Toba-Maskoy: Regular

Romanos
Romanos
Capítulo 1

Aclheianma apualhoc Pablo enenlhet'awoc Corintios
1 Co'o Pablo, jeiasennaicama Cristo Jesus, nquetlhenquec ewalhoc quetlhencap co romanos. Jeliequiescama lhta Engiapom Neten cacpota atnec jeiapascama mota apaiacsec ania'a actacmanma apancoc ma'a. 2 2 Apquellaianquec nac nanec lhema apaioma ncowac ania'a actacmanma nac aniem'o njan apquetlheianmo lhnac nanec apquelletsecama ania'a, nietnenquec ma'a actalhesammalhca waccajac actacmanma nque' Engiapom Neten apaioma. 3 Ca ania'a actacmanma nac aplhenammap ma'a apquetca Jesucristo, apto njan apuesque enganco'oc, aptaiecjo lhnac enenlhet apanquec ma'a, apto njan aptawen neptamen apuesque David annenga. 4 Apquetsepque lhta m'a Jesucristo, netamen aplhatecjasqueiacmo aniem'o apmopuana Engiapom Neten Apualhoc, apquelpeiwesecjo lhta njan ma'a enenlhet'awoc apto jawe ngiapac anque Engiapom neten apquetca m'a. 5 6 Moientalhenmo niecje co'o, Engiapom Neten coca jetnescasque panque' jeiasennaicama aniem'o Jesucristo cacpota apaiacsec ania'a aclhenammalhca apuesai'a apiesecsec metno judíos, quetlhencap anac romanos apquelpalhcammap apiesecsec anac, cacpota meliascamec, elleliejecjoc najan, etnancoc jata njan Jesucristo apquennemolhema. 7 Jai, nquetlhenquec ewalhoc quetlhencap co romanos apquellelto apquellamelaiam cacpota njan apquelleliequiescama Engiapom Neten etnancoc jata njan apquennemolhema apáncawe. Jai, asqueltawe co'o Engiapom Neten cacpota njan Jesucristo apuesque engancoc ewaiwesenta tacjaplhet'oc quetlhencap apquellamellaiam, metca acmasca njan.
Apmajai'a etnec amaica'a Pablo aquieto Roma
8 Gracias co stac Engiapom Neten aniem'o Jesucristo ncanec apquetlhenammacpe lhma nquec jam meliasqueiacmo quetlhencap Jesucristo. 9 Engiapom Neten apto apuesque ejencoc, ascasennaicama mota astengiai'o nac eiempejec aspaiescamo nac ania'a aplhenammap Apquetca, apiawec na nquetlhenque mota ewalhoc quetlhencap, 10 necsa asquenmalhnoncoma mota Engiapom Neten, asquenmalhnema m'a jeiancoc actacmanma la astema amaica'a jam. 11 Awanjec anquec asqueltemo aluetanwetac quetlhencap, atsatjesec asquelpasmoma m'a aniem'o Engiapom Neten cacpota ncoitec aliennactema meliasqueiam. 12 Jata asuactamo ta jam, angeliatalhcac jata aniem'o mongeliasqueiam anac. 13 Quetlhencap elialheng'a co Roma, awanje lhta niecje asqueltemo atnentac amaica'a jam, coca jeliasacja lhma lhta nnac ma'a. Asmac'a alhta niecje apiacsec ania'a actacmanma cacpota meliascamec enenlhet'awoc ma'a, ca stemacja lhta njan ma'a mo'oc iocjalhma apquellomacja nac metnanco judíos. 14 Monwapuanac aiecacsec co'o aspaiescama ania'a actacmanma jalhmanquec jam, apiesecsec meliojoc mocjom caselha cacpota njan apiesecsec apqueliojo caselha, apiesecsec neten apancawec nema apquelianweiacmo, cacpota njan apiesecsec melianweiacmo. 15 Awanjec anquec aspecjai'o niecje apaiacsec ania'a actacmanma apiesecsec anac quetlhencap jam. 16 Momanquec co alhenec ania'a actacmanma ncanec acto acnema acmowana aniem'o Engiapom Neten cacpota ncoluonquesec tep enenlhet'awoc apquellelto la meliasqueiam, apmaniaie' judios, cacpota njan metno judios. 17 Ania'a actacmanma jengetlhecmoscama wanlha Engiapom Neten apuanquec jentesquesancoc nelpeiwomo aniem'o mongeliasqueiam Jesucristo, ca ctemo nac actalhesammalhca njan waccajac Engiapom Neten apaioma jenque'e: «Enenlhet apto la apeiwomo, eloca ta acuanqacjojo» 1 ca ntemac ma'a. 18 Coca ncowaiwenta ta Engiapom Neten aploma tacjalhet'oc caselha ncollatsecama apquellanecamoc enenlhet, mancopeiwomo njan apquellanecamo mota enenlhet'awoc, acto njan altaqjesquescamo acto jawe ngiapac anquec aniem'o melpeiwomo. 19 Apuanca'ac eliojoc Engiapom Neten aniem'o apqueluetai'a lhamacjo caselha apquelanai'a, aptema apanquec na apqueluetasquescama m'a. 20 Mongapuanquec coca anwetac Engiapom Neten cacpota njan apmopuana ncotnenwaianlha nnelha, coca necsa alquetamecama la apualho'oc enenlhet actemacja lhamacjo caselha apquelentepquescama lhta m'a aniem'o apqueluetai'a, ncolpeiwesecja apualho'oc apnema jawe ngiapac anquec Engiapom Neten. Mancollapuanquec na etlhenec meliamo Engiapom Neten, 21 apquelliawec niecje m'a, coca ncacjoc na mellai'oc apuesai'a m'a, metnaiancoc na gracias ma'a, wanlha coca atlheianmo apualho'oc ncoietemo nque, alpaisenquesquescamo njan apualho'oc ma'a. 22 Apquetlhenammacpawec lhta mota apancawec nema apqueliamo m'a, coca malha metca apaqto'oc ma'a, 23 ncanec apqueliengiecjec Engiapom Neten apto acnema apmopuana mancotnenwaianlha nnelha, apqueltacnesquesquecjo m'a caselha apquellanecamoc apancawec anata aquiocja, cacpota njan caselha 4 ameioc anac, aquiocja njan allelto nac alpelhiewaicama nalhepop. 24 Apquelhacjec coca njan Engiapom Neten ma'a enenlhet'awoc anac meliamolhma cacpota etlhenquesec apancawec anmajai'elha la apualho'oc ellanancoc caselha ncollatsecama, caselha jenmancascama nac manganemmalhquelha nac antejec. 25 Lhamacjo caselha ncollatsecama nac aniem'o apqueliengiecja Engiapom Neten, apquelieplecjo m'a acmowana ania'a nac, apquellaio, apquellasennaianca njan caselha apquelentepquescama lhta Engiapom Neten, coca nietawec niecje ellasennama m'a metca nnelha wanlha Engiapom Neten. Amen. 26 Maliamolhma sonquec ma'a, eliengiecjac Engiapom Neten cacpota etlhenquesec apancawec anmajai'acja apualho'oc apancawec ellanancoc caselha jenmancascama nac, nqueluana'ac mmasquec actengianco anacteianca'a apquellennawa'ac apancawe, nqueluana'ac lhemec coca nquenmacjac ma'a. 27 Apquellennawa'ac mmasquec aptengianco nqueluana'ac ancawe, apquellennawa'ac lhemec coca apquenmacjac aniem'o aliecanweiacmo apquenmocjetma, ca nqueniemai'ac apquetlhewaiancoc aquiaqmoiecja m'a. 28 Manconmajai'ac enmoc tacja Engiapom Neten, ca ncanec etlhecjac cacpota elieplauquesec apancawec ncollatsecama alquetansema apualho'oc, ellanancoc ncollatsecama. 29 Nquellaneianquec apualho'oc ncolietemo, ncollatsecama, apqueliaspecamoc caselhaja, apqueliasepquescama po'oc, alietnema apqueliemonque lhma', apquennapommap po'oc, apnaqtewascamo po'oc, apqueliasquemaicamaja. 30 Apquetlheianma mota po'oc meijamolhma, apquellammelhma mota Engiapom Neten, apquellammacpojo, wanlha mota atlheianweiam alhma apualho'oc ellanancoc caselha ncollatsecama, melleliejecjoc na ncana'ac. 31 Manconmajai'ac na elianwomjoc acto jawe ngiapac anque', apquenmopuanca'a ania'a mota, meliamolhma apanque', mangcolietnema apquelietnai'o napa'at po'oc. 32 Apquelliawec niecje Engiapom Neten aptemacja aplheianma nietawec elletsepoc meliamolhma nac ma'a, aptaianquec coca apancawec ma'a, nquelpaijacje mota apualho'oc apqueluet'o la apquellanecamoc ncollatsecama po'oc ma'a.

1Habacuc 2:4

Capítulo 2

1 Apiecpelquec lheiap po'oc, aptewasecpec coca apanquec ncanec apquelan'ac na caselha ncolatsecama lheiap, mancapuanquec jata engiatemmoma acno ta altennasacjo. 2 Coca nengelliawec ennenco'o Engiapom Neten eliecpelcoc alietemo nquec ma'a apquellelto nac apquellanecamoc ncollatsecama. 3 Lheiap apiecpelque panquec po'oc apquelan'o la caselha ncolatsecama, coca apnawe niecje lheiap ma'a, mewomec jata tep lheiap apiaqmoncasacjo ta aptemacja Engiapom Neten aniem'o aplhenaicama po'oc apuesai'a. 4 Mewannama lheiap aquiawai'a nquec apiamolhma Engiapom Neten, mepecjacsec na etacnewac lheiap apquelan'o la caselha ncolatsecama. Jai', jawe ngiapac anquec apto apiamolhma apanquec Engiapom Neten ma'a, apqueltawec elanecja apualhoc, eluatacsec na caselha ncolatsecama apquelanai'a. 5 6 Ncoijec coca apualhoc lheiap, mancomac'ac elanecja apualhoc, ntacmelcasawec coca aquiawenco nema apiaqmoncasecja aptemacja acuacmo ta actemonwanlha nnelha acnem, Engiapom Neten jata ellancoc aquiaqmoiecja aniem'o aptaiancolha apquellanecamoc. 7 Ellancoc jata njan ma'a aliennactema apnengio'oc apquellelto apqueluascapma apquellanecamoc la actacmelo, aptengiaicamoc na ncoleccasama apualhoc Engiapom Neten, aptengiaicamoc na ncolhec allanco aliennactema apnengio'oc, cacpota njan ncolhec altemesquesanco apquelientalhnemo. 8 Coca eiengientac jata apiaqmoncasecja aploma tacjaplhet'oc apquellelto apquenmeiauquesammacpo panquec caselhaja, apquellammelhma njan acto acpeiwomo, coca apquellasecjawec ma'a mancopiewomo nac. 9 Ncowac jato ca aquientalhnema tacjaplhet'oc enenlhet'awoc anac ma'a, ellengancoc jato ca m'a aquientalhnema, apmaniaie' judios netamen metnanco nac judios. 10 Engiapom Neten jatoca etlhenama apqueluesai'a apquellelto nac apquellanecamoc caselha altacmelo, eltemesquesec jata njan apquelientalhnemo, ncolhec jata njan allac'o, etlhewancoc jata njan metca acmasca, apmaniaie' judios, netamen metnanco nac judios, 11 ncanec apnemo po'oc napaqtec Engiapom Neten.
Jenganemacja Moisés
12 Apquellelto nac metnanco nac judios mamma jenganemacja aniem'o nac Moises, ncacjoc coca ncolhec jata acnaqtewasacjo apquellanenco la ncolatsecama, coca judios apancawe nac ncoiaqmoncasecjac jata jenganemacja apanco'oc apancawec apquellanenco la ncolatsecama. 13 Coca enenlhet'awoc apquelleliejecjo nac jenganemacja, ca apquelpeiwomo m'a, jawe wanlha etnancoc moc apquellailhemo, ncaimelhquec coca elleliejecjojo. 14 Mamma jenganemacja aniem'o Moises apquellelto nac metnanco nac judios, coca apquelliawec acto ncolatsecama, acto njan actacmanma, nietnec jenganemacja apualho'oc apancawec, malha nema aliatecama la'a nquelpaqmetcasque mota: —Mancolatsema jam—nlhencasema mota m'a. —Actacmanma jam—nquetsewasquesama mota m'a. 15 Ca jenganemacja nac malha nema aliatecama apualho'oc apancawe nac, ncotlhenquesec jata atlheianma aptaiancolha ncolatsecama, actacmanma m'a napaqtec Engiapom Neten 16 acuo'o ta acnem Cristo Jesus jata etnec jengelliecpelquemo m'a alielhammalhco nac engellualho'oc nenlhamacjo, jata ncotnec ma'a astemacja na mota asquetlhecmoscama ania'a actamanma nac. 17 Apquelacpe mota quetlhencap apquetlhenacpo apancawec judios, cacpota njan aquietnema jenganemacja apanco'oc, apquellelto njan apqueliequiescama Engiapom Neten. 18 Apquelliawec niecje quetlhencap etnancoc cacpota ncoleccasama apualhoc Engiapom Neten aniem'o jenganemacja apanco'oc alletlhecmoscama. 19 Nquetlhenque mota apualho'oc apanco'oc apancawec malha la aponmatma' cacpota elieplo'oc ma'a malha metca nac apaqto'oc 1 apquetlhengama nac malha ienactesacja lhma. 20 Nquetlhenquec na apualho'oc apuanca'ac etlhecmosancoc metca nac apquelianweiacmo cacpota njan malha nematcac aniem'o jenganemacja apanco'oc acto nema nengiamo, acto njan jawe ngiapac anque. 21 Jai', apquetlhecmosenquec po'oc quetlhencap, coca melieplaucasac na quetlhencap ma'a. Apquetlhecmosenque mota po'oc menmenielhe', coca apquenmenielhme mota niecje quetlhencap. 22 Apquetlhecmosenque mota po'oc melleltema menaqtewacsec apnaqteianca'a, coca apnaqtewascanque niecje mota apnaqteianca'a quetlhencap, apquetlhecmosenque mota apquelleltema eltaqnewa' caselha aquiocja allanemmalhca apqueltacnescasecamoc, coca apqueleltalhnenquec conne pa'at acnaiancolha m'a, apquenmenielhmo njan caselha acmennawe anco'oc ma'a 23 23 Apquetlhenammacpawe mota apancawec apquelliamo jenganemacja, moc apatno'oc coca, melleliejecjoc najan, mellai'oc na Engiapom Neten quetlhencap. 24 24 Lhnac nane ntemac lhennenga actalhesammalhca waccajac Engiapom Neten apaioma: «Metno judios apnaqtewascanque mota apuesai'a Engiapom Neten aniem'o quetlhencap meliamolhma» 2 lhna ntemac. 25 Ntase niecje circuncisión anac apquelleliajacjo la jenganemacja nac Moises, coca melleliajacjo la m'a, acjemo ta ncotnec circunsicion, malha ta ncotnec metca circunsicion napaqtec Engiapom Neten. 26 Coca metnanco nac judios apquelleliajacjo la jenganemacja, malha niecje aptancoc circuncidado napaqtec Engiapom Neten. 27 Jai, enenlhet metca nac circuncidado apqueliajacjo la jenganemacja, eliecpelcoc jata judíos aquietnema nac circunsicion, aquietnema njan jenganemacja apanco'oc, melieplauquescama njan. 28 Jawe judío apanque aniem'o apteiaianlha ncana'ac judíos ancawec, aniem'o njan circunsicion. 29 Coca judío apanquec ma'a aquietno la acpeiwomo apualhoc napaqtec Engiapom Neten aniem'o m'a Apualhoc apanque nac ma'a , jawe aniem'o jenganemacja nac Moises. Ca enenlhet anac apeiwomo emoc jata tacja Engiapom Neten, niecje apqueltacnommap anac aniem'o enenlhet.

