. 37 —Ma', ellamoc quetlhengcap aptecamoc enenlhet anac —lhna ptemac Jesus ma'a —Jawe', mangapuanquec angenmoc pan, mamma patacom ennenco'o, apentelhec enenlhet anac, ngquescama patacom ngcaimelhca —lhna ptaiangcoc apqueltamesaicamoc ma'a. 38 Lhna ptemac mocjom Jesus apquellanemo: —¿Se lha pan apnanco quetlhengcap que?— —Wanlha 5 pan cacpota njan janet quelasma mmocjetec —lhna aptaiancoc ma'a. 39 Ca apquelapascamo lhnac apqueltamesaicamoc, ellanesquesec apcacjaicamoc enenlhet tacjalhet pa'at alielsellemo', 40 acuacmo apasmecja apcacjaicamoc 50 cacpota nja 100. Ntemengquec nac ma'a. 41 Netamen apmo lhnac Jesus 5 pan cacpota njan janet quelasma mmocjetec, apcammelho lhnac neten, apto lhnac gracias Engiapom Neten ma'a. Netamen apiapto lhnac pan Jesus cacpota njan quelasma mmocjetec, apquellanco lhnac apqueltamesaicamoc cacpota ennascancoc ma'a. 42 Aptoianquec nac ma'a acuacmo apqueliaqcanacmo' enenlhet anac. 43 Ca apqueliaqjecjo lhnac 12 iama posac alaimommalhca, 44 tep 5000 enenlhet nac aptoiancoc aptecamoc ma'a.
Jesus aplhengama tacjalhet iemmen
45 Netamen apqueltemo lhnac Jesus elcanetuacja apqueltamesaicamoc loma nemmen cacpota eljalhtepelhquetec sanga, eluacjoc natemma Betsaida. Apnecjec noca Jesus ma'a necja sanga cacpota elpaiwesancoc enenlhet'awoc ma'a. 46 Ca apmeiecjo lhnac Jesus neten metaimong aqjema m'a, cacpota epacmetquesec Engiapom Neten ma'a. 47 Pelhasep na ntemac ma'a, acuaiacmo lhnac aisecsec anque sanga loma nemmen, coca Jesus aplomaca lhnac mocjom aquieto metaimong aqjema. 48 Apuetai'ac nac Jesus aquientalhnema apqueliaqjapecamoc loma nemmen ma'a, alhcaiam aquiennactema lhna songquec ma'a. Ca acmopacmo lhna lhma atsai'a, apmeiacjo lhnac Jesus, aplheng'o tacjalhet iemmen, 49 quetsec nac apiecai'ac apquetlhengacja apqueltamesaicamoc, ca apqueluetai'o lhnac nema aclheiam tacjalhet iemmen ma'a, apquennelhtenganquec nac neten, alpaijeianca lhnac na apatno'oc ma'a, enjangoc nac apquellanemac. 50 Coca lhna ptemac Jesus: —Mangjellaga', co'o jengque'e —lhna ptemac ma'a. 51 Ca apcananto lhnac Jesus loma nemmen, mmasquec nac alhcaiam. Ngquelpelapquescangquec nac apqueluetai'a apqueltamesaicamoc ma'a, 52 mang nac elianweiacmoc mocjom, apqueluetai'ac na niecje' aplhamesecjo lhnac pan, mocjom noca aliennactema apualho'oc. 53 Ca apquelluacmo lhnac iocjalhma Genesaret, ca apnacteto lhnac loma nemmen necja sanga. 54 Apqueluetai'ac nac enenlhet Jesus, 55 ca apqueletquecjo lhnac moclhem'a iocjalhma cacpota ellaclosenwacjac anmasca apiempeioc ma'a, netamen apquelletsecjo' lhnac ieplomo apqueltanema apua'acja Jesus ma'a. 56 Lhamacjo na temma cacpota njan apquellawacja aptalhnenuaianlha la Jesus, apnenquenaianco lhnac anmasca apiempeioc necja amai, apquelleltemo lhnac enmanuomoc quetsec anque' nepua'a apqaclammap Jesus. Netamen apquelto apquenmanueiam, nieplomawec na mota apqueltaqmanueiam ma'a.

1Cuando un mensajero o visitante no era recibido en algun lugar, se sacudia los pies para mostrar rechazo.
2Apostol: un enviado para hacer una tarea

Capítulo 7

1 Judios cacpota njan Fariseos, apquelieplauquescamo lhnac lhennenga apqueltemacja',apqueltaqmelquescamawec nac apquelieniesecamocb apmeio'oc, cacpota etawocjac ma'a,apquelleniacto la quelhacjama aptoma, apquellieniesaianquec nac na secjec aptecamoc cacpota njan nojaicoc, apjac, cacpota etawocja. 2 Lhema acnem na ntemac apqueliawei'o Jesus moc lhem'a Fariseos, cacpota njan jengetlhecmoscama jenganemacja 3 Moises apquelleniem'o Jerusalen, ca apqueluetai'o lhnac apqueltamesaicamoc Jesus ma'a, aptaweicocjo metca 4 apqueltacmelquescamo apquellieniesaicamoc apmeio'oc, lhna ptaiangcoc apquellanemo: 5 —!Se lha ntac apqueltamesaicamoc anac lheiap, meluaneiangco nac nentemacja lhennenga! Metca apqueltacmelquescamo apquelieniesaicamoc apmeio'oc anac aptawocja —lhna ptaiangcoc ma'a. 6 Apcatemmoicama lhnac Jesus ma'a: —¡Janet apualho'oc quetlhengcap! Jaweniapac anque apquetlheianmo lhnac nanec Isaias annenga quetlhengcap: «Apqueltaicama apanquec quetlhengcap jelleliejecjo, moc apatno'oc coca, taiepe coca aquietnacja apualho'oc, 7 ngcacjemawec jetlheianmo conne asnemacja, ncanec apquetlhecmosecamoc apanco'oc apancawec quetlhengcap» lhnac na nec aptemac Isaias annenga m'a— 8 Melieplauquescamac jenganemacja quetlhengcap aniem'o Engiapom Neten, wanlha apquellanai'a 9 mota jenganemacja apanco'oc apancawe', jawe ngiapac anque astacja nac. 10 Lhnac na nec aptemac Moises apquetlhecmoscamo: «Ellasecjo ta ngcana'ac, elleltacmelques jata njan, coca apqueliamenaicama la ngcana'ac, ematnecja ta enenlhet anac» lhna ptemac Moises. 11 Coca apquetlhemoseianquec mota quetlhengcap enenlhet, ntasec eltejec ellana ngcana'ac, ca aptancoc jeng: "Mangco mac'ac apasmoc, coca lhamacjo caselha asmac'o lhquec allancoc niecje meme, tata, anwanconwacjac jata colhuawe nac Engiapom Neten apnemacja" ca aptaiancoc quetlhencap ma'a. 12 Melpasmomac enenlhet ncana'ac colhuawe nac, aniem'o jenganemacja apanco'oc quetlhengcap. 13 Apqueltemesquesacjec coneng anque' jenganemacja aniem'o Engiapom Neten, coca apqueltemesquesacjec neten anque' jenganemacja apanco'oc apancawe, mantec na mo'oc caselha ngcollatsecama apquellanecamoc quetlhengcap — 14 Ca apquellaweianca lhnac Jesus enenlhet, lhna ptemac apquellano: —Jellailhonojo cacpota elianwomjo', 15 acto alentalhnema caselha apatong enenlhet, jawe acpaisenquescama apualho'oc, coca m'a, lhamacjo caselha nac ngcolatsecama alenteiapma apaioma apatong enenlhet, ca acpaisenquesquescama apualho'oc enenlhet ma'a— 16 17 16–17 Netamen apquelieniecjo lhnac Jesus enenlhet'awoc ma'a, ca aptalhnemo lhnac conne pa'at ma'a, ca apquelleltemo lhnac elpeiwescasecjac apqueltamesaicamoc actemacja apquetlhecmoscama. 18 Lhna ptemac Jesus apquellanemo m'a: — !Quetlhengcap na meliojoc mocjom! Apto la aptawecja enenlhet, jawe acpaisenquescama apualhoc, 19 coca nentoma nac mangcawanquec ngcoclhec enwalhoc, wanlha enwacmo', cacpota ngcotepecjac mocjom 20 Coca acto jawe niapac anque' alpaisenquescama apualho'oc enenlhet, lhamacjo caselha ngcollatsecama allenteiapma'. 21 Ca ctonac ma'a, atlheianma nac apualho'oc enenlhet ngcollatsecama, apquenmensanweiam alhma', apquenmenielhma', apcaqjema po'oc, 22 apiennenquescama aptawa, apuannaicamoc caselhaja, aptemacja ngcolatsecama, apmopuana ania'a, apiasponcomacja panque' ngcolatsecama, apnatjaicamaja', apmaicama ania'a, apcammacpojo', meijanweiacmo lhma. 23 Ca aclhamacjo caselha nac allenteiapma apualho'oc enenlhet, ca alpaisenquescama m'a napaqtec Engiapom Neten—
Ngqueluana mangcoi'asqueiam ncotno apaioma lhema Jesus.
24 Netamen Jesus apmeiecjo lhnac iocjalhma Tiro, aptalhnemo lhnac conne pa'at, apqueltemawec na niecje eielhacpoc cacpota meluetiec enenlhet'awoc, coca mang nac ngcomopuanac ma'a. 25 Nlomaca lhnac lhema nqueluana, nqueluana atcoc nac na atca m'a, queliacjameio lhnac actewascama. Acmeiacjo lhnac ngquen apnacja Jesus, alpolenwecjo lhnac aquieto apquenmanquelha, lhna ntemac anemo: —Jeiasecjonojo, eiengiescasecja queliacjameio' eietca —lhna ntemac ma'a. 26 Ca nqueluana nac ma'a, lhna nqueniem'ac iocjalhma acuesai'a Sirio Fenicia, mo'oc necja apquellawacja, jawe lhnac apaioma lhema Jesus ma'a. 27 Apcatemmoianca lhnac Jesus ma'a: —Ntasec ellancoc etawancoc apmania'ie judios apancawec, mangcolatsema aljatsoscasecja aptecamoc judios cacpota allanconwomoc po'oc enenlhet malha nac semjeng—lhna ptemac Jesus ma'a. 28 — Apuesque, jawe niapac aptacja nac lheiap, coca ntawengquec na semjeng acpalleiam alaimommalhca nentoma—lhna ntemac nqueluana m'a. 29 —Jai', awanje nac manjeiasqueiam lheia', cotacmelcaso ta actaqjecja acnemacja, nieniacjec queliacjameio' atca lheia' —lhna ptemac Jesus ma'a. 30 Ca actaqjacjo lhnac acnemacja', acuetanwacjo lhnac atca tacjalhet aquietnemacja m'a, nieniecjec nac queliacjameio, ntacmelecjec nac ma'a.
Jesus aptaqmelquescaiam lhema enenlhet metca apaico'oc, aquientalhnema apalhcoc eliatamaja
31 Apteiapmec nac mocjom Jesus iocjalhma Tiro, apiecai'o lhnac iocjalhma Sidon, apmeiecjo sanga Galilea, aquieto iocjalhma acuesai'a Decapolis. 32 Ca apqueliantemacmo lhnac lhema enenlhet metca apaico'oc, aquientalhnema apalhcoc eliatamaja', apqueleltemo lhnac enenquenec apmeioc tacjaplhet ma'a. 33 Ca apiantemo lhnac aplhepquennenga Jesus enenlhet anac, apquelatqueso lhnac apopjeioc conne' apaico'oc, ca apqueliasqueso lhnac na apiemmanong apopjeioc Jesus, apmanwacmo lhnac apalhcoc enenlhet anac. 34 Apcammelho lhnac neten, aptepcaso lhnac apcamnoma, lhna ptemac: —¡Efata!— Neltema, ¡Conmaijecja! 35 Colhuawec anque nac ngquenmaijecjac apaico'oc, actacmelacjo lhnac na apalhcoc, ca actacmelacjo njan apaioma. 36 Netamen apqueltennascamawec nac Jesus ma'a enenlhet anac meleltennasama ania'a nac. Coca enenlhet anac apianwescaiacmec nac ania'a. 37 Mpelapquescangquec nac apquellengai'a ania'a enenlhet'awoc ma'a, lhna aptaiancoc: —¡Ntasec anque' nac apquelanai'a, apqueltacmelcasacje nac enenlhet metca apaico'oc, cacpota njan metca apaioma! —lhna ptaiangcoc enenlhet'awoc ma'a.
Capítulo 8

