\id php \ide UTF-8 \toc1 Filipenses \toc2 Filipenses \toc3 php \h Filipenses \mt Filipenses \c 1 \v 1 Co'o Pablo cacpota njan Timoteo, nengellelto jengelasennaicama Jesucristo, nquetlhenquec engellualho'oc engelialheng'a apcacjanco jam aquieto natemma Filipos, apquellelto Engiapom Neten apquennemolhema aniem'o apquelpasmecja Cristo Jesus. Ca njan nquetlhenac na engellualho'oc ennenco'o apquelemjama apmaniaie' jam cacpota njan nema allasennaicama nac. \v 2 Nengelleltawec Engiapom Neten cacpota njan apuesque Jesucristo ewaiwesentac apquellamelaiam cacpota njan metca altaicama apualho'oc jam. \v 3 Gracias co'o astajac Engiapom Neten necsa aclheianma mota ewalhoc quetlhencap, \v 4 asquenmalhnescasquec na m'a aquieplomo acpaijecja ewalhoc cacpota eltacmelquesec moclhem'a quetlhengcap ma'a, \v 5 ca ncanec ampai'acjasecja lhta apquellengai'o secjec ania'a actacmanma acuacmo nenwanlha nac, jelpasmonque lhta mota asmacmecama nac. \v 6 Ampaiosecja lhta apquelanai'a Engiapom Neten apqueltacmelquesquescaiam apualho'oc apiesecsec anac quetlhencap, jawe ngiapac anquec epenacsec jatoca m'a apmacmecama nac acuacmo apuactamo ta Jesucristo jenque'e. \v 7 Nietawec atnec aclheianma ewalhoc quetlhencap aquieplomo acpaijecja ewalhoc ncanec jelpasmoma mota nesca asmacmecama aniem'o Engiapom Neten jeiaicamoc aniem'o njan jeiamelaiam ma'a. Jai, niecje asnema conne nengaqjencasemmalhquelha canjan napaqtawec apqueluescai'e cacpota anwasennalhco ejenque aniem'o ascanemmalhca moiecacsec aspaiescama ania'a actacmanma, jelpasmonque mota njan quetlhencap ma'a. \v 8 Apiawec coca Engiapom Neten awanjec jeliepuaiam asmajai'a aluetecjac quetlhencap jam aniem'o aquiawai'a asquellamelaiam aniem'o njan Cristo Jesus. \v 9 Asquenmalhnema njan Engiapom Neten eluanenquesquesec apquellamelammacpo apiesecsec anac quetlhencap, cacpota njan ellanco acnema apqueliamo cacpota elianwomjoc na \v 10 aquietemo nque nac nentemacja. Netamen ma'a elloca ta metca apquellanecamoc caselha ncolatsecama, mancolhec jata njan apquetselhnanemmap napaqtec Cristo apuactamo ta mocjom. \v 11 Jai, ellanancoc jata nquescama caselha altacmelo quetlhencap jam aniem'o apquelpasmoma Jesucristo, netamen jata njan eltacnescasancoc, ellajoc jata njan Engiapom Neten apuesai'a apquellelto la apqueluetai'a enenlhet'awoc jam. \v 12 Quetlhencap ellialheng'a, smac'ac aleltennacsec colhuawe nac niecje asnema conne' nengaqlhencasemmalhquelha', ntasec coca njan mpaijenquec ania'a ctacmanma \v 13 jenque'e napactawec apqueluescai'e apcajaiancolha nac pa'at aquiawai'a, cacpota njan aplhamacjo enenlhet'awoc anac jenque'e. \v 14 Necsa apquelengai'a lhnac engelialheng'a asnema jenque'e nengaqlhencasemmalhquelha' nac, awanjec na lhta apqueluascapejo apquelpaiescama ania'a actacmanma metca apquellai'a aquieplomo njan meliasqueiam Apuesque. \v 15 Moclhem'a