1Apquellelto nac metnanco nac judíos
2Isaias 52:5

Capítulo 2

1 ¿Se cla atlheianmo apualho'oc quetlhencap que, je, ntesquesaianque nlho neten apancawec aptaianco judios cacpota njan aquietnemo circuncision? 2 Jai', awanjec anquec actemesquesaicamoc neten apancawec ma'a aniemai'o m'a apquellaicamoc apaioma Engiapom Neten ma'a. 3 Coca moclhem'a judíos melleliejecjoc ma'a, ncacjoc coca Engiapom Neten apieplauquescanquec aptemacja lhta apaioma aplheianma, 4 ncanec jawe apmopuana ania'a, jawe aptonac enenlhet, Engiapom neten coca aplheianma mota iocjalhmec anque', ca actemo nac na actalhesammalhca waccajac Engiapom Neten apaioma: «Aplhamacjo enenlhet jata eliojoc aptema la iocjalhmec aplheianma lheiap, no la aquiantemacjo napaqtec jengiecpelquemo, eiepjomwomjoc jata lheiap ma'a» 1 lhna ntemac ma'a. 5 Quelha allelto la atlheianma apualho'oc jenque'e, ca mangeliamolhma nac ncoluetasquesec enenlhet'awoc wanlha apanquec Engiapom Neten apto apeiwomo, man quelha ncoietoc na eliaqmoncasquesecjac apqueltemacja meliamolhma, quelha ncotnec atlheianma apualho'oc quetlhencap. 6 Motnamonque mota atlhenaicama apualho'oc jenque'e, ncanec Engiapom Neten apto apeiwomo panque, apmopuana njan eliecpelcoc aplhamacjo enenlhet'awoc jalhma nquec jam. 7 Moclhem'a quelha njan ncotlhenec apualho'oc mancolietec nema aquiaqmoncasecja aptanco la apquenmopuanca ania'a, ncanec nenmopuana ania'a nac ncoluetasquesec aplhamacjo enenlhet'awoc wanlha apanque Engiapom Neten apto metca apmopuana ania'a, cacpota ellajoc enenlhet'awoc ma'a. 8 Apquetlheianmec na lhta mota moclhem'a quetlhencap ntasec ellanancoc caselha ncollatsecama cacpota Engiapom Neten etnescasecja actacmanma m'a. Apquetlheianmec na lhta astemo asquetlhecmoscama co m'a, apquellentepcasecama asuesai'a m'a, ntasec ncowac aquientalhnema tacjaplhet'oc enenlhet'awoc anac ma'a.
Lhamacjo enenlhet meliamolhma
9 Smac'ac alelmalhnama lhema caselha quetlhencap, ¿neten engancawe nlho nentanco nac judiós mannoc po'oc enenlhet la'a, je? Mma', asqueleltennasque lhta quetlhencap secje lhta judíos cacpota njan metnanco judíos anmaicama njan maniamolhma nac. 10 Ca ctemo nac na actalhesammalhca waccajac Engiapom Neten apaioma: «Mamma enenlhet apto apeiwomo, mamma apanquec lhema la'a, 10 Ka ktemo nak na aktalhesammalhka Vakkahak Eniapom Neten apaivoma: «Mamma enenlhet apto apeivomo, mamma apankek lhema la'a, 11 mamma njan enenlhet neten apanquec la apianweiacmo, mamma njan aptengiai'a la Engiapom Neten, 12 lhamacjo enenlhet apquelietnocjamonwacmec malha amai actacmelo, apquelieplacjec amai ncolatsencolha, apqueltemonwacmec meliamolhma, mellanencoc na altacmanma caselhaja, mamma apanquec lhema apjapac la'a» 2 13 «Alhua'ac apiaspo'oc anac malha niecje malhec anac nema atsepma conne metca nema alapecja la'a, apalhco'oc coca nquelpaqmetquec wanlha actaicamoc anmowanca ania'a» 3 « Apqueliatecama malha veneno ncoc anac nonempa menasma» 4 14 «Apatno'oc anac nlanei'awec nengiematquescama emmo'oc cacpota njan malha acmasca nac aimenec» 5 15 «Apquelielhewai'a panquec apquengianco la'a cacpota ennapoc po'oc, 16 apnaqtewasquec cacpota njan necja tcoc aptemesquesacjac caselha apqueluanlha la'a. 17 Meliojoc malha amai metca acmasca nac anieplo'oc» 6 18 «Mellai'o mota Engiapom Neten» 7 ca ntemac ania'a m'a. 19 Nengelliawec ennenco'o actemacja aclheianma jenganemacja cacpota njan allanemacja etnancoc judios, cacpota ncoluetasquesec apquetselhnanemmap ncanec mellelijecjoc ma'a, mamma njan enenlhet etlhenec napaqtec Engiapom Neten melliamojo. 20 Mancollapuanquec enenlhet etlhenacpo apancawec apquelpeiwomo napaqtec Engiapom Neten aniem'o apieplauquescama jenganemacja, ncanec jenganemacja nac jengeluetascasquec mongeliamolhma. 21 Coca colhuawe nac jengeluetascasquec Engiapom Neten antancoc nengelpeiwomo jawe m'a aniem'o jenganemacja nac, lhnac nanec na ntemac aclheianma m'a waccajac jenganemacja Moisés cacpota njan waccajac apanco'oc apquetsecama ania'a. 22 Jai, Engiapom Neten jengeltemescasquec nengelpéiwomo nenlhamacjo lhmanquec jam aniem'o mongeliasqueiam Jesucristo ncanec nennawec enmo'oc napaqtec ma'a, 23 nenlhamacjo njan nellanecamoc ncollatsecama, taiepe canque lhta njan ennenco'o Engiapom Neten apto acnema apmopuana apanque. 24 Awanjec anque lhtoca jengellamelaiam Engiapom Neten, apcapascamo lhta Jesucristo cacpota jengeljatsoscasancoc malha jennactetema mongeliamolhma, jengeltemescasecjo lhta njan nengelpeiwomo napaqte Engiapom Neten ma'a, metca aquianmoma. 25 Apeiwomo panque Engiapom Neten, apuanque lhta niecje jennaqtewasecja aniem'o nellanecamoc mongeliamolhma, coca mepecjescamac jengellanei'o ennenco'o, nietnenque lhta njan apenescamo lhema caselha, aplheianmo lhnac nanec apualhoc engiapacsec Cristo Jesús nenwanlha nac cacpota engietsepoc ncoianquenalhcac na ema apancoc jengianmoma ennenco'o, cacpota ncolhec anmacjo tacja mocjom apquellelto la meliasqueiam. 26 Apquetsepque lhta Cristo Jesús cacpota esaujo acpeiwomo anemacja etnec jenganemacja, 8 apqueluetascasque lhta njan apto apeiwomo Engiapom Neten ma'a, apqueluetascasque lhta njan Engiapom Neten apto apqueltemesquescama apquelpeiwomo apquellelto la meliasqueiam Jesús. 27 Acjemo angetlhenalhcoc engancawec nelieplauquescama jenganemacja napaqtec Engiapom Neten, ncanec neten anquec acto aquiaspommalhca m'a mongiasqueiam anac. 28 Engiapom Neten jengeltemesquescama nengelpeiwomo aniem'o mongeliasqueiam, jawe aniem'o m'a nengeliejecjo nac jenganemacja. 29 Engiapom Neten apto apuesque apanco'oc lhamacjo enenlhet'awoc jalhmanquec jam, jawe wanlha m'a apquellelto nac judíos. 30 Apto njan Engiapom Neten lhema apjapac apanque, aptemescasque panque apquelpeiwomo enenlhet'awoc judios, cacpota njan metnanco nac judios aniem'o meliasqueiam. 31 Co la actemacja atlheianma apualho'oc quetlhencap, ¿mongiasqueiam anac mmasquesque nlho aquiennactema jenganemacja nac, je? ¡Ma! Ca mongiasqueiam anac jengelianwesquescacmec jenganemacja nac acto actacmanma m'a.

1Salmos 51:4
2Salmos 14.1-3; 53.1-3
3Salmos 5:9 (10)
4Salmos 140:3 (4) f
5Salmos 10:7
6Isaias 59:7-8
7Salmos 36:1
8La ley ordenaba que debían morir los que la desobedecían

Capítulo 4

Abraham nema actemesquescama apeiwomo aniem'o meiasqueiam
1 Cotlhenno apualho'oc aptemacja lhnac na nec nelieiejenca Abraham, 2 lhta cto la actemesquescama apeiwomo aniem'o actacmanma apnema, apuanque nlho lhta ncotnesquesec apcammacpo napaqtawec enenlhet'awoc ma'a, coca jawe m'a napaqtec Engiapom Neten. 3 Coca nietnec actalhesammalhca waccajac Engiapom neten apaioma jenque'e, ca ntemac: «Meiasqueiacmoc Abraham Engiapom Neten, aplheianmo njan apto apeiwomo m'a» 1 ca ntemac ania'a m'a. 4 Colhua ellailhono lhema asietquescama nac, lhema apuesque la'a mancapuanquec engianco panquec apmacmesaicama pataccom metco la apmacmecama, amanie coca secjec ntasec emacmesama m'a. 5 Coca Engiapom Neten mo'oc actema, mancaimommalhca jenmacmesama secjec cacpota jentemesquesec nempeiwomo, apmasquesquec na mangeliamolhma aniem'o moniasqueiam, jawe aniem'o nelanai'a actemacja aclheianma jenganemacja. 6 Lhnac nanec na aptemac David apquetlheianmo enenlhet'awoc apquenmapseiwac'a nema altemesquescama apquelpeiwomo metca aquianmoma. 7 Lhnac nanec aptemac: «Apmapseiwe' enenlhet apmasquesquescama la Engiapom Neten meijamolhma, metca aplhenquesquecjo mocjom. 8 Apmapseiwe' njan enenlhet melietsatquesecjo Engiapom Neten apquellanai'a ncolatsecama» 2 9 10 ¿Wanlha nlho apquenmapseiwac'a apquellelto nac circuncidados?¿Nlho ca la njan mellelto nac circuncidados? Cotlheianwacjo no apualho'oc, metca circuncision lhnac nanec Abraham apiempec ma'a, meiasqueiacmo njan Engiapom Neten, ca acnemo lhnac nanec actemesquescamo njan apeiwomo napaqtec Engiapom Neten ma'a, netamen coca m'a aptemenweiacmo apiempec circuncision ma'a cacpota eluetac enenlhet caselha mongenatquescama apiempec ma'a, aclheianma niecje m'a nema actemesquescama apeiwomo aniem'o meiasqueiam. 11 Netamen nemo njan aptemesquescamo Abraham malha apqueliapom apquellelto nac meliasqueiam Engiapom Neten, niecje metca nac circuncidados, nnenquec coca nquec altemesquescamo apquelpeiwomo aniem'o meliasqueiam Engiapom Neten. 12 Abraham na apqueliapom apquellelto nac circuncidados, meliasqueiam anac, cacpota njan apquelleliejecjo nac Engiapom Neten, ca aptemo lhnac nanec na Abraham ma'a amanie apmajai'a ncolhec actemesqueso circunsicion.
Engiapom Neten apcaicamoc Abraham metca aquianmoma aniem'o meiasqueiam
13 Apenescamawec nac nanec apaioma Engiapom Neten apqueltennascamo Abraham annenga engiancoc jata m'a lhepop lhmanquec jam, cacpota njan aptawana'ac neptamen, ncanec apeiwomo Abraham aniem'o meiasqueiam, jawe aniem'o m'a apqueliejecjo jenganemacja. 14 Ca apquellapuanco la enenlhet etlhewancoc apenescamo lhta apaioma Engiapom Neten ellancoc jata aniem'o apquelieplauquescama jenganemcja Moises, malha acjemo ncotnec meliasqueiam anac Engiapom Neten, acjemo njan ncotnec ma'a apenescamo lhta apaioma Engiapom Neten ellancoc jata. 15 Niaqmoncasacjec aptemacja melleliejecjoc la enenlhet jenganemacja, coca metco la jenganemacja, mamma apquetselhnanemmap ma'a melleliajacjo la'a. 16 Aptemacja lhnac nanec apenescamo aplheianma Engiapom Neten ellancoc jata, apquetlhewanquec ma'a aplhamacjo aptawana'ac neptamen Abraham aniem'o la meliasqueiam, metca aquianmoma, apquellelto nac judíos aquietnema jenganemacja Moises cacpota njan aplhamacjo enenlhet'awoc lhma nquec jam acnanco la njan meliasqueiam malha aptemo lhnac nanec na Abraham, apto njan malha engiapma'ac nenlhamacjo nengellelto nac mongeliasqueiam. 17 Ca ctemo nac na actalhesammalhca waccajac Engiapom Neten apaioma jenque'e: «Astemescasquec lheiap apiapma'ac aplhamacjo apquellawacja lhmanquec jam» 3 lhna nane ntemac ania'a. Man nac eiasqueiacmoc Abraham Engiapom Neten, apto aquietnema apmopuana apanque, enaclhatecjascamoc na apquenmasquenwaiacmo, apuanquec na elhenec caselha amanie ncowac jata. 18 Mancapuanque lhta Abraham ncoitec aptawana'ac neptamen, coca meiasqueiacmoc Engiapom Neten apmopuana elanac aptemacja lhta apqueltennascama ncotnec jata apiaijecama Abraham, lhnac nanec aptemac Engiapom Neten apcanemo m'a: «Aplhaniec jata etnec aptawana'ac neptamen lheiap» 4 lhna aptema apcanemo. 19 Coca mancapuanque lhta niecje etac apquetca Abraham ma'a, apuaneiam apanque' lhta sonquec, malha 100 año apanco lhta m'a, iennaqtema naie' lhta njan aptawa Sara, 20 coca malhta ncoietnammalhcac napa'at ma'a aniem'o awanje lhta meiasqueiam, netamen aptemo lhta njan ma'a gracias Engiapom Neten. 21 Apiamawe panque lhta Abraham Engiapom apuanquec eieplauquesec aptacja la apaioma m'a. 22 Apuetai'ac Engiapom Neten meiasqueiam Abraham, ca aptemesquescamo apeiwomo m'a. 23 Ca actemo na aclheianma Engiapom neten apaioma m'a aptemesquesammacpo apeiwomo Abraham, coca jawe wanlha Abraham, 24 ennenco'o njan ma'a nengellelto nac mongeliasqueiam Engiapom Neten aplhatecjasecjo lhta apiesecsec apquenmasquenwaiacmo apuesque engancoc Jesus. 25 Apto lhta njan ma'a aplhewanweiam cacpota engietsepoc jenniaqmoiecja ennenco'o aniem'o mongeliamolhma, netamen nemo njan aclhatecjasqueiacmo cacpota jengeltemesquesec nengelpeiwomo m'a.