Jesus apquellaicamoc aptecamoc enenlhet apentalhnema
1 Lhema acnem na ntemac apcaqnecjo enenlhet'awoc apnacja Jesus, mamma lhnac aptecamoc ma'a, ca apquellawenca lhnac apqueltamesaicamoc, lhna ptemac apquellanemo: 2 —Mamma aptecamoc enenlhet'awoc anac, asquelietnawec co'o napaqta'a, 3 acnem antac jelieplecamaja, 3 ca allapacsec apcacjaianquelha metca aptaweicocja, ngcollieijec quelha lhma amai, taiepec anquec apcacjaianquelha napocja —lhna ptemac Jesus. 4 Apquelatemmoicama lhnac apqueltamesaicamoc: —¿Co la angeluetanwomoc aptecamoc enenlhet'awoc anac? Mamma temma ngque'e— 5 Apquelelmalhnenca lhnac Jesus: —¿Se lha pan apnanco quetlhengcap que?— —Siete —lhna ptaiangcoc ma'a. 6 Netamen Jesus apquelto lhnac eniacjancoc nalhepop enenlhet'awoc, apquenmo lhnac 7 pan, ca apto gracias Engiapom Neten, ca apqueliapquesacjo, apquellanco lhnac apqueltamesaicamoc cacpota ellancoc enenlhet'awoc ma'a. 7 Nnaiangquec nac na moc lhem'a quelasma atco'oc mmocjetec, apto lhnac na mocjom gracias Engiapom Neten, ca apquellanco lhnac apqueltamesaicamoc cacpota ennascancoc mocjom ma'a. 8 Ca aptawenco lhnac acuacmo apqueliaqcanacmo, ca apquellanquesecjo' lhnac 7 iama posac alaimommalhca. 9 Malha lhnac 4000 enenlhet'awoc ma'a. Netamen ca apto acpaiwesquecja apquellanei'o enenlhet'awoc Jesus, ca apquelieniecjo' m'a. 10 Ca apcanetuacjo lhnac loma memmen, apqueltamesaicamoc nac apquetlhelhma'ac, apquenmeiacjo iocjalhma Dalmanuta, 11 apqueluecjec nac na Fariseos ma'a, apquellatemmomacpec nac Jesus. Ca apquelleltemo lhnac elanac caselha jempelapquescama, cacpota eltemesquesec iocjalhmec anque' apqueniem'o Engiapom Neten, apqueleltemo eliepconec nac Jesus ma'a. 12 Nnatjescanquec nac Jesus ma'a, lhna ptemac apquellanemo: —!Se lha ntac jellelmalhnenca nac alanac caselha jempelapquescama, momac'ac alana! —lhna ptemac Jesus ma'a. 13 Ca apquelieniacjo lhnac Jesus, apcanetuacjo lhnac mocjom loma nemmen, ca apquenmeiacjo mo'oc necja sanga. 14 Apqueleluancaiacmo lhnac apqueltamesaicamoc elletsacja aptecamoc, wanlha lhnac lhema pjapac pan. 15 Lhna ptemac Jesus apquellanemo: — Ellajo ta, eliecpetcanwomoc, ellecjojo aptaianquelha ngollatsecama Fariseos cacpota njan Herodes, ngcowanemoc quetsec apiepjaicamoc malha alena nac apiepjescama— 16 Ca atlheno lhnac apualho'oc apqueltamesaicamoc, lhna aptaiancoc: —Quelha aplhenac mangelletsantamo nac pan— 17 Apiamawec noca Jesus actacja aclheianma apualho'oc apqueltamesaicamoc, lhna ptemac apquellanemo: —Molhe nac co'o pan apanque' nac, meliejec quetlhengcap, malha metca apqatco'oc. 18 Apaqto'oc ca niecje' nnac quetlhengcap, malha metca apaqto'oc coca aptaiancoc. Apaico'oc na nnac niecje' quetlhengcap, mang coca ellengai'ac. 19 Cotlheianwacjo no apualho'oc asquennasectemo nac 5 pan, malha 5000 enenlhet'awoc. ¿Se lhta iama posac nentoma aclhatmommalhca aquiecanwacmo m'a ie?— Apquellatemmoicama lhnac apqueltamesaicamoc: —12 iama posac ca lhta ngqueliecanguacmoc ma'a— 20 Lhna ptemac mocjom Jesus: —Cacpota njan ngcotlheianguacjoc apualho'oc asquennasectemo nac siete pan, malha 4000 enenlhet'awoc ¿Se lhta nja iama posac nentoma aclhatmommalhca aquiecanwacmo m'a ie?— Apquelatemomma lhnac mocjom apqueltamesaicamoc: —Siete lhta— 21 Netamen lhna ptemac Jesus : —Meliojoc mocjom quetlhengcap—
Jesus aptaqmelquescaiam metca apaqto'oc
22 Netamen apqueluecjo lhnac na temma Betsaida, apqueliantemecjo lhnac metca apaqto'oc apnacja Jesus, apquelleltemo lhnac emanwomoc. 23 Ca apmo lhnac Jesus apmec metca apaqto'oc, aptepcaso lhnac na temma Betsaida, apiantemacjo mo'oc necja. Ca apto lhnac apiemmanong Jesus apaqto'oc enenlhet anac, apnenqueno lhnac na apmeioc tacjaplhet, ca apquenmalhnenca lhnac: —¿Apuetacje i'e lhma'? —lhna ptemac Jesus. 24 —Jai', asqueluet'a niecje' enenlhet apquetlhengo malha iamet coca aptancoc —lhna ptemac apcatemmoianca enenlhet anac. 25 Apnenqueno lhnac mocjom apmeioc Jesus tacjalhet apaqto'oc enenlhet anac, ca actacmelacjo lhnac, apqueluetai'a lhamacjo caselhaja. 26 Netamen Jesus lhna ptemac pcanemo: —Metaqjo nquec mocjom natemma lhquec—Lhna ptemac Jesus ma'a.
Pedro aplheianma Jesus apto Cristo
27 Jesus cacpota njan apqueltamesaicamoc apquenmeiecjo lhnac po'oc temma acuesai'a Cesarea aquieto Filipo, necsa apquetlhengama lhnac apquelelmalhneianca apqueltamesaicamoc: —¿Co la aptaianquelha jetlheianmo co'o enenlhet ma'a?— 28 Ca apquellatemmoianca lhnac ma'a: —Moc lhem'a enenlhet apquetlheianma lheiap Juan apquellauquescama iemmen na niapom, na pocja enenlhet apquetlheianma nja Elias secama ania'a nnenga, moc lhem'a njan apquetlheianma lheiap apto Engiapom Neten secama ania'a apancoc lhennenga— lhna aptaiancoc apquellatemoianca apqueltamesaicamoc. 29 —Quetlhengcap na ¿se lha co'o ie?— Ca apcatemmoianca lhnac Pedro m'a: —Cristo lheiap, aplheianmo lhnac nanec Engiapom Neten engiapacsec— lhna aptemac. 30 Netamen Jesus lhnac ptemac apquellanemo apqueltamesaicamoc: —Meleltennasama nquec enenlhet ania'a nac—
Aplheianma Jesus apquetsepma'
31 Netamen Jesus apqueleltennaseianco lhnac apqueltamesaicamoc acmac'acja ta ngcotnecjec: —Co'o, asto asqueniem'o neten astaiecjo Enenlhet apanque' 1 , awanje ta ngcotnec aslengaianco', jeltacnewac jata apquelemjama apmania ie', cacpota njan apquelemjama apmania ie' sacerdotes, jengetlhecmoscama jenganemacja Moises. Jellaqjec jata, 3 acnem jatoca ngcotnejec, Engiapom Neten jata jetnescasecjac mocjom ejalhnancoc apiesecsec apquenmasquenwaiacmo. 32 iocjalhmec anquec na ntemac actacja apaioma, ca apiantemo lhnac Pedro Jesus aplhepquennenga tep atquetse, lhna ptemac apcanemo: —Jawe', menianconquec ematong —lhna ptemac ma'a. 33 Coca Jesus lhnac aptemac apcanemo: —¡Manjelaptencasama lheiap Pedro, Satanas anmama lheiap! Nlhenama apualhoc aptemacja nac enenlhet apanque, meijoc apmac'acja etnec Engiapom Neten —lhna aptemac Jesus. 34 Ca apquellawenca lhnac apqueltamesaicamoc, cacpota njan enenlhet, lhnac aptemac apquellanemo: —Enenlhet alleio la apualho'oc etnejec jeieplecamaja, ngcaimelhquec metnec apmac'acja la etnejec, wanlha elanac acleclemelha la apualhoc Engiapom Neten, cacpota njan metca apcanmelhmo' niecje acuai'a aquientalhnema, cacpota njan enietsepoc quelhaja. 35 Enenlhet aclheianma la apualhoc apancoc apanque, mewongcasacpec jata tep, coca enenlhet apmama la tacja aquientalhnema aniem'o jeieplecama co'o, cacpota njan apmama tacja ania'a actacmanma, ewoncasacpoc jata tep enenlhet anac. 36 Aqjemo ta ngcotnec enenlhet anac aptengiaicama nquescama apquetsecama, mewongcasacpec jata tep ma'a. 37 Mangcapuanquec ei'anmonquesec patacom enenlhet cacpota ngcolhec acuoncaso tep. 38 ¡Ellailhono! Apqueluacjec jata nquec quetlhengcap napaqtawec enenlhet meliamolhma nac, menmancanquec jetlhenec co'o, apquenmancacquec jata ngquec jetlhenec, co'o asto asqueniem'o neten, astaiecjo Enenlhet apanque, amancac jata njan allanjoc co'o quetlhengcap asuactamo ta aquieplomo asmopuana jeiaicamoc tata, Enenlhet Neten jatoca asquetlhelhma'ac ma'a—