lhta apquelpaiesac ania'a aplhenammap Cristo aniem'o jeliasepquescama co'o aptengianque lhta njan apquenmajai'a jellammelhecja, napocja alhtoca apquelpaiesquec ania'a aplhenammap Cristo altacmanma apualho'oc \v 16 aniem'o aquietnema apquellamelaiam, apquelliawec na apto Engiapom Neten jeiaicamoc asmacmecama nac cacpota anwasennalhco anio'oc ania'a actacmanma. \v 17 Coca napocja apquelpaiesquec ania'a actacmanma aniem'o apquenmajai'a etnancoc neten apancawec napaqtawec enenlhet, jawe iocjalhmoie', wanlha coca apquenmajai'a jenactewacsec co'o necsa asnema jenque'e nengaqlhencasemmalhquelha nac \v 18 Coca ncacjojo, niecje jawe iocjalhme, nlho ca la iocjalhme, mpaijacjec ewalhoc co'o ncanec nnec acpaieso ania'a aplhenammap Cristo. Coca ncopaijecjac jata mocjom ewalhoc ma'a \v 19 ncanec asiawec co'o ncolhec jata ewoncaso tep aniem'o jelelmalhnesquescama quetlhencap, aniem'o jepasmoc jata njan Apualhoc Jesucristo. \v 20 Jai', nietnec aljalhanma ewalhoc manjenmancacsec jata njan enenlhet'awoc, jawe ngiapac anquec, eluetac jata aplhamacjo aquietnema asmopuana aniem'o Cristo, niecje astema ejalhnancoc mocjom nlho ca la amasquenwomoc jatelhaja. \v 21 Ca asto la mocjom ejalhnancoc, anwasennama ta mota mocjom Cristo, coca asmasquenwacmo la'a ntasec na ncotnec ma'a. \v 22 Coca asto la mocjom ejalhnancoc ewanquec apasmoc mocjom cacpota altacmelquesquesec apquellaniemjaicama aplhamacjo enenlhet'awoc jenque'e, moijoc actemacja janet caselha nac co la actacmelacja atnec ma'a. \v 23 Nientelhec anquec angeliequiacsec ma'a, asqueltawe niecje amasquenwomoc cacpota amjamcoc ma'a alhnemoc napocja Cristo, coca m'a neten anquec actacmanma. \v 24 Coca ntasec na atnec ejalhnancoc mocjom jenque'e cacpota alhenquesec asquelpasmoma quetlhencap. \v 25 Jai', asiawec co'o ascaimelhque mota apiesecsec anac quetlhencap jam, ca ncanec momasquenwacmoc, alpasmoc jata mocjom cacpota ncowanamoc meliasqueiam, elloca ta njan alpaijecja apualho'oc. \v 26 Aniantac jata mocjom jam apiesecsec anac quetlhencap, ncolpaijecjac jata apualho'oc jelueto ta aptemacja Cristo jepasmoma m'a. \v 27 Wanlha asqueltawec allancoc lhema aspaioma asquellanemacja etnancoc quetlhencap, ellanamo mota caselha acpeiwomo ncoie actemacja nac jengetlhecmoscama ania'a actacmanma aniem'o Cristo, ncacjoc mongiacje' nlhoca la angiacjac jam asqueltawec coca aijo ejenque njeclhec quelha aliennactema meliasqueiam, acnemo njan mo'oc apualho'oc apquellammelhma la njan aquientalhnema acuai'a la'a aniem'o m'a meliasquiam ania'a actacmanma. \v 28 ¡Mellaga nquec alammelhaicama nac! Ncotlhenec jata au'alho'oc nconaqtewasalhcac ma'a, ncotlhenec jata njan au'alho'oc eluonquesec jata tep Engiapom Neten quetlhencap ma'a. \v 29 Engiapom Neten apquellaicamoc quetlhencap caselha actacmanma nquec acuesai'a meliasqueiam Cristo, apquellaicamoc na apquellengaianco