1Genesis 15:6
2Salmos 32:1-2
3Genesis 17:5
4Genesis 15:5

Capítulo 5

Mongiasqueiam aptaqmelquescama nengellaniemjaicama
1 Jengeltemesquescanque lhta panque' nengelpeiwomo Engiapom Neten aniem'o mongeliasqueiam, colhua coca nentancocjac metca nellammelhma Engiapom Neten aniem'o apuesque engancoc Jesucristo. 2 Colhua enwanca'ac angeltetescacjac na apnacja m'a, angelletsewasama njan aniem'o m'a, nquelpaijacjec engellualho'oc colhuawe nac ncanec nengelliáwec angeluacjac jata apnacja m'a cacpota njan ma'a ampasmecjac jata caselha altacmanma Engiapom Neten apanco'oc. 3 Nquelpaijacjec na engellualho'oc ncanec ntepcasquec na nenwascapecjo necsa acuai'a la aquientalhnema, 4 5 ca aquietno la ennenco'o nenwascapecjo nac, ntepcasquec na aquiennactema nengieplauquescama, ca aquietno la aquiennactema nengieplauquescama, ncotiepoc jata njan actemonwaiam iocjalhmec anquec acuai'a m'a aptemacja apenescamo aplheianma Engiapom Neten, ncanec apquellanenque lhta engellualho'oc jengellamelaiam aniem'o Apualhoc apanquec. 6 Mongeliennactema lhta secje lhta ennenco'o, ncacjoc coca apquetsepme lhta apanquec Cristo jengianmoma m'a. 7 Nientelhec anquec engietsepoc lhema enenlhet cacpota engiawacpoc enenlhet la apeiwomo, engietsepoc quelha njan lhema enenlhet cacpota engiawacpoc enenlhet apcamelaianlha la'a. 8 Coca Engiapom Neten jengeluetascasquec aquiawai'a nquec jengellamelaiam ncanec apcapascanquec Cristo cacpota engietsepoc jengiaqmoiecja ennenco'o necsa mongeliamolhma lhta. 9 Colhua coca jengeltemesquescamac nengelpeiwo Engiapom Neten aniem'o apquetsepma Cristo, jawe ta nja ngiapac ncotnec jengeluonquesec tep ma'a acuo'o ta acnem nengelliecpelcammalhquelha. 10 Nelammelhmacja lhta ennenco'o Engiapom Neten, ncacjoc coca jengenmecjawe lhta apanquec tacja aniem'o lhta apquetsepma Apquetca, colhua coca jengellamelecjawec mocjom ma'a, jawe ngiapac anquec jata nja ncotnec jengeluonquescama tep ma'a aniem'o actaiecja mocjom apjalhnancoc Apquetca. 11 Nquelpaijecjawec coca engellualho'oc colhuawe nac ncanec jengenmecjo mocjom tacja Engiapom Neten aniem'o apuesque engancoc Jesucristo.
Apietquesammap Adan Jesucristo
12 Acuai'o nac mongeliamolhma lhmanquec jam aniem'o lhema apjapac enenlhet apuesai'a Adan, apquelan'a lhta ncolatsecama m'a, netamen acpaijecjo lhmanquec jam nengetsepma nac ncanec aplhamacjo njan enenlhet'awoc apquellanecamoc meliamolhma. 13 Amanie lhta acmajai'a ncowac jenganemacja Moises, apquellaneianque lhtoca ncollatsecama enenlhet ma'a, metquelha lhtoca njan jenganemacja atlhenquesquecjo la apquellanecamoc meliamolhma m'a, 14 coca ncacjoc apquelletsepme lhta mota enenlhet'awoc ampai'o lhta Adan acuacmo Moises aniem'o meliamolhma, coca moc actema lhnac nanec meijamolhma Adan, meliejecjo m'a lhema apaioma apcanemacja Engiapom Neten, moc actema lhnac nanec na meliamolhma enenlhet'awoc ma'a. Adan coca apietquesammap ma'a malha niecje enenlhet aplhenammacpo lhta ewac 1 . 15 15 Meliejecjo nac Adan acuai'o aquientalhnema, coca mo'oc actema Engiapom Neten jengellaianco metca aquianmoma. Acuai'o nac apqueletsepma lhamacjo enenlhet lhmanquec jam aniem'o meliejecjo lhema apjapac enenlhet, Adan apuesai'a m'a. Coca Engiapom Neten na jengellaianco caselha metca aquianmoma altacmelquescamo nac nengellaniemjaicama nenlhamacjo aniem'o njan lhema enenlhet apuesai'a Jesucristo. 16 Jai', acuai'o nac nengetsepma lhmanquec jam aniem'o lhema enenlhet apquelanai'a ncolatsecama, coca acuai'o njan netlhewai'a metca aquianmoma aniem'o mantec enenlhet meliamolhma, apqueltemawec Engiapom Neten etnesquesancoc apquelpeiwomo. 17 Awesque lhta ntemac nengetsepma apiesecsec enenlhet'awoc aniem'o lhta lhema enenlhet apquelanai'a ncolatsecama, colhua coca ncoltemesquesec jata apquelientalhnemo apquellelto apquetlhewaicamoc alhnancoc apquellaniemjaicama, nema altemesquescama njan apquelpeiwomo metca aquianmoma aniem'o lhema enenlhet apuesai'a Jesucristo. 18 Lhennenga lhta aplhamacjo enenlhet'awoc apquetselhnanemmap aniem'o meijamolhma Adan, colhua coca neltemescaso apquelpeiwomo, apquetlhewai'o njan alhnancoc apquelliennactema aniem'o apquetsepma Jesucristo aquietemo ncoie'. 19 Lhema enenlhet alhta apmanie panque meliejecjo, jengeltemesquescamo njan ennenco'o mongeliamolhma, netamen na lhema apjapac apanque lhta njan enenlhet apqueliejecjo, jengeltemesquescamo njan ennenco'o nengelpeiwomo m'a. 20 Ca actemacja nac jenganemacja Moisés, nemo allaianco cacpota elpeiwesecjac enenlhet aquiawai'a nquec anmaicama meliamolhma, netamen niaweianque lhta meliamolhma, coca neten anque lhta nja ntemac aquiawecamoc apquellamelaiam Engiapom Neten. 21 Lhennenga lhta ntemenquec awesque mongeliamolhma apiesecsec enenlhet, acsoiacmo njan nengetsepma, colhua coca ntemac awesque jengamelaiam anac Engiapom Neten, jengeltemesquescamo njan nengelpeiwomo metca aquianmoma, cacpota njan jengellaianco aquiennactema ennengiec mancotnenwaianlha nnelha, aniem'o apuesque engancoc Jesucristo.

1Cristo era el que iba a llegar

Capítulo 6

Acmasquema acmowana maniamolhma tecjenlhet'oc
1 ¿Se lha atlheianma apualho'oc quetlhencap que, ntase nlho niecje angetlhenquesec nengellanecamoc la mongeliamolhma cacpota ncoiawancoc na jengellamelaiam Engiapom Neten, je? 2 ¡Mma'! Mmasquec jengenmanca maniamolhma, ncanec malha neletsepma ennenco'o lhemec Cristo, mancolatsema angelieplauquesec mocjom mongeliamolhma. 3 Cotlheianwacjo no apualho'oc quetlhencap necsa nema jengellauquesaicamoc alhta conne iemmen ma'a, malha neletsepmo lheme lhta ntemac Cristo. 4 Necsa lhta nema jengellauquesaicamoc conne iemmen, malha lhta nja ntemac nelcatonnammalhca lheme Cristo m'a, malha lhta njan neletsepma, ca acmasquemacja lhta njan jengenmaicama mongeliamolhma m'a, colhua coca enwanca'ac mota angellanacoc caselha altacmelo, nnawec ma'a Cristo aplhatecjanweiacmo lhta apiesecsec apquenmasquenwaiacmo aniem'o aquiawai'a apmopuana Engiapom Neten. 5 Lhta ntemac ma'a ennenco'o malha nengeletsepmo lhta lheme Cristo m'a, netamen antancocjac jata njan enjalhnanco'oc ma'a malha actemo lhta Cristo. 6 Nelliawec ennenco'o aluaneiam alhta engellualho'oc nquetsepmec lhemec ma'a Cristo aquieto neten iamet actennescama, mmasquec na jengenmanca maniamolhma. 7 Enenlhet apto la apquetsepmo lhemec Cristo, mmasquec acmanca maniamolhma, 8 nenlhamacjo nengellelto neletsepmo lhemec Cristo, jawe ngiapac anque jata ncotnec ma'a angelloca ta lheme Cristo. 9 Nelliawec ennenco'o apquetsepme lhta Cristo lhema actema nquec cacpota emasquescamoc acmowana maniamolhma, netamen ma'a nemo njan aclhatecjasqueiacmo, 10 mengietsepecjec jata mocjom ma'a ncanec mmasquec acmowana nengetsepma nac tacjaplhet ma'a, colhua coca aptenquescasecama mota apualhoc Engiapom Neten. 11 Ncotlheng apquellualho'oc quetlhencap malha apqueletsepmo lhemec Cristo, ca nqueniemai'ac mancollapuanquec mocjom eltemenwacjo lhma, wanlha coca apuanca'ac ellanancoc acleclemelha la apualhoc Engiapom Neten aniem'o apquelpasmecja m'a Cristo Jesús. 12 Ca ncanec na quetlhencap mellanquec nconmama mocjom maniamolhma, aliatenco la apualho'oc ellanancoc ncolatsecama. 13 Mellanquejec na mocjom apqueliocja nac ncollanescasancoc ncollatsecama, ncanec malha apqueletsepmo lhemec Cristo, mmasquec na anmanca maniamolhma nac, colhua coca nnancoc quetlhencap alhnancoc apquellaniemjaicama, ntasec ellancoc apqueliocja m'a Engiapom Neten cacpota ncoliennac apiempeioc ellanancoc caselha altacmelo. 14 Ca apquellanenco la m'a astacja lhque alheianma, mmasquec acno acmowana maniamolhma nac tacjaplhet'oc quetlhencap, mmasquec na apquellawa' coneng jenganemacja, colhua coca apquelloca coneng apquellamelaiam anac Engiapom Neten. 15 Jai', mmasquec nellawa coneng jenganemacja, colhua coca nelloca coneng jengamelaiam anac Engiapom Neten. ¿Ntase nlho niecje angellanancoc mocjom mongeliamolhma, je? ¡Ma', mancolatsemaja! 16 Apquelliawec quetlhengcap apquellelto nac esclavos apquelleliajacjawe mota apuesque apanco'oc, ca aptanco la awesque apanco'oc acuesai'a nac maniamolhma, eletsepoc jata quetlhencap ma'a, coca aptanco la apuesque apanco'oc Engiapom Neten, elloca ta nja mota apquellanecamoc caselha acpeiwomo. 17 Lhennenga lhta quetlhencap malha esclavos apquelleliejecjo lhta mota maniamolhma, colhua coca apuanca'a elleliejecjoc aniem'o la apquelpasmoma Engiapom Neten jengetlhecmoscama actacmanma apquetlhewai'a lhta. 18 Nne lhta alpaqnencasacjo maniamolhma quetlhencap, ca aptancocjo allasennaicama caselha acpeiwomo. 19 Coca nientelhec eliamwomjoc asquetlhecmoscama lhcaiec, ca nqueniemai'ac na atlhecmocsec asietquescama aspaioma m'a. Lhennenga lhta quetlhencap anmaicama maniamolhma nac, aliateianco lhta njan ellanancoc caselha acpaiseiam, caselha ncolatsecama metca apqueljalhionweianlha, colhua coca ntase ellancoc enmama Engiapom Neten cacpota apuanca'ac eluatesancoc meliamolhma, ellananco mota caselha altacmelo. 20 Lhennenga lhta quetlhencap malha esclavo ancoc maniamolhma nac, ma lhta ellasennaicama caselha acpeiwomo nac. 21 ¿Nqueltacmelquesquescanque nlho lhta apquellaniemjaicama quetlhencap aniem'o apquellanecamoc caselha jenmancascama nac, je? Ma, wanlha lhtoca acmajai'o nconnapoc, ncoliengieuquesec na Engiapom Neten. 22 Colhua coca nnenquec alpaqnencasecjo maniamolhma, aptancocjec apquellasennaicama Engiapom Neten, apuanquec na etepquesquesec eluanenquesquesec na aptaicamoc apqueliamolhma, cacpota ncolhnancoc na aliennactema apnengio'oc ncotnenwaianlha nnelha. 23 Maniamolhma nac nema aquiaqmoncasecja netsepma nac, coca Engiapom Neten na jengellancoc aliennactema ennengio'oc mancotnenwaianlha nnelha metca aquianmoma aniem'o apuesque engancoc Cristo Jesus.
Capítulo 7