1Hijo del Hombre

Capítulo 9

1 —Jaweniapac anque moclhem'a enenlhet apquellawa nac jengque'e, eluetancoc jata acnem etnecjac apuesque Engiapom Neten, aquieplomo apmowana—
Apiengiewecja apiempec Jesus
2 Seis acnem na ntemac aquiecai'a m'a, apmeiecjo lhnac Jesus neten metaimong acjema, ca apqueliantemecjo lhnac Pedro, Santiago cacpota njan Juan. Ca apiengiewecjo' lhnac apiempec Jesus ma'a napaqtawec apquetlhelhma'ac. 3 Apmopai'a panquec nac aptaiecja aptalhnema, malha apqueliemmoma lhnac, mamma apno ietamopai'a apmopai'a, ngcacjoc nemalieniescama nac. 4 Ca acpelapquescamo lhnac apquelenteiapueio'o Elias cacpota njan Moises apquetsecama ania'a nnenga, Jesus nac apquelpacmetquescamac ma'a. 5 Lhna ptemac apcanemo Pedro Jesus: —Jengetlhecmoscama !Ntalhnawec anque nac jenque'e! Ennenco ta angellana janetolhem'a pa'at, lhema lheiap, mo'oc na Moises, cacpota nja Elias— 6 Lhnac aptemac Pedro, ngcane' apienwactenquec nac ma'a, nnawec nac na m'a apquetlhelhma'ac. 7 Ca acuai'o lhnac iepjopai'a pesquesca ancoc, apquellengai'o lhnac nema aliatecama aisecsec iepjopai'a, lhna ntemac: —Co'o eietca jam, awanje' ca nque ascamelaiam, ellasecjo ta njan quetlhengcap— 8 Colhuawe ca nque nac apquelletsepanei'ac Elias cacpota njan Moises apquetsecama ania'a nnenga lhquec, wanlha lhnac apcaimommacpo Jesus. 9 Necsa apquelenteiapma lhnac neten metaimong acjema, apqueleltennasawec nac Jesus metlhene' actacja apqueluetai'a, jato ca m'a acuacmo ta acnem aptemescasecja mocjom apjalhnancoc apiesecsec apquenmasquenwaiacmo mocjom Engiapom Neten Enenlhet apto apqueniem'o Neten aptaiecjo enenlhet apanque 1 . 10 Mang nac etlheianmac ma'a, apquelelmalhnemmacpawec nac moc apancawe': 11 Netamen apquelelmalhneianca lhnac Jesus ma'a: —¿Jawe nlho niapac apquetlheianmo nac jengetlhecmoscama jenganemacja Moises, ewac jata apmanie' Elias secama ania'a nnenga, cacpota ewac alhaie Cristo?— 12 13 Ca apquellatemmoicama lhnac Jesus ma'a, lhna aptemac: —Jai', apuai'ac 2 ma'a, cacpota epenesoc lhamacjo caselhaja, coca awanje lhta aptacnommap ma'a. Ntemengquec ma'a, ncanec nietnec actalhesammalhca waccajac Engiapom Neten apaioma. Cacpota njan nietnec actalhesammalhca Engiapom neten apaioma, awanjec jata ngcotnec aplengaianco enenlhet apqueniem'o neten aptaiecjo enenlhet apanque', etacnewacpoc jata njan—
Jesus aptaqmelquescaiam apquetcoc queliaqjameio' actewascama
14 Netamen Jesus cacpota njan apqueltamesaicamoc, apqueluecjo lhnac mocjom apquellocja napocja apqueltamesaicamoc ma'a, apquellatemmommacpo lhnac jengetlhecmoscama jenganemacja Moises, apuacjei'awe' nac enenlhet'awoc ma'a. 15 Netamen apqueluetai'o lhnac Jesus enenlhet'awoc ma'a, ngqueliemascangquec nac apualho'oc, apqueletcaianco lhnac apnacja, ca apquelpaiwesaianco lhnac ma'a: —Lheiap anac — —Jai' co'o —lhna ptemac Jesus. 16 Ca apquelelmalhnenca lhnac Jesus apqueltamesaicamoc: —¿Se lhque cto aie'?— 17 Ca apcatemmoianca lhnac lhema enenlhet ma'a: —Jengetlhecmoscama, asiantemantec lhec eietca, mangcoliatesquescamac mota queliaqjameio' jengque'e. 18 Necsa acuecta queliaqjameio', nieplawawe' mota aquiamasma nalhepop, ntepque mota njan aquiaqmopai'a apatong, apqueltaclhec na apmo'oc, ngquelliennactesema' mota njan apiempejec. Asqueltawec' lhec niecje eliengiescasecjac apqueltamesaicamoc anac lheiap, coca man lhe ngcollapuanca'ac —lhna aptemac ma'a. 19 Coca lhna ptemac Jesus apquellano enenlhet'awoc ma'a: —¡Apqueliasqueiam quetlhengcap, mellianguomje nac, sec jatelha acnem elianwomjoc quetlhengcap! ¡Eliantementa no apquetcoc anac jalep! — 20 Ca apqueliantementamo lhnac apnacja' Jesus apquetcoc anac, ca acuetai'o lhnac queliaqjameio' m'a, colhuawe ca nquec nac ntemescasecja' apquetsepaicama, apiaqneno lhnac nalhepop apquellelhpocjanca lhnac ma'a, actepcaso lhnac na aquiaqmopai'a apatong. 21 Ca apquenmalhnenca lhnac Jesus, apiapom apquetcoc anac: —¿Lhennenga nlho actema jeng?— —Jai', lhennega, aptemacja lhta nematca, 22 ntewasque mota'a, nieniauque mota natelh cacpota njan nemmen, acmajai'a ngcaqjec. ¡Epasem no eietca, aquietno la apmopuana, eietno no nengaqta'a ennenco'o! —lhna ptemac apiapom apquetcoc anac. 23 Netamen, lhna ptemac Jesus: —Ca actacja nac jenmalhnecama aquietnema asmopuana, enenlhet mei'ascacmo la Engiapom Neten, ngcoitec jata apmopuana m'a— 24 Ca apcatemmonca apiapom apquetcoc: —Quetsec anquec moiasqueiam Engiapom Neten, jepasem jata cacpota ngcoianguomoc moi'asqueiam —lhna ptemac. 25 Ca apuetai'o lhnac Jesus apmajai'a enianuac enenlhet'awoc ma'a, ca apcacjetanca lhnac apquelanei'o, lhna ptemac apcanemo queliaqjameio': —¡Coiengiecja jam apquetcoc anac, metca apaioma ntemesquescamac cacpota njan metca apaico'oc, moi'otamo ngquec mocjom!— 26 Mpaijema lhnac atong queliaqjameio', ca actemescasacjo lhnac mocjom apquetsepaicama, actepo lhnac ma'a. Malha apquetsepma lhna ntemesquescamac apquetcoc anac ma'a. —!Apquetsepque, apquetsepque! —lhnac aptaiancoc enenlhet'awoc ma'a. 27 Ca apmo lhnac Jesus apmec apquetcoc anac, apquenencasacjo lhnac neten. 28 Netamen Jesus aptalhno lhnac conne pa'at, ca apquelelmalhnenca lhnac apqueltamesaicamoc: —¿Se lha cto ennenco'o mangellapuanco nac angellentepquesec queliaqjameio' que'?— 29 Ca apcatemmoianca lhnac Jesus ma'a: —Coca jeng acto nac queliaqjameio' nac, wanlha apuanca'ac ellentepquesec aquietno la metca nnelha apquelpaqmetquescama Engiapom Neten apqueltengianco la nja apquelpasmoma quetlhengcap— lhna ptemac Jesus apquellanemo apqueltamesaicamoc.
Jesus aplhenecjo mocjom ematong enietsepoc
30 Jesus cacpota njan apqueltamesaicamoc apquenmeiacjo lhnac iocjalhma Galilea, mang nac eltemac ngconnalhca' ania'a, 31 wanlha lhnac apqueltemo mota etlhecmocsec apqueltamesaicamoc. Lhna ptemac apquellanemo Jesus: —Co'o, asto nac asqueniem'o neten astaiecjo Enenlhet apanque' amalhcac jata, jellaqje ta njan. Janetolhem'a acnem jatoca ngcotnec, jetnescasecjac mocjom ejalhnancoc Engiapom Neten apiesecsec apquenmasquenwaiacmo —lhna ptemac apquellanemo m'a. 32 Mang noca elianweiacmoc mocjom ma'a actacja apaioma Jesus, man nac elleltemoc elpeiwescasecja alhnacjo nquec Jesus ma'a, ncanec ngcowac jata anmaiosac'a apualho'oc.
Nempasmoma secjec emmo'oc cacpota antec nemjama emmanie'
33 Ca apquelluacjo lhnac na temma Capernaum, apquellentalhnemo lhnac conne pa'at, ca apquelelmalhneianca lhnac Jesus apqueltamesaicamoc: —¿Se lhque cto apquellatemmocpo lhquec amai?— 34 Coca apqueluanmonquec nac, lhna songquec ma'a apquelatemmomap: —¿Se lha amjama amanie ennenco'o ie'? —lhna ptaiangcoc ma'a. 35 Ca apno lhnac Jesus, apquelto lhnac na engiaqjenwatac nengaqtec anquec apqueltamesaicamoc, lhna ptemac apquellanemo: —Actemacja nemmajai'a anwomoc nemjama' emmanie', ngcaimelhque ampasmoc secjec emmo'oc, cacpota njan antama coneng apanque'—lhna ptemac Jesus. 36 Ca apcaweianca lhnac lhema nematca, apmo lhnac ma'a napaqtawec apqueltamesaicamoc, lhna ptemac apquellanemo: 37 —Enenlhet apto la apmama tacja ca ctonac nematca 3 nac, jenmec na tacja' co'o, enenlhet apto la jemama tacja co'o, apmec na tacja Engiapom Neten, apto lhta jeiapascama —lhna ptemac Jesus.
Enenlhet apto meniammelhaicama Jesus, coca aplhelhma m'a.
38 Lhnac aptac Juan apcano Jesus: —Jengetlhecmoscama, nenguet'ac ennenco'o lhema enenlhet apmaicama apuesai'a lheiap, cacpota eliengiescasecjac queliaqjameio' !Nennawesque' lhta m'a! ncanec jawe netlhelhma'ac —lhna ptemac Juan. 39 Apcatemmoicama lhnac Jesus: —¡Mennawesanco ie'! Ngcanec enenlhet apmac'acja elana caselha jempelapquescama asuesai'a co'o, mangcapuangquec jata jelhenec asmapsoma. 40 Ca mangjengellammelhma' nac enenlhet ennenco'o, netlhelhma'ac ma'a. 41 Jawe niapac anque, apqueliemac'ac jata nquec quetlhengcap, apquetlhewanco la'a quetsec anquec iemmen, ntase ie, Engiapom Neten jata njan eniancoc aquianmoma enenlhet anac, ncanec quetlhencap apquelto jelieplecama co'o quetlhengcap —lhna ptemac apquellanemo Jesus. 42 —Enenlhet apto la njan jeclhacquesecja jelieplecamaja, ngcaimelhquec ngcolhec acteto apiaspoc lhema metaimong aquiawai'a, cacpota eiengiocpoc aisecsec anque' aluata aquiau'acja iemmen. 43 44 Ca apmec anac lheiap, ntemescasquec jata nquec mangcoliejescasecjo Engiapom Neten, eiaqtemen jata. Ntase nac eclhec acpensema apmec Engiapom Neten apcawacja, mangcolhno eclhec aquieplomo janet apmeioc nemaluanlhecjelha caselha apawoc 4 , metca acsepanai'acja talha lhnac ma'a. 45 46 Ca apmenec anac lheiap, nquelanescasquec jata nque ngcolatsecamaja, eiaqtemen jata. Ntase nac eclhec acpensema apmenec Engiapom Neten apcawacja, mangcolhno emjancoc janet apmanco'oc nema aluanlhecjelha caselha apawoc 47 Ca apaqtec anac lheiap, nquelanescasquec jata nque ngcolatsecama, elec jata. Ntase nac eclhec apiawec Engiapom Neten apcawacja, mangcolhno emjancoc nema aluanlhecjelha caselha apawoc, aquieplomo janet apaqto'oc. 48 Meletsepec nac iapa' pquetco'oc ma'a, cacpota njan metca acsepanai'a lhnac talha m'a. 49 Ca sta co'o asquellano quetlhengcap eluatesamoc jata ngcolatsecama nac aptaiancolha, Engiapom Neten jata enialhnasecjac apualho'oc enenlhet, talha ta etnejec, ca aptaianquelha na mota'a apquenmaicama nac iasec apquenmopesacja nac caselhaja. 50 iasec 5 acto actacmanma nque' nemmaicama, coca acpallesalhco la nalhepop, mmasquec nemmancaja, nnelhacquec najan. Nnawec na quetlhengcap, etnamoc jata nemanmaicama, malha acto nac iasec. Ellanamoc jata actacmanma, elloca ta panco ie' metca apquennapommap —lhna aptemac Jesus.

1Hijo del Hombre
2Aqui se refiere a Juan el Bautista
3Los niños no eran bien recibidos entre los judios
4Infierno
5En aquella epoca, la sal en trozos se colocaba como piso en los hornos para aumentar rapidamente su calor, y tambien se mezclaba con estiercol para que sirviera de combustible.

Capítulo 10

Aplheianma Jesus metca neniamasma' entawa'
1 Apteiapmec nac mocjom Jesus Capernaum, apmeiecjo lhnac iocjalhma Judea, apqueluecjo lhnac na temma aquieto actepa cnem aluata Jordan. Apuacjei'awec nac enenlhet'awoc Jesus, ca apquetlhecmoscamo lhnac aptemacja apanquec na mota Jesus ma'a. 2 Ca apqueltetescai'o lhnac fariseos apmajai'a etselhnanac Jesus, apquelelmalhneianca lhnac ma'a: —¿Apqueltammacpe nlho eiengioc aptawa enenlhet?— 3 Apquellatemoicama lhnac Jesus: —¿Co la actacja jenganemacja Moises? — 4 Ca apquellatemmoianca lhnac Fariseos ma'a: —Apcaiancawec nac nanec Moises eiengio'oc aptawa' enenlhet, ca aptalhesquescamo lhnac lhema waccajac neniamasma entawa' —lhna ptaiangcoc fariseos. 5 Lhna ptemac Jesus: —Aliennactema apualho'oc lhnac nanec asonquec enenlhet'awoc ma'a. 6 Apcaiancawec nac nanec Moises eiengio'oc aptawa enenlhet, coca mang nac nanec ngcotnemac ampai'acja' secja Engiapom Neten apquelanai'ac nac nanec apquenno', nqueluana, 7 netamen apquenno nac, eiengiecjac jata aptema apnemolhema ngcana'ac aliemjapo la'a, cacpota eloca lhemec aptawa enenlhet, 8 ngcotnecjac jata malha lhema. 9 Ca apiepetquescama nac Engiapom Neten lhema apquenno cacpota njan lhema nqueluana, mamma ta ngcolhpanquesec —lhna aptemac Jesus ma'a. 22 Ca apcatemmoianca lhnac Jesus ma'a: —Meliasquem coca Engiapom Neten, 235
Apquenmama tacja Jesus nematcac
13 Apqueliantemecjo lhnac enenlhet moclhem'a nematcac apnacja Jesus cacpota enmanwomoc, coca apqueltamesaicamoc apqueliamenaianque nac enenlhet apto apqueliantemaiam nematcac. 14 Nnatjescangquec noca Jesus, lhna ptemac apquellanemo apqueltamesaicamoc: —¡Ellanco jeliotac nematcac anac, meliasamolhma! 15 Apqueleltawec jata nquec etnancoc Engiapom Neten apnemolhema, meliascamanque', ca aptaianquelha nac nematcac metca apqueliasqueiam Engiapom Neten—lhna ptemac ma'a. 16 Ca apcacjeso lhnac Jesus aptec apio'oc nematcac, apnenqueno lhnac na apmeioc tacjalhet, apquellamelaicama lhnac na m'a.
Apquetcoc nquescama apquetsecama apacmetquescama Jesus
17 Necsa apmajai'ac elhong nac Jesus, ca apuai'o lhnac apquetcoc apnacja m'a, apqueltanuo'o lhnac aptapno'oc, lhna ptemac apcanemo: —Jengetlhecmoscama apiamolhma ¿Co la atnesquesec awomoc aquiennactemacja enengiec?— 18 Ca apcatemmoianca lhnac Jesus ma'a: —¿Se lha ntac jeltangco nac asiamolhma? Wanlha Engiapom Neten apto apiamolhma. 19 Apiawec lheiap jenganemacja aptalhescama lhnac na nec Moises. Meniaqja nquec po'oc, metuesanquec ncotnacjo aptawa', memenielh, metnama nquec apmopuana ania'a apmajai'a eselhnanac po'oc, meiennenques anquec na po'oc, ellasecjo ta ngcana'ac, eltaqmelques jata njan —lhna ptemac Jesus ma'a. 20 Ca apcatemmoianca lhnac apquetcoc anac: —Jengetlhecmoscama, ca jenganemacja nac, astemacja apquetcoc ascasecjai'o—lhna ptemac ma'a. 21 Apquelanei'awec nac Jesus apquetcoc anac, ca apcamelaianca lhnac ma'a, lhna ptemac apcanemo: —Lhema caselha ngcaimelhcac elana', eliengiau jata lhamacjo apanco'oc anac, etengia ta aquianmoma patacom, cacpota ellancoc metca nac apquelletsecama, cacpota jeieplomaja'. Ca pto la m'a, Engiapom Neten jata ellancoc aquiawai'a nquec aquiaqmoiecja m'a neten —lhna aptemac Jesus. 22 Aiosec na ntemac apualhoc aplengai'o apquetcoc anac, mang nac eiennactemac aplhengamo, ncanec mang nantec apquetsecama m'a'. 23 Ca apquelan'o lhnac Jesus nepiawa', apquelpaqmetcaso lhnac apqueltamesaicamoc: —¡Nientelhe ca nque eclhec acnema apquetsecama Engiapom Neten apcawacja!— 24 Mpelapquescangquec nac apquellengai'a apqueltamesaicamoc, ca apquelpacmetquesecjo lhnac mocjom Jesus ma'a: —Ellailhono', mangcapuanquec eclhec ietapecjang seie' alhancoc, 1 25 neten anquec enenlhet nquescama nac apquetsecama, mancapuanquec eclhec Engiapom neten apcawacja —lhna aptemac ma'a. 26 Ca acpelapquescamo lhnac apquellengai'a apqueltamesaicamoc, lhna ptaiangcoc ma'a: —¡Nientelhe nalhmoc la'a antelhec Engiapom Neten apcawacja! —lhna aptaiancoc ma'a. 27 Ca apcatemmoianca lhnac Jesus ma'a: —Enenlhet mangcapuanque, Engiapom Neten coca apuanque eluonquesec tep enenlhet'awoc, apuanquec na ellanac apmac'acja la elana— 28 Lhnac aptemac Pedro: —Wesque', nelpecquenacje lhta lhamacjo caselha engancoc ennenco'o, ca nelieplawengca lheiap — lhna aptemac. 29 Apcatemoicama lhnac Jesus ma'a: —Jawe niapac anque, enenlhet apquelieniecja la secjec apquelpetma'a, apquelialheng'a, ngcana'ac, apquetcac, apnemacja, cacpota njan lhepop apancoc, aniem'o jelieplecama apquenmama nja tacja ania'a actacmanma, 30 etlhewancoc jata aclhamacma caselha apanco'oc jenque'e, ca acto nac apnemacja, lhepop apancoc, cacpota njan apquetcac, coca mangcolhec jata njan allamelanca. Netamen jata apquetsepma, elhnacjoc jata lhemec Engiapom Neten, metca actemacja nnelha. 31 Moclhem'a enenlhet colhuawe nac aptaicamoc anac apmaniaie, alhaiec jata etnocjac ma'a, coca moc lhem'a enenlhet colhuawe nac metnaicamo nac apmaniaie', apmaniaiec jata etnocjac ma'a—lhna ptemac Jesus.
Jesus aplhenecjo mocjom enietsepoc
32 Apquenmeiecjo lhnac aquieto Jerusalen, aplhengamo lhnac apmanie' Jesus. Alpelapquescamo lhnac apqueluetai'a apqueltamesaicamoc, apquellai'ac nac na napocja enenlhet ma'a, ncanec apocquenammacpec nac Jesus ma'a. Ca apquellawenca lhnac Jesus apqueltamesaicamoc, apqueliantemo lhnac tep apquetse' moc apancawe, apqueleltennaso lhnac acmac'acja ta ngcotnejec. 33 —Ellailhono, ca nenmeiacjelha nac Jerusalen, co'o asto nac asqueniem'o neten astaiecjo Enenlhet apanque', ngcolhe ta jeiantemacjo apcacjanquelha' apquellemjama apmania ie' sacerdotes, cacpota jan jengetlhecmoscama jenganemacja Moises, jellangconguomoc jata ngcotno nempaioma lhema', elleltoc jata jellaqjec. 34 Jeliematquese ta njan enenlhet, apiemmanong jata njan jellelhpaqja', jeltecpoma ta, jellaqjec jata njan. Janetolhem'a acnem jatoca ngcotnec, jetnescasecjac ejalhnancoc mocjom Engiapom Neten apiesecsec apquenmasquenwaiacmo — lhna aptemac ma'a.
Jacobo cacpota njan Juan apquelleltemo etnancoc neten apancawe'
35 Jacobo cacpota njan Juan, Zebedeo apquetcac, apqueltetescai'o lhnac Jesus ma'a, lhna aptaiancoc apquellanemo: —Jengetlhecmoscama, nengeltawe' ennenco'o angelelmalhnama lhema caselha — lhnac aptaiancoc. 36 —¿Se lha apquellelto ie'? —lhnac aptemac Jesus. 37 —Jata apto ta apuesque apiennactema, nengeltawec angacjancoc napocja lheiap, lhema aquiennacja', cacpota njan sancaluelha, cacpota antancoc nelanma enmania'ie neliaspommalhca— lhna aptaiancoc ma'a. 38 Ca apquellatemmoianca lhnac Jesus ma'a: —Meliojoc quetlhengcap actacja nac jelelmalhnecamaja' ¿Apqueleltawe i'e njan ellengancoc acmac'acja ta ngcotnec aslengaianco? —lhnac aptemac Jesus. 39 —Jai', nengelpenesawec ennenco'o —lhnac aptaiancoc apquellatemmoianca m'a. Netamen lhna ptemac apquellanemo Jesus: —Jai', awanjec jata ngcotnec apquellengaiancoc acmasca quetlhengcap, ca acmac'acja na ngcotnec co'o, 40 coca apqueliequiescama lhta Engiapom Neten enenlhet engiacjecsec jata aquieto iennacja cacpota njan sangcaluelha cacpota etnancoc apquelemjama apmania'ie neten apacawec apqueliaspommap —lhna aptemac Jesus. 41 Ngquennatjescangquec nac 10 apqueltamesaicamoc ma'a apquellengai'o apquelelmalhnecama Juan cacpota nja Jacobo. 42 Ca apquellaweianca lhnac aplhamacjo apqueltamesaicamoc Jesus, lhna ptemac apquellanemo: —Apquelliawe nlho quetlhengcap apquelanma apmania ie' metno judio, aptanquec malha apanco'oc alhma nquec jam, queliecasqueiacmec apquelientalhnemo, apqueliecai'awec aptemo lhemec enenlhet. 43 Coca quetlhengcap metnamonquec aptaianquelha nac ma'a, 44 apma'ac jata nquec etnancoc apmania ie', elpasem jata po'oc, 45 ca astemacja nac co'o, asqueniem'o neten astaiecjo Enenlhet apanque, asua'a ie' cacpota alpasmoc quetlhengcap, jawe quetlhengcap asqueltemo jellennencasamaja. Asua'ac co'o cacpota aljatsoscacja enenlhet anmama nac meliamolhma, jata asmac'o ta atnec jeng, amanie ta anwetsepoc asiaqmoiecja m'a enenlhet anac—
Jesus aptaqmelquescaiam metca apaqto'oc Bartimeo
46 Jesus cacpota njan apqueltamesaicamoc apquelentalhnenwacjo lhnac na temma Jerico, netamen apquelentepecjo lhnac ma'a, apquelieplecjec nac enenlhet'awoc. Apnemo lhnac necja amai metca apaqto'oc apuesai'a Bartimeo, Timeo apquetca lhnac ma'a, apquellelmalhneianca lhna mota caselha enenlhet. 47 Ca aplengai'o lhnac Bartimeo Jesus co Nazaret nac apiecai'a apnacja m'a, ca apueneianca lhnac ma'a : —¡Jesus, David aptawen neptamen, 2 eietno neja'at, jepasem! — lhna ptemac ma'a. 48 —!Ewanma jam! —lhna ptaiangcoc enenlhet ma'a. Coca apianwescaiacmec nac apuenecama mocjom: —¡Jesus, David aptawen neptamen, eietno neja'at, jepasem!— 49 Ca apquenenwaiacmo lhnac Jesus ma'a, lhnac aptemac: —¡Ellawamanojo! —lhna ptemac apquellanemo Jesus enenlhet. Ca apquellawenca lhnac enenlhet Bartimeo: —!Elheng nac, meniaga, Jesus apcawemaja! —lhna aptaiancoc ma'a. 50 Colhuawec anque nac apquenmecjac neten Bartimeo m'a, apiengiawo lhnac apcaqlammap, ca aptetescaiacmo lhnac Jesus ma'a. 51 —¿Se lha apquelto allanac lheiap que? — lhna aptemac Jesus. —Asqueltawe' atecja lhma' mocjom —lhna ptemac Bartimeo apcatemmoianca. 52 —Jai', ntase', alanjoc jata colhuawe nac, ncanec mei'ascacmoc lheiap —Lhna ptemac Jesus. Colhuawec anquec nac aptacmelecjac Bartimeo m'a, ca apieplecjo lhnac Jesus.