aquientalhnema aniem'o apquelleliejecjo Cristo. \v 30 Ca ctemo lhta co'o ascaniemjaicama aslengaianco lhta aquientalhnema, acuacmo njan colhuawe nac, apquelliawec quetlhencap ma'a. \cl Capítulo 1 \c 2 \v 1 Coca apquellanco la Cristo quetlhencap apquenmopuanca'a cacpota eliatecjoc po'oc, alpecjesanca la njan apquellamelaiam cacpota elpaiesquescamoc apualho'oc po'oc, acno la njan mo'oc apualho'oc cacpota njan apquelietnai'o la napa'at po'oc, \v 2 netamen elloca ta m'a metca acmasca apiesecsec quetlhencap ma'a, ellamelemmac na po'oc, acnemo njan mo'oc apualho'oc, etengiancoc na acnemo mo'oc caselha apanco'oc. Ca aptanco la quetlhencap ma'a, ncopaijecjac jata ewalhoc co'o. \v 3 Metnamoquec apquelammacpo, mellanamo nquec na caselha apquelasquesammap ame', eltamoc coca nalhepec apualho'oc, eltemesques jata njan neten apancawec po'oc la'a jawe aptanco nac quetlhencap. \v 4 Meltengiamoc apanco'oc apancawec caselhaja cacpota ncotacmelec apquellaniemjaicama wanlha quetlhencap ma'a, coca ntasec elleltoc ncoltacmelec apquellaniemjaicama po'oc. \v 5 Quetlhencap apquelpasmecja Cristo ca nqueniemai'ac ntasec ncolquetamancoc apualho'oc aptemacja lhta m'a Cristo, \v 6 \v 7 niecje apnemo lhta Engiapom Neten ma'a coca apiengiecjec na aptemacja apientalhnemo niecje m'a, mancomajai'ac epatjetec nengientalhnemo m'a ncanec apnawec Engiapom Neten, coca enenlhet apanque lhta aptaiecja, aptemo njan nema asennaicama aplhamacjo m'a, \v 8 aptacje lhta njan meientalhnemo m'a, apqueliejecjo njan acuacmo apquetsepo neten iamet actennescama. \v 9 Ca nqueniemai'ac etnesquesec Engiapom Neten neten apanquec ma'a, aptengiasquescamo njan apuesai'a neten anquec apiaspommap ma'a apiesecsec aplhamaco enenlhet'awoc, \v 10 netamen apquellelto apcacjaicamoc neten canjan nalhepop cacpota njan coneng lhepop anac ellelteclhencoc aptapno'oc napaqtec ma'a, \v 11 elianwomjoc jata Jesucristo apto apuesque, netamen eltacnescasancoc jata njan Engiapom Neten apuesai'a aniem'o aquietnema aquiawai'a apmopuana. \v 12 Quetlhencap elialheng'a jelleliejecjawe lhta mota asnemo lhta apiesecsec jam, ntasec na jelleliejecjoc colhuawe nac necsa asnema mocje, ellanamoc jata lhamacjo caselha aimommalhquelha la'a cacpota ncolhec aluoncaso tep, aquieplomo necsa apquellai'o cacpota njan necsa apquellelpelhiennoma. \v 13 Engiapom Neten jata elpecjesama ellanancoc caselha altacmelo, elpasmoc jata njan cacpota ellanancoc ma'a aniem'o apiamolhma. \v 14 Enmacmama ta njan metca apquelmalengioicama, metca njan apquetlheianma po'oc aptemacja \v 15 cacpota eluetacpoc apquellelto apqueliamolhma quetlhencap, aptanco njan Engiapom Neten apquetcac apiesecsec enenlhet meliamolhnma canjan apqueltemenwecjo nalhma. Ntasec etnancoc malha apquelaponmatma quetlhencap apiesecsec ma'a, \v 16 melieniau anquec na ania'a actacmanma acto nac jengaicamoc