1 Quetlhencap elialheng'a, apquelliawec jenganemacja nac nietnec acmowana tacjaplhet'oc apquellelto nac mocjom apjalhnanco'oc, coca apquelletsepo la'a, mmasquec na acmowana jenganemacja. 2 Ca actonac lhema nqueluana la apnema la atawa', malha nja ntac acnaqtetemmalhco lhemec atawa' la'a aniem'o jenganemacja, coca apquetsepo la atawa m'a, mmasquec na m'a malha actetema lhemec atawa aniem'o jenganemacja. 3 Coca apno la mocjom atawa, ncomecjac po'oc, ntewasquec atawa. Coca apquetsepo la atawa, mmasquec na acmowana tacjalhet jenganemacja m'a, awanquec ncotengiecjac po'oc atawa, jawe njan acuesai'a m'a actewascama la atawa. 4 Nnawec na quetlhencap ma'a elialheng'a, mamma acmowana jenganemacja tacjaplhet'oc ncanec malha apqueletsepmo lheme lhta Cristo, apto njan nema aclhatecjasqueiam apiesecsec apquenmasquenwaiacmo, colhua coca aptancocjac apquelpasmecjac Cristo, apuanca'ac na ellanancoc caselha acleclemelha la apualhoc Engiapom Neten. 5 Lhennenga lhta ennenco'o nengellaneianque mota caselha ncolatsecama, jengenmaicama lhta aliasponcomacja nac engellualho'oc, jengelliateianque lhta angellieca' jenganemacja, jengellaianco lhta njan nengetsepma. 6 Colhua coca mmasquec jennacteto m'a jenganemacja ennenco'o, ncanec malha neletsepmo lhemec Cristo, enwanca'ac angellasennama Engiapom Neten alhnancoc nentemacja, aniem'o njan jengelleltennasecamoc Apualhoc apanquec ma'a, jawe m'a nentaiancolha lhta lhennenga jengelleltennasecamoc alhta jenganemacja. 7 Nquetlheianmec quelha apualho'oc quetlhencap acto ncolatsecama jenganemacja nac, coca jawe niecje m'a, wanlha coca niecje jengascama caselha ncolatsecama m'a. Ma lhta angeliamoc secje lhta ennenco'o mancolatsecama atsepaicama nac ennengiec, coca acuai'o jenganemacja, lhta ntac jengellano': «Mellanamonque mota caselha nac alletsepaicamoc apnengio'oc» ca ntema mota m'a. 8 Nelleng'a ennenco'o jenganemacja nac, colhuawec anque lhta njan jengelliatencoc aliasponcomacja nac engellualho'oc cacpota ncoletsepoc ennengio'oc caselha cacpota njan angeliecac jenganemacja, coca mancoietno la jengellascama jenganemacja nac, manjengelliatanque na engellualho'oc aliasponcomacja nac cacpota njan mangelliequec na jenganemacja nac. 9 Lhennenga tep nac nanec mamma ennenco'o jenganemacja nac, netamen acuai'o m'a jengescamacja, ca actepo njan jengiatecamoc angeliecac ma'a aliasponcomacja nac engellualho'oc, 10 malha lhta nelletsepma ntemac ma'a. Ca jenganemacja nac mmajai'a lhta niecje jengellancoc nengelliennactema, coca nsoiacmec ma'a nengetsepma nac, 11 ncanec nellengai'a mota jengellascamacja nac, ca aliasponcomacja nac engellualho'oc jengelliatenquec angelliecac ma'a, netamen ma'a nlhenalhquec antequiewecjac ma'a. 12 Jai, jawe ngiapac anquec jenganemacja nac aniem'o Engiapom Neten, acpeiwomo m'a canjan actacmanma, aclheianma mota wanlha apqueltemacja mota antec Engiapom Neten. 13 Quelha ncotnec atlheianma apualho'oc quetlhencap jawe actacmelo jenganemacja nac ncanec nlhenquec anmatnecja aniem'o nellanai'a ncolatsecama , quelha ncotnec ma'a. Coca mancoietoc etnancoc ma'a, coca acto jengeliantemecja nengetsepmacja acuesai'a nac mongeliamolhma, acto njan jengeliatecamoc cacpota angellanancoc caselha ncolatsecama, jengeliecascama njan jenganemacja acto niecje njan actacmelo. Atlhenquesquecjo njan engellualho'oc mancolatsecama nquec ma'a maniamolhma nac. 14 Nengelliawec ennenco'o jenganemacja acto actacmelo, aniem'o nac Engiapom Neten, ennenco'o coca nengellelto nac mongeliamolhma, malha actonac esclavos nema aquiamasma la emoc po'oc apuesque acuesai'a m'a moniamolhma cacpota jengellasennama m'a. 15 Mangelliamoc ennenco'o nenmajai'awec niecje angellanancoc caselha actacmelo, coca netamen nellanenquec caselha ncolatsecama, manconmajai'a niecje angellanancoc ncolatsecama niecje neltacnoncoma m'a, nellanenquec coca. 16 Nquetlheianwacjec ennenco'o engellualho'oc jenganemacja acto actacmanma, nqueltawec angellanancoc acpeiwomo, coca ennenco'o mongapuanquec angelleliejecjoc ma'a. 17 Malha niecje jawe aniem'o ennenco'o nellanecamoc ncollatsecama, aniem'o coca jengeliatecamoc mangeliamolhma nac, 18 aliasponcomacja nac engellualho'oc jengelliatenquec angellanancoc caselha ncolatsecama, niecje mangelleltemo angellanancoc ma'a, coca nellanenquec ma'a. 19 20 Nenmac'awec niecje angellanancoc caselha altacmelo, coca mongellanencoc. Mang coca njan niecje nconmac'ac angellanancoc ncolatsecama, ncacjoc coca nellanenquec ma'a. Ca atlheianwacjo ennenco'o engellualhoc ma'a jawe ennenco'o nelleniemai'a, coca aniem'o m'a maniamolhma aquietnema ennenco'o engellualho'oc. 21 Jai', nenmac'awe niecje angellanancoc caselha altacmelo, nanquec coca moniamolhma engellualho'oc, 22 awanje niecje nellamelaiam jenganemacja nac Engiapom Neten, 23 coca engellualho'oc anac ennenco'o nnanquec jenganemacja ncoc maniamolhma nac, nquennapelhquec na jenganemacja apancoc anac Engiapom Neten, jengelliatenquec angellanancoc caselha ncolatsecama. 24 ¡Ennenco'o la ie, se lha jengelpaqnencasquesecja mongeliamolhma malha aquiennactema nquec jengenmaicamoc la'a! 25 Wanlha coca niecje Engiapom Neten apuanquec ma'a aniem'o njan apuesque engancoc Jesucristo, jai', ntase canquec ma'a, gracias Engiapom Neten. Nwacmec actacja nnelha jenque'e, jawe ngiapac anque nenmac'ac angelleliejecjoc jenganemacja Engiapom Neten, coca engellualho'oc anac acmaicama jenganemacja ancoc maniamolhma.
Capítulo 8

1 Colhua coca mamma nennactewasemmalhca nengellelto nac nempasmecja Cristo Jesus, 2 ncanec apmopuana 1 nac Apualhoc jengelpaqnencasecja acmowana 2 maniamolhma cacpota njan nengetsepma, jengellaianco njan nelliennactema aniem'o m'a Cristo Jesús. 3 Jenganemacja nac Moises mmajai'a lhta niecje jengelluonquesec tep, ma lhtoca ncomowanac ma'a aniem'o ennenco'o mangenmopuanca'a angelleliejecjojo ncanec ma lhta angellienna'ac cacpota njan mongeliamolhma. Ca nqueniemai'ac Engiapom Neten engiapacsec apquetca aptemesquesecjo enenlhet apanque, aptemenwai'o njan meiennactema m'a cacpota engietsepoc jengelliaqmoiecja ennenco'o, niecje aptemonwai'a enenlhet apanque, meiennactema njan, ncacjoc coca ntewascanquec maniamolhma nac. 4 Jengellaianco lhta njan nenmopuanca'a cacpota angelieplauquesec acpeiwomo nquec actemacja aclheianma jenganemacja, colhua coca enwanca'ac ncanec mmasquec jengenmanca m'a aliasponcomacja nac engellualho'oc, colhua coca jengenmama m'a Apualhoc. 5 Coca apquellelto nac anmaicama aliasponcomacja apquelualho'oc, wanlha mota atlheianma apualho'oc ellanancoc caselha ncolatsecama, coca apquellelto nac apquenmaicama njan Apualhoc, wanlha mota atlheianma apualho'oc ellanancoc apqueltemacja la ellanancoc ma'a. 6 Apquellelto nac apquellanecamoc caselha ncollatsecama, nnec aquiacmoncasacjo apqueletsepma, coca apquellelto la apquellanecamoc caselha acleclemelha nac apualhoc Espiritu, nnec aquiacmoncasacjo aliennactema apnengio'oc cacpota njan metca altaicama apualho'oc. 7 8 Apquellelto nac apquelieplauquescama aliasponcomacja nac apualho'oc, coca apqueluesai'a apquellammelhma Engiapom Neten, manconmac'ac na elleliejecjoc ma'a, mancollapuanca'ac najan, manconmac'ac na elleccasama apualhoc Engiapom Neten. 9 Coca apcacjanco la apualho'oc Espiritu apancoc Engiapom Neten, ntasec elieplauquesec ma'a. Coca metco la apualho'oc Espiritu apancoc Engiapom Neten, coca jawe Jesucristo apquenemolhema m'a. 10 Apno la Cristo apualho'oc quetlhengcap, nietnec na apualho'oc alhnancoc, nieplawawec na nema altemesquescama apquelpeiwomo, coca apqueliocja nac malha aletsepma aniem'o maniamolhma. 11 Apno la apualho'oc quetlhencap Espiritu apancoc Engiapom Neten apto lhta njan aptemescasecja apjalhnancoc Cristo Jesús, ellancoc jata m'a alhnancoc apqueliocja aniem'o m'a Espiritu apancoc Engiapom Neten apno apualho'oc quetlhencap, coca apqueliocja nac acmowana ncomasquenwomoc. 12 13 Mangelleliejecjec anquec jata aliasponcomacja nac engellualho'oc ncanec awanquec jangaqjec ma'a, coca neluatesanco la nellanecamoc caselha ncollatsecama aniem'o njan jengelpasmoma Apualhoc, angelloca ta ncotnenwaianlha nnelha. 14 Aplhamacjo apquellelto la apquenmaicama Engiapom Neten Apualhoc, coca apqueluesai'a Engiapom Neten apquetcac ma'a. 15 Metlhewancoc quetlhencap apualhoc anmajai'a nac ncoltemesquesec malha esclavos, ca njan altemesquescama nac apquellai'a mocjom, apquetlhewanquec coca Apualhoc apqueltemesquescama Engiapom Neten apquetcac, colhua coca apuanca'ac eltetescacjac Engiapom Neten, apuanca'ac na elpaqmetquesec nalhepe' apquelpaqmeiasma ellanjojo', etnancoc ellana': —Ta— 16 17 Ca Engiapom Neten Apualhoc anac apaqmetquesanquec engellualho'oc engancawe, jawe ngiapac anquec ennenco'o nac nengellelto Engiapom Neten apquetcac, angetlhewancoc jata lhemec Cristo aptemacja lhta apenescamo apaioma Engiapom Neten. Nengellelto la angetlhewancoc jata altacmanma m'a, nnawec na Cristo m'a elhcac jata, ncaimelhquec coca secjec angenmancoc tacja acuo'o la aquientalhnema nac ma'a, aptemo lhta njan Cristo.
Actacmelo caselha ncowac jata
18 Niecje nellengaianco quetsec aquientalhnema colhuawe nac, mancolhnoc awanjec jatoca m'a actacmanma angelloca m'a. 19 Awanjec alleleljalhanma caselha apquelentepquescama lhnac na nec, Engiapom Neten eltemescasecjac ma'a alientalhnemo apquellelo apquetcac. 20 Ca nema nac aliennaiancojo nconactewasalhca lhamacjo caselha nema alentepquescama, jawe aniem'o anco'oc ancawec, coca aniem'o m'a Engiapom Neten. Coca nietnenque mota njan aleljalhanma m'a 21 ncolhec jata aluoncaso tep necsa anmaicama acnactewascama, allacjaicama au'alho'oc najan, ca actemo nac ma'a Engiapom Neten apquetcac nemo nac alpaqnencasecjo anmama maniamolhma. 22 Ampai'o lhnac tep nac nanec allengaianco caselha nema alentepquescama nac, acuacmo nenwanlha nac allengaianco, allapenteicamoc malha nqueluana acmajai'a nac ncotenquesec atca'. 23 Nellapentenquec na ennenco'o, niecje aquietnema Espiritu apquelientemonquescamo lhta amanie' jengellaicamoc, ncacjoc coca awanjec nellengaianco nengelleljalhanma ncolhec jata jengeltemesquesacjo Engiapom Neten apquetcac aquiocjo ncoie', ncolhec jata njan jengelluoncaso tep enjapetec anac acmaicama nac maniamolhma. 24 Nengelluoncasemmalhquec tep necsa jengenmaicama nengetsepma ncanec nengellelejalhanme lhta m'a, colhua mancaimommalhcac mocjom angelleljalhnama nwaia'ac ma'a. 25 Coca ncaimommalhcac ma'a angelleljalhnama ncolhec jengelpaqnenquescasacjo enjapetec anac acmaicama maniamolhma, ncanec mancowac mocjom ma'a, ntasec angellailhec nelluascapma m'a. 26 Mongelliennactema ennenco'o, mangeliojoc na actemacja acpeiwomo nengenmalhnoncoma Engiapom Neten, coca Apualhoc jengelpasmac ma'a, apquelmalhnema apmalengioicama Engiapom Neten cacpota jengeltacmelquese mota m'a, mangeliojoc ennenco'o aptacja mota. 27 Apiawec coca Engiapom Neten alquetansema engellualho'oc, apiawec na apto apquenmalhnecama Espiritu Santo ncanec apquenmalhnema mota apmajai'acja la etnec Engiapom Neten apquellelto la Engiapom Neten apquennemolhema. 28 Nelliawec ennenco'o Engiapom Neten apquelpenescasawec lhamacjo caselha cacpota ncoltacmelquesec apquellaniemjaicama apquellelto nac apquellamelaicamaja, Engiapom Neten apquellawecama njan cacpota elieplauquesec na apquellanemacja la etnancoc ma'a. 29 Lhennenga coca apiamo Engiapom Neten apto ta apcawecama, apqueliequiescama njan cacpota ncowomoc jata malha aptema m'a apquetca apanque, coca apquetca apanque nac ma'a apto metno pquetcoc apiesecsec apentalhnacja apquelialheng'a. 30 Jai', lhennenga apqueliequiescama Engiapom Neten ma'a, netamen apquellaweianca njan, apqueltemesquescamo njan apquelpeiwomo, apqueltemesqueso njan neten apancawec apqueliaspommap ma'a. 31 ¡Ntasec anquec actemacja caselha nac ma'a! Apno la nengeqja Engiapom Neten, mamma njan enenlhet apmopuana la jengellammelhec. 32 Apqueltawe lhta Engiapom Neten engiancoc apquetca cacpota engietsepoc jengelliaqmoiecja ennenco'o, jawe ngiapac anque jengellancoc jata njan alaimommalhquelha la caselha ennenco'o. 33 Mamma apquetlhenammap la apquellelto nac Engiapom Neten apqueliequiescama, ncanec Engiapom Neten apto apqueltemesquescama apquelpeiwomo m'a, 34 mamma njan apnaqtewasemmap la m'a, ncanec apquetsepme Cristo Jesus apqueliaqmecja m'a, netamen aptaiecjo lhta njan mocjom apjalhnancoc, colhua coca apnec ma'a napocja aquiennacja Engiapom Neten, apqueltennasque mota apqueltemo elpasmoc ma'a. 35 Mamma caselha acmowana jengiengiauquesec nengasecjai'o Cristo, niecje nellengaianco aquientalhnema, niecje acmasca, nema jenmenlhenaicama, mec, metca netsecama, caselha nengai'o, nelletsepma nenmatnamojo, mamma caselha nac m'a acmowana jengiengieuquesec nengasecjai'o Cristo. 36 Ca ntac waccajac actalhesammalhca Engiapom Neten apaioma: «Aniem'o lheiap nelieplecama, nentequieuque mota, jengeltemescasquec malha nepquesec nema aquiantemecja ta aptequiomacja» 37 Coca nengelliepjonwacmec ma'a aniem'o jengelpasmoma Engiapom Neten apto njan jengamelaiam, 38 nengelliawec na ennenco'o acto jawe ngiapac anquec mamma caselha acmowana jengelliengiauquesec jengamelaiam Engiapom Neten, niecje nengetsepma, nengelliennactema, enenlhet neten, casecapo au'alho'oc, actacja nenwetai'a colhuawe nac, actacja ta emmanie nac, 39 mamma acmowana aniem'o neten anac cacpota njan conne anquec nalhepop anac, mamma caselha apquelentepquescama lhta Engiapom Neten, mancollawanquec na jengelliengieuquesec jengamelaiam Engiapom Neten aniem'o apuesque engancoc Cristo Jesus.