1En castellano dice: no puede entrar un camello en el ojo de una aguja
2Asi tambien le decian los judios al Cristo, Bartimeo se dio cuenta de que Jesus era el Cristo.

Capítulo 11

Jesus aptalhnenwecja' natemma Jerusalen
1 Jesus cacpota njan apqueltamesaicamoc apqueluacjo lhnac lhienep acjaiam acuesai'a Olivos, nengaqtec nac na temma Betfage, cacpota njan Betania, nengaqtec nac na apiau'acja temma' Jerusalen ma'a. 2 Lhnac aptemac apquellanemo Jesus apcanet apqueltamesaicamoc: —¡Enmeiacja no ja'e, na temma nac! Eluetanwacjac jata malecca atcoc nemactetema, metca ngcolhec ananto !Eljatsosques jata tama', eliantementa ta! 3 Jata cno ta alenmalhnenca se lha ntac apqueljatsoscasenco nac tama', eleltennes jata apuesque lhquec apqueltema, colhuawec nac lhec neniantementamo mocjom, jata eltec ellana —lhna ptemac Jesus ma'a. 4 Ca apquenmeiacjo lhnac ma'a, apqueluetanwacjo lhnac malecca atcoc actetemmalhca necja amai, ca apqueljatsoscasenco lhnac ma'a. 5 Nnengquec nac alelmalhneianca: —¿Se lha ntac apqueljatsoscasenco nac actetemmalhca malecca atcoc anac? —lhna ptaiangcoc enenlhet. 6 —Apuesque lhquec apqueltema, colhuawe nac lhec neniantementamo mocjom —lhna aptaiancoc apquellatemmoianca m'a. —Jai', ntase' eliantemecja —lhna aptaiancoc ma'a. 7 Ca apqueliantemecjo lhnac malecca atcoc, apqueltanquesacjo' lhnac apquelaclammap, ca apcananto lhnac Jesus ma'a. 8 Mang na ntec enenlhet'awoc apnenquenaicamoc apquelaclammap, cacpota njan ietapa'ang apua' au'alhoc amai 1 apmammap tacja Jesus. 9 Necsa aptalhnema lhnac Jesus Jerusalen, apasmeianquec nac enenlhet'awoc, apqueluenecama lhnac ma'a: —¡Ntasec apuo'o lheiap apuesque David aptawen neptamen, nengelletsewasawec ennenco'o, nengelliawec Engiapom Neten apcapascama lheiap! 10 !Ntase ca nque, quetse ngcaimelhcac aptecjelha apuesque David aptawen neptamen! —lhna ptaiangcoc enenlhet'awoc ma'a. 11 Netamen acuetammalhca lhnac caselha, aptalhnenwecjo lhnac Jesus Engiapom Neten apnemacja, apquellanei'awec nac lhamacjo caselha m'a conne, ca apquelienacteseianca lhna lhma' m'a, ca apquenmeiecjo lhnac natemma Betania cacpota njan apqueltamesaicamoc.
Jesus cacpota njan iamet higuera
12 Mo'oc acnem nac ntemac, Jesus cacpota njan apqueltamesaicamoc apquelentepo Betania, mec nac ngcacjemac Jesus necsa aplhengama, 13 apuetai'o lhnac iamet acuesai'a higuera, aptetescaiacmo lhnac apmajai'a niecje' etuoc aquielhna. Mamma lhnoca aquielhna, mang nac ngcowaiacmoc aquielhnemacja, moc' awa lhnac ma'a. 14 Lhna aptemac Jesus apcanemo higuera: —¡Mangcotawalhquec jata mocjom aquielhna lheia!—lhna aptemac ma'a. Apquellailhemawec nac apqueltamesaicamoc actacja apqueliatecama Jesus ma'a.
Jesus apquellentepquescama enenlhet conne Engiapom Neten apnemacja'
15 Ca apqueluecjo lhnac Jerusalen, aptalhnenwecjo lhnac Jesus conne acjalhtemommalhca aujac pa'at Engiapom Neten apnemacja, apquelentepquescamo lhnac enenlhet'awoc apquenmaicamoc caselha, cacpota njan apquelhaicamoc caselhaja. Apqueliaqnenquescamo lhnac asota apanco'oc enenlhet apqueliaqmoncasecja mo'oc patacom po'oc enenlhet apanco'oc, cacpota njan iamet aisecsec conemmactec aplhano'oc apquelhammap apqueliaqnenquescamac na Jesus ma'a. 16 Mang nac eltemoc Jesus eljalhtepelhquetec enenlhet aquieplomo apquelletsecja caselha apanco'oc ma'a. 17 Lhnac aptemac Jesus apquellanemo enenlhet'awoc ma': —Ca ptemac Engiapom Neten: «Co snemacja ngcotnec jata apcaqnecjelha enenlhet'awoc lhamacjo apquellawacja cacpota jelpaqmetquesec» 2 , «quetlhengcap coca apqueltemescasac enenlhet apquenmenielhma' apcacjaianquelha'» 3 18 Ca apquelleng'o lhnac apquelemjama apmaniaie' sacerdotes, cacpota njan jengetlhecmoscama jenganemacja Moises actacja apaioma Jesus, colhuawec ca nquec nac apquellanecjac ania'a cacpota ellaqjec ma'a, apquellai'ac noca, ncanec aplhaniec nac enenlhet apquellailhemo mota apquetlhecmoscama monlengai'o. 19 Pelhasep na ptemac, Jesus cacpota njan apqueltamesaicamoc apquellenteiapmo lhnac na temma Jerusalen.
Iamet higuera aquiemai'a
20 Mo'oc acnem na ntemac, sosecje', apqueltaqjemo lhnac ma'a apqueliecanwacjo lhnac mocjom amjamacja lhquec iamet higuera, apqueluetanwecjo' lhnac aliemai'o awa', acuacjo aicapmen'oc. 21 Nlheianwecjec nac apualhoc actemacja apuetai'a Pedro, lhna aptemac apcano Jesus: —!Elanjono iamet anac, ngqueliemai'a nac awa', acuacjo aicapmen'oc, ca sonque apiamenanca lhta lheiap!—lhna ptemac Pedro. 22 Ca apcatemmoianca lhnac Jesus ma'a: —Meliasquem coca Engiapom Neten, 23 asietquescama apquelpaqmetcasque ta ngque' lhienep anac, etnancoc jeng: 24 "!Cotiep jam, cotiem aluata nac!" Ngcotiemo ta. Necsa apquenmalhnecama Engiapom Neten caselhaja, meliasquem anque' nietnec apenescamo m'a, jawe niapac ngcowac jata. 25 Necsa apquelpacmetquescama Engiapom Neten, ellamelecjo ta mocjom enenlhet apnactewascama alhta quetlhengcap, netamen apqueliapom anac quetlhengcap, apno nac neten, ellamelecjoc jata njan mocjom quetlhengcap ma'a— 26
Nema anmalhnecama Jesus co la aniem'acja apientalhnemo
27 Apquelentalhnenwecjec nac mocjom apqueltamesaicamoc cacpota njan Jesus Jerusalen, ca apiaijeianca lhnac Jesus necja'uac Engiapom Neten apnemacja, apqueltetescai'o lhnac apquelemjama apmaniaie' sacerdotes, jengetlhecmoscama jenganemacja Moises, cacpota njan apquelemjama apmania ie' apquellawacja nac ma'a, apquelelmalhneianca lhnac ma'a: 28 —¿Se lha altemo eientalhnesacpoc lheiap apquelentepquescamo nac enenlhet conne Engiapom Neten apnemacja ?—lhna ptaiangcoc apquellanemo m'a. 29 30 Ca apcatemmoianca lhnac Jesus ma'a: —Co'o nja smac'ac alenmalhnama secje' quetlhengcap ¿Se lha altemo eientalhnesacpoc Juan cacpota ellauquesancoc iemmen enenlhet'awoc, Engiapom Neten, nlhoca la enenlhet? Jellatemmoma ta apmania ie' quetlhengcap, cacpota allatemmoma njan alhaiec co'o —lhna ptemac Jesus. 31 Ca apquelpaqmetcasecpo lhnac secjec moc apancawec, lhna aptaiancoc: —Jawe ta anlhenec Engiapom Neten apqueltemo eientalhnesacpoc Juan, ncanec jengenmalhnecjo ta Jesus, jata etnec jengellana: "So ca cto quetlhengcap apqueliasqueiacmo nac Juan" jata etnec jengellana. 32 Jawe ta njan anlhenec enenlhet'awoc apqueltema eientalhnesacpoc Juan — lhna aptaiancoc ma'a. Mang nac ncomajai'ac etlhenec, ncanec enenlhet'awoc nac apquellai'ac ma'a, apquelliawec nac enenlhet Juan apto Engiapom neten secama ania'a apancoc. 33 Netamen apquellatemmoianca lhnac ma'a: —Mangeliojoc ennenco'o se lha altemo eientalhnesacpoc Juan —lhna aptaiancoc ma'a. —Co'o njan moltoc alhenec se lha altemo aientalhnesalhcoc cacpota alanac lhamacjo caselha nac — lhna ptemac Jesus ma'a