nengiennactema, netamen ncacjama ta ewalhoc co'o m'a apuactamo ta Cristo ncanec jawe aqjemo asmacmecama apiesecsec quetlhencap jam. \v 17 Maliasqueiam anac quetlhencap malha niecje ntac nema acmescama nac Engiapom Neten caselha nentoscama acuanlhenmalhca nac, ca asquetsepo la co'o necsa jelasennaicama quetlhencap, ema ejencoc malha ntacjac nema alianquenaicama nac tacjalhet caselha nema acmescama Engiapom Neten, jata acto ta ascaniemjaicama m'a ncaqjoc mancotnama ta ewalhoc ma'a, asqueltawec na quetlhencap mancoltama apualho'oc lhemec co'o m'a. \v 18 Jai, eltacmelcaso ta apualho'oc quetlhencap astemacja nac co'o. \v 19 Apquelto la apuesque Jesús anwapacsec jata Timoteo jam aptengiacama la ania'a apiesecsec anac quetlhencap cacpota ncopaiesecjac ewalhoc co'o. \v 20 Wanlha lhema Timoteo acnemo mo'oc mota enwalho'oc apmajai'o panque' elpasmoc quetlhencap jam, \v 21 coca napocja enenlhet'awoc anac aptengianque mota apanco'oc apancawec caselhaja, moca ellanencoc apquellanemacja nac etnancoc Jesucristo. \v 22 Apquellengai'a quetlhencap actacmanma aptemacja Timoteo, awanjec asmacmecama lheme' aplheianma ania'a actacmanma, jepasmec najan malha apto nac eietca la'a. \v 23 Ca acleco nac ewalhoc anwapacsec jata jam, amanie coca secjec co'o jenque'e asmac'ac aijoc acmac'acja ta ncotnec ascaniemjaicama, \v 24 nlhenque niecje ewalhoc Apuesque jepasmoc jatelhaja cacpota aniantac co'o colhuawec anquec jam astaicama la amaica'a. \v 25 Jata njan ataqjeso neptamen ascapascama engialheng Epafrodito mocjom jam, apquellapascama lhta quetlhencap cacpota jepasenwatac aimelhquelha la'a co'o jenque'e, \v 26 awanjec aliepuaiam apmajai'a eluetecjac quetlhencap, awanjec na actaicama apualhoc aplheng'a alhta ania'a anmaiosac'a apualho'oc quetlhencap ncanec nemmasquema lhta ncaqjemac jenque'e. \v 27 Jawe lhta ngiapac ma'a, awanje lhta acmasca apiempejec nquetlhencasque lhta engietsepoc coca Engiapom Neten alhta njan apietnai'awec napa'at ca apuoncaso tep, cacpota njan co'o apietnai'awec neja'at ncanec ncanatanco nlho lhta acmaiose ewalhoc apquetsepo la m'a. \v 28 Colhuawec anquec jata anwapacsec Epafrodito jam cacpota ncolpaijecjac apualho'oc apqueluetacjo la quetlhengcap, ncomascoc na anmaiosac'ac apualho'oc. \v 29 Enma ta tacja aquieplomo alpaijecja apualho'oc apqueltemacja na mota etnancoc Apuesque, ellajo ta aplhamacjo aptemacja na mota m'a. \v 30 Niecje atlhenquescama lhta engietsepoc aniem'o apieplauquescama apcanemacja Cristo, nquetlhencasque lhta njan engietsepoc aniem'o jepasmoma co'o ncanec taiepec apcacjaianquelha quetlhencap mancollapuanquec elpasenwatac jenque'e. \cl Capítulo 2 \c 3 \v 1 Quetlhencap elialheng'a, colpaijecja apualho'oc aniem'o apquelpasmecja Apuesque. Smac'ac anwempasecjo mocjom astalhesquescama astacja lhta njan aptalhescama secje lhta, manjeliasalhma altacjenwescacja