1Ley
2Ley

Capítulo 9

1 Jawe ngiapac anquec asmac'acja nac atnec alheianma, metca asmopuana ania'a ncanec moiasqueiam Cristo, canjan Espiritu Santo apmaicama mota aclhenaicama nac ewalhoc. 2 Awanjec anquec acmaiose ewalhoc, aslengaianco njan 3 actemacja asqueluetai'a aspaiomo lhema judios. Ewanquec niecje annancoc aquientalhnema acnemo m'a apquellengaianco apquelhacjanweian la Cristo, ntasec na niecje annancojo aquientalhnema nac ma'a cacpota alpasmoc elialheng'a judios. 4 Apquellelto aptawana'ac neptamen Israel ma'a, nnenquec na aliequiescamo m'a cacpota etnancoc Engiapom Neten apquetcac, apquetlhelhma'ac alhta mota aptaiancoc apquenmancolha la amai ma'a, apqueluetasquescanque lhta njan caselha monwetai'o, apquellaianco lhta njan lhema apaioma eltacmelquesquesec apquellaniemjaicama apquelleliajacjo la'a, apquellaianco lhta njan jenganemacja apancoc, apquetlhecmoseianco njan etnancoc eltacnescasancoc apuesai'a m'a, apquellaianco lhta njan alhnancoc apaioma acmac'ac jata ncotnec apquellaniemjaicama. 5 Apquellelto njan aptawana'ac neptamen nellieijengca'a judios aptaianco lhnac nanec neten apancawec, Cristo njan apto aptawana'ac neptamen ma'a, apnemo njan Engiapom Neten, aptec apuesque tacjalhet'oc caselha lhman quec jam. Jai', ntasec anquec antacnescasanco mota apuesai'a. Amen. 6 Malha niecje Engiapom Neten meieplauquescama la actemacja alhta apaioma ellancoc Israel, coca aniem'o m'a jawe aplhamacjo apquennemolhema Engiapom Neten. 7 Apquellelto aptawana'ac neptamen Abraham, jawe njan aplhamacjo apquennemolhema Engiapom Neten, lhnac nanec ptemac apcanemo Engiapom Neten Abraham: «Elentepoc jata aptawana'ac neptamen lheiap apquelleniem'o m'a apquetca Isaac» lhna aptemac ma'a. 8 Coca acuesai'a m'a, mancollapuanquec etnancoc Engiapom Neten apquetcac aniem'o m'a aptaicamoc judíos, nlho ca la njan po'oc enenlhet, wanlha coca aniem'o m'a apnescamo lhnac nanec apaioma Engiapom Neten, 9 lhnac nanec aptemac apcanemo Abraham: «Awatamoc jata mo'oc acnem cacpota ncotac atca aptawa lheiap Sara» lhna aptemac ma'a. 10 Lhnac nanec na ntemac Rebeca aluetai'o lhnac apcanet atcac ma'a, apqueliapom coca m'a Isaac nellieijenca. 11 12 13 Amanie lhnac nanec apquenmajai'a epallenmac m'a, mamma mocjom apquellanecamoc caselha ncolatsecama, nlho ca la actacmanma, coca Engiapom Neten apqueltennascanquec nac nanec Rebeca apselhiec engiasennama ta metno apquetcoc. Ca ntemac na actalhesammalhca waccajac Engiapom Neten apaioma: «Awanje scamelaiam Jacob aselhtec Esaú» lhna aptemac Engiapom Neten. Apuanquec Engiapom Neten apmac'acja la eliequiecsec enenlhet, ncacjoc meliamolhma la'a nlho ca la apiamolhma cacpota emacmesama apmac'acja la enmecsec apquellaneiojo. 14 Ncotlhenec quelha apualho'oc quetlhencap mancoietemo aptacja Engiapom Neten ma'a, jawe coca niecje m'a, 15 ncanec lhnac nanec ptemac apcanemo Engiapom Neten Moises: «Apiosec alanjoc enenlhet asmac'acja la aliequiecsec, asietnai'o njan napa'at enenlhet asmac'acja la aliequiecsec» lhna aptemac. 16 Apietnai'o panquec napa'at Engiapom Neten apmac'acja la etnesquesec enenlhet, jawe aniem'o enenlhet apmac'acja la etne panque, jawe njan aniem'o aptacmelcasemmacpo la'a napaqtec ma'a. 17 Lhnac nanec aptemac apcanemo Engiapom Neten apuesque Egipto: «Astemescasquec co lheiap apuesque cacpota aiengientac aquientalhnema tacjaplhet lheiap, cacpota ncotcama ania'a aquietnema asmopuana lhmanquec jam» lhnac nane aptemac. 18 Jai', jawe ngiapac anquec ma'a, apuanquec Engiapom Neten apmac'acja la etnejec, apquelietnawec napaqta'a moclhema enenlhet, po'oc enenlhet coca apqueliennaqtescasquec apualho'oc. 19 Jatelha ncotnec atlheianma apualho'oc quetlhencap: —Mancollapuanquec enenlhet enmancoc apmac'o la eliennactesquesec apualho'oc Engiapom Neten, ca ncanec na mancolatsama quelha Engiapom Neten ellancoc aquientalhnema aniem'o aliennactema apualho'oc ma'a— jatelha ncotnec atlheianma apualho'oc quetlhencap ma'a. 20 21 ¡Mancoieto ncotnancoc atlheianma apualho'oc quetlhencap ma'a! ncanec Engiapom Neten apuanquec elana apmac'acja la elana, jengellan'a lhta njan ennenco'o, mongapuanquec na annawescamoc ma'a. Malha acto nac ietanwalhua nac apquelanai'a, mancapuanquec enawacsec apto apquellanai'a, apuanque elanac lhema ietanwalhua actacmanma, po'oc na melatsecama, wanlha coca lhema apiaqjapescama nialpa apquelleniemai'a m'a. 1 22 Malha niecje la apmajai'a eluetasquesec aploma Engiapom Neten canjan apmopuana, apuascapma apquellailhema metca acpecjai'a ietanwalhua alietemo la apnactewasemmap. 23 Canjan apmac'ac eluetascasquesec aquiawai'a nquec apquellamelaiam ietanwalhua apquelpenescama lhta apquellanai'a lhennenga cacpota engiapiosec elanjojo. 24 Coca ietanwalhua nac ennenco'o niecje m'a nengellelto judíos cacpota njan metnanco nac judíos nenlhamacjo nengellelto jengellawecama Engiapom Neten. 25 Ca actemo nac na actalhesammalhcac waccajac Oseas: «Apquellelto mancotno asquennemolhema, atnec jata asquennemolhema, apquellelto metca allamelaiam, allamelemmac jata co'o m'a» 26 Ca ntemac na actalhesammalhca mo'oc: «Aquieto nac ma'a, lhna nnema actemo jawe asquennemolhema quetlhencap, coca aquieto nac ma'a jata njan etlhenacpoc apquetcac Engiapom Neten apto menietsepma» 2 27 Aplheianmec nac nanec na Isaias apqueltemacja apquennemolhema Israel, lhna aptemac: «Aplhanie panque aptawana'ac neptamen Israel malha niecje lhepop actec anac acjescama alhcaiam, coca aselhtec jata ncolhec aluoncaso tep. 28 Colhuawec jata Engiapom Neten etnec apsaujomo aptemacja apaioma aplheianma lhmanquec jam» 3 29 Lhnac nane na ptemac mocjom Isaias: « Lhta melaiacmo la moclhem'a enquetcac Apuesque acnema apmopuana, jennactewacsec nenlhamacjo ca actemo lhnac nanec Sodoma cacpota njan Gomorra» 4
Nema jengeltemesquescama negelpeiwomo aniem'o mongeliasqueiam
30 ¿Co la antemesquesec nenlheianma, je? Apquellelto nac metno judios metengiaiancoc etnancoc apquelpeiwomo, ncacjoc coca Engiapom Neten apqueltemesquescanque lhta apanque apquelpeiwomo aniem'o meliasqueiam ma'a. 31 Coca Israelitas aptengiaianque lhta mota etnancoc apquelpeiwomo aniem'o jenganemacja Moises, malhtoca eluetanweiacmoc ma'a, 32 ncanec wanlha coca apuanca'ac etnancoc apquelpeiwomo aniem'o meliasqueiam, jawe aniem'o jenganemacja nac Moisés. Malhtoca nconmajai'ac enmoc tacja jengetlhecmoscama nac, nqueliaseianque lhta lhma metaimong malha aquietnema la amai alpelaponquescamo cacpota eluomoc niecje apnacja Engiapom Neten. 33 Lhnac nane ntemac actalhesammalhca waccajac Engiapom Neten apaioma: «Aspeccanmec co lhema metaimong 5 aquieto iocjalhma Sion 6 , aplhaniec jata ncolpelaponquesec ma'a, coca meliascacmo la m'a, mancoliennenquesec jata m'a» lhna ntemac actalhesammalhca m'a.

1Un cantaro para honra y otro para deshonra
2Oseas 1:10
3Isaias 10:22-23
4Isaias 1:9
5Cristo es esa piedra
6Jerusalen

Capítulo 10

1 Quetlhengcap elialheng'a, awanje asqueltemo eluonquesec tep Engiapom Neten co israelitas, asquelelmalhnescasque mota Engiapom Neten ma'a. 2 Asiawec co'o awanjec niecje apquelleltemo ellasennama Engiapom Neten, coca meliojoc aptancolha aquietemo nquec la'a. 3 Aptengianque mota aptaicamoc apquelpeiwomo apanco'oc apancawec, mancomajai'ac eliecpelcoc apto wanlha Engiapom Neten apqueltemesquescama apquelpeiwomo, lhennenga actemacja aclhenaicama apualhoc etnejec ma'a, coca manconmajai'ac enmancoc tacja co israelitas. 4 5 Aplheianmec nac nanec Moises actemacja antec nempeiwomo aniem'o jenganemacja, lhnac nanec aptemac: «Enenlhet apto la apqueliejecjo jenganemacja nac, elloca ta mota aniem'o m'a jenganemacja nac» lhna aptemac ma'a. Coca nwaiacme nnelha m'a apuai'o Cristo, colhua coca apuanca'ac etnancoc apquelpeiwomo meliascacmo la m'a 6 Lhna nnema actemo antec nempeiwomo aniem'o moniasqueiam jenque'e: (CAMBIAR) «Molheng apualhoc sec la enenlhet engiacjac neten cacpota eiantementac nalhepop Cristo. 7 Molheng na apualhoc sec la enenlhet ewaiwentac malhec conne canque cacpota elecuacjac Cristo apiesecsec apqueletsepma» 1 lhna nnema actemo. 8 Ca ntemac na actalhesammalhca waccajac Engiapom Neten apaioma jenque'e: «Nengaqtec lheiap, aquieto apatong canjan apualhoc nietnac nema acpaioma aniem'o Engiapom Neten» 2 Jai', ca ania'a nac jentemesquescama mongiasqueiam nelpaiescamo nac ennenco'o, 9 enenlhet aplheno la Jesus apto Apuesque, mancoiascacmo la njan apualhoc aplhatecjanweiam apiesecsec apquemasquenwaiacmo aniem'o Engiapom Neten apmopuana, jata ewoncasacpoc tep enenlhet anac ma'a. 10 Jai, ncaimelhquec mancoiascamec apualhoc cacpota ncolhec actemesqueso apeiwomo, ncaimelhquec na etlhenec Jesus apto Apuesque cacpota ewoncasacpoc tep. 11 Ca ntemac actalhesammalhca waccajac Engiapom Neten apaioma: «Enenlhet apto la meiasqueiam Engiapom Neten, meiennenquesec jata njan ma'a» ntemac ma'a. 12 Coca aplhamacjo enenlhet'awoc ma'a, judíos cacpota njan metno judíos, apnawec po'oc napaqtec Engiapom Neten, apto Apuesque tacjaplhet'oc enenlhet'awoc lhmanquec jam, nema apquetsecama Engiapom Neten, nietnec lhema caselha cacpota engiancoc apto la apqueltaicama apuesai'a m'a. 13 Jai, aplhamacjo apquellelto la apquelleltaicama apqueluenecama apuesai'a m'a, eluoncasacpoc jata tep. 14 Coca meluenama ta m'a apquellelto la apqueliasqueiam, mancoujec na aptaicamoc la meliasqueiam melleng'o la m'a ania'a actacmanma aclhenammalhca apiesecsec ma'a, mellengiec jata njan ania'a actacmanma metco la enenlhet aplheianweiam apiesecsec ma'a, 15 15 mamma ta njan enenlhet emjancoc ma'a aplheianweiam ania'a metco la nema apascama. Ca ntemac na actalhesammalhca Engiapom Neten apaioma: «Ntasec anque ncotnec ma'a apqueluo'o la apquetsecama ania'a actacmanma» 3 ca ntemac. 16 Coca jawe aplhamacjo apquelleliejecjo ania'a actacmanma, lhna ntemac na actalhesammalhca waccajac Isaias: «Apuesque, apcanetec enenlhet aptaicamoc meliasqueiam actemacja netlheianma» lhna aptemac apsecama ania'a Isaias. 17 Amanie secjec ellailhoc ania'a actacmanma, netamen ma'a ncowac meliasqueiam Engiapom Neten apaioma. 18 ¿Ma nlho ellengai'a niecje ania'a, je? Mma', apquellengai'a niecje jawe ngiapac anquec aplhamacjo apancawec ania'a, ca actemo nac actalhesammalhca waccajac Engiapom Neten apaioma: «Ca apquelpaioma nac apquetsecama ania'a ntepquec lhamacjo eiempec, canjan actacja nnelha nquec lhepop nwacmec ania'a m'a» 4 19 ¿Ma nlho elianweiacmo co israelitas ma'a, je? ¡Mma', jawe ngiapac apquelianweiacme niecje! Lhnac nanec aptemac Moisés apmanie nque': «Atnesquesec jata jennatjaicama asquelioc mota po'oc temma meiaspommap anac, atnesquesec jata njan apqueloma jellanei'o po'oc temma metca apquelianweiacmo nac» 5 20 Lhnac na nec na aptemac Isaias metca apcai'a: «Jeluetacje lhta apquellelto nac manjelquetansema, asqueluetasquesalhque lhta njan ejenque' apquellelto nac mellelmalhnenwaiam alhma asuesai'a» 6 21 Coca lhnac nanec na aptemac Isaias apquetlheianmo aptaiancolha co Israelitas: «Squelpeiwesque niecje ejectengoc tacjaplhet temma nac enenlhet'awoc melleliejecjo nac canjan jellammelhaicama nac» lhna aptemac ma'a.