1Asi hacian para darle la bienvenida.
2Isaias 56:7
3Jeremias 7:11

Capítulo 12

Apquenmacmecama aniep meliamolhma'
1 Apquetlhecmoscanquec nac lhema apietquescama mocjom Jesus apquelemjama apmaniaie sacerdotes, jengetlhecmoscama jenganemacja Moises, cacpota njan apquelemjama apmania ie apquellawacja nac, lhna ptemac: —Apcanmec nac uva iamet lhema enenlhet iocjalhma apancoc, apjalhtenquescamo lhnac necjau'ac, apquelan'o lhnac apquelanei'acja iama anmen aimenec cacpota njan apquelamelhaianquelha neten neiawa aniep apancoc. Netamen aptengiai'o lhnac secjec apquenmacmesaicama enenlhet aniep apancoc, ca aplhengamo lhnac netamen ma'a. 2 Nguaiacmec nac pelten nennaclhemacja aquielhna, coca acto lhquec apancoc aniep apcapascamo lhnac lhema apmacmesaicama, cacpota eluacjesec necja aquielhna apancoc. 3 Coca apquenmacmecama lhquec aniep, apqueltecpoicama lhnac apiempejec nema apascama lhquec, moc apmeioc nac nnemac apasecjo m'a. 4 Netamen apcapasacjo lhnac mocjom po'oc apmacmesaicama, apqueliamenaicama lhnac ma'a, apqatec nac apqueltecpoicamaja. 5 Ca apcapasacjo lhnac mocjom po'oc apmacmesaicama, apquellaqjenquec noca m'a. Netamen apquellapasacjo lhnac mocjom po'oc, apqueltecpoicama lhnac ma'a, apquellaqjenquec nac na pocja m'a 6 Ca aclheno lhnac apualhoc acto apancoc aniep: "Anwapacse ta co'o lhema apjapac apanque' eietca, asto ascamelaiam, jatelha ellasecjoc ma'a". 7 Apquellanentamec nac apquenmacmecama lhquec aniep apquelhiaiacmo apquetca acto apancoc aniep, ca apquelpacmetquesacpo lhnac moc apancawe': "Jata etnecjac apancoc aniep, apquetse pota apiapom !Angaqje ta! cacpota ngcotnecjac engancoc ennenco'o aniep anac". 8 Ca apquelpatjeto, apquellaqjo lhnac ma'a, apquelieniewo lhnac apjapac necja aniep —lhna ptemac apqueltennaianca Jesus ma'a. 9 Netamen apquelelmalhnenca lhnac Jesus enenlhet'awoc ma'a: —¿Nieje ta etnec acto apancoc aniep anac? Ennapuacjac jata enenlhet meliamolhma nac, cacpota ellancocjac po'oc enenlhet aniep apancoc. 10 Cotlheianwacjo no apualho'oc actemacja aclheianma Engiapom Neten apaioma, ca ntac jeng: «Apquelhaicamoc alhta metaimong apquellanecamoc pa'at, neten anque ntacjac actacmanma anmama m'a, 11 Engiapom Neten alhta ngqueniem'ac ma'a, ca jengelpelapqueso njan ennenco'o» 1 12 Necsa apquellengai'a lhnac apqueltennaicama Jesus apquelemjama apmaniaie sacerdotes, jengetlhecmoscama jenganemacja Moises, cacpota njan apquelemjama apmania ie apquellawacja, apquelliamawec nac apquetlhenammap malha aniep apquenmacmecama meliamolhma' nac, apqueleltemawec na niecje ellaclhenquesec nengaclhengcasemmalhquelha Jesus, coca mang nac eliamoc apmac'acja eltejec, enenlhet nac apquellai'ac, ca apquelieniecjo lhnac ma'a.
Nema almalhnecama Jesus nenianmonquescama patacom impuestos
13 Ca apquenmeiecjo lhnac moclhem'a fariseos, cacpota njan apquelieplecama apuesque Herodes apnacja Jesus, lhna aptaiancoc apquellanemo: 14 —Jengetlhecmoscama, nenniawec ennenco'o acto nac iocjalhme' apaioma lheiap mamma apcai'acja, melan'oc apiempec enenlhet acnema apquelletsecama, wanlha aquietemo nquec apquetlhecmoscama jenganemacja Engiapom Neten, ca nemmac'o nac angelelmalhnamaja: ¿Ntase nlho angelianmonquesec impuesto apuesque iocjalhma co Roma? 2 —lhna aptaiancoc. 15 Coca Jesus apiamawec nac apmajai'a etselhnanac ma'a, janet napaqta'ac enenlhet anac, lhnac aptemac: —¿Se lha ntac apquelto nac jetselhnanac quetlhengcap que? Ngua no lhema patacom aquiaquiema nac, apqueliamonquescama nac impuesto ancoc— 16 Ca apcanco lhnac lhema enenlhet patacom aquiaquiema, lhnac aptemac Jesus: —¿Se lha enenlhet napa'at jenca ie', patacom aquiaquiema nac, co la puesai'a m'a? —Apuesque iocjalhma Roma jam —lhna aptaiancoc ma'a. 17 Netamen lhna ptemac Jesus: —Ellamoc apuesque Roma acto apancoc, ellamoc na Engiapom Neten acto la njan apancoc— Mpelapquescangquec nac apquellengai'a enenlhet'awoc actemacja apianweiacmo Jesus ma'a.
Apquetlhecmoscama Jesus apquelto apqueletsepma' etnescasocjac jata apjalhnanco'oc Engiapom Neten apiesecsec apquenmasquenwaiacmo
18 Saduceos 3 apquetlheianmec nac enenlhet apqueletsepma metnocjec mocjom apjalhnancoc apiesecsec apquenmasquenwaiacmo, ca apquenmeiecjo lhnac apnacja Jesus, lhna ptaiangcoc: 19 —Jengetlhecmoscama, aptalhescanquec nac na nec Moises jenganemacja, lhna ntemac jeng. Apquetsepo la enenlhet metca apquetca, apialheng jata etnecjac aptawa neptamen cacpota ngcoluetac atcac, jata etnecjac malha apquetcac ma'a apetma apquetsepma. 20 Engiailho ta nema altennaicama, 7 lhnac apquelialheng'a enenlhet, ngqueliemjapmec nac ma'a metno apquetcoc, ca apquetsepo lhnac ma'a, mang nac etai'ac apquetca m'a. 21 Apialheng apquemjaicamoc nac aptaiecjac aptawa', apetma aptawa neptamen, apquetsepmec nac na mocjom ma'a, metai'a apquetca'. Netamen po'oc apialheng, nnawec nac na m'a, apquetsepo lhnac na m'a, 3 nac apuaiacmoc apqueletsepma. 22 Apsaujommacpawec nac 7 apquelialheng'a apqueletsepma, mamma lhnac apquetcac, netamen atsepo lhnac na nqueluana. 23 Coca colhuawe nac nemmac'ac angeliojoc ennenco'o, nguacmec jata nque' acnem apqueltemescasecjelha mocjom apjalhnancoc Engiapom Neten apiesecsec apquenmasquenwaiacmo ¿Sec jata etnecja aptawa 7 nac apquelialheng'a nqueluana nac?—lhna aptaiancoc ma'a. 24 25 Ca apquellatemoianca lhnac Jesus ma'a: —Mamma', ngcoliemjapecjac mocjom ma'a, jata ngcotnec aptaiancolha nac Enenlhet Neten. Meliojoc quetlhengcap jenganemacja Engiapom Neten, cacpota njan meliejec actemacja apmopuana. 26 Apquelliawec quetlhengcap ania'a lhennenga, alaiwomo lhnac nanec iamet atcoc ma'a, apacmetquescamo lhnac na nec Engiapom Neten Moises: «Co'o asto apiapma'ac apquelieijenca Abraham, Isaac cacpota njan Jacob» lhnac na nec aptemac apcanemo Engiapom Neten Moises. 27 Engiapom Neten apto apiapma'ac enenlhet meletsepma', jawe apquelletsepma nac—lhna aptemac Jesus ma'a.
Jenganemacja neten anquec actacmanma
28 Necsa apacmetquescama lhnac Jesus Saduceos, apnenquec nac na lhema jengetlhecmoscama jenganemacja Moises, apcailheianquec nac apqueltenaicama Jesus aquietemo nque', ca aptetescai'o lhnac ma'a, apquenmalhneianca lhnac: —¿Sec la jenganemacja neten anquec actacmanma ie' ?— 29 Apcatemmoicama lhnac Jesus: —Ca ntac jenganemacja jenque'e: «!Ellailho no co Israel, Engiapom Neten apuesque engancoc, apto wanlha lhema! 30 !Ellamelemma mota Engiapom Neten acuacjo conne canquec apualho'oc, alietnaicama apaqtec, cacpota njan apqueliennactema apanque'» 31 Cacpota njan nietnec na mo'oc jenganemacja actacmanma nque: «¡Ellamelemma ta po'oc, ca acto nac apquellamelammacpo apancawe apqueliocja nac quetlhengcap!» Ca altacmanma nque jenganemacja m'a — 32 Lhna aptemac jengetlhecmoscama jenganemacja Moises: —Jai', jawe niapac anque aptacja nac lheiap, wanlha Engiapom Neten apuesque engancoc, mamma po'oc, 33 enwanquec angamelemmoc Engiapom Neten, angancoc enwalhoc, aquietnaicama engaqtec, neniennactema, cacpota njan nengamelaiam emmo'oc, ca acto nac nengamelammalhco engancoc enganque', coca jenganemacja nac acto neten anquec altacmanma, mangcolhno nenguanlhema aluatnemmalhquelha 4 caselha nentoscama nengaicamoc Engiapom Neten — lhna aptemac. 34 Apuetai'ac nac Jesus jengetlhecmoscama jenganemacja Moises aquietemo nque actacja aplheianma, lhna ptemac apcanemo: —Ngquetlhengcasquec etnecjac apnemolhema Engiapom Neten lheiap —lhna aptemac ma'a. Nqueluannammalhquec nac apualho'oc elelmalhnama mocjom Jesus ma'a.
¿Se lha atawen Cristo ie?
35 Apquempecjawec nac mocjom apquetlhecmoscama Jesus aquieto Engiapom neten apnemacja, lhna ptemac: —Jengetlhecmoscama jenganemacja Moises apquetlheianmec na mota Cristo apto apuesque David aptawen neptamen, 36 coca David, Engiapom Neten apualhoc noca apqueltennasecamoc, lhnac nanec aptemac: «Lhta aptac Engiapom Neten aplheno apuesque 5 ejencoc ma'a: "Elhnata nejecja aquiennacja 6 , acuacmo asaujo asnaqtewasecja apquellelto apquellammelhmacja lheiap"» lhnac nanec aptema Engiapom Neten. 37 Apuesque David aplheianmec nac Cristo apto apuesque apancoc ¿Etnecja nalhmoc la apuesque apancoc aptawen neptamen?— Mang na ntec apquellailhemo apqueltennaicama Jesus enenlhet'awoc ma'a, apqueletsewascamawec nac ma'a. 38 Lhna aptemac mocjom Jesus: —¡Ellajo ta jengetlhecmoscama jenganemacja Moises! Awanje mota apquellammacpo, apquellentalhnecja apquellentalhnema apqueltacmanma, apquelleltemo ngcolhec alpaiwesanca necsa apqueluaiam apcacnaianquelha enenlhet. 39 Ngquellecawe mota apualho'oc actacmelacja la nentanema aquieto nemacnecjelha, cacpota njan aquieto actacmelanquelha lhma', 40 coca apqueltacmelquescamawec apquenmenielhquescama caselha anco'oc lhentampa'a, ajolhec anquec na apquelpacmetquescama Engiapom Neten, cacpota ngcolhec alleltanco apqueliamo lhma', awanjec jatoca ngcotnec apiaqmoncasecjac Engiapom Neten apqueltemacja m'a —lhna aptemac Jesus ma'a.
Lhentampe metca atsecama aicamoc patacom ancoc Engiapom Neten
41 Aptalhnemo lhnac Jesus Engiapom Neten apnemacja, apnemo lhnac aquietelha napa'at aquieto aquietnemacja iamet aisecsec patacom alhancoc, apquellaneianca lhnac apnenquenaicamoc aquiawai'a patacom nema apquelletsecama enenlhet, 42 acuai'o lhnac na lhentampe metca atsecama m'a, acpeccanuei'o lhnac quetsec anque patacom, janet pataccom aliaquiema lhnac. 43 Netamen lhna ptemac apquellanemo Jesus apqueltamesaicamoc: —Ca nqueluana nac metca atsecama, nsaujawec aicamoc Engiapom Neten patacom, mangcaiacmoc quetsec actengiai'a la actoma, 44 coca cnema nac apquelletsecama apquellanquec patacom apanco'oc, nietnec coca mocjom nquescama pataccom apancoc ma'a. Ca ncanec aleltennacsec quetlhengcap, nqueluana nac nsaujawe' acpeccanma, mangco lhno apquellaicamoc anac nema apquelletsecama — lhna ptemac apquellanemo Jesus ma'a.