astalhescama nac aniem'o ncoltacmelquesquesec jata apualho'oc apquelleng'o ta. \v 2 ¡Ellajo ta enenlhet malha nac semjeng! Enenlhet meliamolhma nac apquenmac'a mota eltemesquesec circuncisión quetlhencap, coca mancaimelhcac etnancoc ma'a, \v 3 ncanec ennenco'o nengellelto nac nengellasennaicama Engiapom Neten aniem'o njan Apualhoc apanque, malha circuncidado ntac napaqtec ma'a. Nquellaqjama ennenco'o engellualho'oc aniem'o mongeliasqueiam Cristo Jesús, mongelleltemo ennenco'o ncolhec jengelleltacmelquescaso aniem'o nelieplauquescama aptaiancolha nac judíos. \v 4 Ewanque panque niecje moiascamec Engiapom Neten cacpota jetacmelquesquesec ascaniemjaicama aniem'o njan asieplauquescama aptaiancolha apancawec judíos, \v 5 circuncidado lhna lhta co'o acuaiacmo quelha 8 acnem asteiam, asto njan co Israelita apanque' asqueniem'o njan apquennemolhema Benjamin, asto hebreo panque'. Asto lhta njan aspasmecja fariseos apquellelto nac apquelieplauquescama aquiennactema nquec jenganemacja Moisés, \v 6 co'o lhta njan asto neten ejenquec asieplauquescama jenganemacja nac, asmenlhenaicama lhta njan apquellelto nac Jesucristo apquennemolhema m'a, mamma lhta enenlhet jenawacsec elhenec moieplauquecama jenganemacja Moisés. \v 7 Coca lhamacjo caselha lhta m'a acto lhta neten anquec aquiaspommalhca m'a coca mmasquec colhuawe nac aniem'o Cristo. \v 8 Ca lhamacjo caselha lhta m'a colhua coca mancollienna'ac, jawe ctonac caselha altacmelo nac asiecpelcanweiacmo nac Cristo Jesus apuesque ejencoc, asquelhacjanquec lhamacjo caselha lhta malha basura ntemac ma'a aniem'o lhta asmama tacja Cristo, \v 9 aspasmecjo njan ma'a. Asiengiecjec astema moiasqueiam ascanemo lhta aspeiwomo aniem'o lhta asqueliejecjo jemganemacja Moisés, colhua coca asiawec asto aspeiwomo aniem'o moiasqueiam Cristo. Jai', jetnescasquec aspeiwomo Engiapom Neten aniem'o m'a mongiasqueiam anac. \v 10 Asmac'ac aiawencasancoc mocjom asianweiacmo Cristo, asmac'ac na annancojo nema acmowama aclhatecjasqueiacmo lhnac Cristo, ntasec na annancoc aquientalhnema acuacmo asquetsepo aptemo lhta njan apcaniemjaicama m'a Cristo, \v 11 netamen jata njan alhatecjanwomoc mocjom co'o m'a. \v 12 Jawe njan aspeiwomo mocjom co'o ncaimelhquec aiecpelcoc mocjom Cristo, asquelienlhanacmec coca lhamacjo acnem aiecpelcanwomoc ma'a, ncanec apto lhta jeliequiescama co'o ma'a. \v 13 Quetlhencap elialheng'a, malha niecje ntac nelpaiwasemmalhca nenganiemjaicama nac, mowac co'o mocjom actacja nnelha aquiensasemmalhca la'a, asiaqjapquec coca mocjom monwescama metca ascammelhecjo netamen \v 14 cacpota awomoc actacja la nnelha malha aquiensasemmalhca la'a cacpota alhcac asnaqsepma Engiapom Neten apmajai'a jeiancoc, jeiawema lhta m'a aniem'o njan Cristo Jesús. \v 15 Jai', nengellelto la aliennactema mongeliasqueiam ntasec jata ncotnancoc atlhenaicama engellualho'oc