1Cristo ya bajó del cielo, murió y resucitó para salvarnos
2Deuteronomio 30:12-14
3Isaias 2:7 ; Nahum 1:15
4Salmos 19:4
5Duteronomio 32:21
6Isaias 65:1

Capítulo 11

1 ¿Apqueltacnonconque nlho Engiapom Neten apquennemolhema apanque Israel, je? ¡Ma', co'o njan asto israelita, asto njan aptawen neptamen Abraham, asqueniemai'o apqueliaquiaicamoc apquennemolhema Benjamin. 2 Tep nac nanec apqueliequiescamo Engiapom Neten Israelitas cacpota etnec apquennemolhema, man coca njan eltacnoncomac colhuawe nac. Cotlheianwacjo no apualho'oc quetlhengcap secama ania'a Elias apquetlheianmo lhnac nanec co Israelitas meliamolha napaqtec Engiapom Neten, lhna aptemac: 3 «Apuesque, apquennapeianquec apquetsecama ania'a apanco'oc lheiap ja'e, apnaqtewaseianquec na aluanlhenmalhquelha caselha nema acmescama nac lheiap, wanlha coca co'o asqueniem'o napaqtawec ma'a, colhua coca jelleliama apquenmajai'a jennapoc ma'a» lhna aptemac Elias. 4 Coca apcatemmoicama lhnac Engiapom Neten ma'a, lhna aptemac: «Asquelpocquenque co'o 7.000 enenlhet'awoc ma'a mellelteclheianco aptapno'oc naqte caselha aquiocja alanemmalhca acuesai'a Baal» lhna aptemac. 5 Nnawec na nenwanlha nac, apcacjanquec napocja pquetcoc judios apquellelto apqueliequiescama Engiapom Neten aniem'o apiamolhma apanque', 6 jawe aniem'o aptaiancolha apancawec la'a. Ca apqueliequieso la Engiapom Neten enenlhet'awoc aniem'o aptaiancolha apancawec la'a, mmasquec ma'a apqueliequieso aniem'o apiamolhma apanquec ma'a. 7 Ca ntemac na colhuawe nac co israelitas, niecje aptengiaicamoc apquelleltemo eltacmelquesquesec apquellaniemjaicama Engiapom Neten, coca meluetanweiacmoc ma'a, wanlha coca apqanetec apqueluetanweiam ma'a, apquellelto nac apqueliequiescama Engiapom Neten. Aplhamacja coca nnenquec aliennactesquescamo apualho'oc. 8 Ca actemo nac aclheianma actalhesammalhca waccajac Engiapom Neten apaioma: «Apqueltemescasquec Engiapom Neten malha tenn allapecama apualho'oc, malha njan meluetai'a lhma la apaqto'oc, malha mellengai'a lhma njan apaico'oc, acuacmo nenwanlha nac» lhna aptemac. 9 Lhnac na nec na aptemac apuesque David: «Ncotnecjac jata malha aljanemmalhca allanquemmalhca ncolatsecama apanco'oc anac, cacpota njan aljanemmalhca tama cacpota ncolpalesemmac aniem'o aliaqmoncasecja ncawe meliamolhma apanco'oc apancawe'. 10 Ncolhec jata njan altemesqueso metca apaqto'oc, etnesques jata aljalhema apcapo'oc aniem'o aquientalhnema apquelpatama» 1 lhnac ptemac. 11 Smac'ac alelmalhnama colhuawe nac ¿Wanlha nlho ta ncotnec apnaicamoc nalhepop judíos apquellelto lhta apquellelpelapeiam, je? ¡Ma, elaqnecjac jata neten! Coca apquellelto lhta apalleiam ma'a cacpota ncotnesquesec jata apqueluoncasemmap tep metnanco nac judíos, cacpota eliasepquesec judíos ma'a. 12 Ca cno la altacmelquescaso apquellaniemjaicama metno judios anac aniem'o melleliejecjo judíos cacpota njan apalleiam, tep anquec jata ncotnec altacmanma apquellaniemjaicama metnanco judíos acuo'o ta acnem Engiapom Neten apquenmecjo tacja m'a judíos. 13 ¡Ellailho no quetlhencap metno judios, co'o asto apostol jeiapascama Engiapom Neten cacpota apaiacsec ania'a actacmanma apiesecsec quetlhencap, awanjec anquec ascai'o asmacmecama nac, 14 asqueltawec co'o aspaiomo lhema nac ennatjama quetlhencap, netamen jata njan jelquetmoc niecje cacpota atlhecmocsec ancoc apqueluoncasemmap tep ma'a. 15 Apquenmanquec tacja Engiapom Neten metno judios aniem'o apqueltaqnonwecja judios apancawe nac, netamen jata m'a apquenmocjo la tacja Engiapom Neten judios apancawe nac, neten anquec jata ncotnec altacmallueiam apquellaniemjaicama aplhamacjo enenlhet'awoc lhmanquec jam, ncolhec jata njan acnaqlhatecjascacmo mocjom apiesecsec apquenmasquenwaiacmo. 16 Ca apmaiaie nac pan apquelenteiapma nema acmescama Engiapom Neten ma'a, nnawec ma'a nema aquiaqjapescama nac harina apto njan nema acmescama. Ca aicapmen'oc la iamet nema acmescama Engiapom Neten, nnawec na m'a actengoc anac nema acmescama njan. 17 Apquellelto nac judíos malha actengoc anac iamet acuesai'a olivo, moclhem'a coca nnemac aliaqtemanmo m'a, ca acno lhta aliepetquescaiacmo quetlhencap ma'a metnanco nac judios, malha actengoc apquelleniem'o m'a mo'oc iamet olivo amjama nalhma.Colhua coca nietnec aliennactema m'a aniem'o alpetsesma iemmen aicapmen'oc cacpota njan aieiwo'oc ma'a iamet anac. 18 Coca melacponcoie', melluannama njan quetlhencap actengoc alhta aliaqtemenammalhca, ncanec quetlhencap jawe apquelliennactema apancawoie', coca aniem'o m'a aicapmen'oc lhec ma'a. 19 Quelha ncotnec atlheianma apualho'oc quetlhencap jeng: —Nnenquec jengeliepetquescaiacmo m'a alanmacja lhta niecje actengoc lhennenga aniem'o quelha nengellelto nengeliamolhma—quelha ncotnec atlheianma apualho'oc quetlhencap. 20 Coca ellajo ta quetlhencap ma'a, apqueliaqtemenammacpe lhta malha acteng'oc alhta lhennenga aniem'o aliasqueiam, ca acno aliepetquescacmo njan quetlhencap ma'a aniemai'o njan meliasqueiam, coca apquelacpo la quetlhencap, 21 menmecjec jata njan tacja Engiapom Neten ma'a, etlhojoc jata njan ma'a malha actengoc alhta lhennenga nema aliaqtemanma lhta. 22 Jai', Engiapom Neten apto apiamolhma apanque', apqueltacmelcasquec na apquellaniemjaicama quetlhencap metnanco nac judios, apto njan apiaqmoncasecja apqueltemacja melleliejecjo lhta judios. Coca apqueliengiacjo la aptaicamoc meliasqueiam quetlhencap ma'a, ncolhec jata njan aliaqtemenwactamo m'a. 23 Coca aptancocjo ta mocjom meliasqueiam judios apancawe nac, eliepetquescacjac jata mocjom iamet olivo alanmacja lhta, apuanquec coca Engiapom Neten etnec ma'a. 24 Quetlhencap apquellelto nac metno judíos, malha lhta actengoc olivo aniem'o nalhma, Engiapom Neten alhta apqueliaqtemanwacmoc ma'a, apqueliepetquescactamo iamet olivo anammalhca nac natemma aniem'o lhta njan apmopuana, apuanque panquec jata njan eliepetquescacjac mocjom actengoc alanmacja lhta lhennenga, iamet olivo anammalhca natemma. 25 Quetlhengcap elialheng'a metnanco nac judíos, melacpo nquec ncotlhenec apualho'oc apqueliequiescama Engiapom Neten aniem'o nema apqueliamo apancawe', jawe m'a. Nietne lhta apenescamo Engiapom Neten aquielhammalhca apmac'acja etnejec, napocja israelitas nqueliennacuaiacme lhta apualho'oc acuacmo toca acnem ma'a aptaicamoc meliasqueiam aplhamacjo nac metnanco nac judios. 26 Netamen eluoncasacpoc jata tep aplhamacjo apquellelto nac israelitas. Ca actemo nac actalhesammalhca waccajac Engiapom Neten apaioma jenque'e: «Na temma Sion engiengiemac jata apqueluonquescama tep cacpota eiengiescasecjac ncollatsecama Jacob. 2 27 Coca asto ascanemacja etnancoc cacpota njan atnec co'o, anmasquesquesec jata meliamolhma apquellanecamoc» 28 Ellailhono quetlhengcap metnanco nac judios, mantec israelitas colhuawe nac apquellelto apquellammelhecja ania'a actacmanma nenwanlha nac, coca nqueltacmelcasquesacjec apquellaniemjaicama quetlhengcap ma'a, coca apquellamelacmec mocjom Engiapom Neten ma'a israelitas ncanec apqueliequiescama lhta apquelieijenca neptamna'ac, 29 apquellaweianca lhta njan, apquellaianco njan metca aquianmoma caselhaja, metca apquenmasuecja njan, meluancacmoc na apquellelto lhta apquellawecama. 30 31 Lhennenga lhta quetlhencap metnanco nac judios ma lhta elleliejecjoc Engiapom Neten, apquelietnai'awec coca napaqta'ac quetlhencap Engiapom Neten aniem'o m'a melleliejecjoc apquennemolhema apancawe, netamen jata njan ma'a elietnajoc napaqta'a apquennemolhema apancoie', ca aptaianco nac na apquellanei'o quetlhencap. 32 Engiapom Neten apqueltemesquescama aplhamacjo melleliejecjo m'a cacpota netamen mocjom ma'a elietnajoc napaqta'a aplhamacjo nac ma'a. 33 Neten apanquec aquietnema apianweiacmo Engiapom Neten, apiecpelquemo njan lhamacjo caselha, mongapuanquec ennenco'o angeliamwomjoc alquetamecama apualhoc ma'a cacpota njan apquellanai'a caselhaja. 34 Mamma njan enenlhet eijoc aquietnaicama la apaqtec, mancapuanquec na enenlhet eltennasancoc ma'a. 35 Mamma njan enenlhet apcaicamoc caselha apancoc ma'a cacpota njan aptacjesquescamo la caselha apancoc ma'a. 36 Ncanec Engiapom Neten apto apquellanai'a lhamacjo caselha lhmanquec jam, apanco'oc apancawec ma'a, apquellaicamoc na aliennactema m'a caselha lhta apquelentepquescama cacpota ncollocaja. Jai', ntasec ma'a ncolhec actacnescasencoc apuesai'a lhma nquec jam. Amen.

1Salmos 69:22-23
2El pueblo de Israel

Capítulo 12

1 Quetlhencap elialheng'a, awanjec anquec apqueltacmelquesquescama apquellaniemjaicama Engiapom Neten, ntasec elpocquenec ellasennama mota apuanlha apanquec ma'a, ellanancoc na caselha acleclemelha la mota apualhoc ma'a, coca acto aquietemo nquec eltacnescasancoc apuesai'a m'a. 2 Metnamonquec aptaiancolha nac meliamo nac Engiapom Neten, amanie nquec ncaimelhcac eliaqmoncasecjac mo'oc atlhenaicama apualho'oc, netamen ncowac jata njan ma'a malha aquiaqmoiecja na mo'oc apquellaniemjaicama, netamen jata njan ma'a ncowac apquelianweiacmo apquellanemacja etnancoc Engiapom Neten, caselha altacmelo, acleclemo enwalhoc, caselha acpeiwomo njan. 3 Jeiamelaiacmec co'o Engiapom neten, jeianque lhta asientalhnemo cacpota alleltennasancoc quetlhencap, motlhenama nquec apualho'oc apquellelto neten apancawec melhnemo m'a po'oc, ntasec coca elhnesoc mo'oc atlhenaicama apualho'oc metca aliecammalhca, acnancolha la acuanlha meliasqueiam aniem'o apquellaicamoc alhta Engiapom Neten. 4 Nengiocja nac nlhaniec atlhelhma'ac, moclhem'a nquellana mota anmacmecama mancolhnemo mo'oc allanei'o caselha. 5 Nnawec na ennenco'o niecje nenlhamacma, coca nenlhamacjo nengellelto nengelpasmecja aniem'o Cristo, nentancocjec malha lhema nengiocja. 6 Jengellamelaiam Engiapom Neten, jengellanquec lhta alpalhcammalhca nenmopuanca'a nenmacmecama. Enenlhet apto lhta aplhewai'a apmopuana eltennama aniem'o Engiapom Neten, ntasec eltennama acuanlha la njan meiasqueiam aplhewai'a. 7 Enenlhet apto lhta aplhewai'a apmopuana etnec nema asennaicama, ntasec etnec actacmanma apmacmecama. Apto lhta njan aplhewai'a apmopuana etlhecmocsec, ntasec eieplauquesec ma'a. 8 Enenlhet apto lhta njan aplhewai'a apmopuana eiatecjoc po'oc, ntasec na eieplauquesec ma'a. Enenlhet apto la jengaianco ngiapom caselha apancoc, ntasec etnec metca apquenmeiauquesammacpo panque' caselhaja. Enenlhet apto lhta njan aplhewai'a apmopuana la malha apuesque, ntasec etnec apiamo, aptacmelquescamo njan. Apto lhta njan aplhewai'a apmopuana epasmoc apquellelto nac metca apquelletsecama, ntasec etnec acpaijecja mota apualhoc ma'a.
Nengelleltammalhquelha antancoc
9 Ellamelacpo metca apqueliennenquescama po'oc, eltacnewa' caselha ncolatsecama, ellelieplauques coca mota ellanancoc caselha altacmelo. 10 Ellamelacpo' pancawe apiesecsec quetlhengcap malha acto nac apquennemolhema apancawe nac, ellajo po'oc, ellelientemoncaso njan apmanie po'oc caselhaja. 11 Metnamoc apqueljalhemmap ellanancoc caselhaja, eliennecjo coca mota, elluascap jata njan ellasennama apuesque engancoc. 12 Colpaijecja ta mota apualho'oc aniem'o acto jawe ngiapac anquec eluonquesec jata tep quetlhencap Engiapom Neten. Necsa apquelluetai'a la aquientalhnema, elleljalhen jata metca apquelpecjescama apquelleltemo elpasmoc Engiapom Neten, elelmalhna ta mota metca nnelha m'a. 13 Etnamo ta mota apquenmajai'o elpasmoc engellialheng'a metca nac apquelletsecama, enmamoc jata mota tacja amaica'a apancoc la'a. 14 Meliematquesanquec apquellelto nac apquenmenlhenaicama quetlhencap, ntasec coca eltacmelquesec ma'a. 15 15 Colpaijecjo ta lhemec apualho'c apquellelto la alpaijecja apualho'oc, eliapqalh jata njan lheme' apquellelto la apiapqalhema. 16 Elienlhanmamoc jata njan ellanancoc metca acmasca apiesecsec quetlhencap, metnamo nquec apquellammacpo eltemescasentac coneng metca nac apquelletsecama, ntasec coca elpasmecjac ma'a, metnamo nquec apquetlhenammacpo apancawec nema apquelianweiacmo. 17 Nnec jata nquec acnaqtewaso quetlhencap, meliaqmoncasecja ncoie', ntasec coca elienlhanmanco mota eltoc ncoltacmelec apquellaniemjaicama po'oc. 18 Etengiamoc coca apiempeioc apquennawesammap cacpota ncowac metca acmasca apiesecsec anac quetlhencap. 19 Quetlhencap elialheng'a, meliaqmoncasecja nquec meliamolhma apquellanei'o po'oc, Engiapom Neten jatoca eliaqmoncasquesecjac aptaiancolha meliamolhma m'a. Lhnac nanec aptemac Engiapom neten: «Co'o ta aietquesquesec apqueltemacja meliamolhma, aiaqmoncasecjac jata njan aptacja m'a» lhna aptemac Apuesque. 20 Mec jata nquec ncaqjac apcammelhmacja lheiap, engiamoc jata aptoma m'a, acnem jata nque ncaqjac, engiamoc jata njan iemmen ma'a, netamen ecposama ta napa'at ma'a aniem'o apmancanwecja» 21 Mengianco nquec ncotnescasenta coneng maniamolhma nac, ntasec coca etnescasentac coneng lheiap ma'a aniem'o caselha altacmelo apquelanai'a lheiap.
Capítulo 13