1Salmos 118:22-23
2El gobierno Romano habia conquistado a los judios y les obligaba a pagar impuestos muy pesados.
3Grupo de personas ricas que se dedican al estudio de los 5 primeros libros de la biblia, no creian en la resurreccion ni en los angeles, eran enemigos de los fariseos
4Explicar el tema de los sacrificios
5Jesucristo
6Significaba estar en un lugar importante

Capítulo 13

Aplheianma Jesus ngcotuasalhcac Engiapom Neten apnemacja
1 Necsa apquelenteiapma lhnac Engiapom Neten apnemacja, lhna aptemac apcanemo lhema apqueltamescama Jesus: —Jengetlhecmoscama ¡Elanjono awanjec anque nac alanemmalhca Engiapom Neten apnemacja nac!— 2 —Jai', awanjec anque niecjec, coca mangcaimalhque ta necja atco'oc, ngcosawjalhcoc jata actewasemmalhca —lhna ptemac Jesus. 3 Netamen Jesus, cacpota njan apqueltamesaicamoc, apquelmeiecjo lhnac lhienep acjaiam acuesai'a Olivos, aquietelha Engiapom Neten apnemacja. Ca apnemo lhnac Jesus ma'a, apqueltetesquectamo lhnac Pedro, Santiago, Juan cacpota njan Andres, ca apquelelmalhneianca lhnac: 4 —¿Se lha acnem ngcotuasalhcac Engiapom Neten apnemacja? ¿Co la ta actemacja caselha ngcotiepoc, cacpota angeliojoc ennenco'o anquetuacmo ta acnem? —lhna aptaiancoc ma'a. 5 6 Apcatemmoicama lhnac Jesus: —Eluac jata enenlhet eleltacpoc jata Cristo, eliennenquesec jata enenlhet'awoc, coca ellajo ta quetlhencap nema liennengquescama 7 8 Apquelleng'ac jata nquec quetlhengcap apquennapommap jengque'e cacpota njan mo'oc apquellawacja, ngcowac jata m'a, coca mellagangco ie', mangcowacmoc mocjom actemacja nnelha acnem lhmanquec jam. Mamma ta ngcotnec aptecamoc enenlhet, ngcolpaclhemmac jata njan lhepop moclhem'a apquellawacja, ca ampacjasecja apquellengaianco aquientalhnema enenlhet'awoc ma'a 9 ¡Ellajo ta quetlhengap! Ngcolhec jata aliantemacjo apcacjanquelha apqueluescaie, mangcolhec jata altaqmelcaso. Ngcolhec jata njan altecponca nemacnecjelha, ncanec co asqueltamesaicamoc quetlhengcap, coca etlhenques jata jetlheianma co'o napaqtawec ma'a. 10 ma'a. 11 Mangcoltamanquec apualho'oc acmac'acja ta eltejec apquellatemmoicama quetlhengcap ma'a, Engiapom Neten Apualhoc jata ellapuanesquesec apquellatemmoicamaja. Amanie acmajai'a ngcotnec nnelha acnem lhma nquec jam, ngcaimelhquec ngcolhenalhcac secjec ania'a actacmanma lhma nquec jam. 12 Ca acnem acmo'o ta ngcowac, enianac jata emacpoc apialheng apanque' enenlhet, cacpota njan eltoc ematnecja. Nnawec na apiapma'ac eltoc jata ngcolhec annapacjo apquetcac apancawe', cacpota njan apquetcac ennapecjac jata ngcana'ac apancawe'. 13 Eltacnewacpoc jata quetlhengcap ncanec co'o asqueltamesaicamoc, coca awonquesec jata tep enenlhet apto apuascapma acuacmo ta actacja nnelha apcaniemjaicamaja. 14 Apqueluet'ac jata nquec quetlhengap acuo'o la aplheianmo lhnac na nec Daniel, Engiapom Neten secama ania'a apancoc, ngcolhec jata atsawo conne Engiapom Neten apnemacja caselha ngcolatsecama nque. Apcacjaicamoc la na temma Judea, enieniamoc jata enmancoc aquieto nac neten metaimong acjaiam aquiawai'a, 15 apnec jata nquec enenlhet aujac 1 pa'at apnemacja, colhuawec anquec jata enieniec, metalhnenguacja nquec apnemacja eluacjac caselha apanco'oc. 16 Aploca ta nquec enenlhet nalhma, metacjo nquec ewacjac apcaqlammap, 17 awanjec jata ngcotnec aclengaianco nqueluana nlosawe', aiosec jata njan nqueluana secja' acuetai'a atca'. 18 Ellelmalhnama ta Engiapom Neten cacpota mangcotnec necsa ieiam apualhoc, 19 ncanec awanjec anquec jata ngcotnec apquellengaianco enenlhet'awoc acuacmo ta acnem. Mangco lhnoc apquellengaianco enenlhet'awoc ma'a apquelanei'o secja lhnac nanec Engiapom Neten lhma nquec jam. 20 Coca Engiapom Neten jata eiacuatesoc apquellengaianco cacpota mesaujacpec apqueletsepma, ncanec awanjec apquellamelaiam enenlhet apquelto lhta apqueliequiescama. 21 22 ¡Ellanjono'! Eluac jata apquelietquesammacpo Cristo, cacpota njan secama ania'a. Ellanac jata caselha manguetai'o, cacpota eliennenquesec lhamacjo enenlhet, ngcomajac jata njan eliennenquesec Engiapom Neten apqueliequiescama lhta. 23 !Ellajo ta quetlhengcap enenlhet anac ma'a! Aspenesawec asqueleltennascama quetlhengcap amanie acmajai'a ngcowac caselha nac ma'a—
Apuectanlha ta Enenlhet apqueniem'o neten aptaiecjo enenlhet apanque
24 —Netamen apquelengaianco ta enenlhet'awoc, ngcomascoc jata atsaso acnem alhma nquec jam, cacpota njan pelten, 25 epallentac jata apiau'a, ngcolieujama ta caselha aliennactema acnaianco nac ma'a neten, 26 netamen jeluetac jata alhiemoc tacjajlet iepjopai'a aquieplomo asmopuana cacpota njan asientalhnemo, asto asqueniem'o neten astaiecjo Enenlhet apanque. 27 Allapacsec jata Enenlhet Neten alhma nquec jam, cacpota enianquesecjac apquelto jelieplecamaja. 28 Apqueluet'o la wantep 2 apoctengoc alenteiapma alhnancoc, cacpota njan alielsellemo apua', apquelliawec quetlhengcap ma'a ngcangquetuacmec aliepuai'acja. 29 Nnawec na m'a, apquelueto ta lhamacjo caselha aquientalhnema actacja nac alheianma, eliojo ta, quetse ngcaimelhca asuectanlha asto enenlhet asqueniem'o neten astaiecjo enenlhet apanque'. 30 Jawe niapac anquec, moc lhem'a eluetancoc jata aquientalhnema ca apcactengaicamoc anac. 31 Nalhepop cacpota njan neten ngcomascoc jata, coca lhamacjo asquetlhecmoscama nac, mangcomasquenguomec jata. 32 Mamma ngcoijo cnem asuectanlha, nlho ca la sosecje, catelho, ienaqteso, pelhasep, meliojoc na Enenlhet Neten, moijoc na co'o, wanlha Engiapom Neten apiawe. 33 Jelleljalhnama ta quetlhengap—
Ncaimelhquec eleljalhnamaja
34 Apquetlhecmoscanquec nac Jesus lhema apietquescama actemacja nengeljalhnecamaja, lhna aptemac ma'a: —Aplhenganquec nac lhema enenlhet, apecquencasecjo lhnac apaioma apquenmacmesaicama, cacpota elanescasama apnemacja. Moc lhem'a lhnac apquellaiancoc apquenmacmecama, lhema lhnac apquelanecama atong pa'at. 35 Apquelleljalhnecama lhnac ma'a, ncanec mang nac eliamoc acnem ewatac apuesque apanco'oc, nlhocala ewata ienaqteso, sosecje, neplhet pelhasep, acmopacmo lhma' quelhaja. 36 Nnawec na quetlhengap, jelleljalhnamata ta, ngcoplapquesec quelha awata, aluetanwetac metca jelleljalhnecama. 37 Ca stacja nac asquellano quetlhengap, cacpota njan lhamacjo enenlhet'awoc !Eleljalhnama ta, ellaielh jata njan!—