ma'a astacja lhquec alheianma, coca napocja enenlhet nquetlhenquec apualho'oc moc actemacja m'a, Engiapom Neten jatoca eluetasquesec lhema caselha alhnacjo nquec ma'a. \v 16 Ntasec angelloca mota actacja la aquietnema mongiasqueiam. \v 17 Quetlhencap elialheng'a, elieplauques jata astemacja nac co'o, ellanjoc na napocja aptaiancolha apquetlhenquescama nac actacmanma, apquellelto nac apquelieplauquescama nentaiancolha nac ennenco'o. \v 18 Asmac'ac altacjenwescacja mota astacja lhta asquelleltennascama, asqueleclhanwecama neten colhuawe nac aniem'o mantec enenlhet apquelamelhaicama ania'a actacmanma actemacja apquetsepma lhta Cristo neten iamet actennescama, \v 19 coca enenlhet'awoc anac enactewasacpoc jata ncanec wanlha mota anmajai'o nquec apualho'oc ellanancoc caselha ncolatsecama apanco'oc apancawec, apquellacpec apquellanenco la caselha jenmancascama nac, wanlha mota atlheianma apualho'oc caselha acnaianco nac jenque'e nalhepop anac. \v 20 Ennenco'o coca malha nellawacja neten, angellailhec jata elhiemoc jata m'a apto jengelluonquescama ta tep, apto njan apuesque engancoc Jesucristo. \v 21 Eliaqmoncasecjac jata mo'oc actemacja engiempeioc anac acmowana ncomasquenwomoc, jengellancoc jata njan engiempeioc acnema anmowanca'a ncoie, ca actemo nac apiocja m'a, apuanquec na enmama lhamacjo caselha aniem'o aquietnema apmopuana m'a. \cl Capítulo 3 \c 4 \v 1 Quetlhencap elialheng'a, Engiapom Neten jata ellancoc altacmanma apquellaniemjaicama quetlhencap, ca ncanec na ntasec etlhenquesec aquiennactema nquec apquelleliejecjoc Apuesque. Awanjec niecje njan asqueltemo atnentac amiaca'a jam ncanec apquelpaiesecja mota ewalhoc co'o, quetlhencap malha asnaqsepma la'a alhewai'a aniem'o Engiapom Neten jellaicamoc. \v 2 Asqueltawec co'o Evodia cacpota njan Sintique ncotnancocjac acnemo mo'oc atlheianma au'alho'oc ncanec engelialheng'a aniem'o Apuesque. \v 3 Lheiap apto alhelhma jeiasecjai'o aptema nengaqte' mota asmacmeca, ntasec elpasmoc jam nqueluana'ac anac ncanec jelpasmonque lhta mota aspaiescamo ania'a actacmanma. Clemente lhta njan netlhelhma'ac ma'a canjan aplhamacja alhta, nnaianquec coca apqueluesai'a m'a lhema waccajac aquiennactema ennengiec ncotnenwaianlha nnelha'. \v 4 ¡Colpaijecja ta mota apualho'oc aniem'o Apuesque, jai, colpaijecja ta mota apualho'oc! \v 5 Cacpota eluetac enenlhet apquellelto apqueliamolhma quetlhencap ¡Apcanquetuactec apuesque! \v 6 Molleltama nquec apualho'oc, elelmalhna coca mota Engiapom Neten alaimelhco la caselha apanco'oc, etnamoc jata njan gracias. \v 7 Netamen ellancoc jata njan Engiapom Neten aquiawai'a nquec manwaiam annelha metca acmasca apquellaniemjaicama, eltacmelquesquesec jata njan apualho'oc cacpota njan alquetansema apualho'oc aniem'o njan Cristo Jesús ma'a. \v 8 Quetlhencap elialheng'a, asmac'ac aleltennacsec mocjom actacja