Ntasec angellajoc apqueluescai'e
1 Elleliejecjo ta m'a apquelientalhnemo nac, ncanec Engiapom Neten apqueltemesquescama. 2 Ca melleliajacjo la m'a, melleliejecjec jata njan Engiapom Neten quetlhencap ma'a, netamen ncolhec jata njan aliaqmoncasacjo m'a. 3 Ca apquelientalhnemo nac mancoieto engiagac enenlhet apquellanai'a la actacmelo caselha, coca engiagac ma'a apquellanai'a nac caselha ncolatsecama. Ca apquelan'o la lheiap caselha altacmelo, mancoitec jata njan apcai'a apquelientalhnemo nac, etlhenama ta mota apto apiamolhma lheiap ma'a. 4 Ca apquelientalhnemo nac apquellasennaicama Engiapom Neten cacpota ncotacmelec apcaniemjaicama lheiap ma'a, coca metacmelcasacpo la lheiap, netamen ncoiepleujoc jata apcai'a ncanec nnanquec apquenmopuanca'a eiaqmoncasecjac jata metacmelcasecpo la lheiap. 5 Jai, coca nietawec anquec ma'a angelleliejecjoc apquelientalhnemo nac cacpota mancolhec jengeliaqmoncasquesacjo aniem'o mongeliamolhma, cacpota njan mancoitec atlheianwecjo engellualho'oc caselha ncolatsecama la nellanai'a. 6 Jai', apquelientalhnemo nac apquellasennnaicama mota Engiapom Neten ma'a, ca ncanec na ntasec elianmonquesec quetlhencap impuesto. 7 Ellamoc jata moclhem'a aquietelha la m'a impuesto ancoc cacpota njan actengiammalhquelha la mota pataccom mo'oc la nengianmonquescamacja, elleliejejo ta m'a, ellajo ta njan. 8 Mangcoliet apqueliaqmoicamoc po'oc, ellamelemma mota po'oc, ca apquelanenco la mota quetlhencap ma'a, coca acto acsaujomo nquec apquelieplauquescama lhamacjo jenganemacja. 9 Ca ntac moclhema jenganemacja aisecsec anac jenque'e: «Meiennenques anquec aptawa', mengiaqja po'oc, memenielh, mancotsep apnengiec caselha apanco'oc po'oc» Coca acto lhamacjo aisecsec jenganemacja nac anquesecjac aquiepjonweiacmo actemescasecja malha lhema, ca ntac jenque'e: «Eniamelemma po'oc malha acto nac apcamelammacpo panque nac lheiap» 10 Enenlhet apto la apcamelaiam po'oc, apsaujawec apieplauquescama lhamacjo jenganemacja m'a, ncanec mamma nquec na aptewascamo la po'oc. 11 Colhua coca nenwanlha nac najan acto neten anquec aquiaspommalhca, ampai'o lhta secjec anquec mongeliasqueiam Jesus acuacmo nenwanlha nac, quetsec anquec na ncaimelhcac nengelluoncasemmalhquelha ta tep, quetlhencap coca malha apnaqteianma aptancoc ¡Enaqlhatecjamoc coca! 12 Ncanquetua'c ncotsac jata, mmac'a ncotiepoc acnem, eluatesamoc apquellanecamoc caselha alleniem'o ienactesacja lhma, ntasec coca ellanancoc caselha alleniem'o nac atsac'elha lhma. 13 Coca elloca m'a malha atsac'elha lhma nac, ellanamoc caselha altacmelo. Melpasenwom anquec mellescama etawancoc aptecamoc, mellescama nac einancoc anmen, menmensanwomanque lhma, mellanamonquec na caselha ncollatsecama, metca apquennapommap najan, metca njan apiasepquescaiam caselha apanco'oc la po'oc. 14 Alpeiwecja coca etnamoc, elleliejecjoc coca mota Apuesque engancoc Jesucristo, mellanco nquec nconmama altacja la apualho'oc aliasponcomacja nac.
Capítulo 14

1 Enmamoc jata tacja engelialheng'a mancoliennactema nac meliasqueiam mocjom, mellatemmongap pancoie' aclhamacjo actemacja aptancolha la'a. 2 Moclhem'a nquetlhenque mota apualho'oc ntasec anto'oc lhamacjo caselha, coca apquellelto nac mancolliennactema meliasqueiam nquetlhenque apualho'oc ntasec etawancoc wanlha aquielhna aniem'o aniep. 3 Apquellelto nac apqueltaseiama lhma melleltamonquec melianweiacmo apquellelto nac metecamoc aclhamacjo caselhaja. Coca apquellelto nac meltaseiamana lhma, melpaiesamanquec apqueluesai'a m'a apquellelto nac aptecamoc lhamacjo caselhaja ncanec apquenmec na tacja Engiapom Neten enenlhet'awoc anac ma'a. 4 Mancoietoc eliemetcasama quetlhencap ncotno apquenmacmesaicama, coca apuesque apanco'oc anac ma'a apuanquec etlhenec ncolatsecama apquenmacmecama nlho ca la actacmanma, coca ntasec jata ncotnec apquenmacmecama m'a aniem'o apasmoma apuesque apancoc. 5 Moclhem'a quetlhencap nquetlhenque mota apualho'oc lhema acnem acto neten anquec aquiaspommalhca mancolhoc ma'a mo'oc la acnem, coca napocja nquetlhenque mota apualho'oc mamma acnem acto neten anquec aquiaspommalhca la'a, coca nietawec etnancoc aliacuanlha la ntasec etnancoc ma'a. 6 Apquellelto nac apquelpocquenquescama lhema acnem anque cacpota eltacnescasancoc Apuesque, aptengiaicamoc mota apquellai'o m'a. Apquellelto nac na apqueltaseiama lhma, aptengiaicamoc na mota apquellai'o Apuesque cacpota njan etnancoc gracias Engiapom Neten. Apquellelto nac meltaseiama lhma, aptengiaicamoc na m'a apquellai'acja la'a Apuesque cacpota njan etnancoc gracias Engiapom Neten ma'a. 7 Mamma ennenco'o enlhema la enganco'oc engancawe nelaniemjaicama nac, mamma njan ennenco'o enganco'oc engancawec neletsepma nac. 8 Nentaicamoc la enjalhnanco'oc anac mocjom ma'a, ancoc ma'a nengai'o Apuesque. Neletsepo la njan, ancoc na m'a nengai'o Apuesque. Nentanco la enjalhnancoc mocjom, nlho ca la neletsepo la'a, coca apto Apuesque apanco'oc ennenco'o m'a, 9 ncanec apquetsepque lhta Cristo cacpota njan aplhatecjanwacme lhta apiesecsec apquenmasquenwaiacmo, aptaiecjo njan apuesque tacjaplhet'oc apquellelto nac apquelletsepma cacpota njan apjalhnanco'oc. 10 Ca ncanec quetlhencap meliemetcasama, melleltanquec na melianweiacmo apquelialheng'a ncanec Engiapom Neten jata jengelliepelcoc ennenco'o nenlhamacjo neluacjo ta napaqtec ma'a. 11 Ca actemo nac actalhesammalhca waccajac Engiapom Neten apaioma: «Lhna aptemac apuesque, elteclhencoc jata aptapno'oc nejaqtec co'o aplhamacjo enenlhet'awoc lhmanquec jam, jeltacnescasancoc jata njan asuesai'a, jawe ngiapac anquec astacja nac alheianma» 1 lhna aptemac. 12 Jai, nenlhamacjo ta ennenco'o angetlhenec nentaiancolha engancawe napaqtec Engiapom Neten ma'a, 13 ca ncanec mongetlhenama apqueluesai'a emo'oc, ntasec na montenquesec emmo'oc, monnactewacsec na m'a cacpota mancoujec apqueluatesaicamoc meliasqueiam ma'a. 14 Moiasqueiacmoc co'o apuesque engancoc Jesus, asiawe co'o mamma ncolatsecama nentoma la napaqtec Engiapom Neten 2 , coca moclhem'a engelialheng'a quelha atlheno la apualho'oc mancolatsecama anto'oc mantomacja la'a, ntasec etnancoc apancawec ma'a. 15 Ellailho no, ca apquellauquescacmo la po'oc quetlhencap aniem'o m'a aptecamoc metoiancolha nac apquellascama, coca jawe acuesai'a nengamelaiam emmo'oc ma'a ncanec apquellamelacmec na Cristo m'a engelialheng'a nac, apquetsepque lhta njan apqueliaqmoiecja m'a. Metawamonquec na aptecamoc napaqtawec ma'a cacpota ncoliasanco lhma ncanec nconnatjacsec jata m'a, eluatesancoc jata njan aptaicamoc meliasqueiam. 16 Netamen eliemetcasecjac jata quetlhencap ma'a ncanec apuanca'ac etawancoc lhamacjo caselha m'a. 17 Napaqtec Engiapom Neten mamma lhema la nentoma acto neten anquec aquiaspommalhca, cacpota njan nengiama la'a, coca acto neten anquec aquiaspommalhca m'a antengiancoc nentaicamoc nelpeiwomo, metca altaicama enwalhoc cacpota njan acpaijecja enwalhoc aniem'o Espíritu Santo. 18 Enenlhet apto la apquelanai'a lhamacjo caselha nac coca apto apiamolhma apcasennaicama Engiapom Neten, nlecawec apualhoc ma'a, enmancoc na tacja enenlhet'awoc ma'a. 19 Jai', angellanancoc jata lhamacjo nque nac cacpota ncowac metca altaicama engellualho'oc cacpota njan ncowanamoc lhamacjo caselha enganco'oc. 20 Menactewes actemacja apquelpasmommacpo apquellanemacja eltejec Engiapom Neten apiesecsec quetlhencap aniem'o aptecamoc apquetlheianma. Lhamacjo nentoma nac allelto alalhnai'o napaqtec Engiapom Neten, coca mancolatsema m'a etawancoc napaqtawec apquelialheng'a lhema nentoma la acmowana ncolietnocjasquesec apualho'oc apquelueto la'a ncanec ncoluaiwentac quelha meliasqueiam. 21 Ca ncanec ntasec metawanquec apetec la'a, meinanquec na vino, mellanamoc caselha acmowana nac ncolietnocjasquesec apualho'oc apquelialheng'a napaqtawec ma'a. 22 Ca meiascacmo la lheiap apuanquec etuoc lhamacjo actemacja aptoma, ntasec actacja la aclheianma apualhoc lheiap napaqtec Engiapom Neten. ¡Apquelengiemawec enenlhet apquelanai'a caselha mancotuasquescama aclheianma apualhoc netamen! 23 Coca aptawo la apanquec aptoma alpeiwecja aclheianma apualhoc mancolatsecama nlho ca la ntasec, eipetcasancoc najan, coca aptewasecpe panquec apancoc apanquec ncanec meieplaucasac meiasqueiam ma'a, mancolatsema m'a.

1Isaías 45:23
2Los judios pensaban que algunas comidas ensuciaban el corazon de las personas delante de Dios.