1Arriba de la casa, los judios tenian doble piso.
2Higuera

Capítulo 14

Aquianquenquescama Jesus apietsecsec aimenec acmases aimes lhema nqueluana
1 Janet acnem nac ngcaimommalhca actacmelaicama lhma acuesai'a pascua, mo'oc nemaltema pan metca apiepjescama. Apquellemjama apmaniaie sacerdotes cacpota njan jengetlhecmoscama jenganemacja Moises, apquelleliaicama lhnac actemacja ania'a acmowana ania'a cacpota elpatjetec ennapoc Jesus. 2 Mang nac ngcommajai'ac ellanac necsa actacmelaicama lhma m'a, cacpota meliasangque lhma enenlhet'awoc ma'a, cacpota njan mangconnatjacsec ma'a. 3 Apnenquec nac Jesus aquieto natemma Betania, Simon apnemacja, acto lhta aptacmelquescaiam Jesus nemmasquema actepelcammalhca eniempec. Necsa aptawecja lhnac Jesus ma'a, acuai'o lhnac nqueluana, acsoiacmo lhnac lhema alhancoc aimenec acmases aimes, acmennawe lhnac ma'a, ca actetescai'o lhnac apnacja Jesus ma'a, ca acleclemo lhnac apmatacja m'a, aquiancanmo lhnac apietsecsec Jesus aimenec acmases aimes. 4 Ngquennatjescangquec nac moclhem'a enenlhet ma'a, lhna aptaiancoc: —!Ntewasque nac acmases aimes ancoc, ennauquec jam! 5 Ntasec niecje ngcoteniac nquescama aquianmoma patacom, cacpota ngcollangcoc metca nac apquelletsecama —lhna aptaiancoc ma'a. Apqueliennai'awec nac na apquellanei'o nqueluana enenlhet'awoc ma'a, 6 coca lhna ptemac Jesus: —¡Eliengiecja, meliasamolhma! Ntasec actacja nac jelanei'o. 7 Eloca ta mota metca apquelletsecama apiesecsec quetlhengcap, coca elpasem jata mota quetlhengcap ma'a. Co'o coca molhec jata apiesecsec quetlhengcap. 8 Ca jeng nqueluana nac, nquelan'a niecje awanquelha la ngcolana, niangquenquec epatec aimenec acmases aimes, mpenesawec jelanei'o amanie asquetsepma, mang coca ngcoijoc mocjom. 9 Acto jaweniapac anque', actacja nac alanai'a, etlhenecjoc jata mota enenlhet alhma nquec jam, aclhenalhco la ania'a actacmanma aniem'o Engiapom Neten —lhna aptemac Jesus ma'a. 10 Netamen Judas Iscariote apqueltamescama lhnac Jesus ma'a, apmeiecjo lhnac apcacjanquelha sacerdote apquelemjama apmania ie, cacpota elpasmoc elpatjetec Jesus ma'a. 11 Nquelpaijecjec nac apualho'oc apquelemjama apmaniaie' sacerdotes, apquetlheianmec nac ellancoc patacom Judas. Ca apqueliaianca lhnac actacmelacja la acnem cacpota epatjetacpoc Jesus ma'a.
Aptaweicocja lheme' Jesus apqueltamesaicamoc
12 Necsa actacmelaicama lhma lhnac pascua m'a, aptommacpelha lhnac alena apquelquenammap, ampacjasecja acnem noca wanlha apquennapma' mota nepquesec ma'a. Ca apquelelmalhneianca lhnac apqueltamesaicamoc Jesus: —¿Co la aquietelha angellanenwacja nentoma ancoc actacmelaicama lhma pascua m'a? —lhna aptaiancoc 13 14 Lhna ptemac Jesus apquellanemo apcanet apqueltamesaicamoc: —Enmeiacja ta Jerusalen, eluetanwomoc jata enenlhet ma'a apsecama ietanwalhua ieplomo iemmen, elieplacja ta acuacjo aptalhnenwacjo pa'at, eleltennes jata apto apnemacja, jengetlhecmoscama lhquec apme' eijoc nentawecjelha conne pa'at pelhasep pascua ancoc. 15 Ca enenlhet anac ma'a eluetasquesec jata lhema aquiawai'a au'alhoc pa'at neten apnemacja, aquieplomo nema alanescama acnaicamoc caselhaja, elpeneso ta m'a cacpota antawocjac ma'a —lhna aptemac Jesus ma'a. 16 Ca apquenmeiecjo lhnac apqueltamesaicamoc aquieto Jerusalen ma'a, apqueluetai'ac nac actacja lhquec aplheianma Jesus, apquelpenescamo lhnac nentoma ancoc actacmelaicama lhma pascua. 17 Ca apto lhnac pelhasep ma'a, apmeiacjo lhnac Jesus cacpota njan apqueltamesaicamoc na temma Jerusalen. 18 Necsa aptaweicocja, lhna ptemac Jesus apquellanemo: —Lhema apiesecsec quetlhengcap, jeselhnanac jata —lhna aptemac. 19 Aiosac'ac na ntemac apualho'oc apqueltamesaicamoc, lhnac aptaiancoc ma'a: —Ma', jawe co'o— —Jawe nja colha —lhna aptaiancoc. 20 Coca Jesus lhna aptemac apquellanemo: —Jai', lhema pjapac jata jetuacsec, ca nentoiangco lheme nac. 21 Nlheianmec Engiapom Neten apaioma, co'o asto asqueniem'o neten astaiecjo Enenlhet apanque anwetsepoc jata, coca enenlhet apto jeselhnanongcoma, ngcowac jata lhema caselha ngcolatsecama apcaniemjaicamaja, ngcaimelhque lhta mangcotec ngquen enenlhet anac —lhna aptemac ma'a. 22 Necsa aptaweicocja, apmo lhnac Jesus alena apquenammap, apto lhnac gracias Engiapom Neten, ca apiapto. Apquellanco lhnac na apqueltamesaicamoc, lhna aptemac apquellanemo: —¡Enma', etawamoc! Coca jengca acto ejepetec— 23 Netamen apmamo lhnac na lhema nojaicoc vino, ca apto mocjom gracias Engiapom Neten, apquellanco lhnac na mocjom apqueltamesaicamoc, ca apienaianco lhnac ma'a. 24 Netamen lhna ptemac Jesus apquellanemo: —Coca jengca ema ejencoc, Engiapom Neten apqueltawec ngcoitec lhema apaioma alhnancoc 1 , ca jeng ema nac ngcotnec jata aluonquescama tep aplhamacjo enenlhet'awoc. 25 Actacja nnelha asiamo lhemec vino quetlhengcap, jatoca m'a ainecjoc mocjom vino alhnancoc Engiapom Neten apcawacja, jawe niapac anquec actacja nac aspaioma —lhna ptemac Jesus. 26 Netamen ma'a apquennecmaseianco lhnac salmo, ca apquenmeiecjo lhnac neten lhienep acjaiam acuesai'a Olivos, 27 lhna ptemac Jesus apquellanemo: —Nietnec actalhesammalhca Engiapom Neten apaioma, enietsepoc jata apquellanecama nepquesec, netamen engielhpacnec jata apnaqtoscama. Jata ngcotnec na quetlhengcap ma'a, jelieniecjac jata. 28 Coca netamen jennapma ta, Engiapom Neten jata jetnescasecjac mocjom ejalhnancoc apiesecsec apquenmasquenwaiacmo, netamen ma'a aniacjac jata aquieto natemma Galilea, amanie apquenmajai'a enmeiacjac quetlhengcap ma'a— 29 Netamen, lhna aptemac Pedro apcanemo Jesus: —Ngcacjoc eliengiecjac lhamacjo nac, co'o coca moieniecje lheiap —lhna ptemac Pedro. 30 Apcatemmoicama lhnac Jesus ma'a: —Jawe niapac, ca pelhasep anac, amanie acmajai'a ngcotnec janet acpaiwoma tape'e, janetolhem'a ta ngcotnec aplheianma mang jeiecpelquema lheiap —lhna aptema. 31 Coca Pedro aplhenecjawec na mota, lhna aptemac ma'a: —Ma', motnec jata co'o m'a, wacjo jennapoc lhemec lheiap— Lhnac na aptaiancoc ma'a aplhamacja apqueltamesaicamoc ma'a.
Jesus apacmetquescama Engiapom Neten aquieto iocjalhma acuesai'a Getsemani
32 Jesus cacpota njan apqueltamesaicamoc, apquenmeiecjo lhnac iocjalhma acuesai'a Getsemani, lhna ptemac apquellanemo: —Jellaielh jata jengque'e, Engiapom Neten asmac'ac apacmetquesec —lhna aptemac 33 Ca apquellaweianca lhnac ma'a Pedro, Jacobo, cacpota njan Juan cacpota etnancoc apquetlhelhma'ac tep atquetsec mocjom. Ampai'acja lhnac acmaiose apualhoc, apcai'ac nac na Jesus ma'a, 34 lhna ptemac apquellanemo: —Aiosec anquec ewalhoc co'o, aslenganque' asmajai'a anwetsepoc ¡Eniacjamoc jata quetlhengcap jengque'e, eleljalhnama ta, menacten ancoie'!—lhna aptemac. 35 36 Ca aplhengamo lhnac Jesus tep atquetsec ma'a, apqueltanentamo lhnac aptapno'oc nalhepop, cacpota njan apteclheclhemo lhnac na napa'at lhepop, lhna aptemac apcanemo Engiapom Neten: —¡Ta! jeieques aquientalhnema nac acmac'o na ngcowac, nietnec apmopuana lheiap, momac'ac atnejec asmac'acja atnejec, wanlha apquelto la apmac'acja la etnec lheiap —lhna ptemac Jesus ma'a. 37 Netamen apuactamo lhnac mocjom apcacjanquelha apqanetolhem'a lhquec apqueltamesaicamoc, apqueluetanwectamo lhnac apnacteianma, netamen lhna ptemac apcanemo Pedro: —Simon ¿Aptenque i'e? ¿Mancapuanque i'e metienec acuacmo lhema hora? 38 !Menacten coca! Elpacmetques Engiapom Nenten cacpota ellammelhec aliepconma quetlhengcap, apquellelto la ellanac actacmanma, mangcollapuanquec mocapancawec quetlhengcap —lhna aptemac apquellanemo. 39 Netamen Jesus apquelieniecjo lhnac mocjom, aptaiecjec nac mocjom actacja apacmetquescama Engiapom Neten ma'a, 40 ca apuacjo lhnac mocjom apcacjanquelha apqanetolhem'a lhquec apqueltamesaicamoc, apqueluetai'o lhnac apnaqteianma m'a, ngqueliaqnenaicama lhnac apqatco'oc, ten annapma', apqueliampai'a lhna songque. Ca apnaclhatecjascamo lhnac mocjom ma'a, ngquellennongquec nac ellatemmoma mocjom ma'a. 41 Netamen apquelieniacjec nac mocjom, janeto lhem'a lhnac nguaiacmoc apacmetquescama Engiapom Neten, apuectanwecjec nac mocjom apnaqteianma m'a apqueltamesaicamoc. Netamen lhna ptemac apquellanemo: —¿Ngjeclhe nac apnaqteianma? ¡Enaclhatacja! Apquetlhecmec enenlhet meliamolhma m'a, co'o pmac'ac jelpatjetec asto enenlhet asqueniem'o neten astaiecjo enenlhet apanque'. 42 ¡Elacnecja neten, etlhemma jalep! Ca aplhecmo nac ma'a apmajai'a jetuacsec —lhna aptemac ma'a.
Apatjetammap Jesus
43 Ngjeclhec nac apquellawecama Jesus apqueltamesaicamoc ma'a, apuai'o lhnac apqueltamescama apuesai'a Judas, apqueliantemaiacmo lhnac enenlhet'awoc, apquelletsoiacmo lhnac pelettau, iamet. Apquelemjama apmaniaie sacerdotes, jengetlhecmoscama jenganemacja Moises, cacpota nja apquellemjama apmaniaie judios lhnac apquellapascama m'a. 44 Lhna aptemac Judas secjec apquellanemo: —Ca aspetseso ta apmalhempenec, ca Jesus ma'a. ¡Elpatjet jata m'a, elaqlacja ta, eltacmelcaso ta apnactetema apmeioc! —lhna aptemac Judas. 45 Netamen aptetescaiacmo lhnac Judas Jesus ma'a, lhna ptemac apcanemo: —¡Jengetlhecmoscama!— Ca apetsescamo lhnac apmalhempenec Jesus ma'a, 46 colhuawec anquec nac apquelpatjetmac Jesus ma'a. 47 Apleclemo lhnac pellettau apancoc lhema enenlhet, apiaqtemanmo lhnac apaicoc apquennencasecama apuesque sacerdotes. 48 Netamen Jesus apquelelmalhnenca lhnac: —¿Se lha ntac apquetlhecmo nac ieplomo pelettau, cacpota njan iamet quetlhengcap? Malha enenlhet meijamolhma nac jeltemescasac. 49 Lhamacjo acnem alhta asquetlhecmoscama Engiapom Neten apnemacja, mang coca jelpatjetmac quetlhengcap ma'a. Coca colhuawe nac ngua'ac acnem jeiepconma, aclheianmo nac Engiapom Neten apaioma —lhna aptemac ma'a. 50 Ca apquengiaianco lhnac lhamacjo apqueltamesaicamoc, 51 52 ca apqueliantemecjo lhnac Jesus ma'a. Lhema apquetcoc nac na apieplecjac ma'a, apquelpatjetmo lhnac na niecje' quempocjacmec ma'a, aplecammacpawec nac aptalhnema m'a, ca apquenniemo lhnac ma'a metca aptalhnema, wanlha lhnac lhema apjapac aptalhnema m'a.
Jesus napaqtawec apquelemjama apmaniaie
53 54 Apieplecjec nac Pedro Jesus, mocjec nac aptaicama m'a, apuecjawec nac apnemacja apuesque sacerdotes, necja talha lhnac apnaiacmoc Pedro m'a, apcacjanquelha apquellanecama atong. Ca apqueliantemacjo lhnac Jesus apcacjanquelha apquelemjama apmanie sacerdotes, judios, cacpota njan jengetlhecmoscama jenganemacja Moises. 55 Apquenmajai'ac nac ennapoc, apquelleliaianca lhnac na moclhem'a enenlhet cacpota etnancoc apquenmopuanca ania'a etlhenec Jesus ngcolatsecama aptemacja. 56 Ca apqueluai'o lhnac enenlhet apquetlheianmo lhnac ngcolatsecama aptemacja Jesus ma'a, coca apquenmopuanca ania'a lhnac, alpeiwecja lhnac aptaiancoc apquetlheianma m'a. 57 Lhna aptaiancoc enenlhet: 58 —Nenleng'a lhta ennenco'o apaioma Jesus, apmac'a lhta etuacsec Engiapom Neten apnemacja nac, ennenco'o lhta nellanai'a, netamen janeto lhem'a acnem alhta aplhenac elanecjoc mocjom metca cnema acpasmoma —lhna aptaiancoc ma'a. 59 Coca alpeiwecja lhnac aptaiancoc apquetlheianma m'a. 60 Netamen apquenmecjo lhnac neten apuesque sacerdotes, apquenmalhneianca lhnac Jesus ma'a, lhna aptemac: —¿Apleng'a i'e aplhenammap ngcolatsecama aptemacja lheiap? Eniasennacpo no panque — lhna ptemac. 61 Coca mang nac eniatemoicama Jesus ma'a. Apquenmalhnecjawe nac mocjom apuesque sacerdotes: —¿Lheiap ai'e Cristo, Engiapom Neten apquetca?— 62 —Jai, co'o asto nac asqueniem'o neten astaiecjo Enenlhet apanque, jeluetac jata alhec napocja Engiapom Neten aquieto aquiennacja, cacpota njan asquelhiacmo ta aisecsec iepjopai'a aquieplomo asiennactema aniem'o Engiapom Neten —lhna ptemac Jesus. 63 64 Necsa aplengai'a lhnac ma'a, ca apiaptemo lhnac aptalhnema apuesque sacerdote, aniem'o acnatjescama, lhnac aptemac: —Aptewasque apuesai'a Engiapom Neten enenlhet anac, mangcaimelhcac angeliama mocjom enenlhet cacpota etlhenec meijamolhma, ntasec angaqjec —lhna aptemac. Lhamacjo apqueluesca ie lhnac apquelleltemoc ematong Jesus ma'a, 65 moclhem'a lhnac apquelhpacjaiancoc apiemmanong, cacpota njan apquellapquescanquec nac na apaqto'oc, apqueltecponganquec nac na m'a, lhna ptaniangcoc apquellanemo: —¿Se lha actecpongo nac que?—lhna aptaiancoc. Apquellanecama Engiapom Neten apnemacja, lhnac na apqueltecpomac napa'at Jesus ma'a.
Aplheianma Pedro meiecpelquema Jesus
66 67 Necsa apqueltecpoicama lhnac Jesus, apnenque nac Pedro m'a conne acjalhtemommalhca aquieto aujac pa'at, talha lhnac apquelhtemac ma'a, ca acuo'o lhnac lhema nqueluana apuesque sacerdote apquennencasecama, ngqueltamescamawec nac ma'a, lhna ntemac anemo: —Lheiap alhta njan aptaicama aplhelhma Jesus co Nazaret —lhna ntemac ma'a 68 —Moiecpelcac co m'a enenlhet anac —lhna aptemac Pedro. Ca apteiapmo lhnac Pedro m'a, ca acpaiwo lhnac tape'e. 69 Netamen, acuet'o lhnac mocjom nqueluana lhquec Pedro, lhna ntemac allanemo atlhelhma'ac: —Ca lhema enenlhet anac apieplecama lhta njan Jesus jam—lhna ntemac. 70 —Moiecpelcac co m'a enenlhet anac —lhna aptemac Pedro apcatemmoianca. Netamen moclhem'a enenlhet nac aptaiancoc apquellanemo mocjom Pedro: —Jawe niapac anquec, lheiap alhta njan apieplecama Jesus, apquelleniem'o lhemec Galilea— 71 Apiennactescanquec nac apaioma Pedro m'a, lhna aptemac: —Alhenocja lhquec moiecpelquema co enenlhet anac, Engiapom Neten jata jetuacsec mangcotno la iocjalhme alheianma nac —lhna aptemac. 72 Ca acpaiwo lhnac mocjom tape'e, aclheianwacjo lhnac apualhoc Pedro, actacja lhta apaioma Jesus: —Amanie acmajai'a ngcotnec janet acpaiwoma tape'e, janetolhem'a ta ngcotnec aplheianma mangjeiecpelquema lheiap —lhna ntemac aclheianwecjo apualhoc Pedro m'a. Netamen, apuenemo lhnac nquescama Pedro m'a.