nnelha, cotlhen jata apquellualho'oc lhamacjo caselha acto jawe ngiapac anque', nentemacja njan acto aquietemo nquec nengai'o emmo'oc anac, caselha acpeiwomo, caselha alhnai'o nquec, caselha acleclema enwalhoc, canjan aclhenammalhca nac caselha altacmelo. Jai', lhamacjo caselha lhquec altacmanma alheianma, caselha aclhenammalhcac altacmelo, ntasec ncotnancoc jata mota atlhenaicama apualho'oc ma'a. \v 9 Ellanamoc jata mota lhamacjo astemacja lhta mota asquetlhecmoscama apqueluetai'o lhta asquellanai'a, eluanamoc jata mota astemacja nac, netamen Engiapom Neten apto nac metca acmasca ngiapom etnancoc jata mota apquetlhelhma'ac ma'a. \v 10 Awanjec acpaijecja ewalhoc atlheianmo apualho'oc asnaja' co'o jenque'e ncanec jelpasmec mocjom, manalhmoc la jeleluancamaiancoc quetlhencap, quelha nqueniemai'ac mamma elmesquesec. \v 11 Niecje aimommalhca caselha co'o, ntasec coca co'o m'a, ewanquec coca aiensepancoc quetsec. \v 12 Ewanquec na aloca necsa mec jaiaqjema, cacpota njan necsa asiapqaneiamo la'a, necsa metca caselha ejencoc cacpota njan caselha jeiecanweiacmo la'a. \v 13 Ewanquec coca mota njan aiepjonwomjoc aniem'o Cristo jeiaicamoc asiennactema, \v 14 coca ntasec na jelpasmomo quetlhencap ma'a necsa aimommalhca caselha ejencoc. \v 15 Asquempaiacja lhta secjec anquec aspaiescama ania'a actacmanma aquieto m'a Macedonia, wanlha lhta mota quetlhencap co Filipos jellapasquescama pataccom ma'a, mamma mo'oc necja nac engellialheng'a. \v 16 Ca asnemo lhta njan ma'a Tesalonica nlhamacme lhta njan jellapasquescama pataccom astengia'o lhta njan alaimommalhquelha lhta co m'a. \v 17 Jawe co'o astengia'a mocjom pataccom asquelleltennaso nac quetlhencap, wanlha coca astengiac etlhewancoc nema aquiaqmoncasecja ta aniem'o jelpasmoma co'o. \v 18 Alhewanwactec caselha jellapasquescama quetlhencap apsenta coca Epafrodito jenque'e, jeiecanwacme', nlecama njan ewalhoc malha ntac tonac acmases la aimes nema acmescama nac Engiapom Neten cacpota ncolcama njan apualhoc ma'a. \v 19 Engiapom Neten apto nema netsecama ngiapom aquiawai'a nquec, ellancoc jata lhamacjo caselha alaimommalhquelha la quetlhencap aniem'o njan Cristo Jesus, jawe ngiapac anquec jata ncotnec ma'a. \v 20 Angeltemesquesancoc jata mota gloria apto Engiapom Neten. Amén. \v 21 Asqueltawec nac anwapacsec aclheianma ewalhoc aplhamacjo Jesucristo apquennemolhema jam, apquellapasquec na atlheianma apualho'oc Jesucristo apquennemolhema asquetlhelhma'ac anac jenque'e, \v 22 ca njan apquellapasac atlheianma apualho'oc apquellelto Jesucristo apquennemolhema apquellawa nac jenque'e, apquellelto nac na apquenmacmesaicama apiau'acja apuesque Roma apquellapascamo na mota atlheianma apualho'oc quetlhencap. \v 23 Jai', asquenmalhnescasque mota Apuesque Jesucristo cacpota eiengientac actemacja nengiamolhma tacjaplhet'oc quetlhencap. \cl Capítulo 4