Capítulo 15

1 Nengellelto nac aliennactema mongeliasqueiam Engiapom Neten mancolatsema mota antengiancoc nenmac'acja la antancoc, ntasec coca enmancoc tacja apquenmac'acja la njan etnancoc ncoliennactema nac meliasqueiam Engiapom Neten. 2 Ntasec coca antengiancoc ncollecoc na apualho'oc emmo'oc, angellanac na actacmelo caselha cacpota njan ncotnec nempasmecja nenlhamacjo acuanecamoc. 3 Ca aptemacja lhta mota Cristo metengiaiac ncolhec aquiaspenca apancoc apanque, ca actemo nac actalhesammalhca waccajac Engiapom Neten apaioma: «Nteiacme lhta tecjelhet co'o aptaqnommap lheiap» 1 4 Lhamacjo actemacja nac actalhesammalhca Engiapom Neten apaioma cacpota jengetlhecmocsec ennenco'o, acpaiescaiam enwalho'oc, jentemesquescama njan metca nempecjescama, jengaicamoc na aljalhnecama enwalho'oc. 5 Asqueltawec co'o Engiapom Neten apto ngiapom metca nenpecjescama nac, canja m'a acpaiescaiam enwalhoc, elpasmoc quetlhencap cacpota elloca lhemec acnemo mo'oc apualho'oc, aptemacja lhta mota njan Cristo Jesús. 6 Netamen na aplhamacjo apqueltacnescasecamoc Engiapom Neten apuesai'a, apto apiapom apuesque engancoc Jesucristo. 7 Jai, ntase enmanco mota tacja po'oc quetlhencap, aptemacja lhta Cristo apquenmanque lhta tacja njan quetlhencap. Netamen ma'a eltacnescasancoc jata aplhamacjo apuesai'a Engiapom Neten ma'a. 8 Asmac'ac aleltennacsec quetlhencap lhema caselha, apuai'a lhta Cristo cacpota etnec apquellasennaicama apquellelto nac judíos, apieplauquescamo njan aptemacja lhnac nanec apenescamo apaioma Engiapom Neten aplheianma apquelleltennascamo nellieijenca'a cacpota eluetasquesec na iocjalhmec anquec aplheianmo lhnac nanec Engiapom Neten. 9 Apuai'a lhta njan m'a cacpota elietnajoc na napaqta'a metnanco nac judios cacpota eltacnescasancoc Engiapom Neten apuesai'a. Ca actemo nac actalhesammalhca waccajac Engiapom Neten apaioma jenque'e: «Alhenec jata apuesai'a lheiap napaqtawec metnanco nac judios, annecmacsec jata apuesai'a lheiap» lhna nnema actemo m'a. 10 Ca ntemac mocjom actalhesammalhca jenque'e: «Colpaijecjo apualho'oc metnanco judíos apquelpasmecja njan Engiapom Neten apquennemolhema apancawe nac» 11 Ca ntemac na mo'oc actalhesammalhca jenque'e: «Eltacnescasamoc apuesai'a Engiapom Neten lhamacjo apquellawacja cacpota njan lhamacjo temma lhmanquec jam» lhna nnema actemo m'a. 12 Lhnac nanec na aptemac secama ania'a Isaias: «Etnenwomoc jata apuesque aptawen neptamen 2 3 lhna aptemac Isaias. 13 13 Jai, Engiapom Neten apto aljalhnecama enwalho'oc angiapom ellancoc jata alpaijecja apualho'oc cacpota njan metca acmasca apquellaniemjaicama apquellelto nac meliasqueiam apuesai'a m'a, ellanescasancoc jata njan apualho'oc aleljalhnecama aniem'o Espiritu Santo apmopuana.
Aplheianma Pablo actemacja apmacmecama apancoc
14 Quetlhencap elialheng'a', asiawe co'o apqueliamolhma apancawec quetlhencap, apuanca'ac na elleltennasancoc po'oc. 15 Ncacjoc coca asnaqtalhesquescanque ejenquec waccajac anac cacpota ncotlhenquesquescacjoc apualho'oc actemacja apqueltacmelcasemmacpo la'a. Ewanquec co'o alleltennasancoc quetlhencap aniem'o jeiamelaiam Engiapom Neten, jeliequiescama njan 16 cacpota njan atnec jeiasennaicama Cristo Jesus, apaiacsec na ania'a actacmanma apiesecsec ma'a metnanco nac judios cacpota njan eltancoc apquelpoccanma Engiapom Neten, malha nema acmescama nac apiasponcomacja la Engiapom Neten, aniem'o Espíritu apancoc. 17 Ntasec ncalhcoc ewalhoc aniem'o jeiasennaicama Engiapom Neten, ncanec Cristo Jesús jeiaicamoc asiennactema cacpota amacmama. 18 Jawe ejencoc ejenquec asiennactema, Cristo jepasmoma ca asquetsauquescamo lhta asquetlhecmoscama metnanco nac judios cacpota ncowac na apquelleliejecjoc Engiapom Neten ma'a. Asquetlhecmosque lhta njan acnema acmowana asqueliatecama canjan asquelanai'a lhta caselha 19 caselha jempelapquescama, caselha monwetai'o njan aniem'o Engiapom Neten Apualhoc. Aspaiesque lhta ania'a actacmanma lhamacjo apquellawacja asquempai'o lhta Jerusalen acuacmo iocjalhma Iliria. 20 Wanlha lhta mota asmaianco metquelha la nema acpaiescamacja ania'a actacmanma, ma lhta amajai'ac aipetquescamoc asmacmecama nemacja la acpaiescamacja ania'a actacmanma. 21 Asieplauquescanque lhta actemacja nac aclheianma Engiapom Neten apaioma, ca actemo nac jenque'e: «Apquellelto nac metca nema acpaiescama ania'a apuesai'a apiesecsec ma'a, eluetac jata m'a. Apquellelto nac na mellengai'a ania'a apuesai'a m'a, elianwomjoc jatoca » ca ntemac ma'a.
Apmajai'a emjancoc Pablo aquieto Roma
22 23 Elialheng'a, lhennenga asmajai'a angiantac jam astaicama la amaica'a, mancoca amopuanac aniem'o lhta aspaiescama ania'a actacmanma metquelha nac nema acpaiescama ania'a apiesecsec ma'a. Colhua coca asaujoquiec asmacmecama m'a, ntasec jata angiantac jam 24 asmeiacjo ta España, necsa alhengama ta nalhet amai jatelha atnec amaica'a quetlhencap jam, aquiacuatacjo toca, ncopaijecja ta njan ewalhoc apiesecsec anac jam, asqueltawe niecje njan jelpasmoc jellancoc caselha apanco'oc aimelhquelha la co'o cacpota anwempecjoc jatelha mocjom alhengama m'a. 25 Coca colhuawe nac asmac'ac angiacjac Jerusalén cacpota aletsacjesec pataccom elialheng'a m'a. 26 Apquellanquesec alhta anmajai'a nquec apualho'oc elialheng'a metnanco nac judíos apcacjanco m'a iocjalhma Macedonia capota njan Acaya, cacpota ellapasquesec ma'a elialheng'a judíos metca apquelletsecama aquieto m'a Jerusalén. 27 Anmajai'o nque lhta apualho'oc ellanquesecja pataccom anac, ntasec aptaianco m'a ncanec malha apqueliaqmoncasecja apquellanconwaiam alhta ania'a actacmanma elialheng'a judíos apancawec nac. 28 Jata asquellanconwacjo ta pataccom m'a, asqueltawec angiacjac España, necsa alhengama nalhet amai jatelha atnec amaica'a quetlhencap jam, 29 angelpasmecjac jata lhemec lhamacjo caselha actacmanma jengellaicamoc alhta Cristo, jawe ngiapac anquec ma'a. 30 Elialheng'a, aquieplomo apuesai'a apuesque engancoc Jesucristo cacpota njan Espiritu apto ngiapom jengamelaiam, asqueltawec jelpasmecja jelelmalhnesquesec Engiapom Neten 31 jengio'oc cacpota manjenaqtewacsec apquellelto nac apqueliasqueiam apcacjanco m'a Judea, cacpota ncolpaijecjac apualho'oc apquetlhewanco ta caselha nac metca aquianmoma engellialheng'a' co Jerusalen. 32 Netamen jata m'a, apquelto la Engiapom Neten, angiacjac jatelha apiesecsec quetlhencap jam astaicama la amaica'a, aquieplomo acpaijecja telha njan ewalhoc, aiamposalhcac jatelha njan quetsec jam. 33 Jai, asqueltawec co'o Engiapom Neten apto ngiapom metca acmasca, etnancoc jata mota njan apquetlhelhma'ac moclhem'a quetlhencap jam. Amen.

1Salmos69:9
2La raíz de Jesé /f* Jese tacjaplhet'oc lhamacjo apquellawacja, ncoitec jata aleljalhnecama apualho'oc aplhamacjo enenlhet'awoc aniem'o apuesque nac»
3Isaías 11:10

Capítulo 16

1 Asmac'ac aleltennacsec lhema aspaioma, enmamoc jata tacja engialheng Febe acto nema asennaicama 1 mota apiesecsec Jesucristo apquennemolhema m'a aquieto na natemma Cencreas, 2 eltacmelcaso ta apquellanei'o aptaiancolha na mota apiesecsec Engiapom Neten apquennemolhema ellanjoc po'oc, ellamoc jata aimelhquelha la'a caselha m'a ncanec aplhanie mota alpasmoma enenlhet'awoc ma'a acuacjo lhta njan co lha'. 3 Ascapasquec na aclheianma ewalhoc Priscila cacpota njan Aquila, jelpasmoma lhta necsa asqueltennaicama ania'a actacmanma aplhenammap Cristo Jesus, 4 niecje alletlhenquescama ncotequio'oc aniem'o lhta anmajai'a jeluonquesec tep ma'a, gracia njan co squeltemac ma'a, gracias na aptaiancoc engellialheng'a metnanco nac judios. 5 Cacpota njan ascapasquec aclheianma ewalhoc engelialheng'a apcaqnecjelha na mota aquieto acjaiancolha nquec ma'a. Ca njan nlhenquec ewalhoc stema emo'oc ascamelaianlha apuesai'a Epeneto, apto lhta apmanie apanquec meiasqueiam ania'a actacmanma aplhenammap Jesús apiesecsec enenlhet aquieto m'a iocjalhma Asia. 6 Nlhenquec na ewalhoc Maria, awanje lhta acmacmecama cacpota ncoltacmelec apquellaniemjaicama quetlhencap jam. 7 Nlhenquec na ewalhoc aspaioma lheme Andronico cacpota njan Junias, allelto lhta amania ie ncawec ncoliasqueiam Jesus, alhaiec coca co'o, asnactemommalhco lhta njan lhemec co m'a, awanjec anque lhta njan apquelleliejecjo mota apostoles ma'a. 8 Nlhenquec na ewalhoc astema eialheng aniem'o Engiapom Neten, Ampliato apuesai'a. 9 Nlhenquec na ewalhoc Urbano, apto njan netlhelhma'ac nenmacmesaicama Cristo, cacpota njan nlhenquec ewalhoc ascamelaianlha Estaquis. 10 Nlhenquec na ewalhoc Apeles, aplhenammacpo lhta mota apto jawe ngiapac anquec meiasqueiam Cristo, nlhenquec na ewalhoc apquennemolhema apanquec Aristobulo. 11 Nlhenquec na ewalhoc aspaioma lheme' Herodion cacpota njan apquennemolhema apanquec Narciso, apquellelto nac meliasqueiam Apuesque. 12 Nlhenquec na ewalhoc Trifena cacpota njan Trifosa, awanje canque lhta anmacmesaicama Apuesque, nlhenquec na ewalhoc eialheng Perside, awanjec anque lhta acmacmesaicama Apuesque m'a. 13 Nlhenquec na ewalhoc Rufo, apto lhta apqueliequiescama Apuesque, ca njan nquen acto m'a malha meme ejencoc. 14 Nlhenquec na ewalhoc Asincrito, Flegonte, Hermes, Patrobas, Hermas cacpota njan engellialheng'a apcacjanco lhemec ma'a. 15 Asmac'ac na ncolhenec ewalhoc Filologo, Julia, Nereo cacpota njan apialheng nqueluana. Nlhenquec na ewalhoc Olimpas cacpota njan aplhamacjo Jesucristo apquennemolhem'a apcacjanco lhemec ma'a. 16 Elpaiwesacpo ta apancawec apiesecsec quetlhencap jam aquieplomo apquelpetsesammap apmalhempenoc apquelialheng'a, ca apquellapasac na atlheianma apualho'oc jam aplhamacjo apquellelto nac meliasqueiam apquelloma nac jenque'e. 17 Quetlhencap elialheng'a', ellajo ta mota enenlhet'awoc anac apquenmajai'a la elhpanquesec, apquenmajai'o nac na eliepconec jam, apquenmajai'a njan ellammelhec nema atlhecmoscama lhta apquetlhewai'a quetlhencap. ¡Melpalhcama ncoie'! 18 Ncanec jawe apquellasennaicama apuesque engancoc Cristo m'a enenlhet'awoc anac, wanlha aptengiaicamo mota anmajai'elha la apualho'oc apanco'oc apancawec, apqueltacmelcasawe mota apquelpaqmetquesaicama apquellelto nac melianweiacmo cacpota elliennenquesec ma'a. 19 Coca aplhamacjo enenlhet apqueluet'ac quetlhencap apquellelto apquelleliejecjo apuesque engancoc, awanjec anquec apquelpaiesecja ewalhoc. ¡Etnamoc jata mota nema apqueliamo elieplauquesec caselha altacmelo nac, meltamoc coca m'a nema apqueliamo elieplauquesec caselha ncolatsecama nac. 20 Quetse ncaimelhca Engiapom Neten apto metca acmasca ngiapom etnescasecja coneng awesque queliacjamei'o acmowana cacpota elteianmancoc quetlhencap ma'a. Jai', asqueltawec co'o ellamelemma apuesque engancoc Jesucristo quetlhencap, etnanco ta mota njan apquetlhelhma'ac ma'a. 21 Nlhenquec na apualhoc quetlhencap alhelhma nac apuesai'a Timoteo, nquetlhenquec na apualho'oc jenque'e aspaiomo lhema nac apqueluesai'a Lucio, Jason cacpota njan Sosipatro. 22 Co'o njan Tercio, asto astalhesquescama waccajac anac aptacja la aplheianma Pablo, nlhenquec na ewalhoc quetlhencap jam apquellelto nac jengellasennaicama lhemec Apuesque engancoc. 23 24 Nlhenquec na apualhoc quetlhencap jenque'e Gayo apto apnemacja asnema, apcaqnecjelha nja mota engelialheng'a jenque'e. Nlhenquec na apualhoc quetlhencap apto apqueltacmelquescama pataccom apquellawacja nac jenque'e apuesai'a Erasto, ca njan apcapasac aclheianma apualhoc jenque'e engialheng anac apuesai'a Cuarto. 25 Angeltacnescasancoc jata ennenco'o Engiapom Neten apto apmopuana jengelliennactecsec, ca actemacja nac asquetlhecmoscama ania'a actacmanma aplhemammap Jesucristo. Lhennenga tep nac na nec apenescamo lhema caselha Engiapom Neten apmac'acja ta etnec, malha aposcama coca ntemac, 26 colhua coca aplecuacje jengeluetascasquec najan, apquetlheianmec nac nane mota apquelletsecama ania'a nnenga. ¡Jai! Engiapom Neten apto mengietsepmac aplecuacjec colhua jengeluetascasque alhnacjo ncoie apmajai'acja lhta etnejec cacpota elleliejecjoc, meliascamec najan enenlhet'awoc lhmanquec jam. 27 ¡Ntasec angeltacnescasancoc jata mota metca nnelha apuesai'a Engiapom Neten apto acnema apiamo, wanlha njan apto lhema apjapac apuesque engancoc aniem'o Jesucristo. Amen!

1Diaconisa