1Pacto

Capítulo 15

Jesus napaqtec Pilato
1 Mmopeiacmec na lhma' atsai'a m'a, apcacnecjo lhnac apquellemjama apmaniaie sacerdotes, apquellemjama apmaniaie apquellawacja', cacpota njan jengetlhecmoscama jenganemacja Moises, cacpota elpacmetquesacpoc etlhenec apmac'acja eltemesquesec Jesus ma'a, ca acnaqtetelhco lhnac apmeioc Jesus, apqueliantemecjo lhnac napaqte apuesque Pilato m'a. 2 Netamen apquenmalhnenca lhnac Pilato Jesus ma'a, lhna aptemac: —¿Jawe nlho niapac lheiap apuesque judios? —lhna aptemac —Aplhenquec lheiap —lhna ptemac Jesus ma'a. 3 Coca apquellemjama apmaniaie sacerdotes apquelpesqueiacmec nac ngquescama caselha ngcolatsecama mota apquelanai'a Jesus, 4 lhna ptemac Pilato apcanemo Jesus: —!Eniatemmoma no aplhenammap!— 5 Coca Jesus mang nac eniatemmoicama m'a. Niemascangquec nac apualhoc Pilato apuetai'o meniatemmoicama m'a.
Enenlhet apquelleltemo ellaqjec Jesus
6 Necsa actacmelaicama lhma pascua, aptemacja lhna mota Pilato ellancoc apmac'acja la etnancoc enenlhet, cacpota elpaqnemecja lhema apcaqlhencasemmap la'a. 7 Apnenquec nac lhema enenlhet nengaclhengcasemmalhquelha m'a apuesai'a Barrabas cacpota njan apquetlhelhma'ac, apquennapmo lhnac enenlhet necsa apquelammelhammap apquennapommap apuesque Roma. 8 Ca apqueluecjo lhnac enenlhet apnacja Pilato, apquelleltemo lhnac etepcasecjac lhema enenlhet apcaclhencasemmap, aptemacja lhna mota Pilato m'a. 9 10 Apiamawec nac Pilato, apquellemjama apmaniaie sacerdotes apqueliantemecjo Jesus apnacja, ncanec apqueliasepquescama lhna songque', ca apquelelmalhneianca lhnac enenlhet'awoc ma'a, lhna aptemac: —¿Apquelleltawe nlho quetlhengcap apacnemecjac judios apuesque apanco'oc? —lhna aptemac. 11 Coca mang nac eleltemoc enenlhet'awoc ma'a, ncanec apquellemjama apmaniaie sacerdotes nac apquelpaqmetquesaiancoc ma'a cacpota ngcolhec acpacnemacjo Barrabas. 12 Netamen Pilato apquelelmalhneianca lhnac mocjom enenlhet'awoc: —¿Co la apqueltacja atnec alanjo apuesque judios? —lhna aptemac 13 —!Eliaclha apmeioc cacpota njan apmancoc neten iamet actennescama ! —lhna aptaiancoc enenlhet'awoc ma'a. 14 Coca lhnac aptemac Pilato: —!Metcocja la apquelanai'a caselha ngcolatsecama enenlhet anac!— Coca enenlhet'awoc mang nac ellescamac apiapcalheianca, lhna aptaiancoc: —¡ Eliaclha apmeioc cacpota njan apmancoc neten iamet actennescama! — 15 Ca apaqnemacjo lhnac Pilato Barrabas, apquelto lhnac ngcolhec aliacpelhquetanca caselha aiempec nema alanai'a Jesus, cacpota njan ngcolhec aliaqlho apmeioc, apmancoc neten iamet actennescama. Coca apqueltemawec nac ellamelecjoc Pilato napaqtawec enenlhet'awoc ma'a.
Apuannammap Jesus
16 Ca apqueliantemacjo lhnac apcacjaianquelha soldados Jesus conne pa'at aquiawai'a, apquellaweianca lhnac apqueltemo lheme', 17 apqueljatsoscaseianco lhnac aptalhnema m'a, ca apquelentalhnescasecjo lhnac apuenactema aptalhnema apaiseiam apielhuasema, nnengquec nac na alhenquescamo nema alanai'a iamet actengoc aquieplomo am'oc apqatec Jesus ma'a. 18 Ca ampai'acja lhnac apqueluannaicama m'a, lhna aptaiancoc: —¡Aptasec noca niecje apuesque apanco'oc judios! —lhna aptaiancoc. 19 Netamen apqueltecpoianca lhnac iamet apqatec ma'a, cacpota njan apquelelhpaqjai'o lhnac na apiemmanong, apquellelteclheianquec na mota aptapno'oc apquenmanquelha', aptaiancolha lhna mota napactawe' apqueluescaie apanco'oc. 20 Ngquelastenguaiacmec nac apqueluannaicama, ca apqueljatsosquescamo lhnac apquellentalhnesecja lhquec, apquelentalhnesacjo lhnac mocjom aptalhnema apanque', ca apqueliantemecjo lhnac ma'a cacpota ngcolhec aliaclho apmeioc, apmancoc neten iamet actennescama.
Jesus nema aliaclhaclhema apmeioc apmancoc neten iamet actennescama
21 Apquelenteiapmec nac soldados conne' pa'at aquiawai'a, apqueliantemecjo lhnac Jesus ma'a, ca apqueluaiacmo lhnac nalhet amai, apqueluetanweiacmo enenlhet apuesai'a Simon co Cirene, apqanet nac apquetcac ma'a, Alejandro cacpota njan Rufo. Apquellapecama lhnac soldado apqueleltemo epasmoc Jesus cacpota epatmoc esacjac iamet actennescama aquientalhnema. 22 Lhnac apqueliantemecjac Jesus ma'a iocjalhma acuesai'a Golgota, nema altema acnaianquelha ientepac nema apqatco'oc, 23 ca apquellaianco lhnac niecje' iama anmen aquiepetcai'a panactema jentacmetquescama cacpota mennangquec acmasca, coca mang nac eiamac Jesus ma'a. 24 Ca apqueliaclhai'o lhnac apmeioc apmancoc neten iamet actennescama Jesus, la 9 sosecjec nac ma'a, ca apnactewaseianco lhnac lhema nennactewascama soldados ma'a, nennietemo cacpota esacjac Jesus aptalhnema. 25 Ca apqueleclhanmo lhnac tacjaplhet lhema iamet acpaijema actalhesammalhca, lhna ntemac acpaioma, judios apuesque apanco'oc. 26 Apqanet enenlhet meliamolhma lhnac na nnemac aleclhanmo lhemec neten iamet actennescama 27 Jesus ma'a, lhema lhnac aquiennacja cacpota njan sangcaluelha. 28 29 Necsa apqueliecai'a lhnac enenlhet, apqueluannaicama lhna mota Jesus ma'a, lhna aptaiancoc: —¡Jei! Aplhenque lhta lheiap acnema apmopuana cacpota etuacsecjac Engiapom Neten apnemacja, elanecjac acuacmo janetolhem'a acnem. 30 Ca acto la jaweniapac anque, aquietnema aquiawai'a apmopuana lheiap, etiep no neten iamet actennescama nac, ewoncasacpo no panque' tep —lhna aptaianco enenlhet ma'a. 31 Apquelemjama apmaniaie sacerdotes, cacpota njan jengetlhecmoscama jenganemacja Moises, apquelluaiacmawec nac na apquelluannaicama Jesus ma'a, lhna aptaiancoc: 32 —Apuoncasque lhta tep po'oc, ewoncasacpo jatelha panque tep, aplhenacpe lhta panquec apto Cristo, etiepoc jatelha apanquec na neten iamet actennescama nac, cacpota mangeliascamec ennenco'o —lhna aptaiancoc ma'a. Apqueluannaicama lhnac na enenlhet lhec apqanet meliamolhma, nema aleclhanmo lhemec neten iamet actennescama Jesus ma'a.
Apquetsepma Jesus
33 Catelho lhna ntemac, aquienacteso lhma neten acuacmo la 3 ienacteso, 34 ca apqueliatenca lhnac Jesus aquiennactema, lhna aptemac: —Eloi, Eloi ¿Lema Sabactani? Neltema, Engiapom Neten, Engiapom Neten ¿Se lha ntac jeieniacjo nac que? — lhna ptemac Jesus ma'a. 35 Netamen, lhnac aptaiancoc enenlhet : —Ellailhonojo, Elias Engiapom Neten secama ania'a apancoc apcawema ja'e —lhna ptaiangcoc ma'a. 36 Lhema lhnac apuetanweiacmoc aia'ac ma'a, apqueltelhnaianco lhnac vino acmasca, apteto lhnac nau'a iamet acuenactema, cacpota epetsesquesec Jesus, netamen lhna ptemac apquellanemo enenlhet: —Ia', angellanama enganco ie', elhiemoc jatelha Elias aplheno lhquec, etepquescatac jatelha neten iamet actennescama nac —lhna ptemac ma'a. 37 Netamen Jesus, apueneianca lhnac aquiennactema, ca apquetsepmo lhnac ma'a. 38 Colhuawec anquec nac, apiaptemmacpoc ietamopai'a apjalhtemommap conne Engiapom Neten apnemacja, neten nac ngquempai'ac apiaptemmap acuactamo coneng 39 Apnenquec nac na m'a lhema soldado Romano apquemjama apmanie', apuetaianque nac apquetsepmo Jesus ma'a, lhnac aptemac: —Jawe niapac anque nac, Engiapom Neten apquetca jeng, enenlhet anac —lhna ptemac.
Nema acpeccanwecja' Jesus apjapac conne metaimong alhua
40 Ngquellomaca lhnac na moc lhem'a ngqueluana'ac ma'a, mocjec nac ngquellanecama Jesus apquetsepmo m'a. Maria Magdalena, Salome, cacpota njan Maria, Jose nquen, apselhiec nac atca apuesai'a Santiago. 41 Alieploianquelha nquec nac Jesus ma'a, ca alpasmomo lhnac aquieto Galilea. Ngquellomaca lhnac na m'a aclhamacja ngqueluana'a, altemo lhnac atlhelhma'ac ma'a necsa apmeiecja Jerusalen. 42 Viernes ienacteso lhna ntemac, apquellanecjec nac apqueltacja judios amanie acnem nennecjelha. 43 Lhema enenlhet nac apuesai'a Jose co Arimatea, apiawecjo lhnac apnacja apuesque Pilato, cacpota elmalhnenwacjac Jesus apjapac ma'a, mang nac eniai'ac ma'a. Jose lhnac na apto apquemjama apmanie, apacmetquescanquec na mota Engiapom Neten lhamacjo acnem, apqueltemo lhnac ngcowa' colhuawec anquec Engiapom Neten apmopuana. 44 Mpelapquescangquec nac aplengai'a Pilato apquetsepma Jesus, ca apcawenca lhnac lhema soldado cacpota enmalhnama jawe quelha niapac ania'a nac. 45 Netamen soldado lhna ptemac apcatemmoianca: —Jai, jawe lhque niapac ania'a —lhna ptemac. Ca apqueltemo lhnac Pilato elcoc Jose, Jesus apjapac neten iamet actennescama m'a. 46 Ca apmeiecjo lhnac Jose m'a cacpota elecuacjac Jesus neten iamet actennescama, apelhquetmo lhnac lhema ietamopai'a apmennawe panque', apeccanwecjo lhnac conne metaimong alhua. Mangnac ngcowangcoc alanemmalhca m'a, ca apcapecjo lhnac na atong lhema metaimong aquiaquiema aquiawai'a. 47 Ngquellanecama lhnac ma'a Maria Magdalena cacpota njan Maria Jose ngquen.
Capítulo 16

Engiapom Neten aptemescasecja' apjalhnancoc Jesus apiesecsec apquenmasquenwaiacmo
1 Netamen, niecai'ac nac acnem 1 sabado, Maria Magdalena, salome cacpota njan Maria Santiago ngquen, anmaianco lhnac acmases aimes aimenec cacpota ngcollelhpacjanguacjac Jesus apjapac. 2 Domingo sosecjec na ntemac, secja acteiapma acnem, anmeiecjo lhnac aquieto metaimong alhua, 3 4 necsa atlhengama, ngquelelmalhnecama lhnac mo'oc: —¿Se lha jenglecquesec nemma apma nac atong metaimong alhua? ¡Awanjec ma'a, nientelhec najan! —lhna ntaiangcoc ma'a. Necsa aluecja lhnac ma'a, aluetai'o lhnac aclecammalhca atong. 5 Ca alentalhnemo lhnac conne metaimong alhua' m'a, aluet'o lhnac na lhema enenlhet apquetcoc apmopai'a apanquec aptalhnema apuenactema, apnenquec nac aquieto aquiennacja. Mang na ngquescamac allai'a m'a, 6 lhnac aptemac apquellanemo apquetcoc anac: —Mangjellaga, Jesus co nazaret ngquelquetamac quetlhengca, apquetsepma lhta neten iamet actennescama. Mamma jengque'e, Engiapom Neten lhec aptemesquesacjac apjalhnancoc apiesecsec apquenmasquenwaiacmo. ¡Collanjono, ca aquietnacja lhta apjapac Jesus! 7 Coltacjo ta colhuawe, colleltennaso ta apqueltamesaimoc anac cacpota njan Pedro, ca apmeiacjac apmanie m'a aquieto Galilea, jata eluetanwacjac ma'a, actacja lhta apaioma amanie apquetsepma —lhna aptemac. 8 Netamen ngqueluana'ac anac ngqueletquecjec nac ma'a, nquellelpelhiennongquec nac allai'a, necsa atlhengama amai mang nac ngcotlheianmac actacja aluetai'a, ncanec nquellienguactenquec nac ma'a.
Apuetasquesammap Jesus Maria Magdalena cacpota njan apqueltamesaicamoc
9 Engiapom Neten nac aptemescasecjac apjalhnancoc Jesus apiesecsec apquenmasquenwaiacmo, domingo sosecjec anquec nac ma'a, Jesus apuetasquesammacpo amanie Maria Magdalena, apquelpaqnenquescasecjo lhnac secjec anquec 7 queliacjameio m'a. 10 Ca aleltennascacjo lhnac ania'a apqueltamesaicamoc, nqueliepuameiangquec nac ma'a, apiapcalhenquec nac najan, 11 apqueliasqueiacmec noca ania'a m'a. 12 Netamen apuetasquesammacpo lhnac na Jesus apcanet apqueltamesaicamoc, moca actema lhnoca ntemac napa'at ma'a, necsa apquetlhengama amai. 13 Netamen apquenmeiecjo lhnac apqueleltennascacjo apquetlhelhma'ac actacja apqueluetai'a, coca apqueliasqueiacmec noca m'a. 14 Netamen apuetasquesammacpo lhnac mocjom 11 apqueltamesaicamoc ma'a, necsa aptaweicocja lhnac ma'a. Mang nac eniescamac apatong Jesus apquelanei'o, ncanec apqueliasqueiacmec na songquec aptescasecja mocjom apjalhnancoc apiesecsec apquenmasquenwaiacmo Engiapom Neten, aniem'o alliennactema apualho'oc.
Jesus apquellapascama apqueltamesaicamoc lhmanquec jam cacpota elhpanquesec ania'a actacmanma
15 Netamen lhna aptemac Jesus apquellanemo apqueltamesaicamoc: —Enmamoc jata quetlhengcap lhmanquec jam, ellelhpanques jata ania'a actacmanma aniem'o Engiapom Neten. 16 Mang jata nque jeliascacmoc enenlhet'awoc, ngcolhec jata allauqueso conne iemen cacpota eluoncasacpoc tep, coca jeliascacmo la'a, mollanjec jata co'o enenlhet'awoc anac. 17 Coca mangjeliascacmo la'a, co'o ta allancoc ellanac caselha jempelapquescama, eliengiescasecjac jata queliacjameio' enenlhet, cacpota njan apquenmopuanca'a mo'oc apquelpaqmeiasma, 18 enmoc jata niecje njan menasma, ngcaqjoc jata meluetangquec einancoc aimenec jengaqjemo, mangcolhec jata actacja. Eniacjesancoc jata njan apmeio'oc tacjaplhet anmasca apiempeioc, eltacmelecjac jata—lhna ptemac Jesus.
Jesus nema aquiantemecja neten
19 Ca apsaujomo lhnac actemacja apqueleltennasecama apqueltamesaicamoc Jesus ma'a, ca acno lhnac aquiantemacjo m'a neten, apnec ma'a aquieto neten anquec aquiaspommalhquelha, aquiennacja apoctong Engiapom Neten. 20 Ca apquetlhengamo lhnac apqueltamesaicamoc, apquelpaiescamo lhnac ania'a actacmanma aniem'o Engiapom Neten lhma nquec jam, apquelpasmonquec nac na Jesus ma'a, apquellaianquec nac apquenmopuanca'a cacpota ellanac caselha jempelapquescama. Ca apqueluetai'o lhnac na enenlhet actemacja apquellanai'a apqueltamesaicamoc Jesus ma'a, apqueliamawec nac enenlhet'awoc aniem'o Engiapom Neten apmopuana.

1El dia duraba desde que sale el sol hasta que se mete el sol